໗. ສຕ຺ຕກນິທ຺ເທໂສ

(໑) ສຕ຺ຕານຸສຍາ

໙໔໙. ຕຕ຺ຖ ກຕເມ ສຕ຺ຕານຸສຍາ? ກາມຣາຄານຸສໂຍ, ປຏິຆານຸສໂຍ, ມານານຸສໂຍ, ທິຏ຺ຐານຸສໂຍ, ວິຈິກິຈ຺ຉານຸສໂຍ, ຠວຣາຄານຸສໂຍ, ອວິຊ຺ຊານຸສໂຍ – ອິເມ ສຕ຺ຕ ອນຸສຍາ.

(໒) ສຕ຺ຕ ສໍໂຍຊນານິ

ຕຕ຺ຖ ກຕມານິ ສຕ຺ຕ ສໍໂຍຊນານິ? ກາມຣາຄສໍໂຍຊນໍ, ປຏິຆສໍໂຍຊນໍ, ມານສໍໂຍຊນໍ, ທິຏ຺ຐິສໍໂຍຊນໍ, ວິຈິກິຈ຺ຉາສໍໂຍຊນໍ, ຠວຣາຄສໍໂຍຊນໍ, ອວິຊ຺ຊາສໍໂຍຊນໍ – ອິມານິ ສຕ຺ຕ ສໍໂຍຊນານິ.

(໓) ສຕ຺ຕ ປຣິຍຸຏ຺ຐານານິ

ຕຕ຺ຖ ກຕມານິ ສຕ຺ຕ ປຣິຍຸຏ຺ຐານານິ? ກາມຣາຄປຣິຍຸຏ຺ຐານໍ, ປຏິຆປຣິຍຸຏ຺ຐານໍ, ມານປຣິຍຸຏ຺ຐານໍ, ທິຏ຺ຐິປຣິຍຸຏ຺ຐານໍ, ວິຈິກິຈ຺ຉາປຣິຍຸຏ຺ຐານໍ, ຠວຣາຄປຣິຍຸຏ຺ຐານໍ, ອວິຊ຺ຊາປຣິຍຸຏ຺ຐານໍ – ອິມານິ ສຕ຺ຕ ປຣິຍຸຏ຺ຐານານິ.

(໔) ສຕ຺ຕ ອສທ຺ຘມ຺ມາ

໙໕໐. ຕຕ຺ຖ ກຕເມ ສຕ຺ຕ ອສທ຺ຘມ຺ມາ? ອສ຺ສທ຺ໂຘ ໂຫຕິ, ອຫິຣິໂກ ໂຫຕິ, ອໂນຕ຺ຕປ຺ປີ ໂຫຕິ, ອປ຺ປສ຺ສຸໂຕ ໂຫຕິ, ກຸສີໂຕ ໂຫຕິ, ມຸຏ຺ຐສ຺ສຕີ ໂຫຕິ, ທຸປ຺ປຎ຺ໂຎ ໂຫຕິ – ອິເມ ສຕ຺ຕ ອສທ຺ຘມ຺ມາ.

(໕) ສຕ຺ຕ ທຸຈ຺ຈຣິຕານິ

ຕຕ຺ຖ ກຕມານິ ສຕ຺ຕ ທຸຈ຺ຈຣິຕານິ? ປາຓາຕິປາໂຕ, ອທິນ຺ນາທານໍ, ກາເມສຸມິຈ຺ຉາຈາໂຣ, ມຸສາວາໂທ, ປິສຸຓາ ວາຈາ, ຜຣຸສາ ວາຈາ, ສມ຺ຜປ຺ປລາໂປ – ອິມານິ ສຕ຺ຕ ທຸຈ຺ຈຣິຕານິ.

(໖) ສຕ຺ຕ ມານາ

ຕຕ຺ຖ ກຕເມ ສຕ຺ຕ ມານາ? ມາໂນ, ອຕິມາໂນ, ມານາຕິມາໂນ, ໂອມາໂນ, ອຘິມາໂນ, ອສ຺ມິມາໂນ, ມິຈ຺ຉາມາໂນ – ອິເມ ສຕ຺ຕ ມານາ.

(໗) ສຕ຺ຕ ທິຏ຺ຐິໂຍ

໙໕໑. (ກ) ຕຕ຺ຖ ກຕມາ ສຕ຺ຕ ທິຏ຺ຐິໂຍ? ອິເຘກຈ຺ໂຈ ສມໂຓ ວາ ພ຺ຣາຫ຺ມໂຓ ວາ ເອວໍວາທີ ໂຫຕິ ເອວໍທິຏ຺ຐິ – ‘‘ຍໂຕ ໂຂ, ໂຠ, ອຍໍ ອຕ຺ຕາ ຣູປີ ຈາຕຸມຫາຠູຕິໂກ [ຈາຕຸມ຺ມຫາຠູຕິໂກ (ສີ. ສ຺ຍາ.)] ມາຕາເປຕ຺ຕິກສມ຺ຠໂວ ກາຍສ຺ສ ເຠທາ ອຸຈ຺ຉິຊ຺ຊຕິ ວິນສ຺ສຕິ ນ ໂຫຕິ ປຣໍ ມຣຓາ, ເອຕ຺ຕາວຕາ ໂຂ ໂຠ, ອຍໍ ອຕ຺ຕາ ສມ຺ມາ ສມຸຈ຺ຉິນ຺ໂນ ໂຫຕີ’’ຕິ. ອິຕ຺ເຖເກ ສໂຕ ສຕ຺ຕສ຺ສ ອຸຈ຺ເຉທໍ ວິນາສໍ ວິຠວໍ ປຎ຺ຎເປນ຺ຕິ.

(ຂ) ຕມຎ຺ໂຎ ເອວມາຫ – ‘‘ອຕ຺ຖິ ໂຂ, ໂຠ, ເອໂສ ອຕ຺ຕາ ຍໍ ຕ຺ວໍ ວເທສິ. ‘ເນໂສ ນຕ຺ຖີ’ຕິ ວທາມິ. ໂນ ຈ ໂຂ, ໂຠ, ອຍໍ ອຕ຺ຕາ ເອຕ຺ຕາວຕາ ສມ຺ມາ ສມຸຈ຺ຉິນ຺ໂນ ໂຫຕິ. ອຕ຺ຖິ ໂຂ ໂຠ ອຎ຺ໂຎ ອຕ຺ຕາ ທິພ຺ໂພ ຣູປີ ກາມາວຈໂຣ ກພຬີກາຣຠກ຺ໂຂ. ຕໍ ຕ຺ວໍ ນ ຊານາສິ ນ ປສ຺ສສິ. ຕມຫໍ ຊານາມິ ປສ຺ສາມິ. ໂສ ໂຂ, ໂຠ, ອຕ຺ຕາ ຍໂຕ ກາຍສ຺ສ ເຠທາ ອຸຈ຺ຉິຊ຺ຊຕິ ວິນສ຺ສຕິ ນ ໂຫຕິ ປຣໍ ມຣຓາ, ເອຕ຺ຕາວຕາ ໂຂ, ໂຠ, ອຍໍ ອຕ຺ຕາ ສມ຺ມາສມຸຈ຺ຉິນ຺ໂນ ໂຫຕີ’’ຕິ. ອິຕ຺ເຖເກ ສໂຕ ສຕ຺ຕສ຺ສ ອຸຈ຺ເຉທໍ ວິນາສໍ ວິຠວໍ ປຎ຺ຎເປນ຺ຕິ.

(ຄ) ຕມຎ຺ໂຎ ເອວມາຫ – ‘‘ອຕ຺ຖິ ໂຂ, ໂຠ, ເອໂສ ອຕ຺ຕາ ຍໍ ຕ຺ວໍ ວເທສິ. ‘ເນໂສ ນຕ຺ຖີ’ຕິ ວທາມິ. ໂນ ຈ ໂຂ, ໂຠ, ອຍໍ ອຕ຺ຕາ ເອຕ຺ຕາວຕາ ສມ຺ມາ ສມຸຈ຺ຉິນ຺ໂນ ໂຫຕິ. ອຕ຺ຖິ ໂຂ, ໂຠ, ອຎ຺ໂຎ ອຕ຺ຕາ ທິພ຺ໂພ ຣູປີ ມໂນມໂຍ ສພ຺ພງ຺ຄປຈ຺ຈງ຺ຄີ ອຫີນິນ຺ທ຺ຣິໂຍ. ຕໍ ຕ຺ວໍ ນ ຊານາສິ ນ ປສ຺ສສິ. ຕມຫໍ ຊານາມິ ປສ຺ສາມິ. ໂສ ໂຂ, ໂຠ, ອຕ຺ຕາ ຍໂຕ ກາຍສ຺ສ ເຠທາ ອຸຈ຺ຉິຊ຺ຊຕິ ວິນສ຺ສຕິ ນ ໂຫຕິ ປຣໍ ມຣຓາ, ເອຕ຺ຕາວຕາ ໂຂ, ໂຠ, ອຍໍ ອຕ຺ຕາ ສມ຺ມາ ສມຸຈ຺ຉິນ຺ໂນ ໂຫຕີ’’ຕິ. ອິຕ຺ເຖເກ ສໂຕ ສຕ຺ຕສ຺ສ ອຸຈ຺ເຉທໍ ວິນາສໍ ວິຠວໍ ປຎ຺ຎເປນ຺ຕິ.

(ຆ) ຕມຎ຺ໂຎ ເອວມາຫ – ‘‘ອຕ຺ຖິ ໂຂ, ໂຠ, ເອໂສ ອຕ຺ຕາ ຍໍ ຕ຺ວໍ ວເທສິ. ‘ເນໂສ ນຕ຺ຖີ’ຕິ ວທາມິ. ໂນ ຈ ໂຂ, ໂຠ, ອຍໍ ອຕ຺ຕາ ເອຕ຺ຕາວຕາ ສມ຺ມາ ສມຸຈ຺ຉິນ຺ໂນ ໂຫຕິ. ອຕ຺ຖິ ໂຂ, ໂຠ, ອຎ຺ໂຎ ອຕ຺ຕາ ສພ຺ພໂສ ຣູປສຎ຺ຎານໍ ສມຕິກ຺ກມາ ປຏິຆສຎ຺ຎານໍ ອຕ຺ຖງ຺ຄມາ ນານຕ຺ຕສຎ຺ຎານໍ ອມນສິກາຣາ ອນນ຺ໂຕ ອາກາໂສຕິ ອາກາສານຎ຺ຈາຍຕນູປໂຄ. ຕໍ ຕ຺ວໍ ນ ຊານາສິ ນ ປສ຺ສສິ. ຕມຫໍ ຊານາມິ ປສ຺ສາມິ. ໂສ ໂຂ, ໂຠ, ອຕ຺ຕາ ຍໂຕ ກາຍສ຺ສ ເຠທາ ອຸຈ຺ຉິຊ຺ຊຕິ ວິນສ຺ສຕິ ນ ໂຫຕິ ປຣໍ ມຣຓາ, ເອຕ຺ຕາວຕາ ໂຂ, ໂຠ, ອຍໍ ອຕ຺ຕາ ສມ຺ມາ ສມຸຈ຺ຉິນ຺ໂນ ໂຫຕີ’’ຕິ. ອິຕ຺ເຖເກ ສໂຕ ສຕ຺ຕສ຺ສ ອຸຈ຺ເຉທໍ ວິນາສໍ ວິຠວໍ ປຎ຺ຎເປນ຺ຕິ.

(ງ) ຕມຎ຺ໂຎ ເອວມາຫ – ‘‘ອຕ຺ຖິ ໂຂ, ໂຠ, ເອໂສ ອຕ຺ຕາ ຍໍ ຕ຺ວໍ ວເທສິ. ‘ເນໂສ ນຕ຺ຖີ’ຕິ ວທາມິ. ໂນ ຈ ໂຂ, ໂຠ, ອຍໍ ອຕ຺ຕາ ເອຕ຺ຕາວຕາ ສມ຺ມາ ສມຸຈ຺ຉິນ຺ໂນ ໂຫຕິ. ອຕ຺ຖິ ໂຂ, ໂຠ, ອຎ຺ໂຎ ອຕ຺ຕາ ສພ຺ພໂສ ອາກາສານຎ຺ຈາຍຕນໍ ສມຕິກ຺ກມ຺ມ ອນນ຺ຕໍ ວິຎ຺ຎາຓນ຺ຕິ ວິຎ຺ຎາຓຎ຺ຈາຍຕນູປໂຄ. ຕໍ ຕ຺ວໍ ນ ຊານາສິ ນ ປສ຺ສສິ. ຕມຫໍ ຊານາມິ ປສ຺ສາມິ. ໂສ ໂຂ, ໂຠ, ອຕ຺ຕາ ຍໂຕ ກາຍສ຺ສ ເຠທາ ອຸຈ຺ຉິຊ຺ຊຕິ ວິນສ຺ສຕິ ນ ໂຫຕິ ປຣໍ ມຣຓາ, ເອຕ຺ຕາວຕາ ໂຂ, ໂຠ, ອຍໍ ອຕ຺ຕາ ສມ຺ມາ ສມຸຈ຺ຉິນ຺ໂນ ໂຫຕີ’’ຕິ. ອິຕ຺ເຖເກ ສໂຕ ສຕ຺ຕສ຺ສ ອຸຈ຺ເຉທໍ ວິນາສໍ ວິຠວໍ ປຎ຺ຎເປນ຺ຕິ.

(ຈ) ຕມຎ຺ໂຎ ເອວມາຫ – ‘‘ອຕ຺ຖິ ໂຂ, ໂຠ, ເອໂສ ອຕ຺ຕາ ຍໍ ຕ຺ວໍ ວເທສິ. ‘ເນໂສ ນຕ຺ຖີ’ຕິ ວທາມິ. ໂນ ຈ ໂຂ, ໂຠ, ອຍໍ ອຕ຺ຕາ ເອຕ຺ຕາວຕາ ສມ຺ມາ ສມຸຈ຺ຉິນ຺ໂນ ໂຫຕິ. ອຕ຺ຖິ ໂຂ, ໂຠ, ອຎ຺ໂຎ ອຕ຺ຕາ ສພ຺ພໂສ ວິຎ຺ຎາຓຎ຺ຈາຍຕນໍ ສມຕິກ຺ກມ຺ມ ນຕ຺ຖິ ກິຎ຺ຈີຕິ ອາກິຎ຺ຈຎ຺ຎາຍຕນູປໂຄ. ຕໍ ຕ຺ວໍ ນ ຊານາສິ ນ ປສ຺ສສິ. ຕມຫໍ ຊານາມິ ປສ຺ສາມິ. ໂສ ໂຂ, ໂຠ, ອຕ຺ຕາ ຍໂຕ ກາຍສ຺ສ ເຠທາ ອຸຈ຺ຉິຊ຺ຊຕິ ວິນສ຺ສຕິ ນ ໂຫຕິ ປຣໍ ມຣຓາ, ເອຕ຺ຕາວຕາ ໂຂ, ໂຠ, ອຍໍ ອຕ຺ຕາ ສມ຺ມາ ສມຸຈ຺ຉິນ຺ໂນ ໂຫຕີ’’ຕິ. ອິຕ຺ເຖເກ ສໂຕ ສຕ຺ຕສ຺ສ ອຸຈ຺ເຉທໍ ວິນາສໍ ວິຠວໍ ປຎ຺ຎເປນ຺ຕິ.

(ຉ) ຕມຎ຺ໂຎ ເອວມາຫ – ‘‘ອຕ຺ຖິ ໂຂ ປນ ເອໂສ ອຕ຺ຕາ ຍໍ ຕ຺ວໍ ວເທສິ. ‘ເນໂສ ນຕ຺ຖີ’ຕິ ວທາມິ. ໂນ ຈ ໂຂ, ໂຠ, ອຍໍ ອຕ຺ຕາ ເອຕ຺ຕາວຕາ ສມ຺ມາ ສມຸຈ຺ຉິນ຺ໂນ ໂຫຕິ. ອຕ຺ຖິ ໂຂ, ໂຠ, ອຎ຺ໂຎ ອຕ຺ຕາ ສພ຺ພໂສ ອາກິຎ຺ຈຎ຺ຎາຍຕນໍ ສມຕິກ຺ກມ຺ມ ເນວສຎ຺ຎານາສຎ຺ຎາຍຕນູປໂຄ. ຕໍ ຕ຺ວໍ ນ ຊານາສິ ນ ປສ຺ສສິ. ຕມຫໍ ຊານາມິ ປສ຺ສາມິ. ໂສ ໂຂ, ໂຠ, ອຕ຺ຕາ ຍໂຕ ກາຍສ຺ສ ເຠທາ ອຸຈ຺ຉິຊ຺ຊຕິ ວິນສ຺ສຕິ ນ ໂຫຕິ ປຣໍ ມຣຓາ, ເອຕ຺ຕາວຕາ ໂຂ, ໂຠ, ອຍໍ ອຕ຺ຕາ ສມ຺ມາ ສມຸຈ຺ຉິນ຺ໂນ ໂຫຕີ’’ຕິ. ອິຕ຺ເຖເກ ສໂຕ ສຕ຺ຕສ຺ສ ອຸຈ຺ເຉທໍ ວິນາສໍ ວິຠວໍ ປຎ຺ຎເປນ຺ຕິ. ອິມາ ສຕ຺ຕ ທິຏ຺ຐິໂຍ.

ສຕ຺ຕກໍ.