໘. ອຏ຺ຐກນິທ຺ເທໂສ

(໑) ອຏ຺ຐ ກິເລສວຕ຺ຖູນິ

໙໕໒. ຕຕ຺ຖ ກຕມານິ ອຏ຺ຐ ກິເລສວຕ຺ຖູນິ? ໂລໂຠ, ໂທໂສ, ໂມໂຫ, ມາໂນ, ທິຏ຺ຐິ, ວິຈິກິຈ຺ຉາ, ຖິນໍ, ອຸທ຺ຘຈ຺ຈໍ – ອິມານິ ອຏ຺ຐ ກິເລສວຕ຺ຖູນິ.

(໒) ອຏ຺ຐ ກຸສີຕວຕ຺ຖູນິ

໙໕໓. ຕຕ຺ຖ ກຕມານິ ອຏ຺ຐ ກຸສີຕວຕ຺ຖູນິ?

(ກ) ອິຘ ຠິກ຺ຂຸນາ ກມ຺ມໍ ກາຕພ຺ພໍ ໂຫຕິ. ຕສ຺ສ ເອວໍ ໂຫຕິ – ‘‘ກມ຺ມໍ ໂຂ ເມ ກາຕພ຺ພໍ ຠວິສ຺ສຕິ. ກມ຺ມໍ ໂຂ ປນ ເມ ກໂຣນ຺ຕສ຺ສ ກາໂຍ ກິລມິສ຺ສຕິ. ຫນ຺ທາຫໍ ນິປຊ຺ຊາມີ’’ຕິ. ໂສ ນິປຊ຺ຊຕິ; ນ ວີຣິຍໍ ອາຣຠຕິ ອປ຺ປຕ຺ຕສ຺ສ ປຕ຺ຕິຍາ, ອນຘິຄຕສ຺ສ ອຘິຄມາຍ, ອສຈ຺ຉິກຕສ຺ສ ສຈ຺ຉິກິຣິຍາຍ. ອິທໍ ປຐມໍ ກຸສີຕວຕ຺ຖຸ.

(ຂ) ປຸນ ຈປຣໍ ຠິກ຺ຂຸນາ ກມ຺ມໍ ກຕໍ ໂຫຕິ. ຕສ຺ສ ເອວໍ ໂຫຕິ – ‘‘ອຫໍ ໂຂ ກມ຺ມໍ ອກາສິໍ. ກມ຺ມໍ ໂຂ ປນ ເມ ກໂຣນ຺ຕສ຺ສ ກາໂຍ ກິລນ຺ໂຕ. ຫນ຺ທາຫໍ ນິປຊ຺ຊາມີ’’ຕິ. ໂສ ນິປຊ຺ຊຕິ; ນ ວີຣິຍໍ ອາຣຠຕິ ອປ຺ປຕ຺ຕສ຺ສ ປຕ຺ຕິຍາ, ອນຘິຄຕສ຺ສ ອຘິຄມາຍ, ອສຈ຺ຉິກຕສ຺ສ ສຈ຺ຉິກິຣິຍາຍ. ອິທໍ ທຸຕິຍໍ ກຸສີຕວຕ຺ຖຸ.

(ຄ) ປຸນ ຈປຣໍ ຠິກ຺ຂຸນາ ມຄ຺ໂຄ ຄນ຺ຕພ຺ໂພ ໂຫຕິ. ຕສ຺ສ ເອວໍ ໂຫຕິ – ‘‘ມຄ຺ໂຄ ໂຂ ເມ ຄນ຺ຕພ຺ໂພ ຠວິສ຺ສຕິ. ມຄ຺ຄໍ ໂຂ ປນ ເມ ຄຈ຺ຉນ຺ຕສ຺ສ ກາໂຍ ກິລມິສ຺ສຕິ. ຫນ຺ທາຫໍ ນິປຊ຺ຊາມີ’’ຕິ. ໂສ ນິປຊ຺ຊຕິ; ນ ວີຣິຍໍ ອາຣຠຕິ ອປ຺ປຕ຺ຕສ຺ສ ປຕ຺ຕິຍາ, ອນຘິຄຕສ຺ສ ອຘິຄມາຍ, ອສຈ຺ຉິກຕສ຺ສ ສຈ຺ຉິກິຣິຍາຍ. ອິທໍ ຕຕິຍໍ ກຸສີຕວຕ຺ຖຸ.

(ຆ) ປຸນ ຈປຣໍ ຠິກ຺ຂຸນາ ມຄ຺ໂຄ ຄໂຕ ໂຫຕິ. ຕສ຺ສ ເອວໍ ໂຫຕິ – ‘‘ອຫໍ ໂຂ ມຄ຺ຄໍ ອຄມາສິໍ. ມຄ຺ຄໍ ໂຂ ປນ ເມ ຄຈ຺ຉນ຺ຕສ຺ສ ກາໂຍ ກິລນ຺ໂຕ. ຫນ຺ທາຫໍ ນິປຊ຺ຊາມີ’’ຕິ. ໂສ ນິປຊ຺ຊຕິ; ນ ວີຣິຍໍ ອາຣຠຕິ ອປ຺ປຕ຺ຕສ຺ສ ປຕ຺ຕິຍາ, ອນຘິຄຕສ຺ສ ອຘິຄມາຍ, ອສຈ຺ຉິກຕສ຺ສ ສຈ຺ຉິກິຣິຍາຍ. ອິທໍ ຈຕຸຕ຺ຖໍ ກຸສີຕວຕ຺ຖຸ.

(ງ) ປຸນ ຈປຣໍ ຠິກ຺ຂຸ ຄາມໍ ວາ ນິຄມໍ ວາ ປິຓ຺ຑາຍ ຈຣນ຺ໂຕ ນ ລຠຕິ ລູຂສ຺ສ ວາ ປຓີຕສ຺ສ ວາ ໂຠຊນສ຺ສ ຍາວທຕ຺ຖໍ ປາຣິປູຣິໍ. ຕສ຺ສ ເອວໍ ໂຫຕິ – ‘‘ອຫໍ ໂຂ ຄາມໍ ວາ ນິຄມໍ ວາ ປິຓ຺ຑາຍ ຈຣນ຺ໂຕ ນາລຕ຺ຖໍ ລູຂສ຺ສ ວາ ປຓີຕສ຺ສ ວາ ໂຠຊນສ຺ສ ຍາວທຕ຺ຖໍ ປາຣິປູຣິໍ. ຕສ຺ສ ເມ ກາໂຍ ກິລນ຺ໂຕ ອກມ຺ມຎ຺ໂຎ. ຫນ຺ທາຫໍ ນິປຊ຺ຊາມີ’’ຕິ. ໂສ ນິປຊ຺ຊຕິ; ນ ວີຣິຍໍ ອາຣຠຕິ ອປ຺ປຕ຺ຕສ຺ສ ປຕ຺ຕິຍາ, ອນຘິຄຕສ຺ສ ອຘິຄມາຍ, ອສຈ຺ຉິກຕສ຺ສ ສຈ຺ຉິກິຣິຍາຍ. ອິທໍ ປຎ຺ຈມໍ ກຸສີຕວຕ຺ຖຸ.

(ຈ) ປຸນ ຈປຣໍ ຠິກ຺ຂຸ ຄາມໍ ວາ ນິຄມໍ ວາ ປິຓ຺ຑາຍ ຈຣນ຺ໂຕ ລຠຕິ ລູຂສ຺ສ ວາ ປຓີຕສ຺ສ ວາ ໂຠຊນສ຺ສ ຍາວທຕ຺ຖໍ ປາຣິປູຣິໍ. ຕສ຺ສ ເອວໍ ໂຫຕິ – ‘‘ອຫໍ ໂຂ ຄາມໍ ວາ ນິຄມໍ ວາ ປິຓ຺ຑາຍ ຈຣນ຺ໂຕ ອລຕ຺ຖໍ ລູຂສ຺ສ ວາ ປຓີຕສ຺ສ ວາ ໂຠຊນສ຺ສ ຍາວທຕ຺ຖໍ ປາຣິປູຣິໍ. ຕສ຺ສ ເມ ກາໂຍ ກິລນ຺ໂຕ ອກມ຺ມຎ຺ໂຎ ມາສາຈິຕໍ ມຎ຺ເຎ. ຫນ຺ທາຫໍ ນິປຊ຺ຊາມີ’’ຕິ. ໂສ ນິປຊ຺ຊຕິ; ນ ວີຣິຍໍ ອາຣຠຕິ ອປ຺ປຕ຺ຕສ຺ສ ປຕ຺ຕິຍາ, ອນຘິຄຕສ຺ສ ອຘິຄມາຍ, ອສຈ຺ຉິກຕສ຺ສ ສຈ຺ຉິກິຣິຍາຍ. ອິທໍ ຉຏ຺ຐໍ ກຸສີຕວຕ຺ຖຸ.

(ຉ) ປຸນ ຈປຣໍ ຠິກ຺ຂຸໂນ ອຸປ຺ປນ຺ໂນ ໂຫຕິ ອປ຺ປມຕ຺ຕໂກ ອາພາໂຘ. ຕສ຺ສ ເອວໍ ໂຫຕິ – ‘‘ອຸປ຺ປນ຺ໂນ ໂຂ ເມ ອຍໍ ອປ຺ປມຕ຺ຕໂກ ອາພາໂຘ. ອຕ຺ຖິ ກປ຺ໂປ ນິປຊ຺ຊິຕຸໍ. ຫນ຺ທາຫໍ ນິປຊ຺ຊາມີ’’ຕິ. ໂສ ນິປຊ຺ຊຕິ; ນ ວີຣິຍໍ ອາຣຠຕິ ອປ຺ປຕ຺ຕສ຺ສ ປຕ຺ຕິຍາ, ອນຘິຄຕສ຺ສ ອຘິຄມາຍ, ອສຈ຺ຉິກຕສ຺ສ ສຈ຺ຉິກິຣິຍາຍ. ອິທໍ ສຕ຺ຕມໍ ກຸສີຕວຕ຺ຖຸ.

(ຊ) ປຸນ ຈປຣໍ ຠິກ຺ຂຸ ຄິລານາ ວຸຏ຺ຐິໂຕ [ຄິລານວຸຏ຺ຐິໂຕ (ສທ຺ທນີຠິ) ອ. ນິ. ໖.໑໖ ປາຬິຍາ ຏີກາ ປສ຺ສິຕພ຺ພາ] ໂຫຕິ ອຈິຣວຸຏ຺ຐິໂຕ ເຄລຎ຺ຎາ. ຕສ຺ສ ເອວໍ ໂຫຕິ – ‘‘ອຫໍ ໂຂ ຄິລານາ ວຸຏ຺ຐິໂຕ ອຈິຣວຸຏ຺ຐິໂຕ ເຄລຎ຺ຎາ. ຕສ຺ສ ເມ ກາໂຍ ທຸພ຺ພໂລ ອກມ຺ມຎ຺ໂຎ. ຫນ຺ທາຫໍ ນິປຊ຺ຊາມີ’’ຕິ. ໂສ ນິປຊ຺ຊຕິ; ນ ວີຣິຍໍ ອາຣຠຕິ ອປ຺ປຕ຺ຕສ຺ສ ປຕ຺ຕິຍາ, ອນຘິຄຕສ຺ສ ອຘິຄມາຍ, ອສຈ຺ຉິກຕສ຺ສ ສຈ຺ຉິກິຣິຍາຍ. ອິທໍ ອຏ຺ຐມໍ ກຸສີຕວຕ຺ຖຸ. ອິມານິ ອຏ຺ຐ ກຸສີຕວຕ຺ຖູນິ.

(໓) ອຏ຺ຐສຸ ໂລກຘມ຺ເມສຸ ຈິຕ຺ຕສ຺ສ ປຏິຆາໂຕ

໙໕໔. ຕຕ຺ຖ ກຕເມສຸ ອຏ຺ຐສຸ ໂລກຘມ຺ເມສຸ ຈິຕ຺ຕສ຺ສ ປຏິຆາໂຕ? ລາເຠ ສາຣາໂຄ, ອລາເຠ ປຏິວິໂຣໂຘ, ຍເສ ສາຣາໂຄ, ອຍເສ ປຏິວິໂຣໂຘ, ປສໍສາຍ ສາຣາໂຄ, ນິນ຺ທາຍ ປຏິວິໂຣໂຘ, ສຸເຂ ສາຣາໂຄ, ທຸກ຺ເຂ ປຏິວິໂຣໂຘ – ອິເມສຸ ອຏ຺ຐສຸ ໂລກຘມ຺ເມສຸ ຈິຕ຺ຕສ຺ສ ປຏິຆາໂຕ.

(໔) ອຏ຺ຐອນຣິຍໂວຫາຣາ

໙໕໕. ຕຕ຺ຖ ກຕເມ ອຏ຺ຐ ອນຣິຍໂວຫາຣາ? ອທິຏ຺ເຐ ທິຏ຺ຐວາທິຕາ, ອສ຺ສຸເຕ ສຸຕວາທິຕາ, ອມຸເຕ ມຸຕວາທິຕາ, ອວິຎ຺ຎາເຕ ວິຎ຺ຎາຕວາທິຕາ, ທິຏ຺ເຐ ອທິຏ຺ຐວາທິຕາ, ສຸເຕ ອສ຺ສຸຕວາທິຕາ, ມຸເຕ ອມຸຕວາທິຕາ, ວິຎ຺ຎາເຕ ອວິຎ຺ຎາຕວາທິຕາ – ອິເມ ອຏ຺ຐ ອນຣິຍໂວຫາຣາ.

(໕) ອຏ຺ຐ ມິຈ຺ຉຕ຺ຕາ

໙໕໖. ຕຕ຺ຖ ກຕເມ ອຏ຺ຐ ມິຈ຺ຉຕ຺ຕາ? ມິຈ຺ຉາທິຏ຺ຐິ, ມິຈ຺ຉາສງ຺ກປ຺ໂປ, ມິຈ຺ຉາວາຈາ, ມິຈ຺ຉາກມ຺ມນ຺ໂຕ, ມິຈ຺ຉາອາຊີໂວ, ມິຈ຺ຉາວາຍາໂມ, ມິຈ຺ຉາສຕິ, ມິຈ຺ຉາສມາຘິ – ອິເມ ອຏ຺ຐ ມິຈ຺ຉຕ຺ຕາ.

(໖) ອຏ຺ຐ ປຸຣິສໂທສາ

໙໕໗. ຕຕ຺ຖ ກຕເມ ອຏ຺ຐ ປຸຣິສໂທສາ? (ກ) ອິຘ ຠິກ຺ຂູ ຠິກ຺ຂຸໍ ອາປຕ຺ຕິຍາ ໂຈເທນ຺ຕິ. ໂສ ຠິກ຺ຂຸ ຠິກ຺ຂູຫິ ອາປຕ຺ຕິຍາ ໂຈທິຍມາໂນ [ໂຈທິຍມາໂນ (ສີ. ສ຺ຍາ.) ອ. ນິ. ໘.໑໔] ‘‘ນ ສຣາມິ ນ ສຣາມີ’’ຕິ ອສ຺ສຕິຍາວ ນິພ຺ເພເຐຕິ. ອຍໍ ປຐໂມ ປຸຣິສໂທໂສ.

(ຂ) ປຸນ ຈປຣໍ ຠິກ຺ຂູ ຠິກ຺ຂຸໍ ອາປຕ຺ຕິຍາ ໂຈເທນ຺ຕິ. ໂສ ຠິກ຺ຂຸ ຠິກ຺ຂູຫິ ອາປຕ຺ຕິຍາ ໂຈທິຍມາໂນ ໂຈທກໍເຍວ ປຏິປ຺ຜຣຕິ – ‘‘ກິໍ ນຸ ໂຂ ຕຸຍ຺ຫໍ ພາລສ຺ສ ອພ຺ຍຕ຺ຕສ຺ສ ຠຓິເຕນ! ຕ຺ວມ຺ປິ ນາມ ມໍ ຠຓິຕພ຺ພໍ ມຎ຺ຎສີ’’ຕິ! ອຍໍ ທຸຕິໂຍ ປຸຣິສໂທໂສ.

(ຄ) ປຸນ ຈປຣໍ ຠິກ຺ຂູ ຠິກ຺ຂຸໍ ອາປຕ຺ຕິຍາ ໂຈເທນ຺ຕິ. ໂສ ຠິກ຺ຂຸ ຠິກ຺ຂູຫິ ອາປຕ຺ຕິຍາ ໂຈທິຍມາໂນ ໂຈທກໍເຍວ [ໂຈທກສ຺ເສວ (ສ຺ຍາ.) ອ. ນິ. ໘.໑໔] ປຈ຺ຈາໂຣເປຕິ – ‘‘ຕ຺ວມ຺ປິ ໂຂສິ ອິຕ຺ຖນ຺ນາມໍ ອາປຕ຺ຕິໍ ອາປນ຺ໂນ. ຕ຺ວໍ ຕາວ ປຐມໍ ປຏິກໂຣຫີ’’ຕິ. ອຍໍ ຕຕິໂຍ ປຸຣິສໂທໂສ.

(ຆ) ປຸນ ຈປຣໍ ຠິກ຺ຂູ ຠິກ຺ຂຸໍ ອາປຕ຺ຕິຍາ ໂຈເທນ຺ຕິ. ໂສ ຠິກ຺ຂຸ ຠິກ຺ຂູຫິ ອາປຕ຺ຕິຍາ ໂຈທິຍມາໂນ ອຎ຺ເຎນາຎ຺ຎໍ ປຏິຈຣຕິ, ພຫິທ຺ຘາ ກຖໍ ອປນາເມຕິ, ໂກປຎ຺ຈ ໂທສຎ຺ຈ ອປ຺ປຈ຺ຈຍຎ຺ຈ ປາຕຸກໂຣຕິ. ອຍໍ ຈຕຸຕ຺ໂຖ ປຸຣິສໂທໂສ.

(ງ) ປຸນ ຈປຣໍ ຠິກ຺ຂູ ຠິກ຺ຂຸໍ ອາປຕ຺ຕິຍາ ໂຈເທນ຺ຕິ. ໂສ ຠິກ຺ຂຸ ຠິກ຺ຂູຫິ ອາປຕ຺ຕິຍາ ໂຈທິຍມາໂນ ສງ຺ຆມຊ຺ເຌ ພາຫາວິກ຺ເຂປກໍ ຠຓຕິ. ອຍໍ ປຎ຺ຈໂມ ປຸຣິສໂທໂສ.

(ຈ) ປຸນ ຈປຣໍ ຠິກ຺ຂູ ຠິກ຺ຂຸໍ ອາປຕ຺ຕິຍາ ໂຈເທນ຺ຕິ. ໂສ ຠິກ຺ຂຸ ຠິກ຺ຂູຫິ ອາປຕ຺ຕິຍາ ໂຈທິຍມາໂນ ອນາທິຍິຕ຺ວາ ສງ຺ຆໍ, ອນາທິຍິຕ຺ວາ ໂຈທກໍ, ສາປຕ຺ຕິໂກວ [ອາປຕ຺ຕິໂກວ (ກ.) ອ. ນິ. ໘.໑໔] ເຍນກາມໍ ປກ຺ກມຕິ. ອຍໍ ຉຏ຺ໂຐ ປຸຣິສໂທໂສ.

(ຉ) ປຸນ ຈປຣໍ ຠິກ຺ຂູ ຠິກ຺ຂຸໍ ອາປຕ຺ຕິຍາ ໂຈເທນ຺ຕິ. ໂສ ຠິກ຺ຂຸ ຠິກ຺ຂູຫິ ອາປຕ຺ຕິຍາ ໂຈທິຍມາໂນ ‘‘ເນວາຫໍ ອາປນ຺ໂນມ຺ຫິ, ນ ປນາຫໍ ອນາປນ຺ໂນມ຺ຫີ’’ຕິ ຕຸຓ຺ຫີຠູໂຕ ສງ຺ຆໍ ວິເຫເສຕິ. ອຍໍ ສຕ຺ຕໂມ ປຸຣິສໂທໂສ.

(ຊ) ປຸນ ຈປຣໍ ຠິກ຺ຂູ ຠິກ຺ຂຸໍ ອາປຕ຺ຕິຍາ ໂຈເທນ຺ຕິ. ໂສ ຠິກ຺ຂຸ ຠິກ຺ຂູຫິ ອາປຕ຺ຕິຍາ ໂຈທິຍມາໂນ ເອວມາຫ – ‘‘ກິໍ ນຸ ໂຂ ຕຸມ຺ເຫ ອາຍສ຺ມນ຺ໂຕ ອຕິພາຬ຺ຫໍ ມຍິ ພ຺ຍາວຏາ. ອິທານາຫໍ ສິກ຺ຂໍ ປຈ຺ຈກ຺ຂາຍ ຫີນາຍາວຕ຺ຕິສ຺ສາມີ’’ຕິ. ໂສ ສິກ຺ຂໍ ປຈ຺ຈກ຺ຂາຍ ຫີນາຍາວຕ຺ຕິຕ຺ວາ ເອວມາຫ – ‘‘ອິທານິ ໂຂ ຕຸມ຺ເຫ ອາຍສ຺ມນ຺ໂຕ ອຕ຺ຕມນາ ໂຫຖາ’’ຕິ. ອຍໍ ອຏ຺ຐໂມ ປຸຣິສໂທໂສ. ອິເມ ອຏ຺ຐ ປຸຣິສໂທສາ.

(໗) ອຏ຺ຐ ອສຎ຺ຎີວາທາ

໙໕໘. ຕຕ຺ຖ ກຕເມ ອຏ຺ຐ ອສຎ຺ຎີວາທາ? ‘‘ຣູປີ ອຕ຺ຕາ ໂຫຕິ ອໂຣໂຄ ປຣໍ ມຣຓາ’’ຕິ – ອສຎ຺ຎີຕິ ນໍ ປຎ຺ຎເປນ຺ຕິ; ອຣູປີ ອຕ຺ຕາ…ເປ… ຣູປີ ຈ ອຣູປີ ຈ…ເປ… ເນວຣູປີນາຣູປີ…ເປ… ‘‘ອນ຺ຕວາ ອຕ຺ຕາ ໂຫຕິ ອໂຣໂຄ ປຣໍ ມຣຓາ’’ຕິ – ອສຎ຺ຎີຕິ ນໍ ປຎ຺ຎເປນ຺ຕິ; ‘‘ອນນ຺ຕວາ ອຕ຺ຕາ ໂຫຕິ ອໂຣໂຄ ປຣໍ ມຣຓາ’’ຕິ – ອສຎ຺ຎີຕິ ນໍ ປຎ຺ຎເປນ຺ຕິ; ‘‘ອນ຺ຕວາ ຈ ອນນ຺ຕວາ ຈ ອຕ຺ຕາ ໂຫຕິ ອໂຣໂຄ ປຣໍ ມຣຓາ’’ຕິ – ອສຎ຺ຎີຕິ ນໍ ປຎ຺ຎເປນ຺ຕິ; ‘‘ເນວນ຺ຕວາ ນານນ຺ຕວາ ອຕ຺ຕາ ໂຫຕິ ອໂຣໂຄ ປຣໍ ມຣຓາ’’ຕິ – ອສຎ຺ຎີຕິ ນໍ ປຎ຺ຎເປນ຺ຕິ. ອິເມ ອຏ຺ຐ ອສຎ຺ຎີວາທາ.

(໘) ອຏ຺ຐ ເນວສຎ຺ຎີນາສຎ຺ຎີວາທາ

໙໕໙. ຕຕ຺ຖ ກຕເມ ອຏ຺ຐ ເນວສຎ຺ຎີນາສຎ຺ຎີວາທາ? ‘‘ຣູປີ ອຕ຺ຕາ ໂຫຕິ ອໂຣໂຄ ປຣໍ ມຣຓາ’’ຕິ – ເນວສຎ຺ຎີນາສຎ຺ຎີຕິ ນໍ ປຎ຺ຎເປນ຺ຕິ; ‘‘ອຣູປີ ອຕ຺ຕາ ໂຫຕິ ອໂຣໂຄ ປຣໍ ມຣຓາ’’ຕິ – ເນວສຎ຺ຎີນາສຎ຺ຎີຕິ ນໍ ປຎ຺ຎເປນ຺ຕິ; ‘‘ຣູປີ ຈ ອຣູປີ ຈ ອຕ຺ຕາ ໂຫຕິ ອໂຣໂຄ ປຣໍ ມຣຓາ’’ຕິ – ເນວສຎ຺ຎີນາສຎ຺ຎີຕິ ນໍ ປຎ຺ຎເປນ຺ຕິ; ‘‘ເນວຣູປີນາຣູປີ ອຕ຺ຕາ ໂຫຕິ ອໂຣໂຄ ປຣໍ ມຣຓາ’’ຕິ – ເນວສຎ຺ຎີນາສຎ຺ຎີຕິ ນໍ ປຎ຺ຎເປນ຺ຕິ; ‘‘ອນ຺ຕວາ ອຕ຺ຕາ ໂຫຕິ ອໂຣໂຄ ປຣໍ ມຣຓາ’’ຕິ – ເນວສຎ຺ຎີນາສຎ຺ຎີຕິ ນໍ ປຎ຺ຎເປນ຺ຕິ; ‘‘ອນນ຺ຕວາ ອຕ຺ຕາ ໂຫຕິ ອໂຣໂຄ ປຣໍ ມຣຓາ’’ຕິ – ເນວສຎ຺ຎີນາສຎ຺ຎີຕິ ນໍ ປຎ຺ຎເປນ຺ຕິ; ‘‘ອນ຺ຕວາ ຈ ອນນ຺ຕວາ ຈ ອຕ຺ຕາ ໂຫຕິ ອໂຣໂຄ ປຣໍ ມຣຓາ’’ຕິ – ເນວສຎ຺ຎີນາສຎ຺ຎີຕິ ນໍ ປຎ຺ຎເປນ຺ຕິ; ‘‘ເນວນ຺ຕວາ ນານນ຺ຕວາ ອຕ຺ຕາ ໂຫຕິ ອໂຣໂຄ ປຣໍ ມຣຓາ’’ຕິ – ເນວສຎ຺ຎີນາສຎ຺ຎີຕິ ນໍ ປຎ຺ຎເປນ຺ຕິ. ອິເມ ອຏ຺ຐ ເນວສຎ຺ຎີນາສຎ຺ຎີວາທາ.

ອຏ຺ຐກໍ.