(໑໔) ຉ ທິຏ຺ຐິໂຍ

໙໔໘. ຕຕ຺ຖ ກຕມາ ຉ ທິຏ຺ຐິໂຍ? ‘‘ອຕ຺ຖິ ເມ ອຕ຺ຕາ’’ຕິ ວາ ອສ຺ສ ສຈ຺ຈໂຕ ເຖຕໂຕ ທິຏ຺ຐິ ອຸປ຺ປຊ຺ຊຕິ, ‘‘ນຕ຺ຖິ ເມ ອຕ຺ຕາ’’ຕິ ວາ ອສ຺ສ ສຈ຺ຈໂຕ ເຖຕໂຕ ທິຏ຺ຐິ ອຸປ຺ປຊ຺ຊຕິ, ‘‘ອຕ຺ຕນາ ວາ ອຕ຺ຕານໍ ສຎ຺ຊານາມີ’’ຕິ ວາ ອສ຺ສ ສຈ຺ຈໂຕ ເຖຕໂຕ ທິຏ຺ຐິ ອຸປ຺ປຊ຺ຊຕິ, ‘‘ອຕ຺ຕນາ ວາ ອນຕ຺ຕານໍ ສຎ຺ຊານາມີ’’ຕິ ວາ ອສ຺ສ ສຈ຺ຈໂຕ ເຖຕໂຕ ທິຏ຺ຐິ ອຸປ຺ປຊ຺ຊຕິ, ‘‘ອນຕ຺ຕນາ ວາ ອຕ຺ຕານໍ ສຎ຺ຊານາມີ’’ຕິ ວາ ອສ຺ສ ສຈ຺ຈໂຕ ເຖຕໂຕ ທິຏ຺ຐິ ອຸປ຺ປຊ຺ຊຕິ; ອຖ ວາ ປນສ຺ສ ເອວໍທິຏ຺ຐິ ໂຫຕິ – ‘‘ໂສ ເມ ອຍໍ ອຕ຺ຕາ ວໂທ ເວເທຍ຺ໂຍ ຕຕ຺ຣ ຕຕ຺ຣ ທີຆຣຕ຺ຕໍ ກລ຺ຍາຓປາປການໍ ກມ຺ມານໍ ວິປາກໍ ປຈ຺ຈນຸໂຠຕິ. ນ ໂສ ຊາໂຕ ນາໂຫສິ, ນ ໂສ ຊາໂຕ ນ ຠວິສ຺ສຕິ, ນິຈ຺ໂຈ ຘຸໂວ ສສ຺ສໂຕ ອວິປຣິຓາມຘມ຺ໂມ’’ຕິ ວາ ປນສ຺ສ ສຈ຺ຈໂຕ ເຖຕໂຕ ທິຏ຺ຐິ ອຸປ຺ປຊ຺ຊຕິ. ອິມາ ຉ ທິຏ຺ຐິໂຍ.

ຉກ຺ກໍ.