໒. ທຸກນິທ຺ເທໂສ

(໑) ໂກໂຘ ຈ ອຸປນາໂຫ ຈ

໘໙໑. (ກ) ຕຕ຺ຖ ກຕໂມ ໂກໂຘ? ໂຍ ໂກໂຘ ກຸຊ຺ຌນາ ກຸຊ຺ຌິຕຕ຺ຕໍ ໂທໂສ ທຸສ຺ສນາ ທຸສ຺ສິຕຕ຺ຕໍ ພ຺ຍາປຕ຺ຕິ ພ຺ຍາປຊ຺ຊນາ ພ຺ຍາປຊ຺ຊິຕຕ຺ຕໍ ວິໂຣໂຘ ປຏິວິໂຣໂຘ ຈຓ຺ຑິກ຺ກໍ ອສຸໂຣໂປ ອນຕ຺ຕມນຕາ ຈິຕ຺ຕສ຺ສ – ອຍໍ ວຸຈ຺ຈຕິ ‘‘ໂກໂຘ’’.

(ຂ) ຕຕ຺ຖ ກຕໂມ ອຸປນາໂຫ? ປຸພ຺ພກາລໍ ໂກໂຘ, ອປຣກາລໍ ອຸປນາໂຫ. ໂຍ ເອວຣູໂປ ອຸປນາໂຫ ອຸປນຍ຺ຫນາ ອຸປນຍ຺ຫິຕຕ຺ຕໍ ອຏ຺ຐປນາ ຐປນາ ສຓ຺ຐປນາ ອນຸສໍສນ຺ທນາ ອນຸປ຺ປພນ຺ຘນາ ທຬ຺ຫີກມ຺ມໍ ໂກຘສ຺ສ – ອຍໍ ວຸຈ຺ຈຕິ ‘‘ອຸປນາໂຫ’’.

(໒) ມກ຺ໂຂ ຈ ປຬາໂສ ຈ

໘໙໒. (ກ) ຕຕ຺ຖ ກຕໂມ ມກ຺ໂຂ? ໂຍ ມກ຺ໂຂ ມກ຺ຂາຍນາ ມກ຺ຂາຍິຕຕ຺ຕໍ [ມກ຺ຂິຍນາ ມກ຺ຂິຍິຕຕ຺ຕໍ (ສີ. ກ.)] ນິຏ຺ຐຸຣິຍໍ ນິຏ຺ຐຸຣິຍກມ຺ມໍ – ອຍໍ ວຸຈ຺ຈຕິ ‘‘ມກ຺ໂຂ’’.

(ຂ) ຕຕ຺ຖ ກຕໂມ ປຬາໂສ? ໂຍ ປຬາໂສ ປຬາສາຍນາ [ປລາສາຍນາ ປລາສາຍິຕຕ຺ຕໍ (ສ຺ຍາ.)] ປຬາສາຫາໂຣ ວິວາທຏ຺ຐານໍ ຍຸຄຄ຺ຄາໂຫ ອປ຺ປຏິນິສ຺ສຄ຺ໂຄ – ອຍໍ ວຸຈ຺ຈຕິ ‘‘ປຬາໂສ’’.

(໓) ອິສ຺ສາ ຈ ມຈ຺ຉຣິຍຎ຺ຈ

໘໙໓. (ກ) ຕຕ຺ຖ ກຕມາ ອິສ຺ສາ? ຍາ ປຣລາຠສກ຺ກາຣຄຣຸກາຣມານນວນ຺ທນປູຊນາສຸ ອິສ຺ສາ ອິສ຺ສາຍນາ ອິສ຺ສາຍິຕຕ຺ຕໍ ອຸສູຍາ ອຸສູຍນາ ອຸສູຍິຕຕ຺ຕໍ – ອຍໍ ວຸຈ຺ຈຕິ ‘‘ອິສ຺ສາ’’.

(ຂ) ຕຕ຺ຖ ກຕມໍ ມຈ຺ຉຣິຍໍ? ປຎ຺ຈ ມຈ຺ຉຣິຍານິ – ອາວາສມຈ຺ຉຣິຍໍ, ກຸລມຈ຺ຉຣິຍໍ, ລາຠມຈ຺ຉຣິຍໍ, ວຓ຺ຓມຈ຺ຉຣິຍໍ, ຘມ຺ມມຈ຺ຉຣິຍໍ. ຍໍ ເອວຣູປໍ ມຈ຺ເຉຣໍ ມຈ຺ຉຣາຍນາ ມຈ຺ຉຣາຍິຕຕ຺ຕໍ ເວວິຈ຺ຉໍ ກທຣິຍໍ ກຏຸກຎ຺ຈຸກຕາ ອຄ຺ຄຫິຕຕ຺ຕໍ [ປຄ຺ຄຫິຕຕ຺ຕໍ (ສີ. ກ.) ຘ. ສ. ໑໑໒໗] ຈິຕ຺ຕສ຺ສ – ອິທໍ ວຸຈ຺ຈຕິ ‘‘ມຈ຺ຉຣິຍໍ’’.

(໔) ມາຍາ ຈ ສາເຐຍ຺ຍຎ຺ຈ

໘໙໔. (ກ) ຕຕ຺ຖ ກຕມາ ມາຍາ? ອິເຘກຈ຺ໂຈ ກາເຍນ ທຸຈ຺ຈຣິຕໍ ຈຣິຕ຺ວາ, ວາຈາຍ ທຸຈ຺ຈຣິຕໍ ຈຣິຕ຺ວາ, ມນສາ ທຸຈ຺ຈຣິຕໍ ຈຣິຕ຺ວາ ຕສ຺ສ ປຏິຈ຺ຉາທນເຫຕຸໍ ປາປິກໍ ອິຈ຺ຉໍ ປຓິທຫຕິ. ‘‘ມາ ມໍ ຊຎ຺ຎາ’’ຕິ ອິຈ຺ຉຕິ. ‘‘ມາ ມໍ ຊຎ຺ຎາ’’ຕິ ສງ຺ກປ຺ເປຕິ. ‘‘ມາ ມໍ ຊຎ຺ຎາ’’ຕິ ວາຈໍ ຠາສຕິ. ‘‘ມາ ມໍ ຊຎ຺ຎາ’’ຕິ ກາເຍນ ປຣກ຺ກມຕິ. ຍາ ເອວຣູປາ ມາຍາ ມາຍາວິຕາ ອຈ຺ຈາສຣາ ວຎ຺ຈນາ ນິກຕິ ວິກິຣຓາ ປຣິຫຣຓາ ຄູຫນາ ປຣິຄູຫນາ ຉາທນາ ປຏິຈ຺ຉາທນາ ອນຸຕ຺ຕານີກມ຺ມໍ ອນາວິກມ຺ມໍ ໂວຈ຺ຉາທນາ ປາປກິຣິຍາ – ອຍໍ ວຸຈ຺ຈຕິ ‘‘ມາຍາ’’.

(ຂ) ຕຕ຺ຖ ກຕມໍ ສາເຐຍ຺ຍໍ? ອິເຘກຈ຺ໂຈ ສໂຐ ໂຫຕິ ປຣິສໂຐ. ຍໍ ຕຕ຺ຖ ສຐໍ ສຐຕາ ສາເຐຍ຺ຍໍ ກກ຺ກຣຕາ ກກ຺ກຣິຍໍ [ກກ຺ຂຬຕາ ກກ຺ຂຬິຍໍ (ສ຺ຍາ.)] ປຣິກ຺ຂຕ຺ຕຕາ ປາຣິກ຺ຂຕ຺ຕິຍໍ – ອິທໍ ວຸຈ຺ຈຕິ ‘‘ສາເຐຍ຺ຍໍ’’.

(໕) ອວິຊ຺ຊາ ຈ ຠວຕຓ຺ຫາ ຈ

໘໙໕. (ກ) ຕຕ຺ຖ ກຕມາ ອວິຊ຺ຊາ? ຍໍ ອຎ຺ຎາຓໍ ອທສ຺ສນໍ…ເປ… ອວິຊ຺ຊາລງ຺ຄີ ໂມໂຫ ອກຸສລມູລໍ – ອຍໍ ວຸຈ຺ຈຕິ ‘‘ອວິຊ຺ຊາ’’.

(ຂ) ຕຕ຺ຖ ກຕມາ ຠວຕຓ຺ຫາ? ໂຍ ຠເວສຸ ຠວຈ຺ຉນ຺ໂທ ຠວຣາໂຄ ຠວນນ຺ທີ ຠວຕຓ຺ຫາ ຠວສິເນໂຫ ຠວປຣິຬາໂຫ ຠວມຸຈ຺ຉາ ຠວຊ຺ໂຌສານໍ – ອຍໍ ວຸຈ຺ຈຕິ ‘‘ຠວຕຓ຺ຫາ’’.

(໖) ຠວທິຏ຺ຐິ ຈ ວິຠວທິຏ຺ຐິ ຈ

໘໙໖. (ກ) ຕຕ຺ຖ ກຕມາ ຠວທິຏ຺ຐິ? ‘‘ຠວິສ຺ສຕິ ອຕ຺ຕາ ຈ ໂລໂກ ຈາ’’ຕິ – ຍາ ເອວຣູປາ ທິຏ຺ຐິ ທິຏ຺ຐິຄຕໍ…ເປ… ວິປຣິຍາສຄ຺ຄາໂຫ – ອຍໍ ວຸຈ຺ຈຕິ ‘‘ຠວທິຏ຺ຐິ’’.

(ຂ) ຕຕ຺ຖ ກຕມາ ວິຠວທິຏ຺ຐິ? ‘‘ນ ຠວິສ຺ສຕິ ອຕ຺ຕາ ຈ ໂລໂກ ຈາ’’ຕິ – ຍາ ເອວຣູປາ ທິຏ຺ຐິ ທິຏ຺ຐິຄຕໍ…ເປ… ວິປຣິຍາສຄ຺ຄາໂຫ – ອຍໍ ວຸຈ຺ຈຕິ ວິຠວທິຏ຺ຐິ.

(໗) ສສ຺ສຕທິຏ຺ຐິ ຈ ອຸຈ຺ເຉທທິຏ຺ຐິ ຈ

໘໙໗. (ກ) ຕຕ຺ຖ ກຕມາ ສສ຺ສຕທິຏ຺ຐິ? ‘‘ສສ຺ສໂຕ ອຕ຺ຕາ ຈ ໂລໂກ ຈາ’’ຕິ – ຍາ ເອວຣູປາ ທິຏ຺ຐິ ທິຏ຺ຐິຄຕໍ…ເປ… ວິປຣິຍາສຄ຺ຄາໂຫ – ອຍໍ ວຸຈ຺ຈຕິ ‘‘ສສ຺ສຕທິຏ຺ຐິ’’.

(ຂ) ຕຕ຺ຖ ກຕມາ ອຸຈ຺ເຉທທິຏ຺ຐິ? ‘‘ອຸຈ຺ຉິຊ຺ຊິສ຺ສຕິ ອຕ຺ຕາ ຈ ໂລໂກ ຈາ’’ຕິ – ຍາ ເອວຣູປາ ທິຏ຺ຐິ ທິຏ຺ຐິຄຕໍ…ເປ… ວິປຣິຍາສຄ຺ຄາໂຫ – ອຍໍ ວຸຈ຺ຈຕິ ‘‘ອຸຈ຺ເຉທທິຏ຺ຐິ’’.

(໘) ອນ຺ຕວາທິຏ຺ຐິ ຈ ອນນ຺ຕວາທິຏ຺ຐິ ຈ

໘໙໘. (ກ) ຕຕ຺ຖ ກຕມາ ອນ຺ຕວາທິຏ຺ຐິ? ‘‘ອນ຺ຕວາ ອຕ຺ຕາ ຈ ໂລໂກ ຈາ’’ຕິ – ຍາ ເອວຣູປາ ທິຏ຺ຐິ ທິຏ຺ຐິຄຕໍ…ເປ… ວິປຣິຍາສຄ຺ຄາໂຫ – ອຍໍ ວຸຈ຺ຈຕິ ‘‘ອນ຺ຕວາທິຏ຺ຐິ’’.

(ຂ) ຕຕ຺ຖ ກຕມາ ອນນ຺ຕວາທິຏ຺ຐິ? ‘‘ອນນ຺ຕວາ ອຕ຺ຕາ ຈ ໂລໂກ ຈາ’’ຕິ – ຍາ ເອວຣູປາ ທິຏ຺ຐິ ທິຏ຺ຐິຄຕໍ…ເປ… ວິປຣິຍາສຄ຺ຄາໂຫ – ອຍໍ ວຸຈ຺ຈຕິ ‘‘ອນນ຺ຕວາທິຏ຺ຐິ’’.

(໙) ປຸພ຺ພນ຺ຕານຸທິຏ຺ຐິ ຈ ອປຣນ຺ຕານຸທິຏ຺ຐິ ຈ

໘໙໙. (ກ) ຕຕ຺ຖ ກຕມາ ປຸພ຺ພນ຺ຕານຸທິຏ຺ຐິ? ປຸພ຺ພນ຺ຕໍ ອາຣພ຺ຠ ຍາ ອຸປ຺ປຊ຺ຊຕິ ທິຏ຺ຐິ ທິຏ຺ຐິຄຕໍ…ເປ… ວິປຣິຍາສຄ຺ຄາໂຫ – ອຍໍ ວຸຈ຺ຈຕິ ‘‘ປຸພ຺ພນ຺ຕານຸທິຏ຺ຐິ’’.

(ຂ) ຕຕ຺ຖ ກຕມາ ອປຣນ຺ຕານຸທິຏ຺ຐິ? ອປຣນ຺ຕໍ ອາຣພ຺ຠ ຍາ ອຸປ຺ປຊ຺ຊຕິ ທິຏ຺ຐິ ທິຏ຺ຐິຄຕໍ…ເປ… ວິປຣິຍາສຄ຺ຄາໂຫ – ອຍໍ ວຸຈ຺ຈຕິ ‘‘ອປຣນ຺ຕານຸທິຏ຺ຐິ’’.

(໑໐) ອຫິຣິກຎ຺ຈ ອໂນຕ຺ຕປ຺ປຎ຺ຈ

໙໐໐. (ກ) ຕຕ຺ຖ ກຕມໍ ອຫິຣິກໍ? ຍໍ ນ ຫິຣີຍຕິ ຫິຣິຍິຕພ຺ເພນ, ນ ຫິຣີຍຕິ ປາປການໍ ອກຸສລານໍ ຘມ຺ມານໍ ສມາປຕ຺ຕິຍາ – ອິທໍ ວຸຈ຺ຈຕິ ‘‘ອຫິຣິກໍ’’.

(ຂ) ຕຕ຺ຖ ກຕມໍ ອໂນຕ຺ຕປ຺ປໍ? ຍໍ ນ ໂອຕ຺ຕປ຺ປຕິ ໂອຕ຺ຕປ຺ປິຕພ຺ເພນ ນ ໂອຕ຺ຕປ຺ປຕິ ປາປການໍ ອກຸສລານໍ ຘມ຺ມານໍ ສມາປຕ຺ຕິຍາ – ອິທໍ ວຸຈ຺ຈຕິ ‘‘ອໂນຕ຺ຕປ຺ປໍ’’.

(໑໑) ໂທວຈສ຺ສຕາ ຈ ປາປມິຕ຺ຕຕາ ຈ

໙໐໑. (ກ) ຕຕ຺ຖ ກຕມາ ໂທວຈສ຺ສຕາ? ສຫຘມ຺ມິເກ ວຸຈ຺ຈມາເນ ໂທວຈສ຺ສາຍໍ ໂທວຈສ຺ສິຍໍ ໂທວຈສ຺ສຕາ ວິປ຺ປຏິກຸລຄ຺ຄາຫິຕາ ວິປຈ຺ຈນີກສາຕຕາ ອນາທຣິຍໍ ອນາທຣຕາ ອຄາຣວຕາ ອປ຺ປຕິສ຺ສວຕາ – ອຍໍ ວຸຈ຺ຈຕິ ‘‘ໂທວຈສ຺ສຕາ’’.

(ຂ) ຕຕ຺ຖ ກຕມາ ປາປມິຕ຺ຕຕາ? ເຍ ເຕ ປຸຄ຺ຄລາ ອສ຺ສທ຺ຘາ ທຸສ຺ສີລາ ອປ຺ປສ຺ສຸຕາ ມຈ຺ຉຣິໂນ ທຸປ຺ປຎ຺ຎາ, ຍາ ເຕສໍ ເສວນາ ນິເສວນາ ສໍເສວນາ ຠຊນາ ສມ຺ຠຊນາ ຠຕ຺ຕິ ສມ຺ຠຕ຺ຕິ ສມ຺ປວງ຺ກຕາ – ອຍໍ ວຸຈ຺ຈຕິ ‘‘ປາປມິຕ຺ຕຕາ’’.

(໑໒) ອນຊ຺ຊໂວ ຈ ອມທ຺ທໂວ ຈ

໙໐໒. (ກ) ຕຕ຺ຖ ກຕໂມ ອນຊ຺ຊໂວ? ໂຍ ອນຊ຺ຊໂວ ອນຊ຺ຊວຕາ ຊິມ຺ຫຕາ ວງ຺ກຕາ ກຸຏິລຕາ – ອຍໍ ວຸຈ຺ຈຕິ ‘‘ອນຊ຺ຊໂວ’’.

(ຂ) ຕຕ຺ຖ ກຕໂມ ອມທ຺ທໂວ? ຍາ ອມຸທຸຕາ ອມທ຺ທວຕາ ກກ຺ຂຬິຍໍ ຜາຣຸສິຍໍ ກກ຺ຂຬຕາ ກຐິນຕາ [ກຖິນຕາ (ສ຺ຍາ. ກ.)] ອຸຊຸຈິຕ຺ຕຕາ ອມຸທຸຕາ – ອຍໍ ວຸຈ຺ຈຕິ ‘‘ອມທ຺ທໂວ’’.

(໑໓) ອກ຺ຂນ຺ຕິ ຈ ອໂສຣຈ຺ຈຎ຺ຈ

໙໐໓. (ກ) ຕຕ຺ຖ ກຕມາ ອກ຺ຂນ຺ຕິ? ຍາ ອກ຺ຂນ຺ຕິ ອກ຺ຂມນຕາ ອນຘິວາສນຕາ ຈຓ຺ຑິກ຺ກໍ ອສຸໂຣໂປ ອນຕ຺ຕມນຕາ ຈິຕ຺ຕສ຺ສ – ອຍໍ ວຸຈ຺ຈຕິ ‘‘ອກ຺ຂນ຺ຕິ’’.

(ຂ) ຕຕ຺ຖ ກຕມໍ ອໂສຣຈ຺ຈໍ? ກາຍິໂກ ວີຕິກ຺ກໂມ ວາຈສິໂກ ວີຕິກ຺ກໂມ ກາຍິກວາຈສິໂກ ວີຕິກ຺ກໂມ – ອິທໍ ວຸຈ຺ຈຕິ ‘‘ອໂສຣຈ຺ຈໍ’’. ສພ຺ພມ຺ປິ ທຸສ຺ສີລ຺ຍໍ ອໂສຣຈ຺ຈໍ.

(໑໔) ອສາຂລ຺ຍຎ຺ຈ ອປ຺ປຏິສນ຺ຖາໂຣ ຈ

໙໐໔. (ກ) ຕຕ຺ຖ ກຕມໍ ອສາຂລ຺ຍໍ? ຍາ ສາ ວາຈາ ກຓ຺ຑກາ ກກ຺ກສາ ປຣກຏຸກາ ປຣາຠິສຊ຺ຊນີ ໂກຘສາມນ຺ຕາ ອສມາຘິສໍວຕ຺ຕນິກາ ຕຖາຣູປິໍ ວາຈໍ ຠາສິຕາ ໂຫຕິ. ຍາ ຕຕ຺ຖ ອສຓ຺ຫວາຈຕາ ອສຂິລວາຈຕາ ຜຣຸສວາຈຕາ – ອິທໍ ວຸຈ຺ຈຕິ ‘‘ອສາຂລ຺ຍໍ’’.

(ຂ) ຕຕ຺ຖ ກຕໂມ ອປ຺ປຏິສນ຺ຖາໂຣ [ອປ຺ປຏິສນ຺ຘາໂຣ (ກ.)]? ທ຺ເວ ປຏິສນ຺ຖາຣາ – ອາມິສປຏິສນ຺ຖາໂຣ ຈ ຘມ຺ມປຏິສນ຺ຖາໂຣ ຈ. ອິເຘກຈ຺ໂຈ ອປ຺ປຏິສນ຺ຖາຣໂກ ໂຫຕິ ອາມິສປຏິສນ຺ຖາເຣນ ວາ ຘມ຺ມປຏິສນ຺ຖາເຣນ ວາ – ອຍໍ ວຸຈ຺ຈຕິ ‘‘ອປ຺ປຏິສນ຺ຖາໂຣ’’.

(໑໕) ອິນ຺ທ຺ຣິເຍສຸ ອຄຸຕ຺ຕທ຺ວາຣຕາ ຈ ໂຠຊເນ ອມຕ຺ຕຎ຺ຎຸຕາ ຈ

໙໐໕. (ກ) ຕຕ຺ຖ ກຕມາ ອິນ຺ທ຺ຣິເຍສຸ ອຄຸຕ຺ຕທ຺ວາຣຕາ? ອິເຘກຈ຺ໂຈ ຈກ຺ຂຸນາ ຣູປໍ ທິສ຺ວາ ນິມິຕ຺ຕຄ຺ຄາຫີ ໂຫຕິ ອນຸພ຺ຍຎ຺ຊນຄ຺ຄາຫີ. ຍຕ຺ວາຘິກຣຓເມນໍ ຈກ຺ຂຸນ຺ທ຺ຣິຍໍ ອສໍວຸຕໍ ວິຫຣນ຺ຕໍ ອຠິຊ຺ຌາໂທມນສ຺ສາ ປາປກາ ອກຸສລາ ຘມ຺ມາ ອນ຺ວາສ຺ສເວຍ຺ຍຸໍ, ຕສ຺ສ ສໍວຣາຍ ນ ປຏິປຊ຺ຊຕິ, ນ ຣກ຺ຂຕິ ຈກ຺ຂຸນ຺ທ຺ຣິຍໍ, ຈກ຺ຂຸນ຺ທ຺ຣິເຍ ນ ສໍວຣໍ ອາປຊ຺ຊຕິ. ໂສເຕນ ສທ຺ທໍ ສຸຕ຺ວາ…ເປ… ຆາເນນ ຄນ຺ຘໍ ຆາຍິຕ຺ວາ…ເປ… ຊິວ຺ຫາຍ ຣສໍ ສາຍິຕ຺ວາ…ເປ… ກາເຍນ ໂຜຏ຺ຐພ຺ພໍ ຜຸສິຕ຺ວາ…ເປ… ມນສາ ຘມ຺ມໍ ວິຎ຺ຎາຍ ນິມິຕ຺ຕຄ຺ຄາຫີ ໂຫຕິ ອນຸພ຺ຍຎ຺ຊນຄ຺ຄາຫີ. ຍຕ຺ວາຘິກຣຓເມນໍ ມນິນ຺ທ຺ຣິຍໍ ອສໍວຸຕໍ ວິຫຣນ຺ຕໍ ອຠິຊ຺ຌາໂທມນສ຺ສາ ປາປກາ ອກຸສລາ ຘມ຺ມາ ອນ຺ວາສ຺ສເວຍ຺ຍຸໍ, ຕສ຺ສ ສໍວຣາຍ ນ ປຏິປຊ຺ຊຕິ, ນ ຣກ຺ຂຕິ ມນິນ຺ທ຺ຣິຍໍ, ມນິນ຺ທ຺ຣິເຍ ນ ສໍວຣໍ ອາປຊ຺ຊຕິ. ຍາ ອິເມສໍ ຉນ຺ນໍ ອິນ຺ທ຺ຣິຍານໍ ອຄຸຕ຺ຕິ ອໂຄປນາ ອນາຣກ຺ໂຂ ອສໍວໂຣ – ອຍໍ ວຸຈ຺ຈຕິ ‘‘ອິນ຺ທ຺ຣິເຍສຸ ອຄຸຕ຺ຕທ຺ວາຣຕາ’’.

(ຂ) ຕຕ຺ຖ ກຕມາ ໂຠຊເນ ອມຕ຺ຕຎ຺ຎຸຕາ? ອິເຘກຈ຺ໂຈ ອປ຺ປຏິສງ຺ຂາ ອໂຍນິໂສ ອາຫາຣໍ ອາຫາເຣຕິ ທວາຍ ມທາຍ ມຓ຺ຑນາຍ ວິຠູສນາຍ. ຍາ ຕຕ຺ຖ ອສນ຺ຕຸຏ຺ຐິຕາ ອມຕ຺ຕຎ຺ຎຸຕາ ອປ຺ປຏິສງ຺ຂາ ໂຠຊເນ – ອຍໍ ວຸຈ຺ຈຕິ ‘‘ໂຠຊເນ ອມຕ຺ຕຎ຺ຎຸຕາ.’’

(໑໖) ມຸຏ຺ຐສ຺ສຈ຺ຈຎ຺ຈ ອສມ຺ປຊຎ຺ຎຎ຺ຈ

໙໐໖. (ກ) ຕຕ຺ຖ ກຕມໍ ມຸຏ຺ຐສ຺ສຈ຺ຈໍ? ຍາ ອສ຺ສຕິ ອນນຸສ຺ສຕິ ອປ຺ປຏິສ຺ສຕິ ອສ຺ສຕິ ອສ຺ສຣຓຕາ ອຘາຣຓຕາ ປິລາປນຕາ ສມ຺ມຸສນຕາ – ອິທໍ ວຸຈ຺ຈຕິ ‘‘ມຸຏ຺ຐສ຺ສຈ຺ຈໍ’’.

(ຂ) ຕຕ຺ຖ ກຕມໍ ອສມ຺ປຊຎ຺ຎໍ? ຍໍ ອຎ຺ຎາຓໍ ອທສ຺ສນໍ…ເປ… ອວິຊ຺ຊາລງ຺ຄີ ໂມໂຫ ອກຸສລມູລໍ – ອິທໍ ວຸຈ຺ຈຕິ ‘‘ອສມ຺ປຊຎ຺ຎໍ’’.

(໑໗) ສີລວິປຕ຺ຕິ ຈ ທິຏ຺ຐິວິປຕ຺ຕິ ຈ

໙໐໗. (ກ) ຕຕ຺ຖ ກຕມາ ສີລວິປຕ຺ຕິ? ໂຍ ກາຍິໂກ ວີຕິກ຺ກໂມ ວາຈສິໂກ ວີຕິກ຺ກໂມ ກາຍິກວາຈສິໂກ ວີຕິກ຺ກໂມ – ອຍໍ ວຸຈ຺ຈຕິ ‘‘ສີລວິປຕ຺ຕິ’’. ສພ຺ພມ຺ປິ ທຸສ຺ສີລ຺ຍໍ ສີລວິປຕ຺ຕິ.

(ຂ) ຕຕ຺ຖ ກຕມາ ທິຏ຺ຐິວິປຕ຺ຕິ? ‘‘ນຕ຺ຖິ ທິນ຺ນໍ, ນຕ຺ຖິ ຍິຏ຺ຐໍ…ເປ… ເຍ ອິມຎ຺ຈ ໂລກໍ ປຣຎ຺ຈ ໂລກໍ ສຍໍ ອຠິຎ຺ຎາ ສຈ຺ຉິກຕ຺ວາ ປເວເທນ຺ຕີ’’ຕິ – ຍາ ເອວຣູປາ ທິຏ຺ຐິ ທິຏ຺ຐິຄຕໍ…ເປ… ວິປຣິຍາສຄ຺ຄາໂຫ – ອຍໍ ວຸຈ຺ຈຕິ ‘‘ທິຏ຺ຐິວິປຕ຺ຕິ’’. ສພ຺ພາປິ ມິຈ຺ຉາທິຏ຺ຐິ ທິຏ຺ຐິວິປຕ຺ຕິ.

(໑໘) ອຊ຺ຌຕ຺ຕສໍໂຍຊນຎ຺ຈ ພຫິທ຺ຘາສໍໂຍຊນຎ຺ຈ

໙໐໘. (ກ) ຕຕ຺ຖ ກຕມໍ ອຊ຺ຌຕ຺ຕສໍໂຍຊນໍ? ປຎ຺ໂຈຣມ຺ຠາຄິຍານິ ສໍໂຍຊນານິ – ອຊ຺ຌຕ຺ຕສໍໂຍຊນໍ. (ຂ) ປຎ຺ຈຸທ຺ຘມ຺ຠາຄິຍານິ ສໍໂຍຊນານິ – ພຫິທ຺ຘາສໍໂຍຊນໍ.

ທຸກໍ.