໑໐. ທສກນິທ຺ເທໂສ

(໑) ທສ ກິເລສວຕ຺ຖູນິ

໙໖໖. ຕຕ຺ຖ ກຕມານິ ທສ ກິເລສວຕ຺ຖູນິ? ໂລໂຠ, ໂທໂສ, ໂມໂຫ, ມາໂນ, ທິຏ຺ຐິ, ວິຈິກິຈ຺ຉາ, ຖິນໍ, ອຸທ຺ຘຈ຺ຈໍ, ອຫິຣິກໍ, ອໂນຕ຺ຕປ຺ປໍ – ອິມານິ ທສ ກິເລສວຕ຺ຖູນິ.

(໒) ທສ ອາຆາຕວຕ຺ຖູນິ

໙໖໗. ຕຕ຺ຖ ກຕມານິ ທສ ອາຆາຕວຕ຺ຖູນິ? ‘‘ອນຕ຺ຖໍ ເມ ອຈຣີ’’ຕິ ອາຆາໂຕ ຊາຍຕິ, ‘‘ອນຕ຺ຖໍ ເມ ຈຣຕີ’’ຕິ ອາຆາໂຕ ຊາຍຕິ, ‘‘ອນຕ຺ຖໍ ເມ ຈຣິສ຺ສຕີ’’ຕິ ອາຆາໂຕ ຊາຍຕິ, ‘‘ປິຍສ຺ສ ເມ ມນາປສ຺ສ ອນຕ຺ຖໍ ອຈຣິ’’…ເປ… ອນຕ຺ຖໍ ຈຣຕິ…ເປ… ອນຕ຺ຖໍ ຈຣິສ຺ສຕີຕິ ອາຆາໂຕ ຊາຍຕິ, ອປ຺ປິຍສ຺ສ ເມ ອມນາປສ຺ສ ອຕ຺ຖໍ ອຈຣິ…ເປ… ອຕ຺ຖໍ ຈຣຕິ…ເປ… ອຕ຺ຖໍ ຈຣິສ຺ສຕີຕິ ອາຆາໂຕ ຊາຍຕິ, ອຏ຺ຐາເນ ວາ ປນ ອາຆາໂຕ ຊາຍຕິ – ອິມານິ ທສ ອາຆາຕວຕ຺ຖູນິ.

(໓) ທສ ອກຸສລກມ຺ມປຖາ

໙໖໘. ຕຕ຺ຖ ກຕເມ ທສ ອກຸສລກມ຺ມປຖາ? ປາຓາຕິປາໂຕ, ອທິນ຺ນາທານໍ, ກາເມສຸມິຈ຺ຉາຈາໂຣ, ມຸສາວາໂທ, ປິສຸຓາ ວາຈາ, ຜຣຸສາ ວາຈາ, ສມ຺ຜປ຺ປລາໂປ, ອຠິຊ຺ຌາ, ພ຺ຍາປາໂທ, ມິຈ຺ຉາທິຏ຺ຐິ – ອິເມ ທສ ອກຸສລກມ຺ມປຖາ.

(໔) ທສ ສໍໂຍຊນານິ

໙໖໙. ຕຕ຺ຖ ກຕມານິ ທສ ສໍໂຍຊນານິ? ກາມຣາຄສໍໂຍຊນໍ, ປຏິຆສໍໂຍຊນໍ, ມານສໍໂຍຊນໍ, ທິຏ຺ຐິສໍໂຍຊນໍ, ວິຈິກິຈ຺ຉາສໍໂຍຊນໍ, ສີລພ຺ພຕປຣາມາສສໍໂຍຊນໍ, ຠວຣາຄສໍໂຍຊນໍ, ອິສ຺ສາສໍໂຍຊນໍ, ມຈ຺ຉຣິຍສໍໂຍຊນໍ, ອວິຊ຺ຊາສໍໂຍຊນໍ – ອິມານິ ທສ ສໍໂຍຊນານິ.

(໕) ທສ ມິຈ຺ຉຕ຺ຕາ

໙໗໐. ຕຕ຺ຖ ກຕເມ ທສ ມິຈ຺ຉຕ຺ຕາ? ມິຈ຺ຉາທິຏ຺ຐິ, ມິຈ຺ຉາສງ຺ກປ຺ໂປ, ມິຈ຺ຉາວາຈາ, ມິຈ຺ຉາກມ຺ມນ຺ໂຕ, ມິຈ຺ຉາອາຊີໂວ, ມິຈ຺ຉາວາຍາໂມ, ມິຈ຺ຉາສຕິ, ມິຈ຺ຉາສມາຘິ, ມິຈ຺ຉາຎາຓໍ, ມິຈ຺ຉາວິມຸຕ຺ຕິ – ອິເມ ທສ ມິຈ຺ຉຕ຺ຕາ.

(໖) ທສວຕ຺ຖຸກາ ມິຈ຺ຉາທິຏ຺ຐິ

໙໗໑. ຕຕ຺ຖ ກຕມາ ທສວຕ຺ຖຸກາ ມິຈ຺ຉາທິຏ຺ຐິ? ນຕ຺ຖິ ທິນ຺ນໍ, ນຕ຺ຖິ ຍິຏ຺ຐໍ, ນຕ຺ຖິ ຫຸຕໍ, ນຕ຺ຖິ ສຸກຕທຸກ຺ກຏານໍ ກມ຺ມານໍ ຜລໍ ວິປາໂກ, ນຕ຺ຖິ ອຍໍ ໂລໂກ, ນຕ຺ຖິ ປໂຣ ໂລໂກ, ນຕ຺ຖິ ມາຕາ, ນຕ຺ຖິ ປິຕາ, ນຕ຺ຖິ ສຕ຺ຕາ ໂອປປາຕິກາ, ນຕ຺ຖິ ໂລເກ ສມຓພ຺ຣາຫ຺ມຓາ ສມ຺ມຄ຺ຄຕາ [ສມຄ຺ຄຕາ (ກ.)] ສມ຺ມາ ປຏິປນ຺ນາ ເຍ ອິມຎ຺ຈ ໂລກໍ ປຣຎ຺ຈ ໂລກໍ ສຍໍ ອຠິຎ຺ຎາ ສຈ຺ຉິກຕ຺ວາ ປເວເທນ຺ຕີຕິ – ອຍໍ ທສວຕ຺ຖຸກາ ມິຈ຺ຉາທິຏ຺ຐິ.

(໗) ທສວຕ຺ຖຸກາ ອນ຺ຕຄ຺ຄາຫິກາ ທິຏ຺ຐິ

໙໗໒. ຕຕ຺ຖ ກຕມາ ທສວຕ຺ຖຸກາ ອນ຺ຕຄ຺ຄາຫິກາ ທິຏ຺ຐິ? ສສ຺ສໂຕ ໂລໂກຕິ ວາ, ອສສ຺ສໂຕ ໂລໂກຕິ ວາ, ອນ຺ຕວາ ໂລໂກຕິ ວາ, ອນນ຺ຕວາ ໂລໂກຕິ ວາ, ຕໍ ຊີວໍ ຕໍ ສຣີຣນ຺ຕິ ວາ, ອຎ຺ຎໍ ຊີວໍ ອຎ຺ຎໍ ສຣີຣນ຺ຕິ ວາ, ໂຫຕິ ຕຖາຄໂຕ ປຣໍ ມຣຓາຕິ ວາ, ນ ໂຫຕິ ຕຖາຄໂຕ ປຣໍ ມຣຓາຕິ ວາ, ໂຫຕິ ຈ ນ ຈ ໂຫຕິ ຕຖາຄໂຕ ປຣໍ ມຣຓາຕິ ວາ, ເນວ ໂຫຕິ ນ ນ ໂຫຕິ ຕຖາຄໂຕ ປຣໍ ມຣຓາຕິ ວາ – ອຍໍ ທສວຕ຺ຖຸກາ ອນ຺ຕຄ຺ຄາຫິກາ ທິຏ຺ຐິ.

ທສກໍ.