໓. ປຎ຺ຫາປຸຈ຺ຉກໍ

໖໓໘. ຈຕ຺ຕາຣິ ຌານານິ – ອິຘ ຠິກ຺ຂຸ ວິວິຈ຺ເຈວ ກາເມຫິ ວິວິຈ຺ຈ ອກຸສເລຫິ ຘມ຺ເມຫິ ສວິຕກ຺ກໍ ສວິຈາຣໍ ວິເວກຊໍ ປີຕິສຸຂໍ ປຐມໍ ຌານໍ ອຸປສມ຺ປຊ຺ຊ ວິຫຣຕິ…ເປ… ວິຕກ຺ກວິຈາຣານໍ ວູປສມາ ອຊ຺ຌຕ຺ຕໍ ສມ຺ປສາທນໍ ເຈຕໂສ ເອໂກທິຠາວໍ ອວິຕກ຺ກໍ ອວິຈາຣໍ ສມາຘິຊໍ ປີຕິສຸຂໍ ທຸຕິຍໍ ຌານໍ ອຸປສມ຺ປຊ຺ຊ ວິຫຣຕິ…ເປ… ປີຕິຍາ ຈ ວິຣາຄາ ອຸເປກ຺ຂໂກ ຈ ວິຫຣຕິ ສໂຕ ຈ ສມ຺ປຊາໂນ ສຸຂຎ຺ຈ ກາເຍນ ປຏິສໍເວເທຕິ, ຍໍ ຕໍ ອຣິຍາ ອາຈິກ຺ຂນ຺ຕິ – ‘‘ອຸເປກ຺ຂໂກ ສຕິມາ ສຸຂວິຫາຣີ’’ຕິ ຕຕິຍໍ ຌານໍ ອຸປສມ຺ປຊ຺ຊ ວິຫຣຕິ…ເປ… ສຸຂສ຺ສ ຈ ປຫານາ ທຸກ຺ຂສ຺ສ ຈ ປຫານາ ປຸພ຺ເພວ ໂສມນສ຺ສໂທມນສ຺ສານໍ ອຕ຺ຖງ຺ຄມາ ອທຸກ຺ຂມສຸຂໍ ອຸເປກ຺ຂາສຕິປາຣິສຸທ຺ຘິໍ ຈຕຸຕ຺ຖໍ ຌານໍ ອຸປສມ຺ປຊ຺ຊ ວິຫຣຕິ.

໖໓໙. ຈຕຸນ຺ນໍ ຌານານໍ ກຕິ ກຸສລາ, ກຕິ ອກຸສລາ, ກຕິ ອພ຺ຍາກຕາ…ເປ… ກຕິ ສຣຓາ, ກຕິ ອຣຓາ?

໑. ຕິກໍ

໖໔໐. ສິຍາ ກຸສລາ, ສິຍາ ອພ຺ຍາກຕາ. ຕີຓິ ຌານານິ – ເອຕ຺ຖຸປ຺ປນ຺ນໍ ສຸຂໍ ເວທນໍ ຐເປຕ຺ວາ ສຸຂາຍ ເວທນາຍ ສມ຺ປຍຸຕ຺ຕາ, ຈຕຸຕ຺ຖໍ ຌານໍ – ເອຕ຺ຖຸປ຺ປນ຺ນໍ ອທຸກ຺ຂມສຸຂໍ ເວທນໍ ຐເປຕ຺ວາ ອທຸກ຺ຂມສຸຂາຍ ເວທນາຍ ສມ຺ປຍຸຕ຺ຕໍ. ສິຍາ ວິປາກາ, ສິຍາ ວິປາກຘມ຺ມຘມ຺ມາ, ສິຍາ ເນວວິປາກນວິປາກຘມ຺ມຘມ຺ມາ. ສິຍາ ອຸປາທິນ຺ນຸປາທານິຍາ, ສິຍາ ອນຸປາທິນ຺ນຸປາທານິຍາ, ສິຍາ ອນຸປາທິນ຺ນອນຸປາທານິຍາ. ສິຍາ ອສໍກິລິຏ຺ຐສໍກິເລສິກາ, ສິຍາ ອສໍກິລິຏ຺ຐອສໍກິເລສິກາ. ປຐມໍ ຌານໍ – ເອຕ຺ຖຸປ຺ປນ຺ເນ ວິຕກ຺ກວິຈາເຣ ຐເປຕ຺ວາ ສວິຕກ຺ກໍ ສວິຈາຣໍ, ຕີຓິ ຌານານິ ອວິຕກ຺ກອວິຈາຣາ. ທ຺ເວ ຌານານິ – ເອຕ຺ຖຸປ຺ປນ຺ນໍ ປີຕິໍ ຐເປຕ຺ວາ ປີຕິສຫຄຕາ, ຕີຓິ ຌານານິ – ເອຕ຺ຖຸປ຺ປນ຺ນໍ ສຸຂໍ ຐເປຕ຺ວາ ສຸຂສຫຄຕາ, ຈຕຸຕ຺ຖໍ ຌານໍ – ເອຕ຺ຖຸປ຺ປນ຺ນໍ ອຸເປກ຺ຂໍ ຐເປຕ຺ວາ ອຸເປກ຺ຂາສຫຄຕໍ. ເນວ ທສ຺ສເນນ ນ ຠາວນາຍ ປຫາຕພ຺ພາ. ເນວ ທສ຺ສເນນ ນ ຠາວນາຍ ປຫາຕພ຺ພເຫຕຸກາ. ສິຍາ ອາຈຍຄາມິໂນ, ສິຍາ ອປຈຍຄາມິໂນ, ສິຍາ ເນວາຈຍຄາມິນາປຈຍຄາມິໂນ. ສິຍາ ເສກ຺ຂາ, ສິຍາ ອເສກ຺ຂາ, ສິຍາ ເນວເສກ຺ຂນາເສກ຺ຂາ. ສິຍາ ມຫຄ຺ຄຕາ, ສິຍາ ອປ຺ປມາຓາ. ຕີຓິ ຌານານິ ນ ວຕ຺ຕພ຺ພາ ປຣິຕ຺ຕາຣມ຺ມຓາຕິປິ, ມຫຄ຺ຄຕາຣມ຺ມຓາຕິປິ, ສິຍາ ອປ຺ປມາຓາຣມ຺ມຓາ, ສິຍາ ນ ວຕ຺ຕພ຺ພາ ອປ຺ປມາຓາຣມ຺ມຓາຕິ; ຈຕຸຕ຺ຖໍ ຌານໍ ສິຍາ ປຣິຕ຺ຕາຣມ຺ມຓໍ, ສິຍາ ມຫຄ຺ຄຕາຣມ຺ມຓໍ, ສິຍາ ອປ຺ປມາຓາຣມ຺ມຓໍ; ສິຍາ ນ ວຕ຺ຕພ຺ພໍ ປຣິຕ຺ຕາຣມ຺ມຓນ຺ຕິປິ, ມຫຄ຺ຄຕາຣມ຺ມຓນ຺ຕິປິ, ອປ຺ປມາຓາຣມ຺ມຓນ຺ຕິປິ. ສິຍາ ມຊ຺ຌິມາ, ສິຍາ ປຓີຕາ. ສິຍາ ສມ຺ມຕ຺ຕນິຍຕາ, ສິຍາ ອນິຍຕາ. ຕີຓິ ຌານານິ ນ ມຄ຺ຄາຣມ຺ມຓາ, ສິຍາ ມຄ຺ຄເຫຕຸກາ, ສິຍາ ມຄ຺ຄາຘິປຕິໂນ, ສິຍາ ນ ວຕ຺ຕພ຺ພາ ມຄ຺ຄເຫຕຸກາຕິປິ, ມຄ຺ຄາຘິປຕິໂນຕິປິ; ຈຕຸຕ຺ຖໍ ຌານໍ ສິຍາ ມຄ຺ຄາຣມ຺ມຓໍ, ສິຍາ ມຄ຺ຄເຫຕຸກໍ, ສິຍາ ມຄ຺ຄາຘິປຕິ, ສິຍາ ນ ວຕ຺ຕພ຺ພໍ ມຄ຺ຄາຣມ຺ມຓນ຺ຕິປິ, ມຄ຺ຄເຫຕຸກນ຺ຕິປິ ມຄ຺ຄາຘິປຕີຕິປິ. ສິຍາ ອຸປ຺ປນ຺ນາ, ສິຍາ ອນຸປ຺ປນ຺ນາ, ສິຍາ ອຸປ຺ປາທິໂນ. ສິຍາ ອຕີຕາ, ສິຍາ ອນາຄຕາ, ສິຍາ ປຈ຺ຈຸປ຺ປນ຺ນາ. ຕີຓິ ຌານານິ ນ ວຕ຺ຕພ຺ພາ ອຕີຕາຣມ຺ມຓາຕິປິ, ອນາຄຕາຣມ຺ມຓາຕິປິ, ປຈ຺ຈຸປ຺ປນ຺ນາຣມ຺ມຓາຕິປິ; ຈຕຸຕ຺ຖໍ ຌານໍ ສິຍາ ອຕີຕາຣມ຺ມຓໍ, ສິຍາ ອນາຄຕາຣມ຺ມຓໍ, ສິຍາ ປຈ຺ຈຸປ຺ປນ຺ນາຣມ຺ມຓໍ, ສິຍາ ນ ວຕ຺ຕພ຺ພໍ ອຕີຕາຣມ຺ມຓນ຺ຕິປິ, ອນາຄຕາຣມ຺ມຓນ຺ຕິປິ, ປຈ຺ຈຸປ຺ປນ຺ນາຣມຓນ຺ຕິປິ. ສິຍາ ອຊ຺ຌຕ຺ຕາ, ສິຍາ ພຫິທ຺ຘາ, ສິຍາ ອຊ຺ຌຕ຺ຕພຫິທ຺ຘາ. ຕີຓິ ຌານານິ ພຫິທ຺ຘາຣມ຺ມຓາ, ຈຕຸຕ຺ຖໍ ຌານໍ ສິຍາ ອຊ຺ຌຕ຺ຕາຣມ຺ມຓໍ, ສິຍາ ພຫິທ຺ຘາຣມ຺ມຓໍ, ສິຍາ ອຊ຺ຌຕ຺ຕພຫິທ຺ຘາຣມ຺ມຓໍ, ສິຍາ ນ ວຕ຺ຕພ຺ພໍ ອຊ຺ຌຕ຺ຕາຣມ຺ມຓນ຺ຕິປິ, ພຫິທ຺ຘາຣມ຺ມຓນ຺ຕິປິ, ອຊ຺ຌຕ຺ຕພຫິທ຺ຘາຣມ຺ມຓນ຺ຕິປິ. ອນິທສ຺ສນອປ຺ປຏິຆາ.

໒. ທຸກໍ

໖໔໑. ນ ເຫຕູ, ສເຫຕຸກາ, ເຫຕຸສມ຺ປຍຸຕ຺ຕາ, ນ ວຕ຺ຕພ຺ພາ ‘‘ເຫຕູ ເຈວ ສເຫຕຸກາ ຈາ’’ຕິ, ສເຫຕຸກາ ເຈວ ນ ຈ ເຫຕູ, ນ ວຕ຺ຕພ຺ພາ ‘‘ເຫຕູ ເຈວ ເຫຕຸສມ຺ປຍຸຕ຺ຕາ ຈາ’’ຕິ, ເຫຕຸສມ຺ປຍຸຕ຺ຕາ ເຈວ ນ ຈ ເຫຕູ, ນ ເຫຕູ ສເຫຕຸກາ.

ສປ຺ປຈ຺ຈຍາ, ສງ຺ຂຕາ, ອນິທສ຺ສນາ, ອປ຺ປຏິຆາ, ອຣູປາ, ສິຍາ ໂລກິຍາ, ສິຍາ ໂລກຸຕ຺ຕຣາ, ເກນຈິ ວິຎ຺ເຎຍ຺ຍາ, ເກນຈິ ນ ວິຎ຺ເຎຍ຺ຍາ.

ໂນ ອາສວາ, ສິຍາ ສາສວາ, ສິຍາ ອນາສວາ, ອາສວວິປ຺ປຍຸຕ຺ຕາ, ນ ວຕ຺ຕພ຺ພາ ‘‘ອາສວາ ເຈວ ສາສວາ ຈາ’’ຕິ, ສິຍາ ສາສວາ ເຈວ ໂນ ຈ ອາສວາ, ສິຍາ ນ ວຕ຺ຕພ຺ພາ ‘‘ສາສວາ ເຈວ ໂນ ຈ ອາສວາ’’ຕິ. ນ ວຕ຺ຕພ຺ພາ ‘‘ອາສວາ ເຈວ ອາສວສມ຺ປຍຸຕ຺ຕາ ຈາຕິ’’ປິ, ອາສວສມ຺ປຍຸຕ຺ຕາ ເຈວ ໂນ ຈ ອາສວາຕິປິ. ສິຍາ ອາສວວິປ຺ປຍຸຕ຺ຕາ ສາສວາ, ສິຍາ ອາສວວິປ຺ປຍຸຕ຺ຕາ ອນາສວາ.

ໂນ ສໍໂຍຊນາ…ເປ… ໂນ ຄນ຺ຖາ…ເປ… ໂນ ໂອຆາ…ເປ… ໂນ ໂຍຄາ…ເປ… ໂນ ນີວຣຓາ…ເປ… ໂນ ປຣາມາສາ…ເປ… ສາຣມ຺ມຓາ, ໂນ ຈິຕ຺ຕາ, ເຈຕສິກາ, ຈິຕ຺ຕສມ຺ປຍຸຕ຺ຕາ, ຈິຕ຺ຕສໍສຏ຺ຐາ, ຈິຕ຺ຕສມຸຏ຺ຐານາ, ຈິຕ຺ຕສຫຠຸໂນ, ຈິຕ຺ຕານຸປຣິວຕ຺ຕິໂນ, ຈິຕ຺ຕສໍສຏ຺ຐສມຸຏ຺ຐານາ, ຈິຕ຺ຕສໍສຏ຺ຐສມຸຏ຺ຐານສຫຠຸໂນ, ຈິຕ຺ຕສໍສຏ຺ຐສມຸຏ຺ຐານານຸປຣິວຕ຺ຕິໂນ, ພາຫິຣາ, ໂນ ອຸປາທາ, ສິຍາ ອຸປາທິນ຺ນາ, ສິຍາ ອນຸປາທິນ຺ນາ.

ໂນ ອຸປາທານາ…ເປ… ໂນ ກິເລສາ…ເປ… ນ ທສ຺ສເນນ ປຫາຕພ຺ພາ, ນ ຠາວນາຍ ປຫາຕພ຺ພາ, ນ ທສ຺ສເນນ ປຫາຕພ຺ພເຫຕຸກາ, ນ ຠາວນາຍ ປຫາຕພ຺ພເຫຕຸກາ. ປຐມໍ ຌານໍ – ເອຕ຺ຖຸປ຺ປນ຺ນໍ ວິຕກ຺ກໍ ຐເປຕ຺ວາ ສວິຕກ຺ກໍ, ຕີຓິ ຌານານິ ອວິຕກ຺ກາ. ປຐມໍ ຌານໍ – ເອຕ຺ຖຸປ຺ປນ຺ນໍ ວິຈາຣໍ ຐເປຕ຺ວາ ສວິຈາຣໍ, ຕີຓິ ຌານານິ ອວິຈາຣາ. ທ຺ເວ ຌານານິ – ເອຕ຺ຖຸປ຺ປນ຺ນໍ ປີຕິໍ ຐເປຕ຺ວາ ສປ຺ປີຕິກາ, ທ຺ເວ ຌານານິ ອປ຺ປີຕິກາ. ທ຺ເວ ຌານານິ – ເອຕ຺ຖຸປ຺ປນ຺ນໍ ປີຕິໍ ຐເປຕ຺ວາ ປີຕິສຫຄຕາ, ທ຺ເວ ຌານານິ ນ ປີຕິສຫຄຕາ. ຕີຓິ ຌານານິ – ເອຕ຺ຖຸປ຺ປນ຺ນໍ ສຸຂໍ ຐເປຕ຺ວາ ສຸຂສຫຄຕາ, ຈຕຸຕ຺ຖໍ ຌານໍ ນ ສຸຂສຫຄຕໍ. ຈຕຸຕ຺ຖໍ ຌານໍ – ເອຕ຺ຖຸປ຺ປນ຺ນໍ ອຸເປກ຺ຂໍ ຐເປຕ຺ວາ ອຸເປກ຺ຂາສຫຄຕໍ, ຕີຓິ ຌານານິ ອຸເປກ຺ຂາສຫຄຕາ, ນ ກາມາວຈຣາ, ສິຍາ ຣູປາວຈຣາ, ສິຍາ ນ ຣູປາວຈຣາ, ຕີຓິ ຌານານິ ນ ອຣູປາວຈຣາ, ຈຕຸຕ຺ຖໍ ຌານໍ ສິຍາ ອຣູປາວຈຣໍ, ສິຍາ ນ ອຣູປາວຈຣໍ, ສິຍາ ປຣິຍາປນ຺ນາ, ສິຍາ ອປຣິຍາປນ຺ນາ, ສິຍາ ນິຍ຺ຍານິກາ, ສິຍາ ອນິຍ຺ຍານິກາ, ສິຍາ ນິຍຕາ, ສິຍາ ອນິຍຕາ, ສິຍາ ສອຸຕ຺ຕຣາ, ສິຍາ ອນຸຕ຺ຕຣາ, ອຣຓາຕິ.

ປຎ຺ຫາປຸຈ຺ຉກໍ.

ຌານວິຠງ຺ໂຄ ນິຏ຺ຐິໂຕ.