໑໓. ອປ຺ປມຎ຺ຎາວິຠງ຺ໂຄ

໑. ສຸຕ຺ຕນ຺ຕຠາຊນີຍໍ

໖໔໒. ຈຕສ຺ໂສ ອປ຺ປມຎ຺ຎາໂຍ – ອິຘ ຠິກ຺ຂຸ ເມຕ຺ຕາສຫຄເຕນ ເຈຕສາ ເອກໍ ທິສໍ ຜຣິຕ຺ວາ ວິຫຣຕິ, ຕຖາ ທຸຕິຍໍ, ຕຖາ ຕຕິຍໍ, ຕຖາ ຈຕຸຕ຺ຖໍ [ຈຕຸຕ຺ຖິໍ (ສີ.)]. ອິຕິ ອຸທ຺ຘມໂຘ ຕິຣິຍໍ ສພ຺ພຘິ ສພ຺ພຕ຺ຕຕາຍ ສພ຺ພາວນ຺ຕໍ ໂລກໍ ເມຕ຺ຕາສຫຄເຕນ ເຈຕສາ ວິປຸເລນ ມຫຄ຺ຄເຕນ ອປ຺ປມາເຓນ ອເວເຣນ ອພ຺ຍາປຊ຺ເຊນ [ອພ຺ຍາປຊ຺ເຌນ (ສີ. ສ຺ຍາ.)] ຜຣິຕ຺ວາ ວິຫຣຕິ. ກຣຸຓາສຫຄເຕນ ເຈຕສາ ເອກໍ ທິສໍ ຜຣິຕ຺ວາ ວິຫຣຕິ, ຕຖາ ທຸຕິຍໍ, ຕຖາ ຕຕິຍໍ, ຕຖາ ຈຕຸຕ຺ຖໍ. ອິຕິ ອຸທ຺ຘມໂຘ ຕິຣິຍໍ ສພ຺ພຘິ ສພ຺ພຕ຺ຕຕາຍ ສພ຺ພາວນ຺ຕໍ ໂລກໍ ກຣຸຓາສຫຄເຕນ ເຈຕສາ ວິປຸເລນ ມຫຄ຺ຄເຕນ ອປ຺ປມາເຓນ ອເວເຣນ ອພ຺ຍາປຊ຺ເຊນ ຜຣິຕ຺ວາ ວິຫຣຕິ. ມຸທິຕາສຫຄເຕນ ເຈຕສາ ເອກໍ ທິສໍ ຜຣິຕ຺ວາ ວິຫຣຕິ, ຕຖາ ທຸຕິຍໍ, ຕຖາ ຕຕິຍໍ, ຕຖາ ຈຕຸຕ຺ຖໍ. ອິຕິ ອຸທ຺ຘມໂຘ ຕິຣິຍໍ ສພ຺ພຘິ ສພ຺ພຕ຺ຕຕາຍ ສພ຺ພາວນ຺ຕໍ ໂລກໍ ມຸທິຕາສຫຄເຕນ ເຈຕສາ ວິປຸເລນ ມຫຄ຺ຄເຕນ ອປ຺ປມາເຓນ ອເວເຣນ ອພ຺ຍາປຊ຺ເຊນ ຜຣິຕ຺ວາ ວິຫຣຕິ. ອຸເປກ຺ຂາສຫຄເຕນ ເຈຕສາ ເອກໍ ທິສໍ ຜຣິຕ຺ວາ ວິຫຣຕິ, ຕຖາ ທຸຕິຍໍ, ຕຖາ ຕຕິຍໍ, ຕຖາ ຈຕຸຕ຺ຖໍ. ອິຕິ ອຸທ຺ຘມໂຘ ຕິຣິຍໍ ສພ຺ພຘິ ສພ຺ພຕ຺ຕຕາຍ ສພ຺ພາວນ຺ຕໍ ໂລກໍ ອຸເປກ຺ຂາສຫຄເຕນ ເຈຕສາ ວິປຸເລນ ມຫຄ຺ຄເຕນ ອປ຺ປມາເຓນ ອເວເຣນ ອພ຺ຍາປຊ຺ເຊນ ຜຣິຕ຺ວາ ວິຫຣຕິ.

໑. ເມຕ຺ຕາ

໖໔໓. ກຖຎ຺ຈ ຠິກ຺ຂຸ ເມຕ຺ຕາສຫຄເຕນ ເຈຕສາ ເອກໍ ທິສໍ ຜຣິຕ຺ວາ ວິຫຣຕິ? ເສຍ຺ຍຖາປິ ນາມ ເອກໍ ປຸຄ຺ຄລໍ ປິຍໍ ມນາປໍ ທິສ຺ວາ ເມຕ຺ຕາເຍຍ຺ຍ, ເອວເມວ ສພ຺ເພ ສຕ຺ເຕ ເມຕ຺ຕາຍ ຜຣຕິ.

ຕຕ຺ຖ ກຕມາ ເມຕ຺ຕາ? ຍາ ສຕ຺ເຕສຸ ເມຕ຺ຕິ ເມຕ຺ຕາຍນາ ເມຕ຺ຕາຍິຕຕ຺ຕໍ ເມຕ຺ຕາເຈໂຕວິມຸຕ຺ຕິ – ອຍໍ ວຸຈ຺ຈຕິ ‘‘ເມຕ຺ຕາ’’.

ຕຕ຺ຖ ກຕມໍ ຈິຕ຺ຕໍ? ຍໍ ຈິຕ຺ຕໍ ມໂນ ມານສໍ ຫທຍໍ ປຓ຺ຑຣໍ ມໂນ ມນາຍຕນໍ ມນິນ຺ທ຺ຣິຍໍ ວິຎ຺ຎາຓໍ ວິຎ຺ຎາຓກ຺ຂນ຺ໂຘ ຕຊ຺ຊາມໂນວິຎ຺ຎາຓຘາຕຸ – ອິທໍ ວຸຈ຺ຈຕິ ‘‘ຈິຕ຺ຕໍ’’. ອິທໍ ຈິຕ຺ຕໍ ອິມາຍ ເມຕ຺ຕາຍ ສຫຄຕໍ ໂຫຕິ ສຫຊາຕໍ ສໍສຏ຺ຐໍ ສມ຺ປຍຸຕ຺ຕໍ. ເຕນ ວຸຈ຺ຈຕິ ‘‘ເມຕ຺ຕາສຫຄເຕນ ເຈຕສາ’’ຕິ.

໖໔໔. ‘‘ເອກໍ ທິສ’’ນ຺ຕິ ປຸຣຕ຺ຖິມໍ ວາ ທິສໍ ປຈ຺ຉິມໍ ວາ ທິສໍ ອຸຕ຺ຕຣໍ ວາ ທິສໍ ທກ຺ຂິຓໍ ວາ ທິສໍ ອຸທ຺ຘໍ ວາ ອໂຘ ວາ ຕິຣິຍໍ ວາ ວິທິສໍ ວາ.

໖໔໕. ‘‘ຜຣິຕ຺ວາ’’ຕິ ຜຣິຕ຺ວາ ອຘິມຸຈ຺ຈິຕ຺ວາ.

໖໔໖. ‘‘ວິຫຣຕີ’’ຕິ ອິຣິຍຕິ ວຕ຺ຕຕິ ປາເລຕິ ຍເປຕິ ຍາເປຕິ ຈຣຕິ ວິຫຣຕິ. ເຕນ ວຸຈ຺ຈຕິ ‘‘ວິຫຣຕີ’’ຕິ.

໖໔໗. ‘‘ຕຖາ ທຸຕິຍ’’ນ຺ຕິ ຍເຖວ ເອກໍ ທິສໍ ຕຖາ ທຸຕິຍໍ ທິສໍ ຕຖາ ຕຕິຍໍ ທິສໍ ຕຖາ ຈຕຸຕ຺ຖໍ ທິສໍ ຕຖາ ອຸທ຺ຘໍ ຕຖາ ອໂຘ ຕຖາ ຕິຣິຍໍ ຕຖາ ວິທິສໍ.

໖໔໘. ‘‘ສພ຺ພຘິ ສພ຺ພຕ຺ຕຕາຍ ສພ຺ພາວນ຺ຕໍ ໂລກ’’ນ຺ຕິ ສພ຺ເພນ ສພ຺ພໍ ສພ຺ພຖາ ສພ຺ພໍ ອເສສໍ ນິສ຺ເສສໍ. ປຣິຍາທາຍວຈນເມຕໍ – ‘‘ສພ຺ພຘິ ສພ຺ພຕ຺ຕຕາຍ ສພ຺ພາວນ຺ຕໍ ໂລກ’’ນ຺ຕິ.

໖໔໙. ‘‘ເມຕ຺ຕາສຫຄເຕນ ເຈຕສາ’’ຕິ ຕຕ຺ຖ ກຕມາ ເມຕ຺ຕາ? ຍາ ສຕ຺ເຕສຸ ເມຕ຺ຕິ ເມຕ຺ຕາຍນາ ເມຕ຺ຕາຍິຕຕ຺ຕໍ ເມຕ຺ຕາເຈໂຕວິມຸຕ຺ຕິ – ອຍໍ ວຸຈ຺ຈຕິ ‘‘ເມຕ຺ຕາ’’.

ຕຕ຺ຖ ກຕມໍ ຈິຕ຺ຕໍ? ຍໍ ຈິຕ຺ຕໍ ມໂນ ມານສໍ…ເປ… ຕຊ຺ຊາມໂນວິຎ຺ຎາຓຘາຕຸ – ອິທໍ ວຸຈ຺ຈຕິ ‘‘ຈິຕ຺ຕໍ’’. ອິທໍ ຈິຕ຺ຕໍ ອິມາຍ ເມຕ຺ຕາຍ ສຫຄຕໍ ໂຫຕິ ສຫຊາຕໍ ສໍສຏ຺ຐໍ ສມ຺ປຍຸຕ຺ຕໍ. ເຕນ ວຸຈ຺ຈຕິ ‘‘ເມຕ຺ຕາສຫຄເຕນ ເຈຕສາ’’ຕິ.

໖໕໐. ‘‘ວິປຸເລນາ’’ຕິ ຍໍ ວິປຸລໍ ຕໍ ມຫຄ຺ຄຕໍ, ຍໍ ມຫຄ຺ຄຕໍ ຕໍ ອປ຺ປມາຓໍ, ຍໍ ອປ຺ປມາຓໍ ໂສ ອເວໂຣ, ໂຍ ອເວໂຣ ໂສ ອພ຺ຍາປຊ຺ໂຊ [ອພ຺ຍາປຊ຺ໂຌ (ສີ. ສ຺ຍາ.)].

໖໕໑. ‘‘ຜຣິຕ຺ວາ’’ຕິ ຜຣິຕ຺ວາ ອຘິມຸຈ຺ຈິຕ຺ວາ.

໖໕໒. ‘‘ວິຫຣຕີ’’ຕິ…ເປ… ເຕນ ວຸຈ຺ຈຕິ ‘‘ວິຫຣຕີ’’ຕິ.

໒. ກຣຸຓາ

໖໕໓. ກຖຎ຺ຈ ຠິກ຺ຂຸ ກຣຸຓາສຫຄເຕນ ເຈຕສາ ເອກໍ ທິສໍ ຜຣິຕ຺ວາ ວິຫຣຕິ? ເສຍ຺ຍຖາປິ ນາມ ເອກໍ ປຸຄ຺ຄລໍ ທຸຄ຺ຄຕໍ ທຸຣູເປຕໍ ທິສ຺ວາ ກຣຸຓາເຍຍ຺ຍ, ເອວເມວ ສພ຺ເພ ສຕ຺ເຕ ກຣຸຓາຍ ຜຣຕິ.

ຕຕ຺ຖ ກຕມາ ກຣຸຓາ? ຍາ ສຕ຺ເຕສຸ ກຣຸຓາ ກຣຸຓາຍນາ ກຣຸຓາຍິຕຕ຺ຕໍ ກຣຸຓາເຈໂຕວິມຸຕ຺ຕິ – ອຍໍ ວຸຈ຺ຈຕິ ‘‘ກຣຸຓາ’’.

ຕຕ຺ຖ ກຕມໍ ຈິຕ຺ຕໍ? ຍໍ ຈິຕ຺ຕໍ ມໂນ ມານສໍ…ເປ… ຕຊ຺ຊາມໂນວິຎ຺ຎາຓຘາຕຸ – ອິທໍ ວຸຈ຺ຈຕິ ‘‘ຈິຕ຺ຕໍ’’. ອິທໍ ຈິຕ຺ຕໍ ອິມາຍ ກຣຸຓາຍ ສຫຄຕໍ ໂຫຕິ ສຫຊາຕໍ ສໍສຏ຺ຐໍ ສມ຺ປຍຸຕ຺ຕໍ. ເຕນ ວຸຈ຺ຈຕິ ‘‘ກຣຸຓາສຫຄເຕນ ເຈຕສາ’’ຕິ.

໖໕໔. ‘‘ເອກໍ ທິສ’’ນ຺ຕິ ປຸຣຕ຺ຖິມໍ ວາ ທິສໍ ປຈ຺ຉິມໍ ວາ ທິສໍ ອຸຕ຺ຕຣໍ ວາ ທິສໍ ທກ຺ຂິຓໍ ວາ ທິສໍ ອຸທ຺ຘໍ ວາ ອໂຘ ວາ ຕິຣິຍໍ ວາ ວິທິສໍ ວາ.

໖໕໕. ‘‘ຜຣິຕ຺ວາ’’ຕິ ຜຣິຕ຺ວາ ອຘິມຸຈ຺ຈິຕ຺ວາ.

໖໕໖. ‘‘ວິຫຣຕີ’’ຕິ ອິຣິຍຕິ ວຕ຺ຕຕິ ປາເລຕິ ຍເປຕິ ຍາເປຕິ ຈຣຕິ ວິຫຣຕິ. ເຕນ ວຸຈ຺ຈຕິ ‘‘ວິຫຣຕີ’’ຕິ.

໖໕໗. ‘‘ຕຖາ ທຸຕິຍ’’ນ຺ຕິ ຍເຖວ ເອກໍ ທິສໍ ຕຖາ ທຸຕິຍໍ ທິສໍ ຕຖາ ຕຕິຍໍ ທິສໍ ຕຖາ ຈຕຸຕ຺ຖໍ ທິສໍ ຕຖາ ອຸທ຺ຘໍ ຕຖາ ອໂຘ ຕຖາ ຕິຣິຍໍ ຕຖາ ວິທິສໍ.

໖໕໘. ‘‘ສພ຺ພຘິ ສພ຺ພຕ຺ຕຕາຍ ສພ຺ພາວນ຺ຕໍ ໂລກ’’ນ຺ຕິ ສພ຺ເພນ ສພ຺ພໍ ສພ຺ພຖາ ສພ຺ພໍ ອເສສໍ ນິສ຺ເສສໍ. ປຣິຍາທາຍວຈນເມຕໍ – ‘‘ສພ຺ພຘິ ສພ຺ພຕ຺ຕຕາຍ ສພ຺ພາວນ຺ຕໍ ໂລກ’’ນ຺ຕິ.

໖໕໙. ‘‘ກຣຸຓາສຫຄເຕນ ເຈຕສາ’’ຕິ ຕຕ຺ຖ ກຕມາ ກຣຸຓາ? ຍາ ສຕ຺ເຕສຸ ກຣຸຓາ ກຣຸຓາຍນາ ກຣຸຓາຍິຕຕ຺ຕໍ ກຣຸຓາເຈໂຕວິມຸຕ຺ຕິ – ອຍໍ ວຸຈ຺ຈຕິ ‘‘ກຣຸຓາ’’.

ຕຕ຺ຖ ກຕມໍ ຈິຕ຺ຕໍ? ຍໍ ຈິຕ຺ຕໍ ມໂນ ມານສໍ…ເປ… ຕຊ຺ຊາມໂນວິຎ຺ຎາຓຘາຕຸ – ອິທໍ ວຸຈ຺ຈຕິ ‘‘ຈິຕ຺ຕໍ’’. ອິທໍ ຈິຕ຺ຕໍ ອິມາຍ ກຣຸຓາຍ ສຫຄຕໍ ໂຫຕິ ສຫຊາຕໍ ສໍສຏ຺ຐໍ ສມ຺ປຍຸຕ຺ຕໍ. ເຕນ ວຸຈ຺ຈຕິ ‘‘ກຣຸຓາສຫຄເຕນ ເຈຕສາ’’ຕິ.

໖໖໐. ‘‘ວິປຸເລນາ’’ຕິ ຍໍ ວິປຸລໍ ຕໍ ມຫຄ຺ຄຕໍ, ຍໍ ມຫຄ຺ຄຕໍ ຕໍ ອປ຺ປມາຓໍ, ຍໍ ອປ຺ປມາຓໍ ໂສ ອເວໂຣ, ໂຍ ອເວໂຣ ໂສ ອພ຺ຍາປຊ຺ໂຊ.

໖໖໑. ‘‘ຜຣິຕ຺ວາ’’ຕິ ຜຣິຕ຺ວາ ອຘິມຸຈ຺ຈິຕ຺ວາ.

໖໖໒. ‘‘ວິຫຣຕີ’’ຕິ…ເປ… ເຕນ ວຸຈ຺ຈຕິ ‘‘ວິຫຣຕີ’’ຕິ.

໓. ມຸທິຕາ

໖໖໓. ກຖຎ຺ຈ ຠິກ຺ຂຸ ມຸທິຕາສຫຄເຕນ ເຈຕສາ ເອກໍ ທິສໍ ຜຣິຕ຺ວາ ວິຫຣຕິ? ເສຍ຺ຍຖາປິ ນາມ ເອກໍ ປຸຄ຺ຄລໍ ປິຍໍ ມນາປໍ ທິສ຺ວາ ມຸທິໂຕ ອສ຺ສ, ເອວເມວ ສພ຺ເພ ສຕ຺ເຕ ມຸທິຕາຍ ຜຣຕິ.

ຕຕ຺ຖ ກຕມາ ມຸທິຕາ? ຍາ ສຕ຺ເຕສຸ ມຸທິຕາ ມຸທິຕາຍນາ ມຸທິຕາຍິຕຕ຺ຕໍ ມຸທິຕາເຈໂຕວິມຸຕ຺ຕິ – ອຍໍ ວຸຈ຺ຈຕິ ‘‘ມຸທິຕາ’’.

ຕຕ຺ຖ ກຕມໍ ຈິຕ຺ຕໍ? ຍໍ ຈິຕ຺ຕໍ ມໂນ ມານສໍ…ເປ… ຕຊ຺ຊາມໂນວິຎ຺ຎາຓຘາຕຸ – ອິທໍ ວຸຈ຺ຈຕິ ‘‘ຈິຕ຺ຕໍ’’. ອິທໍ ຈິຕ຺ຕໍ ອິມາຍ ມຸທິຕາຍ ສຫຄຕໍ ໂຫຕິ ສຫຊາຕໍ ສໍສຏ຺ຐໍ ສມ຺ປຍຸຕ຺ຕໍ. ເຕນ ວຸຈ຺ຈຕິ ‘‘ມຸທິຕາສຫຄເຕນ ເຈຕສາ’’ຕິ.

໖໖໔. ‘‘ເອກໍ ທິສ’’ນ຺ຕິ ປຸຣຕ຺ຖິມໍ ວາ ທິສໍ ປຈ຺ຉິມໍ ວາ ທິສໍ ອຸຕ຺ຕຣໍ ວາ ທິສໍ ທກ຺ຂິຓໍ ວາ ທິສໍ ອຸທ຺ຘໍ ວາ ອໂຘ ວາ ຕິຣິຍໍ ວາ ວິທິສໍ ວາ.

໖໖໕. ‘‘ຜຣິຕ຺ວາ’’ຕິ ຜຣິຕ຺ວາ ອຘິມຸຈ຺ຈິຕ຺ວາ.

໖໖໖. ‘‘ວິຫຣຕີ’’ຕິ…ເປ… ເຕນ ວຸຈ຺ຈຕິ ‘‘ວິຫຣຕີ’’ຕິ.

໖໖໗. ‘‘ຕຖາ ທຸຕິຍ’’ນ຺ຕິ ຍເຖວ ເອກໍ ທິສໍ ຕຖາ ທຸຕິຍໍ ທິສໍ ຕຖາ ຕຕິຍໍ ທິສໍ ຕຖາ ຈຕຸຕ຺ຖໍ ທິສໍ ຕຖາ ອຸທ຺ຘໍ ຕຖາ ອໂຘ ຕຖາ ຕິຣິຍໍ ຕຖາ ວິທິສໍ.

໖໖໘. ‘‘ສພ຺ພຘິ ສພ຺ພຕ຺ຕຕາຍ ສພ຺ພາວນ຺ຕໍ ໂລກ’’ນ຺ຕິ ສພ຺ເພນ ສພ຺ພໍ ສພ຺ພຖາ ສພ຺ພໍ ອເສສໍ ນິສ຺ເສສໍ. ປຣິຍາທາຍວຈນເມຕໍ – ‘‘ສພ຺ພຘິ ສພ຺ພຕ຺ຕຕາຍ ສພ຺ພາວນ຺ຕໍ ໂລກ’’ນ຺ຕິ.

໖໖໙. ‘‘ມຸທິຕາສຫຄເຕນ ເຈຕສາ’’ຕິ ຕຕ຺ຖ ກຕມາ ມຸທິຕາ? ຍາ ສຕ຺ເຕສຸ ມຸທິຕາ ມຸທິຕາຍນາ ມຸທິຕາຍິຕຕ຺ຕໍ ມຸທິຕາເຈໂຕວິມຸຕ຺ຕິ – ອຍໍ ວຸຈ຺ຈຕິ ‘‘ມຸທິຕາ’’.

ຕຕ຺ຖ ກຕມໍ ຈິຕ຺ຕໍ? ຍໍ ຈິຕ຺ຕໍ ມໂນ ມານສໍ…ເປ… ຕຊ຺ຊາມໂນວິຎ຺ຎາຓຘາຕຸ – ອິທໍ ວຸຈ຺ຈຕິ ‘‘ຈິຕ຺ຕໍ’’. ອິທໍ ຈິຕ຺ຕໍ ອິມາຍ ມຸທິຕາຍ ສຫຄຕໍ ໂຫຕິ ສຫຊາຕໍ ສໍສຏ຺ຐໍ ສມ຺ປຍຸຕ຺ຕໍ. ເຕນ ວຸຈ຺ຈຕິ ‘‘ມຸທິຕາສຫຄເຕນ ເຈຕສາ’’ຕິ.

໖໗໐. ‘‘ວິປຸເລນາ’’ຕິ ຍໍ ວິປຸລໍ ຕໍ ມຫຄ຺ຄຕໍ, ຍໍ ມຫຄ຺ຄຕໍ ຕໍ ອປ຺ປມາຓໍ, ຍໍ ອປ຺ປມາຓໍ ໂສ ອເວໂຣ, ໂຍ ອເວໂຣ ໂສ ອພ຺ຍາປຊ຺ໂຊ.

໖໗໑. ‘‘ຜຣິຕ຺ວາ’’ຕິ ຜຣິຕ຺ວາ ອຘິມຸຈ຺ຈິຕ຺ວາ.

໖໗໒. ‘‘ວິຫຣຕີ’’ຕິ …ເປ… ເຕນ ວຸຈ຺ຈຕິ ‘‘ວິຫຣຕີ’’ຕິ.

໔. ອຸເປກ຺ຂາ

໖໗໓. ກຖຎ຺ຈ ຠິກ຺ຂຸ ອຸເປກ຺ຂາສຫຄເຕນ ເຈຕສາ ເອກໍ ທິສໍ ຜຣິຕ຺ວາ ວິຫຣຕິ? ເສຍ຺ຍຖາປິ ນາມ ເອກໍ ປຸຄ຺ຄລໍ ເນວ ມນາປໍ ນ ອມນາປໍ ທິສ຺ວາ ອຸເປກ຺ຂໂກ ອສ຺ສ, ເອວເມວ ສພ຺ເພ ສຕ຺ເຕ ອຸເປກ຺ຂາຍ ຜຣຕິ.

ຕຕ຺ຖ ກຕມາ ອຸເປກ຺ຂາ? ຍາ ສຕ຺ເຕສຸ ອຸເປກ຺ຂາ ອຸເປກ຺ຂາຍນາ ອຸເປກ຺ຂາຍິຕຕ຺ຕໍ ອຸເປກ຺ຂາເຈໂຕວິມຸຕ຺ຕິ – ອຍໍ ວຸຈ຺ຈຕິ ‘‘ອຸເປກ຺ຂາ’’.

ຕຕ຺ຖ ກຕມໍ ຈິຕ຺ຕໍ? ຍໍ ຈິຕ຺ຕໍ ມໂນ ມານສໍ…ເປ… ຕຊ຺ຊາມໂນວິຎ຺ຎາຓຘາຕຸ – ອິທໍ ວຸຈ຺ຈຕິ ‘‘ຈິຕ຺ຕໍ’’. ອິທໍ ຈິຕ຺ຕໍ ອິມາຍ ອຸເປກ຺ຂາຍ ສຫຄຕໍ ໂຫຕິ ສຫຊາຕໍ ສໍສຏ຺ຐໍ ສມ຺ປຍຸຕ຺ຕໍ. ເຕນ ວຸຈ຺ຈຕິ ‘‘ອຸເປກ຺ຂາສຫຄເຕນ ເຈຕສາ’’ຕິ.

໖໗໔. ‘‘ເອກໍ ທິສ’’ນ຺ຕິ ປຸຣຕ຺ຖິມໍ ວາ ທິສໍ ປຈ຺ຉິມໍ ວາ ທິສໍ ອຸຕ຺ຕຣໍ ວາ ທິສໍ ທກ຺ຂິຓໍ ວາ ທິສໍ ອຸທ຺ຘໍ ວາ ອໂຘ ວາ ຕິຣິຍໍ ວາ ວິທິສໍ ວາ.

໖໗໕. ‘‘ຜຣິຕ຺ວາ’’ຕິ ຜຣິຕ຺ວາ ອຘິມຸຈ຺ຈິຕ຺ວາ.

໖໗໖. ‘‘ວິຫຣຕີ’’ຕິ…ເປ… ເຕນ ວຸຈ຺ຈຕິ ‘‘ວິຫຣຕີ’’ຕິ.

໖໗໗. ‘‘ຕຖາ ທຸຕິຍ’’ນ຺ຕິ ຍເຖວ ເອກໍ ທິສໍ ຕຖາ ທຸຕິຍໍ ທິສໍ ຕຖາ ຕຕິຍໍ ທິສໍ ຕຖາ ຈຕຸຕ຺ຖໍ ທິສໍ ຕຖາ ອຸທ຺ຘໍ ຕຖາ ອໂຘ ຕຖາ ຕິຣິຍໍ ຕຖາ ວິທິສໍ.

໖໗໘. ‘‘ສພ຺ພຘິ ສພ຺ພຕ຺ຕຕາຍ ສພ຺ພາວນ຺ຕໍ ໂລກ’’ນ຺ຕິ ສພ຺ເພນ ສພ຺ພໍ ສພ຺ພຖາ ສພ຺ພໍ ອເສສໍ ນິສ຺ເສສໍ. ປຣິຍາທາຍວຈນເມຕໍ – ‘‘ສພ຺ພຘິ ສພ຺ພຕ຺ຕຕາຍ ສພ຺ພາວນ຺ຕໍ ໂລກ’’ນ຺ຕິ.

໖໗໙. ‘‘ອຸເປກ຺ຂາສຫຄເຕນ ເຈຕສາ’’ຕິ, ຕຕ຺ຖ ກຕມາ ອຸເປກ຺ຂາ? ຍາ ສຕ຺ເຕສຸ ອຸເປກ຺ຂາ ອຸເປກ຺ຂາຍນາ ອຸເປກ຺ຂາຍິຕຕ຺ຕໍ ອຸເປກ຺ຂາເຈໂຕວິມຸຕ຺ຕິ – ອຍໍ ວຸຈ຺ຈຕິ ‘‘ອຸເປກ຺ຂາ’’.

ຕຕ຺ຖ ກຕມໍ ຈິຕ຺ຕໍ? ຍໍ ຈິຕ຺ຕໍ ມໂນ ມານສໍ…ເປ… ຕຊ຺ຊາມໂນວິຎ຺ຎາຓຘາຕຸ – ອິທໍ ວຸຈ຺ຈຕິ ‘‘ຈິຕ຺ຕໍ’’. ອິທໍ ຈິຕ຺ຕໍ ອິມາຍ ອຸເປກ຺ຂາຍ ສຫຄຕໍ ໂຫຕິ ສຫຊາຕໍ ສໍສຏ຺ຐໍ ສມ຺ປຍຸຕ຺ຕໍ. ເຕນ ວຸຈ຺ຈຕິ ‘‘ອຸເປກ຺ຂາສຫຄເຕນ ເຈຕສາ’’ຕິ.

໖໘໐. ‘‘ວິປຸເລນາ’’ຕິ ຍໍ ວິປຸລໍ ຕໍ ມຫຄ຺ຄຕໍ, ຍໍ ມຫຄ຺ຄຕໍ ຕໍ ອປ຺ປມາຓໍ, ຍໍ ອປ຺ປມາຓໍ ໂສ ອເວໂຣ, ໂຍ ອເວໂຣ ໂສ ອພ຺ຍາປຊ຺ໂຊ.

໖໘໑. ‘‘ຜຣິຕ຺ວາ’’ຕິ ຜຣິຕ຺ວາ ອຘິມຸຈ຺ຈິຕ຺ວາ.

໖໘໒. ‘‘ວິຫຣຕີ’’ຕິ…ເປ… ເຕນ ວຸຈ຺ຈຕິ ‘‘ວິຫຣຕີ’’ຕິ.

ສຸຕ຺ຕນ຺ຕຠາຊນີຍໍ.

໒. ອຠິຘມ຺ມຠາຊນີຍໍ

໖໘໓. ຈຕສ຺ໂສ ອປ຺ປມຎ຺ຎາໂຍ – ເມຕ຺ຕາ, ກຣຸຓາ, ມຸທິຕາ, ອຸເປກ຺ຂາ.

໖໘໔. ຕຕ຺ຖ ກຕມາ ເມຕ຺ຕາ? ອິຘ ຠິກ຺ຂຸ ຍສ຺ມິໍ ສມເຍ ຣູປູປປຕ຺ຕິຍາ ມຄ຺ຄໍ ຠາເວຕິ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ເມຕ຺ຕາສຫຄຕໍ, ຍາ ຕສ຺ມິໍ ສມເຍ ເມຕ຺ຕິ ເມຕ຺ຕາຍນາ ເມຕ຺ຕາຍິຕຕ຺ຕໍ ເມຕ຺ຕາເຈໂຕວິມຸຕ຺ຕິ – ອຍໍ ວຸຈ຺ຈຕິ ‘‘ເມຕ຺ຕາ’’. ອວເສສາ ຘມ຺ມາ ເມຕ຺ຕາຍ ສມ຺ປຍຸຕ຺ຕາ.

ຕຕ຺ຖ ກຕມາ ເມຕ຺ຕາ? ອິຘ ຠິກ຺ຂຸ ຍສ຺ມິໍ ສມເຍ ຣູປູປປຕ຺ຕິຍາ ມຄ຺ຄໍ ຠາເວຕິ ວິຕກ຺ກວິຈາຣານໍ ວູປສມາ…ເປ… ທຸຕິຍໍ ຌານໍ ອຸປສມ຺ປຊ຺ຊ ວິຫຣຕິ ເມຕ຺ຕາສຫຄຕໍ, ຍາ ຕສ຺ມິໍ ສມເຍ ເມຕ຺ຕິ ເມຕ຺ຕາຍນາ ເມຕ຺ຕາຍິຕຕ຺ຕໍ ເມຕ຺ຕາເຈໂຕວິມຸຕ຺ຕິ – ອຍໍ ວຸຈ຺ຈຕິ ‘‘ເມຕ຺ຕາ’’. ອວເສສາ ຘມ຺ມາ ເມຕ຺ຕາຍ ສມ຺ປຍຸຕ຺ຕາ.

ຕຕ຺ຖ ກຕມາ ເມຕ຺ຕາ? ອິຘ ຠິກ຺ຂຸ ຍສ຺ມິໍ ສມເຍ ຣູປູປປຕ຺ຕິຍາ ມຄ຺ຄໍ ຠາເວຕິ ປີຕິຍາ ຈ ວິຣາຄາ…ເປ… ຕຕິຍໍ ຌານໍ ອຸປສມ຺ປຊ຺ຊ ວິຫຣຕິ ເມຕ຺ຕາສຫຄຕໍ, ຍາ ຕສ຺ມິໍ ສມເຍ ເມຕ຺ຕິ ເມຕ຺ຕາຍນາ ເມຕ຺ຕາຍິຕຕ຺ຕໍ ເມຕ຺ຕາເຈໂຕວິມຸຕ຺ຕິ – ອຍໍ ວຸຈ຺ຈຕິ ‘‘ເມຕ຺ຕາ’’. ອວເສສາ ຘມ຺ມາ ເມຕ຺ຕາຍ ສມ຺ປຍຸຕ຺ຕາ.

໖໘໕. ອິຘ ຠິກ຺ຂຸ ຍສ຺ມິໍ ສມເຍ ຣູປູປປຕ຺ຕິຍາ ມຄ຺ຄໍ ຠາເວຕິ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ເມຕ຺ຕາສຫຄຕໍ, ຍາ ຕສ຺ມິໍ ສມເຍ ເມຕ຺ຕິ ເມຕ຺ຕາຍນາ ເມຕ຺ຕາຍິຕຕ຺ຕໍ ເມຕ຺ຕາເຈໂຕວິມຸຕ຺ຕິ – ອຍໍ ວຸຈ຺ຈຕິ ‘‘ເມຕ຺ຕາ’’. ອວເສສາ ຘມ຺ມາ ເມຕ຺ຕາຍ ສມ຺ປຍຸຕ຺ຕາ.

ອິຘ ຠິກ຺ຂຸ ຍສ຺ມິໍ ສມເຍ ຣູປູປປຕ຺ຕິຍາ ມຄ຺ຄໍ ຠາເວຕິ ວິວິຈ຺ເຈວ ກາເມຫິ ວິວິຈ຺ຈ ອກຸສເລຫິ ຘມ຺ເມຫິ ອວິຕກ຺ກໍ ວິຈາຣມຕ຺ຕໍ ວິເວກຊໍ ປີຕິສຸຂໍ ທຸຕິຍໍ ຌານໍ ອຸປສມ຺ປຊ຺ຊ ວິຫຣຕິ ເມຕ຺ຕາສຫຄຕໍ, ຍາ ຕສ຺ມິໍ ສມເຍ ເມຕ຺ຕິ ເມຕ຺ຕາຍນາ ເມຕ຺ຕາຍິຕຕ຺ຕໍ ເມຕ຺ຕາເຈໂຕວິມຸຕ຺ຕິ – ອຍໍ ວຸຈ຺ຈຕິ ‘‘ເມຕ຺ຕາ’’. ອວເສສາ ຘມ຺ມາ ເມຕ຺ຕາຍ ສມ຺ປຍຸຕ຺ຕາ.

ອິຘ ຠິກ຺ຂຸ ຍສ຺ມິໍ ສມເຍ ຣູປູປປຕ຺ຕິຍາ ມຄ຺ຄໍ ຠາເວຕິ ວິຕກ຺ກວິຈາຣານໍ ວູປສມາ…ເປ… ຕຕິຍໍ ຌານໍ ອຸປສມ຺ປຊ຺ຊ ວິຫຣຕິ ເມຕ຺ຕາສຫຄຕໍ, ຍາ ຕສ຺ມິໍ ສມເຍ ເມຕ຺ຕິ ເມຕ຺ຕາຍນາ ເມຕ຺ຕາຍິຕຕ຺ຕໍ ເມຕ຺ຕາເຈໂຕວິມຸຕ຺ຕິ – ອຍໍ ວຸຈ຺ຈຕິ ‘‘ເມຕ຺ຕາ’’. ອວເສສາ ຘມ຺ມາ ເມຕ຺ຕາຍ ສມ຺ປຍຸຕ຺ຕາ.

ອິຘ ຠິກ຺ຂຸ ຍສ຺ມິໍ ສມເຍ ຣູປູປປຕ຺ຕິຍາ ມຄ຺ຄໍ ຠາເວຕິ ປີຕິຍາ ຈ ວິຣາຄາ…ເປ… ຈຕຸຕ຺ຖໍ ຌານໍ ອຸປສມ຺ປຊ຺ຊ ວິຫຣຕິ ເມຕ຺ຕາສຫຄຕໍ, ຍາ ຕສ຺ມິໍ ສມເຍ ເມຕ຺ຕິ ເມຕ຺ຕາຍນາ ເມຕ຺ຕາຍິຕຕ຺ຕໍ ເມຕ຺ຕາເຈໂຕວິມຸຕ຺ຕິ – ອຍໍ ວຸຈ຺ຈຕິ ‘‘ເມຕ຺ຕາ’’. ອວເສສາ ຘມ຺ມາ ເມຕ຺ຕາຍ ສມ຺ປຍຸຕ຺ຕາ.

໖໘໖. ຕຕ຺ຖ ກຕມາ ກຣຸຓາ? ອິຘ ຠິກ຺ຂຸ ຍສ຺ມິໍ ສມເຍ ຣູປູປປຕ຺ຕິຍາ ມຄ຺ຄໍ ຠາເວຕິ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ກຣຸຓາສຫຄຕໍ, ຍາ ຕສ຺ມິໍ ສມເຍ ກຣຸຓາ ກຣຸຓາຍນາ ກຣຸຓາຍິຕຕ຺ຕໍ ກຣຸຓາເຈໂຕວິມຸຕ຺ຕິ – ອຍໍ ວຸຈ຺ຈຕິ ‘‘ກຣຸຓາ’’. ອວເສສາ ຘມ຺ມາ ກຣຸຓາຍ ສມ຺ປຍຸຕ຺ຕາ.

ຕຕ຺ຖ ກຕມາ ກຣຸຓາ? ອິຘ ຠິກ຺ຂຸ ຍສ຺ມິໍ ສມເຍ ຣູປູປປຕ຺ຕິຍາ ມຄ຺ຄໍ ຠາເວຕິ ປີຕິຍາ ຈ ວິຣາຄາ…ເປ… ທຸຕິຍໍ ຌານໍ ອຸປສມ຺ປຊ຺ຊ ວິຫຣຕິ ກຣຸຓາສຫຄຕໍ, ຍາ ຕສ຺ມິໍ ສມເຍ ກຣຸຓາ ກຣຸຓາຍນາ ກຣຸຓາຍິຕຕ຺ຕໍ ກຣຸຓາເຈໂຕວິມຸຕ຺ຕິ – ອຍໍ ວຸຈ຺ຈຕິ ‘‘ກຣຸຓາ’’. ອວເສສາ ຘມ຺ມາ ກຣຸຓາຍ ສມ຺ປຍຸຕ຺ຕາ.

ຕຕ຺ຖ ກຕມາ ກຣຸຓາ? ອິຘ ຠິກ຺ຂຸ ຍສ຺ມິໍ ສມເຍ ຣູປູປປຕ຺ຕິຍາ ມຄ຺ຄໍ ຠາເວຕິ ປີຕິຍາ ຈ ວິຣາຄາ…ເປ… ຕຕິຍໍ ຌານໍ ອຸປສມ຺ປຊ຺ຊ ວິຫຣຕິ ກຣຸຓາສຫຄຕໍ, ຍາ ຕສ຺ມິໍ ສມເຍ ກຣຸຓາ ກຣຸຓາຍນາ ກຣຸຓາຍິຕຕ຺ຕໍ ກຣຸຓາເຈໂຕວິມຸຕ຺ຕິ – ອຍໍ ວຸຈ຺ຈຕິ ‘‘ກຣຸຓາ’’. ອວເສສາ ຘມ຺ມາ ກຣຸຓາຍ ສມ຺ປຍຸຕ຺ຕາ.

໖໘໗. ອິຘ ຠິກ຺ຂຸ ຍສ຺ມິໍ ສມເຍ ຣູປູປປຕ຺ຕິຍາ ມຄ຺ຄໍ ຠາເວຕິ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ກຣຸຓາສຫຄຕໍ, ຍາ ຕສ຺ມິໍ ສມເຍ ກຣຸຓາ ກຣຸຓາຍນາ ກຣຸຓາຍິຕຕ຺ຕໍ ກຣຸຓາເຈໂຕວິມຸຕ຺ຕິ – ອຍໍ ວຸຈ຺ຈຕິ ‘‘ກຣຸຓາ’’. ອວເສສາ ຘມ຺ມາ ກຣຸຓາຍ ສມ຺ປຍຸຕ຺ຕາ.

ອິຘ ຠິກ຺ຂຸ ຍສ຺ມິໍ ສມເຍ ຣູປູປປຕ຺ຕິຍາ ມຄ຺ຄໍ ຠາເວຕິ ວິວິຈ຺ເຈວ ກາເມຫິ ວິວິຈ຺ຈ ອກຸສເລຫິ ຘມ຺ເມຫິ ອວິຕກ຺ກໍ ວິຈາຣມຕ຺ຕໍ ວິເວກຊໍ ປີຕິສຸຂໍ ທຸຕິຍໍ ຌານໍ ອຸປສມ຺ປຊ຺ຊ ວິຫຣຕິ ກຣຸຓາສຫຄຕໍ, ຍາ ຕສ຺ມິໍ ສມເຍ ກຣຸຓາ ກຣຸຓາຍນາ ກຣຸຓາຍິຕຕ຺ຕໍ ກຣຸຓາເຈໂຕວິມຸຕ຺ຕິ – ອຍໍ ວຸຈ຺ຈຕິ ‘‘ກຣຸຓາ’’. ອວເສສາ ຘມ຺ມາ ກຣຸຓາຍ ສມ຺ປຍຸຕ຺ຕາ.

ອິຘ ຠິກ຺ຂຸ ຍສ຺ມິໍ ສມເຍ ຣູປູປປຕ຺ຕິຍາ ມຄ຺ຄໍ ຠາເວຕິ ວິຕກ຺ກວິຈາຣານໍ ວູປສມາ…ເປ… ຕຕິຍໍ ຌານໍ ອຸປສມ຺ປຊ຺ຊ ວິຫຣຕິ ກຣຸຓາສຫຄຕໍ, ຍາ ຕສ຺ມິໍ ສມເຍ ກຣຸຓາ ກຣຸຓາຍນາ ກຣຸຓາຍິຕຕ຺ຕໍ ກຣຸຓາເຈໂຕວິມຸຕ຺ຕິ – ອຍໍ ວຸຈ຺ຈຕິ ‘‘ກຣຸຓາ’’. ອວເສສາ ຘມ຺ມາ ກຣຸຓາຍ ສມ຺ປຍຸຕ຺ຕາ.

ອິຘ ຠິກ຺ຂຸ ຍສ຺ມິໍ ສມເຍ ຣູປູປປຕ຺ຕິຍາ ມຄ຺ຄໍ ຠາເວຕິ ປີຕິຍາ ຈ ວິຣາຄາ…ເປ… ຈຕຸຕ຺ຖໍ ຌານໍ ອຸປສມ຺ປຊ຺ຊ ວິຫຣຕິ ກຣຸຓາສຫຄຕໍ, ຍາ ຕສ຺ມິໍ ສມເຍ ກຣຸຓາ ກຣຸຓາຍນາ ກຣຸຓາຍິຕຕ຺ຕໍ ກຣຸຓາເຈໂຕວິມຸຕ຺ຕິ – ອຍໍ ວຸຈ຺ຈຕິ ‘‘ກຣຸຓາ’’. ອວເສສາ ຘມ຺ມາ ກຣຸຓາຍ ສມ຺ປຍຸຕ຺ຕາ.

໖໘໘. ຕຕ຺ຖ ກຕມາ ມຸທິຕາ? ອິຘ ຠິກ຺ຂຸ ຍສ຺ມິໍ ສມເຍ ຣູປູປປຕ຺ຕິຍາ ມຄ຺ຄໍ ຠາເວຕິ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ມຸທິຕາສຫຄຕໍ, ຍາ ຕສ຺ມິໍ ສມເຍ ມຸທິຕາ ມຸທິຕາຍນາ ມຸທິຕາຍິຕຕ຺ຕໍ ມຸທິຕາເຈໂຕວິມຸຕ຺ຕິ – ອຍໍ ວຸຈ຺ຈຕິ ‘‘ມຸທິຕາ’’. ອວເສສາ ຘມ຺ມາ ມຸທິຕາຍ ສມ຺ປຍຸຕ຺ຕາ.

ຕຕ຺ຖ ກຕມາ ມຸທິຕາ? ອິຘ ຠິກ຺ຂຸ ຍສ຺ມິໍ ສມເຍ ຣູປູປປຕ຺ຕິຍາ ມຄ຺ຄໍ ຠາເວຕິ ວິຕກ຺ກວິຈາຣານໍ ວູປສມາ…ເປ… ທຸຕິຍໍ ຌານໍ ອຸປສມ຺ປຊ຺ຊ ວິຫຣຕິ ມຸທິຕາສຫຄຕໍ, ຍາ ຕສ຺ມິໍ ສມເຍ ມຸທິຕາ ມຸທິຕາຍຕນາ ມຸທິຕາຍິຕຕ຺ຕໍ ມຸທິຕາເຈໂຕວິມຸຕ຺ຕິ – ອຍໍ ວຸຈ຺ຈຕິ ‘‘ມຸທິຕາ’’. ອວເສສາ ຘມ຺ມາ ມຸທິຕາຍ ສມ຺ປຍຸຕ຺ຕາ.

ຕຕ຺ຖ ກຕມາ ມຸທິຕາ? ອິຘ ຠິກ຺ຂຸ ຍສ຺ມິໍ ສມເຍ ຣູປູປປຕ຺ຕິຍາ ມຄ຺ຄໍ ຠາເວຕິ ປີຕິຍາ ຈ ວິຣາຄາ…ເປ… ຕຕິຍໍ ຌານໍ ອຸປສມ຺ປຊ຺ຊ ວິຫຣຕິ ມຸທິຕາສຫຄຕໍ, ຍາ ຕສ຺ມິໍ ສມເຍ ມຸທິຕາ ມຸທິຕາຍນາ ມຸທິຕາຍິຕຕ຺ຕໍ ມຸທິຕາເຈໂຕວິມຸຕ຺ຕິ – ອຍໍ ວຸຈ຺ຈຕິ ‘‘ມຸທິຕາ’’. ອວເສສາ ຘມ຺ມາ ມຸທິຕາຍ ສມ຺ປຍຸຕ຺ຕາ.

໖໘໙. ອິຘ ຠິກ຺ຂຸ ຍສ຺ມິໍ ສມເຍ ຣູປູປປຕ຺ຕິຍາ ມຄ຺ຄໍ ຠາເວຕິ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ມຸທິຕາສຫຄຕໍ, ຍາ ຕສ຺ມິໍ ສມເຍ ມຸທິຕາ ມຸທິຕາຍນາ ມຸທິຕາຍິຕຕ຺ຕໍ ມຸທິຕາເຈໂຕວິມຸຕ຺ຕິ – ອຍໍ ວຸຈ຺ຈຕິ ‘‘ມຸທິຕາ’’. ອວເສສາ ຘມ຺ມາ ມຸທິຕາຍ ສມ຺ປຍຸຕ຺ຕາ.

ອິຘ ຠິກ຺ຂຸ ຍສ຺ມິໍ ສມເຍ ຣູປູປປຕ຺ຕິຍາ ມຄ຺ຄໍ ຠາເວຕິ ວິວິຈ຺ເຈວ ກາເມຫິ ວິວິຈ຺ຈ ອກຸສເລຫິ ຘມ຺ເມຫິ ອວິຕກ຺ກໍ ວິຈາຣມຕ຺ຕໍ ວິເວກຊໍ ປີຕິສຸຂໍ ທຸຕິຍໍ ຌານໍ ອຸປສມ຺ປຊ຺ຊ ວິຫຣຕິ ມຸທິຕາສຫຄຕໍ, ຍາ ຕສ຺ມິໍ ສມເຍ ມຸທິຕາ ມຸທິຕາຍນາ ມຸທິຕາຍິຕຕ຺ຕໍ ມຸທິຕາເຈໂຕວິມຸຕ຺ຕິ – ອຍໍ ວຸຈ຺ຈຕິ ‘‘ມຸທິຕາ’’. ອວເສສາ ຘມ຺ມາ ມຸທິຕາຍ ສມ຺ປຍຸຕ຺ຕາ.

ອິຘ ຠິກ຺ຂຸ ຍສ຺ມິໍ ສມເຍ ຣູປູປປຕ຺ຕິຍາ ມຄ຺ຄໍ ຠາເວຕິ ວິຕກ຺ກວິຈາຣານໍ ວູປສມາ…ເປ… ຕຕິຍໍ ຌານໍ ອຸປສມ຺ປຊ຺ຊ ວິຫຣຕິ ມຸທິຕາສຫຄຕໍ, ຍາ ຕສ຺ມິໍ ສມເຍ ມຸທິຕາ ມຸທິຕາຍນາ ມຸທິຕາຍິຕຕ຺ຕໍ ມຸທິຕາເຈໂຕວິມຸຕ຺ຕິ – ອຍໍ ວຸຈ຺ຈຕິ ‘‘ມຸທິຕາ’’. ອວເສສາ ຘມ຺ມາ ມຸທິຕາຍ ສມ຺ປຍຸຕ຺ຕາ.

ອິຘ ຠິກ຺ຂຸ ຍສ຺ມິໍ ສມເຍ ຣູປູປປຕ຺ຕິຍາ ມຄ຺ຄໍ ຠາເວຕິ ປີຕິຍາ ຈ ວິຣາຄາ…ເປ… ຈຕຸຕ຺ຖໍ ຌານໍ ອຸປສມ຺ປຊ຺ຊ ວິຫຣຕິ ມຸທິຕາສຫຄຕໍ, ຍາ ຕສ຺ມິໍ ສມເຍ ມຸທິຕາ ມຸທິຕາຍນາ ມຸທິຕາຍິຕຕ຺ຕໍ ມຸທິຕາເຈໂຕວິມຸຕ຺ຕິ – ອຍໍ ວຸຈ຺ຈຕິ ‘‘ມຸທິຕາ’’. ອວເສສາ ຘມ຺ມາ ມຸທິຕາຍ ສມ຺ປຍຸຕ຺ຕາ.

໖໙໐. ຕຕ຺ຖ ກຕມາ ອຸເປກ຺ຂາ? ອິຘ ຠິກ຺ຂຸ ຍສ຺ມິໍ ສມເຍ ຣູປູປປຕ຺ຕິຍາ ມຄ຺ຄໍ ຠາເວຕິ ສຸຂສ຺ສ ຈ ປຫານາ…ເປ… ຈຕຸຕ຺ຖໍ ຌານໍ ອຸປສມ຺ປຊ຺ຊ ວິຫຣຕິ ອຸເປກ຺ຂາສຫຄຕໍ, ຍາ ຕສ຺ມິໍ ສມເຍ ອຸເປກ຺ຂາ ອຸເປກ຺ຂາຍນາ ອຸເປກ຺ຂາຍິຕຕ຺ຕໍ ອຸເປກ຺ຂາເຈໂຕວິມຸຕ຺ຕິ – ອຍໍ ວຸຈ຺ຈຕິ ‘‘ອຸເປກ຺ຂາ’’. ອວເສສາ ຘມ຺ມາ ອຸເປກ຺ຂາຍ ສມ຺ປຍຸຕ຺ຕາ.

໖໙໑. ຈຕສ຺ໂສ ອປ຺ປມຎ຺ຎາໂຍ – ເມຕ຺ຕາ, ກຣຸຓາ, ມຸທິຕາ, ອຸເປກ຺ຂາ.

໖໙໒. ຕຕ຺ຖ ກຕມາ ເມຕ຺ຕາ? ອິຘ ຠິກ຺ຂຸ ຍສ຺ມິໍ ສມເຍ ຣູປູປປຕ຺ຕິຍາ ມຄ຺ຄໍ ຠາເວຕິ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ເມຕ຺ຕາສຫຄຕໍ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ. ອິເມ ຘມ຺ມາ ກຸສລາ. ຕສ຺ເສວ ຣູປາວຈຣສ຺ສ ກຸສລສ຺ສ ກມ຺ມສ຺ສ ກຕຕ຺ຕາ ອຸປຈິຕຕ຺ຕາ ວິປາກໍ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ເມຕ຺ຕາສຫຄຕໍ, ຍາ ຕສ຺ມິໍ ສມເຍ ເມຕ຺ຕິ ເມຕ຺ຕາຍນາ ເມຕ຺ຕາຍິຕຕ຺ຕໍ ເມຕ຺ຕາເຈໂຕວິມຸຕ຺ຕິ – ອຍໍ ວຸຈ຺ຈຕິ ‘‘ເມຕ຺ຕາ’’. ອວເສສາ ຘມ຺ມາ ເມຕ຺ຕາຍ ສມ຺ປຍຸຕ຺ຕາ.

ຕຕ຺ຖ ກຕມາ ເມຕ຺ຕາ? ອິຘ ຠິກ຺ຂຸ ຍສ຺ມິໍ ສມເຍ ຣູປູປປຕ຺ຕິຍາ ມຄ຺ຄໍ ຠາເວຕິ ວິຕກ຺ກວິຈາຣານໍ ວູປສມາ…ເປ… ທຸຕິຍໍ ຌານໍ ອຸປສມ຺ປຊ຺ຊ ວິຫຣຕິ ເມຕ຺ຕາສຫຄຕໍ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ. ອິເມ ຘມ຺ມາ ກຸສລາ. ຕສ຺ເສວ ຣູປາວຈຣສ຺ສ ກຸສລສ຺ສ ກມ຺ມສ຺ສ ກຕຕ຺ຕາ ອຸປຈິຕຕ຺ຕາ ວິປາກໍ ວິຕກ຺ກວິຈາຣານໍ ວູປສມາ…ເປ… ທຸຕິຍໍ ຌານໍ…ເປ… ຕຕິຍໍ ຌານໍ…ເປ… ປຐມໍ ຌານໍ…ເປ… ທຸຕິຍໍ ຌານໍ…ເປ… ຕຕິຍໍ ຌານໍ…ເປ… ຈຕຸຕ຺ຖໍ ຌານໍ ອຸປສມ຺ປຊ຺ຊ ວິຫຣຕິ ເມຕ຺ຕາສຫຄຕໍ, ຍາ ຕສ຺ມິໍ ສມເຍ ເມຕ຺ຕິ ເມຕ຺ຕາຍນາ ເມຕ຺ຕາຍິຕຕ຺ຕໍ ເມຕ຺ຕາເຈໂຕວິມຸຕ຺ຕິ – ອຍໍ ວຸຈ຺ຈຕິ ‘‘ເມຕ຺ຕາ’’. ອວເສສາ ຘມ຺ມາ ເມຕ຺ຕາຍ ສມ຺ປຍຸຕ຺ຕາ.

໖໙໓. ຕຕ຺ຖ ກຕມາ ກຣຸຓາ? ອິຘ ຠິກ຺ຂຸ ຍສ຺ມິໍ ສມເຍ ຣູປູປປຕ຺ຕິຍາ ມຄ຺ຄໍ ຠາເວຕິ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ກຣຸຓາສຫຄຕໍ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ. ອິເມ ຘມ຺ມາ ກຸສລາ. ຕສ຺ເສວ ຣູປາວຈຣສ຺ສ ກຸສລສ຺ສ ກມ຺ມສ຺ສ ກຕຕ຺ຕາ ອຸປຈິຕຕ຺ຕາ ວິປາກໍ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ກຣຸຓາສຫຄຕໍ, ຍາ ຕສ຺ມິໍ ສມເຍ ກຣຸຓາ ກຣຸຓາຍນາ ກຣຸຓາຍິຕຕ຺ຕໍ ກຣຸຓາເຈໂຕວິມຸຕ຺ຕິ – ອຍໍ ວຸຈ຺ຈຕິ ‘‘ກຣຸຓາ’’. ອວເສສາ ຘມ຺ມາ ກຣຸຓາຍ ສມ຺ປຍຸຕ຺ຕາ.

ຕຕ຺ຖ ກຕມາ ກຣຸຓາ? ອິຘ ຠິກ຺ຂຸ ຍສ຺ມິໍ ສມເຍ ຣູປູປປຕ຺ຕິຍາ ມຄ຺ຄໍ ຠາເວຕິ ວິຕກ຺ກວິຈາຣານໍ ວູປສມາ…ເປ… ທຸຕິຍໍ ຌານໍ ອຸປສມ຺ປຊ຺ຊ ວິຫຣຕິ ກຣຸຓາສຫຄຕໍ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ. ອິເມ ຘມ຺ມາ ກຸສລາ. ຕສ຺ເສວ ຣູປາວຈຣສ຺ສ ກຸສລສ຺ສ ກມ຺ມສ຺ສ ກຕຕ຺ຕາ ອຸປຈິຕຕ຺ຕາ ວິປາກໍ ວິຕກ຺ກວິຈາຣານໍ ວູປສມາ…ເປ… ທຸຕິຍໍ ຌານໍ…ເປ… ຕຕິຍໍ ຌານໍ…ເປ… ປຐມໍ ຌານໍ…ເປ… ທຸຕິຍໍ ຌານໍ…ເປ… ຕຕິຍໍ ຌານໍ…ເປ… ຈຕຸຕ຺ຖໍ ຌານໍ ອຸປສມ຺ປຊ຺ຊ ວິຫຣຕິ ກຣຸຓາສຫຄຕໍ, ຍາ ຕສ຺ມິໍ ສມເຍ ກຣຸຓາ ກຣຸຓາຍນາ ກຣຸຓາຍິຕຕ຺ຕໍ ກຣຸຓາເຈໂຕວິມຸຕ຺ຕິ – ອຍໍ ວຸຈ຺ຈຕິ ‘‘ກຣຸຓາ’’. ອວເສສາ ຘມ຺ມາ ກຣຸຓາຍ ສມ຺ປຍຸຕ຺ຕາ.

໖໙໔. ຕຕ຺ຖ ກຕມາ ມຸທິຕາ? ອິຘ ຠິກ຺ຂຸ ຍສ຺ມິໍ ສມເຍ ຣູປູປປຕ຺ຕິຍາ ມຄ຺ຄໍ ຠາເວຕິ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ມຸທິຕາສຫຄຕໍ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ. ອິເມ ຘມ຺ມາ ກຸສລາ. ຕສ຺ເສວ ຣູປາວຈຣສ຺ສ ກຸສລສ຺ສ ກມ຺ມສ຺ສ ກຕຕ຺ຕາ ອຸປຈິຕຕ຺ຕາ ວິປາກໍ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ມຸທິຕາສຫຄຕໍ, ຍາ ຕສ຺ມິໍ ສມເຍ ມຸທິຕາ ມຸທິຕາຍນາ ມຸທິຕາຍິຕຕ຺ຕໍ ມຸທິຕາເຈໂຕວິມຸຕ຺ຕິ – ອຍໍ ວຸຈ຺ຈຕິ ‘‘ມຸທິຕາ’’. ອວເສສາ ຘມ຺ມາ ມຸທິຕາຍ ສມ຺ປຍຸຕ຺ຕາ.

ຕຕ຺ຖ ກຕມາ ມຸທິຕາ? ອິຘ ຠິກ຺ຂຸ ຍສ຺ມິໍ ສມເຍ ຣູປູປປຕ຺ຕິຍາ ມຄ຺ຄໍ ຠາເວຕິ ວິຕກ຺ກວິຈາຣານໍ ວູປສມາ…ເປ… ທຸຕິຍໍ ຌານໍ ອຸປສມ຺ປຊ຺ຊ ວິຫຣຕິ ມຸທິຕາສຫຄຕໍ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ. ອິເມ ຘມ຺ມາ ກຸສລາ. ຕສ຺ເສວ ຣູປາວຈຣສ຺ສ ກຸສລສ຺ສ ກມ຺ມສ຺ສ ກຕຕ຺ຕາ ອຸປຈິຕຕ຺ຕາ ວິປາກໍ ວິຕກ຺ກວິຈາຣານໍ ວູປສມາ…ເປ… ທຸຕິຍໍ ຌານໍ…ເປ… ຕຕິຍໍ ຌານໍ…ເປ… ປຐມໍ ຌານໍ…ເປ… ທຸຕິຍໍ ຌານໍ…ເປ… ຕຕິຍໍ ຌານໍ…ເປ… ຈຕຸຕ຺ຖໍ ຌານໍ ອຸປສມ຺ປຊ຺ຊ ວິຫຣຕິ ມຸທິຕາສຫຄຕໍ, ຍາ ຕສ຺ມິໍ ສມເຍ ມຸທິຕາ ມຸທິຕາຍນາ ມຸທິຕາຍິຕຕ຺ຕໍ ມຸທິຕາເຈໂຕວິມຸຕ຺ຕິ – ອຍໍ ວຸຈ຺ຈຕິ ‘‘ມຸທິຕາ’’. ອວເສສາ ຘມ຺ມາ ມຸທິຕາຍ ສມ຺ປຍຸຕ຺ຕາ.

໖໙໕. ຕຕ຺ຖ ກຕມາ ອຸເປກ຺ຂາ? ອິຘ ຠິກ຺ຂຸ ຍສ຺ມິໍ ສມເຍ ຣູປູປປຕ຺ຕິຍາ ມຄ຺ຄໍ ຠາເວຕິ ສຸຂສ຺ສ ຈ ປຫານາ…ເປ… ຈຕຸຕ຺ຖໍ ຌານໍ ອຸປສມ຺ປຊ຺ຊ ວິຫຣຕິ ອຸເປກ຺ຂາສຫຄຕໍ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ. ອິເມ ຘມ຺ມາ ກຸສລາ. ຕສ຺ເສວ ຣູປາວຈຣສ຺ສ ກຸສລສ຺ສ ກມ຺ມສ຺ສ ກຕຕ຺ຕາ ອຸປຈິຕຕ຺ຕາ ວິປາກໍ ສຸຂສ຺ສ ຈ ປຫານາ ທຸກ຺ຂສ຺ສ ຈ ປຫານາ…ເປ… ຈຕຸຕ຺ຖໍ ຌານໍ ອຸປສມ຺ປຊ຺ຊ ວິຫຣຕິ ອຸເປກ຺ຂາສຫຄຕໍ, ຍາ ຕສ຺ມິໍ ສມເຍ ອຸເປກ຺ຂາ ອຸເປກ຺ຂາຍນາ ອຸເປກ຺ຂາຍິຕຕ຺ຕໍ ອຸເປກ຺ຂາເຈໂຕວິມຸຕ຺ຕິ – ອຍໍ ວຸຈ຺ຈຕິ ‘‘ອຸເປກ຺ຂາ’’. ອວເສສາ ຘມ຺ມາ ອຸເປກ຺ຂາຍ ສມ຺ປຍຸຕ຺ຕາ.

໖໙໖. ຈຕສ຺ໂສ ອປ຺ປມຎ຺ຎາໂຍ – ເມຕ຺ຕາ, ກຣຸຓາ, ມຸທິຕາ, ອຸເປກ຺ຂາ.

໖໙໗. ຕຕ຺ຖ ກຕມາ ເມຕ຺ຕາ? ອິຘ ຠິກ຺ຂຸ ຍສ຺ມິໍ ສມເຍ ຣູປາວຈຣໍ ຌານໍ ຠາເວຕິ ກິຣິຍໍ ເນວ ກຸສລໍ ນາກຸສລໍ ນ ຈ ກມ຺ມວິປາກໍ ທິຏ຺ຐຘມ຺ມສຸຂວິຫາຣໍ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ເມຕ຺ຕາສຫຄຕໍ, ຍາ ຕສ຺ມິໍ ສມເຍ ເມຕ຺ຕິ ເມຕ຺ຕາຍນາ ເມຕ຺ຕາຍິຕຕ຺ຕໍ ເມຕ຺ຕາເຈໂຕວິມຸຕ຺ຕິ – ອຍໍ ວຸຈ຺ຈຕິ ‘‘ເມຕ຺ຕາ’’. ອວເສສາ ຘມ຺ມາ ເມຕ຺ຕາຍ ສມ຺ປຍຸຕ຺ຕາ.

ຕຕ຺ຖ ກຕມາ ເມຕ຺ຕາ? ອິຘ ຠິກ຺ຂຸ ຍສ຺ມິໍ ສມເຍ ຣູປາວຈຣໍ ຌານໍ ຠາເວຕິ ກິຣິຍໍ ເນວ ກຸສລໍ ນາກຸສລໍ ນ ຈ ກມ຺ມວິປາກໍ ທິຏ຺ຐຘມ຺ມສຸຂວິຫາຣໍ ວິຕກ຺ກວິຈາຣານໍ ວູປສມາ…ເປ… ທຸຕິຍໍ ຌານໍ…ເປ… ຕຕິຍໍ ຌານໍ…ເປ… ປຐມໍ ຌານໍ…ເປ… ທຸຕິຍໍ ຌານໍ…ເປ… ຕຕິຍໍ ຌານໍ…ເປ… ຈຕຸຕ຺ຖໍ ຌານໍ ອຸປສມ຺ປຊ຺ຊ ວິຫຣຕິ ເມຕ຺ຕາສຫຄຕໍ, ຍາ ຕສ຺ມິໍ ສມເຍ ເມຕ຺ຕິ ເມຕ຺ຕາຍນາ ເມຕ຺ຕາຍິຕຕ຺ຕໍ ເມຕ຺ຕາເຈໂຕວິມຸຕ຺ຕິ – ອຍໍ ວຸຈ຺ຈຕິ ‘‘ເມຕ຺ຕາ’’. ອວເສສາ ຘມ຺ມາ ເມຕ຺ຕາຍ ສມ຺ປຍຸຕ຺ຕາ.

໖໙໘. ຕຕ຺ຖ ກຕມາ ກຣຸຓາ…ເປ… ຕຕ຺ຖ ກຕມາ ມຸທິຕາ…ເປ… ຕຕ຺ຖ ກຕມາ ອຸເປກ຺ຂາ? ອິຘ ຠິກ຺ຂຸ ຍສ຺ມິໍ ສມເຍ ຣູປາວຈຣໍ ຌານໍ ຠາເວຕິ ກິຣິຍໍ ເນວ ກຸສລໍ ນາກຸສລໍ ນ ຈ ກມ຺ມວິປາກໍ ທິຏ຺ຐຘມ຺ມສຸຂວິຫາຣໍ ສຸຂສ຺ສ ຈ ປຫານາ ທຸກ຺ຂສ຺ສ ຈ ປຫານາ…ເປ… ຈຕຸຕ຺ຖໍ ຌານໍ ອຸປສມ຺ປຊ຺ຊ ວິຫຣຕິ ອຸເປກ຺ຂາສຫຄຕໍ, ຍາ ຕສ຺ມິໍ ສມເຍ ອຸເປກ຺ຂາ ອຸເປກ຺ຂາຍນາ ອຸເປກ຺ຂາຍິຕຕ຺ຕໍ ອຸເປກ຺ຂາເຈໂຕວິມຸຕ຺ຕິ – ອຍໍ ວຸຈ຺ຈຕິ ‘‘ອຸເປກ຺ຂາ’’. ອວເສສາ ຘມ຺ມາ ອຸເປກ຺ຂາຍ ສມ຺ປຍຸຕ຺ຕາ.

ອຠິຘມ຺ມຠາຊນີຍໍ.

໓. ປຎ຺ຫາປຸຈ຺ຉກໍ

໖໙໙. ຈຕສ຺ໂສ ອປ຺ປມຎ຺ຎາໂຍ – ອິຘ ຠິກ຺ຂຸ ເມຕ຺ຕາສຫຄເຕນ ເຈຕສາ ເອກໍ ທິສໍ ຜຣິຕ຺ວາ ວິຫຣຕິ ຕຖາ ທຸຕິຍໍ ຕຖາ ຕຕິຍໍ ຕຖາ ຈຕຸຕ຺ຖໍ, ອິຕິ ອຸທ຺ຘມໂຘ ຕິຣິຍໍ ສພ຺ພຘິ ສພ຺ພຕ຺ຕຕາຍ ສພ຺ພາວນ຺ຕໍ ໂລກໍ ເມຕ຺ຕາສຫຄເຕນ ເຈຕສາ ວິປຸເລນ ມຫຄ຺ຄເຕນ ອປ຺ປມາເຓນ ອເວເຣນ ອພ຺ຍາປຊ຺ເຊນ ຜຣິຕ຺ວາ ວິຫຣຕິ; ກຣຸຓາສຫຄເຕນ ເຈຕສາ ເອກໍ ທິສໍ ຜຣິຕ຺ວາ ວິຫຣຕິ ຕຖາ ທຸຕິຍໍ ຕຖາ ຕຕິຍໍ ຕຖາ ຈຕຸຕ຺ຖໍ, ອິຕິ ອຸທ຺ຘມໂຘ ຕິຣິຍໍ ສພ຺ພຘິ ສພ຺ພຕ຺ຕຕາຍ ສພ຺ພາວນ຺ຕໍ ໂລກໍ ກຣຸຓາສຫຄເຕນ ເຈຕສາ ວິປຸເລນ ມຫຄ຺ຄເຕນ ອປ຺ປມາເຓນ ອເວເຣນ ອພ຺ຍາປຊ຺ເຊນ ຜຣິຕ຺ວາ ວິຫຣຕິ; ມຸທິຕາສຫຄເຕນ ເຈຕສາ ເອກໍ ທິສໍ ຜຣິຕ຺ວາ ວິຫຣຕິ ຕຖາ ທຸຕິຍໍ ຕຖາ ຕຕິຍໍ ຕຖາ ຈຕຸຕ຺ຖໍ, ອິຕິ ອຸທ຺ຘມໂຘ ຕິຣິຍໍ ສພ຺ພຘິ ສພ຺ພຕ຺ຕຕາຍ ສພ຺ພາວນ຺ຕໍ ໂລກໍ ມຸທິຕາສຫຄເຕນ ເຈຕສາ ວິປຸເລນ ມຫຄ຺ຄເຕນ ອປ຺ປມາເຓນ ອເວເຣນ ອພ຺ຍາປຊ຺ເຊນ ຜຣິຕ຺ວາ ວິຫຣຕິ; ອຸເປກ຺ຂາສຫຄເຕນ ເຈຕສາ ເອກໍ ທິສໍ ຜຣິຕ຺ວາ ວິຫຣຕິ ຕຖາ ທຸຕິຍໍ ຕຖາ ຕຕິຍໍ ຕຖາ ຈຕຸຕ຺ຖໍ, ອິຕິ ອຸທ຺ຘມໂຘ ຕິຣິຍໍ ສພ຺ພຘິ ສພ຺ພຕ຺ຕຕາຍ ສພ຺ພາວນ຺ຕໍ ໂລກໍ ອຸເປກ຺ຂາສຫຄເຕນ ເຈຕສາ ວິປຸເລນ ມຫຄ຺ຄເຕນ ອປ຺ປມາເຓນ ອເວເຣນ ອພ຺ຍາປຊ຺ເຊນ ຜຣິຕ຺ວາ ວິຫຣຕິ.

໗໐໐. ຈຕຸນ຺ນໍ ອປ຺ປມຎ຺ຎານໍ ກຕິ ກຸສລາ, ກຕິ ອກຸສລາ, ກຕິ ອພ຺ຍາກຕາ…ເປ… ກຕິ ສຣຓາ, ກຕິ ອຣຓາ?

໑. ຕິກໍ

໗໐໑. ສິຍາ ກຸສລາ, ສິຍາ ອພ຺ຍາກຕາ. ຕິສ຺ໂສ ອປ຺ປມຎ຺ຎາໂຍ ສຸຂາຍ ເວທນາຍ ສມ຺ປຍຸຕ຺ຕາ, ອຸເປກ຺ຂາ ອທຸກ຺ຂມສຸຂາຍ ເວທນາຍ ສມ຺ປຍຸຕ຺ຕາ. ສິຍາ ວິປາກາ, ສິຍາ ວິປາກຘມ຺ມຘມ຺ມາ, ສິຍາ ເນວວິປາກນວິປາກຘມ຺ມຘມ຺ມາ. ສິຍາ ອຸປາທິນ຺ນຸປາທານິຍາ, ສິຍາ ອນຸປາທິນ຺ນຸປາທານິຍາ. ອສໍກິລິຏ຺ຐສໍກິເລສິກາ. ຕິສ຺ໂສ ອປ຺ປມຎ຺ຎາໂຍ ສິຍາ ສວິຕກ຺ກສວິຈາຣາ, ສິຍາ ອວິຕກ຺ກວິຈາຣມຕ຺ຕາ, ສິຍາ ອວິຕກ຺ກອວິຈາຣາ; ອຸເປກ຺ຂາ ອວິຕກ຺ກອວິຈາຣາ. ຕິສ຺ໂສ ອປ຺ປມຎ຺ຎາໂຍ ສິຍາ ປີຕິສຫຄຕາ, ສິຍາ ສຸຂສຫຄຕາ, ນ ອຸເປກ຺ຂາສຫຄຕາ, ສິຍາ ນ ວຕ຺ຕພ຺ພາ ປີຕິສຫຄຕາຕິ; ອຸເປກ຺ຂາ ອຸເປກ຺ຂາສຫຄຕາ. ເນວ ທສ຺ສເນນ ນ ຠາວນາຍ ປຫາຕພ຺ພາ. ເນວ ທສ຺ສເນນ ນ ຠາວນາຍ ປຫາຕພ຺ພເຫຕຸກາ. ສິຍາ ອາຈຍຄາມິໂນ, ສິຍາ ເນວາຈຍຄາມິນາປຈຍຄາມິໂນ, ເນວເສກ຺ຂນາເສກ຺ຂາ, ມຫຄ຺ຄຕາ, ນ ວຕ຺ຕພ຺ພາ ປຣິຕ຺ຕາຣມ຺ມຓາຕິປິ, ມຫຄ຺ຄຕາຣມ຺ມຓາຕິປິ, ອປ຺ປມາຓາຣມ຺ມຓາຕິປິ. ມຊ຺ຌິມາ, ອນິຍຕາ, ນ ວຕ຺ຕພ຺ພາ ມຄ຺ຄາຣມ຺ມຓາຕິປິ, ມຄ຺ຄເຫຕຸກາຕິປິ, ມຄ຺ຄາຘິປຕິໂນຕິປິ. ສິຍາ ອຸປ຺ປນ຺ນາ, ສິຍາ ອນຸປ຺ປນ຺ນາ, ສິຍາ ອຸປ຺ປາທິໂນ. ສິຍາ ອຕີຕາ, ສິຍາ ອນາຄຕາ, ສິຍາ ປຈ຺ຈຸປ຺ປນ຺ນາ. ນ ວຕ຺ຕພ຺ພາ ອຕີຕາຣມ຺ມຓາຕິປິ, ອນາຄຕາຣມ຺ມຓາຕິປິ, ປຈ຺ຈຸປ຺ປນ຺ນາຣມ຺ມຓາຕິປິ. ສິຍາ ອຊ຺ຌຕ຺ຕາ, ສິຍາ ພຫິທ຺ຘາ, ສິຍາ ອຊ຺ຌຕ຺ຕພຫິທ຺ຘາ, ພຫິທ຺ຘາຣມ຺ມຓາ, ອນິທສ຺ສນອປ຺ປຏິຆາ.

໒. ທຸກໍ

໗໐໒. ເມຕ຺ຕາ ເຫຕຸ, ຕິສ຺ໂສ ອປ຺ປມຎ຺ຎາໂຍ ນ ເຫຕູ, ສເຫຕຸກາ, ເຫຕຸສມ຺ປຍຸຕ຺ຕາ. ເມຕ຺ຕາ ເຫຕຸ ເຈວ ສເຫຕຸກາ ຈ; ຕິສ຺ໂສ ອປ຺ປມຎ຺ຎາໂຍ ນ ວຕ຺ຕພ຺ພາ ເຫຕູ ເຈວ ສເຫຕຸກາ ຈາຕິ, ສເຫຕຸກາ ເຈວ ນ ຈ ເຫຕູ. ເມຕ຺ຕາ ເຫຕຸ ເຈວ ເຫຕຸສມ຺ປຍຸຕ຺ຕາ ຈ; ຕິສ຺ໂສ ອປ຺ປມຎ຺ຎາໂຍ ນ ວຕ຺ຕພ຺ພາ ເຫຕູ ເຈວ ເຫຕຸສມ຺ປຍຸຕ຺ຕາ ຈາຕິ, ເຫຕຸສມ຺ປຍຸຕ຺ຕາ ເຈວ ນ ຈ ເຫຕູ. ຕິສ຺ໂສ ອປ຺ປມຎ຺ຎາໂຍ ນ ເຫຕູ ສເຫຕຸກາ; ເມຕ຺ຕາ ນ ວຕ຺ຕພ຺ພາ ນ ເຫຕຸ ສເຫຕຸກາຕິປິ, ນ ເຫຕຸ ອເຫຕຸກາຕິປິ.

ສປ຺ປຈ຺ຈຍາ, ສງ຺ຂຕາ, ອນິທສ຺ສນາ, ອປ຺ປຏິຆາ, ອຣູປາ, ໂລກິຍາ, ເກນຈິ ວິຎ຺ເຎຍ຺ຍາ, ເກນຈິ ນ ວິຎ຺ເຎຍ຺ຍາ, ໂນ ອາສວາ, ສາສວາ, ອາສວວິປ຺ປຍຸຕ຺ຕາ, ນ ວຕ຺ຕພ຺ພາ ອາສວາ ເຈວ ສາສວາ ຈາຕິ, ສາສວາ ເຈວ ໂນ ຈ ອາສວາ, ນ ວຕ຺ຕພ຺ພາ ອາສວາ ເຈວ ອາສວສມ຺ປຍຸຕ຺ຕາ ຈາຕິປິ, ອາສວສມ຺ປຍຸຕ຺ຕາ ເຈວ ໂນ ຈ ອາສວາຕິປິ. ອາສວວິປ຺ປຍຸຕ຺ຕາ ສາສວາ.

ໂນ ສໍໂຍຊນາ…ເປ… ໂນ ຄນ຺ຖາ…ເປ… ໂນ ໂອຆາ…ເປ… ໂນ ໂຍຄາ…ເປ… ໂນ ນີວຣຓາ…ເປ… ໂນ ປຣາມາສາ …ເປ… ສາຣມ຺ມຓາ, ໂນ ຈິຕ຺ຕາ, ເຈຕສິກາ, ຈິຕ຺ຕສມ຺ປຍຸຕ຺ຕາ, ຈິຕ຺ຕສໍສຏ຺ຐາ, ຈິຕ຺ຕສມຸຏ຺ຐານາ, ຈິຕ຺ຕສຫຠຸໂນ, ຈິຕ຺ຕານຸປຣິວຕ຺ຕິໂນ, ຈິຕ຺ຕສໍສຏ຺ຐສມຸຏ຺ຐານາ, ຈິຕ຺ຕສໍສຏ຺ຐສມຸຏ຺ຐານສຫຠຸໂນ, ຈິຕ຺ຕສໍສຏ຺ຐສມຸຏ຺ຐານານຸປຣິວຕ຺ຕິໂນ, ພາຫິຣາ, ໂນ ອຸປາທາ, ສິຍາ ອຸປາທິນ຺ນາ, ສິຍາ ອນຸປາທິນ຺ນາ.

ໂນ ອຸປາທານາ…ເປ… ໂນ ກິເລສາ…ເປ… ນ ທສ຺ສເນນ ປຫາຕພ຺ພາ, ນ ຠາວນາຍ ປຫາຕພ຺ພາ, ນ ທສ຺ສເນນ ປຫາຕພ຺ພເຫຕຸກາ, ນ ຠາວນາຍ ປຫາຕພ຺ພເຫຕຸກາ. ຕິສ຺ໂສ ອປ຺ປມຎ຺ຎາໂຍ ສິຍາ ສວິຕກ຺ກາ, ສິຍາ ອວິຕກ຺ກາ; ອຸເປກ຺ຂາ ອວິຕກ຺ກາ. ຕິສ຺ໂສ ອປ຺ປມຎ຺ຎາໂຍ ສິຍາ ສວິຈາຣາ, ສິຍາ ອວິຈາຣາ; ອຸເປກ຺ຂາ ອວິຈາຣາ. ຕິສ຺ໂສ ອປ຺ປມຎ຺ຎາໂຍ ສິຍາ ສປ຺ປີຕິກາ, ສິຍາ ອປ຺ປີຕິກາ; ອຸເປກ຺ຂາ ອປ຺ປີຕິກາ. ຕິສ຺ໂສ ອປ຺ປມຎ຺ຎາໂຍ ສິຍາ ປີຕິສຫຄຕາ, ສິຍາ ນ ປີຕິສຫຄຕາ; ອຸເປກ຺ຂາ ນ ປີຕິສຫຄຕາ. ຕິສ຺ໂສ ອປ຺ປມຎ຺ຎາໂຍ ສຸຂສຫຄຕາ, ອຸເປກ຺ຂາ ນ ສຸຂສຫຄຕາ. ອຸເປກ຺ຂາ ອຸເປກ຺ຂາສຫຄຕາ, ຕິສ຺ໂສ ອປ຺ປມຎ຺ຎາໂຍ ນ ອຸເປກ຺ຂາສຫຄຕາ, ນ ກາມາວຈຣາ, ຣູປາວຈຣາ, ນ ອຣູປາວຈຣາ, ປຣິຍາປນ຺ນາ, ອນິຍ຺ຍານິກາ, ອນິຍຕາ, ສອຸຕ຺ຕຣາ, ອຣຓາຕິ.

ປຎ຺ຫາປຸຈ຺ຉກໍ.

ອປ຺ປມຎ຺ຎາວິຠງ຺ໂຄ ນິຏ຺ຐິໂຕ.