໒. ທຸກປຸຄ຺ຄລປຎ຺ຎຕ຺ຕິ

໔໕. ກຕໂມ ຈ ປຸຄ຺ຄໂລ ໂກຘໂນ? ຕຕ຺ຖ ກຕໂມ ໂກໂຘ? ໂຍ ໂກໂຘ ກຸຊ຺ຌນາ ກຸຊ຺ຌິຕຕ຺ຕໍ ໂທໂສ ທຸສ຺ສນາ ທຸສ຺ສິຕຕ຺ຕໍ [ທູສນາ ທູສິຕຕ຺ຕໍ (ສ຺ຍາ.)] ພ຺ຍາປຕ຺ຕິ ພ຺ຍາປຊ຺ຊນາ ພ຺ຍາປຊ຺ຊິຕຕ຺ຕໍ ວິໂຣໂຘ ປຏິວິໂຣໂຘ ຈຓ຺ຑິກ຺ກໍ ອສຸໂຣໂປ ອນຕ຺ຕມນຕາ ຈິຕ຺ຕສ຺ສ – ອຍໍ ວຸຈ຺ຈຕິ ໂກໂຘ. ຍສ຺ສ ປຸຄ຺ຄລສ຺ສ ອຍໍ ໂກໂຘ ອປ຺ປຫີໂນ – ອຍໍ ວຸຈ຺ຈຕິ ປຸຄ຺ຄໂລ ‘‘ໂກຘໂນ’’.

໔໖. ກຕໂມ ຈ ປຸຄ຺ຄໂລ ອຸປນາຫີ? ຕຕ຺ຖ ກຕໂມ ອຸປນາໂຫ? ປຸພ຺ພກາລໍ ໂກໂຘ ອປຣກາລໍ ອຸປນາໂຫ. ໂຍ ເອວຣູໂປ ອຸປນາໂຫ ອຸປນຍ຺ຫນາ ອຸປນຍ຺ຫິຕຕ຺ຕໍ ອຏ຺ຐປນາ [ອາຐປນາ (ກ.) ວິຠ. ໘໙໑] ຐປນາ ສຓ຺ຐປນາ ອນຸສໍສນ຺ທນາ ອນຸປ຺ປພນ຺ຘນາ ທຬ຺ຫີກມ຺ມໍ ໂກຘສ຺ສ – ອຍໍ ວຸຈ຺ຈຕິ ອຸປນາໂຫ. ຍສ຺ສ ປຸຄ຺ຄລສ຺ສ ອຍໍ ອຸປນາໂຫ ອປ຺ປຫີໂນ – ອຍໍ ວຸຈ຺ຈຕິ ປຸຄ຺ຄໂລ ‘‘ອຸປນາຫີ’’.

໔໗. ກຕໂມ ຈ ປຸຄ຺ຄໂລ ມກ຺ຂີ? ຕຕ຺ຖ ກຕໂມ ມກ຺ໂຂ? ໂຍ ມກ຺ໂຂ ມກ຺ຂາຍນາ ມກ຺ຂາຍິຕຕ຺ຕໍ [ມກ຺ຂີຍນາ ມກ຺ຂີຍິຕຕ຺ຕໍ (ສີ.), ມກ຺ຂິຍນາ ມກ຺ຂິຍິຕຕ຺ຕໍ (ກ.)] ນິຏ຺ຐຸຣິຍໍ ນິຏ຺ຐຸຣິຍກມ຺ມໍ – ອຍໍ ວຸຈ຺ຈຕິ ມກ຺ໂຂ. ຍສ຺ສ ປຸຄ຺ຄລສ຺ສ ອຍໍ ມກ຺ໂຂ ອປ຺ປຫີໂນ – ອຍໍ ວຸຈ຺ຈຕິ ປຸຄ຺ຄໂລ ‘‘ມກ຺ຂີ’’.

໔໘. ກຕໂມ ຈ ປຸຄ຺ຄໂລ ປຬາສີ? ຕຕ຺ຖ ກຕໂມ ປຬາໂສ? ໂຍ ປຬາໂສ ປຬາສາຍນາ ປຬາສາຍິຕຕ຺ຕໍ ປຬາສາຫາໂຣ ວິວາທຏ຺ຐານໍ ຍຸຄຄ຺ຄາໂຫ ອປ຺ປຏິນິສ຺ສຄ຺ໂຄ – ອຍໍ ວຸຈ຺ຈຕິ ປຬາໂສ. ຍສ຺ສ ປຸຄ຺ຄລສ຺ສ ອຍໍ ປຬາໂສ ອປ຺ປຫີໂນ – ອຍໍ ວຸຈ຺ຈຕິ ປຸຄ຺ຄໂລ ‘‘ປຬາສີ’’.

໔໙. ກຕໂມ ຈ ປຸຄ຺ຄໂລ ອິສ຺ສຸກີ? ຕຕ຺ຖ ກຕມາ ອິສ຺ສາ? ຍາ ປຣລາຠສກ຺ກາຣຄຣຸກາຣມານນວນ຺ທນປູຊນາສຸ ອິສ຺ສາ ອິສ຺ສາຍນາ ອິສ຺ສາຍິຕຕ຺ຕໍ ອຸສູຍາ ອຸສູຍນາ [ອຸສ຺ສຸຍາ ອຸສ຺ສຸຍນາ (ກ.) ວິຠ. ໘໙໓] ອຸສູຍິຕຕ຺ຕໍ – ອຍໍ ວຸຈ຺ຈຕິ ອິສ຺ສາ. ຍສ຺ສ ປຸຄ຺ຄລສ຺ສ ອຍໍ ອິສ຺ສາ ອປ຺ປຫີນາ – ອຍໍ ວຸຈ຺ຈຕິ ປຸຄ຺ຄໂລ ‘‘ອິສ຺ສຸກີ’’.

໕໐. ກຕໂມ ຈ ປຸຄ຺ຄໂລ ມຈ຺ຉຣີ? ຕຕ຺ຖ ກຕມໍ ມຈ຺ຉຣິຍໍ? ປຎ຺ຈ ມຈ຺ຉຣິຍານິ – ອາວາສມຈ຺ຉຣິຍໍ, ກຸລມຈ຺ຉຣິຍໍ, ລາຠມຈ຺ຉຣິຍໍ, ວຓ຺ຓມຈ຺ຉຣິຍໍ, ຘມ຺ມມຈ຺ຉຣິຍໍ. ຍໍ ເອວຣູປໍ ມຈ຺ເຉຣໍ ມຈ຺ຉຣາຍນາ ມຈ຺ຉຣາຍິຕຕ຺ຕໍ ເວວິຈ຺ຉໍ ກທຣິຍໍ ກຏຸກຎ຺ຈຸກຕາ ອຄ຺ຄຫິຕຕ຺ຕໍ ຈິຕ຺ຕສ຺ສ – ອິທໍ ວຸຈ຺ຈຕິ ມຈ຺ຉຣິຍໍ. ຍສ຺ສ ປຸຄ຺ຄລສ຺ສ ອິທໍ ມຈ຺ຉຣິຍໍ ອປ຺ປຫີນໍ – ອຍໍ ວຸຈ຺ຈຕິ ປຸຄ຺ຄໂລ ‘‘ມຈ຺ຉຣີ’’.

໕໑. ກຕໂມ ຈ ປຸຄ຺ຄໂລ ສໂຐ? ຕຕ຺ຖ ກຕມໍ ສາເຐຍ຺ຍໍ? ອິເຘກຈ຺ໂຈ ສໂຐ ໂຫຕິ ປຣິສໂຐ. ຍໍ ຕຕ຺ຖ ສຐໍ ສຐຕາ ສາເຐຍ຺ຍໍ ກກ຺ກຣຕາ ກກ຺ກຣິຍໍ [ກກ຺ຂຬຕາ ກກ຺ຂຬິຍໍ (ສ຺ຍາ.) ເອວໍ ຂຸທ຺ທກວິຠງ຺ຄທຸກນິທ຺ເທເສປິ] ປຣິກ຺ຂຕ຺ຕຕ຺ຕາ ປາຣິກ຺ຂຕ຺ຕິຍໍ – ອິທໍ ວຸຈ຺ຈຕິ ສາເຐຍ຺ຍໍ. ຍສ຺ສ ປຸຄ຺ຄລສ຺ສ ອິທໍ ສາເຐຍ຺ຍໍ ອປ຺ປຫີນໍ – ອຍໍ ວຸຈ຺ຈຕິ ປຸຄ຺ຄໂລ ‘‘ສໂຐ’’.

໕໒. ກຕໂມ ຈ ປຸຄ຺ຄໂລ ມາຍາວີ? ຕຕ຺ຖ ກຕມາ ມາຍາ? ອິເຘກຈ຺ໂຈ ກາເຍນ ທຸຈ຺ຈຣິຕໍ ຈຣິຕ຺ວາ ວາຈາຍ ທຸຈ຺ຈຣິຕໍ ຈຣິຕ຺ວາ ມນສາ ທຸຈ຺ຈຣິຕໍ ຈຣິຕ຺ວາ ຕສ຺ສ ປຏິຈ຺ຉາທນເຫຕຸ ປາປິກໍ ອິຈ຺ຉໍ ປຓິທຫຕິ – ‘‘ມາ ມໍ ຊຎ຺ຎາ’’ຕິ ອິຈ຺ຉຕິ, ‘‘ມາ ມໍ ຊຎ຺ຎາ’’ຕິ ສງ຺ກປ຺ປຕິ ‘‘ມາ ມໍ ຊຎ຺ຎາ’’ຕິ ວາຈໍ ຠາສຕິ, ‘‘ມາ ມໍ ຊຎ຺ຎາ’’ຕິ ກາເຍນ ປຣກ຺ກມຕິ. ຍາ ເອວຣູປາ ມາຍາ ມາຍາວິຕາ ອຈ຺ຈາສຣາ ວຎ຺ຈນາ ນິກຕິ ວິກິຣຓາ ປຣິຫຣຓາ ຄູຫນາ ປຣິຄູຫນາ ຉາທນາ ປຏິຈ຺ຉາທນາ ອນຸຕ຺ຕານີກມ຺ມໍ ອນາວິກມ຺ມໍ ໂວຈ຺ຉາທນາ ປາປກິຣິຍາ – ອຍໍ ວຸຈ຺ຈຕິ ມາຍາ. ຍສ຺ສ ປຸຄ຺ຄລສ຺ສ ອຍໍ ມາຍາ ອປ຺ປຫີນາ – ອຍໍ ວຸຈ຺ຈຕິ ປຸຄ຺ຄໂລ ‘‘ມາຍາວີ’’.

໕໓. ກຕໂມ ຈ ປຸຄ຺ຄໂລ ອຫິຣິໂກ? ຕຕ຺ຖ ກຕມໍ ອຫິຣິກໍ? ຍໍ ນ ຫິຣີຍຕິ ຫິຣິຍິຕພ຺ເພນ ນ ຫິຣີຍຕິ ປາປການໍ ອກຸສລານໍ ຘມ຺ມານໍ ສມາປຕ຺ຕິຍາ – ອິທໍ ວຸຈ຺ຈຕິ ອຫິຣິກໍ. ອິມິນາ ອຫິຣິເກນ ສມນ຺ນາຄໂຕ ປຸຄ຺ຄໂລ ‘‘ອຫິຣິໂກ’’.

໕໔. ກຕໂມ ຈ ປຸຄ຺ຄໂລ ອໂນຕ຺ຕປ຺ປີ? ຕຕ຺ຖ ກຕມໍ ອໂນຕ຺ຕປ຺ປໍ? ຍໍ ນ ໂອຕ຺ຕປ຺ປຕິ ໂອຕ຺ຕປ຺ປິຕພ຺ເພນ ນ ໂອຕ຺ຕປ຺ປຕິ ປາປການໍ ອກຸສລານໍ ຘມ຺ມານໍ ສມາປຕ຺ຕິຍາ – ອິທໍ ວຸຈ຺ຈຕິ ອໂນຕ຺ຕປ຺ປໍ. ອິມິນາ ອໂນຕ຺ຕປ຺ເປນ ສມນ຺ນາຄໂຕ ປຸຄ຺ຄໂລ ‘‘ອໂນຕ຺ຕປ຺ປີ’’.

໕໕. ກຕໂມ ຈ ປຸຄ຺ຄໂລ ທຸພ຺ພໂຈ? ຕຕ຺ຖ ກຕໂມ ໂທວຈສ຺ສຕາ? ສຫຘມ຺ມິເກ ວຸຈ຺ຈມາເນ ໂທວຈສ຺ສາຍໍ ໂທວຈສ຺ສິຍໍ ໂທວຈສ຺ສຕາ ວິປ຺ປຏິກຸລຄ຺ຄາຫິຕາ ວິປຈ຺ຈນີກສາຕຕາ ອນາທຣິຍໍ ອນາທຣິຍຕາ ອຄາຣວຕາ ອປ຺ປຕິສ຺ສວຕາ – ອຍໍ ວຸຈ຺ຈຕິ ໂທວຈສ຺ສຕາ. ອິມາຍ ໂທວຈສ຺ສຕາຍ ສມນ຺ນາຄໂຕ ປຸຄ຺ຄໂລ ‘‘ທຸພ຺ພໂຈ’’.

໕໖. ກຕໂມ ຈ ປຸຄ຺ຄໂລ ປາປມິຕ຺ໂຕ? ຕຕ຺ຖ ກຕມາ ປາປມິຕ຺ຕຕາ? ເຍ ເຕ ປຸຄ຺ຄລາ ອສ຺ສທ຺ຘາ ທຸສ຺ສີລາ ອປ຺ປສ຺ສຸຕາ ມຈ຺ຉຣິໂນ ທຸປ຺ປຎ຺ຎາ, ຍາ ເຕສໍ ເສວນາ ນິເສວນາ ສໍເສວນາ ຠຊນາ ສມ຺ຠຊນາ ຠຕ຺ຕິ ສມ຺ຠຕ຺ຕິ ສມ຺ປວງ຺ກຕາ – ອຍໍ ວຸຈ຺ຈຕິ ປາປມິຕ຺ຕຕາ. ອິມາຍ ປາປມິຕ຺ຕຕາຍ ສມນ຺ນາຄໂຕ ປຸຄ຺ຄໂລ ‘‘ປາປມິຕ຺ໂຕ’’.

໕໗. ກຕໂມ ຈ ປຸຄ຺ຄໂລ ອິນ຺ທ຺ຣິເຍສຸ ອຄຸຕ຺ຕທ຺ວາໂຣ? ຕຕ຺ຖ ກຕມາ ອິນ຺ທ຺ຣິເຍສຸ ອຄຸຕ຺ຕທ຺ວາຣຕາ? ອິເຘກຈ຺ໂຈ ປຸຄ຺ຄໂລ ຈກ຺ຂຸນາ ຣູປໍ ທິສ຺ວາ ນິມິຕ຺ຕຄ຺ຄາຫີ ໂຫຕິ ອນຸພ຺ຍຎ຺ຊນຄ຺ຄາຫີ; ຍຕ຺ວາຘິກຣຓເມນໍ ຈກ຺ຂຸນ຺ທ຺ຣິຍໍ ອສໍວຸຕໍ ວິຫຣນ຺ຕໍ ອຠິຊ຺ຌາໂທມນສ຺ສາ ປາປກາ ອກຸສລາ ຘມ຺ມາ ອນ຺ວາສ຺ສເວຍ຺ຍຸໍ, ຕສ຺ສ ສໍວຣາຍ ນ ປຏິປຊ຺ຊຕິ, ນ ຣກ຺ຂຕິ ຈກ຺ຂຸນ຺ທ຺ຣິຍໍ, ຈກ຺ຂຸນ຺ທ຺ຣິເຍ ນ ສໍວຣໍ ອາປຊ຺ຊຕິ. ໂສເຕນ ສທ຺ທໍ ສຸຕ຺ວາ…ເປ… ຆາເນນ ຄນ຺ຘໍ ຆາຍິຕ຺ວາ…ເປ… ຊິວ຺ຫາຍ ຣສໍ ສາຍິຕ຺ວາ…ເປ… ກາເຍນ ໂຜຏ຺ຐພ຺ພໍ ຜຸສິຕ຺ວາ…ເປ… ມນສາ ຘມ຺ມໍ ວິຎ຺ຎາຍ ນິມິຕ຺ຕຄ຺ຄາຫີ ໂຫຕິ ອນຸພ຺ຍຎ຺ຊນຄ຺ຄາຫີ; ຍຕ຺ວາຘິກຣຓເມນໍ ມນິນ຺ທ຺ຣິຍໍ ອສໍວຸຕໍ ວິຫຣນ຺ຕໍ ອຠິຊ຺ຌາໂທມນສ຺ສາ ປາປກາ ອກຸສລາ ຘມ຺ມາ ອນ຺ວາສ຺ສເວຍ຺ຍຸໍ, ຕສ຺ສ ສໍວຣາຍ ນ ປຏິປຊ຺ຊຕິ, ນ ຣກ຺ຂຕິ ມນິນ຺ທ຺ຣິຍໍ, ມນິນ຺ທ຺ຣິເຍ ນ ສໍວຣໍ ອາປຊ຺ຊຕິ. ຍາ ອິເມສໍ ຉນ຺ນໍ ອິນ຺ທ຺ຣິຍານໍ ອຄຸຕ຺ຕິ ອໂຄປນາ ອນາຣກ຺ໂຂ ອສໍວໂຣ – ອຍໍ ວຸຈ຺ຈຕິ ອິນ຺ທ຺ຣິເຍສຸ ອຄຸຕ຺ຕທ຺ວາຣຕາ. ອິມາຍ ອິນ຺ທ຺ຣິເຍສຸ ອຄຸຕ຺ຕທ຺ວາຣຕາຍ ສມນ຺ນາຄໂຕ ປຸຄ຺ຄໂລ ‘‘ອິນ຺ທ຺ຣິເຍສຸ ອຄຸຕ຺ຕທ຺ວາໂຣ’’.

໕໘. ກຕໂມ ຈ ປຸຄ຺ຄໂລ ໂຠຊເນ ອມຕ຺ຕຎ຺ຎູ? ຕຕ຺ຖ ກຕມາ ໂຠຊເນ ອມຕ຺ຕຎ຺ຎຸຕາ? ອິເຘກຈ຺ໂຈ ປຸຄ຺ຄໂລ ອປ຺ປຏິສງ຺ຂາ ອໂຍນິໂສ ອາຫາຣໍ ອາຫາເຣຕິ ທວາຍ ມທາຍ ມຓ຺ຑນາຍ ວິຠູສນາຍ, ຍາ ຕຕ຺ຖ ອສນ຺ຕຸຏ຺ຐິຕາ ອມຕ຺ຕຎ຺ຎຸຕາ ອປ຺ປຏິສງ຺ຂາ ໂຠຊເນ – ອຍໍ ວຸຈ຺ຈຕິ ໂຠຊເນ ອມຕ຺ຕຎ຺ຎຸຕາ. ອິມາຍ ໂຠຊເນ ອມຕ຺ຕຎ຺ຎຸຕາຍ ສມນ຺ນາຄໂຕ ປຸຄ຺ຄໂລ ‘‘ໂຠຊເນ ອມຕ຺ຕຎ຺ຎູ’’.

໕໙. ກຕໂມ ຈ ປຸຄ຺ຄໂລ ມຸຏ຺ຐສ຺ສຕິ? ຕຕ຺ຖ ກຕມໍ ມຸຏ຺ຐສ຺ສຈ຺ຈໍ? ຍາ ອສ຺ສຕິ ອນນຸສ຺ສຕິ ອປ຺ປຏິສ຺ສຕິ ອສ຺ສຕິ ອສ຺ສຣຓຕາ ອຘາຣຓຕາ ປິລາປນຕາ ສມ຺ມຸສນຕາ – ອິທໍ ວຸຈ຺ຈຕິ ມຸຏ຺ຐສ຺ສຈ຺ຈໍ. ອິມິນາ ມຸຏ຺ຐສ຺ສຈ຺ເຈນ ສມນ຺ນາຄໂຕ ປຸຄ຺ຄໂລ ‘‘ມຸຏ຺ຐສ຺ສຕິ’’.

໖໐. ກຕໂມ ຈ ປຸຄ຺ຄໂລ ອສມ຺ປຊາໂນ? ຕຕ຺ຖ ກຕມໍ ອສມ຺ປຊຎ຺ຎໍ? ຍໍ ອຎ຺ຎາຓໍ ອທສ຺ສນໍ ອນຠິສມໂຍ ອນນຸໂພໂຘ ອສມ຺ໂພໂຘ ອປ຺ປຏິເວໂຘ ອສງ຺ຄາຫຓາ ອປຣິໂຍຄາຫຓາ [ອສໍຄາຫນາ ອປຣິໂຍຄາຫນາ (ສີ. ສ຺ຍາ. ກ.)] ອສມເປກ຺ຂຓາ ອປຈ຺ຈເວກ຺ຂຓາ ອປຈ຺ຈກ຺ຂກມ຺ມໍ ທຸມ຺ເມຊ຺ຌໍ ພາລ຺ຍໍ ອສມ຺ປຊຎ຺ຎໍ ໂມໂຫ ປໂມໂຫ ສມ຺ໂມໂຫ ອວິຊ຺ຊາ ອວິຊ຺ໂຊໂຆ ອວິຊ຺ຊາໂຍໂຄ ອວິຊ຺ຊານຸສໂຍ ອວິຊ຺ຊາປຣິຍຸຏ຺ຐານໍ ອວິຊ຺ຊາລງ຺ຄີ ໂມໂຫ ອກຸສລມູລໍ – ອິທໍ ວຸຈ຺ຈຕິ ອສມ຺ປຊຎ຺ຎໍ. ອິມິນາ ອສມ຺ປຊຎ຺ເຎນ ສມນ຺ນາຄໂຕ ປຸຄ຺ຄໂລ ‘‘ອສມ຺ປຊາໂນ’’.

໖໑. ກຕໂມ ຈ ປຸຄ຺ຄໂລ ສີລວິປນ຺ໂນ? ຕຕ຺ຖ ກຕມາ ສີລວິປຕ຺ຕິ? ກາຍິໂກ ວີຕິກ຺ກໂມ ວາຈສິໂກ ວີຕິກ຺ກໂມ ກາຍິກວາຈສິໂກ ວີຕິກ຺ກໂມ – ອຍໍ ວຸຈ຺ຈຕິ ສີລວິປຕ຺ຕິ. ສພ຺ພມ຺ປິ ທຸສ຺ສິລ຺ຍໍ ສີລວິປຕ຺ຕິ. ອິມາຍ ສີລວິປຕ຺ຕິຍາ ສມນ຺ນາຄໂຕ ປຸຄ຺ຄໂລ ‘‘ສີລວິປນ຺ໂນ’’.

໖໒. ກຕໂມ ຈ ປຸຄ຺ຄໂລ ທິຏ຺ຐິວິປນ຺ໂນ? ຕຕ຺ຖ ກຕມາ ທິຏ຺ຐິວິປຕ຺ຕິ? ‘‘ນຕ຺ຖິ ທິນ຺ນໍ, ນຕ຺ຖິ ຍິຏ຺ຐໍ, ນຕ຺ຖິ ຫຸຕໍ, ນຕ຺ຖິ ສຸກຕທຸກ຺ກຏານໍ [ສຸກຏທຸກ຺ກຏານໍ (ສີ.)] ກມ຺ມານໍ ຜລໍ ວິປາໂກ, ນຕ຺ຖິ ອຍໍ ໂລໂກ, ນຕ຺ຖິ ປໂຣ ໂລໂກ, ນຕ຺ຖິ ມາຕາ, ນຕ຺ຖິ ປິຕາ, ນຕ຺ຖິ ສຕ຺ຕາ ໂອປປາຕິກາ, ນຕ຺ຖິ ໂລເກ ສມຓພ຺ຣາຫ຺ມຓາ ສມ຺ມຄ຺ຄຕາ [ສມຄ຺ຄຕາ (ກ.)] ສມ຺ມາປຏິປນ຺ນາ ເຍ ອິມຎ຺ຈ ໂລກໍ ປຣຎ຺ຈ ໂລກໍ ສຍໍ ອຠິຎ຺ຎາ ສຈ຺ຉິກຕ຺ວາ ປເວເທນ຺ຕີ’’ຕິ. ຍາ ເອວຣູປາ ທິຏ຺ຐິ ທິຏ຺ຐິຄຕໍ ທິຏ຺ຐິຄຫນໍ ທິຏ຺ຐິກນ຺ຕາໂຣ ທິຏ຺ຐິວິສູກາຍິກໍ ທິຏ຺ຐິວິປ຺ຜນ຺ທິຕໍ ທິຏ຺ຐິສໍໂຍຊນໍ ຄາໂຫ ປຏິຄ຺ຄາໂຫ ອຠິນິເວໂສ ປຣາມາໂສ ກຸມ຺ມຄ຺ໂຄ ມິຈ຺ຉາປໂຖ ມິຈ຺ຉຕ຺ຕໍ ຕິຕ຺ຖາຍຕນໍ ວິປຣິຍາສຄ຺ຄາໂຫ [ວິປຣິເຍສຄ຺ຄາໂຫ (ສພ຺ພຕ຺ຖ) ປທສິທ຺ຘິ ຈິນ຺ເຕຕພ຺ພາ], ອຍໍ ວຸຈ຺ຈຕິ ທິຏ຺ຐິວິປຕ຺ຕິ. ສພ຺ພາປິ ມິຈ຺ຉາທິຏ຺ຐິ ທິຏ຺ຐິວິປຕ຺ຕິ. ອິມາຍ ທິຏ຺ຐິວິປຕ຺ຕິຍາ ສມນ຺ນາຄໂຕ ປຸຄ຺ຄໂລ ‘‘ທິຏ຺ຐິວິປນ຺ໂນ’’.

໖໓. ກຕໂມ ຈ ປຸຄ຺ຄໂລ ອຊ຺ຌຕ຺ຕສໍໂຍຊໂນ? ຍສ຺ສ ປຸຄ຺ຄລສ຺ສ ປຎ຺ໂຈຣມ຺ຠາຄິຍານິ ສໍໂຍຊນານິ ອປ຺ປຫີນານິ – ອຍໍ ວຸຈ຺ຈຕິ ປຸຄ຺ຄໂລ ‘‘ອຊ຺ຌຕ຺ຕສໍໂຍຊໂນ’’.

໖໔. ກຕໂມ ຈ ປຸຄ຺ຄໂລ ພຫິທ຺ຘາສໍໂຍຊໂນ? ຍສ຺ສ ປຸຄ຺ຄລສ຺ສ ປຎ຺ຈຸທ຺ຘມ຺ຠາຄິຍານິ ສໍໂຍຊນານິ ອປ຺ປຫີນານິ – ອຍໍ ວຸຈ຺ຈຕິ ປຸຄ຺ຄໂລ ‘‘ພຫິທ຺ຘາສໍໂຍຊໂນ’’.

໖໕. ກຕໂມ ຈ ປຸຄ຺ຄໂລ ອກ຺ໂກຘໂນ? ຕຕ຺ຖ ກຕໂມ ໂກໂຘ? ໂຍ ໂກໂຘ ກຸຊ຺ຌນາ ກຸຊ຺ຌິຕຕ຺ຕໍ ໂທໂສ ທຸສ຺ສນາ ທຸສ຺ສິຕຕ຺ຕໍ ພ຺ຍາປຕ຺ຕິ ພ຺ຍາປຊ຺ຊນາ ພ຺ຍາປຊ຺ຊິຕຕ຺ຕໍ ວິໂຣໂຘ ປຏິວິໂຣໂຘ ຈຓ຺ຑິກ຺ກໍ ອສຸໂຣໂປ ອນຕ຺ຕມນຕາ ຈິຕ຺ຕສ຺ສ – ອຍໍ ວຸຈ຺ຈຕິ ໂກໂຘ. ຍສ຺ສ ປຸຄ຺ຄລສ຺ສ ອຍໍ ໂກໂຘ ປຫີໂນ – ອຍໍ ວຸຈ຺ຈຕິ ປຸຄ຺ຄໂລ ‘‘ອກ຺ໂກຘໂນ’’.

໖໖. ກຕໂມ ຈ ປຸຄ຺ຄໂລ ອນຸປນາຫີ? ຕຕ຺ຖ ກຕໂມ ອຸປນາໂຫ? ປຸພ຺ພກາລໍ ໂກໂຘ ອປຣກາລໍ ອຸປນາໂຫ ໂຍ ເອວຣູໂປ ອຸປນາໂຫ ອຸປນຍ຺ຫນາ ອຸປນຍ຺ຫິຕຕ຺ຕໍ ອຏ຺ຐປນາ ຐປນາ ສຓ຺ຐປນາ ອນຸສໍສນ຺ທນາ ອນຸປ຺ປພນ຺ຘນາ ທຬ຺ຫີກມ຺ມໍ ໂກຘສ຺ສ – ອຍໍ ວຸຈ຺ຈຕິ ອຸປນາໂຫ. ຍສ຺ສ ປຸຄ຺ຄລສ຺ສ ອຍໍ ອຸປນາໂຫ ປຫີໂນ – ອຍໍ ວຸຈ຺ຈຕິ ປຸຄ຺ຄໂລ ‘‘ອນຸປນາຫີ’’.

໖໗. ກຕໂມ ຈ ປຸຄ຺ຄໂລ ອມກ຺ຂີ? ຕຕ຺ຖ ກຕໂມ ມກ຺ໂຂ? ໂຍ ມກ຺ໂຂ ມກ຺ຂາຍນາ ມກ຺ຂາຍິຕຕ຺ຕໍ ນິຏ຺ຐຸຣິຍໍ ນິຏ຺ຐຸຣິຍກມ຺ມໍ – ອຍໍ ວຸຈ຺ຈຕິ ມກ຺ໂຂ. ຍສ຺ສ ປຸຄ຺ຄລສ຺ສ ອຍໍ ມກ຺ໂຂ ປຫີໂນ – ອຍໍ ວຸຈ຺ຈຕິ ປຸຄ຺ຄໂລ ‘‘ອມກ຺ຂີ’’.

໖໘. ກຕໂມ ຈ ປຸຄ຺ຄໂລ ອປຬາສີ? ຕຕ຺ຖ ກຕໂມ ປຬາໂສ? ໂຍ ປຬາໂສ ປຬາສາຍນາ ປຬາສາຍິຕຕ຺ຕໍ ປຬາສາຫາໂຣ ວິວາທຏ຺ຐານໍ ຍຸຄຄ຺ຄາໂຫ ອປ຺ປຏິນິສ຺ສຄ຺ໂຄ – ອຍໍ ວຸຈ຺ຈຕິ ປຬາໂສ. ຍສ຺ສ ປຸຄ຺ຄລສ຺ສ ອຍໍ ປຬາໂສ ປຫີໂນ – ອຍໍ ວຸຈ຺ຈຕິ ປຸຄ຺ຄໂລ ‘‘ອປຬາສີ’’.

໖໙. ກຕໂມ ຈ ປຸຄ຺ຄໂລ ອນິສ຺ສຸກີ? ຕຕ຺ຖ ກຕມາ ອິສ຺ສາ? ຍາ ປຣລາຠສກ຺ກາຣຄຣຸກາຣມານນວນ຺ທນປູຊນາສຸ ອິສ຺ສາ ອິສ຺ສາຍນາ ອິສ຺ສາຍິຕຕ຺ຕໍ ອຸສູຍາ ອຸສູຍນາ ອຸສູຍິຕຕ຺ຕໍ – ອຍໍ ວຸຈ຺ຈຕິ ອິສ຺ສາ. ຍສ຺ສ ປຸຄ຺ຄລສ຺ສ ອຍໍ ອິສ຺ສາ ປຫີນາ – ອຍໍ ວຸຈ຺ຈຕິ ປຸຄ຺ຄໂລ ‘‘ອນິສ຺ສຸກີ’’.

໗໐. ກຕໂມ ຈ ປຸຄໂລ ອມຈ຺ຉຣີ? ຕຕ຺ຖ ກຕມໍ ມຈ຺ຉຣິຍໍ? ປຎ຺ຈ ມຈ຺ຉຣິຍານິ – ອາວາສມຈ຺ຉຣິຍໍ, ກຸລມຈ຺ຉຣິຍໍ, ລາຠມຈ຺ຉຣິຍໍ, ວຓ຺ຓມຈ຺ຉຣິຍໍ, ຘມ຺ມມຈ຺ຉຣິຍໍ. ຍໍ ເອວຣູປໍ ມຈ຺ເຉຣໍ ມຈ຺ຉຣາຍນາ ມຈ຺ຉຣາຍິຕຕ຺ຕໍ ເວວິຈ຺ຉໍ ກທຣິຍໍ ກຏຸກຎ຺ຈຸກຕາ ອຄ຺ຄຫິຕຕ຺ຕໍ ຈິຕ຺ຕສ຺ສ – ອິທໍ ວຸຈ຺ຈຕິ ມຈ຺ຉຣິຍໍ. ຍສ຺ສ ປຸຄ຺ຄລສ຺ສ ອິທໍ ມຈ຺ຉຣິຍໍ ປຫີນໍ – ອຍໍ ວຸຈ຺ຈຕິ ປຸຄ຺ຄໂລ ‘‘ອມຈ຺ຉຣີ’’.

໗໑. ກຕໂມ ຈ ປຸຄ຺ຄໂລ ອສໂຐ? ຕຕ຺ຖ ກຕມໍ ສາເຐຍ຺ຍໍ? ອິເຘກຈ຺ໂຈ ສໂຐ ໂຫຕິ ປຣິສໂຐ. ຍໍ ຕຕ຺ຖ ສຐໍ ສຐຕາ ສາເຐຍ຺ຍໍ ກກ຺ກຣຕາ ກກ຺ກຣິຍໍ ປຣິກ຺ຂຕ຺ຕຕາ ປາຣິກ຺ຂຕ຺ຕິຍໍ – ອິທໍ ວຸຈ຺ຈຕິ ສາເຐຍ຺ຍໍ. ຍສ຺ສ ປຸຄ຺ຄລສ຺ສ ອິທໍ ສາເຐຍ຺ຍໍ ປຫີນໍ – ອຍໍ ວຸຈ຺ຈຕິ ປຸຄ຺ຄໂລ ‘‘ອສໂຐ’’.

໗໒. ກຕໂມ ຈ ປຸຄ຺ຄໂລ ອມາຍາວີ? ຕຕ຺ຖ ກຕມາ ມາຍາ? ອິເຘກຈ຺ໂຈ ປຸຄ຺ຄໂລ ກາເຍນ ທຸຈ຺ຈຣິຕໍ ຈຣິຕ຺ວາ ວາຈາຍ ທຸຈ຺ຈຣິຕໍ ຈຣິຕ຺ວາ ມນສາ ທຸຈ຺ຈຣິຕໍ ຈຣິຕ຺ວາ ຕສ຺ສ ປຏິຈ຺ຉາທນເຫຕຸ ປາປິກໍ ອິຈ຺ຉໍ ປຓິທຫຕິ – ‘‘ມາ ມໍ ຊຎ຺ຎາ’’ຕິ ອິຈ຺ຉຕິ, ‘‘ມາ ມໍ ຊຎ຺ຎາ’’ຕິ ສງ຺ກປ຺ປຕິ, ‘‘ມາ ມໍ ຊຎ຺ຎາ’’ຕິ ວາຈໍ ຠາສຕິ, ‘‘ມາ ມໍ ຊຎ຺ຎາ’’ຕິ ກາເຍນ ປຣກ຺ກມຕິ. ຍາ ເອວຣູປາ ມາຍາ ມາຍາວິຕາ ອຈ຺ຈາສຣາ ວຎ຺ຈນາ ນິກຕິ ວິກິຣຓາ ປຣິຫຣຓາ ຄູຫນາ ປຣິຄູຫນາ ຉາທນາ ປຏິຈ຺ຉາທນາ ອນຸຕ຺ຕານີກມ຺ມໍ ອນາວິກມ຺ມໍ ໂວຈ຺ຉາທນາ ປາປກິຣິຍາ – ອຍໍ ວຸຈ຺ຈຕິ ມາຍາ. ຍສ຺ສ ປຸຄ຺ຄລສ຺ສ ອຍໍ ມາຍາ ປຫີນາ – ອຍໍ ວຸຈ຺ຈຕິ ປຸຄ຺ຄໂລ ‘‘ອມາຍາວີ’’.

໗໓. ກຕໂມ ຈ ປຸຄ຺ຄໂລ ຫິຣິມາ? ຕຕ຺ຖ ກຕມາ ຫິຣີ? ຍໍ ຫິຣີຍຕິ ຫິຣິຍິຕພ຺ເພນ ຫິຣີຍຕິ ປາປການໍ ອກຸສລານໍ ຘມ຺ມານໍ ສມາປຕ຺ຕິຍາ – ອຍໍ ວຸຈ຺ຈຕິ ຫິຣີ. ອິມາຍ ຫິຣິຍາ ສມນ຺ນາຄໂຕ ປຸຄ຺ຄໂລ ‘‘ຫິຣິມາ’’.

໗໔. ກຕໂມ ຈ ປຸຄ຺ຄໂລ ໂອຕ຺ຕປ຺ປີ? ຕຕ຺ຖ ກຕມໍ ໂອຕ຺ຕປ຺ປໍ? ຍໍ ໂອຕ຺ຕປ຺ປຕິ ໂອຕ຺ຕປ຺ປິຕພ຺ເພນ ໂອຕ຺ຕປ຺ປຕິ ປາປການໍ ອກຸສລານໍ ຘມ຺ມານໍ ສມາປຕ຺ຕິຍາ – ອິທໍ ວຸຈ຺ຈຕິ ໂອຕ຺ຕປ຺ປໍ. ອິມິນາ ໂອຕ຺ຕປ຺ເປນ ສມນ຺ນາຄໂຕ ປຸຄ຺ຄໂລ ‘‘ໂອຕ຺ຕປ຺ປີ’’.

໗໕. ກຕໂມ ຈ ປຸຄ຺ຄໂລ ສຸວໂຈ? ຕຕ຺ຖ ກຕມາ ໂສວຈສ຺ສຕາ? ສຫຘມ຺ມິເກ ວຸຈ຺ຈມາເນ ໂສວຈສ຺ສາຍໍ ໂສວຈສ຺ສິຍໍ ໂສວຈສ຺ສຕາ ອວິປ຺ປຏິກຸລຄ຺ຄາຫິຕາ ອວິປຈ຺ຈນີກສາຕຕາ ສາທຣິຍໍ ສາທຣິຍຕາ ສຄາຣວຕາ ສປ຺ປຕິສ຺ສວຕາ – ອຍໍ ວຸຈ຺ຈຕິ ໂສວຈສ຺ສຕາ. ອິມາຍ ໂສວຈສ຺ສຕາຍ ສມນ຺ນາຄໂຕ ປຸຄ຺ຄໂລ ‘‘ສຸວໂຈ’’.

໗໖. ກຕໂມ ຈ ປຸຄ຺ຄໂລ ກລ຺ຍາຓມິຕ຺ໂຕ? ຕຕ຺ຖ ກຕມາ ກລ຺ຍາຓມິຕ຺ຕຕາ? ເຍ ເຕ ປຸຄ຺ຄລາ ສທ຺ຘາ ສີລວນ຺ໂຕ ພຫຸສ຺ສຸຕາ ຈາຄວນ຺ໂຕ ປຎ຺ຎວນ຺ໂຕ, ຍາ ເຕສໍ ເສວນາ ນິເສວນາ ສໍເສວນາ ຠຊນາ ສມ຺ຠຊນາ ຠຕ຺ຕິ ສມ຺ຠຕ຺ຕິ ສມ຺ປວງ຺ກຕາ – ອຍໍ ວຸຈ຺ຈຕິ ກລ຺ຍາຓມິຕ຺ຕຕາ. ອິມາຍ ກລ຺ຍາຓມິຕ຺ຕຕາຍ ສມນ຺ນາຄໂຕ ປຸຄ຺ຄໂລ ‘‘ກລ຺ຍາຓມິຕ຺ໂຕ’’.

໗໗. ກຕໂມ ຈ ປຸຄ຺ຄໂລ ອິນ຺ທ຺ຣິເຍສຸ ຄຸຕ຺ຕທ຺ວາໂຣ? ຕຕ຺ຖ ກຕມາ ອິນ຺ທ຺ຣິເຍສຸ ຄຸຕ຺ຕທ຺ວາຣຕາ? ອິເຘກຈ຺ໂຈ ປຸຄ຺ຄໂລ ຈກ຺ຂຸນາ ຣູປໍ ທິສ຺ວາ ນ ນິມິຕ຺ຕຄ຺ຄາຫີ ໂຫຕິ ນານຸພ຺ຍຎ຺ຊນຄ຺ຄາຫີ; ຍຕ຺ວາຘິກຣຓເມນໍ ຈກ຺ຂຸນ຺ທ຺ຣິຍໍ ອສໍວຸຕໍ ວິຫຣນ຺ຕໍ ອຠິຊ຺ຌາໂທມນສ຺ສາ ປາປກາ ອກຸສລາ ຘມ຺ມາ ອນ຺ວາສ຺ສເວຍ຺ຍຸໍ, ຕສ຺ສ ສໍວຣາຍ ປຏິປຊ຺ຊຕິ, ຣກ຺ຂຕິ ຈກ຺ຂຸນ຺ທ຺ຣິຍໍ ຈກ຺ຂຸນ຺ທ຺ຣິເຍ ສໍວຣໍ ອາປຊ຺ຊຕິ. ໂສເຕນ ສທ຺ທໍ ສຸຕ຺ວາ…ເປ… ຆາເນນ ຄນ຺ຘໍ ຆາຍິຕ຺ວາ…ເປ… ຊິວ຺ຫາຍ ຣສໍ ສາຍິຕ຺ວາ…ເປ… ກາເຍນ ໂຜຏ຺ຐພ຺ພໍ ຜຸສິຕ຺ວາ…ເປ… ມນສາ ຘມ຺ມໍ ວິຎ຺ຎາຍ ນ ນິມິຕ຺ຕຄ຺ຄາຫີ ໂຫຕິ ນານຸພ຺ຍຎ຺ຊນຄ຺ຄາຫີ; ຍຕ຺ວາຘິກຣຓເມນໍ ມນິນ຺ທ຺ຣິຍໍ ອສໍວຸຕໍ ວິຫຣນ຺ຕໍ ອຠິຊ຺ຌາໂທມນສ຺ສາ ປາປກາ ອກຸສລາ ຘມ຺ມາ ອນ຺ວາສ຺ສເວຍ຺ຍຸໍ, ຕສ຺ສ ສໍວຣາຍ ປຏິປຊ຺ຊຕິ, ຣກ຺ຂຕິ ມນິນ຺ທ຺ຣິຍໍ, ມນິນ຺ທ຺ຣິເຍ ສໍວຣໍ ອາປຊ຺ຊຕິ. ຍາ ອິເມສໍ ຉນ຺ນໍ ອິນ຺ທ຺ຣິຍານໍ ຄຸຕ຺ຕິ ໂຄປນາ ອາຣກ຺ໂຂ ສໍວໂຣ – ອຍໍ ວຸຈ຺ຈຕິ ອິນ຺ທ຺ຣິເຍສຸ ຄຸຕ຺ຕທ຺ວາຣຕາ. ອິມາຍ ອິນ຺ທ຺ຣິເຍສຸ ຄຸຕ຺ຕທ຺ວາຣຕາຍ ສມນ຺ນາຄໂຕ ປຸຄ຺ຄໂລ ‘‘ອິນ຺ທ຺ຣິເຍສຸ ຄຸຕ຺ຕທ຺ວາໂຣ’’.

໗໘. ກຕໂມ ຈ ປຸຄ຺ຄໂລ ໂຠຊເນ ມຕ຺ຕຎ຺ຎູ? ຕຕ຺ຖ ກຕມາ ໂຠຊເນ ມຕ຺ຕຎ຺ຎຸຕາ? ອິເຘກຈ຺ໂຈ ປຸຄ຺ຄໂລ ປຏິສງ຺ຂາ ໂຍນິໂສ ອາຫາຣໍ ອາຫາເຣຕິ – ‘‘ເນວ ທວາຍ, ນ ມທາຍ, ນ ມຓ຺ຑນາຍ, ນ ວິຠູສນາຍ; ຍາວເທວ ອິມສ຺ສ ກາຍສ຺ສ ຐິຕິຍາ ຍາປນາຍ ວິຫິໍສູປຣຕິຍາ ພ຺ຣຫ຺ມຈຣິຍານຸຄ຺ຄຫາຍ. ອິຕິ ປຸຣາຓຎ຺ຈ ເວທນໍ ປຏິຫງ຺ຂາມິ, ນວຎ຺ຈ ເວທນໍ ນ ອຸປ຺ປາເທສ຺ສາມິ, ຍາຕ຺ຣາ ຈ ເມ ຠວິສ຺ສຕິ ອນວຊ຺ຊຕາ ຈ ຜາສຸວິຫາໂຣ ຈາ’’ຕິ. ຍາ ຕຕ຺ຖ ສນ຺ຕຸຏ຺ຐິຕາ ມຕ຺ຕຎ຺ຎຸຕາ ປຏິສງ຺ຂາ ໂຠຊເນ – ອຍໍ ວຸຈ຺ຈຕິ ໂຠຊເນ ມຕ຺ຕຎ຺ຎຸຕາ. ອິມາຍ ໂຠຊເນ ມຕ຺ຕຎ຺ຎຸຕາຍ ສມນ຺ນາຄໂຕ ປຸຄ຺ຄໂລ ‘‘ໂຠຊເນ ມຕ຺ຕຎ຺ຎູ’’.

໗໙. ກຕໂມ ຈ ປຸຄ຺ຄໂລ ອຸປຏ຺ຐິຕສ຺ສຕິ? ຕຕ຺ຖ ກຕມາ ສຕິ? ຍາ ສຕິ ອນຸສ຺ສຕິ ປຏິສ຺ສຕິ ສຕິ ສຣຓຕາ ຘາຣຓຕາ ອປິລາປນຕາ ອສມ຺ມຸສນຕາ ສຕິ ສຕິນ຺ທ຺ຣິຍໍ ສຕິພລໍ ສມ຺ມາສຕິ – ອຍໍ ວຸຈ຺ຈຕິ ສຕິ. ອິມາຍ ສຕິຍາ ສມນ຺ນາຄໂຕ ປຸຄ຺ຄໂລ ‘‘ອຸປຏ຺ຐິຕສ຺ສຕິ’’.

໘໐. ກຕໂມ ຈ ປຸຄ຺ຄໂລ ສມ຺ປຊາໂນ? ຕຕ຺ຖ ກຕມໍ ສມ຺ປຊຎ຺ຎໍ? ຍາ ປຎ຺ຎາ ປຊານນາ ວິຈໂຍ ປວິຈໂຍ ຘມ຺ມວິຈໂຍ ສລ຺ລກ຺ຂຓາ ອຸປລກ຺ຂຓາ ປຈ຺ຈຸປລກ຺ຂຓາ ປຓ຺ຑິຈ຺ຈໍ ໂກສລ຺ລໍ ເນປຸຎ຺ຎໍ ເວຠພ຺ຍາ ຈິນ຺ຕາ ອຸປປຣິກ຺ຂາ ຠູຣີ ເມຘາ ປຣິຓາຍິກາ ວິປສ຺ສນາ ສມ຺ປຊຎ຺ຎໍ ປໂຕໂທ ປຎ຺ຎາ ປຎ຺ຎິນ຺ທ຺ຣິຍໍ ປຎ຺ຎາພລໍ ປຎ຺ຎາສຕ຺ຖໍ ປຎ຺ຎາປາສາໂທ ປຎ຺ຎາອາໂລໂກ ປຎ຺ຎາໂອຠາໂສ ປຎ຺ຎາປຊ຺ໂຊໂຕ ປຎ຺ຎາຣຕນໍ ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອິທໍ ວຸຈ຺ຈຕິ ສມ຺ປຊຎ຺ຎໍ. ອິມິນາ ສມ຺ປຊຎ຺ເຎນ ສມນ຺ນາຄໂຕ ປຸຄ຺ຄໂລ ‘‘ສມ຺ປຊາໂນ’’.

໘໑. ກຕໂມ ຈ ປຸຄ຺ຄໂລ ສີລສມ຺ປນ຺ໂນ? ຕຕ຺ຖ ກຕມາ ສີລສມ຺ປທາ? ກາຍິໂກ ອວີຕິກ຺ກໂມ ວາຈສິໂກ ອວີຕິກ຺ກໂມ ກາຍິກວາຈສິໂກ ອວີຕິກ຺ກໂມ – ອຍໍ ວຸຈ຺ຈຕິ ສີລສມ຺ປທາ. ສພ຺ໂພປິ ສີລສໍວໂຣ ສີລສມ຺ປທາ. ອິມາຍ ສີລສມ຺ປທາຍ ສມນ຺ນາຄໂຕ ປຸຄ຺ຄໂລ ‘‘ສີລສມ຺ປນ຺ໂນ’’.

໘໒. ກຕໂມ ຈ ປຸຄ຺ຄໂລ ທິຏ຺ຐິສມ຺ປນ຺ໂນ? ຕຕ຺ຖ ກຕມາ ທິຏ຺ຐິສມ຺ປທາ? ‘‘ອຕ຺ຖິ ທິນ຺ນໍ, ອຕ຺ຖິ ຍິຏ຺ຐໍ, ອຕ຺ຖິ ຫຸຕໍ, ອຕ຺ຖິ ສຸກຕທຸກ຺ກຏານໍ ກມ຺ມານໍ ຜລໍ ວິປາໂກ, ອຕ຺ຖິ ອຍໍ ໂລໂກ, ອຕ຺ຖິ ປໂຣ ໂລໂກ, ອຕ຺ຖິ ມາຕາ, ອຕ຺ຖິ ປິຕາ, ອຕ຺ຖິ ສຕ຺ຕາ ໂອປປາຕິກາ, ອຕ຺ຖິ ໂລເກ ສມຓພ຺ຣາຫ຺ມຓາ ສມ຺ມຄ຺ຄຕາ ສມ຺ມາປຏິປນ຺ນາ ເຍ ອິມຎ຺ຈ ໂລກໍ ປຣຎ຺ຈ ໂລກໍ ສຍໍ ອຠິຎ຺ຎາ ສຈ຺ຉິກຕ຺ວາ ປເວເທນ຺ຕີ’’ຕິ. ຍາ ເອວຣູປາ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອຍໍ ວຸຈ຺ຈຕິ ທິຏ຺ຐິສມ຺ປທາ. ສພ຺ພາປິ ສມ຺ມາທິຏ຺ຐິ ທິຏ຺ຐິສມ຺ປທາ. ອິມາຍ ທິຏ຺ຐິສມ຺ປທາຍ ສມນ຺ນາຄໂຕ ປຸຄ຺ຄໂລ ‘‘ທິຏ຺ຐິສມ຺ປນ຺ໂນ’’.

໘໓. ກຕເມ ທ຺ເວ ປຸຄ຺ຄລາ ທຸລ຺ລຠາ ໂລກສ຺ມິໍ? ໂຍ ຈ ປຸພ຺ພກາຣີ, ໂຍ ຈ ກຕຎ຺ຎູ ກຕເວທີ – ອິເມ ທ຺ເວ ປຸຄ຺ຄລາ ທຸລ຺ລຠາ ໂລກສ຺ມິໍ.

໘໔. ກຕເມ ທ຺ເວ ປຸຄ຺ຄລາ ທຸຕ຺ຕປ຺ປຍາ? ໂຍ ຈ ລທ຺ຘໍ ລທ຺ຘໍ ນິກ຺ຂິປຕິ, ໂຍ ຈ ລທ຺ຘໍ ລທ຺ຘໍ ວິສ຺ສຊ຺ເຊຕິ – ອິເມ ທ຺ເວ ປຸຄ຺ຄລາ ‘‘ທຸຕ຺ຕປ຺ປຍາ’’.

໘໕. ກຕເມ ທ຺ເວ ປຸຄ຺ຄລາ ສຸຕປ຺ປຍາ? ໂຍ ຈ ລທ຺ຘໍ ລທ຺ຘໍ ນ ນິກ຺ຂິປຕິ, ໂຍ ຈ ລທ຺ຘໍ ລທ຺ຘໍ ນ ວິສ຺ສຊ຺ເຊຕິ – ອິເມ ທ຺ເວ ປຸຄ຺ຄລາ ‘‘ສຸຕປ຺ປຍາ’’.

໘໖. ກຕເມສໍ ທ຺ວິນ຺ນໍ ປຸຄ຺ຄລານໍ ອາສວາ ວຑ຺ຒນ຺ຕິ? ໂຍ ຈ ນ ກຸກ຺ກຸຈ຺ຈາຍິຕພ຺ພໍ ກຸກ຺ກຸຈ຺ຈາຍຕິ, ໂຍ ຈ ກຸກ຺ກຸຈ຺ຈາຍິຕພ຺ພໍ ນ ກຸກ຺ກຸຈ຺ຈາຍຕິ – ອິເມສໍ ທ຺ວິນ຺ນໍ ປຸຄ຺ຄລານໍ ອາສວາ ວຑ຺ຒນ຺ຕິ.

໘໗. ກຕເມສໍ ທ຺ວິນ຺ນໍ ປຸຄ຺ຄລານໍ ອາສວາ ນ ວຑ຺ຒນ຺ຕິ? ໂຍ ຈ ນ ກຸກ຺ກຸຈ຺ຈາຍິຕພ຺ພໍ ນ ກຸກ຺ກຸຈ຺ຈາຍຕິ, ໂຍ ຈ ກຸກ຺ກຸຈ຺ຈາຍິຕພ຺ພໍ ກຸກ຺ກຸຈ຺ຈາຍຕິ – ອິເມສໍ ທ຺ວິນ຺ນໍ ປຸຄ຺ຄລານໍ ອາສວາ ນ ວຑ຺ຒນ຺ຕິ.

໘໘. ກຕໂມ ຈ ປຸຄ຺ຄໂລ ຫີນາຘິມຸຕ຺ໂຕ? ອິເຘກຈ຺ໂຈ ປຸຄ຺ຄໂລ ທຸສ຺ສີໂລ ໂຫຕິ ປາປຘມ຺ໂມ, ໂສ ອຎ຺ຎໍ ທຸສ຺ສີລໍ ປາປຘມ຺ມໍ ເສວຕິ ຠຊຕິ ປຍິຣຸປາສຕິ – ອຍໍ ວຸຈ຺ຈຕິ ປຸຄ຺ຄໂລ ‘‘ຫີນາຘິມຸຕ຺ໂຕ’’.

໘໙. ກຕໂມ ຈ ປຸຄ຺ຄໂລ ປຓີຕາຘິມຸຕ຺ໂຕ? ອິເຘກຈ຺ໂຈ ປຸຄ຺ຄໂລ ສີລວາ ໂຫຕິ ກລ຺ຍາຓຘມ຺ໂມ, ໂສ ອຎ຺ຎໍ ສີລວນ຺ຕໍ ກລ຺ຍາຓຘມ຺ມໍ ເສວຕິ ຠຊຕິ ປຍິຣຸປາສຕິ – ອຍໍ ວຸຈ຺ຈຕິ ປຸຄ຺ຄໂລ ‘‘ປຓີຕາຘິມຸຕ຺ໂຕ’’.

໙໐. ກຕໂມ ຈ ປຸຄ຺ຄໂລ ຕິຕ຺ໂຕ? ປຈ຺ເຈກສມ຺ພຸທ຺ຘາ [ປຈ຺ເຈກພຸທ຺ໂຘ (ສີ.)] ເຍ ຈ ຕຖາຄຕສ຺ສ ສາວກາ ອຣຫນ຺ໂຕ ຕິຕ຺ຕາ. ສມ຺ມາສມ຺ພຸທ຺ໂຘ ຕິຕ຺ໂຕ ຈ ຕປ຺ເປຕາ ຈ [ຕປ຺ເປຕາ ຈ, ອຍໍ ວຸຈ຺ຈຕິ ປຸຄ຺ຄໂລ ຕິຕ຺ໂຕ (ສີ.)].

ທຸກນິທ຺ເທໂສ.