໑. ເອກກປຸຄ຺ຄລປຎ຺ຎຕ຺ຕິ

໑. ກຕໂມ ຈ ປຸຄ຺ຄໂລ ສມຍວິມຸຕ຺ໂຕ? ອິເຘກຈ຺ໂຈ ປຸຄ຺ຄໂລ ກາເລນ ກາລໍ ສມເຍນ ສມຍໍ ອຏ຺ຐ ວິໂມກ຺ເຂ ກາເຍນ ຜຸສິຕ຺ວາ [ຜສ຺ສິຕ຺ວາ (ສີ. ປີ.)] ວິຫຣຕິ, ປຎ຺ຎາຍ ຈສ຺ສ ທິສ຺ວາ ເອກຈ຺ເຈ ອາສວາ ປຣິກ຺ຂີຓາ ໂຫນ຺ຕິ – ອຍໍ ວຸຈ຺ຈຕິ ປຸຄ຺ຄໂລ ‘‘ສມຍວິມຸຕ຺ໂຕ’’.

໒. ກຕໂມ ຈ ປຸຄ຺ຄໂລ ອສມຍວິມຸຕ຺ໂຕ? ອິເຘກຈ຺ໂຈ ປຸຄ຺ຄໂລ ນ ເຫວ ໂຂ ກາເລນ ກາລໍ ສມເຍນ ສມຍໍ ອຏ຺ຐ ວິໂມກ຺ເຂ ກາເຍນ ຜຸສິຕ຺ວາ ວິຫຣຕິ, ປຎ຺ຎາຍ ຈສ຺ສ ທິສ຺ວາ ອາສວາ ປຣິກ຺ຂີຓາ ໂຫນ຺ຕິ – ອຍໍ ວຸຈ຺ຈຕິ ປຸຄ຺ຄໂລ ‘‘ອສມຍວິມຸຕ຺ໂຕ’’. ສພ຺ເພປິ ອຣິຍປຸຄ຺ຄລາ ອຣິເຍ ວິໂມກ຺ເຂ ອສມຍວິມຸຕ຺ຕາ.

໓. ກຕໂມ ຈ ປຸຄ຺ຄໂລ ກຸປ຺ປຘມ຺ໂມ? ອິເຘກຈ຺ໂຈ ປຸຄ຺ຄໂລ ລາຠີ ໂຫຕິ ຣູປສຫຄຕານໍ ວາ ອຣູປສຫຄຕານໍ ວາ ສມາປຕ຺ຕີນໍ. ໂສ ຈ ໂຂ ນ ນິກາມລາຠີ ໂຫຕິ ນ ອກິຈ຺ຉລາຠີ ນ ອກສິຣລາຠີ; ນ ຍຕ຺ຖິຈ຺ຉກໍ ຍທິຈ຺ຉກໍ ຍາວຕິຈ຺ຉກໍ ສມາປຊ຺ຊຕິປິ ວຸຏ຺ຐາຕິປິ. ຐານໍ ໂຂ ປເນຕໍ ວິຊ຺ຊຕິ, ຍໍ ຕສ຺ສ ປຸຄ຺ຄລສ຺ສ ປມາທມາຄມ຺ມ ຕາ ສມາປຕ຺ຕິໂຍ ກຸປ຺ເປຍ຺ຍຸໍ – ອຍໍ ວຸຈ຺ຈຕິ ປຸຄ຺ຄໂລ ‘‘ກຸປ຺ປຘມ຺ໂມ’’.

໔. ກຕໂມ ຈ ປຸຄ຺ຄໂລ ອກຸປ຺ປຘມ຺ໂມ? ອິເຘກຈ຺ໂຈ ປຸຄ຺ຄໂລ ລາຠີ ໂຫຕິ ຣູປສຫຄຕານໍ ວາ ອຣູປສຫຄຕານໍ ວາ ສມາປຕ຺ຕີນໍ. ໂສ ຈ ໂຂ ນິກາມລາຠີ ໂຫຕິ ອກິຈ຺ຉລາຠີ ອກສິຣລາຠີ; ຍຕ຺ຖິຈ຺ຉກໍ ຍທິຈ຺ຉກໍ ຍາວຕິຈ຺ຉກໍ ສມາປຊ຺ຊຕິປິ ວຸຏ຺ຐາຕິປິ. ອຏ຺ຐານເມຕໍ ອນວກາໂສ ຍໍ ຕສ຺ສ ປຸຄ຺ຄລສ຺ສ ປມາທມາຄມ຺ມ ຕາ ສມາປຕ຺ຕິໂຍ ກຸປ຺ເປຍ຺ຍຸໍ – ອຍໍ ວຸຈ຺ຈຕິ ປຸຄ຺ຄໂລ ‘‘ອກຸປ຺ປຘມ຺ໂມ’’. ສພ຺ເພປິ ອຣິຍປຸຄ຺ຄລາ ອຣິເຍ ວິໂມກ຺ເຂ ອກຸປ຺ປຘມ຺ມາ.

໕. ກຕໂມ ຈ ປຸຄ຺ຄໂລ ປຣິຫານຘມ຺ໂມ? ອິເຘກຈ຺ໂຈ ປຸຄ຺ຄໂລ ລາຠີ ໂຫຕິ ຣູປສຫຄຕານໍ ວາ ອຣູປສຫຄຕານໍ ວາ ສມາປຕ຺ຕີນໍ. ໂສ ຈ ໂຂ ນ ນິກາມລາຠີ ໂຫຕິ ນ ອກິຈ຺ຉລາຠີ ນ ອກສິຣລາຠີ; ນ ຍຕ຺ຖິຈ຺ຉກໍ ຍທິຈ຺ຉກໍ ຍາວຕິຈ຺ຉກໍ ສມາປຊ຺ຊຕິປິ ວຸຏ຺ຐາຕິປິ. ຐານໍ ໂຂ ປເນຕໍ ວິຊ຺ຊຕິ, ຍໍ ໂສ ປຸຄ຺ຄໂລ ປມາທມາຄມ຺ມ ຕາຫິ ສມາປຕ຺ຕີຫິ ປຣິຫາເຍຍ຺ຍ – ອຍໍ ວຸຈ຺ຈຕິ ປຸຄ຺ຄໂລ ‘‘ປຣິຫານຘມ຺ໂມ’’.

໖. ກຕໂມ ຈ ປຸຄ຺ຄໂລ ອປຣິຫານຘມ຺ໂມ? ອິເຘກຈ຺ໂຈ ປຸຄ຺ຄໂລ ລາຠີ ໂຫຕິ ຣູປສຫຄຕານໍ ວາ ອຣູປສຫຄຕານໍ ວາ ສມາປຕ຺ຕີນໍ. ໂສ ຈ ໂຂ ນິກາມລາຠີ ໂຫຕິ ອກິຈ຺ຉລາຠີ ອກສິຣລາຠີ; ຍຕ຺ຖິຈ຺ຉກໍ ຍທິຈ຺ຉກໍ ຍາວຕິຈ຺ຉກໍ ສມາປຊ຺ຊຕິປິ ວຸຏ຺ຐາຕິປິ. ອຏ຺ຐານເມຕໍ ອນວກາໂສ ຍໍ ໂສ ປຸຄ຺ຄໂລ ປມາທມາຄມ຺ມ ຕາຫິ ສມາປຕ຺ຕີຫິ ປຣິຫາເຍຍ຺ຍ – ອຍໍ ວຸຈ຺ຈຕິ ປຸຄ຺ຄໂລ ‘‘ອປຣິຫານຘມ຺ໂມ’’. ສພ຺ເພປິ ອຣິຍປຸຄ຺ຄລາ ອຣິເຍ ວິໂມກ຺ເຂ ອປຣິຫານຘມ຺ມາ.

໗. ກຕໂມ ຈ ປຸຄ຺ຄໂລ ເຈຕນາຠພ຺ໂພ? ອິເຘກຈ຺ໂຈ ປຸຄ຺ຄໂລ ລາຠີ ໂຫຕິ ຣູປສຫຄຕານໍ ວາ ອຣູປສຫຄຕານໍ ວາ ສມາປຕ຺ຕີນໍ. ໂສ ຈ ໂຂ ນ ນິກາມລາຠີ ໂຫຕິ ນ ອກິຈ຺ຉລາຠີ ນ ອກສິຣລາຠີ; ນ ຍຕ຺ຖິຈ຺ຉກໍ ຍທິຈ຺ຉກໍ ຍາວຕິຈ຺ຉກໍ ສມາປຊ຺ຊຕິປິ ວຸຏ຺ຐາຕິປິ. ສເຈ ອນຸສຎ຺ເຈເຕຕິ, ນ ປຣິຫາຍຕິ ຕາຫິ ສມາປຕ຺ຕີຫິ. ສເຈ ນ ອນຸສຎ຺ເຈເຕຕິ, ປຣິຫາຍຕິ ຕາຫິ ສມາປຕ຺ຕີຫິ – ອຍໍ ວຸຈ຺ຈຕິ ປຸຄ຺ຄໂລ ‘‘ເຈຕນາຠພ຺ໂພ’’.

໘. ກຕໂມ ຈ ປຸຄ຺ຄໂລ ອນຸຣກ຺ຂຓາຠພ຺ໂພ? ອິເຘກຈ຺ໂຈ ປຸຄ຺ຄໂລ ລາຠີ ໂຫຕິ ຣູປສຫຄຕານໍ ວາ ອຣູປສຫຄຕານໍ ວາ ສມາປຕ຺ຕີນໍ. ໂສ ຈ ໂຂ ນ ນິກາມລາຠີ ໂຫຕິ ນ ອກິຈ຺ຉລາຠີ ນ ອກສິຣລາຠີ; ນ ຍຕ຺ຖິຈ຺ຉກໍ ຍທິຈ຺ຉກໍ ຍາວຕິຈ຺ຉກໍ ສມາປຊ຺ຊຕິປິ ວຸຏ຺ຐາຕິປິ. ສເຈ ອນຸຣກ຺ຂຕິ, ນ ປຣິຫາຍຕິ ຕາຫິ ສມາປຕ຺ຕີຫິ. ສເຈ ນ ອນຸຣກ຺ຂຕິ, ປຣິຫາຍຕິ ຕາຫິ ສມາປຕ຺ຕີຫິ – ອຍໍ ວຸຈ຺ຈຕິ ປຸຄ຺ຄໂລ ‘‘ອນຸຣກ຺ຂຓາຠພ຺ໂພ’’.

໙. ກຕໂມ ຈ ປຸຄ຺ຄໂລ ປຸຖຸຊ຺ຊໂນ? ຍສ຺ສ ປຸຄ຺ຄລສ຺ສ ຕີຓິ ສໍໂຍຊນານິ ອປ຺ປຫີນານິ; ນ ຈ ເຕສໍ ຘມ຺ມານໍ ປຫານາຍ ປຏິປນ຺ໂນ – ອຍໍ ວຸຈ຺ຈຕິ ປຸຄ຺ຄໂລ ‘‘ປຸຖຸຊ຺ຊໂນ’’.

໑໐. ກຕໂມ ຈ ປຸຄ຺ຄໂລ ໂຄຕ຺ຣຠູ? ເຍສໍ ຘມ຺ມານໍ ສມນນ຺ຕຣາ ອຣິຍຘມ຺ມສ຺ສ ອວກ຺ກນ຺ຕິ ໂຫຕິ ເຕຫິ ຘມ຺ເມຫິ ສມນ຺ນາຄໂຕ – ອຍໍ ວຸຈ຺ຈຕິ ປຸຄ຺ຄໂລ ‘‘ໂຄຕ຺ຣຠູ’’.

໑໑. ກຕໂມ ຈ ປຸຄ຺ຄໂລ ຠຍູປຣໂຕ? ສຕ຺ຕ ເສກ຺ຂາ ຠຍູປຣຕາ, ເຍ ຈ ປຸຖຸຊ຺ຊນາ ສີລວນ຺ໂຕ. ອຣຫາ ອຠຍູປຣໂຕ.

໑໒. ກຕໂມ ຈ ປຸຄ຺ຄໂລ ອຠພ຺ພາຄມໂນ? ເຍ ເຕ ປຸຄ຺ຄລາ ກມ຺ມາວຣເຓນ ສມນ຺ນາຄຕາ, ກິເລສາວຣເຓນ ສມນ຺ນາຄຕາ, ວິປາກາວຣເຓນ ສມນ຺ນາຄຕາ, ອສ຺ສທ຺ຘາ ອຈ຺ຉນ຺ທິກາ ທຸປ຺ປຎ຺ຎາ ເອຬາ, ອຠພ຺ພາ ນິຍາມໍ ໂອກ຺ກມິຕຸໍ ກຸສເລສຸ ຘມ຺ເມສຸ ສມ຺ມຕ຺ຕໍ – ອິເມ ວຸຈ຺ຈນ຺ຕິ ປຸຄ຺ຄລາ ‘‘ອຠພ຺ພາຄມນາ’’.

໑໓. ກຕໂມ ຈ ປຸຄ຺ຄໂລ ຠພ຺ພາຄມໂນ? ເຍ ເຕ ປຸຄ຺ຄລາ ນ ກມ຺ມາວຣເຓນ ສມນ຺ນາຄຕາ, ນ ກິເລສາວຣເຓນ ສມນ຺ນາຄຕາ, ນ ວິປາກາວຣເຓນ ສມນ຺ນາຄຕາ, ສທ຺ຘາ ຉນ຺ທິກາ ປຎ຺ຎວນ຺ໂຕ [ປຎ຺ຎວນ຺ຕາ (ສີ.)] ອເນຬາ, ຠພ຺ພາ ນິຍາມໍ ໂອກ຺ກມິຕຸໍ ກຸສເລສຸ ຘມ຺ເມສຸ ສມ຺ມຕ຺ຕໍ – ອິເມ ວຸຈ຺ຈນ຺ຕິ ປຸຄ຺ຄລາ ‘‘ຠພ຺ພາຄມນາ’’.

໑໔. ກຕໂມ ຈ ປຸຄ຺ຄໂລ ນິຍໂຕ? ປຎ຺ຈ ປຸຄ຺ຄລາ ອານນ຺ຕຣິກາ, ເຍ ຈ ມິຈ຺ຉາທິຏ຺ຐິກາ ນິຍຕາ, ອຏ຺ຐ ຈ ອຣິຍປຸຄ຺ຄລາ ນິຍຕາ. ອວເສສາ ປຸຄ຺ຄລາ ອນິຍຕາ.

໑໕. ກຕໂມ ຈ ປຸຄ຺ຄໂລ ປຏິປນ຺ນໂກ? ຈຕ຺ຕາໂຣ ມຄ຺ຄສມງ຺ຄິໂນ ປຸຄ຺ຄລາ ປຏິປນ຺ນກາ, ຈຕ຺ຕາໂຣ ຜລສມງ຺ຄິໂນ ປຸຄ຺ຄລາ ຜເລ ຐິຕາ.

໑໖. ກຕໂມ ຈ ປຸຄ຺ຄໂລ ສມສີສີ? ຍສ຺ສ ປຸຄ຺ຄລສ຺ສ ອປຸພ຺ພໍ ອຈຣິມໍ ອາສວປຣິຍາທານຎ຺ຈ ໂຫຕິ ຊີວິຕປຣິຍາທານຎ຺ຈ – ອຍໍ ວຸຈ຺ຈຕິ ປຸຄ຺ຄໂລ ‘‘ສມສີສີ’’.

໑໗. ກຕໂມ ຈ ປຸຄ຺ຄໂລ ຐິຕກປ຺ປີ? ອຍຎ຺ຈ ປຸຄ຺ຄໂລ ໂສຕາປຕ຺ຕິຜລສຈ຺ຉິກິຣິຍາຍ ປຏິປນ຺ໂນ ອສ຺ສ, ກປ຺ປສ຺ສ ຈ ອຸຑ຺ຑຍ຺ຫນເວລາ ອສ຺ສ, ເນວ ຕາວ ກປ຺ໂປ ອຸຑ຺ຑຍ຺ເຫຍ຺ຍ ຍາວາຍໍ ປຸຄ຺ຄໂລ ນ ໂສຕາປຕ຺ຕິຜລໍ ສຈ຺ຉິກໂຣຕິ. ອຍໍ ວຸຈ຺ຈຕິ ປຸຄ຺ຄໂລ ‘‘ຐິຕກປ຺ປີ’’. ສພ຺ເພປິ ມຄ຺ຄສມງ຺ຄິໂນ ປຸຄ຺ຄລາ ຐິຕກປ຺ປິໂນ.

໑໘. ກຕໂມ ຈ ປຸຄ຺ຄໂລ ອຣິໂຍ? ອຏ຺ຐ ອຣິຍປຸຄ຺ຄລາ ອຣິຍາ. ອວເສສາ ປຸຄ຺ຄລາ ອນຣິຍາ.

໑໙. ກຕໂມ ຈ ປຸຄ຺ຄໂລ ເສກ຺ໂຂ? ຈຕ຺ຕາໂຣ ມຄ຺ຄສມງ຺ຄິໂນ ຕໂຍ ຜລສມງ຺ຄິໂນ ປຸຄ຺ຄລາ ‘‘ເສກ຺ຂາ’’. ອຣຫາ ອເສກ຺ໂຂ. ອວເສສາ ປຸຄ຺ຄລາ ເນວເສກ຺ຂນາເສກ຺ຂາ.

໒໐. ກຕໂມ ຈ ປຸຄ຺ຄໂລ ເຕວິຊ຺ໂຊ? ຕີຫິ ວິຊ຺ຊາຫິ ສມນ຺ນາຄໂຕ ປຸຄ຺ຄໂລ ‘‘ເຕວິຊ຺ໂຊ’’.

໒໑. ກຕໂມ ຈ ປຸຄ຺ຄໂລ ຉຬຠິຎ຺ໂຎ? ຉຫິ ອຠິຎ຺ຎາຫິ ສມນ຺ນາຄໂຕ ປຸຄ຺ຄໂລ ‘‘ຉຬຠິຎ຺ໂຎ’’.

໒໒. ກຕໂມ ຈ ປຸຄ຺ຄໂລ ສມ຺ມາສມ຺ພຸທ຺ໂຘ? ອິເຘກຈ຺ໂຈ ປຸຄ຺ຄໂລ ປຸພ຺ເພ ອນນຸສ຺ສຸເຕສຸ ຘມ຺ເມສຸ ສາມໍ ສຈ຺ຈານິ ອຠິສມ຺ພຸຊ຺ຌຕິ; ຕຕ຺ຖ ຈ ສພ຺ພຎ຺ຎຸຕໍ ປາປຸຓາຕິ, ພເລສຸ ຈ ວສີຠາວໍ – ອຍໍ ວຸຈ຺ຈຕິ ປຸຄ຺ຄໂລ ‘‘ສມ຺ມາສມ຺ພຸທ຺ໂຘ’’.

໒໓. ກຕໂມ ຈ ປຸຄ຺ຄໂລ ປຈ຺ເຈກສມ຺ພຸທ຺ໂຘ? ອິເຘກຈ຺ໂຈ ປຸຄ຺ຄໂລ ປຸພ຺ເພ ອນນຸສ຺ສຸເຕສຸ ຘມ຺ເມສຸ ສາມໍ ສຈ຺ຈານິ ອຠິສມ຺ພຸຊ຺ຌຕິ; ນ ຈ ຕຕ຺ຖ ສພ຺ພຎ຺ຎຸຕໍ ປາປຸຓາຕິ, ນ ຈ ພເລສຸ ວສີຠາວໍ – ອຍໍ ວຸຈ຺ຈຕິ ປຸຄ຺ຄໂລ ‘‘ປຈ຺ເຈກສມ຺ພຸທ຺ໂຘ’’.

໒໔. ກຕໂມ ຈ ປຸຄ຺ຄໂລ ອຸຠໂຕຠາຄວິມຸຕ຺ໂຕ? ອິເຘກຈ຺ໂຈ ປຸຄ຺ຄໂລ ອຏ຺ຐ ວິໂມກ຺ເຂ ກາເຍນ ຜຸສິຕ຺ວາ ວິຫຣຕິ; ປຎ຺ຎາຍ ຈສ຺ສ ທິສ຺ວາ ອາສວາ ປຣິກ຺ຂີຓາ ໂຫນ຺ຕິ – ອຍໍ ວຸຈ຺ຈຕິ ປຸຄ຺ຄໂລ ‘‘ອຸຠໂຕຠາຄວິມຸຕ຺ໂຕ’’.

໒໕. ກຕໂມ ຈ ປຸຄ຺ຄໂລ ປຎ຺ຎາວິມຸຕ຺ໂຕ? ອິເຘກຈ຺ໂຈ ປຸຄ຺ຄໂລ ນ ເຫວ ໂຂ ອຏ຺ຐ ວິໂມກ຺ເຂ ກາເຍນ ຜຸສິຕ຺ວາ ວິຫຣຕິ; ປຎ຺ຎາຍ ຈສ຺ສ ທິສ຺ວາ ອາສວາ ປຣິກ຺ຂີຓາ ໂຫນ຺ຕິ. ອຍໍ ວຸຈ຺ຈຕິ ປຸຄ຺ຄໂລ ‘‘ປຎ຺ຎາວິມຸຕ຺ໂຕ’’.

໒໖. ກຕໂມ ຈ ປຸຄ຺ຄໂລ ກາຍສກ຺ຂີ? ອິເຘກຈ຺ໂຈ ປຸຄ຺ຄໂລ ອຏ຺ຐ ວິໂມກ຺ເຂ ກາເຍນ ຜຸສິຕ຺ວາ ວິຫຣຕິ; ປຎ຺ຎາຍ ຈສ຺ສ ທິສ຺ວາ ເອກຈ຺ເຈ ອາສວາ ປຣິກ຺ຂີຓາ ໂຫນ຺ຕິ. ອຍໍ ວຸຈ຺ຈຕິ ປຸຄ຺ຄໂລ ‘‘ກາຍສກ຺ຂີ’’.

໒໗. ກຕໂມ ຈ ປຸຄ຺ຄໂລ ທິຏ຺ຐິປ຺ປຕ຺ໂຕ? ອິເຘກຈ຺ໂຈ ປຸຄ຺ຄໂລ ‘‘ອິທໍ ທຸກ຺ຂ’’ນ຺ຕິ ຍຖາຠູຕໍ ປຊານາຕິ, ‘‘ອຍໍ ທຸກ຺ຂສມຸທໂຍ’’ຕິ ຍຖາຠູຕໍ ປຊານາຕິ, ‘‘ອຍໍ ທຸກ຺ຂນິໂຣໂຘ’’ຕິ ຍຖາຠູຕໍ ປຊານາຕິ, ‘‘ອຍໍ ທຸກ຺ຂນິໂຣຘຄາມິນີ ປຏິປທາ’’ຕິ ຍຖາຠູຕໍ ປຊານາຕິ. ຕຖາຄຕປ຺ປເວທິຕາ ຈສ຺ສ ຘມ຺ມາ ປຎ຺ຎາຍ ໂວທິຏ຺ຐາ ໂຫນ຺ຕິ ໂວຈຣິຕາ. ປຎ຺ຎາຍ ຈສ຺ສ ທິສ຺ວາ ເອກຈ຺ເຈ ອາສວາ ປຣິກ຺ຂີຓາ ໂຫນ຺ຕິ – ອຍໍ ວຸຈ຺ຈຕິ ປຸຄ຺ຄໂລ ‘‘ທິຏ຺ຐິປ຺ປຕ຺ໂຕ’’.

໒໘. ກຕໂມ ຈ ປຸຄ຺ຄໂລ ສທ຺ຘາວິມຸຕ຺ໂຕ? ອິເຘກຈ຺ໂຈ ປຸຄ຺ຄໂລ ‘‘ອິທໍ ທຸກ຺ຂ’’ນ຺ຕິ ຍຖາຠູຕໍ ປຊານາຕິ, ‘‘ອຍໍ ທຸກ຺ຂສມຸທໂຍ’’ຕິ ຍຖາຠູຕໍ ປຊານາຕິ, ‘‘ອຍໍ ທຸກ຺ຂນິໂຣໂຘ’’ຕິ ຍຖາຠູຕໍ ປຊານາຕິ, ‘‘ອຍໍ ທຸກ຺ຂນິໂຣຘຄາມິນີ ປຏິປທາ’’ຕິ ຍຖາຠູຕໍ ປຊານາຕິ. ຕຖາຄຕປ຺ປເວທິຕາ ຈສ຺ສ ຘມ຺ມາ ປຎ຺ຎາຍ ໂວທິຏ຺ຐາ ໂຫນ຺ຕິ ໂວຈຣິຕາ. ປຎ຺ຎາຍ ຈສ຺ສ ທິສ຺ວາ ເອກຈ຺ເຈ ອາສວາ ປຣິກ຺ຂີຓາ ໂຫນ຺ຕິ, ໂນ ຈ ໂຂ ຍຖາ ທິຏ຺ຐິປ຺ປຕ຺ຕສ຺ສ – ອຍໍ ວຸຈ຺ຈຕິ ປຸຄ຺ຄໂລ ‘‘ສທ຺ຘາວິມຸຕ຺ໂຕ’’.

໒໙. ກຕໂມ ຈ ປຸຄ຺ຄໂລ ຘມ຺ມານຸສາຣີ? ຍສ຺ສ ປຸຄ຺ຄລສ຺ສ ໂສຕາປຕ຺ຕິຜລສຈ຺ຉິກິຣິຍາຍ ປຏິປນ຺ນສ຺ສ ປຎ຺ຎິນ຺ທ຺ຣິຍໍ ອຘິມຕ຺ຕໍ ໂຫຕິ, ປຎ຺ຎາວາຫິໍ ປຎ຺ຎາປຸພ຺ພງ຺ຄມໍ ອຣິຍມຄ຺ຄໍ ຠາເວຕິ – ອຍໍ ວຸຈ຺ຈຕິ ປຸຄ຺ຄໂລ ‘‘ຘມ຺ມານຸສາຣີ’’. ໂສຕາປຕ຺ຕິຜລສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ຘມ຺ມານຸສາຣີ ຜເລ ຐິໂຕ ທິຏ຺ຐິປ຺ປຕ຺ໂຕ.

໓໐. ກຕໂມ ຈ ປຸຄ຺ຄໂລ ສທ຺ຘານຸສາຣີ? ຍສ຺ສ ປຸຄ຺ຄລສ຺ສ ໂສຕາປຕ຺ຕິຜລສຈ຺ຉິກິຣິຍາຍ ປຏິປນ຺ນສ຺ສ ສທ຺ຘິນ຺ທ຺ຣິຍໍ ອຘິມຕ຺ຕໍ ໂຫຕິ, ສທ຺ຘາວາຫິໍ ສທ຺ຘາປຸພ຺ພງ຺ຄມໍ ອຣິຍມຄ຺ຄໍ ຠາເວຕິ – ອຍໍ ວຸຈ຺ຈຕິ ປຸຄ຺ຄໂລ ‘‘ສທ຺ຘານຸສາຣີ’’. ໂສຕາປຕ຺ຕິຜລສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ສທ຺ຘານຸສາຣີ ຜເລ ຐິໂຕ ສທ຺ຘາວິມຸຕ຺ໂຕ.

໓໑. ກຕໂມ ຈ ປຸຄ຺ຄໂລ ສຕ຺ຕກ຺ຂຕ຺ຕຸປຣໂມ? ອິເຘກຈ຺ໂຈ ປຸຄ຺ຄໂລ ຕິຓ຺ຓໍ ສໍໂຍຊນານໍ ປຣິກ຺ຂຍາ ໂສຕາປນ຺ໂນ ໂຫຕິ ອວິນິປາຕຘມ຺ໂມ ນິຍໂຕ ສມ຺ໂພຘິປຣາຍໂນ [ສມ຺ໂພຘິປຣາຍໂຓ (ສີ. ກ.)]. ໂສ ສຕ຺ຕກ຺ຂຕ຺ຕຸໍ ເທເວ ຈ ມານຸເສ ຈ ສນ຺ຘາວິຕ຺ວາ ສໍສຣິຕ຺ວາ ທຸກ຺ຂສ຺ສນ຺ຕໍ ກໂຣຕິ – ອຍໍ ວຸຈ຺ຈຕິ ປຸຄ຺ຄໂລ ‘‘ສຕ຺ຕກ຺ຂຕ຺ຕຸປຣໂມ’’.

໓໒. ກຕໂມ ຈ ປຸຄ຺ຄໂລ ໂກລງ຺ໂກໂລ? ອິເຘກຈ຺ໂຈ ປຸຄ຺ຄໂລ ຕິຓ຺ຓໍ ສໍໂຍຊນານໍ ປຣິກ຺ຂຍາ ໂສຕາປນ຺ໂນ ໂຫຕິ ອວິນິປາຕຘມ຺ໂມ ນິຍໂຕ ສມ຺ໂພຘິປຣາຍໂນ. ໂສ ທ຺ເວ ວາ ຕີຓິ ວາ ກຸລານິ ສນ຺ຘາວິຕ຺ວາ ສໍສຣິຕ຺ວາ ທຸກ຺ຂສ຺ສນ຺ຕໍ ກໂຣຕິ – ອຍໍ ວຸຈ຺ຈຕິ ປຸຄ຺ຄໂລ ‘‘ໂກລງ຺ໂກໂລ’’.

໓໓. ກຕໂມ ຈ ປຸຄ຺ຄໂລ ເອກພີຊີ? ອິເຘກຈ຺ໂຈ ປຸຄ຺ຄໂລ ຕິຓ຺ຓໍ ສໍໂຍຊນານໍ ປຣິກ຺ຂຍາ ໂສຕາປນ຺ໂນ ໂຫຕິ ອວິນິປາຕຘມ຺ໂມ ນິຍໂຕ ສມ຺ໂພຘິປຣາຍໂນ. ໂສ ເອກໍເຍວ ມານຸສກໍ ຠວໍ ນິພ຺ພຕ຺ເຕຕ຺ວາ ທຸກ຺ຂສ຺ສນ຺ຕໍ ກໂຣຕິ – ອຍໍ ວຸຈ຺ຈຕິ ປຸຄ຺ຄໂລ ‘‘ເອກພີຊີ’’.

໓໔. ກຕໂມ ຈ ປຸຄ຺ຄໂລ ສກທາຄາມີ? ອິເຘກຈ຺ໂຈ ປຸຄ຺ຄໂລ ຕິຓ຺ຓໍ ສໍໂຍຊນານໍ ປຣິກ຺ຂຍາ ຣາຄໂທສໂມຫານໍ ຕນຸຕ຺ຕາ ສກທາຄາມີ ໂຫຕິ, ສກິເທວ ອິມໍ ໂລກໍ ອາຄນ຺ຕ຺ວາ ທຸກ຺ຂສ຺ສນ຺ຕໍ ກໂຣຕິ – ອຍໍ ວຸຈ຺ຈຕິ ປຸຄ຺ຄໂລ ‘‘ສກທາຄາມີ’’.

໓໕. ກຕໂມ ຈ ປຸຄ຺ຄໂລ ອນາຄາມີ? ອິເຘກຈ຺ໂຈ ປຸຄ຺ຄໂລ ປຎ຺ຈນ຺ນໍ ໂອຣມ຺ຠາຄິຍານໍ ສໍໂຍຊນານໍ ປຣິກ຺ຂຍາ ໂອປປາຕິໂກ ໂຫຕິ, ຕຕ຺ຖ ປຣິນິພ຺ພາຍີ ອນາວຕ຺ຕິຘມ຺ໂມ ຕສ຺ມາ ໂລກາ – ອຍໍ ວຸຈ຺ຈຕິ ປຸຄ຺ຄໂລ ‘‘ອນາຄາມີ’’.

໓໖. ກຕໂມ ຈ ປຸຄ຺ຄໂລ ອນ຺ຕຣາປຣິນິພ຺ພາຍີ? ອິເຘກຈ຺ໂຈ ປຸຄ຺ຄໂລ ປຎ຺ຈນ຺ນໍ ໂອຣມ຺ຠາຄິຍານໍ ສໍໂຍຊນານໍ ປຣິກ຺ຂຍາ ໂອປປາຕິໂກ ໂຫຕິ, ຕຕ຺ຖ ປຣິນິພ຺ພາຍີ ອນາວຕ຺ຕິຘມ຺ໂມ ຕສ຺ມາ ໂລກາ. ໂສ ອຸປປນ຺ນໍ ວາ ສມນນ຺ຕຣາ ອປ຺ປຕ຺ຕໍ ວາ ເວມຊ຺ຌໍ ອາຍຸປ຺ປມາຓໍ ອຣິຍມຄ຺ຄໍ ສຎ຺ຊເນຕິ ອຸປຣິຏ຺ຐິມານໍ ສໍໂຍຊນານໍ ປຫານາຍ – ອຍໍ ວຸຈ຺ຈຕິ ປຸຄ຺ຄໂລ ‘‘ອນ຺ຕຣາປຣິນິພ຺ພາຍີ’’.

໓໗. ກຕໂມ ຈ ປຸຄ຺ຄໂລ ອຸປຫຈ຺ຈປຣິນິພ຺ພາຍີ? ອິເຘກຈ຺ໂຈ ປຸຄ຺ຄໂລ ປຎ຺ຈນ຺ນໍ ໂອຣມ຺ຠາຄິຍານໍ ສໍໂຍຊນານໍ ປຣິກ຺ຂຍາ ໂອປປາຕິໂກ ໂຫຕິ, ຕຕ຺ຖ ປຣິນິພ຺ພາຍີ ອນາວຕ຺ຕິຘມ຺ໂມ ຕສ຺ມາ ໂລກາ. ໂສ ອຕິກ຺ກມິຕ຺ວາ ເວມຊ຺ຌໍ ອາຍຸປ຺ປມາຓໍ ອຸປຫຈ຺ຈ ວາ ກາລກິຣິຍໍ [ກາລໍ ກິຣິຍໍ (ກ.)] ອຣິຍມຄ຺ຄໍ ສຎ຺ຊເນຕິ ອຸປຣິຏ຺ຐິມານໍ ສໍໂຍຊນານໍ ປຫານາຍ – ອຍໍ ວຸຈ຺ຈຕິ ປຸຄ຺ຄໂລ ‘‘ອຸປຫຈ຺ຈປຣິນິພ຺ພາຍີ’’.

໓໘. ກຕໂມ ຈ ປຸຄ຺ຄໂລ ອສງ຺ຂາຣປຣິນິພ຺ພາຍີ? ອິເຘກຈ຺ໂຈ ປຸຄ຺ຄໂລ ປຎ຺ຈນ຺ນໍ ໂອຣມ຺ຠາຄິຍານໍ ສໍໂຍຊນານໍ ປຣິກ຺ຂຍາ ໂອປປາຕິໂກ ໂຫຕິ, ຕຕ຺ຖ ປຣິນິພ຺ພາຍີ ອນາວຕ຺ຕິຘມ຺ໂມ ຕສ຺ມາ ໂລກາ. ໂສ ອສງ຺ຂາເຣນ ອຣິຍມຄ຺ຄໍ ສຎ຺ຊເນຕິ ອຸປຣິຏ຺ຐິມານໍ ສໍໂຍຊນານໍ ປຫານາຍ – ອຍໍ ວຸຈ຺ຈຕິ ປຸຄ຺ຄໂລ ‘‘ອສງ຺ຂາຣປຣິນິພ຺ພາຍີ’’.

໓໙. ກຕໂມ ຈ ປຸຄ຺ຄໂລ ສສງ຺ຂາຣປຣິນິພ຺ພາຍີ? ອິເຘກຈ຺ໂຈ ປຸຄ຺ຄໂລ ປຎ຺ຈນ຺ນໍ ໂອຣມ຺ຠາຄິຍານໍ ສໍໂຍຊນານໍ ປຣິກ຺ຂຍາ ໂອປປາຕິໂກ ໂຫຕິ, ຕຕ຺ຖ ປຣິນິພ຺ພາຍີ ອນາວຕ຺ຕິຘມ຺ໂມ ຕສ຺ມາ ໂລກາ. ໂສ ສສງ຺ຂາເຣນ ອຣິຍມຄ຺ຄໍ ສຎ຺ຊເນຕິ ອຸປຣິຏ຺ຐິມານໍ ສໍໂຍຊນານໍ ປຫານາຍ – ອຍໍ ວຸຈ຺ຈຕິ ປຸຄ຺ຄໂລ ‘‘ສສງ຺ຂາຣປຣິນິພ຺ພາຍີ’’.

໔໐. ກຕໂມ ຈ ປຸຄ຺ຄໂລ ອຸທ຺ຘໍໂສໂຕ ອກນິຏ຺ຐຄາມີ? ອິເຘກຈ຺ໂຈ ປຸຄ຺ຄໂລ ປຎ຺ຈນ຺ນໍ ໂອຣມ຺ຠາຄິຍານໍ ສໍໂຍຊນານໍ ປຣິກ຺ຂຍາ ໂອປປາຕິໂກ ໂຫຕິ, ຕຕ຺ຖ ປຣິນິພ຺ພາຍີ ອນາວຕ຺ຕິຘມ຺ໂມ ຕສ຺ມາ ໂລກາ. ໂສ ອວິຫາ ຈຸໂຕ ອຕປ຺ປໍ ຄຈ຺ຉຕິ, ອຕປ຺ປາ ຈຸໂຕ ສຸທສ຺ສໍ ຄຈ຺ຉຕິ, ສຸທສ຺ສາ ຈຸໂຕ ສຸທສ຺ສິໍ ຄຈ຺ຉຕິ, ສຸທສ຺ສິຍາ ຈຸໂຕ ອກນິຏ຺ຐໍ ຄຈ຺ຉຕິ; ອກນິຏ຺ເຐ ອຣິຍມຄ຺ຄໍ ສຎ຺ຊເນຕິ ອຸປຣິຏ຺ຐິມານໍ ສໍໂຍຊນານໍ ປຫານາຍ – ອຍໍ ວຸຈ຺ຈຕິ ປຸຄ຺ຄໂລ ‘‘ອຸທ຺ຘໍໂສໂຕ ອກນິຏ຺ຐຄາມີ’’.

໔໑. ກຕໂມ ຈ ປຸຄ຺ຄໂລ ໂສຕາປນ຺ໂນ ໂສຕາປຕ຺ຕິຜລສຈ຺ຉິກິຣິຍາຍ ປຏິປນ຺ໂນ? ຕິຓ຺ຓໍ ສໍໂຍຊນານໍ ປຫານາຍ ປຏິປນ຺ໂນ ປຸຄ຺ຄໂລ ໂສຕາປຕ຺ຕິຜລສຈ຺ຉິກິຣິຍາຍ ປຏິປນ຺ໂນ. ຍສ຺ສ ປຸຄ຺ຄລສ຺ສ ຕີຓິ ສໍໂຍຊນານິ ປຫີນານິ – ອຍໍ ວຸຈ຺ຈຕິ ປຸຄ຺ຄໂລ ‘‘ໂສຕາປນ຺ໂນ’’.

໔໒. ກາມຣາຄພ຺ຍາປາທານໍ ຕນຸຠາວາຍ ປຏິປນ຺ໂນ ປຸຄ຺ຄໂລ ສກທາຄາມິຜລສຈ຺ຉິກິຣິຍາຍ ປຏິປນ຺ໂນ. ຍສ຺ສ ປຸຄ຺ຄລສ຺ສ ກາມຣາຄພ຺ຍາປາທາ ຕນຸຠູຕາ – ອຍໍ ວຸຈ຺ຈຕິ ປຸຄ຺ຄໂລ ‘‘ສກທາຄາມີ’’.

໔໓. ກາມຣາຄພ຺ຍາປາທານໍ ອນວເສສປ຺ປຫານາຍ ປຏິປນ຺ໂນ ປຸຄ຺ຄໂລ ອນາຄາມິຜລສຈ຺ຉິກິຣິຍາຍ ປຏິປນ຺ໂນ. ຍສ຺ສ ປຸຄ຺ຄລສ຺ສ ກາມຣາຄພ຺ຍາປາທາ ອນວເສສາ ປຫີນາ – ອຍໍ ວຸຈ຺ຈຕິ ປຸຄ຺ຄໂລ ‘‘ອນາຄາມີ’’.

໔໔. ຣູປຣາຄອຣູປຣາຄມານອຸທ຺ຘຈ຺ຈອວິຊ຺ຊາຍ ອນວເສສປ຺ປຫານາຍ ປຏິປນ຺ໂນ ປຸຄ຺ຄໂລ ອຣຫຕ຺ຕຜລສຈ຺ຉິກິຣິຍາຍ ປຏິປນ຺ໂນ. ຍສ຺ສ ປຸຄ຺ຄລສ຺ສ ຣູປຣາໂຄ ອຣູປຣາໂຄ ມາໂນ ອຸທ຺ຘຈ຺ຈໍ ອວິຊ຺ຊາ ອນວເສສາ ປຫີນາ – ອຍໍ ວຸຈ຺ຈຕິ ປຸຄ຺ຄໂລ ‘‘ອຣຫາ’’.

ເອກກນິທ຺ເທໂສ.