(໑໙໖) ໓. ນິຣຍປາລກຖາ

໘໖໖. ນຕ຺ຖິ ນິຣເຍສຸ ນິຣຍປາລາຕິ? ອາມນ຺ຕາ. ນຕ຺ຖິ ນິຣເຍສຸ ກມ຺ມກາຣຓາຕິ? ນ ເຫວໍ ວຕ຺ຕພ຺ເພ…ເປ… ອຕ຺ຖິ ນິຣເຍສຸ ກມ຺ມກາຣຓາຕິ? ອາມນ຺ຕາ. ອຕ຺ຖິ ນິຣເຍສຸ ນິຣຍປາລາຕິ? ນ ເຫວໍ ວຕ຺ຕພ຺ເພ…ເປ….

ອຕ຺ຖິ ມນຸສ຺ເສສຸ ກມ຺ມກາຣຓາ, ອຕ຺ຖິ ຈ ກາຣຓິກາຕິ? ອາມນ຺ຕາ. ອຕ຺ຖິ ນິຣເຍສຸ ກມ຺ມກາຣຓາ, ອຕ຺ຖິ ຈ ກາຣຓິກາຕິ? ນ ເຫວໍ ວຕ຺ຕພ຺ເພ…ເປ… ອຕ຺ຖິ ນິຣເຍສຸ ກມ຺ມກາຣຓາ, ນຕ຺ຖິ ຈ ກາຣຓິກາຕິ? ອາມນ຺ຕາ. ອຕ຺ຖິ ມນຸສ຺ເສສຸ ກມ຺ມກາຣຓາ, ນຕ຺ຖິ ຈ ກາຣຓິກາຕິ? ນ ເຫວໍ ວຕ຺ຕພ຺ເພ…ເປ….

໘໖໗. ອຕ຺ຖິ ນິຣເຍສຸ ນິຣຍປາລາຕິ? ອາມນ຺ຕາ. ນນຸ ວຸຕ຺ຕໍ ຠຄວຕາ –

‘‘ນ ເວສ຺ສຠູ ໂນປິ ຈ ເປຕ຺ຕິຣາຊາ,

ໂສໂມ ຍໂມ ເວສ຺ສວໂຓ ຈ ຣາຊາ;

ສການິ ກມ຺ມານິ ຫນນ຺ຕິ ຕຕ຺ຖ, ອິໂຕ ປຓຸນ຺ນໍ [ປຓຸຓ຺ຓໍ (ສ຺ຍາ. ກ.), ປນຸນ຺ນໍ (ສີ.)] ປຣໂລກປຕ຺ຕ’’ນ຺ຕິ.

ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ເຕນ ຫິ ນຕ຺ຖິ ນິຣເຍສຸ ນິຣຍປາລາຕິ.

໘໖໘. ນຕ຺ຖິ ນິຣເຍສຸ ນິຣຍປາລາຕິ? ອາມນ຺ຕາ. ນນຸ ວຸຕ຺ຕໍ ຠຄວຕາ – ‘‘ຕເມນໍ, ຠິກ຺ຂເວ, ນິຣຍປາລາ ປຎ຺ຈວິຘພນ຺ຘນໍ ນາມ ກາຣຓໍ ກາເຣນ຺ຕິ [ກໂຣນ຺ຕິ (ມ. ນິ. ໓.໒໕໐; ອ. ນິ. ໓.໓໖)] – ຕຕ຺ຕໍ ອໂຍຂີລໍ ຫຕ຺ເຖ ຄເມນ຺ຕິ, ຕຕ຺ຕໍ ອໂຍຂີລໍ ທຸຕິເຍ ຫຕ຺ເຖ ຄເມນ຺ຕິ, ຕຕ຺ຕໍ ອໂຍຂີລໍ ປາເທ ຄເມນ຺ຕິ, ຕຕ຺ຕໍ ອໂຍຂີລໍ ທຸຕິເຍ ປາເທ ຄເມນ຺ຕິ, ຕຕ຺ຕໍ ອໂຍຂີລໍ ມຊ຺ເຌອຸຣສ຺ມິໍ ຄເມນ຺ຕິ; ໂສ ຕຕ຺ຖ ທຸກ຺ຂາ ຕິພ຺ພາ ກຏຸກາ ເວທນາ ເວເທຕິ; ນ ຈ ຕາວ ກາລໍ ກໂຣຕິ ຍາວ ນ ຕໍ ປາປກມ຺ມໍ ພ຺ຍນ຺ຕີໂຫຕີ’’ຕິ [ມ. ນິ. ໓.໒໕໐; ອ. ນິ. ໓.໓໖]! ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ເຕນ ຫິ ອຕ຺ຖິ ນິຣເຍສຸ ນິຣຍປາລາຕິ.

ນຕ຺ຖິ ນິຣເຍສຸ ນິຣຍປາລາຕິ? ອາມນ຺ຕາ. ນນຸ ວຸຕ຺ຕໍ ຠຄວຕາ – ‘‘ຕເມນໍ, ຠິກ຺ຂເວ, ນິຣຍປາລາ ສໍເວເສຕ຺ວາ ກຸຐາຣີຫິ [ກຸຘາຣີຫິ (ສພ຺ພຕ຺ຖ)] ຕຈ຺ຉນ຺ຕິ…ເປ… ຕເມນໍ, ຠິກ຺ຂເວ, ນິຣຍປາລາ ອຸທ຺ຘມ຺ປາທໍ ອໂຘສິຣໍ ຐເປຕ຺ວາ ວາສີຫິ ຕຈ຺ຉນ຺ຕິ…ເປ… ຕເມນໍ, ຠິກ຺ຂເວ, ນິຣຍປາລາ ຣເຖ ໂຍເຊຕ຺ວາ ອາທິຕ຺ຕາຍ ປຖວິຍາ ສມ຺ປຊ຺ຊລິຕາຍ ສໂຊຕິຠູຕາຍ [ສຎ຺ໂຊຕິຠູຕາຍ (ສ຺ຍາ.)] ສາເຣນ຺ຕິປິ ປຈ຺ຈາສາເຣນ຺ຕິປິ…ເປ… ຕເມນໍ, ຠິກ຺ຂເວ, ນິຣຍປາລາ ມຫນ຺ຕໍ ອງ຺ຄາຣປພ຺ພຕໍ ອາທິຕ຺ຕໍ ສມ຺ປຊ຺ຊລິຕໍ ສໂຊຕິຠູຕໍ ອາໂຣເປນ຺ຕິປິ ໂອໂຣເປນ຺ຕິປິ…ເປ… ຕເມນໍ, ຠິກ຺ຂເວ, ນິຣຍປາລາ ອຸທ຺ຘມ຺ປາທໍ ອໂຘສິຣໍ ຄເຫຕ຺ວາ ຕຕ຺ຕາຍ ໂລຫກຸມ຺ຠິຍາ ປກ຺ຂິປນ຺ຕິ ອາທິຕ຺ຕາຍ ສມ຺ປຊ຺ຊລິຕາຍ ສໂຊຕິຠູຕາຍ. ໂສ ຕຕ຺ຖ ເຜຓຸທ຺ເທຫກໍ ປຈ຺ຈຕິ, ໂສ ຕຕ຺ຖ ເຜຓຸທ຺ເທຫກໍ ປຈ຺ຈມາໂນ ສກິມ຺ປິ ອຸທ຺ຘໍ ຄຈ຺ຉຕິ, ສກິມ຺ປິ ອໂຘ ຄຈ຺ຉຕິ, ສກິມ຺ປິ ຕິຣິຍໍ ຄຈ຺ຉຕິ. ໂສ ຕຕ຺ຖ ທຸກ຺ຂາ ຕິພ຺ພາ ກຏຸກາ ເວທນາ ເວທຍຕິ, ນ ຈ ຕາວ ກາລໍ ກໂຣຕິ ຍາວ ນ ຕໍ ປາປກມ຺ມໍ ພ຺ຍນ຺ຕີໂຫຕິ. ຕເມນໍ, ຠິກ຺ຂເວ, ນິຣຍປາລາ ມຫານິຣເຍ ປກ຺ຂິປນ຺ຕິ! ໂສ ໂຂ ປນ, ຠິກ຺ຂເວ, ມຫານິຣໂຍ –

‘‘ຈຕຸກ຺ກຓ຺ໂຓ ຈຕຸທ຺ວາໂຣ, ວິຠຕ຺ໂຕ ຠາຄໂສ ມິໂຕ;

ອໂຍປາກາຣປຣິຍນ຺ໂຕ, ອຍສາ ປຏິກຸຊ຺ຊິໂຕ.

‘‘ຕສ຺ສ ອໂຍມຍາ ຠູມິ, ຊລິຕາ ເຕຊສາ ຍຸຕາ;

ສມນ຺ຕາ ໂຍຊນສຕໍ, ຜຣິຕ຺ວາ ຕິຏ຺ຐຕິ ສພ຺ພທາ’’ຕິ [ມ. ນິ. ໓.໒໕໐; ອ. ນິ. ໓.໓໖; ເປ. ວ. ໗໑].

ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ເຕນ ຫິ ອຕ຺ຖິ ນິຣເຍສຸ ນິຣຍປາລາຕິ.

ນິຣຍປາລກຖາ ນິຏ຺ຐິຕາ.