໒໐. ວີສຕິມວຄ຺ໂຄ

(໑໙໗) ໔. ຕິຣຈ຺ຉານກຖາ

໘໖໙. ອຕ຺ຖິ ເທເວສຸ ຕິຣຈ຺ຉານຄຕາຕິ? ອາມນ຺ຕາ. ອຕ຺ຖິ ຕິຣຈ຺ຉານຄເຕສຸ ເທວາຕິ? ນ ເຫວໍ ວຕ຺ຕພ຺ເພ…ເປ… ອຕ຺ຖິ ເທເວສຸ ຕິຣຈ຺ຉານຄຕາຕິ? ອາມນ຺ຕາ. ເທວໂລໂກ ຕິຣຈ຺ຉານໂຍນີຕິ? ນ ເຫວໍ ວຕ຺ຕພ຺ເພ…ເປ… ອຕ຺ຖິ ເທເວສຸ ຕິຣຈ຺ຉານຄຕາຕິ? ອາມນ຺ຕາ. ອຕ຺ຖິ ຕຕ຺ຖ ກີຏາ ປຏງ຺ຄາ ມກສາ ມກ຺ຂິກາ ອຫີ ວິຈ຺ຉິກາ ສຕປທີ ຄຓ຺ຑຸປ຺ປາທາຕິ [ຄຓ຺ຑຸປາທາຕິ (ສ຺ຍາ. ກໍ. ປີ.)]? ນ ເຫວໍ ວຕ຺ຕພ຺ເພ…ເປ….

໘໗໐. ນຕ຺ຖິ ເທເວສຸ ຕິຣຈ຺ຉານຄຕາຕິ? ອາມນ຺ຕາ. ນນຸ ອຕ຺ຖິ ຕຕ຺ຖ ເອຣາວໂຓ ນາມ ຫຕ຺ຖິນາໂຄ ສຫສ຺ສຍຸຕ຺ຕໍ ທິພ຺ພໍ ຍານນ຺ຕິ? ອາມນ຺ຕາ. ຫຎ຺ຈິ ອຕ຺ຖິ ຕຕ຺ຖ ເອຣາວໂຓ ນາມ ຫຕ຺ຖິນາໂຄ ສຫສ຺ສຍຸຕ຺ຕໍ ທິພ຺ພໍ ຍານໍ, ເຕນ ວຕ ເຣ ວຕ຺ຕພ຺ເພ – ‘‘ອຕ຺ຖິ ເທເວສຸ ຕິຣຈ຺ຉານຄຕາ’’ຕິ.

໘໗໑. ອຕ຺ຖິ ເທເວສຸ ຕິຣຈ຺ຉານຄຕາຕິ? ອາມນ຺ຕາ. ອຕ຺ຖິ ຕຕ຺ຖ ຫຕ຺ຖິພນ຺ຘາ ອສ຺ສພນ຺ຘາ [ຫຕ຺ຖິຠຓ຺ຑາ ອສ຺ສຠຓ຺ຑາ (?)] ຍາວສິກາ ກາຣຓິກາ ຠຕ຺ຕກາຣກາຕິ? ນ ເຫວໍ ວຕ຺ຕພ຺ເພ. ເຕນ ຫິ ນຕ຺ຖິ ເທເວສຸ ຕິຣຈ຺ຉານຄຕາຕິ.

ຕິຣຈ຺ຉານກຖາ ນິຏ຺ຐິຕາ.