໑໗. ສຕ຺ຕຣສມວຄ຺ໂຄ

(໑໗໒) ໗. ນ ວຕ຺ຕພ຺ພໍ ສງ຺ໂຆ ທກ຺ຂິຓໍ ວິໂສເຘຕີຕິກຖາ

໗໙໓. ນ ວຕ຺ຕພ຺ພໍ – ‘‘ສງ຺ໂຆ ທກ຺ຂິຓໍ ວິໂສເຘຕີ’’ຕິ? ອາມນ຺ຕາ. ນນຸ ສງ຺ໂຆ ອາຫຸເນຍ຺ໂຍ ປາຫຸເນຍ຺ໂຍ ທກ຺ຂິເຓຍ຺ໂຍ ອຎ຺ຊລິກຣຓີໂຍ ອນຸຕ຺ຕຣໍ ປຸຎ຺ຎກ຺ເຂຕ຺ຕໍ ໂລກສ຺ສາຕິ? ອາມນ຺ຕາ. ຫຎ຺ຈິ ສງ຺ໂຆ ອາຫຸເນຍ຺ໂຍ…ເປ… ອນຸຕ຺ຕຣໍ ປຸຎ຺ຎກ຺ເຂຕ຺ຕໍ ໂລກສ຺ສ, ເຕນ ວຕ ເຣ ວຕ຺ຕພ຺ເພ – ‘‘ສງ຺ໂຆ ທກ຺ຂິຓໍ ວິໂສເຘຕີ’’ຕິ.

ນ ວຕ຺ຕພ຺ພໍ – ‘‘ສງ຺ໂຆ ທກ຺ຂິຓໍ ວິໂສເຘຕີ’’ຕິ? ອາມນ຺ຕາ. ນນຸ ຈຕ຺ຕາໂຣ ປຸຣິສຍຸຄາ ອຏ຺ຐ ປຸຣິສປຸຄ຺ຄລາ ທກ຺ຂິເຓຍ຺ຍາ ວຸຕ຺ຕາ ຠຄວຕາຕິ? ອາມນ຺ຕາ. ຫຎ຺ຈິ ຈຕ຺ຕາໂຣ ປຸຣິສຍຸຄາ ອຏ຺ຐ ປຸຣິສປຸຄ຺ຄລາ ທກ຺ຂິເຓຍ຺ຍາ ວຸຕ຺ຕາ ຠຄວຕາ, ເຕນ ວຕ ເຣ ວຕ຺ຕພ຺ເພ – ‘‘ສງ຺ໂຆ ທກ຺ຂິຓໍ ວິໂສເຘຕີ’’ຕິ.

ນ ວຕ຺ຕພ຺ພໍ – ‘‘ສງ຺ໂຆ ທກ຺ຂິຓໍ ວິໂສເຘຕີ’’ຕິ? ອາມນ຺ຕາ. ນນຸ ອຕ຺ຖິ ເກຈິ ສງ຺ຆສ຺ສ ທານໍ ທຕ຺ວາ ທກ຺ຂິຓໍ ອາຣາເຘນ຺ຕີຕິ? ອາມນ຺ຕາ. ຫຎ຺ຈິ ອຕ຺ຖິ ເກຈິ ສງ຺ຆສ຺ສ ທານໍ ທຕ຺ວາ ທກ຺ຂິຓໍ ອາຣາເຘນ຺ຕິ, ເຕນ ວຕ ເຣ ວຕ຺ຕພ຺ເພ – ‘‘ສງ຺ໂຆ ທກ຺ຂິຓໍ ວິໂສເຘຕີ’’ຕິ.

ນນຸ ອຕ຺ຖິ ເກຈິ ສງ຺ຆສ຺ສ ຈີວຣໍ ທຕ຺ວາ…ເປ… ປິຓ຺ຑປາຕໍ ທຕ຺ວາ…ເປ… ເສນາສນໍ ທຕ຺ວາ… ຄິລານປຈ຺ຈຍເຠສຊ຺ຊປຣິກ຺ຂາຣໍ ທຕ຺ວາ… ຂາທນີຍໍ ທຕ຺ວາ… ໂຠຊນີຍໍ ທຕ຺ວາ…ເປ… ປານີຍໍ ທຕ຺ວາ ທກ຺ຂິຓໍ ອາຣາເຘນ຺ຕີຕິ? ອາມນ຺ຕາ. ຫຎ຺ຈິ ອຕ຺ຖິ ເກຈິ ສງ຺ຆສ຺ສ ປານີຍໍ ທຕ຺ວາ ທກ຺ຂິຓໍ ອາຣາເຘນ຺ຕິ, ເຕນ ວຕ ເຣ ວຕ຺ຕພ຺ເພ – ‘‘ສງ຺ໂຆ ທກ຺ຂິຓໍ ວິໂສເຘຕີ’’ຕິ.

໗໙໔. ສງ຺ໂຆ ທກ຺ຂິຓໍ ວິໂສເຘຕີຕິ? ອາມນ຺ຕາ. ມຄ຺ໂຄ ວິໂສເຘຕິ, ຜລໍ ວິໂສເຘຕີຕິ? ນ ເຫວໍ ວຕ຺ຕພ຺ເພ…ເປ….

ນ ວຕ຺ຕພ຺ພໍ ສງ຺ໂຆ ທກ຺ຂິຓໍ ວິໂສເຘຕີຕິກຖາ ນິຏ຺ຐິຕາ.