໑໗. ສຕ຺ຕຣສມວຄ຺ໂຄ

(໑໗໓) ໘. ນ ວຕ຺ຕພ຺ພໍ ສງ຺ໂຆ ຠຸຎ຺ຊຕີຕິກຖາ

໗໙໕. ນ ວຕ຺ຕພ຺ພໍ – ‘‘ສງ຺ໂຆ ຠຸຎ຺ຊຕິ ປິວຕິ ຂາທຕິ ສາຍຕີ’’ຕິ? ອາມນ຺ຕາ. ນນຸ ອຕ຺ຖິ ເກຈິ ສງ຺ຆຠຕ຺ຕານິ ກໂຣນ຺ຕິ, ອຸທ຺ເທສຠຕ຺ຕານິ ກໂຣນ຺ຕິ, ຍາຄຸປານານິ ກໂຣນ຺ຕີຕິ? ອາມນ຺ຕາ. ຫຎ຺ຈິ ອຕ຺ຖິ ເກຈິ ສງ຺ຆຠຕ຺ຕານິ ກໂຣນ຺ຕິ, ອຸທ຺ເທສຠຕ຺ຕານິ ກໂຣນ຺ຕິ, ຍາຄຸປານານິ ກໂຣນ຺ຕິ, ເຕນ ວຕ ເຣ ວຕ຺ຕພ຺ເພ – ‘‘ສງ຺ໂຆ ຠຸຎ຺ຊຕິ ປິວຕິ ຂາທຕິ ສາຍຕີ’’ຕິ.

ນ ວຕ຺ຕພ຺ພໍ – ‘‘ສງ຺ໂຆ ຠຸຎ຺ຊຕິ ປິວຕິ ຂາທຕິ ສາຍຕີ’’ຕິ? ອາມນ຺ຕາ. ນນຸ ວຸຕ຺ຕໍ ຠຄວຕາ – ‘‘ຄຓໂຠຊນໍ ປຣມ຺ປຣໂຠຊນໍ ອຕິຣິຕ຺ຕໂຠຊນໍ ອນຕິຣິຕ຺ຕໂຠຊນ’’ນ຺ຕິ? ອາມນ຺ຕາ. ຫຎ຺ຈິ ວຸຕ຺ຕໍ ຠຄວຕາ – ‘‘ຄຓໂຠຊນໍ ປຣມ຺ປຣໂຠຊນໍ ອຕິຣິຕ຺ຕໂຠຊນໍ ອນຕິຣິຕ຺ຕໂຠຊນໍ’’, ເຕນ ວຕ ເຣ ວຕ຺ຕພ຺ເພ – ‘‘ສງ຺ໂຆ ຠຸຎ຺ຊຕິ ປິວຕິ ຂາທຕິ ສາຍຕີ’’ຕິ.

ນ ວຕ຺ຕພ຺ພໍ – ‘‘ສງ຺ໂຆ ຠຸຎ຺ຊຕິ ປິວຕິ ຂາທຕິ ສາຍຕີ’’ຕິ? ອາມນ຺ຕາ. ນນຸ ອຏ຺ຐ ປານານິ ວຸຕ຺ຕານິ ຠຄວຕາ – ອມ຺ພປານໍ, ຊມ຺ພຸປານໍ, ໂຈຈປານໍ, ໂມຈປານໍ, ມຘຸກປານໍ, [ມຘຸປານໍ (ສີ. ສ຺ຍາ. ກໍ. ປີ.) ມຫາວ. ໓໐໐ ປນ ປສ຺ສິຕພ຺ພໍ] ມຸທ຺ທິກປານໍ, ສາລຸກປານໍ, ຜາຣຸສກປານນ຺ຕິ? ອາມນ຺ຕາ. ຫຎ຺ຈິ ອຏ຺ຐ ປານານິ ວຸຕ຺ຕານິ ຠຄວຕາ – ອມ຺ພປານໍ, ຊມ຺ພຸປານໍ, ໂຈຈປານໍ, ໂມຈປານໍ, ມຘຸກປານໍ, ມຸທ຺ທິກປານໍ, ສາລຸກປານໍ, ຜາຣຸສກປານໍ, ເຕນ ວຕ ເຣ ວຕ຺ຕພ຺ເພ – ‘‘ສງ຺ໂຆ ຠຸຎ຺ຊຕິ ປິວຕິ ຂາທຕິ ສາຍຕີ’’ຕິ.

໗໙໖. ສງ຺ໂຆ ຠຸຎ຺ຊຕິ ປິວຕິ ຂາທຕິ ສາຍຕີຕິ? ອາມນ຺ຕາ. ມຄ຺ໂຄ ຠຸຎ຺ຊຕິ ປິວຕິ ຂາທຕິ ສາຍຕິ, ຜລໍ ຠຸຎ຺ຊຕິ ປິວຕິ ຂາທຕິ ສາຍຕີຕິ? ນ ເຫວໍ ວຕ຺ຕພ຺ເພ…ເປ….

ນ ວຕ຺ຕພ຺ພໍ ສງ຺ໂຆ ຠຸຎ຺ຊຕີຕິກຖາ ນິຏ຺ຐິຕາ.