໑໗. ສຕ຺ຕຣສມວຄ຺ໂຄ

(໑໗໑) ໖. ນ ວຕ຺ຕພ຺ພໍ ສງ຺ໂຆ ທກ຺ຂິຓໍ ປຏິຄ຺ຄຓ຺ຫາຕິກຖາ

໗໙໑. ນ ວຕ຺ຕພ຺ພໍ – ‘‘ສງ຺ໂຆ ທກ຺ຂິຓໍ ປຏິຄ຺ຄຓ຺ຫາຕີ’’ຕິ? ອາມນ຺ຕາ. ນນຸ ສງ຺ໂຆ ອາຫຸເນຍ຺ໂຍ ປາຫຸເນຍ຺ໂຍ ທກ຺ຂິເຓຍ຺ໂຍ ອຎ຺ຊລິກຣຓີໂຍ ອນຸຕ຺ຕຣໍ ປຸຎ຺ຎກ຺ເຂຕ຺ຕໍ ໂລກສ຺ສາຕິ? ອາມນ຺ຕາ. ຫຎ຺ຈິ ສງ຺ໂຆ ອາຫຸເນຍ຺ໂຍ ປາຫຸເນຍ຺ໂຍ ທກ຺ຂິເຓຍ຺ໂຍ ອຎ຺ຊລິກຣຓີໂຍ ອນຸຕ຺ຕຣໍ ປຸຎ຺ຎກ຺ເຂຕ຺ຕໍ ໂລກສ຺ສ, ເຕນ ວຕ ເຣ ວຕ຺ຕພ຺ເພ – ‘‘ສງ຺ໂຆ ທກ຺ຂິຓໍ ປຏິຄ຺ຄຓ຺ຫາຕີ’’ຕິ.

ນ ວຕ຺ຕພ຺ພໍ – ‘‘ສງ຺ໂຆ ທກ຺ຂິຓໍ ປຏິຄ຺ຄຓ຺ຫາຕີ’’ຕິ? ອາມນ຺ຕາ. ນນຸ ຈຕ຺ຕາໂຣ ປຸຣິສຍຸຄາ ອຏ຺ຐປຸຣິສປຸຄ຺ຄລາ ທກ຺ຂິເຓຍ຺ຍາ ວຸຕ຺ຕາ ຠຄວຕາຕິ? ອາມນ຺ຕາ. ຫຎ຺ຈິ ຈຕ຺ຕາໂຣ ປຸຣິສຍຸຄາ ອຏ຺ຐ ປຸຣິສປຸຄ຺ຄລາ ທກ຺ຂິເຓຍ຺ຍາ ວຸຕ຺ຕາ ຠຄວຕາ, ເຕນ ວຕ ເຣ ວຕ຺ຕພ຺ເພ – ‘‘ສງ຺ໂຆ ທກ຺ຂິຓໍ ປຏິຄ຺ຄຓ຺ຫາຕີ’’ຕິ.

ນ ວຕ຺ຕພ຺ພໍ – ‘‘ສງ຺ໂຆ ທກ຺ຂິຓໍ ປຏິຄ຺ຄຓ຺ຫາຕີ’’ຕິ? ອາມນ຺ຕາ. ນນຸ ອຕ຺ຖິ ເກຈິ ສງ຺ຆສ຺ສ ທານໍ ເທນ຺ຕີຕິ? ອາມນ຺ຕາ. ຫຎ຺ຈິ ອຕ຺ຖິ ເກຈິ ສງ຺ຆສ຺ສ ທານໍ ເທນ຺ຕິ, ເຕນ ວຕ ເຣ ວຕ຺ຕພ຺ເພ – ‘‘ສງ຺ໂຆ ທກ຺ຂິຓໍ ປຏິຄ຺ຄຓ຺ຫາຕີ’’ຕິ. ນນຸ ອຕ຺ຖິ ເກຈິ ສງ຺ຆສ຺ສ ຈີວຣໍ ເທນ຺ຕິ…ເປ… ປິຓ຺ຑປາຕໍ ເທນ຺ຕິ… ເສນາສນໍ ເທນ຺ຕິ… ຄິລານປຈ຺ຈຍເຠສຊ຺ຊປຣິກ຺ຂາຣໍ ເທນ຺ຕິ… ຂາທນີຍໍ ເທນ຺ຕິ… ໂຠຊນີຍໍ ເທນ຺ຕິ…ເປ… ປານີຍໍ ເທນ຺ຕີຕິ? ອາມນ຺ຕາ. ຫຎ຺ຈິ ອຕ຺ຖິ ເກຈິ ສງ຺ຆສ຺ສ ປານີຍໍ ເທນ຺ຕິ, ເຕນ ວຕ ເຣ ວຕ຺ຕພ຺ເພ – ‘‘ສງ຺ໂຆ ທກ຺ຂິຓໍ ປຏິຄ຺ຄຓ຺ຫາຕີ’’ຕິ.

ນ ວຕ຺ຕພ຺ພໍ – ‘‘ສງ຺ໂຆ ທກ຺ຂິຓໍ ປຏິຄ຺ຄຓ຺ຫາຕີ’’ຕິ? ອາມນ຺ຕາ. ນນຸ ວຸຕ຺ຕໍ ຠຄວຕາ –

‘‘ອາຫຸຕິໍ ຊາຕເວໂທວ, ມຫາເມຆໍວ ເມທນີ;

ສງ຺ໂຆ ສມາຘິສມ຺ປນ຺ໂນ, ປຏິຄ຺ຄຓ຺ຫາຕິ ທກ຺ຂິຓ’’ນ຺ຕິ.

ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ເຕນ ຫິ ສງ຺ໂຆ ທກ຺ຂິຓໍ ປຏິຄ຺ຄຓ຺ຫາຕີຕິ.

໗໙໒. ສງ຺ໂຆ ທກ຺ຂິຓໍ ປຏິຄ຺ຄຓ຺ຫາຕີຕິ? ອາມນ຺ຕາ. ມຄ຺ໂຄ ປຏິຄ຺ຄຓ຺ຫາຕິ, ຜລໍ ປຏິຄ຺ຄຓ຺ຫາຕີຕິ? ນ ເຫວໍ ວຕ຺ຕພ຺ເພ…ເປ….

ນ ວຕ຺ຕພ຺ພໍ ສງ຺ໂຆ ທກ຺ຂິຓໍ ປຏິຄ຺ຄຓ຺ຫາຕີຕິກຖາ ນິຏ຺ຐິຕາ.