໕. ຈາຄານຸສ຺ສຕິກຖາວຓ຺ຓນາ

໑໖໐. ປກຕິຍາຕິ ສຠາເວນ. ຈາຄາຘິມຸຕ຺ເຕນາຕິ ເທຍ຺ຍຘມ຺ມປຣິຈ຺ຈາເຄ ຍຸຕ຺ຕປ຺ປຍຸຕ຺ເຕນ ຕນ຺ນິນ຺ເນນ ຕປ຺ໂປເຓນ. ນິຈ຺ຈໍ ສທາ ປວຕ຺ຕາ ທານສໍວິຠາຄາ ຍສ຺ສ ໂສ ນິຈ຺ຈປວຕ຺ຕທານສໍວິຠາໂຄ, ເຕນ. ອິຘາປິ ‘‘ປກຕິຍາ’’ຕິ ອາເນຕ຺ວາ ສມ຺ພນ຺ຘິຕພ຺ພໍ. ຍໍ ປຣສ຺ສ ປຏິຍຕ຺ຕໍ ທິຍ຺ຍຕິ, ຕໍ ທານໍ. ຍໍ ອຕ຺ຕນາ ປຣິຠຸຎ຺ຊິຕພ຺ພໂຕ ສໍວິຠຊຕິ, ໂສ ສໍວິຠາໂຄ. ອິໂຕ ທານິ ປຠຸຕີຕິ ອິໂຕ ປຏ຺ຐາຍ ທານິ ອຊ຺ຊຕຄ຺ເຄ ອຊ຺ຊທິວສໍ ອາທິໍ ກຕ຺ວາ. ອທຕ຺ວາ ນ ຠຸຎ຺ຊິສ຺ສາມີຕິ ທານສມາທານໍ ກຕ຺ວາ. ຕໍທິວສນ຺ຕິ ຕສ຺ມິໍ ຠາວນາຣມ຺ຠທິວເສ. ຕຕ຺ຖ ນິມິຕ຺ຕໍ ຄຓ຺ຫິຕ຺ວາຕິ ຕສ຺ມິໍ ທາເນ ປຣິຈ຺ຈາຄເຈຕນາຍ ປວຕ຺ຕິອາກາຣສ຺ສ ສລ຺ລກ຺ຂຓວເສນ ນິມິຕ຺ຕໍ ຄເຫຕ຺ວາ. ວິຄຕມລມຈ຺ເຉຣຕາທິຄຸຓວເສນາຕິ ວິຄຕານິ ມລມຈ຺ເຉຣານິ ເອຕສ຺ມາຕິ ວິຄຕມລມຈ຺ເຉໂຣ, ຈາໂຄ, ຕສ຺ສ ຠາໂວ ວິຄຕມລມຈ຺ເຉຣຕາ. ຕທາທີນໍ ຄຸຓານໍ, ສມ຺ປຕ຺ຕີນໍ, ອານິສໍສານໍ ວາ ວເສນ.

ສຕໍ ຘມ຺ມໍ ອນຸກ຺ກມນ຺ຕິ ສາຘູນໍ ໂພຘິສຕ຺ຕານໍ ຘມ຺ມໍ ປເວຓິໍ ອນຸ ອນຸ ກມນ຺ໂຕ ໂອກ຺ກມນ຺ໂຕ, ອໂວກ຺ກມນ຺ໂຕ ວາ. ເຍ ອິເມ ທາຍກສ຺ສ ລາຠາ ອາຍຸວຓ຺ຓສຸຂພລປຏິຠານາທໂຍ, ປິຍຠາວາທໂຍ ຈ ຠຄວຕາ ສໍວຓ຺ຓິຕາ ປກິຕ຺ຕິຕາ. ມນຸສ຺ສຕ຺ຕໍ ວາຕິ ວາ-ສທ຺ໂທ ອວຸຕ຺ຕວິກປ຺ປຕ຺ໂຖ, ເຕນ ອິນ຺ທ຺ຣິຍປາຏວຠາວກມ຺ມສ຺ສກຕາຎາຓາທີນໍ ສງ຺ຄໂຫ ທຏ຺ຐພ຺ໂພ.

ມຈ຺ເຉຣມເລນາຕິ ມຈ຺ເຉຣສງ຺ຂາເຕນ ມເລນ. ອຖ ວາ ມຈ຺ເຉຣຎ຺ຈ ມລຎ຺ຈ ມຈ຺ເຉຣມລໍ, ເຕນ ມຈ຺ເຉເຣນ ເຈວ ໂລຠາທິມເລນ ຈາຕິ ອຕ຺ໂຖ. ປຊາຍນວເສນາຕິ ຍຖາສກໍ ກມ຺ມນິພ຺ພຕ຺ຕນວເສນ. ກຓ຺ຫຘມ຺ມານນ຺ຕິ ໂລຠາທິເອກນ຺ຕກາຬການໍ ປາປຘມ຺ມານໍ. ວິຄຕຕ຺ຕາຕິ ປຫີນຕ຺ຕາ. ວິຄຕມລມຈ຺ເຉເຣນ ເຈຕສາຕິ ອິຕ຺ຖມ຺ຠູຕລກ຺ຂເຓ ກຣຓວຈນໍ. ໂສຕາປນ຺ນສ຺ສ ສໂຕຕິ ເຄຫໍ ອາວສນ຺ຕສ຺ສ ໂສຕາປນ຺ນສ຺ສ ສມານສ຺ສ. ນິສ຺ສຍວິຫາຣນ຺ຕິ ນິສ຺ສາຍ ວິຫຣິຕພ຺ພວິຫາຣໍ, ເທວສິກໍ ວຬຎ຺ຊນກກມ຺ມຏ຺ຐານນ຺ຕິ ອຕ຺ໂຖ. ອຠິຠວິຕ຺ວາຕິ ອຄາຣໍ ອາວສນ຺ຕານໍ ອຎ຺ເຎສໍ ອຸປ຺ປຊ຺ຊນກຣາຄາທິອຸປກ຺ກິເລເສ ອຠິຠຸຍ຺ຍ.

ໂຍ ກິຎ຺ຈິ ເທນ຺ໂຕປິ ສາເປກ຺ໂຂວ ເທຕິ, ໂສ ມຸຕ຺ຕຈາໂຄ ນ ໂຫຕິ, ອຍໍ ປນ ນ ເອວນ຺ຕິ ‘‘ມຸຕ຺ຕຈາໂຄ’’ຕິ ວຸຕ຺ຕໍ. ວິສ຺ສຏ຺ຐຈາໂຄຕິ ນິຣເປກ຺ຂປຣິຈ຺ຈາໂຄຕິ ອຕ຺ໂຖ. ຍຖາ ປາຓາຕິປາຕພຫຸໂລ ປຸຄ຺ຄໂລ ‘‘ໂລຫິຕປາຓີ’’ຕິ ວຸຈ຺ຈຕິ, ເອວໍ ທານພຫຸໂລ ປຸຄ຺ຄໂລ ‘‘ປຍຕປາຓີ’’ຕິ ວຸຕ຺ໂຕຕິ ທສ຺ເສນ຺ໂຕ ‘‘ທາຕຸໍ ສທາ ໂຘຕຫຕ຺ໂຖເຍວາ’’ຕິ ອາຫ. ຕຕ຺ຖ ສທາຕິ ນິຈ຺ຈໍ, ອຠິຓ຺ຫນ຺ຕິ ອຕ຺ໂຖ. ປຣິຈ຺ຈາໂຄຕິ ເທຍ຺ຍຘມ຺ມປຣິຈ຺ຈາໂຄຕິ ອຘິກາຣໂຕ ວິຎ຺ຎາຍຕິ. ຍໍ ຍໍ ເທຍ຺ຍຘມ຺ມໍ ປເຣ ຍາຈນກາ. ຍາຈເນ ໂຍໂຄ ຍາຈນໂຍໂຄ, ປເຣຫິ ຍາຈິຕຸໍ ຍຸຕ຺ໂຕຕິ ອຕ຺ໂຖ. ຍາເຊນ ຍຸຕ຺ໂຕຕິ ທາເນນ ຍຸຕ຺ໂຕ ສທາ ປຣິຈ຺ຈຊນໂຕ. ອຸຠເຍຕິ ຍຖາວຸຕ຺ເຕ ທາເນ, ສໍວິຠາເຄ ຈ ຣໂຕ ອຠິຣໂຕ.

໑໖໑. ຍຖາ ປຣິສຸທ຺ຘສີລສ຺ສ ປຸຄ຺ຄລສ຺ສ ອຂຓ຺ຑຕາທິຄຸຓວເສນ ອຕ຺ຕໂນ ສີລສ຺ສ ອນຸສ຺ສຣນ຺ຕສ຺ສ ສີລານຸສ຺ສຕິຠາວນາ ອິຊ຺ຌຕິ, ເອວໍ ປຣິສຸທ຺ຘອຸຬາຣປຣິຈ຺ຈາຄສ຺ສ ປຸຄ຺ຄລສ຺ສ ອນຸປກ຺ກິລິຏ຺ຐເມວ ອຕ຺ຕໂນ ປຣິຈ຺ຈາຄໍ ອນຸສ຺ສຣນ຺ຕສ຺ສ ຠາວນາ ອິຊ຺ຌຕີຕິ ທສ຺ເສຕຸໍ ‘‘ວິຄຕມລມຈ຺ເຉຣຕາທິຄຸຓວເສນາ’’ຕິອາທິ ວຸຕ຺ຕໍ, ຕໍ ວຸຕ຺ຕຕ຺ຖເມວ.

ຠິຍ຺ໂຍໂສຕິ ອຸປຣິປິ. ມຕ຺ຕາຍ ປມາຓສ຺ສ ມຫຕິຍາ ມຕ຺ຕາຍ, ວິປຸເລນ ປມາເຓນາຕິ ອຕ຺ໂຖ. ຈາຄາຘິມຸຕ຺ໂຕຕິ ປຣິຈ຺ຈາເຄ ອຘິມຸຕ຺ໂຕ ນິນ຺ນໂປຓປພ຺ຠາໂຣ. ຕໂຕ ເອວ ອໂລຠຊ຺ຌາສໂຍ ກຕ຺ຖຈິປິ ອນຠິສງ຺ຄຈິຕ຺ໂຕ. ປຏິຄ຺ຄາຫເກສຸ ເມຕ຺ຕາຍນວເສນ ປຣິຈ຺ຈາໂຄ ໂຫຕີຕິ ເມຕ຺ຕາຍ ເມຕ຺ຕາຠາວນາຍ ອນຸໂລມກາຣີ ອນຸຣູປປຏິປຕ຺ຕິ. ວິສາຣໂທຕິ ວິສໂທ ອຕ຺ຕໂນວ ຄຸເຓນ ກຕ຺ຖຈິປິ ອມງ຺ກຸຠູໂຕ ອຠິຠຸຍ຺ຍ ວິຫາຣີ. ເສສໍ ສຸວິຎ຺ເຎຍ຺ຍເມວ.