໕. ເສສກສິຓນິທ຺ເທສວຓ຺ຓນາ

ອາໂປກສິຓກຖາວຓ຺ຓນາ

໙໑. ຍຖາວິຕ຺ຖາຣິຕສ຺ສ ອຕ຺ຖສ຺ສ ອຕິເທໂສປິ ວິຕ຺ຖາຣຏ຺ຐາເນເຍວ ຕິຏ຺ຐຕີຕິ ອາຫ ‘‘ວິຕ຺ຖາຣກຖາ ໂຫຕີ’’ຕິ. ອາໂປກສິຓນ຺ຕິ ອາໂປກສິຓຊ຺ຌານໍ, ອາໂປກສິຓກມ຺ມຏ຺ຐານໍ ວາ. ສພ຺ພໍ ວິຕ຺ຖາເຣຕພ຺ພນ຺ຕິ ປຖວີກສິຓກມ຺ມຏ຺ຐາເນ ວຸຕ຺ຕນເຍນ ວິຕ຺ຖາເຣຕພ຺ພໍ. ເອຕ຺ຕກມ຺ປີຕິ ‘‘ກເຕ ວາ ອກເຕ ວາຕິ ສພ຺ພໍ ວິຕ຺ຖາເຣຕພ຺ພ’’ນ຺ຕິ ເອຕ຺ຕກມ຺ປິ ອວຕ຺ວາ. ສາມຸທ຺ທິເກນ ໂລຓຸທເກນ ຠຣິໂຕ ຊລາສໂຍ ໂລຓີ. ນີລາທິວຓ຺ຓສງ຺ກຣປຣິຫຣຓຕ຺ຖໍ ‘‘ສຸທ຺ຘວຕ຺ເຖນ ຄຫິຕ’’ນ຺ຕິ ວຸຕ຺ຕໍ. ອຎ຺ຎນ຺ຕິ ຠູມິໍ ສມ຺ປຕ຺ຕໍ. ຕຖາຣູປນ຺ຕິ ຍາທິສໍ ອາກາສຊໍ ອຸທກໍ, ຕາທິສໍ. ເຕນາຫ ‘‘ວິປ຺ປສນ຺ນໍ ອນາວິລ’’ນ຺ຕິ, ຍໍ ປນ ອຸທກນ຺ຕິ ສມ຺ພນ຺ໂຘ. ‘‘ນ ວຓ຺ໂຓ ປຈ຺ຈເວກ຺ຂິຕພ຺ໂພ’’ຕິອາທີສຸ ຍໍ ວຕ຺ຕພ຺ພໍ, ຕໍ ປຖວີກສິຓກຖາຍໍ ວຸຕ຺ຕເມວ. ລກ຺ຂຓໍ ປນ ອິຘ ປຄ຺ຆຣຓລກ຺ຂຓໍ ເວທິຕພ຺ພໍ.

ວຸຕ຺ຕນເຍເນວາຕິ ປຖວີກສິຓຠາວນາຍໍ ວຸຕ຺ຕນເຍເນວ. ຕຣງ຺ຄຸຏ຺ຐານາທິ, ເຜຓມິສ຺ສຕາທິ ຈ ອິຘ ກສິຓໂທໂສ. ໂສຕິ ໂຍຄາວຈໂຣ. ຕສ຺ສາຕິ ປຏິຠາຄນິມິຕ຺ຕສ຺ສ.

ເຕໂຊກສິຓກຖາວຓ຺ຓນາ

໙໒. ສິນິທ຺ຘານິ ສິເນຫວນ຺ຕານິ. ສາຣທາຣູນິ ນ ເຜຄ຺ຄຸທາຣູນິ. ຊາລາຍ ຈິຣຏ຺ຐິຕຕ຺ຖໍ ສິນິທ຺ຘສາຣທາຣຸຄ຺ຄຫຓໍ. ຆຏິກໍ ຆຏິກໍ ກຕ຺ວາຕິ ຂນ຺ຘໂສ ກຣິຕ຺ວາ. ອາລິມ຺ເປຕ຺ວາຕິ ຊາເລຕ຺ວາ. ຆນຊາລາຍາຕິ ອວິຣຬວເສນ ປວຕ຺ຕອຄ຺ຄິຊາລາຍໍ.

ປຕນສທິສນ຺ຕິ ປຕມານສທິສໍ. ອກເຕ ຄຓ຺ຫນ຺ຕສ຺ສາຕິ ວຸຕ຺ຕນເຍນ ຍຖາ ກສິຓມຓ຺ຑລໍ ປຎ຺ຎາຍຕິ, ເອວໍ ອນຠິສງ຺ຂເຕ ເກວເລ ເຕຊສ຺ມິໍ ນິມິຕ຺ຕໍ ຄຓ຺ຫນ຺ຕສ຺ສ.

ວາໂຍກສິຓກຖາວຓ຺ຓນາ

໙໓. ວຸຕ຺ຕຎ຺ເຫຕນ຺ຕິ ເອຕ຺ຖ ຫິ-ສທ຺ໂທ ເຫຕຸອຕ຺ໂຖ, ຍສ຺ມາຕິ ອຕ຺ໂຖ. ຕສ຺ສ ‘‘ຕສ຺ມາ’’ຕິ ອິມິນາ ສມ຺ພນ຺ໂຘ. ອຸຈ຺ຉຄ຺ຄນ຺ຕິ ອຸຈ຺ຉຸເຂຕ຺ເຕ ຍຖາຐິຕານໍ ອຄ຺ຄໍ. ເອຣິຕນ຺ຕິ ວາເຕນ ຈລິຕໍ. ສເມຣິຕນ຺ຕິ ສພ຺ພໂສ ຈລິຕໍ. ຕສ຺ມາຕິ ຍສ຺ມາ ‘‘ວາໂຍກສິຓໍ…ເປ… ອຸປລກ຺ເຂຕີ’’ຕິ ເອວໍ ວຸຕ຺ຕໍ ອຏ຺ຐກຖາຍໍ, ຕສ຺ມາ. ສມສີສຏ຺ຐິຕນ຺ຕິ ອຸປຣິ ປຕ຺ຕານໍ ວເສນ ສມສີສໍ ຫຸຕ຺ວາ ຐິຕໍ. ເວຬຸໍ ວາ ຣຸກ຺ຂໍ ວາຕິ ເອຕ຺ຖາປິ ‘‘ສມສີສໍ ຐິຕໍ ຆນປຕ຺ຕເວຬຸໍ ວາ ຆນປຕ຺ຕຣຸກ຺ຂໍ ວາ’’ຕິ ອາເນຕ຺ວາ ໂຍເຊຕພ຺ພໍ. ເອກງ຺ຄຸລາທິປ຺ປມາເຓສຸ ເກເສສຸ ຣສ຺ສຠາວໂຕ, ທີຆຕເຣສຸ ໂອລມ຺ພນໂຕ, ວິຣເຬສຸ ອນຸປ຺ປເວສໂຕ ວາຕປ຺ປຫາໂຣ ນ ປຎ຺ຎາຍຕີຕິ ຈຕຸຣງ຺ຄຸລປ຺ປມາຓຄ຺ຄຫຓໍ, ຆນຄ຺ຄຫຓຎ຺ຈ ກຕໍ. ເອຕສ຺ມິໍ ຐາເນ ປຫຣຕີຕິ ສຕິໍ ຐເປຕ຺ວາຕິ ອຸຈ຺ຉຄ຺ຄາທີນໍ ປຈລນາກາຣຄ຺ຄຫຓມຸເຂນ ເຕສໍ ປຫາຣເກ ວາຕສງ຺ຆາເຕ ສຕິໍ ອຸປຏ຺ຐເປຕ຺ວາ. ຕຕ຺ຖ ສຕິໍ ຐເປຕ຺ວາຕິ ຕສ຺ມິໍ ກາຍປເທສສ຺ສ ສງ຺ຆຏ຺ຏນວເສນ ປວຕ຺ເຕ ວາຍຸປິຓ຺ເຑ ສງ຺ຆຏ຺ຏນາກາຣຄ຺ຄຫຓມຸເຂນ ສຕິໍ ອຸປຏ຺ຐເປຕ຺ວາ. ‘‘ອຸສຸມວຏ຺ຏິສທິສ’’ນ຺ຕິ ເອເຕນ ປຸຣິມກສິຓສ຺ສ ວິຍ ອິມສ຺ສາປິ ນິມິຕ຺ຕສ຺ສ ສໍວິຄ຺ຄຫຕໍ ທສ຺ເສຕິ. ‘‘ນິຈ຺ຈລ’’ນ຺ຕິ ອິມິນາ ນິຈ຺ຈລຠາໂວເຍວ ອຸຄ຺ຄຫນິມິຕ຺ຕໂຕ ອິມສ຺ສ ວິເສໂສຕິ ປຏິຠາຄນິມິຕ຺ຕສ຺ສາປິ ອຸສຸມວຏ຺ຏິສທິສຕາວ ວິຠາວິຕາ ໂຫຕິ.

ນີລກສິຓກຖາວຓ຺ຓນາ

໙໔. ອຎ຺ຊນຣາຊິວຏ຺ຏາທິ ວຓ຺ຓຘາຕຸຍາ ວາ. ຕຖາຣູປໍ ມາລາຄຈ຺ຉນ຺ຕິ ອວິຣຬວິກສິຕນີລວຓ຺ຓປຸປ຺ຜສຎ຺ຉນ຺ນໍ ປຸປ຺ຜຄຈ຺ຉໍ. ອິຕເຣນາຕິ ອກຕາຘິກາເຣນ. ຄິຣິກຓ຺ຓິກຄ຺ຄຫເນນ ນີລໍ ຄິຣິກຓ຺ຓິກມາຫ. ກຣຓ຺ຑປຏລໍ ສມຸຄ຺ຄປິຘານໍ. ປຕ຺ເຕຫິເຍວາຕິ ນີລຸປ຺ປລາທີນໍ ເກສຣວຓ຺ຏານິ ອປເນຕ຺ວາ ເກວເລຫິ ປຕ຺ເຕຫິເຍວ. ປູເຣຕພ຺ພນ຺ຕິ ນີລວຓ຺ຓໍ ວຕ຺ຖໍ ຄເຫຕ຺ວາ ຠຓ຺ຑິກໍ ວິຍ ພນ຺ຘິຕ຺ວາ ຍຖາ ນີລມຓ຺ຑລໍ ຫຸຕ຺ວາ ປຎ຺ຎາຍຕິ, ຕຖາ ຈງ຺ໂກຏກໍ ວາ ກຣຓ຺ຑປຏລໍ ວາ ປູເຣຕພ຺ພໍ. ມຸຂວຏ຺ຏິຍໍ ວາ ອສ຺ສາຕິ ອສ຺ສ ຈງ຺ໂກຏກສ຺ສ, ກຣຓ຺ຑປຏລສ຺ສ ວາ ມຸຂວຏ຺ຏິຍໍ ພນ຺ຘິຕພ຺ພໍ. ມຓິຕາລວຓ຺ຏໍ ອິນ຺ທນີລມຓິມຍໍ ຕາລວຓ຺ຏໍ.

ປີຕກສິຓກຖາວຓ຺ຓນາ

໙໕. ປີຕກສິເຓ ມາລາຄຈ຺ຉນ຺ຕິ ອິກ຺ກຏາທິມາລາຄຈ຺ຉໍ. ຫຣິຕາລໍ, ມໂນສິລາ ວາ ຘາຕຸ. ປຕ຺ຕງ຺ຄປຸປ຺ເຜຫີຕິ ປຕ຺ຕງ຺ຄນາມິກາ ປີຕວຓ຺ຓປຸປ຺ຜາ ເອກາ ຄຈ຺ຉຊາຕິ, ຕສ຺ສ ປຸປ຺ເຜຫິ. ອາສນປູຊນ຺ຕິ ເຈຕິຍງ຺ຄເຓ ກຕໍ ອາສນປູຊໍ. ກຓິກາຣປຸປ຺ຜາທິນາຕິ ອາທິ-ສທ຺ເທນ ອາກຸລິກິງ຺ກິຣາຕປຸປ຺ຜາທີນໍ ສງ຺ຄໂຫ ທຏ຺ຐພ຺ໂພ.

ໂລຫິຕກສິຓກຖາວຓ຺ຓນາ

໙໖. ໂລຫິຕມຓິ ໂລຫິຕງ຺ຄມຓິອາທິ. ໂລຫິຕຘາຕຸ ເຄຣຸກຊາຕິຫິງ຺ຄຸລິກາທິ.

ໂອທາຕກສິຓກຖາວຓ຺ຓນາ

໙໗. ໂອທາຕກສິເຓ ມາລາຄຈ຺ຉນ຺ຕິ ນນ຺ທິຍາວຕ຺ຕາທິມາລາຄຈ຺ຉໍ. ຘາຕຸ ກກ຺ກຏິມຸຕ຺ຕເສຕິກາທິ.

ອາໂລກກສິຓກຖາວຓ຺ຓນາ

໙໘. ຕຖາ ອສກ຺ໂກນ຺ເຕນາຕິ ຍຖາ ສູຣິຍາໂລກາທິວເສນ ໂອຠາສນິມິຕ຺ຕຸປ຺ປາທນໍ ວຸຕ຺ຕໍ, ຕສ຺ສ ໂອຠາສມຓ຺ຑລສ຺ສ ນ ຈິຣຏ຺ຐິຕິຕາຍ ຕຖາ ນິມິຕ຺ຕຸປ຺ປາທນໍ ກາຕຸໍ ອສກ຺ໂກນ຺ເຕນ. ຆຏມຸເຂນ ນິຄ຺ຄຈ຺ຉນກໂອຠາສສ຺ສ ມຫນ຺ຕຠາວໂຕ ‘‘ຆຏມຸຂໍ ປິທຫິຕ຺ວາ’’ຕິ ວຸຕ຺ຕໍ. ຠິຕ຺ຕິມຸຂນ຺ຕິ ຠິຕ຺ຕິອຠິມຸຂໍ. ອຸຏ຺ຐິຕມຓ຺ຑລສທິສນ຺ຕິ ຠິຕ຺ຕິອາທີສຸ ອຸຏ຺ຐິຕປາກຕິກອາໂລກມຓ຺ຑລສທິສໍ. ຆນວິປ຺ປສນ຺ນໍ ອາໂລກປຸຎ຺ຊສທິສນ຺ຕິ ຠຄວໂຕ ພ຺ຍາມປ຺ປຠາ ວິຍ ພຫໂລ, ວິປ຺ປສນ຺ໂນ ຈ ຫຸຕ຺ວາ ປຸຎ຺ຊຠູໂຕ ອາໂລໂກ ອຕ຺ຖິ ເຈ, ຕໍສທິໂສຕິ ອຕ຺ໂຖ.

ປຣິຈ຺ຉິນ຺ນາກາສກສິຓກຖາວຓ຺ຓນາ

໙໙. ຉິທ຺ທສທິສເມວ ໂຫຕີຕິ ເຍຫິ ຠິຕ຺ຕິປຣິຍນ຺ຕາທີຫິ ປຣິຈ຺ຉິນ຺ນໍ, ຕໍ ຉິທ຺ທໍ, ຕໍສທິສໍ, ເຕນວາກາເຣນ ອຸຄ຺ຄຫນິມິຕ຺ຕໍ ອຸປຏ຺ຐາຕີຕິ ອຕ຺ໂຖ. ‘‘ວຑ຺ຒິຍມານມ຺ປິ ນ ວຑ຺ຒຕີ’’ຕິ ອຸຄ຺ຄຫນິມິຕ຺ຕສ຺ສ ອວຑ຺ຒນີຍຕໍ ທສ຺ເສຕຸໍ ວຸຕ຺ຕໍ. ສພ຺ພມ຺ປິ ຫິ ອຸຄ຺ຄຫນິມິຕ຺ຕໍ ວຑ຺ຒິຍມານໍ ນ ວຑ຺ຒຕິເຍວ. ສຕິປິ ຈ ວຑ຺ເຒຕຸກາມຕາຍໍ ວຑ຺ຒນາ ນ ສມ຺ຠວຕິ ຠາວນາຍ ປຣິທຸພ຺ພລຕ຺ຕາ. ຠາວນາວເສນ ຫິ ນິມິຕ຺ຕວຑ຺ຒນາ. ປຏິຠາຄນິມິຕ຺ຕໍ ປນ ຕສ຺ມິໍ ອຸປ຺ປນ຺ເນ ຠາວນາ ຖິຣາຕິ ກຕ຺ວາ ‘‘ວຑ຺ຒິຍມານໍ ວຑ຺ຒຕີ’’ຕິ ວຸຕ຺ຕໍ.

ກິຎ຺ຈາປິ ປາຬິຍໍ ‘‘ປຖວີກສິຓາທີນິ ຣູປຌານາຣມ຺ມຓານິ ອຏ຺ເຐວ ກສິຓານິ ສຣູປໂຕ ອາຄຕານິ, ໂອທາຕກສິເຓ ປນ ອາໂລກກສິຓໍ, ອາກາສກສິເຓ ຈ ປຣິຈ຺ຉິນ຺ນາກາສກສິຓໍ ອນ຺ໂຕຄຘໍ ກຕ຺ວາ ເທສນາ ກຕາ’’ຕິ ອຘິປ຺ປາເຍນາຫ ‘‘ອິຕິ ກສິຓານິ ທສພໂລ, ທສ ຍານິ ອໂວຈາ’’ຕິ. ປກິຓ຺ຓກກຖາປິ ວິຎ຺ເຎຍ຺ຍາຕິ ປຸພ຺ເພ ວິຍ ອສາຘາຣຓໍ ຕສ຺ມິໍ ຕສ຺ມິໍ ກສິເຓ ປຏິນິຍຕເມວ ອຕ຺ຖໍ ອຄ຺ຄເຫຕ຺ວາ ອສາຘາຣຓໂຕ, ສາຘາຣຓໂຕ ຈ ຕຕ຺ຖ ຕຕ຺ຖ ປກິຓ຺ຓກໍ ວິສຏໍ ອຕ຺ຖໍ ຄເຫຕ຺ວາ ປວຕ຺ຕາ ປກິຓ຺ຓກກຖາປິ ວິຊານິຕພ຺ພາ.

ປກິຓ຺ຓກກຖາວຓ຺ຓນາ

໑໐໐. ອາທິຠາໂວຕິ ເອຕ຺ຖ ອາທິ-ສທ຺ເທນ ຍສ຺ສ ກສ຺ສຈິ ປຖວີປກ຺ຂິຍສ຺ສ ວຕ຺ຖຸໂນ ນິມ຺ມານາທິໍ ສງ຺ຄຓ຺ຫາຕິ. ຐານນິສຊ຺ຊາທິກປ຺ປນໍ ວາຕິ ເອຕ຺ຖາປິ ‘‘ອາກາເສ ວາ ອຸທເກ ວາ’’ຕິ ອາເນຕ຺ວາ ສມ຺ພນ຺ຘິຕພ຺ພໍ. ປຣິຕ຺ຕອປ຺ປມາຓນເຍນາຕິ ນີລາທິວຓ຺ຓໍ ອນາມສິຕ຺ວາ ປຣິຕ຺ຕອປ຺ປມາຓນເຍເນວ. ເອວມາທີນີຕິ ອາທິ-ສທ຺ເທນ ສຣີຣໂຕ ອຸທກຘາຣານິມ຺ມານາທິໍ ສງ຺ຄຓ຺ຫາຕິ.

ຍເທວ ໂສ ອິຈ຺ຉຕິ ຕສ຺ສ ຑຫນສມຕ຺ຖຕາຕິ ພຫູສຸ ກປ຺ປາສປິຈຸສາຣທາຣຸອາທີສຸ ເອກຊ຺ຌໍ ຣາສິຠູເຕສຸ ຐິເຕສຸ ຍໍ ຍເທວ ອິຈ຺ຉຕິ, ຕສ຺ສ ຕສ຺ເສວ ຑຫນສມຕ຺ຖຕາ. ອິຘ ອາທິ-ສທ຺ເທນ ອນ຺ຘກາຣວິຘມນາທິໍ ສງ຺ຄຓ຺ຫາຕິ.

ວາຍຸຄຕິຍາ ຄມນໍ ວາຍຸຄຕິຄມນໍ, ອຕິສີຆຄມນໍ. ອິຘ ອາທິ-ສທ຺ເທນ ຍທິຈ຺ຉິຕເທສນ຺ຕຣໍ ປາປຸຓນາທິໍ ສງ຺ຄຓ຺ຫາຕິ.

ສຸວຓ຺ຓນ຺ຕິ ອຘິມຸຈ຺ຈນາ ສຸວຓ຺ຓຠາວາຘິຏ຺ຐານໍ ເສຍ຺ຍຖາປິ ອາຍສ຺ມາ ປິລິນ຺ທວຈ຺ໂຉ (ປາຣາ. ໖໑໙-໖໒໐) ຕິຓຓ຺ຑຸປຄປາສາທາທີນໍ. ວຸຕ຺ຕນເຍນາຕິ ສຸວຓ຺ຓທຸພ຺ພຓ຺ຓນເຍນ.

ວຓ຺ຓກສິເຓສຸ ຕຕ຺ຖ ຕຕ຺ຖ ອາທິ-ສທ຺ເທນ ນີໂລຠາສນິມ຺ມານາທີນໍ ສງ຺ຄໂຫ ທຏ຺ຐພ຺ໂພ. ປຖວີປພ຺ພຕາທີຕິ ອາທິ-ສທ຺ເທນ ສມຸທ຺ທາທີນໍ ສງ຺ຄໂຫ ທຏ຺ຐພ຺ໂພ.

ສພ຺ພາເນວ ທສປິ ກສິຓານິ. ອິມໍ ປເຠທໍ ລຠນ຺ຕີຕິ ອິມໍ ວຑ຺ຒນາທິວິເສສໍ ປາປຸຓນ຺ຕິ. ເອໂກຕິ ເອກຈ຺ໂຈ. ສຎ຺ຊານາຕີຕິ ຠາວນາປຎ຺ຎາຍ ສຎ຺ຊານາຕິ. ອາທິ-ສທ຺ເທນ ‘‘ອາໂປກສິຓ’’ນ຺ຕິອາທິປາຬິໍ ສງ຺ຄຓ຺ຫາຕິ.

ອຸປຣິຄຄນຕລາຠິມຸຂໍ ‘‘ປຖວີກສິຓເມໂກ ສຎ຺ຊານາຕີ’’ຕິ ປາຬິປທານິ ອາເນຕ຺ວາ ສມ຺ພນ຺ຘິຕພ຺ພໍ. ຕຎ຺ຈ ໂຂ ວຑ຺ຒນວເສນ. ເຕນາຫ ‘‘ເອກຈ຺ໂຈ ຫິ ອຸທ຺ຘເມວ ກສິຓໍ ວຑ຺ເຒຕີ’’ຕິ. ເຫຏ຺ຐາຠູມິຕລາຠິມຸຂນ຺ຕິອາທີສຸປິ ເອເສວ ນໂຍ. ປຸພ຺ເພ ວຑ຺ຒນກາເລ ປໂຍຊນໍ ອນເປກ຺ຂິຕ຺ວາ ວຑ຺ເຒນ຺ຕານໍ ວເສນ ວຸຕ຺ຕຕ຺ຕາ ອິທານິ ‘‘ເຕນ ເຕນ ວາ ກາຣເຓນ ເອວໍ ປສາເຣຕີ’’ຕິ ອາຫ, ກສິຓໍ ວຑ຺ເຒຕີຕິ ອຕ຺ໂຖ. ຍຖາ ກິນ຺ຕິ ອາຫ ‘‘ອາໂລກມິວ ທິພ຺ພຈກ຺ຂຸນາ ຣູປທສ຺ສນກາໂມ’’ຕິ. ອຸທ຺ຘຎ຺ເຈ ຣູປໍ ທຏ຺ຐຸກາໂມ ອຸທ຺ຘໍ ອາໂລກໍ ປສາເຣຕິ, ອໂຘ ເຈ ຣູປໍ ທຏ຺ຐຸກາໂມ ອໂຘ ອາໂລກໍ ປສາເຣຕິ, ສມນ຺ຕໂຕ ເຈ ຣູປໍ ທຏ຺ຐຸກາໂມ ສມນ຺ຕໂຕ ອາໂລກໍ ປສາເຣຕິ, ເອວມຍໍ ກສິຓນ຺ຕິ ອຕ຺ໂຖ.

ເອກສ຺ສາຕິ ປຖວີກສິຓາທີສຸ ເອເກກສ຺ສ. ອຎ຺ຎຠາວານຸປຄມນຕ຺ຖນ຺ຕິ ອຎ຺ຎກສິຓຠາວານຸປຄມນທີປນຕ຺ຖໍ, ນ ອຎ຺ຎໍ ປຖວີອາທິ. ນ ຫິ ອຸທເກນ ຐິຕຏ຺ຐາເນ ສສມ຺ຠາຣປຖວີ ອຕ຺ຖິ. ອຎ຺ໂຎ ກສິຓສມ຺ເຠໂທຕິ ອາໂປກສິຓາທິນາ ສງ຺ກໂຣ. ສພ຺ພຕ຺ຖາຕິ ສພ຺ເພສຸ ອາໂປກສິຓາທີສຸ ເສສກສິເຓສຸ. ເອກເທເສ ອຏ຺ຐຕ຺ວາ ອນວເສເສນ ຜຣຓປ຺ປມາຓສ຺ສ ອຄ຺ຄຫຓໂຕ ຜຣຓໍ ອປ຺ປມາຓໍ. ເຕເນວ ຫິ ເນສໍ ກສິຓສມຎ຺ຎາ. ຕຖາ ຈາຫ ‘‘ຕຎ຺ຫີ’’ຕິອາທິ. ຕຕ຺ຖ ເຈຕສາ ຜຣນ຺ໂຕຕິ ຠາວນາຈິຕ຺ເຕນ ອາລມ຺ພນໍ ກໂຣນ຺ໂຕ. ຠາວນາຈິຕ຺ຕຎ຺ຫິ ກສິຓໍ ປຣິຕ຺ຕໍ ວາ ວິປຸລໍ ວາ ເອກກ຺ຂເຓ ສກລເມວ ມນສິ ກໂຣຕິ, ນ ເອກເທສນ຺ຕິ.

໑໐໑. ອານນ຺ຕຣິຍກມ຺ມສມງ຺ຄິໂນຕິ ປຎ຺ຈສຸ ອານນ຺ຕຣິຍກມ຺ເມສຸ ເຍນ ເກນຈິ ສມນ຺ນາຄຕາ. ນິຍຕມິຈ຺ຉາທິຏ຺ຐິກາຕິ ອເຫຕຸກທິຏ຺ຐິ ອກິຣິຍທິຏ຺ຐິ ນຕ຺ຖິກທິຏ຺ຐີຕິ ຕີສຸ ມິຈ຺ຉາທິຏ຺ຐີສຸ ຍາຍ ກາຍຈິ ນິຍຕາຍ ມິຈ຺ຉາທິຏ຺ຐິຍາ ສມນ຺ນາຄຕາ. ອຸຠໂຕພ຺ຍຎ຺ຊນກປຓ຺ຑກາຕິ ອຸຠໂຕພ຺ຍຎ຺ຊນກາ, ປຓ຺ຑກາ ຈ. ກາມຎ຺ເຈເຕ ອເຫຕຸກປຏິສນ຺ຘິກຕ຺ຕາ ວິປາກາວຣເຓນ ສມນ຺ນາຄຕາ ໂຫນ຺ຕິ, ຕຖາປິ ຕິພ຺ພກິເລສຕ຺ຕາ ກິເລສາວຣເຓນ ສມນ຺ນາຄຕາ ວຸຕ຺ຕາ. ອເຫຕຸກທ຺ວິເຫຕຸກປຏິສນ຺ຘິກາຕິ ອເຫຕຸກປຏິສນ຺ຘິກາ, ທ຺ວິເຫຕຸກປຏິສນ຺ຘິກາ ຈ. ທຸເຫຕຸກປຏິສນ຺ຘິການມ຺ປິ ຫິ ອຣິຍມຄ຺ຄປຏິເວໂຘ, ຌານປຏິລາໂຠ ຈ ນຕ຺ຖິ, ຕສ຺ມາ ເຕປິ ວິປາກາວຣເຓນ ສມນ຺ນາຄຕາ ເອວ.

ອປຈ຺ຈນີກປຏິປທາຍນ຺ຕິ ມຄ຺ຄສ຺ສ ອນຸໂລມປຏິປທາຍໍ ສຈ຺ຈານຸໂລມິກາຍໍ ວິປສ຺ສນາຍໍ. ອຈ຺ຉນ຺ທິກາຕິ ‘‘ກຕ຺ຕຸກມ຺ຍຕາຉນ຺ທຣຫິຕາ’’ຕິ ສມ຺ໂມຫວິໂນທນິຍໍ ວຸຕ຺ຕໍ, ຕມ຺ປິ ນິພ຺ພານາຘິຄມຕ຺ຖເມວ ກຕ຺ຕຸກມ຺ຍຕາຉນ຺ທໍ ສນ຺ຘາຍ ວຸຕ຺ຕນ຺ຕິ ທຏ຺ຐພ຺ພໍ. ອຸຕ຺ຕຣກຸຣຸກາປິ ມນຸສ຺ສາ ມາຣາທໂຍ ວິຍ ອຈ຺ຉນ຺ທິກຏ຺ຐານໍ ປວິຏ຺ຐາ ນິພ຺ພຸຕິຉນ຺ທຣຫິຕຕ຺ຕາ. ທຸປ຺ປຎ຺ຎາຕິ ຠວງ຺ຄປຎ຺ຎາຍ ປຣິຫີນາ. ‘‘ຠວງ຺ຄປຎ຺ຎາຍ ປຣິປຸຓ຺ຓາຍປິ ຍສ຺ສ ຠວງ຺ຄໍ ໂລກຸຕ຺ຕຣສ຺ສ ປາທກໍ ນ ໂຫຕິ, ໂສປິ ທຸປ຺ປຎ຺ໂຎເຍວາ’’ຕິ ສມ຺ໂມຫວິໂນທນິຍໍ ວຸຕ຺ຕໍ. ຍສ຺ມິໍ ຫິ ຠວງ຺ເຄ ວຕ຺ຕມາເນ ຕໍສນ຺ຕຕິຍໍ ໂລກຸຕ຺ຕຣໍ ນິພ຺ພຕ຺ຕຕິ, ຕໍ ຕສ຺ສ ປາທກໍ ນາມ ໂຫຕິ.

ກຸສເລສຸ ຘມ຺ເມສູຕິ ອນວຊ຺ຊຘມ຺ເມສຸ, ສຸຂວິປາກຘມ຺ເມສຸ ວາ. ໂອກ຺ກມິຕຸນ຺ຕິ ອຘິຄນ຺ຕຸໍ. ກສິເຓເຍວາຕິ ກສິຓກມ຺ມຏ຺ຐາເນເຍວ. ເອເຕສນ຺ຕິ ກມ຺ມາວຣຓສມນ຺ນາຄຕາທີນໍ. ຕສ຺ມາຕິ ຍສ຺ມາ ເອເຕ ວິປາກນ຺ຕຣາຍາທໂຍ ເອວໍ ອຕ຺ຖຊານິກຣາ, ອນຕ຺ຖເຫຕຸຠູຕາ ຈ, ຕສ຺ມາ. ຕິຓ຺ຓເມວ ເຈຕ຺ຖ ອນ຺ຕຣາຍານໍ ຄຫຓໍ ອິຕຣສ຺ສ ສປ຺ປຏິກາຣຕ຺ຕາ, ກມ຺ມນ຺ຕຣາຍປກ຺ຂິກຕ຺ຕາ ວາຕິ ທຏ຺ຐພ຺ພໍ. ສປ຺ປຸຣິສູປນິສ຺ສຍາທີຫີຕິ ອາທິ-ສທ຺ເທນ ຕຊ຺ຊໍ ໂຍນິໂສມນສິກາຣາທິໍ ສງ຺ຄຓ຺ຫາຕິ. ສທ຺ຘນ຺ຕິ ກມ຺ມຜລສທ຺ຘໍ, ຣຕນຕ຺ຕຍສທ຺ຘຎ຺ຈ. ຉນ຺ທນ຺ຕິ ຠາວນານຸໂຍເຄ ຕິພ຺ພກຕ຺ຕຸກມ຺ຍຕາສງ຺ຂາຕໍ ກຸສລຈ຺ຉນ຺ທໍ. ປຎ຺ຎນ຺ຕິ ປາຣິຫາຣິຍປຎ຺ຎໍ. ວຑ຺ເຒຕ຺ວາຕິ ຍຖາ ຠາວນາ ອິຊ຺ຌຕິ, ຕຖາ ປຣິພ຺ຣູເຫຕ຺ວາ. ຍໍ ປເນຕ຺ຖ ອຕ຺ຖໂຕ ນ ວິຠຕ຺ຕໍ, ຕໍ ສຸວິຎ຺ເຎຍ຺ຍຕ຺ຕາ, ເຫຏ຺ຐາ ວຸຕ຺ຕນຍຕ຺ຕາ ຈ ນ ວິຠຕ຺ຕໍ.

ເສສກສິຓນິທ຺ເທສວຓ຺ຓນາ ນິຏ຺ຐິຕາ.

ອິຕິ ປຎ຺ຈມປຣິຈ຺ເຉທວຓ຺ຓນາ.