ອນຸໂລມຎາຓກຖາວຓ຺ຓນາ

໘໐໔. ອຘິໂມກ຺ຂສທ຺ຘາຕິ ປສາທຠູໂຕ ວຕ຺ຖຸຄໂຕ ນິຈ຺ຉໂຍ ອຘິໂມກ຺ໂຂ. ຕສ຺ມາ ຕຖາຠູຕາ ຠາວນາວິເສເສນ ກິຈ຺ຈໂຕ ອຘິມຕ຺ຕຕາຍ ພລວຕຣາ ນິພ຺ພຕ຺ຕຕິ. ສຸປຄ຺ຄຫິຕນ຺ຕິ ສຸຏ຺ຐຸ ປຄ຺ຄຫິຕໍ. ອສລ຺ລີນໍ ປຏຸຕຣຠາເວນ ປຏິປກ຺ຂວິຘມນສມຕ຺ຖໍ ວີຣິຍໍ ໂຫຕິ. ສູປຏ຺ຐິຕາຕິ ຕິກ຺ຂຕຣຕາຍ ອາຣມ຺ມຓາຠິມຸຂຠາເວນ ສຸຏ຺ຐຸ ອຸປຏ຺ຐິຕາ ສຕິ ໂຫຕິ. ສຸສມາຫິຕນ຺ຕິ ປສ຺ສທ຺ຘິສຸຂານໍ ສາຕິສຍຕາຍ ສຸຏ຺ຐຸ ສມາຫິຕໍ ອາຣມ຺ມເຓ ສມ຺ມເທວ ຐປິຕໍ ອປ຺ປິຕໍ ວິຍ ໂຫຕິ. ຕິກ຺ຂຕຣາຕິ ອນຸໂລມຎາຓຸປ຺ປຕ຺ຕິຍາ ປຈ຺ຈໂຍ ຠວິຕຸໍ ສມຕ຺ຖຠາເວນ ສາຕິສຍໍ ຕິກ຺ຂາ ສູຣາ. ສງ຺ຂາຣານໍ ວິຈິນເນປິ ມຊ຺ຌຕ຺ຕຠູຕສງ຺ຂາຣຸເປກ຺ຂາ ປຎ຺ຎາ ອຸປ຺ປຊ຺ຊຕິ. ອນິຈ຺ຈາຕິ ວາ…ເປ… ສມ຺ມສິຕ຺ວາ ຠວງ຺ຄໍ ໂອຕຣຕີຕິ ອນິຈ຺ຈາທີສຸ ເອເກນາກາເຣນ ສມ຺ມສນ຺ຕີ ສຕ຺ຕກ຺ຂຕ຺ຕຸໍ ປວຕ຺ຕິຕ຺ວາ ຠິຊ຺ຊນ຺ຕີ ຠວງ຺ຄໍ ໂອຕິຓ຺ຓາ ນາມ ໂຫຕິ ຕໂຕ ປຣໍ ຠວງ຺ຄສ຺ສ ວາໂຣຕິ ກຕ຺ວາ. ສງ຺ຂາຣຸເປກ຺ຂາຍ ກຕນເຍເນວາຕິ ອນິຈ຺ຈາທິນາ ອາລມ຺ພນກຣຓນເຍເນວ, ນ ສມ຺ມສິຕນເຍນ. ເຕນາຫ ‘‘ອາຣມ຺ມຓໍ ກຸຣຸມານ’’ນ຺ຕິ. ອາວຏ຺ເຏຕ຺ວາຕິ ນິວຕ຺ເຕຕ຺ວາ ຈິຕ຺ຕສ຺ສ ຠວງ຺ຄວເສນ ວຕ຺ຕິຕຸໍ ອທຕ຺ວາ. ວິສທິສຈິຕ຺ຕປວຕ຺ຕິສງ຺ຂາຕາຍ ວີຈິຍາ ອຠາເວນ ອວີຈິກາ, ຈິຕ຺ຕສນ຺ຕຕິ. ກິຣິຍມໂນຘາຕຸຍາ ຫິ ຠວງ຺ເຄ ອາວຏ຺ຏິເຕ ກິຣິຍມຍຈິຕ຺ຕປວຕ຺ຕິວິປາກຈິຕ຺ຕຸປ຺ປຕ຺ຕິຍາ ສວີຈິກາ ສນ຺ຕຣາ, ນ ເອວໍ ມໂນທ຺ວາຣາວຊ຺ຊເນນາຕິ ວຸຕ຺ຕໍ ‘‘ອວີຈິກໍ ຈິຕ຺ຕສນ຺ຕຕິໍ ອນຸປ຺ປພນ຺ຘມານ’’ນ຺ຕິ. ຕເຖວາຕິ ຍຖາ ອຕີຕາສຸ ທ຺ວຕ຺ຕິໍສຊວນວີຖີສຸ ສງ຺ຂາຣຸເປກ຺ຂາ ‘‘ອນິຈ຺ຈາ’’ຕິ ວາ ‘‘ທຸກ຺ຂາ’’ຕິ ວາ ‘‘ອນຕ຺ຕາ’’ຕິ ວາ ສງ຺ຂາເຣ ອາຣມ຺ມຓມກາສິ, ຕເຖວ. ປຣິກມ຺ມນ຺ຕິ ວຸຈ຺ຈຕິ ມຄ຺ຄສ຺ສ ປຣິກມ຺ມຕ຺ຕາ ປຏິສງ຺ຂາຣກຕ຺ຕາ. ອຸປຈາຣນ຺ຕິ ວຸຈ຺ຈຕິ ມຄ຺ຄສ຺ສ ອາສນ຺ນຕ຺ຕາ, ສມີປຈາຣິກຕ຺ຕາ ວາ. ອນຸໂລມຕ຺ຕໍ ສຍເມວ ວທຕິ.

ອຍຎ຺ຈ ນໂຍ ກາມໍ ມຄ຺ຄວີຖິຍໍ ປຐມຊວນສ຺ສ ປຏິສງ຺ຂຣຓຏ຺ໂຐ, ທຸຕິຍສ຺ສ ຕໂຕ ອາສນ຺ນຏ຺ໂຐ, ຕຕິຍສ຺ສ ເຫຏ຺ຐິມຸປຣິມານໍ ອນຸໂລມຏ຺ໂຐ ຈ ຍຸຕ຺ໂຕຕິ ວຸຕ຺ໂຕ, ຕຖາປິ ສພ຺ເພສມ຺ປິ ອິມາ ສມຎ຺ຎາ ສມ຺ຠວນ຺ຕີຕິ ທສ຺ເສຕຸໍ ‘‘ອວິເສເສນ ປນາ’’ຕິອາທິ ວຸຕ຺ຕໍ. ຕຕ຺ຖ ອາເສວນນ຺ຕິ ອາທເຣນ ເສວນໍ. ປຸຣິມຠາຄປຈ຺ຉິມຠາຄານນ຺ຕິ ເຫຏ຺ຐິມານໍ, ອຸປຣິມານຎ຺ຈ ຘມ຺ມໂກຏ຺ຐາສານໍ. ອຏ຺ຐນ຺ນນ຺ຕິ ອຸທຍພ຺ພຍຎາຓາທີນໍ ອຏ຺ຐນ຺ນໍ. ສພ຺ພາປິ ວິປສ຺ສນາ ລກ຺ຂຓຕ຺ຕຍສມ຺ມສນກິຈ຺ຈາວ, ອິທມ຺ປິ ຕເຖວາຕິ ວຸຕ຺ຕໍ ‘‘ຕຖກິຈ຺ຈຕາຍາ’’ຕິ. ອຸປຣີຕິ ມຄ຺ເຄ. ໂພຘິປກ຺ຂິຍຘມ຺ມານໍ ຕຖກິຈ຺ຈຕາຍ ອນຸໂລເມຕິ ສມ຺ໂມສາທິປຏິປກ຺ຂວິຘມນໂຕ. ອິທານິ ອນຸໂລມຎາຓສ຺ສ ຕທຸຠຍກິຈ຺ຈານຸໂລມໍ ວິຕ຺ຖາຣໂຕ ທສ຺ເສຕຸໍ ‘‘ຕຎ຺ຫີ’’ຕິອາທິ ວຸຕ຺ຕໍ. ຕຕ຺ຖ ອນຸໂລມຎາຓໍ ສຈ຺ຈປຏິຈ຺ຉາທກໂມຫກ຺ຂນ຺ຘາທີນໍ ສາຕິສຍໍ ວິຘມເນນ ໂລກິຍຎາເຓສຸ ອຸກ຺ກໍສປຣິຍນ຺ຕຄຕໍ, ຕໂຕ ເອວ ເຫຏ຺ຐາ ນິພ຺ພຕ຺ຕິຕອຸທຍພ຺ພຍຎາຓາທີນມ຺ປິ ກິຈ຺ຈໍ ປຏິປກ຺ຂທູຣີຠາເວນ ອຕ຺ຖໂຕ ສາເຘນ຺ຕເມວ ຫຸຕ຺ວາ ປວຕ຺ຕຕິ, ຕຖາປວຕ຺ຕມານຎ຺ຈ ເຕສໍ ກິຈ຺ຈໍ ອນຸໂລເມນ຺ຕໍ ວິຍ ໂຫຕີຕິ ອາຫ ‘‘ອຸທຍພ຺ພຍວນ຺ຕານໍ…ເປ… ຕຖກິຈ຺ຈຕາຍ ອນຸໂລເມຕີ’’ຕິ. ຕຕ຺ຖ ‘‘ຠຍໂຕ ອຸປຏ຺ຐິຕ’’ນ຺ຕິ ອິມິນາປິ ອາຣມ຺ມຓສີເສນ ຎາຓພ຺ຍາປາຣເມວ ວທຕິ ສປ຺ປຏິຠຍານໍ ສງ຺ຂາຣານໍ ຍຖາສຠາວທສ຺ສນທີປນໂຕ. ເສເສສຸ ປນ ສຕ຺ຕສຸປິ ຐາເນສຸ ຎາຓພ຺ຍາປາໂຣວ ທສ຺ສິໂຕ. ຍສ຺ມາ ເອຕໍ ອນຸໂລມຎາຓໍ ອນິຈ຺ຈາທີສຸ ອຎ຺ຎຕຣລກ຺ຂຓວເສເນວ ສງ຺ຂາເຣ ອາຣພ຺ຠ ປວຕ຺ຕຕິ, ຕສ຺ມາ ວຸຕ຺ຕໍ ‘‘ອນິຈ຺ຈລກ຺ຂຓາທິວເສນ ສງ຺ຂາເຣ ອາຣພ຺ຠ ປວຕ຺ຕຕ຺ຕາ’’ຕິ. ຕາຍ ປຏິປຕ຺ຕິຍາຕິ ຍາ ສາ ອນຸໂລມຎາຓສ຺ສ ຖູລຖູລສຈ຺ຈປຏິຈ຺ຉາທກສໍກິເລສວິກ຺ຂມ຺ຠນປຏິປຕ຺ຕິ, ຕາຍ. ນ ຫິ ອນຸໂລມຎາເຓ ຕຖາ ອນຸປ຺ປນ຺ເນ ໂຄຕ຺ຣຠຸຎາຓໍ ນິພ຺ພານໍ ອາລມ຺ພິຕຸໍ ສກ຺ໂກຕິ, ໂຄຕ຺ຣຠຸຎາເຓ ວາ ອນຸປ຺ປນ຺ເນ ມຄ຺ຄຎາຓໍ ອຸປ຺ປຊ຺ຊຕີຕິ.

ວຸຕ຺ຕມຕ຺ຖໍ ໂອປມ຺ເມນ ປາກຏຕຣໍ ກາຕຸໍ ‘‘ຍຖາ ຫີ’’ຕິອາທິ ວຸຕ຺ຕໍ. ຕຕ຺ຖ ອຏ຺ຐນ຺ນໍ ໂວຫາຣິກມຫາມຕ຺ຕານໍ ອຄຕິຄມນໍ ປຫາຍ ຕໍຕໍວິນິຈ຺ຉຍກຣຓໍ ວິຍ ອຏ຺ຐນ຺ນໍ ຎາຓານໍ ຍຖາສກໍ ປຏິປກ຺ຂໍ ປຫາຍ ສງ຺ຂາເຣສຸ ອຸທຍພ຺ພຍາທິປຏິປຕ຺ຕິ, ຣຎ຺ໂຎ ມຊ຺ຌຕ຺ຕຠາໂວ ວິຍ ອນຸໂລມຎາຓສ຺ສ ປຸຣິມປຈ຺ຉິມຘມ຺ມໂກຏ຺ຐາສສ຺ສ ອນຸກູລຕາ. ເຕເນວາຕິ ເຫຏ຺ຐິມຎາຓານໍ ອນຸໂລມນມຸເຂນ ອຸປຣິໂພຘິປກ຺ຂິຍານໍ ອນຸໂລມນໂຕເຍວ. ສຈ຺ຈານຸໂລມິກນ຺ຕິ ວຸຈ຺ຈຕິ ມຄ຺ຄສຈ຺ຈສ຺ສ ອນຸໂລມິກຕ຺ຕາ.

ອນຸໂລມຎາຓໍ ນິຏ຺ຐິຕໍ.