໑໑. ໂສສານິກງ຺ຄກຖາວຓ຺ຓນາ

໓໔. ນ ສຸສານນ຺ຕິ ອສຸສານໍ. ອຎ຺ຎຕ຺ໂຖ ນ-ກາໂຣ, ສຸສານລກ຺ຂຓຣຫິຕໍ ວສນຏ຺ຐານນ຺ຕິ ອຘິປ຺ປາໂຍ. ນ ຕຕ຺ຖາຕິ ‘‘ສຸສານ’’ນ຺ຕິ ວວຕ຺ຖປິຕມຕ຺ເຕ ຐາເນ ນ ວສິຕພ຺ພໍ. ນ ຫິ ນາມມຕ຺ເຕນ ສຸສານລກ຺ຂຓໍ ສິຊ຺ຌຕິ. ເຕນາຫ ‘‘ນ ຫີ’’ຕິອາທິ. ຌາປິຕກາລໂຕ ປນ ປຏ຺ຐາຍ…ເປ… ສຸສານເມວ ຉເວນ ສຍິຕມຕ຺ຕາຍ ສຸສານລກ຺ຂຓປ຺ປຕ຺ຕິໂຕ. ຉວສຍນໍ ຫິ ‘‘ສຸສານ’’ນ຺ຕິ ວຸຈ຺ຈຕິ.

ໂສສານິເກນ ນາມ ອປ຺ປກິຈ຺ເຈນ ສລ຺ລຫຸກວຸຕ຺ຕິນາ ຠວິຕພ຺ພນ຺ຕິ ທສ຺ເສຕຸໍ ‘‘ຕສ຺ມິໍ ປນ ວສນ຺ເຕນາ’’ຕິອາທິ ວຸຕ຺ຕໍ. ຄຣຸກນ຺ຕິ ທຸປ຺ປຣິຫາຣໍ. ຕເມວ ຫິ ທຸປ຺ປຣິຫາຣຠາວໍ ທສ຺ເສຕຸໍ ‘‘ຕສ຺ມາ’’ຕິອາທິ ວຸຕ຺ຕໍ. ຕຕ຺ຖ ອຸປ຺ປນ຺ນປຣິສ຺ສຍວິຆາຕຕ຺ຖາຍາຕິ ‘‘ສຸສານໍ ນາມ ມນຸສ຺ສຣາຫສ຺ເສຍ຺ຍກ’’ນ຺ຕິ ໂຈຣາ ກຕກມ຺ມາປິ ອກຕກມ຺ມາປິ ໂອສຣນ຺ຕິ, ຕຕ຺ຖ ໂຈເຣສຸ ຠຓ຺ຑສາມິເກ ທິສ຺ວາ ຠິກ຺ຂຸສມີເປ ຠຓ຺ຑໍ ຉຑ຺ເຑຕ຺ວາ ປລາເຕສຸ ມນຸສ຺ສາ ຠິກ຺ຂຸໍ ‘‘ໂຈໂຣ’’ຕິ ຄເຫຕ຺ວາ ໂປເຖຍ຺ຍຸໍ, ຕສ຺ມາ ວິຫາເຣ ສງ຺ຆຕ຺ເຖຣໍ ວາ ໂຄຈຣຄາເມ ຣຎ຺ຎາ ນິຍຸຕ຺ຕໍ ຣາຊຍຸຕ຺ຕກໍ ວາ ອຕ຺ຕໂນ ໂສສານິກຠາວໍ ຊານາເປຕ຺ວາ ຍຖາ ຕາທິໂສ, ອຎ຺ໂຎ ວາ ປຣິສ຺ສໂຍ ນ ໂຫຕິ, ຕຖາ ອປ຺ປມຕ຺ເຕນ ວສິຕພ຺ພໍ. ຈງ຺ກມນ຺ຕສ຺ສ ຍທາ ອາຬຫນໍ ອຠິມຸຂໍ ນ ໂຫຕິ, ຕທາປິ ສໍເວຄຊນນຕ຺ຖໍ ຕຕ຺ຖ ທິຏ຺ຐິ ວິສ຺ສຊ຺ເຊຕພ຺ພາຕິ ທສ຺ເສຕຸໍ ‘‘ອທ຺ຘກ຺ຂິເກນ ອາຬຫນໍ ໂອໂລເກນ຺ເຕນາ’’ຕິ ວຸຕ຺ຕໍ.

ອຸປ຺ປຖມຄ຺ເຄນ ຄນ຺ຕພ຺ພໍ ອຕ຺ຕໂນ ໂສສານິກຠາວສ຺ສ ອປາກຏຠາວຕ຺ຖໍ. ອາຣມ຺ມຓນ຺ຕິ ຕສ຺ມິໍ ສຸສາເນ ‘‘ອຍໍ ວມ຺ມິໂກ, ອຍໍ ຣຸກ຺ໂຂ, ອຍໍ ຂາຓຸໂກ’’ຕິອາທິນາ ທິວາເຍວ ອາຣມ຺ມຓໍ ວວຕ຺ຖເປຕພ຺ພໍ. ຠຍານກນ຺ຕິ ຠຍຊນກໍ ວມ຺ມິກາທິໍ. ເກນຈິ ເລຑ຺ຑຸປາສາຓາທິນາ ອາສນ຺ເນ ວິຈຣນ຺ຕີຕິ ນ ປຫຣິຕພ຺ພາ. ຕິລປິຏ຺ຐໍ ວຸຈ຺ຈຕິ ປລລໍ. ມາສມິສ຺ສໍ ຠຕ຺ຕໍ ມາສຠຕ຺ຕໍ. ຄຸຬາທີຕິ ອາທິ-ສທ຺ເທນ ຕິລສໍຄຸຬິກາທິຆນປູວຎ຺ຈ ສງ຺ຄຓ຺ຫາຕິ. ກຸລເຄຫໍ ນ ປວິສິຕພ຺ພນ຺ຕິ ເປຕຘູເມນ ວາສິຕຕ຺ຕາ, ປິສາຈານຸພນ຺ຘຕ຺ຕາ ຈ ກຸລເຄຫສ຺ສ ອພ຺ຠນ຺ຕຣໍ ນ ປວິສິຕພ຺ພໍ. ເທວສິກໍ ຉວຑາໂຫ ຘຸວຑາໂຫ. ມຕຎາຕການໍ ຕຕ຺ຖ ຄນ຺ຕ຺ວາ ເທວສິກໍ ໂຣທນໍ ຘຸວໂຣທນໍ. ວຸຕ຺ຕນເຍນາຕິ ‘‘ຌາປິຕກາລໂຕ ປນ ປຏ຺ຐາຍາ’’ຕິ ວຸຕ຺ຕນເຍນ. ‘‘ປຈ຺ຉິມຍາເມ ປຏິກ຺ກມິຕຸໍ ວຏ຺ຏຕີ’’ຕິ ອິຈ຺ຉິຕຕ຺ຕາ ‘‘ສຸສານໍ ອຄຕທິວເສ’’ຕິ ອງ຺ຄຸຕ຺ຕຣຠາຓກາ.

ສຸສາເນ ນິຈ຺ຈກາລໍ ສິວຖິກທສ຺ສເນນ ມຣຓສ຺ສຕິປຏິລາໂຠ. ຕໂຕ ເອວ ອປ຺ປມາທວິຫາຣິຕາ. ຕຕ຺ຖ ຉຑ຺ຑິຕສ຺ສ ມຕກເຬວຣສ຺ສ ທສ຺ສເນນ ອສຸຠນິມິຕ຺ຕາຘິຄໂມ. ຕໂຕ ເອວ ກາມຣາຄວິໂນທນໍ. ພຫຸລໍ ສຣີຣສ຺ສ ອສຸຈິທຸຄ຺ຄນ຺ຘເຊຄຸຈ຺ຉຠາວສລ຺ລກ຺ຂຓໂຕ ອຠິຓ຺ຫໍ ກາຍສຠາວທສ຺ສນໍ. ຕໂຕ ມຣຓສ຺ສຕິປຏິລາຠໂຕ ຈ ສໍເວຄພຫຸລຕາ. ພ຺ຍາຘິການໍ, ຊຣາຊິຓ຺ຓານຎ຺ຈ ມຕານໍ ຕຕ຺ຖ ທສ຺ສເນນ ອາໂຣຄ຺ຍໂຍພ຺ພນຊີວິຕມທປ຺ປຫານໍ. ຂຸທ຺ທກສ຺ສ, ມຫໂຕ ຈ ຠຍສ຺ສ ອຠິຠວນໂຕ ຠຍເຠຣວສຫນຕາ. ສໍວິຄ຺ຄສ຺ສ ໂຍນິໂສ ປທຫນໍ ສມ຺ຠວຕີຕິ ອມນຸສ຺ສານໍ ຄຣຸຠາວນີຍຕາ. ນິທ຺ທາຄຕມ຺ປີຕິ ສຸຕ຺ຕມ຺ປິ, ສຸປິນນ຺ເຕປີຕິ ອຘິປ຺ປາໂຍ.

ອິຕິ ໂສສານິກງ຺ຄກຖາວຓ຺ຓນາ.