ຜສ຺ສປຈ຺ຈຍາເວທນາປທວິຕ຺ຖາຣກຖາວຓ຺ຓນາ

໖໔໓. ທ຺ວາຣໂຕ ສເຬວາຕິ ປຠວສາມຎ຺ຎໂຕ ເອກວິຘາປິ ອຸປ຺ປຕ຺ຕິທ຺ວາຣໂຕ ຉ ເອວ ໂຫນ຺ຕີຕິ ຉເຬວ ເວທນາ ວຸຕ຺ຕາ.

ຈິຕ຺ຕເຠເທນ ເອກູນນວຸຕິວິຘາປິ ອິຘາຘິປ຺ເປຕາ ເອວ ທສ຺ເສຕຸໍ ‘‘ເວທນາສຸ ປນາ’’ຕິອາທິ ວຸຕ຺ຕໍ. ‘‘ເສສານ’’ນ຺ຕິ ເອຕ຺ຖ ສມ຺ປຏິຈ຺ຉນສມ຺ປຍຸຕ຺ຕາຍ ຈກ຺ຂຸສມ຺ຜສ຺ສາທໂຍ ປຎ຺ຈ ຍທິປິ ອນນ຺ຕຣາທີຫິ ປຈ຺ຈຍາ ໂຫນ຺ຕິ, ອນນ຺ຕຣາທີນໍ ປນ ອຸປນິສ຺ສເຍ ອນ຺ໂຕຄຘຕ຺ຕາ ສນ຺ຕີຣຓຕທາຣມ຺ມຓານຎ຺ຈ ສາຘາຣຓສ຺ສ ຕສ຺ສ ວເສນ ‘‘ເອກຘາ’’ຕິ ວຸຕ຺ຕໍ. ເອເກກສ຺ມິໍ ທ຺ວາເຣ ຫິ ຈກ຺ຂຸທ຺ວາຣາທີສຸ ອຸປ຺ປນ຺ນຈກ຺ຂຸວິຎ຺ຎາຓາທີຫິ ສຫຊາຕາ ຜສ຺ສາ ສກສກວີຖີສຸ ສມ຺ປຏິຈ຺ຉນາທີຫິ ສມ຺ປຍຸຕ຺ຕເວທນານໍ, ມໂນທ຺ວາເຣ ຕທາຣມ຺ມຓວເສເນວ ປວຕ຺ຕານໍ ເຕຠູມກວິປາກເວທນານມ຺ປິ ສຫຊາຕມໂນສມ຺ຜສ຺ສສງ຺ຂາໂຕ ໂສ ຜສ຺ໂສ ອຏ຺ຐຘາ ປຈ຺ຈໂຍ ໂຫຕີຕິ ໂຍເຊຕພ຺ພໍ.

ຣູປາຣູປາວຈຣວິປາກເວທນາ ປຏິສນ຺ຘິອາທິວເສເນວ ປວຕ຺ຕນ຺ຕິ, ກາມາວຈຣາປິ ເອກຈ຺ຈາຕິ ‘‘ເຕຠູມກວິປາກເວທນານມ຺ປີ’’ຕິ ວຸຕ຺ຕໍ. ຕາສມ຺ປິ ຫິ ສຫຊາຕມໂນສມ຺ຜສ຺ໂສ ອຏ຺ຐຘາວ ປຈ຺ຈໂຍ ໂຫຕິ. ປຈ຺ຈຍໍ ອນຸປາທິນ຺ນມ຺ປິ ເກຈິ ອິຈ຺ຉນ຺ຕີຕິ ‘‘ຍາ ປນາ’’ຕິອາທິນາ ມໂນທ຺ວາຣາວຊ຺ຊນສມ຺ປຍຸຕ຺ຕຜສ຺ສສ຺ສ ປຈ຺ຈຍຠາໂວ ວຸຕ຺ໂຕ. ຕຎ຺ຈ ມຸຂມຕ຺ຕທສ຺ສນໍ ທຏ຺ຐພ຺ພໍ. ເອເຕນ ນເຍນ ສພ຺ພສ຺ສ ອນນ຺ຕຣສ຺ສ, ອນານນ຺ຕຣສ຺ສ ຈ ຜສ຺ສສ຺ສ ຕສ຺ສາ ຕສ຺ສາ ວິປາກເວທນາຍ ອຸປນິສ຺ສຍຕາ ໂຍເຊຕພ຺ພາຕິ.