ສງ຺ຂາຣປຈ຺ຈຍາວິຎ຺ຎາຓປທວິຕ຺ຖາຣກຖາວຓ຺ຓນາ

໖໒໐. ຍຖາວຸຕ຺ຕສງ຺ຂາຣປຈ຺ຈຍາ ອຸປ຺ປຊ຺ຊມານໍ ຕໍ ກມ຺ມນິພ຺ພຕ຺ຕເມວ ຠວິຕຸໍ ອຣຫຕີຕິ ‘‘ພາຕ຺ຕິໍສ ໂລກິຍວິປາກວິຎ຺ຎາຓານິ ສງ຺ຄຫິຕານີ’’ຕິ ອາຫ. ຘາຕຸກຖາຍໍ ປນ ວິປ຺ປຍຸຕ຺ເຕນ ສງ຺ຄຫິຕາສງ຺ຄຫິຕປທນິທ຺ເທເສ ‘‘ສງ຺ຂາຣປຈ຺ຈຍາ ວິຎ຺ຎາເຓນ ເຍ ຘມ຺ມາ, ສຬາຍຕນປຈ຺ຈຍາ ຜສ຺ເສນ ເຍ ຘມ຺ມາ, ຜສ຺ສປຈ຺ຈຍາ ເວທນາຍ ເຍ ຘມ຺ມາ ວິປ຺ປຍຸຕ຺ຕາ, ເຕ ຘມ຺ມາ ກຕິຫິ ຂນ຺ເຘຫິ…ເປ… ສງ຺ຄຫິຕາ? ເຕ ຘມ຺ມາ ອສງ຺ຂຕໍ ຂນ຺ຘໂຕ ຐເປຕ຺ວາ ເອເກນ ຂນ຺ເຘນ, ເອກາທສຫິ ອາຍຕເນຫິ, ເອກາທສຫິ ຘາຕູຫິ ສງ຺ຄຫິຕາ. ກຕິຫິ ອສງ຺ຄຫິຕາ? ຈຕູຫິ ຂນ຺ເຘຫິ, ເອເກນາຍຕເນນ, ສຕ຺ຕຫິ ຘາຕູຫິ ອສງ຺ຄຫິຕາ’’ຕິ (ຘາຕຸ. ໔໖໖) ວຈນໂຕ ສພ຺ພວິຎ຺ຎາຓຜສ຺ສເວທນາປຣິຄ຺ຄໂຫ ກໂຕ. ຍທິ ຫິ ເອຕ຺ຖ ວິຎ຺ຎາຓຜສ຺ສເວທນາ ສປ຺ປເທສາ ສິຍຸໍ, ‘‘ວິປາກາ ຘມ຺ມາ’’ຕິ (ຘ. ສ. ຕິກມາຕິກາ ໓) ອິມສ຺ສ ວິຍ ວິສຊ຺ຊນໍ ສິຍາ. ຕສ຺ມາ ຕຕ຺ຖ ອຠິຘມ຺ມຠາຊນີຍວເສນ ສງ຺ຂາຣປຈ຺ຈຍາ ວິຎ຺ຎາຓາທໂຍ ຄຫິຕາຕິ ອຘິປ຺ປາໂຍ ເວທິຕພ຺ໂພ. ອວິຊ຺ຊາປຈ຺ຈຍາ ສງ຺ຂາໂຣ ຈ ອຠິຘມ຺ມຠາຊນີເຍ (ວິຠ. ໒໔໓) ຈຕຸຠູມກກຸສລສງ຺ຂາໂຣ, ອກຸສລສງ຺ຂາໂຣ ຈ ວຸຕ຺ໂຕຕິ ເອໂສ ເອວ ຘາຕຸກຖາຍໍ ຄຫິໂຕຕິ ທຏ຺ຐພ຺ໂພ. ຠໂວ ປນ ຘາຕຸກຖາຍໍ ກມ຺ມູປປຕ຺ຕິຠວວິເສສທສ຺ສນຕ຺ຖໍ ນ ອຠິຘມ຺ມຠາຊນີຍວເສນ ຄຫິໂຕ, ເອວຎ຺ຈ ກຕ຺ວາ ຕຕ຺ຖ ‘‘ອຸປາທານປຈ຺ຈຍາ ຠໂວ’’ຕິ ອນຸທ຺ຘຣິຕ຺ວາ ‘‘ກມ຺ມຠໂວ’’ຕິອາທິນາ (ຘາຕຸ. ໖໖) ນເຍນ ຠໂວ ອຸທ຺ຘໂຏ.

ໂລກິຍວິປາກມໂນວິຎ຺ຎາຓເມວ ສນ຺ຘາຍາຫ ‘‘ພາວີສຕິວິຘໍ ໂຫຕີ’’ຕິ. ຉຫິ ວິຎ຺ຎາເຓຫີຕິ ຍຖາອຘິກເຕຫິ ຈກ຺ຂຸວິຎ຺ຎາຓາທີຫິ ຉຫິ ວິຎ຺ຎາເຓຫິ. ກສ຺ມາ ປເນຕ຺ຖ ໂລກິຍວິປາກວິຎ຺ຎາຓສ຺ເສວ ຄຫຓໍ ກຕນ຺ຕິ ອາຫ ‘‘ໂລກຸຕ຺ຕຣານິ ປນ ວຏ຺ຏກຖາຍ ນ ຍຸຊ຺ຊນ຺ຕີ’’ຕິ. ຍທິ ເອວໍ ກສ຺ມາ ຘາຕຸກຖາຍໍ ‘‘ສງ຺ຂາຣປຈ຺ຈຍາ ວິຎ຺ຎາເຓນ ເຍ ຘມ຺ມາ ວິປ຺ປຍຸຕ຺ຕາ’’ຕິອາທີສຸ (ຘາຕຸ. ໓໖໒) ໂລກຸຕ຺ຕຣວິປາການມ຺ປິ ຄຫຓໍ ກຕນ຺ຕິ? ຕໍ ຍຖາຘມ຺ມສາສນຕ຺ຕາ ອຠິຘມ຺ມເທສນາຍ ວິປາກຕ຺ຕິເກ (ຘ. ສ. ຕິກມາຕິກາ ໓) ວິຍ ອນວເສສວິປາກຘມ຺ມສງ຺ຄຓ຺ຫນວເສນ ວຸຕ຺ຕໍ. ສຸຕ຺ຕນ຺ຕເທສນາ ປນ ຍຖານຸໂລມເທສນາຕິ ຕຕ຺ຖ ປວຕ຺ຕິນິວຕ຺ຕິໂຍ ອສງ຺ກຣໂຕ ທສ຺ເສຕພ຺ພາ. ຕສ຺ມາ ຕທຕ຺ຖສໍວຓ຺ຓນາຕິ ກຕ຺ວາ ປວຕ຺ຕິກຖາຍໍ ໂລກິຍວິປາກວິຎ຺ຎາຓານິເຍວ ຄຫິຕານິ. ເຕເນວາຫ ‘‘ວຏ຺ຏກຖາຍ ນ ຍຸຊ຺ຊນ຺ຕີຕິ ນ ຄຫິຕານີ’’ຕິ.

ຍຖາ ກຕໍ ກມ຺ມໍ ຜລທາເນ ສມຕ຺ຖໍ ໂຫຕິ, ຕຖາ ກຕໍ ‘‘ອຸປຈິຕ’’ນ຺ຕິ ວຸຈ຺ຈຕີຕິ ວິປາກທານໂຍຄ຺ຍເມວ ສງ຺ຂາຣໍ ຄຓ຺ຫນ຺ໂຕ ‘‘ອຸປຈິຕກມ຺ມາຠາເວ’’ຕິ ອາຫ. ເຫຕຸ ນາມ ພ຺ຍຕິເຣກປ຺ປຘານນ຺ຕິ ອຠາວ-ຄ຺ຄຫຓໍ, ເຕນ ກມ຺ເມ ສຕິ ຠາວໂຕ, ອສຕິ ອຠາວໂຕຕິ ອຍເມຕ຺ຖ ອຘິປ຺ປາໂຍ. ຍຖາ ປນສ຺ສ ວິຎ຺ຎາຓສ຺ສ ສງ຺ຂາຣປຈ຺ຈຍຕາ ນ ສິທ຺ຘາ, ນ ເອວໍ ວິປາກຠາໂວ. ໂສ ປນ ສິທ຺ໂຘຕິ ກຕ຺ວາ ອາຫ ‘‘ວິປາກໍເຫຕ’’ນ຺ຕິ. ເຕນ ວິຎ຺ຎາຓສ຺ສ ວິປາກຠາເວນ ສງ຺ຂາຣປຈ຺ຈຍຕ຺ຕໍ ສາເຘຕິ. ຕສ຺ສ ປນ ສາຘນຕ຺ຖໍ ‘‘ອຸປຈິຕກມ຺ມາຠາເວ ວິປາກາຠາວໂຕ’’ຕິ ວຸຕ຺ຕນ຺ຕິ ຕໍ ວິວຣນ຺ໂຕ ‘‘ວິປາກຎ຺ຈາ’’ຕິອາທິມາຫ. ຍທິ ອຸປ຺ປຊ຺ເຊຍ຺ຍາຕິ ຍທິ ກມ຺ມນິຣເປກ຺ໂຂ ວິປາໂກ ອຸປ຺ປຊ຺ເຊຍ຺ຍ. ສພ຺ເພສໍ ສຕ຺ຕານໍ ພ຺ຣຫ຺ມຕ຺ຕໍ ອຸປຄຕານໍ ຆານາທິວິຎ຺ຎາຓານິ ມຫາວິປາກວິຎ຺ຎາຓານີຕິ ຕສ຺ສ ຕສ຺ສ ວິປາກສ຺ສ ອໂນກາເສ ຐິຕານມ຺ປິ. ວິປາການີຕິ ວິຎ຺ຎາຓາເປກ຺ຂາຍ ນປຸໍສກນິທ຺ເທໂສ, ສພ຺ພວິປາກວິຎ຺ຎາຓານີຕິ ອຕ຺ໂຖ.

ສງ຺ຂາຣາ ພຫູ ເອກູນຕິໍສເຈຕນາເຠທໂຕ, ວິຎ຺ຎາຓານິ ຈ ພຫູນິ ພາຕ຺ຕິໍສວິຘຕ຺ຕາ, ນ ຈ ສພ຺ພໂຕ ສພ຺ພານີຕິ ອາຫ ‘‘ກຕຣສງ຺ຂາຣປຈ຺ຈຍາ ກຕຣວິຎ຺ຎາຓນ຺ຕິ ເຈ’’ຕິ. ‘‘ວິຎ຺ຎາຓ’’ນ຺ຕິ ຈ ອິທໍ ວິຎ຺ຎາຓສາມຎ຺ຎໍ ຄເຫຕ຺ວາ ວຸຕ຺ຕໍ. ກາມໍ ຂນ຺ຘນິທ຺ເທເສປິ (ວິສຸທ຺ຘິ. ໒.໔໕໑ ອາທໂຍ) ອິມານິ ວິຎ຺ຎາຓານິ ນິທ຺ທິຏ຺ຐານິ, ຕໍ ປນ ອຕິສໍຂິຕ຺ຕໍ, ນ ຈ ຕຕ຺ຖ ເນສໍ ສງ຺ຂາຣປຈ຺ຈຍຕາ ວິຠາວິຕາຕິ ຕໍ ປວຕ຺ຕິຍໍ, ປຏິສນ຺ຘິຍຎ຺ຈ ຠວາທີສຸ ປວຕ຺ຕນາກາຣວເສນ ວິຕ຺ຖາຣໂຕ ທສ຺ເສຕຸໍ ‘‘ກາມາວຈຣປຸຎ຺ຎາຠິສງ຺ຂາຣປຈ຺ຈຍາ’’ຕິອາທິ ອາຣທ຺ຘໍ. ມໂນວິຎ຺ຎາເຓຕິ ນິທ຺ຘາຣເຓ ຠູມ຺ມໍ. ມຫາວິປາການີຕິ ວິຎ຺ຎາຓາເປກ຺ຂາຍ ນປຸໍສກນິທ຺ເທໂສ. ມຫາວິປາກາຕິ ປນ ປາເຐ ມໂນວິຎ຺ຎາຓຘາຕຸໂຍຕິ ອາເນຕ຺ວາ ສມ຺ພນ຺ຘິຕພ຺ພໍ.

໖໒໑. ຍໍສງ຺ຂາຣປຈ຺ຈຍາຕິ ຍສ຺ສ ຍສ຺ສ ສງ຺ຂາຣສ຺ສ ປຈ຺ຈຍຠາເວນ. ຍໍ ວິຎ຺ຎາຓນ຺ຕິ ‘‘ຍໍ ຍໍ ວິຎ຺ຎາຓ’’ນ຺ຕິ ເອວໍ ອຸຠຍຕ຺ຖ ອາເມຑິຕໂລໂປ ທຏ຺ຐພ຺ໂພ. ‘‘ໂຫຕີ’’ຕິ ອິມິນາ ກາຣຓຠາເວ ວິຎ຺ຎາຓສ຺ສ ສພ຺ຠາວມຕ຺ຕໍ ປເວທິຕໍ, ນ ປວຕ຺ຕິວິເສໂສຕິ ຕໍ ທສ຺ເສນ຺ໂຕ ‘‘ເອວໍ ປວຕ຺ຕິ ເວທິຕພ຺ພາ’’ຕິ ອາຫ. ພ຺ຣຫ຺ມານມ຺ປິ ອນິຏ຺ຐຣູປາທິອາປາຖຄມເນ ອກຸສລວິປາກຈກ຺ຂຸວິຎ຺ຎາຓາທີນິ ກທາຈິ ອຸປ຺ປຊ຺ຊນ຺ຕີຕິ ‘‘ອິມານິ ເຕຣສ…ເປ… ປວຕ຺ຕນ຺ຕີ’’ຕິ ວຸຕ຺ຕໍ. ຕຕ຺ຖ ປຎ຺ຈນ຺ນໍ ຂນ຺ຘານໍ ໂວກາໂຣ ວິຕ຺ຖາໂຣ ເອຕ຺ຖາຕິ ປຎ຺ຈໂວກາໂຣ, ໂສ ເອວ ຠໂວ, ເອຕສ຺ມິໍ ປຎ຺ຈໂວກາຣຠເວ. ໂຫຕິ ຫິ ຠິນ຺ນາຘິກຣຓານມ຺ປິ ອຎ຺ຎປທຕ຺ຖສມາໂສ ຍຖາ ‘‘ອຸຣສິໂລໂມ’’ຕິ. ອຖ ວາ ຍຖາປຈ຺ຈຍໍ ປວຕ຺ຕມາເນຫິ ປຎ຺ຈຫິ ຂນ຺ເຘຫິ ໂວກຣີຍຕີຕິ ປຎ຺ຈໂວກາໂຣ, ໂສ ເອວ ຠໂວຕິ ສພ຺ພໍ ປຸພ຺ເພ ວິຍ.

‘‘ປວຕ຺ຕິຍຎ຺ເຎວ ປວຕ຺ຕນ຺ຕີ’’ຕິ ສງ຺ເຂປໂຕ ວຸຕ຺ຕມຕ຺ຖໍ ວິວຣິຕຸໍ ‘‘ກຖ’’ນ຺ຕິອາທິ ອາຣທ຺ຘໍ.

‘‘ເຍຠຸຍ຺ເຍນ ໂລຠສມ຺ປຍຸຕ຺ຕຊວນາວສາເນ’’ຕິ ອິທໍ ປຏິຆວິຈິກິຈ຺ຉຸທ຺ຘຈ຺ຈສມ຺ປຍຸຕ຺ຕານນ຺ຕຣໍ ໂສມນສ຺ສສຫຄຕສ຺ສ ອນຸປ຺ປຊ຺ຊນໂຕຕິ ເກຈິ, ຕໍ ນ ຄເຫຕພ຺ພໍ. ‘‘ຈກ຺ຂຸໍ ອສ຺ສາເທຕິ ອຠິນນ຺ທຕິ, ຕໍ ອາຣພ຺ຠ ຣາໂຄ ອຸປ຺ປຊ຺ຊຕິ, ທິຏ຺ຐິ ອຸປ຺ປຊ຺ຊຕິ…ເປ… ວິຈິກິຈ຺ຉາ ອຸປ຺ປຊ຺ຊຕິ, ອຸທ຺ຘຈ຺ຈໍ ອຸປ຺ປຊ຺ຊຕິ, ອກຸສເລ ນິຣຸທ຺ເຘ ວິປາໂກ ຕທາຣມ຺ມຓຕາ ອຸປ຺ປຊ຺ຊຕີ’’ຕິ ວຈນໂຕ. ອິຏ຺ຐໍ ເຈ ອາຣມ຺ມຓໍ, ໂສມນສ຺ສຕທາຣມ຺ມຓໍ ນ ນ ອຸປ຺ປຊ຺ຊຕີຕິ. ຊວເນນ ຕທາຣມ຺ມຓນິຍເມ ໂສມນສ຺ສສຫຄຕານນ຺ຕຣໍ ໂສມນສ຺ສສຫຄຕາເນວ ສນ຺ຘາຍ ວຸຕ຺ຕນ຺ຕິ ອປເຣ, ຕໍ ວິຈາເຣຕພ຺ພໍ ອຸເປກ຺ຂາສຫຄຕກຸສລາກຸສລຊວນານນ຺ຕຣມ຺ປິ ໂສມນສ຺ສຕທາຣມ຺ມຓສ຺ສ ອິຈ຺ຉິຕພ຺ພຕ຺ຕາ. ອຸເປກ຺ຂາສຫຄຕກິຣິຍາຊວນານນ຺ຕຣເມວ ຫິ ໂສມນສ຺ສຕທາຣມ຺ມຓໍ ນ ອິຈ຺ຉນ຺ຕິ.

ຍສ຺ມາ ປນ ຕິເຫຕຸກຊວນາວສາເນ ຈ ກທາຈິ ອເຫຕຸກໍ ຕທາຣມ຺ມຓໍ ໂຫຕິ, ຕສ຺ມາ ‘‘ເຍຠຸຍ຺ເຍນາ’’ຕິ ວຸຕ຺ຕໍ. ຍສ຺ມາ ເອກຈິຕ຺ຕກ຺ຂຓາຍຸກໍ ຊວນາຣມ຺ມຓໍ ໂຫຕິ, ຕທາ ຕຕ຺ຖ ເອກເມວ ຕທາຣມ຺ມຓໍ ໂຫຕີຕິ ກຕ຺ວາ ‘‘ສກິໍ ວາ’’ຕິ ວຸຕ຺ຕນ຺ຕິ ເກຈິ. ອປເຣ ປນ ຕທາຣມ຺ມຓໍ ນາມ ຊວນາຣມ຺ມຓານຸຠວນກິຈ຺ຈໍ, ຕໍ ເອກຈິຕ຺ຕກ຺ຂຓິເກ ຕຖາ ອາສນ຺ນເຠເທ ອາຣມ຺ມເຓ ນຸປ຺ປຊ຺ຊຕິ. ຕສ຺ມາ ‘‘ສກິໍ ວາ’’ຕິ ອິທໍ ທິຣຕ຺ຕຕິຣຕ຺ຕາທິ ວິຍ ວຈນສິລິຏ຺ຐຕາວເສນ ວຸຕ຺ຕນ຺ຕິ ເວທິຕພ຺ພໍ, ທ຺ວິກ຺ຂຕ຺ຕຸເມວ ປນ ອຸປ຺ປຊ຺ຊຕີຕິ. ‘‘ທິຣຕ຺ຕຕິຣຕ຺ຕ’’ນ຺ຕິ (ປາຈິ. ໕໐) ເອຕ຺ຖ ຫິ ວາ-ສທ຺ທສ຺ສ ອຠາວາ ວຈນສິລິຏ຺ຐຕາມຕ຺ເຕນ ທິຣຕ຺ຕຄ຺ຄຫຓໍ ກຕນ຺ຕິ ຍຸຊ຺ຊຕິ. ‘‘ນິຣນ຺ຕຣໍ ຕິຣຕ຺ຕທສ຺ສນຕ຺ຖໍ ວາ’’ຕິ ອິຘ ປນ ວາ-ສທ຺ໂທ ວິກປ຺ປຕ຺ໂຖ ວຸຕ຺ໂຕຕິ ສກິໍ ເອວ ຈ ກທາຈິ ປວຕ຺ຕິໍ ສນ຺ຘາຍ ‘‘ສກິໍ ວາ’’ຕິ ວຸຕ຺ຕນ຺ຕິ ທຏ຺ຐພ຺ພໍ. ເຕເນວ ຫິ ສມ຺ໂມຫວິໂນທນິຍໍ ສກິໍ ຕທາຣມ຺ມຓປ຺ປວຕ຺ຕິຍາ ວິຈາເຣຕພ຺ພຕໍ ທສ຺ເສນ຺ເຕນ ‘‘ຈິຕ຺ຕປ຺ປວຕ຺ຕິຄຓນາຍໍ ປນ ສພ຺ພທ຺ວາເຣສຸ ຕທາຣມ຺ມເຓ ທ຺ເວ ເອວ ຈິຕ຺ຕວາຣາ ອາຄຕາ’’ຕິ (ວິຠ. ອຏ຺ຐ. ໒໒໗) ວຸຕ຺ຕໍ.

ຕຕ຺ຖ ຈິຕ຺ຕປ຺ປວຕ຺ຕິຄຓນາຍນ຺ຕິ ວິປາກກຖາຍໍ ພລວຣູປາທິອາຣມ຺ມເຓ ວຸຕ຺ຕໍ ຈິຕ຺ຕປ຺ປວຕ຺ຕິຄຓນໍ ສນ຺ຘາຍາຫ. ຕຕ຺ຖ ຫິ ທ຺ເວວ ຕທາຣມ຺ມຓຸປ຺ປຕ຺ຕິວາຣາ ວຸຕ຺ຕາ. ຕເທວ ຫິ ສນ຺ຘາຍ ອິຘາປິ ວຸຕ຺ຕໍ ‘‘ອຠິຘມ຺ມຏ຺ຐກຖາຍໍ ປນ ຕທາຣມ຺ມເຓ ທ຺ເວ ຈິຕ຺ຕວາຣາ ອາຄຕາ’’ຕິ. ອຠິຘມ຺ມຏ຺ຐກຖາຍໍ ອນິຍຕາຣມ຺ມຓຏ຺ຐານກິຈ຺ຈາ ຫຸຕ຺ວາ ປວຕ຺ຕນ຺ຕີຕິ (ວິຠ. ອຏ຺ຐ. ໒໒໗) ທ຺ວາຣໍ ອນາມສິຕ຺ວາ ເອວ ວຸຕ຺ຕໍ, ຕໍ ອນນ຺ຕຣໍ ປຣໂຕ ວຸຕ຺ຕສເຫຕຸກວິປາກວິຎ຺ຎາຓານໍ ສທິສສໍວຓ຺ຓນໍ ກາຕຸກາມຕາຘິປ຺ປາເຍນ ວຸຕ຺ຕໍ. ອເຫຕຸກທ຺ວຍາທີນຎ຺ຫິ ຠວງ຺ຄຠູຕານໍ ສຍເມວ ທ຺ວາຣຕ຺ຕາ, ຈຸຕິປຏິສນ຺ຘິຠູຕານຎ຺ຈ ຠວງ຺ຄສງ຺ຂາເຕນ, ອຎ຺ເຎນ ຈ ທ຺ວາເຣນ ອນຸປ຺ປຕ຺ຕິໂຕ ນິຍຕໍ, ອນິຍຕໍ ວາ ທ຺ວາຣໍ ເອເຕສນ຺ຕິ ນ ສກ຺ກາ ວຕ຺ຕຸນ຺ຕິ.

ອເຫຕຸກທ຺ວຍສ຺ສ ປນ ສນ຺ຕີຣຓຕທາຣມ຺ມຓຠູຕສ຺ສ ທ຺ວາຣໍ ລພ຺ຠຕິ, ຕຎ຺ຈ ອນິຍຕນ຺ຕິ ຕມ຺ປິ ຄຓ຺ຫນ຺ໂຕ ‘‘ອນິຍຕທ຺ວາຣາຣມ຺ມຓຏ຺ຐານກິຈ຺ຈາ ຫຸຕ຺ວາ ປວຕ຺ຕນ຺ຕີ’’ຕິ ອາຫ. ເຕເນວ ເຈຕ຺ຖ ມຫາວິປາການມ຺ປິ ຕທາຣມ຺ມຓຠູຕານໍ ທ຺ວາຣໍ ລພ຺ຠຕີຕິ ຕຕ຺ຖາປິ ທ຺ວາຣຄ຺ຄຫຓໍ ກຕໍ.

ເອກສ຺ສ ສຕ຺ຕສ຺ສ ປວຕ຺ໂຕ ຣູປາວຈຣວິປາໂກ ປຖວີກສິຓາທີສຸ ຍສ຺ມິໍ ອາຣມ຺ມເຓ ປວຕ຺ໂຕ, ຕໂຕ ອຎ຺ຎສ຺ມິໍ ຕສ຺ສ ປວຕ຺ຕິ ນຕ຺ຖີຕິ ຣູປາວຈຣານໍ ນິຍຕາຣມ຺ມຓຕາ ວຸຕ຺ຕາ. ອິຕຣານິ ອາຣຸປ຺ປວິປາກວິຎ຺ຎາຓານິ. ນິຍຕໍ ອວຕ຺ຖຸການີຕິ ນິຍຕາວຕ຺ຖຸການິ. ກສິຓຸຄ຺ຆາຏິມາກາສາທີສຸເຍວ ອາຣມ຺ມເຓສຸ ປວຕ຺ຕນໂຕ ນິຍຕາຣມ຺ມຓານິ. ຕຕ຺ຣາຕິ ປວຕ຺ຕິຍໍ. ອສ຺ສາຕິ ພາຕ຺ຕິໍສວິຘສ຺ສ ວິປາກວິຎ຺ຎາຓສ຺ສ. ເຕ ເຕ ສງ຺ຂາຣາຕິ ຍຖາວຸຕ຺ຕາ ປຸຎ຺ຎາຠິສງ຺ຂາຣາທິສງ຺ຂາຣາ. ກມ຺ມປຈ຺ຈເຍນາຕິ ນານາກ຺ຂຓິກກມ຺ມປຈ຺ຈເຍນ. ອຸປນິສ຺ສຍປຈ຺ຈເຍນາຕິ ປກຕູປນິສ຺ສຍປຈ຺ຈເຍນ.

໖໒໒. ເອວໍ ປວຕ຺ຕິຍໍ ວິຎ຺ຎາຓປ຺ປວຕ຺ຕິໍ ທສ຺ເສຕ຺ວາ ປຏິສນ຺ຘິຍໍ ທສ຺ເສຕຸໍ ‘‘ຍໍ ປນ ວຸຕ຺ຕ’’ນ຺ຕິອາທິມາຫ. ຕຕ຺ຖ ອນຸຣູປາຍ ປຏິສນ຺ຘິຍາຕິ ອນຸຣູເປນ ປຏິສນ຺ຘິກິຈ຺ເຈນ. ຕໍ ປນ ອນຸຣູປຕໍ ສຍເມວ ວກ຺ຂຕິ. ຠວນ຺ຕເຣນ ຠວນ຺ຕຣສ຺ສ ສນ຺ຘານໍ ອິຘ ປຏິສນ຺ຘີຕິ ຕໍ ອຈິຕ຺ຕກມ຺ປິ ອຕ຺ເຖວາຕິ ກຕ຺ວາ ‘‘ກຕິ ປຏິສນ຺ຘິໂຍ’’ຕິ ປຸຈ຺ຉໍ ກຕ຺ວາປິ ‘‘ກຕິ ປຏິສນ຺ຘິຈິຕ຺ຕານີ’’ຕິ ປຸຈ຺ຉາ ກຕາ. ‘‘ເກນ ກຕ຺ຖາ’’ຕິ ເກນ ຈິຕ຺ເຕນ ກສ຺ມິໍ ຠເວ.

ຕຕ຺ຖາຕິ ເຕສຸ ເອກູນວີສຕິຍາ ປຏິສນ຺ຘິຈິຕ຺ເຕສຸ. ກຸສລວິປາກາຍ ອເຫຕຸກມໂນວິຎ຺ຎາຓຘາຕຸຍາຕິ ສມ຺ພນ຺ໂຘ. ນຕ຺ຖິ ເທເວສຸ ອເຫຕຸກາ ປຏິສນ຺ຘີຕິ ‘‘ມນຸສ຺ສໂລເກ’’ຕິ ວິເສສນໍ. ນປຸໍສກາທີນນ຺ຕິ ອາທິສທ຺ເທນ ມມ຺ມາທີນໍ ສງ຺ຄໂຫ. ເກຈິ ປນ ເອກຈ຺ເຈ ອເຫຕຸກປຏິສນ຺ຘິກາ ອວິກລິນ຺ທ຺ຣິຍາ ຫຸຕ຺ວາ ໂຖກໍ ວິຈາຣຓປກຕິກາປິ ໂຫນ຺ຕິເຍວ, ຕສ຺ມາ ຕາທິສານມ຺ປິ ອິຘ ອາທິສທ຺ເທນ ສງ຺ຄໂຫຕິ ວທນ຺ຕິ. ສງ຺ເຂປໂຕຕິ ສມາສໂຕ, ອສຸກາຍ ປຏິສນ຺ຘິຍາ ອສຸກໍ ອາຣມ຺ມຓນ຺ຕິ ວິຠາຄໍ ອກຕ຺ວາຕິ ອຕ຺ໂຖ.

ເສສານນ຺ຕິ ຣູປາວຈຣາ ປຎ຺ຈ, ປຐມຕຕິຍາຣຸປ຺ປາ ທ຺ເວຕິ ອິມາສໍ ວຸຕ຺ຕາວເສສານໍ ສຕ຺ຕນ຺ນໍ ປຏິສນ຺ຘີນໍ. ປຈ຺ຈຸປ຺ປນ຺ນາຣມ຺ມຓໍ ຈຸຕິຈິຕ຺ຕໍ ນາມ ນຕ຺ຖິ ປຏິສນ຺ຘິອາຣມ຺ມເຓ ເອວ ປວຕ຺ຕນໂຕ. ທ຺ວີສຸ ອາຣມ຺ມເຓສູຕິ ອຕີຕນວຕ຺ຕພ຺ພວເສນ ທ຺ວີສຸ ອາຣມ຺ມເຓສຸ.

໖໒໓. ຕານີຕິ ປຸພ຺ເພ ກຕານິ ກມ຺ມານິ. ອສ຺ສາຕິ ອາສນ຺ນມຣຓສ຺ສ ປຸຄ຺ຄລສ຺ສ. ໂອລມ຺ພນ຺ຕີຕິ ສາຍນ຺ເຫ ມຫນ຺ຕານໍ ປພ຺ພຕກູຏານໍ ຉາຍາ ວິຍ ຠູມິຍໍ ຕສ຺ສ ຈິຕ຺ເຕ ອວລມ຺ພນ຺ຕິ ອຸປຕິຏ຺ຐນ຺ຕິ. ຕສ຺ມິໍ ນິຣຸທ຺ເຘຕິ ຕສ຺ມິໍ ຈຸຕິຈິຕ຺ເຕ ນິຣຸທ຺ຘມຕ຺ເຕ ຕສ຺ສ ນິໂຣຘສມນນ຺ຕຣເມວ. ຕເທວາຕິ ຕໍເຍວ ຍຖາວຸຕ຺ຕຊວນວີຖິຍາ ອາຣມ຺ມຓຠູຕໍ. ອວິຊ຺ຊາຕຓ຺ຫາທີສຸ ກິເລເສສຸ ອນຸປຈ຺ຉິນ຺ເນສ຺ເວວ ກມ຺ມາທິໂນ ອຸປຏ຺ຐານໍ, ຕຎ຺ຈ ອາຣພ຺ຠ ຈິຕ຺ຕສນ຺ຕານສ຺ສ ຠວນ຺ຕຣນິນ຺ນໂປຓປພ຺ຠາຣຕາ ໂຫຕີຕິ ອາຫ ‘‘ອນຸປຈ຺ຉິນ຺ນກິເລສພລວິນາມິຕ’’ນ຺ຕິ. ສນ຺ຕາເນ ຫິ ວິນາມິເຕ ຕເທກເທສຠູຕໍ ປຏິສນ຺ຘິຈິຕ຺ຕຎ຺ຈ ວິນາມິຕເມວ ໂຫຕິ, ນ ຈ ເອກເທສວິນາມິຕຠາເວນ ວິນາ ສນ຺ຕານສ຺ສ ວິນາມິຕຕາ ອຕ຺ຖີຕິ. ສພ຺ພຕ຺ຖ ປນ ທຸຄ຺ຄຕິປຏິສນ຺ຘິນິນ຺ນາຍ ຈຸຕິຍາ ປຸຣິມຊວນານິ ອກຸສລານິ, ອິຕຣາຍ ຈ ກຸສລານີຕິ ນິຈ຺ຉິນນ຺ຕິ. ‘‘ນິມິຕ຺ຕສ຺ສາທຄຘິຕໍ ວາ, ຠິກ຺ຂເວ, ວິຎ຺ຎາຓໍ ຕິຏ຺ຐມານໍ ຕິຏ຺ຐຕິ, ອນຸພ຺ຍຎ຺ຊນສ຺ສາທຄຘິຕໍ ວາ, ຕສ຺ມິໍ ເຈ ສມເຍ ກາລໍ ກໂຣຕິ, ຐານເມຕໍ ວິຊ຺ຊຕິ, ຍໍ ທ຺ວິນ຺ນໍ ຄຕີນໍ ອຎ຺ຎຕຣໍ ຄຕິໍ ອຸປປຊ຺ເຊຍ຺ຍ ນິຣຍໍ ວາ ຕິຣຈ຺ຉານໂຍນິໍ ວາ’’ຕິ (ສໍ. ນິ. ໔.໒໓໕) ຫິ ວຸຕ຺ຕໍ, ຕສ຺ມາ ອກຸສລໍ ທຸຄ຺ຄຕິຍໍ, ກຸສລຎ຺ຈ ສຸຄຕິຍໍ ປຏິສນ຺ຘິຍາ ອຸປນິສ຺ສໂຍ ໂຫຕີຕິ. ອຣຫໂຕ ປນ ສພ຺ພໂສ ກິເລສານໍ ອຸປຈ຺ຉິນ຺ນຕ຺ຕາ ປຏິປ຺ປສ຺ສທ຺ຘສພ຺ພຠວຸສ຺ສຸກ຺ກຕາຍ ກມ຺ມາທິນິມິຕ຺ຕໍ ນ ອຸປຏ຺ຐຫຕິ, ຕໂຕ ວິຊ຺ຊມານມ຺ປິ ກມ຺ມໍ ອລທ຺ຘສຫາຍຕ຺ຕາ ປຏິສນ຺ຘິໍ ນ ຊເນຕິ.

ວຸຕ຺ຕປ຺ປກາຣກມ຺ມວເສນາຕິ ປາປກມ຺ມວເສນ, ຕທຸປຏ຺ຐາປິຕນ຺ຕິ ອຘິປ຺ປາໂຍ. ‘‘ນຣກາທີສຸ ອຄ຺ຄິຊາລວຓ຺ຓາທິກ’’ນ຺ຕິ ອິທໍ ຕໍສທິສຕາວເສນ ວຸຕ຺ຕໍ. ນ ຫິ ໂສ ເອວ ນິຣຍຄ຺ຄິວຓ຺ຓາທິ ຕທາ ຕສ຺ສ ອາປາຖໍ ອາຄຈ຺ຉຕິ. ຕຕ຺ຖ ອຄ຺ຄິຊາລວຓ຺ຓາທິກນ຺ຕິ ອາທິ-ສທ຺ເທນ ເວຕ຺ຕຣຓີສິມ຺ພລິອສິປຕ຺ຕວນາທິວຓ຺ຓໍ ສງ຺ຄຓ຺ຫາຕິ. ນຣກາທີສູຕິ ປນ ອາທິ-ສທ຺ເທນ ເປຕຕິຣຈ຺ຉານານໍ ນິພທ຺ຘສຎ຺ຈຣຓຏ຺ຐານປຣິຍາປນ຺ນວຓ຺ຓໍ. ມໂນທ຺ວາເຣ ອາປາຖມາຄຈ຺ຉຕີຕິ ກມ຺ມພເລນ ອຸປຏ຺ຐາປິຕວຓ຺ຓາຍຕນໍ ສຸປິນໍ ປສ຺ສນ຺ຕສ຺ສ ວິຍ, ທິພ຺ພຈກ຺ຂຸສ຺ສ ວິຍ ຈ ມໂນທ຺ວາເຣ ເອວ ໂຄຈຣຠາວໍ ຄຈ຺ຉຕິ. ເອກໍ ອາວຊ຺ຊນໍ, ປຎ຺ຈ ຊວນານິ, ທ຺ເວ ຕທາຣມ຺ມຓານີຕິ ຕີຓິ ວີຖິຈິຕ຺ຕານິ.

ຣາຄາທິເຫຕຸຠູຕໍ ຫີນມາຣມ຺ມຓນ຺ຕິ ອກຸສລວິປາກສ຺ສ ອາຣມ຺ມຓໍ ຠວິຕຸໍ ຍຸຕ຺ຕໍ ອນິຏ຺ຐມາຣມ຺ມຓມາຫ. ຕມ຺ປິ ຫິ ສງ຺ກປ຺ປນວເສນ ຣາຄສ຺ສາປິ ເຫຕຸ ໂຫຕີຕິ. ອກຸສລວິປາກຊນກກມ຺ມສຫຊາຕານໍ ວາ ຕໍສທິສາສນ຺ນຈຸຕິຊວນເຈຕນາສຫຊາຕານຎ຺ຈ ຣາຄາທີນໍ ເຫຕຸຠາໂວ ເອວ ຫີນຕາ. ຕຎ຺ຫິ ປຈ຺ຉານຸຕາປຊນກກມ຺ມານມາຣມ຺ມຓໍ ກມ຺ມວເສນ ອນິຏ຺ຐໍ ອກຸສລວິປາກສ຺ສ ອາຣມ຺ມຓໍ ຠເວຍ຺ຍ. ອຎ຺ຎຖາ ຈ ອິຏ຺ຐາຣມ຺ມເຓ ປວຕ຺ຕສ຺ສ ອກຸສລກມ຺ມສ຺ສ ວິປາໂກ ອກຸສລກມ຺ມນິມິຕ຺ຕາຣມ຺ມໂຓ ນ ຠເວຍ຺ຍ. ນ ຫິ ອກຸສລວິປາໂກ ອິຏ຺ຐາຣມ຺ມໂຓ ຠວິຕຸໍ ອຣຫຕີຕິ.

ປຎ຺ຈທ຺ວາເຣ ຈ ອາປາຖໍ ອາຄຈ຺ຉນ຺ຕໍ ປຈ຺ຈຸປ຺ປນ຺ນໍ ກມ຺ມນິມິຕ຺ຕໍ ອາສນ຺ນກຕກມ຺ມາຣມ຺ມຓສນ຺ຕຕິຍໍ ອຸປ຺ປນ຺ນໍ, ຕໍສທິສຎ຺ຈ ທຏ຺ຐພ຺ພໍ. ອຎ຺ຎຖາ ຕເທວ ປຏິສນ຺ຘິອາຣມ຺ມຓູປຏ຺ຐາປກໍ, ຕເທວ ຈ ປຏິສນ຺ຘິຊນກໍ ຠເວຍ຺ຍ. ນ ຈ ປຏິສນ຺ຘິຍາ ອຸປຈາຣຠູຕານິ ວິຍ, ເອຕສ຺ມິໍ ຕຍາ ປວຕ຺ຕິຕພ຺ພນ຺ຕິ ປຏິສນ຺ຘິຍາ ອາຣມ຺ມຓໍ ອນຸປ຺ປາເທນ຺ຕານິ ວິຍ ຈ ປວຕ຺ຕານິ ຈຸຕິອາສນ຺ນານິ ຊວນານິ ປຏິສນ຺ຘິຊນການິ ຠເວຍ຺ຍຸໍ. ‘‘ກຕຕ຺ຕາ ອຸປຈິຕຕ຺ຕາ’’ຕິ (ຘ. ສ. ໔໓໑) ຫິ ວຸຕ຺ຕໍ. ຕທາ ຈ ຕໍສມານວີຖິຍໍ ວິຍ ປວຕ຺ຕມານານິ ກຖໍ ກຕູປຈິຕານິ ສິຍຸໍ? ຕທາ ນ ອສ຺ສາທິຕານິ. ນ ຈ ໂລກິຍານິ ໂລກຸຕ຺ຕຣານິ ວິຍ ສມານວີຖິຜລານິ ໂຫນ຺ຕິ. ‘‘ປຸພ຺ເພ ວາສ຺ສ ຕໍ ກຕໍ ໂຫຕິ ປາປກມ຺ມໍ ທຸກ຺ຂເວທນີຍໍ, ປຈ຺ຉາ ວາສ຺ສ ຕໍ ກຕໍ ໂຫຕິ ປາປກມ຺ມໍ ທຸກ຺ຂເວທນີຍໍ, ມຣຓກາເລ ວາສ຺ສ ໂຫຕິ ມິຈ຺ຉາທິຏ຺ຐິ ສມຕ຺ຕາ ໂຫຕິ ສມາທິນ຺ນາ. ເຕນ ໂສ ກາຍສ຺ສ ເຠທາ ປຣໍ ມຣຓາ ອປາຍໍ ທຸຄ຺ຄຕິໍ ວິນິປາຕໍ ນິຣຍໍ ອຸປປຊ຺ຊຕີ’’ຕິອາທິນາ (ມ. ນິ. ໓.໓໐໓) ສຸຕ຺ເຕ ມຣຓກາເລ ສມຕ຺ຕາຍ ສມາທິນ຺ນາຍ ມິຈ຺ຉາທິຏ຺ຐິຍາ, ສມ຺ມາທິຏ຺ຐິຍາ ຈ ສຫຊາຕເຈຕນາຍ ປຏິສນ຺ຘິທານໍ ວຸຕ຺ຕໍ, ນ ຈ ທຸພ຺ພເລຫິ ປຎ຺ຈທ຺ວາຣິກຊວເນຫິ ມິຈ຺ຉາທິຏ຺ຐິ, ສມ຺ມາທິຏ຺ຐິ ວາ ສມຕ຺ຕາ ໂຫຕິ ສມາທິນ຺ນາ. ຕຖາ ຫິ ວຸຕ຺ຕໍ ສມ຺ໂມຫວິໂນທນິຍໍ ‘‘ສພ຺ພມ຺ປິ ເຫຕໍ ກຸສລາກຸສລຘມ຺ມປຏິວິຊານນາທິຈວນປຣິໂຍສານໍ ກິຈ຺ຈໍ ມໂນທ຺ວາຣິກຈິຕ຺ເຕເນວ ໂຫຕິ, ນ ປຎ຺ຈທ຺ວາຣິເກນາຕິ ສພ຺ພສ຺ສເປຕສ຺ສ ກິຈ຺ຈສ຺ສ ກຣເຓ ສຫຊວນການິ ວີຖິຈິຕ຺ຕານິ ປຏິກ຺ຂິຕ຺ຕານີ’’ຕິ (ວິຠ. ອຏ຺ຐ. ໗໖໖).

ຕຕ຺ຖ ຫິ ນ ກິຎ຺ຈິ ຘມ຺ມໍ ປຏິວິຊານາຕີຕິ ‘‘ມໂນປຸພ຺ພງ຺ຄມາ ຘມ຺ມາ’’ຕິ (ຘ. ປ. ໑-໒) ເອວໍ ວຸຕ຺ຕໍ ເອກມ຺ປິ ກຸສລໍ ວາ ອກຸສລໍ ວາ ນ ປຏິວິຊານາຕີຕິ ຈ ວຸຕ຺ຕໍ. ເຍສໍ ປຏິວິຠາວນປ຺ປວຕ຺ຕິຍາ ສຸຂໍ ວາ ທຸກ຺ຂໍ ວາ ອນ຺ເວຕິ, ເຕສໍ ສາ ປວຕ຺ຕິ ປຎ຺ຈທ຺ວາເຣ ປຏິກ຺ຂິຕ຺ຕາ. ກຸສລາກຸສລກມ຺ມສມາທານຎ຺ຈ ຕາທິສເມວາຕິ. ຕທາຣມ຺ມຓານນ຺ຕຣໍ ປນ ຈວນໍ, ຕທນນ຺ຕຣາ ຈ ອຸປປຕ຺ຕິ ມໂນທ຺ວາຣິກາ ເອວ ໂຫຕິ, ນ ສຫຊວນກວີຖິຈິຕ຺ຕປຣິຍາປນ຺ນາຕິ ອິມິນາ ອຘິປ຺ປາເຍນ ອິຘ ປຎ຺ຈທ຺ວາຣິກຕທາຣມ຺ມຓານນ຺ຕຣາ ຈຸຕິ, ຕທນນ຺ຕຣາ ປຏິສນ຺ຘິ ຈ ວຸຕ຺ຕາຕິ ທຏ຺ຐພ຺ພາ. ຕຕ຺ຖ ອວເສສປຎ຺ຈຈິຕ຺ຕກ຺ຂຓາຍຸເກ ຣູປາທິມ຺ຫິ ອຸປ຺ປນ຺ນໍ ປຏິສນ຺ຘິໍ ສນ຺ຘາຍ ‘‘ປຈ຺ຈຸປ຺ປນ຺ນາຣມ຺ມຓໍ ອຸປປຕ຺ຕິຈິຕ຺ຕໍ ປຈ຺ຈຸປ຺ປນ຺ນາຣມ຺ມຓສ຺ສ ຠວງ຺ຄສ຺ສ ອນນ຺ຕຣປຈ຺ຈເຍນ ປຈ຺ຈໂຍ’’ຕິ, ອວເສສເອກຈິຕ຺ຕກ຺ຂຓາຍຸເກ ຈ ອຸປ຺ປນ຺ນໍ ປຏິສນ຺ຘິໍ ສນ຺ຘາຍ ‘‘ປຈ຺ຈຸປ຺ປນ຺ນາຣມ຺ມຓໍ ອຸປປຕ຺ຕິຈິຕ຺ຕໍ ອຕີຕາຣມ຺ມຓສ຺ສ ຠວງ຺ຄສ຺ສ ອນນ຺ຕຣປຈ຺ຈເຍນ ປຈ຺ຈໂຍ’’ຕິ ຈ ວຸຕ຺ຕນ຺ຕິ ເວທິຕພ຺ພໍ.

໖໒໔. ກຓ຺ຫປກ຺ເຂ ສຸກ຺ກປກ຺ຂໍ ຐເປຕ຺ວາຕິ ເອຕ຺ຖ ຍຖາ ປຸພ຺ເພ ‘‘ປາປກມ຺ມໍ ວາ ກມ຺ມນິມິຕ຺ຕໍ ວາ’’ຕິ ວຸຕ຺ເຕ ກຓ຺ຫປກ຺ເຂ ‘‘ອນວຊ຺ຊກມ຺ມໍ ວາ ກມ຺ມນິມິຕ຺ຕໍ ວາ’’ຕິ ສຸກ຺ກປກ຺ໂຂ ວຸຕ຺ໂຕ, ເອວໍ ‘‘ທຸຄ຺ຄຕິປຣິຍາປນ຺ນໍ ປຏິສນ຺ຘິຈິຕ຺ຕໍ, ນຣກາທີສຸ ອຄ຺ຄິຊາລວຓ຺ຓາທິກໍ ທຸຄ຺ຄຕິນິມິຕ຺ຕ’’ນ຺ຕິ ຈ ວຸຕ຺ເຕ ກຓ຺ຫປກ຺ເຂ ‘‘ສຸຄຕິປຣິຍາປນ຺ນໍ ປຏິສນ຺ຘິຈິຕ຺ຕໍ, ມນຸສ຺ສໂລເກ ຣຕ຺ຕກມ຺ພລສທິສມາຕຸກຸຈ຺ຉິວຓ຺ຓສງ຺ຂາຕໍ, ເທວໂລເກ ວາ ອຸຍ຺ຍານວິມານກປ຺ປຣຸກ຺ຂາທິວຓ຺ຓສງ຺ຂາຕໍ ສຸຄຕິນິມິຕ຺ຕ’’ນ຺ຕິ ເອວໍ ສຸກ຺ກປກ຺ຂໍ ຐເປຕ຺ວາ ເສສໍ ສພ຺ພໍ ປຸຣິມນເຍເນວ ເວທິຕພ຺ພໍ. ອຕີຕປຈ຺ຈຸປ຺ປນ຺ນາຣມ຺ມຓາຍາຕິ ກມ຺ມກມ຺ມນິມິຕ຺ຕວເສນ ອຕີຕາຣມ຺ມຓາຍ, ມາຕຸກຸຈ຺ຉິວຓ຺ຓາທິສຸຄຕິນິມິຕ຺ຕວເສນ ປຈ຺ຈຸປ຺ປນ຺ນາຣມ຺ມຓາຍ.

໖໒໕. ຕຎ຺ຈ ໂຂຕິ ຍເທຕໍ ‘‘ອນວຊ຺ຊກມ຺ມໍ ວາ ກມ຺ມນິມິຕ຺ຕໍ ວາ’’ຕິ ອນິຍມນໍ ກຕໍ, ຕຎ຺ຈ ໂຂ. ກມ຺ມນິມິຕ຺ຕເມວ ອາປາຖມາຄຈ຺ຉຕິ ເອກນ຺ຕໂຕ ອຕ຺ຕໂນ ກມ຺ມາຣມ຺ມຓຕາຍ ມຫຄ຺ຄຕວິປາກສ຺ສ. ສຸທ຺ຘາຍ ວາຕິ ມຫຄ຺ຄຕກມ຺ມນິມິຕ຺ຕາຣມ຺ມຓາຍ ຊວນວີຖິຍາ, ຕທາຣມ຺ມຓຣຫິຕາຍາຕິ ອຕ຺ໂຖ, ສາ ປນ ຊວນວີຖິ ມຫຄ຺ຄຕວິປາກສ຺ສ ອຸປຈາໂຣ ວິຍ ທຏ຺ຐພ຺ພາ. ເກຈິ ປນ ຕຎ຺ຈ ວີຖິໍ ມຫຄ຺ຄຕາວສານໍ ວທນ຺ຕິ. ‘‘ນວຕ຺ຕພ຺ພາຣມ຺ມຓາ ວາ’’ຕິ ອິທໍ ຣູປາວຈຣປຏິສນ຺ຘິໍ, ອາຣຸປ຺ເປສຸ ຈ ປຐມໍ, ຕຕິຍຎ຺ຈ ສນ຺ຘາຍ ວຸຕ຺ຕໍ. ທຸຕິຍຈຕຸຕ຺ຖາ ປນ ອຕີຕາຣມ຺ມຓວຈເນເນວ ຄຫິຕາ.

ມາຕຸກຸຈ຺ຉິວຓ຺ຓສງ຺ຂາຕນ຺ຕິອາທິນາ ວຓ຺ໂຓ ເອວ ຄຕິນິມິຕ຺ຕຠາເວນ ອາຄໂຕ. ຕຕ຺ຖ ສທ຺ໂທ ຕາວ ອນຸປາທິນ຺ນຠາເວນ ສຸຄຕິປຣິຍາປນ຺ນຕາຍ ຄຕິນິມິຕ຺ຕຠາເວນ ອຏ຺ຐກຖາສຸ ນາຄໂຕຕິ ຍຸຕ຺ຕເມຕໍ, ຄນ຺ຘາທີນໍ ປນ ອນາຄມເນ ກາຣຓໍ ວີມໍສິຕພ຺ພໍ.

ອຍໍ ຕາຕ ຕວຕ຺ຖາຍ ພຸທ຺ຘປູຊາ ກຣີຍຕີຕິອາທີສຸ ປຸພ຺ພເຈຕນາວເສນ ປຸຎ຺ຎໍ ໂຫຕິ. ສພ຺ພນ຺ຕິມຊວເນ ວຕ຺ຕມານສ຺ສາປີຕິ ວທນ຺ຕິ.

໖໒໖. ‘‘ເອເຕນານຸສາເຣນ ອາຣຸປ຺ປຈຸຕິຍາປິ ອນນ຺ຕຣາ ປຏິສນ຺ຘິ ເວທິຕພ຺ພາ’’ຕິ ອິທໍ ກສ຺ມາ ວຸຕ຺ຕໍ, ນນຸ ‘‘ປຖວີກສິຓຊ຺ຌານາທິວເສນ ປຏິລທ຺ຘມຫຄ຺ຄຕສ຺ສ ສຸຄຕິຍໍ ຐິຕສ຺ສາ’’ຕິ ເອວມາທິເກ ເອວ ນເຍ ອຍມ຺ປິ ປຏິສນ຺ຘິ ອວຣຸທ຺ຘາຕິ? ນ, ຕຕ຺ຖ ຣູປາວຈຣຈຸຕິອນນ຺ຕຣາຍ ເອວ ປຏິສນ຺ຘິຍາ ວຸຕ຺ຕຕ຺ຕາ. ຕຕ຺ຖ ຫິ ‘‘ປຖວີກສິຓາທິກໍ ວາ ນິມິຕ຺ຕໍ ມຫຄ຺ຄຕຈິຕ຺ຕໍ ວາ ມໂນທ຺ວາເຣ ອາປາຖໍ ອາຄຈ຺ຉຕິ, ຈກ຺ຂຸໂສຕານໍ ວາ’’ຕິອາທິນາ ເຕນ ວຈເນນ ຣູປາວຈຣຈຸຕິຍາ ເອວ ອນນ຺ຕຣາ ປຏິສນ຺ຘິ ວຸຕ຺ຕາຕິ ວິຎ຺ຎາຍຕິ. ອຖາປິ ຍຖາສມ຺ຠວໂຍຊນາຍ ອຍມ຺ປິ ປຏິສນ຺ຘິ ຕຕ຺ເຖວ ອວຣຸທ຺ຘາ, ອຣູປາວຈຣຈຸຕິອນນ຺ຕຣາ ປນ ຣູປາວຈຣປຏິສນ຺ຘິ ນຕ຺ຖິ. ອຣູປາວຈເຣ ຈ ອຸປຣູປຣິ ຈຸຕິຍາ ອນນ຺ຕຣາ ເຫຏ຺ຐິມາ ເຫຏ຺ຐິມາ ປຏິສນ຺ຘິ ນຕ຺ຖີຕິ ຈຕຸຕ຺ຖາຣຸປ຺ປຈຸຕິຍາ ນວຕ຺ຕພ຺ພາຣມ຺ມຓປຏິສນ຺ຘິ ນຕ຺ຖິ. ເຕນ ຕໂຕ ຕຕ຺ເຖວ ອຕີຕາຣມ຺ມຓາ, ກາມາວຈເຣ ຈ ອຕີຕປຈ຺ຈຸປ຺ປນ຺ນາຣມ຺ມຓາ ປຏິສນ຺ຘິ. ອິຕຣາຫິ ຈ ຍຖາສມ຺ຠວໍ ອຕີຕນວຕ຺ຕພ຺ພາຣມ຺ມຓາ ອາຣຸປ຺ປປຏິສນ຺ຘິ, ອຕີຕປຈ຺ຈຸປ຺ປນ຺ນາຣມ຺ມຓາ ຈ ກາມາວຈຣປຏິສນ຺ຘິ ໂຍເຊຕພ຺ພາຕິ ອິມສ຺ສ ວິເສສສ຺ສ ທສ຺ສນຕ຺ຖໍ ວິສຸໍ ອຸທ຺ຘຣຓໍ ກຕໍ.

໖໒໗. ເອວໍ ອາຣມ຺ມຓວເສນ ເອກວິຘາຍ ກາມາວຈຣສຸຄຕິຈຸຕິຍາ ທຸວິຘາ ທຸຄ຺ຄຕິປຏິສນ຺ຘິ, ທຸຄ຺ຄຕິຈຸຕິຍາ ທຸວິຘາ ສຸຄຕິປຏິສນ຺ຘິ, ກາມາວຈຣສຸຄຕິຈຸຕິຍາ ທ຺ວິເອກທ຺ວິປ຺ປກາຣານໍ ກາມຣູປາຣູປານໍ ວເສນ ປຎ຺ຈວິຘາ ສຸຄຕິປຏິສນ຺ຘິ, ຣູປາວຈຣຈຸຕິຍາ ຕເຖວ ປຎ຺ຈວິຘາ, ທຸວິຘາຍ ອາຣຸປ຺ປຈຸຕິຍາ ປຈ຺ເຈກໍ ທ຺ວິນ຺ນໍ ທ຺ວິນ຺ນໍ ກາມາຣຸປ຺ປານໍ ວເສນ ອຏ຺ຐວິຘາ ຈ ປຏິສນ຺ຘິ ທສ຺ສິຕາ. ທຸຄ຺ຄຕິຈຸຕິຍາ ປນ ເອກວິຘາຍ ທຸຄ຺ຄຕິປຏິສນ຺ຘິ ທຸວິຘາ ນ ທສ຺ສິຕາ, ຕໍ ທສ຺ເສຕຸໍ ‘‘ທຸຄ຺ຄຕິຍໍ ຐິຕສ຺ສ ປນາ’’ຕິອາທິ ວຸຕ຺ຕໍ. ຍຖາ ວຸຕ຺ຕາ ປນ –

ທ຺ເວ ທ຺ເວ ປຎ຺ຈາຖ ປຎ຺ຈຏ຺ຐ, ທ຺ເວ ຠວາລມ຺ພເຠທໂຕ;

ຈຸຕິຍາ ຕາທິສາເຍຕາ, ຈຕຸວີສຕິ ສນ຺ຘິໂຍ. (ວິຠ. ມູລຏີ. ໒໒໗);

໖໒໘. ‘‘ກາມາວຈຣສ຺ສ ກຸສລສ຺ສ ກມ຺ມສ຺ສ ກຕຕ຺ຕາ’’ຕິອາທິນາ (ຘ. ສ. ໔໓໑) ນານາກ຺ຂຓິກກມ຺ມປຈ຺ຈຍຠາໂວ ເຫຏ຺ຐາ ທສ຺ສິຕປ຺ປກາໂຣຕິ ອຸປນິສ຺ສຍຠາວເມວ ທສ຺ເສນ຺ໂຕ ‘‘ວຸຕ຺ຕຎ຺ເຫຕ’’ນ຺ຕິອາທິມາຫ.

ນິສ຺ສຍປຈ຺ຈຍຠູເຕນ ຣູເປນ ສຫປວຕ຺ຕິເຍເວຕ຺ຖ ວິຎ຺ຎາຓສ຺ສ ເຕນ ມິສ຺ສິຕາ, ຕທຠາໂວ ອມິສ຺ສິຕາ. ຍວນ຺ຕິ ເອຕ຺ຖ ສຕ຺ຕາ ເອກຊາຕິສມນ຺ວເຍນ ອຎ຺ຎມຎ຺ຎມິສ຺ສິຕາ ໂຫນ຺ຕີຕິ ໂຍນິໂຍ. ສຸຈຣິຕທຸຈ຺ຈຣິຕວເສນ ຄນ຺ຕພ຺ພາ ປາປຸຓິຕພ຺ພາຕິ ຄຕິໂຍ. ຕິຏ຺ຐຕິ ເອຕ຺ຖາຕິ ຐິຕິ, ວິຎ຺ຎາຓສ຺ສ ຐິຕິ ວິຎ຺ຎາຓຏ຺ຐິຕິ. ນານຕ຺ຕກາຍນານຕ຺ຕສຎ຺ຎີຕິອາທິອາວາໂສ ເອວ ສຕ຺ເຕຫິ ອາວສິຕພ຺ພໂຕ ສຕ຺ຕາວາໂສ. ອສຎ຺ຎສຕ຺ຕາວາສສ຺ສ ອິຘ ອສມ຺ຠວໂຕ ‘‘ສຕ຺ຕາວາສວເສນ ອຏ຺ຐວິຘໍ ໂຫຕີ’’ຕິ ວຸຕ຺ຕໍ.

໖໒໙. ອຎ຺ຎຕ຺ຣ ຊາຕິປຓ຺ຑກປຏິສນ຺ຘິຍາຕິ ເອຕ຺ຖ ປຐມກປ຺ປິກປຏິສນ຺ຘິຍາປີຕິ ວຕ຺ຕພ຺ພໍ. ສາປິ ຫິ ຠາເວນ ວິນາວ ອຸປ຺ປຊ຺ຊຕີຕິ.

ໂອມໂຕຕິ ອວມໂຕ, ອວກໍສໂຕຕິ ອຕ຺ໂຖ. ອາທິນາຕິ ‘‘ມິສ຺ສໍ ອມິສ຺ສ’’ນ຺ຕິ ເອຕສ຺ມິໍ ທຸເກ ອາທິມ຺ຫິ ວຸຕ຺ເຕນ ມິສ຺ສວິຎ຺ຎາເຓນ. ໂອມໂຕ ທ຺ເວ ວາ ຕໂຍ ວາ ທສກາ ອຸປ຺ປຊ຺ຊນ຺ຕີຕິ ຄພ຺ຠເສຍ຺ຍການໍ ວເສນ ວຸຕ຺ຕໍ. ອຎ຺ຎຕ຺ຖ ປນ ອເນເກ ກລາປາ ສຫ ອຸປ຺ປຊ຺ຊນ຺ຕິ. ພ຺ຣຫ຺ມຕ຺ຕຠາເວປິ ຫິ ອເນກຄາວຸຕປ຺ປມາເຓນ ອເນເກ ກລາປາ ສຫ ອຸປ຺ປຊ຺ຊນ຺ຕີຕິ ຕິໍສໂຕ ອຘິກາເນວ ຣູປານິ ໂຫນ຺ຕິ. ຕທຫຸຊາຕເອຬກສ຺ສ ໂລມໍ ຊາຕິອຸຓ຺ຓາຕິ ເກຈິ. ຫິມວນ຺ຕປ຺ປເທເສ ຊາຕິມນ຺ຕເອຬກໂລມໍ ຊາຕິອຸຓ຺ຓາຕິ ອປເຣ. ຄພ຺ຠໍ ຜາເລຕ຺ວາ ຄຫິຕເອຬກໂລມໍ ຊາຕິອຸຓ຺ຓາຕິ ອຎ຺ເຎ. ອິມາສຸ ຄຕີສຸ ອິມາ ໂຍນິໂຍ ສມ຺ຠວນ຺ຕິ, ອິມາສຸ ນ ສມ຺ຠວນ຺ຕີຕິ ເອວໍ ໂຍນີນໍ ຄຕິວເສນ ສມ຺ຠວເຠໂທ.

໖໓໐. ຠຸມ຺ມວຊ຺ເຊສູຕິ ຠຸມ຺ມເທວານໍ ວຊ຺ຊນໍ ໂຍນິວິຠາຄໍ ປຕິ ເຕສໍ ມນຸສ຺ສສທິສຕ຺ຕາ. ໂຍນິໂຍ ຕິສ຺ໂສ ປຸຣິມິກາ ນ ໂຫນ຺ຕີຕິ ໂຍນິຕ຺ຕຍປຏິກ຺ເຂເປນ ປຈ຺ຉິມາ ໂຍນິ ອນຸຎ຺ຎາຕາຕິ ອຕ຺ຖໂຕ ອາປນ຺ນເມວ ໂຫຕິ. ຄຕິຕ຺ຕເຍຕິ ມນຸສ຺ສເປຕຕິຣຈ຺ຉານສຎ຺ຎິເຕ ຄຕິຕ຺ຕເຍ. ຕຎ຺ຫິ ເອຕ຺ຖ ປຸພ຺ເພ ອນາມຏ຺ຐໍ.

ຈ-ສທ຺ໂທ ອວຸຕ຺ຕສມຸຈ຺ຈຍຕ຺ໂຖຕິ ທສ຺ເສຕຸໍ ‘‘ຈ-ສທ຺ເທນາ’’ຕິອາທິ ວຸຕ຺ຕໍ. ກສ຺ມາ ປນ ນິຊ຺ຌາມຕຓ຺ຫິກເປເຕສຸ ປຸຣິມິກາ ຕິສ຺ໂສ ໂຍນິໂຍ ນ ສນ຺ຕີຕິ? ອສມ຺ຠວໂຕ. ຕາສຎ຺ຫິ ນິຈ຺ຈາຕຸຣຠາວໂຕ ກາມເສວາ ນຕ຺ຖີຕິ ນ ຕາ ອຓ຺ຑຊາທໂຍ ໂຫນ຺ຕິ. ກຸຈ຺ຉິຍໍ ຕາສໍ ຄພ຺ໂຠ ນາວຕິຏ຺ຐຕິ ຊາລສພ຺ຠາວໂຕຕິ ເກຈິ. ອຄ຺ຄິຊາລາຍ ສນ຺ຕປ຺ປມານສຣີຣາ ເອຕາ ນິພ຺ພຕ຺ຕນ຺ຕີຕິ ອລ຺ລຏ຺ຐາເນສຸ, ປຸປ຺ຜາທີສຸ ຈ ສມ຺ຠວາຠາວໂຕ ສໍເສທຊຕາປິ ຕາສໍ ນຕ຺ເຖວາຕິ ວທນ຺ຕິ. ເຕນາຫ ‘‘ໂອປປາຕິກາ ເອວ ຫິ ເຕ ໂຫນ຺ຕີ’’ຕິ.

ຣູປີພ຺ຣຫ຺ເມສຸ ຕາວ ໂອປປາຕິກໂຍນິເກສູຕິ ໂອປປາຕິກໂຍນິເກຫິ ຣູປີພ຺ຣຫ຺ເມ ນິທ຺ຘາເຣຕິ. ຣູປີພ຺ຣຫ຺ເມສູຕິ ຫິ ອຘິກຣເຓ ຠຸມ຺ມໍ, ໂອປປາຕິເກສູຕິ ນິທ຺ຘາຣເຓ. ເຕນ ‘‘ໂອປປາຕິກໂຍນິເກສູ’’ຕິ ສາມຎ຺ຎໂຕ ວຸຕ຺ຕຣາສິໂຕ ‘‘ຣູປີພ຺ຣຫ຺ເມສູ’’ຕິ ວິເສເສນ ຕເທກເທສໍ ນິທ຺ຘາເຣຕິ. ຈກ຺ຂຸໂສຕວຕ຺ຖຸທສການໍ, ຊີວິຕນວກສ຺ສ ຈາຕິ ເອຕ຺ຖ ເກຈິ ‘‘ຈກ຺ຂຸໂສຕວຕ຺ຖຸສຕ຺ຕການໍ, ຊີວິຕຉກ຺ກສ຺ສ ຈາຕິ ຈຕຸນ຺ນໍ ກລາປານໍ ວເສນ ຣູປຠເວ ປຏິສນ຺ຘິວິຎ຺ຎາເຓນ ສຫ ສຕ຺ຕວີສຕິ ຣູປານິ ອຸປ຺ປຊ຺ຊນ຺ຕິ, ຕຕ຺ຖ ຄນ຺ຘຣສາຫາຣານໍ ປຏິກ຺ຂິຕ຺ຕຕ຺ຕາ’’ຕິ ກາຣຓໍ ວຕ຺ວາ ຕໍ ສມຕ຺ເຖນ຺ຕາ ‘‘ປາຬິຍຎ຺ຫິ ‘ຣູປຘາຕຸຍາ ອຸປປຕ຺ຕິກ຺ຂເຓ ຐເປຕ຺ວາ ອຎ຺ຎສຕ຺ຕານໍ ເທວານໍ ປຎ຺ຈາຍຕນານິ ປາຕຸຠວນ຺ຕິ, ປຎ຺ຈ ຘາຕຸໂຍ ປາຕຸຠວນ຺ຕີ’ຕິ (ວິຠ. ໑໐໑໕-໑໐໑໖) ວຸຕ຺ຕໍ, ຕຖາ ‘ຣູປຘາຕຸຍາ ຉ ອາຍຕນານິ, ນວ ຘາຕຸໂຍ’ຕິ ສພ຺ພສງ຺ຄຫກວເສນ ຕຕ຺ຖ ວິຊ຺ຊມານາຍຕນຘາຕຸໂຍ ທສ຺ເສຕຸໍ ວຸຕ຺ຕໍ. ກຖາວຕ຺ຖຸມ຺ຫິ ຈ ຆານາຍຕນາທີນໍ ວິຍ ຄນ຺ຘາຍຕນາທີນຎ຺ຈ ຕຕ຺ຖ ຠາໂວ ປຏິກ຺ຂິຕ຺ໂຕ ‘ອຕ຺ຖິ ຕຕ຺ຖ ຆານາຍຕນນ຺ຕິ? ອາມນ຺ຕາ. ອຕ຺ຖິ ຕຕ຺ຖ ຄນ຺ຘາຍຕນນ຺ຕິ? ນ ເຫວໍ ວຕ຺ຕພ຺ເພ’ຕິອາທິນາ (ກຖາ. ໕໒໐). ນ ຈ ອໂຜຏ຺ຐພ຺ພາຍຕນານໍ ປຖວີຘາຕຸອາທີນໍ ວິຍ ອຄນ຺ຘຣສາຍຕນານໍ ຄນ຺ຘຣສານໍ ຕຕ຺ຖ ຠາໂວ ສກ຺ກາ ວຕ຺ຕຸໍ, ຜຸສິຕຸໍ ສກ຺ກຸເຓຍ຺ຍຕາວິນິມຸຕ຺ຕສ຺ສ ປຖວີອາທິສຠາວສ຺ສ ວິຍ ຄນ຺ຘຣສາຍຕນຠາວວິນິມຸຕ຺ຕສ຺ສ ຄນ຺ຘຣສສຠາວສ຺ສ ອຠາວາ. ຍທິ ຈ ຆານສມ຺ຜສ຺ສາທີນໍ ກາຣຓຠາໂວ ນຕ຺ຖີຕິ ‘ອາຍຕນານີ’ຕິ ເຕ ນ ວຸຈ຺ເຈຍ຺ຍຸໍ, ຘາຕຸສທ຺ໂທ ປນ ນິສ຺ສຕ຺ຕນິຊ຺ຊີວວາຈໂກຕິ ‘ຄນ຺ຘຘາຕຸ ຣສຘາຕູ’ຕິ ອວຈເນ ກາຣຓໍ ນຕ຺ຖິ, ຘມ຺ມຠາໂວ ຈ ເຕສໍ ເອກນ຺ເຕນ ອິຈ຺ຉິຕພ຺ໂພ ສຠາວຘາຣຓາທິລກ຺ຂຓໂຕ ອຎ຺ຎສ຺ສ ອຠາວາ. ຘມ຺ມານຎ຺ຈ ອາຍຕນຠາໂວ ເອກນ຺ຕິໂກ ຍມເກ ວຸຕ຺ໂຕ ‘ຘມ຺ໂມ ອາຍຕນນ຺ຕິ? ອາມນ຺ຕາ’ຕິ (ຍມ. ໑.ອາຍຕນຍມກ.໑໓). ຕສ຺ມາ ເຕສໍ ຄນ຺ຘຣສາຍຕນຠາວາຠາເວປິ ໂກຈິ ອາຍຕນຠາໂວ ວຕ຺ຕພ຺ໂພ. ຍທິ ຈ ໂຜຏ຺ຐພ຺ພຠາວໂຕ ອຎ຺ໂຎ ປຖວີອາທິຠາໂວ ວິຍ ຄນ຺ຘຣສຠາວໂຕ ອຎ຺ໂຎ ເຕສໍ ໂກຈິ ສຠາໂວ ສິຍາ, ເຕສໍ ຘມ຺ມາຍຕນສງ຺ຄໂຫ. ຄນ຺ຘຣສຠາເວ ປນ ອາຍຕນຠາເວ ຈ ສຕິ ‘ຄນ຺ໂຘ ຈ ໂສ ອາຍຕນຎ຺ຈ ຄນ຺ຘາຍຕນໍ, ຣໂສ ຈ ໂສ ອາຍຕນຎ຺ຈ ຣສາຍຕນ’ນ຺ຕິ ອິທມາປນ຺ນເມວາຕິ ຄນ຺ຘຣສາຍຕນຠາໂວ ຈ ນ ສກ຺ກາ ນິວາເຣຕຸໍ. ‘ຕໂຍ ອາຫາຣາ’ຕິ ຈ ວຈນໂຕ ກພຬີກາຣາຫາຣສ຺ສ ຕຕ຺ຖ ອຠາໂວ ວິຎ຺ຎາຍຕິ. ຕສ຺ມາ ຍຖາ ປາຬິຍາ ອວິໂຣໂຘ ໂຫຕິ, ຕຖາ ຣູປຄຓນາ ກາຕພ຺ພາ. ເອວຎ຺ຫິ ຘມ຺ມຕາ ນ ວິໂລມິຕາ ໂຫຕີ’’ຕິ ວທນ຺ຕິ.

ເອຕ຺ຖ ວຸຈ຺ຈເຕ – ຣູປາວຈຣສຕ຺ຕານໍ ຆານຊິວ຺ຫາຍຕນາຠາວໂຕ ວິຊ຺ຊມານາປິ ຄນ຺ຘຣສາ ອາຍຕນກິຈ຺ຈໍ ນ ກໂຣນ຺ຕີຕິ ເຕ ອນາມສິຕ຺ວາ ປາຬິຍໍ ‘‘ປຎ຺ຈາຍຕນານິ ປາຕຸຠວນ຺ຕີ’’ຕິ (ວິຠ. ໑໐໑໕), ‘‘ຉ ອາຍຕນານີ’’ຕິ (ວິຠ. ໙໙໒) ຈ ອາທິ ວຸຕ຺ຕໍ, ‘‘ຕໂຍ ອາຫາຣາ’’ຕິ ຈ ອຊ຺ໂຌຫຣິຕພ຺ພສ຺ສ ອາຫາຣສ຺ສ ອຠາເວນ ໂອຊຏ຺ຐມກຣູປສມຸຏ຺ຐາປນສງ຺ຂາຕສ຺ສ ອາຫາຣກິຈ຺ຈສ຺ສ ອກຣຓໂຕ, ນ ສພ຺ເພນ ສພ຺ພໍ ຄນ຺ຘຣສານໍ, ໂອຊາຍ ຈ ອຠາວໂຕ. ອິຕິ ວິສຍິໂນ, ກິຈ຺ຈສ຺ສ ຈ ອຠາເວນ ວິສໂຍ, ກິຈ຺ຈວາ ຈ ຘມ຺ໂມ ນ ວຸຕ຺ໂຕ. ຍສ຺ມິຎ຺ຫິ ຠເວ ວິສຍີ ນຕ຺ຖິ, ຕສ຺ມິໍ ຕໍເຫຕຸໂກ ນິປ຺ປຣິຍາເຍນ ວິສຍສ຺ສ ອາຍຕນຠາໂວ ນຕ຺ຖີຕິ ວິຊ຺ຊມານສ຺ສາປິ ອວຈນໍ ຍຖາ ຕຕ຺ເຖວ ຣູປຠເວ ປຖວີເຕໂຊວາໂຍຘາຕູນໍ ໂຜຏ຺ຐພ຺ພາຍຕນຠາເວນ. ຍສ຺ສ ປນ ຍຕ຺ຖ ວຈນໍ, ຕສ຺ສ ຕຕ຺ຖ ວິສຍີສພ຺ຠາວເຫຕຸໂກ ນິປ຺ປຣິຍາເຍນ ອາຍຕນຠາໂວ ວຸຕ຺ໂຕ ຍຖາ ຕຕ຺ເຖວ ຣູປາຍຕນສ຺ສ.

ຍທິ ວິສຍີສພ຺ຠາວເຫຕຸໂກ ວິສຍສ຺ສ ນິປ຺ປຣິຍາເຍນ ອາຍຕນຠາໂວ, ກຖມສຎ຺ຎສຕ຺ຕານໍ ທ຺ເວ ອາຍຕນານິ ປາຕຸຠວນ຺ຕີຕິ, ອສຎ຺ຎສຕ຺ຕານຎ຺ຫິ ຈກ຺ຂາຍຕນໍ ນຕ຺ຖິ, ອຈກ຺ຂາຍຕນຠາເວນ ຈ ເນສໍ ຣູປາຍຕນໍ ອຎ຺ເຎສໍ ອວິສໂຍຕິ? ນາຍໍ ວິໂຣໂຘ. ເຍນ ອຘິປ຺ປາເຍນ ຣູປຘາຕຸຍໍ ສຎ຺ຎີນໍ ຄນ຺ຘາຍຕນາທີນໍ ອວຈນໍ, ເຕນ ຣູປາຍຕນສ຺ສາປິ ອວຈນນ຺ຕິ ອສຎ຺ຎີນໍ ເອກໍ ອາຍຕນໍ ວຕ຺ຕພ຺ພໍ. ຍຖາສກຎ຺ຫິ ອິນ຺ທ຺ຣິຍໂຄຈຣຠາວາເປກ຺ຂາຍ ເຍສໍ ນິປ຺ປຣິຍາເຍນ ອາຍຕນຠາໂວ ອຕ຺ຖິ, ເຕສຸ ນິທ຺ທິສິຍມາເນສຸ ຕທຠາວໂຕ ຣູປຘາຕຸຍໍ ສຎ຺ຎີນໍ ຄນ຺ຘາທິເກ ວິສຸໍ ອາຍຕນຠາເວນ ອວຕ຺ວາ ຘມ຺ມສຠາວານຕິວຕ຺ຕນໂຕ, ມໂນວິຎ຺ຎາຓສ຺ສ ຈ ວິສຍຠາວູປຄມນໂຕ ຘມ຺ມາຍຕນນ຺ໂຕຄເຘ ກຕ຺ວາ ‘‘ປຎ຺ຈາຍຕນານີ’’ຕິ ປາຬິຍໍ (ວິຠ. ໑໐໑໕) ວຸຕ຺ຕໍ. ເອຕທຕ຺ຖຎ຺ຫິ ‘‘ຘມ຺ມາຍຕນ’’ນ຺ຕິ ສາມຎ຺ຎໂຕ ນາມກຣຓໍ, ປິຏ຺ຐິວຏ຺ຏການິ ວາ ຕານິ ກຕ຺ວາ ‘‘ປຎ຺ຈາຍຕນານີ’’ຕິ ວຸຕ຺ຕໍ.

ເຍນ ຈ ປນ ອຘິປ຺ປາເຍນ ອສຎ຺ຎີນໍ ຣູປາຍຕນໍ ວຸຕ຺ຕໍ, ເຕນ ສຎ຺ຎີນມ຺ປິ ຄນ຺ຘາທີນໍ ວິສຸໍ ຄຫຓໍ ກາຕພ຺ພນ຺ຕິ ອິມສ຺ສ ນຍສ຺ສ ທສ຺ສນຕ຺ຖໍ ‘‘ອສຎ຺ຎສຕ຺ຕານໍ ເທວານໍ ທ຺ເວ ອາຍຕນານິ ປາຕຸຠວນ຺ຕີ’’ຕິ (ວິຠ. ໑໐໑໗) ວຸຕ຺ຕໍ. ອສຕິປິ ຫິ ຕຕ຺ຖ ອຕ຺ຕໂນ ອິນ຺ທ຺ຣິເຍ ຣູປສ຺ສ ວຓ຺ຓາຍຕນສຠາວາຕິກ຺ກໂມ ນຕ຺ເຖວາຕິ ຕໍ ຣູປາຍຕນນ຺ຕ຺ເວວ ວຸຈ຺ຈຕິ. ອິມິນາ ຈ ນຍທສ຺ສເນນ ຄນ຺ຘາທີນິ ຕີຓິ ປກ຺ຂິປິຕ຺ວາ ສຎ຺ຎີນໍ ອຏ຺ຐ ອາຍຕນານິ, ອສຎ຺ຎີນໍ ປຎ຺ຈາຕິ ອຍມຕ຺ໂຖ ທສ຺ສິໂຕ ໂຫຕິ. ເອວຎ຺ເຈຕໍ ສມ຺ປຏິຈ຺ຉິຕພ຺ພໍ, ອຎ຺ຎຖາ ຣູປໂລເກ ຜຸສິຕຸໍ ອສກ຺ກຸເຓຍ຺ຍຕາຍ ປຖວີອາທີນໍ ພ຺ຣຫ຺ມານໍ ວຈີໂຆໂສ ເອວ ນ ສິຍາ. ນ ຫິ ປຏິຆຏ຺ຏນານິຆໍສມນ຺ຕເຣນ ສທ຺ທປ຺ປວຕ຺ຕິ ອຕ຺ຖິ, ນ ຈ ຜຸສນສຠາວານໍ ກຕ຺ຖຈິ ອຜຸສນຠາວຕາ ສກ຺ກາ ວິຎ຺ຎາຕຸໍ, ໂຜຏ຺ຐພ຺ພາຍຕນສງ຺ຂາຕສ຺ສ ຈ ຠູຕຕ຺ຕຍສ຺ສ ອຠາເວ ຣູປຠເວ ຣູປາຍຕນາທີນມ຺ປິ ສມ຺ຠໂວ ເອວ ນ ສິຍາ. ຕສ຺ມາ ຜຸສິຕຸໍ ສກ຺ກຸເຓຍ຺ຍຕາຍປິ ປຖວີອາທີນໍ ຕຕ຺ຖ ກາຍິນ຺ທ຺ຣິຍາຠາເວນ ເຕສໍ ໂຜຏ຺ຐພ຺ພຠາໂວ ນ ວຸຕ຺ໂຕ. ເອວຎ຺ຈ ກຕ຺ວາ ຣູປຘາຕຸຍໍ ເຕສໍ ສປ຺ປຏິຆວຈນຎ຺ຈ ສມຕ຺ຖິຕໍ ໂຫຕິ. ວຸຕ຺ຕຎ຺ຫິ ‘‘ອສຎ຺ຎສຕ຺ຕານໍ ອນິທສ຺ສນສປ຺ປຏິຆໍ ເອກໍ ມຫາຠູຕໍ ປຏິຈ຺ຈ ທ຺ເວ ມຫາຠູຕາ’’ຕິອາທິ (ປຏ຺ຐາ. ໒.໒໒.໒໐).

ປຏິໂຆ ຈ ນາມ ຠູຕຕ຺ຕຍສ຺ສ ກາຍປ຺ປສາທໍ ປຕິ ຕນ຺ນິສ຺ສຍຠູຕຆຏ຺ຏນາທ຺ວາເຣນ ອຠິມຸຂຠາໂວ, ອິຘ ປນ ຕໍສຠາວຕາ. ໂສ ຈ ຜຸສິຕຸໍ ອສກ຺ກຸເຓຍ຺ຍສຠາວສ຺ສ ຆຏ຺ຏນາຍ ອຠາວໂຕ ນຕ຺ຖິ. ຍທິ ຕຕ຺ຖ ອສຕິປິ ວິສຍິນິ ຣູປາຍຕນໍ ຄເຫຕ຺ວາ ‘‘ທ຺ເວ ອາຍຕນານີ’’ຕິ ວຸຕ຺ຕໍ, ອຖ ກສ຺ມາ ຄນ຺ຘາຍຕນາທີນິ ຄເຫຕ຺ວາ ‘‘ປຎ຺ຈາຍຕນານີ’’ຕິ ນ ວຸຕ຺ຕນ຺ຕິ? ນຍທສ຺ສນວເສນ ເທສນາ ປວຕ຺ຕາຕິ ວຸຕ຺ໂຕວາຍມຕ຺ໂຖ. ອຖ ວາ ຕຕ຺ຖ ຣູປາຍຕນສ຺ເສວ ວຈນໍ ກທາຈິ ອຎ຺ຎຠູມິການໍ ປສາທສ຺ສ ວິສຍຠາວໍ ສນ຺ຘາຍ, ນ ປນ ອິຕເຣສໍ ອຠາວໂຕ, ນາປິ ປຣິຍາເຍນປິ ອາຍຕນຠາວາຠາວໂຕ. ອສຎ຺ຎີນຎ຺ຫິ ຣູປາຍຕນໍ ສມານຕລວາສີນໍ ເວຫປ຺ຜລານໍ, ອຸປຣິຠູມິການຎ຺ຈ ສຸທ຺ຘາວາສານໍ ປສາທສ຺ສ ວິສຍຠາວໍ ຄຈ຺ຉຕິ, ນ ປນ ຄນ຺ຘຣສາຕິ ເຕສໍເຍວ ຕຕ຺ຖ ອວຈນໍ ຍຸຕ຺ຕໍ. ກຖາວຕ຺ຖຸມ຺ຫິ ຈ ນິປ຺ປຣິຍາເຍນ ຄນ຺ຘາຍຕນາທີນໍ ອຕ຺ຖິຠາວໍ ປຏິຊານນ຺ຕໍ ສນ຺ຘາຍ ປຏິເສໂຘ ກໂຕ.

ຍທິປິ ເຈຕໍ ວຈນໍ ຕຕ຺ຖ ຄນ຺ຘາຍຕນາທີນໍ ອຠາວວິຠາວນໍ ນ ໂຫຕິ, ອຕ຺ຖິຠາວທີປນມ຺ປິ ປນ ອຎ຺ຎວຈນໍ ນຕ຺ເຖວາຕິ? ນຍິທເມວໍ, ອຏ຺ຐກຖາສຸ ຕຕ຺ຖ ເນສໍ ອຕ຺ຖິຠາວສ຺ສ ນິທ຺ຘາເຣຕ຺ວາ ວຸຕ຺ຕຕ຺ຕາ. ຍຎ຺ຫິ ອຏ຺ຐກຖາວຈນໍ ປາຬິຍາ ນ ວິຣຸຊ຺ຌຕິ, ຕໍ ປາຬິ ວິຍ ປມາຓຠູຕໍ ອຄຣຫິຕາຍ ອາຈຣິຍປຣມ຺ປຣາຍ ຍາວຊ຺ຊຕນາ ອາຄຕຕ຺ຕາ. ຕຕ຺ຖ ສິຍາ – ຍໍ ປາຬິຍາ ນ ວິຣຸຊ຺ຌຕິ ອຏ຺ຐກຖາວຈນໍ, ຕໍ ປມາຓໍ, ອິທໍ ປນ ວິຣຸຊ຺ຌຕີຕິ? ນຍິທເມວໍ, ຍຖາ ນ ວິຣຸຊ຺ຌຕິ, ຕຖາ ປຏິປາທິຕຕ຺ຕາ. ຈກ຺ຂາທີນໍ ອາຍຕນານໍ, ຕນ຺ນິສ຺ສຍານຎ຺ຈ ວິຎ຺ຎາຓານໍ ສຕ຺ຕສຸຎ຺ຎຕາສນ຺ທສ຺ສນຕ຺ຖໍ ຠຄວໂຕ ຘາຕຸເທສນາຕິ ອາຍຕນຠາເວນ ວຸຕ຺ຕານໍເຍວ ຘາຕຸຠາວທີປນໂຕ ຘາຕຸຠາວສ຺ສາປິ ເຕສໍ ອວຈນໍ ຍຸຊ຺ຊຕິ ເອວ. ຕສ຺ມາ ຍຖາ ປາຬິຍາ ອວິໂຣໂຘ ໂຫຕິ, ຕຖາ ຈກ຺ຂຸທສກາທິວເສນ ອິຘ ຣູປຄຓນາ ກຕາຕິ ນ ເອຕ຺ຖ ຘມ຺ມຕາວິໂລມນາສງ຺ກາຍ ໂອກາໂສຕິ ເວທິຕພ຺ພໍ.

ອຎ຺ເຎສຸ ສໍເສທຊໂອປປາຕິກໂຍນິເກສູຕິ ຣູປີພ຺ຣຫ຺ເມ ປນ ຐເປຕ຺ວາ ອຎ຺ເຎສຸ ໂອປປາຕິເກສຸ, ສໍເສທເຊສຸ ຈາຕິ ເອວເມຕ຺ຖ ສມ຺ພນ຺ໂຘ ເວທິຕພ຺ໂພ. ໂອປປາຕິກວິເສສນຎ຺ເຫຕ຺ຖ ອຎ຺ຎຄ຺ຄຫຓໍ, ນ ສໍເສທຊວິເສສນໍ ອສມ຺ຠວໂຕ. ສຕິ ຫິ ສມ຺ຠເວ, ພ຺ຍຠິຈາເຣ ຈ ວິເສສນວິເສສິຕພ຺ພຕາ ໂຫຕິ. ກາມາວຈຣເທເວສຸ ສພ຺ພກາລໍ ປຏິສນ຺ຘິປວຕ຺ຕີສຸ ຍຖາວຸຕ຺ຕາຍ ສນ຺ຕຕິຍາ ຣູປານໍ ລພ຺ຠນໂຕ ວຸຕ຺ຕໍ ‘‘ຕານິ ຈ ນິຈ຺ຈໍ ເທເວສູ’’ຕິ. ນ ຫິ ເຕ ກທາຈິປິ ວິກລິນ຺ທ຺ຣິຍາ, ອຠາວກາ ຈ ໂຫນ຺ຕີຕິ. ຈກ຺ຂຸ ເນສໍ ທສນ຺ນໍ ປູຣໂຓຕິ ກຕ຺ວາ ຈກ຺ຂຸທສໂກ ນາມ, ອສາຘາຣເຓນ ວາ ຈກ຺ຂຸນາ ລກ຺ຂິໂຕ ທສໂກ ຈກ຺ຂຸທສໂກ. ເອວໍ ເສສາຕິ ຍຖາ ຈກ຺ຂຸທສໂກ ວຸຕ຺ໂຕ, ເອວໍ ເສສາປິ ທສກາ ໂຍເຊຕ຺ວາ ເວທິຕພ຺ພາ. ‘‘ສໍເສທຊູປປາຕໂຍນີສຸ, ອວກໍສໂຕ ຕິໍສາ’’ຕິ ສງ຺ເຂເປນ ວຸຕ຺ຕມຕ຺ຖໍ ວິວຣນ຺ໂຕ ‘‘ອວກໍສໂຕ ປນາ’’ຕິອາທິມາຫ, ຕໍ ປເນຕໍ ປາຬິຍາ ນ ສເມຕິ. ນ ຫິ ປາຬິຍໍ ກາມາວຈຣານໍ ສໍເສທໂຊປປາຕິການໍ ອຆານການໍ ອຸປປຕ຺ຕິ ວຸຕ຺ຕາ. ຘມ຺ມຫທຍວິຠງ຺ເຄ ຫິ ‘‘ກາມຘາຕຸຍາ ອຸປປຕ຺ຕິກ຺ຂເຓ ກສ຺ສຈິ ເອກາທສາຍຕນານິ ປາຕຸຠວນ຺ຕິ, ກສ຺ສຈິ ທສາຍຕນານິ, ກສ຺ສຈິ ອປຣານິ ທສາຍຕນານິ, ກສ຺ສຈິ ນວາຍຕນານິ, ກສ຺ສຈິ ສຕ຺ຕາຍຕນານິ ປາຕຸຠວນ຺ຕີ’’ຕິ ວຸຕ຺ຕໍ, ນ ວຸຕ຺ຕໍ ‘‘ອຏ຺ຐາຍຕນານິ ປາຕຸຠວນ຺ຕີ’’ຕິ (ວິຠ. ໑໐໐໗). ຍທິ ຫິ ອຆານກສ຺ສາປິ ອຸປປຕ຺ຕິ ສິຍາ, ຕິກ຺ຂຕ຺ຕຸໍ ‘‘ທສາຍຕນານິ ປາຕຸຠວນ຺ຕີ’’ຕິ ວຕ຺ຕພ຺ພໍ ສິຍາ, ຕິກ຺ຂຕ຺ຕຸຎ຺ຈ ‘‘ນວາຍຕນານິ ປາຕຸຠວນ຺ຕີ’’ຕິ, ນ ຈ ຕໍ ວຸຕ຺ຕໍ.

ຕຕ຺ຖ ອຸປປຕ຺ຕິກ຺ຂເຓຕິ ປຏິສນ຺ຘິກ຺ຂເຓ. ເອກາທສາຕິ ປຣິປຸຓ຺ຓາຍຕນສ຺ສ ສທ຺ທາຍຕນວຊ຺ຊານິ ເອກາທສ ອາຍຕນານິ. ກສ຺ສຈິ ທສາຍຕນານີຕິ ອນ຺ຘສ຺ສ ຈກ຺ຂາຍຕນວຊ຺ຊານິ. ອປຣານິ ທສາຍຕນານີຕິ ພຘິຣສ຺ສ ໂສຕາຍຕນວຊ຺ຊານິ. ນວາຍຕນານີຕິ ອນ຺ຘພຘິຣສ຺ສ ຈກ຺ຂຸໂສຕາຍຕນວຊ຺ຊານິ. ສຕ຺ຕາຍຕນານີຕິ ຄພ຺ຠເສຍ຺ຍກສ຺ສ ຣູປຄນ຺ຘຣສກາຍໂຜຏ຺ຐພ຺ພມໂນຘມ຺ມາຍຕນວເສນ ວຸຕ຺ຕໍ. ຍທິ ຈກ຺ຂຸໂສຕຆານວິກໂລປິ ອຸປ຺ປຊ຺ເຊຍ຺ຍ, ຕສ຺ສ ອຏ຺ເຐວາຍຕນານິ ສິຍຸໍ, ນ ຈ ວຸຕ຺ຕໍ ‘‘ອຏ຺ຐາຍຕນານິ ປາຕຸຠວນ຺ຕີ’’ຕິ. ຕສ຺ມາ ນຕ຺ເຖວ ຈກ຺ຂຸໂສຕຆານວິກໂລ. ສຕິ ຈ ອຆານກູປປຕ຺ຕິຍໍ ປຸນປິ ‘‘ກສ຺ສຈິ ອປຣານິປິ ທສາຍຕນານິ ປາຕຸຠວນ຺ຕີ’’ຕິ ວຕ຺ຕພ຺ພໍ ສິຍາ. ຕຖາ ຈ ສຕິ ຍຖາ ອນ຺ຘພຘິຣສ຺ສ ວເສນ ‘‘ກສ຺ສຈິ ນວາຍຕນານິ ປາຕຸຠວນ຺ຕີ’’ຕິ ເອກວາຣໍ ວຸຕ຺ຕໍ, ເອວໍ ອນ຺ຘາຆານກສ຺ສ, ພຘິຣາຆານກສ຺ສ ຈ ວເສນ ‘‘ກສ຺ສຈິ ອປຣານິ ນວາຍຕນານິ, ກສ຺ສຈິ ອປຣານິປິ ນວາຍຕນານິ ປາຕຸຠວນ຺ຕີ’’ຕິ ວຕ຺ຕພ຺ພໍ ສິຍາຕິ ອຕ຺ໂຖ. ເອວໍ ຘາຕຸປາຕຸຠາວາທິປຎ຺ຫານິປິ ວຕ຺ຕພ຺ພານີຕິ ວທນ຺ຕິ. ເອຕ຺ຖ ຈ ຍຖາ ‘‘ສຕ຺ຕຕິ ອຸກ຺ກໍສໂຕຖ ຣູປານີ’’ຕິ ປທໍ ‘‘ສໍເສທຊູປປາຕໂຍນີສູ’’ຕິ ເອຕ຺ຖ ໂຍນິທ຺ວຍວເສນ ໂຍຊີຍຕິ, ນ ເອວໍ ‘‘ອວກໍສໂຕ ຕິໍສາ’’ຕິ ອິທໍ. ອິທໍ ປນ ສໍເສທຊໂຍນິວເສເນວ ໂຍເຊຕພ຺ພໍ. ເອກໂຍຄນິທ຺ທິຏ຺ຐສ຺ສາປິ ເອກເທໂສ ສມ຺ພນ຺ຘໍ ລຠຕີຕິ ສໍເສທຊສ຺ສ ຊຈ຺ຈນ຺ຘພຘິຣອຆານກນປຸໍສກສ຺ສ ຊິວ຺ຫາກາຍວຕ຺ຖຸທສການໍ ວເສນ ຕິໍສ ຣູປານິ ອຸປ຺ປຊ຺ຊນ຺ຕີຕິ ວຸຕ຺ຕໍ, ນ ໂອປປາຕິກສ຺ສາຕິ ອຍເມຕ຺ຖ ອຏ຺ຐກຖາຍມຘິປ຺ປາໂຍ.

ເຍ ປນ ‘‘ໂອປປາຕິກສ຺ສ ຊຈ຺ຈນ຺ຘພຘິຣອຆານກນປຸໍສກສ຺ສ ຊິວ຺ຫາກາຍວຕ຺ຖຸທສການໍ ວເສນ ຕິໍສ ຣູປານິ ອຸປ຺ປຊ຺ຊນ຺ຕີຕິ ມຫາອຏ຺ຐກຖາຍໍ ວຸຕ຺ຕ’’ນ຺ຕິ ວທນ຺ຕິ, ຕໍ ນ ຄເຫຕພ຺ພໍ. ໂສ ຫິ ປມາທປາໂຐ. ເອວຎ຺ຈ ກຕ຺ວາ ອາຍຕນຍມກວຓ຺ຓນາຍໍ ‘‘ກາມຘາຕຸຍໍ ປນ ອຆານໂກ ໂອປປາຕິໂກ ນຕ຺ຖິ. ຍທິ ຠເວຍ຺ຍ, ‘ກສ຺ສຈິ ອຏ຺ຐາຍຕນານິ ປາຕຸຠວນ຺ຕີ’ຕິ ວເທຍ຺ຍາ’’ຕິ (ຍມ. ອຏ຺ຐ. ອາຍຕນຍມກ ໑໘-໒໑) ວຸຕ຺ຕໍ. ອປເຣ ປນາຫຸ ‘‘ກສ຺ສຈິ ເອກາທສາຍຕນານິ ປາຕຸຠວນ຺ຕີຕິ ຍາວ ‘ກສ຺ສຈິ ນວາຍຕນານີ’ຕິ ປາຬິ ໂອປປາຕິເກ ສນ຺ຘາຍ ວຸຕ຺ຕາ. ຕສ຺ມາ ປຸພ຺ເພນາປຣໍ ອຏ຺ຐກຖາຍໍ ອວິໂຣໂຘ ສິທ຺ໂຘ. ຕຖາ ຈ ຍຖາວຸຕ຺ຕປາຬິຍາ ອຍມຕ຺ຖວຓ຺ຓນາ ອຎ຺ຎທຕ຺ຖຸ ສໍສນ຺ທຕິ ສເມຕິເຍວາ’’ຕິ. ຍໍ ປເນເກ ວທນ຺ຕິ ‘‘ໂອປປາຕິກຄ຺ຄຫເຓນ ສໍເສທຊາປິ ສງ຺ຄຍ຺ຫນ຺ຕິ. ຕຖາ ຫິ ຘມ຺ມຫທຍວິຠງ຺ເຄ ‘ກາມຘາຕຸຍາ ອຸປປຕ຺ຕິກ຺ຂເຓ ກສ຺ສຈິ ເອກາທສາຍຕນານິ ປາຕຸຠວນ຺ຕີ’ຕິອາທີນໍ (ວິຠ. ໑໐໐໗) ນິທ຺ເທເສ ‘ໂອປປາຕິການໍ ເປຕານ’ນ຺ຕິອາທິນາ (ວິຠ. ໑໐໐໙) ໂອປປາຕິກຄ຺ຄຫຓເມວ ກຕໍ, ນ ສໍເສທຊຄ຺ຄຫຓ’’ນ຺ຕິ, ຕໍ ປຣິປຸຓ຺ຓາຍຕນານໍເຍວ ສໍເສທຊານໍ ໂອປປາຕິເກສຸ ສງ຺ຄຫຓວເສນ ວຸຕ຺ຕນ຺ຕິ ເວທິຕພ຺ພໍ. ຕຖາ ຫິ ວຸຕ຺ຕໍ ອຏ຺ຐກຖາຍໍ ‘‘ສໍເສທຊໂຍນິກາ ປຣິປຸຓ຺ຓາຍຕນາປຣິປຸຓ຺ຓາຍຕນຠາເວນ ໂອປປາຕິກສງ຺ຄຫໍ ກຕ຺ວາ ວຸຕ຺ຕາ’’ຕິ, ປຘານາຍ ວາ ໂຍນິຍາ ສພ຺ພໍ ປຣິປຸຓ຺ຓາຍຕນໂຍນິໍ ທສ຺ເສຕຸໍ ‘‘ໂອປປາຕິການນ຺ຕິ ວຸຕ຺ຕ’’ນ຺ຕິ ຈ, ອິຘ ປນ ໂຍນິທ຺ວຍໍ ສຣູເປເນວ ປກາເສຕຸໍ, ສໍເສທຊໂຍນິວເສເນວ ຈ ອວກໍສໂຕ ຣູປປວຕ຺ຕິໍ ທສ຺ເສຕຸໍ ໂອປປາຕິກໂຍນິຍາ ອິຕຣໍ ອສງ຺ຄເຫຕ຺ວາ ‘‘ສໍເສທຊູປປາຕໂຍນີສູ’’ຕິ ວຸຕ຺ຕໍ. ຕໍ ສພ຺ພໍ ວີມໍສິຕ຺ວາ ຄເຫຕພ຺ພໍ.

ອຸກ຺ກໍສາວກໍສານໍ ປນ ອນ຺ຕເຣຕິ ‘‘ສຕ຺ຕຕິ, ຕິໍສາ’’ຕິ ເອວໍ ວຸຕ຺ຕານໍ ຣູປສ຺ສ ອຸກ຺ກໍສາວກໍສປຣິຈ຺ເຉທານໍ ມຊ຺ເຌ. ອນຸຣູປໂຕ ວິກປ຺ໂປ ເວທິຕພ຺ໂພຕິ ອປາເຍສຸ ອນ຺ຘສ຺ສ ຉ ຈກ຺ຂຸທສກາຠາວໂຕ, ຕຖາ ພຘິຣສ຺ສ ໂສຕທສກາຠາວໂຕ, ອນ຺ຘພຘິຣສ຺ສ ປນ ປຎ຺ຈ ຈກ຺ຂຸໂສຕທສກາຠາວໂຕຕິ ເອວມາທິນາ ນເຍນ ເວທິຕພ຺ໂພ. ຍໍ ປເນຕ຺ຖ ວຕ຺ຕພ຺ພໍ, ຕໍ ວຸຕ຺ຕເມວາຕິ.

໖໓໑. ຈຸຕິປຏິສນ຺ຘີນໍ ຂນ຺ຘາທີຫິ ອຎ຺ຎມຎ຺ຎສມານຕາ ອເຠໂທ. ອສມານຕາ ເຠໂທ.

ອາຣມ຺ມຓໂຕປິ ອຠິນ຺ນາຕິ ຈຕູສຸ ອາຣຸປ຺ເປສຸ ຕໂຕ ຕໂຕ ຈວິຕ຺ວາ ຕຕ຺ຖ ຕຕ຺ເຖວ ອຸປປຊ຺ຊນ຺ຕສ຺ສ ວເສນ ວຸຕ຺ຕໍ. ຕເຖວ ປນ ເຫຏ຺ຐາ, ຣູປຠເວ ວາ ອຸປປຕ຺ຕິ ນຕ຺ຖິ. ອຣູປຠູມິໂຕ ຈວິຕ຺ວາ ເຫຏ຺ຐາ ອຸປປຕ຺ຕິ ນາມ ກາມຠເວ ເອວ, ຕຕ຺ຖາປິ ຕິເຫຕຸກປຏິສນ຺ຘິ ເອວ. ຣູປຠວໂຕ ປນ ຈຸໂຕ ທຸເຫຕຸໂກປິ ໂຫຕີຕິ ວທນ຺ຕິ. ອມຫຄ຺ຄຕພຫິທ຺ຘາຣມ຺ມຓາຍ ຈຸຕິຍາ ອນນ຺ຕຣາ ມຫຄ຺ຄຕອຊ຺ຌຕ຺ຕາຣມ຺ມຓາ ທຸຕິຍຈຕຸຕ຺ຖາຣຸປ຺ປປຏິສນ຺ຘິ. ເອວໍ ນຍມຕ຺ຕສ຺ສ ທສ຺ສິຕຕ຺ຕາ ວຸຕ຺ຕໍ, ອວຸຕ຺ຕຎ຺ຈ ສພ຺ພໍ ສງ຺ຄເຫຕ຺ວາ ອາຫ ‘‘ອຍໍ ຕາວ ອຣູປຠູມີສຸເຍວ ນໂຍ’’ຕິ. ຣູປາຣູປາວຈຣານໍ ອຸປຈາຣສ຺ສ ພລວຕາຍ ຕໂຕ ຈວິຕ຺ວາ ທຸຄ຺ຄຕິຍໍ ອຸປປຕ຺ຕິ ນຕ຺ຖີຕິ ‘‘ເອກຈ຺ຈສຸຄຕິຈຸຕິຍາ’’ຕິ ອາຫ. ເອກຈ຺ຈທຸຄ຺ຄຕິປຏິສນ຺ຘີຕິ ເອຕ຺ຖ ເອກຈ຺ຈຄ຺ຄຫຓສ຺ສ ປໂຍຊນໍ ມຄ຺ຄິຕພ຺ພໍ. ອຍໍ ປເນຕ຺ຖ ອຘິປ຺ປາໂຍ ສິຍາ – ນານຕ຺ຕກາຍນານຕ຺ຕສຎ຺ຎີສຸ ວຸຕ຺ຕາ ເອກຈ຺ເຈ ຈ ວິນິປາຕິກາ ຕິເຫຕຸກາທິປຏິສນ຺ຘິກາ, ເຕສໍ ປຏິສນ຺ຘິໍ ວິນິປາຕິກຠາເວນ ‘‘ທຸຄ຺ຄຕິປຏິສນ຺ຘີ’’ຕິ ຄເຫຕ຺ວາ ສພ຺ພສຸຄຕິຈຸຕິຍາ ຈ ສາ ປຏິສນ຺ຘິ ໂຫຕິ, ນ ເອກຈ຺ຈສຸຄຕິຈຸຕິຍາ ເອວາຕິ ຕນ຺ນິວຕ຺ຕນຕ຺ຖໍ ເອກຈ຺ຈທຸຄ຺ຄຕິຄ຺ຄຫຓໍ ກຕໍ. ອປາຍປຏິສນ຺ຘິ ເອວ ຫິ ເອກຈ຺ຈສຸຄຕິຈຸຕິຍາ ໂຫຕິ, ນ ສພ຺ພສຸຄຕິຈຸຕິຍາຕິ. ອຖ ວາ ທຸຄ຺ຄຕິປຏິສນ຺ຘິ ທຸວິຘາ ເອກຈ຺ຈສຸຄຕິຈຸຕິຍາ ອນນ຺ຕຣາ, ທຸຄ຺ຄຕິຈຸຕິຍາ ຈາຕິ. ຕຕ຺ຖ ປຈ຺ຉິມໍ ວຊ຺ເຊຕ຺ວາ ປຸຣິມໍເຍວ ຄເຫຕຸໍ ວຸຕ຺ຕໍ ‘‘ເອກຈ຺ຈທຸຄ຺ຄຕິປຏິສນ຺ຘີ’’ຕິ. ອເຫຕຸກຈຸຕິຍາ ສເຫຕຸກປຏິສນ຺ຘີຕິ ທຸເຫຕຸກາ ຈ ຕິເຫຕຸກາ ຈ ໂຍເຊຕພ຺ພາ. ມຓ຺ຑູກເທວປຸຕ຺ຕາທີນໍ ວິຍ ຫິ ອເຫຕຸກຈຸຕິຍາ ຕິເຫຕຸກປຏິສນ຺ຘິປິ ໂຫຕີຕິ.

ຕສ຺ສ ຕສ຺ສ ວິປຣີຕໂຕ ຈ ຍຖາໂຍຄໍ ໂຍເຊຕພ຺ພນ຺ຕິ ‘‘ເອກຈ຺ຈສຸຄຕິຈຸຕິຍາ ເອກຈ຺ຈທຸຄ຺ຄຕິປຏິສນ຺ຘີ’’ຕິອາທີສຸ ເຠທວິເສເສສຸ ‘‘ເອກຈ຺ຈທຸຄ຺ຄຕິຈຸຕິຍາ ເອກຈ຺ຈທຸຄ຺ຄຕິປຏິສນ຺ຘີ’’ຕິອາທິນາ ຍໍ ຍໍ ຍຸຊ຺ຊຕິ, ຕໍ ຕໍ ໂຍເຊຕພ຺ພນ຺ຕິ ອຕ຺ໂຖ. ຍຸຊ຺ຊມານມຕ຺ຕາເປກ຺ຂນວເສນ ນປຸໍສກນິທ຺ເທໂສ ກໂຕ. ໂຍເຊຕພ຺ພນ຺ຕິ ວາ ຠາວຕ຺ຖຕາ ທຏ຺ຐພ຺ພາ. ‘‘ອມຫຄ຺ຄຕພຫິທ຺ຘາຣມ຺ມຓາຍ ມຫຄ຺ຄຕອຊ຺ຌຕ຺ຕາຣມ຺ມຓາ’’ຕິອາທີສຸ ປນ ວິປຣີຕໂຍຊນາ ນ ກາຕພ຺ພາ. ນ ຫິ ມຫຄ຺ຄຕອຊ຺ຌຕ຺ຕາຣມ຺ມຓາຍ ຈຸຕິຍາ ອຣູປຠູມີສຸ ອມຫຄ຺ຄຕພຫິທ຺ຘາຣມ຺ມຓາ ປຏິສນ຺ຘິ ອຕ຺ຖິ. ‘‘ຈຕຸກ຺ຂນ຺ຘາຍ ອາຣຸປ຺ປຈຸຕິຍາ ອນນ຺ຕຣາ ປຎ຺ຈກ຺ຂນ຺ຘາ ກາມາວຈຣປຏິສນ຺ຘີ’’ຕິ ເອຕສ຺ສ ວິປຣິຍາໂຍ ສຍເມວ ໂຍຊິໂຕ. ‘‘ອຕີຕາຣມ຺ມຓາຍ ຈຸຕິຍາ ປຈ຺ຈຸປ຺ປນ຺ນາຣມ຺ມຓາ ປຏິສນ຺ຘີ’’ຕິ ເອຕສ຺ສ ຈ ວິປຣິຍາໂຍ ນຕ຺ຖິ ເອວ. ເຠທວິເສໂສ ເອວ ຈ ເອວໍ ວິຕ຺ຖາເຣນ ທສ຺ສິໂຕ, ອເຠທວິເສໂສ ປນ ເອເກກສ຺ມິໍ ເຠເທ ຕຕ຺ຖ ຕຕ຺ເຖວ ຈຸຕິປຏິສນ຺ຘິໂຍຊນາວເສນ ເວທິຕພ຺ໂພ ‘‘ປຎ຺ຈກ຺ຂນ຺ຘາຍ ກາມາວຈຣຈຸຕິຍາ ປຎ຺ຈກ຺ຂນ຺ຘາ ກາມາວຈຣາ…ເປ… ອວິຕກ຺ກອວິຈາຣາຍ ອວິຕກ຺ກາວິຈາຣາ’’ຕິ. ຈຕຸກ຺ຂນ຺ຘາຍ ປນ ຈຕຸກ຺ຂນ຺ຘາ ສຍເມວ ໂຍຊິຕາ. ເອເຕເນວ ນເຍນ ສກ຺ກາ ວິຎ຺ຎາຕຸນ຺ຕິ ປຎ຺ຈກ຺ຂນ຺ຘາທີສຸ ອເຠທວິເສໂສ ນ ທສ຺ສິໂຕຕິ.

໖໓໒. ອິຕີຕິ ເອວໍ ວຸຕ຺ຕປ຺ປກາເຣນ. ເອຕໍ ວິຎ຺ຎາຓໍ ອວິຊ຺ຊາທິສຫກາຣິກາຣຓສຫິຕສ຺ສ ສງ຺ຂາຣສ຺ສ ວເສນ ລທ຺ຘປ຺ປຈ຺ຈຍໍ. ພາຫິຣກກປ຺ປິຕສ຺ສ ອຘິປຕິຏ຺ຐນກສ຺ສ ອຠາວໂຕ ຣູປາຣູປຘມ຺ມມຕ຺ຕໍ. ເຕນາຫ ‘‘ນ ສຕ຺ໂຕ ນ ຊີໂວ’’ຕິ. ອຸເປຕີຕິ ວຸຈ຺ຈຕິ ຕຖາໂວຫາຣມຕ຺ຕໍ, ອຕ຺ຖໂຕ ປນ ປຈ຺ຈຍສາມຄ຺ຄິຍາ ຠວນ຺ຕຣຠາເວນ ອຸປ຺ປຊ຺ຊນມຕ຺ຕນ຺ຕິ ອຘິປ຺ປາໂຍ. ເຕນາຫ ‘‘ຕສ຺ສ ຈາ’’ຕິອາທິ. ຕໂຕ ເຫຕຸໍ ວິນາຕິ ຕຕ຺ຖ ເຫຕຸໍ ວິນາ. ມນຸສ຺ສຈຸຕິປຏິສນ຺ຘິກ຺ກເມນາຕິ ມນຸສ຺ສຈຸຕິໂຕ ມນຸສ຺ສປຏິສນ຺ຘິກ຺ກເມນ. ເອວຎ຺ຫິ ປາກຏຄ຺ຄຫຓໍ ອຸຠຍວິເສສນໍ ໂຫຕິ. ປາກຏຕາ ເຈຕ຺ຖ ຕທາສນ຺ນກ຺ຂນ຺ຘວເສນ ເວທິຕພ຺ພາ ‘‘ຈວມາເນ ອຸປປຊ຺ຊມາເນ’’ຕິອາທີສຸ (ທີ. ນິ. ໑.໒໔໗) ວິຍ. ມນຸສ຺ສຈຸຕິປຏິສນ຺ຘິກ຺ກເມນາຕິ ວາ ມນຸສ຺ສຈຸຕິໂຕ ຍສ຺ສ ກສ຺ສຈິ ປຏິສນ຺ຘິກ຺ກເມນ. ຕຖາ ຫິ ວກ຺ຂຕິ ‘‘ນິສ຺ສຍໍ ອສ຺ສາທຍມານໍ ວາ ອນາສ຺ສາທຍມານໍ ວາ’’ຕິ (ວິສຸທ຺ຘິ. ໒.໖໓໒).

ສຣເສນາຕິ ສຠາເວນ, ປຣິກ຺ຂີຓາຍຸສງ຺ຂາຣຕາຍາຕິ ອຕ຺ໂຖ. ອຸປກ຺ກເມນາຕິ ອຕ຺ຕນາ, ປເຣນ ວາ ກເຕນ ສີສຈ຺ເຉທນາທິອຸປກ຺ກເມນ. ສພ຺ເພສໍ ອງ຺ຄປຈ຺ຈງ຺ຄສນ຺ຘີນໍ ພນ຺ຘນານິ ສພ຺ພງ຺ຄປຈ຺ຈງ຺ຄສນ຺ຘິພນ຺ຘນານິ, ເຕສໍ ເຉທການໍ. ສນ຺ນິປາຕນ຺ຕິ ປຕນໍ ປວຕ຺ຕິ. ຫທຍປ຺ປເທໂສປິ ອນຸກ຺ກເມນ ສຸສ຺ສິຕ຺ວາ ອປ຺ປາວເສໂສ ໂຫຕິ, ປເຄວ ກາໂຍຕິ ອາຫ ‘‘ກເມນ ອຸປສຸສ຺ສມາເນ ສຣີເຣ’’ຕິ. ເຕເນວາຫ ‘‘ຕງ຺ຂຓາວເສສຫທຍວຕ຺ຖຸສນ຺ນິສ຺ສິຕ’’ນ຺ຕິ. ‘‘ນິຣຸທ຺ເຘສຸ ຈກ຺ຂາທີສູ’’ຕິ ອິທໍ ຄພ຺ຠເສຍ຺ຍການໍ ອາຍຕນານໍ ອນຸປຸພ຺ພຸປ຺ປຕ຺ຕິ ວິຍ ນິໂຣໂຘປິ ອນຸປຸພ຺ພໂຕ ໂຫຕີຕິ ອຘິປ຺ປາເຍນ ວຸຕ຺ຕໍ, ອຕິມນ຺ທຠາວູປຄມນຕໍ ວາ ສນ຺ຘາຍ ‘‘ນິຣຸທ຺ເຘສູ’’ຕິ ວຸຕ຺ຕໍ, ນ ອນວເສສນິໂຣຘໍ. ປຎ຺ຈທ຺ວາຣິກວິຎ຺ຎາຓານນ຺ຕຣມ຺ປິ ຫິ ປຸພ຺ເພ ຈຸຕິ ທສ຺ສິຕາ. ຍມເກ ຈ ‘‘ຍສ຺ສ ຈກ຺ຂາຍຕນໍ ນິຣຸຊ຺ຌຕິ, ຕສ຺ສ ມນາຍຕນໍ ນິຣຸຊ຺ຌຕີຕິ? ອາມນ຺ຕາ. ຍສ຺ສ ວາ ປນ ມນາຍຕນໍ ນິຣຸຊ຺ຌຕິ, ຕສ຺ສ ຈກ຺ຂາຍຕນໍ ນິຣຸຊ຺ຌຕີຕິ? ສຈິຕ຺ຕການໍ ອຈກ຺ຂຸການໍ ຈວນ຺ຕານໍ ເຕສໍ ມນາຍຕນໍ ນິຣຸຊ຺ຌຕິ, ໂນ ຈ ເຕສໍ ຈກ຺ຂາຍຕນໍ ນິຣຸຊ຺ຌຕິ. ສຈກ຺ຂຸການໍ ຈວນ຺ຕານໍ ເຕສໍ ມນາຍຕນຎ຺ຈ ນິຣຸຊ຺ຌຕິ, ຈກ຺ຂາຍຕນຎ຺ຈ ນິຣຸຊ຺ຌຕີ’’ຕິອາທິນາ (ຍມ. ໑.ອາຍຕນຍມກ.໑໒໐) ຈກ຺ຂາຍຕນາທີນໍ ຈຸຕິຈິຕ຺ເຕນ ສຫ ນິໂຣໂຘ ວຸຕ຺ໂຕຕິ.

ຫທຍວຕ຺ຖຸມຕ຺ເຕຕິ ຫທຍວຕ຺ຖຸປເທສມຕ຺ເຕ. ນ ຫິ ຫທຍວຕ຺ຖຸໍ ນິສ຺ສາຍ ກາຍິນ຺ທ຺ຣິຍໍ ປວຕ຺ຕຕິ. ຫທຍວຕ຺ຖຸປິ ຕທາ ອາຕເປ ປກ຺ຂິຕ຺ຕຫຣິຕຕາລປຓ຺ຓໍ ວິຍ ອປ຺ປາວເສສໍ ໂຫຕີຕິ ‘‘ຕງ຺ຂຓາວເສສຫທຍວຕ຺ຖຸສນ຺ນິສ຺ສິຕ’’ນ຺ຕິ ວຸຕ຺ຕນ຺ຕິ ວທນ຺ຕິ. ອິຕຣວຕ຺ຖູນໍ ປນ ສກິຈ຺ຈາສມຕ຺ຖຕາຍ ເກວລໍ ຫທຍວຕ຺ຖຸສນ຺ນິສ຺ສິຕເມວ, ຕທາ ວິຎ຺ຎາຓໍ ໂຫຕີຕິ ວຸຕ຺ຕໍ ‘‘ຕງ຺ຂຓາວເສສຫທຍວຕ຺ຖຸສນ຺ນິສ຺ສິຕ’’ນ຺ຕິ. ມາຕຸຆາຕາທິ, ມຫຄ຺ຄຕມຎ຺ຎໍ ວາ ຕາທິສໍ ຄຣຸກໍ ນາມ. ສມາເສວິຕໍ ອຠິຓ຺ຫໂສ ກຕໍ. ອາສນ຺ນໍ ມຣຓກາເລ ກຕໍ, ຍທາ ຕທາ ວາ ກຕມ຺ປິ ປຣິພ຺ຍຕ຺ຕໍ ຫຸຕ຺ວາ ອນຸສ຺ສຣິຕໍ. ປຸພ຺ພກຕໍ ອປຣາປຣິຍາຍເວທນີຍໍ. ລທ຺ໂຘ ອວເສໂສ ອວິຊ຺ຊາທິໂກ ວິຎ຺ຎາຓສ຺ສ ປຈ຺ຈໂຍ ເອເຕນາຕິ ລທ຺ຘາວເສສປຈ຺ຈໂຍ, ສງ຺ຂາໂຣ. ເອເຕນ ວິປຈ຺ຈິຕຸໍ ກໂຕກາສໍ ຍຖູປຈິຕໍ ກຸສລາກຸສລເຈຕນມາຫ. ກມ຺ມນິມິຕ຺ຕໍ ນາມ ຍໍ ວຕ຺ຖຸໍ ອາຣມ຺ມຓໍ ກຕ຺ວາ ອາຍູຫນກາເລ ກມ຺ມໍ ອາຍູຫຕິ, ຕໍ. ອຕີເຕ ກປ຺ປໂກຏິສຕສຫສ຺ສມຕ຺ຖເກປິ ຫິ ກມ຺ເມ ກເຕ ວິປຈ຺ຈນກາເລ ອາຄນ຺ຕ຺ວາ ກມ຺ມໍ ວາ ກມ຺ມນິມິຕ຺ຕໍ ວາ ອຸປຕິຏ຺ຐຕິ. ຄຕິນິມິຕ຺ຕໍ ນາມ ນິພ຺ພຕ຺ຕນກໂອກາເສ ເອໂກ ວຓ຺ໂຓ. ໂສ ຈ ນິຣເຍ ນິພ຺ພຕ຺ຕນາຣຫສ຺ສ ‘‘ອຄ຺ຄິຊາລວຓ຺ຓາທິໂກ’’ຕິອາທິນາ ເຫຏ຺ຐາ ວຸຕ຺ໂຕເຍວ. ອວິຊ຺ຊາປຏິຈ຺ຉາທິຕາທີນເວ ຕສ຺ມິໍ ກມ຺ມາທິວິສເຍ ປຏິສນ຺ຘິວິຎ຺ຎາຓສ຺ສ ອາຣມ຺ມຓຠາເວນ ອຸປ຺ປຕ຺ຕິຏ຺ຐານຠູເຕ.

ຕຓ຺ຫາຍ ອປ຺ປຫີນຕ຺ຕາ ເອວ, ປຸຣິມຸປ຺ປນ຺ນາຍ ຈ ສນ຺ຕຕິຍາ ຕຖາປຣິຓຕຕ຺ຕາ ປຏິສນ຺ຘິຏ຺ຐານາຠິມຸຂໍ ວິຎ຺ຎາຓໍ ນິນ຺ນໂປຓປພ຺ຠາຣໍ ຫຸຕ຺ວາ ປວຕ຺ຕຕີຕິ ອາຫ ‘‘ຕຓ຺ຫາ ນາເມຕີ’’ຕິ. ສຫຊາຕສງ຺ຂາຣາຕິ ຈຸຕິອາສນ຺ນຊວນວິຎ຺ຎາຓສຫຊາຕາ ເຈຕນາ, ສພ຺ເພປິ ວາ ຜສ຺ສາທໂຍ. ຕສ຺ມິໍ ປຏິສນ຺ຘິຏ຺ຐາເນ ກມ຺ມາທິວິສເຍ ວິຎ຺ຎາຓໍ ຂິປນ຺ຕິ. ຂິປນ຺ຕາ ວິຍ ຕສ຺ມິໍ ວິສເຍ ປຏິສນ຺ຘິວເສນ ວິຎ຺ຎາຓປຕິຏ຺ຐານສ຺ສ ເຫຕຸຠາເວນ ປວຕ຺ຕນ຺ຕີຕິ ອຕ຺ໂຖ. ຕນ຺ຕິ ຕໍ ວິຎ຺ຎາຓໍ. ຈຸຕິປຏິສນ຺ຘິຕທາສນ຺ນວິຎ຺ຎາຓານໍ ສນ຺ຕຕິວເສນ ວິຎ຺ຎາຓນ຺ຕິ ອຸປນີເຕກຕ຺ຕໍ. ຕຓ຺ຫາຍ ນາມິຍມານໍ…ເປ… ປວຕ຺ຕຕີຕິ ນມນຂິປນປຸຣິມນິສ຺ສຍຊຫນອປຣນິສ຺ສຍສ຺ສາທນນິສ຺ສຍຣຫິຕປວຕ຺ຕນານິ ສນ຺ຕຕິວເສນ ຕສ຺ເສເວກສ຺ສ ວິຎ຺ຎາຓສ຺ສ ໂຫນ຺ຕິ, ນ ອຎ຺ຎສ຺ສາຕິ ທສ຺ເສຕິ. ສນ຺ຕຕິວເສນາຕິ ຈ ວທນ຺ໂຕ ‘‘ຕເທວິທໍ ວິຎ຺ຎາຓໍ ສນ຺ຘາວຕິ ສໍສຣຕິ ອນຎ຺ຎ’’ນ຺ຕິ (ມ. ນິ. ໑.໓໙໖) ອິມຎ຺ຈ ມິຈ຺ຉາຄາຫໍ ປຏິກ຺ຂິປຕິ. ສຕິ ຫິ ນານຕ຺ຕນເຍ ສນ຺ຕຕິວເສນ ເອກຕ຺ຕນໂຍ ໂຫຕີຕິ. ເອຕ຺ຖ ຈ ໂອຣິມຕີຣຣຸກ຺ຂວິນິພທ຺ຘຣຊ຺ຊຸ ວິຍ ປຸຣິມຠວຕ຺ຕຠາວວິນິພທ຺ຘໍ ກມ຺ມາທິອາຣມ຺ມຓໍ ທຏ຺ຐພ຺ພໍ, ປຸຣິໂສ ວິຍ ວິຎ຺ຎາຓໍ, ຕສ຺ສ ມາຕິກາຕິກ຺ກມນິຈ຺ຉາ ວິຍ ຕຓ຺ຫາ, ອຕິກ຺ກມນປໂຍໂຄ ວິຍ ຂິປນກສງ຺ຂາຣາ, ຍຖາ ຈ ໂສ ປຸຣິໂສ ປຣຕີເຣ ປຕິຏ຺ຐຫມາໂນ ປຣຕີຣຣຸກ຺ຂວິນິພທ຺ຘໍ ກິຎ຺ຈິ ອສ຺ສາທຍມາໂນ ວາ ອນສ຺ສາທຍມາໂນ ວາ ເກວລໍ ປຖວິຍໍ ສກພລປໂຍເຄເຫວ ປຕິຏ຺ຐາຕິ, ເອວມິທມ຺ປິ ຠວນ຺ຕຣຕ຺ຕຠາວວິນິພທ຺ຘໍ ຫທຍວຕ຺ຖຸສງ຺ຂາຕໍ ນິສ຺ສຍໍ ປຎ຺ຈໂວກາຣຠເວ ອສ຺ສາທຍມານໍ, ຈຕຸໂວກາຣຠເວ ອນສ຺ສາທຍມານໍ ວາ ເກວລໍ ອາຣມ຺ມຓສມ຺ປຍຸຕ຺ຕກມ຺ເມເຫວ ປວຕ຺ຕຕິ. ຕຕ຺ຖ ອສ຺ສາທຍມານນ຺ຕິ ປາປຸຓນ຺ຕໍ, ປຏິລຠມານນ຺ຕິ ອຕ຺ໂຖ.

ຠວນ຺ຕຣາທິປຏິສນ຺ຘານໂຕຕິ ຠວນ຺ຕຣສ຺ສ ອຎ຺ຎຠວສ຺ສ ອາທິປຏິສນ຺ຘານຠາວໂຕ. ຠວນ຺ຕຣາທໂຍ ວາ ຠວໂຍນິຄຕິວິຎ຺ຎາຓຏ຺ຐິຕິສຕ຺ຕາວາສນ຺ຕຣານິ, ເຕສໍ ປຏິສນ຺ຘານໂຕຕິ ອຕ຺ໂຖ. ຕເທຕໍ ວິຎ຺ຎາຓໍ ນາປິ ອິຘາຄຕໍ ອິມສ຺ມິໍເຍວ ຠເວ ອຸປ຺ປນ຺ນຕ຺ຕາ. ກມ຺ມນ຺ຕິ ປຏິສນ຺ຘິຊນກໍ ກມ຺ມໍ. ສງ຺ຂາຣາຕິ ຈຸຕິອາສນ຺ນຊວນວິຎ຺ຎາຓສຫຄຕາ ຂິປນກສງ຺ຂາຣາ. ນຕີຕິ ນມນວເສນ ປວຕ຺ຕຕຓ຺ຫາ. ວິສໂຍ ກມ຺ມາທິ.

໖໓໓. ສທ຺ທປຏິໂຆສາທີນໍ ສຕິປິ ປຈ຺ຈຍປຈ຺ຈຍຸປ຺ປນ຺ນຠາເວ ສນ຺ຕານພນ຺ໂຘ ນ ປາກໂຏຕິ ເຕສໍ ເອກຕ຺ຕນານຕ຺ຕຠາວໍ ອນາມສິຕ຺ວາ ອນາຄມນາຕີຕເຫຕຸສມຸປ຺ປາທເມວ ທສ຺ເສນ຺ໂຕ ‘‘ເອຕ຺ຖ ຈາ’’ຕິອາທິມາຫ. ສທ຺ທາທິເຫຕຸກາຕິ ເອຕ຺ຖ ປຏິໂຆໂສ ສທ຺ທເຫຕຸໂກ. ປທີໂປ ປທີປນ຺ຕຣາທິເຫຕຸໂກ. ມຸທ຺ທາ ລຎ຺ຉນເຫຕຸກາ. ຉາຍາ ອາທາສາທິອຠິມຸຂມຸຂາທິເຫຕຸກາ. ໂຫນ຺ຕິ ອຎ຺ຎຕ຺ຣ ອຄນ຺ຕ຺ວາຕິ ສທ຺ທາທິປຈ຺ຈຍເທສໍ ອນຸປຄນ຺ຕ຺ວາ ສທ຺ທາທິເຫຕຸກາ ໂຫນ຺ຕິ ຕໂຕ ປຸພ຺ເພ ອຠາວາ. ເອວໍ ອິທມ຺ປິ ປຏິສນ຺ຘິວິຎ຺ຎາຓໍ ນ ເຫຕຸເທສໍ ຄນ຺ຕ຺ວາ ຕໍເຫຕຸກໍ ໂຫຕິ ຕໂຕ ປຸພ຺ເພ ອຠາວາ. ຕສ຺ມາ ນ ອິທໍ ເຫຕຸເທສໂຕ ປຸຣິມຠວໂຕ ອິຘາຄຕໍ ປຏິໂຆສາທໂຍ ວິຍ ສທ຺ທາທິເທສໂຕ, ນາປິ ຕຕ຺ຖ ເຫຕຸນາ ວິນາ ອຸປ຺ປນ຺ນໍ ສທ຺ທາທີຫິ ວິນາ ປຏິໂຆສາທໂຍ ວິຍາຕິ ອຕ຺ໂຖ. ອຖ ວາ ໂຫນ຺ຕິ ອຎ຺ຎຕ຺ຣ ອຄນ຺ຕ຺ວາຕິ ປຸພ຺ເພ ປຈ຺ຈຍເທເສ ສນ຺ນິຫິຕາ ຫຸຕ຺ວາ ຕໂຕ ອຎ຺ຎຕ຺ຣ ຄນ຺ຕ຺ວາ ຕປ຺ປຈ຺ຈຍາ ນ ໂຫນ຺ຕິ ອຸປ຺ປຕ຺ຕິໂຕ ປຸພ຺ເພ ອຠາວາ, ນາປິ ສທ຺ທາທິປຈ຺ຈຍາ ນ ໂຫນ຺ຕິ, ເອວໍ ອິທມ຺ປີຕິ ວຸຕ຺ຕນເຍເນວ ໂຍເຊຕພ຺ພໍ.

ນຕ຺ຖິ ເອກຕາ ເອກສນ຺ຕາເນກຕ຺ເຕປິ ອຎ຺ຎສ຺ເສວ ວິຎ຺ຎາຓສ຺ສ ປາຕຸຠວນໂຕ. ນາປິ ນານຕາ ສນ຺ຕານພນ຺ຘໂຕ ປທີໂປ ວິຍ. ຂຓິກາຍ ຫິ ປທີປຊາລາຍ ສນ຺ຕາເນກຕ຺ຕໍ ອຸປາທາຍ ໂສ ເອວາຕິ ວຸຈ຺ຈຕິ, ອຕ຺ຖກິຈ຺ຈຎ຺ຈ ສາເຘຕິ, ເອວມິຘາປິ ທຏ຺ຐພ຺ພໍ. ‘‘ຍທິ ຫີ’’ຕິອາທິນາ ສນ຺ຕານພນ຺ເຘ ເອກນ຺ຕໍ ເອກຕາຍ, ນານຕາຍ ຈ ອຄ຺ຄເຫຕພ຺ພຕໍ, ຄຫເຓ ຈ ໂທສໍ ທສ຺ເສຕິ. ເອສ ນໂຍຕິ ອຕິເທເສນ ພີຊງ຺ກຸຣາທີສຸ ສພ຺ພເຫຕຸເຫຕຸສມຸປ຺ປນ຺ເນສຸ ຍຖາສມ຺ຠວໍ ໂຍຊນາ ກາຕພ຺ພາຕິ ທສ຺ເສຕິ. ອິຘາປິ ຫິ ເຫຕຸເຫຕຸສມຸປ຺ປນ຺ນວິຎ຺ຎາຓານໍ ເອກນ຺ຕເມກຕ຺ເຕ ສຕິ ນ ມນຸສ຺ສຄຕິໂຕ ເທວຄຕິ ສມ຺ຠູຕາ ສິຍາ. ເອກນ຺ຕນານຕ຺ເຕ ນ ກມ຺ມວໂຕ ຜລໍ ສິຍາ, ຕໂຕ ‘‘ຣຕ຺ຕສ຺ສ ພີຊໍ ຣຕ຺ຕສ຺ສ ຜລ’’ນ຺ຕິອາທິກສ຺ສ ວິຍ ‘‘ຠູຕປຸພ຺ພາຫໍ, ຠນ຺ເຕ, ໂຣຫິຕສ຺ໂສ ນາມ ອິສິ ອໂຫສິ’’ນ຺ຕິອາທິກສ຺ສ (ສໍ. ນິ. ໑.໑໐໗) ໂວຫາຣສ຺ສ ໂລໂປ ສິຍາ, ຕສ຺ມາ ເອຕ຺ຖ ສນ຺ຕານພນ຺ເຘສຸ ເຫຕຸເຫຕຸສມຸປ຺ປນ຺ເນສຸ ນ ເອກນ຺ຕເມກຕາ ວາ ນານຕາ ວາ ອຸປຄນ຺ຕພ຺ພາ ນ ຄເຫຕພ຺ພາ. ເອຕ຺ຖ ຈ ເອກນ຺ຕເອກຕາປຏິເສເຘນ ‘‘ສຍໍກຕໍ ສຸຂໍ ທຸກ຺ຂ’’ນ຺ຕິ (ວິຠ. ມູລຏີ. ໒໒໗) ອິມໍ ທິຏ຺ຐິໍ ນິວາເຣຕິ, ເອກນ຺ຕນານຕາປຏິເສເຘນ ‘‘ປຣໍກຕໍ ສຸຂໍ ທຸກ຺ຂ’’ນ຺ຕິ (ວິຠ. ມູລຏີ. ໒໒໗), ເຫຕຸເຫຕຸສມຸປ຺ປນ຺ນຕາວຈເນນ ‘‘ອຘິຈ຺ຈສມຸປ຺ປນ຺ນ’’ນ຺ຕິ (ວິຠ. ມູລຏີ. ໒໒໗) ອິມໍ ທິຏ຺ຐິໍ ນິວາເຣຕິ.

໖໓໔. ຕຕ຺ຖາຕິ ຜລຸປ຺ປຕ຺ຕິຏ຺ຐາເນ. ອຎ຺ຎສ຺ສາຕິ ເຍນ ຕໍ ກມ຺ມໍ ກຕໍ, ຕໂຕ ອຎ຺ຎສ຺ສ. ອຎ຺ຎໂຕຕິ ຍໍ ຕໍ ກມ຺ມໍ ນິພ຺ພຕ຺ຕິຕໍ, ຕໂຕ ອຎ຺ຎໂຕ. ‘‘ຘມ຺ມມຕ຺ຕໍ ຠວນ຺ຕຣມຸເປຕີ’’ຕິ (ວິສຸທ຺ຘິ. ໒.໖໓໒; ວິຠ. ອຏ຺ຐ. ໒໒໗; ມຫານິ. ອຏ຺ຐ. ໒໗; ປຏິ. ມ. ອຏ຺ຐ. ໑.໑.໑໐໕) ວຸຕ຺ຕຕ຺ຕາ ຜລສ຺ສ ອຸປຠຸຎ຺ຊເກ ຈ ອສຕິ ກສ຺ສ ຕໍ ຜລໍ ສິຍາຕິ ອນຸຍຸຎ຺ເຊຕິ. ຕຕ຺ຣາຕິ ຕສ຺ມິໍ ຍຖາວຸຕ຺ເຕ ອນຸໂຍເຄ.

ຕຕ຺ຖາຕິ ເອກສນ຺ຕາເນ. ຍສ຺ມິໍ ຘມ຺ມປຸຎ຺ເຊ ກມ຺ມໍ ນິພ຺ພຕ຺ຕໍ, ຕສ຺ເສວ ສນ຺ຕາເນຕິ ອຕ຺ໂຖ. ເອຕສ຺ສ ອຕ຺ຖສ຺ສາຕິ ເຫຕຸຜລານໍ ອຕ຺ຖໂຕ ອຎ຺ຎຕ຺ເຕປິ ເຕເນວ ເຫຕຸຜລຠາເວນ ສມ຺ພນ຺ຘຕ຺ຕາ ຕໍ ຜລໍ ‘‘ອຎ຺ຎສ຺ສ, ອຎ຺ຎໂຕ’’ຕິ ວາ ນ ວຕ຺ຕພ຺ພນ຺ຕິ ເອຕສ຺ສ ອຕ຺ຖສ຺ສ. ຈຕຸມຘຸຣອລຕ຺ຕກຣສາທິຠາວນາ ອມ຺ພມາຕຸລຸງ຺ຄາທິພີຊານໍ ອຠິສງ຺ຂາໂຣ. ເອຕ຺ຖ ຈ ອຠິສງ຺ຂຕໍ ພີຊໍ ວິຍ ກມ຺ມວາ ສຕ຺ໂຕ, ອຠິສງ຺ຂາໂຣ ວິຍ ກມ຺ມໍ, ພີຊສ຺ສ ອງ຺ກຸຣາທິປ຺ປພນ຺ໂຘ ວິຍ ສຕ຺ຕສ຺ສ ປຏິສນ຺ຘິວິຎ຺ຎາຓາທິປ຺ປພນ຺ໂຘ. ຕຕ຺ຖຸປ຺ປນ຺ນສ຺ສ ມຘຸຣສ຺ສ ຣຕ຺ຕເກສຣສ຺ສ ວາ ຜລສ຺ສ ວາ ຕສ຺ເສວ ພີຊສ຺ສ, ຕໂຕ ເອວ ຈ ອຠິສງ຺ຂາຣໂຕ ຠາໂວ ວິຍ ກມ຺ມກາຣກສ຺ເສວ ສຕ຺ຕສ຺ສ, ຕໍກມ຺ມໂຕ ເອວ ຈ ຜລສ຺ສ ຠາໂວ ເວທິຕພ຺ໂພ. ພາລສຣີເຣ ກຕໍ ວິຊ຺ຊາປຣິຍາປຸຓນໍ, ສິປ຺ປສິກ຺ຂນໍ, ໂອສຘປ຺ປໂຍໂຄ ຈ ນ ວຸຑ຺ຒສຣີຣໍ ຄຈ຺ຉນ຺ຕິ. ອຖ ຈ ຕນ຺ນິມິຕ຺ຕໍ ວິຊ຺ຊາປາຏວໍ ສິປ຺ປຊານນໍ, ອນາມຍຕາ ຈ ວຸຑ຺ຒສຣີເຣ ໂຫນ຺ຕິ, ນ ຈ ຕານິ ອຎ຺ຎສ຺ສ ໂຫນ຺ຕິ ຕໍສນ຺ຕຕິປຣິຍາປນ຺ເນ ເອວ ວຸຑ຺ຒສຣີເຣ ອຸປ຺ປຊ຺ຊນໂຕ, ນ ຈ ຍຖາປຍຸຕ຺ເຕນ ວິຊ຺ຊາປຣິຍາປຸຓນາທິນາ ວິນາ ຕານິ ອຎ຺ຎໂຕ ໂຫນ຺ຕິ ຕທຠາເວ ອຠາວໂຕ, ເອວໍ ອິຘາປິ ສນ຺ຕາເນ ຍໍ ຜລໍ, ເອຕໍ ນາຎ຺ຎສ຺ສ. ນ ຈ ອຎ຺ຎໂຕຕິ ໂຍເຊຕພ຺ພໍ. ເອເຕນ ຈ ສງ຺ຂາຣາຠາເວ ຜລາຠາວເມວ ທສ຺ເສຕິ, ນ ອຎ຺ຎປຈ຺ຈຍນິວາຣຓໍ ກໂຣຕິ.

ຍມ຺ປິ ວຸຕ຺ຕໍ, ຕຕ຺ຖ ວທາມາຕິ ວຈນເສໂສ. ຕຕ຺ຖ ວາ ອຸປຠຸຎ຺ຊເກ ອສຕິ ສິທ຺ຘາ ຠຸຎ຺ຊກສມ຺ມຸຕີຕິ ສມ຺ພນ຺ໂຘ. ຜລຕີຕິ ສມ຺ມຸຕິ ຜລຕິສມ຺ມຸຕິ.

ຣຸກ຺ຂສງ຺ຂາຕານໍ ຘມ຺ມານນ຺ຕິ ຣຸກ຺ຂປຎ຺ຎຕ຺ຕິຍາ ອຸປາທານຠູຕານໍ ຠູຕຸປາທາຍຘມ຺ມານໍ. ຕສ຺ມາຕິ ຍສ຺ມາ ຍຖາ ຂນ຺ຘສນ຺ຕາເນ ກຸສລາກຸສລເຈຕນຸປ຺ປຕ຺ຕິຍໍ ‘‘ປຸຎ຺ຎໍ ກໂຣຕິ, ປາປໍ ກໂຣຕີ’’ຕິ ກຕ຺ຕຸໂວຫາໂຣ, ເອວໍ ຕສ຺ສ ຜລຸປ຺ປຕ຺ຕິຍໍ ‘‘ສຸຂໍ ອນຸຠວຕິ, ທຸກ຺ຂໍ ອນຸຠວຕີ’’ຕິ ອຸປຠຸຎ຺ຊກໂວຫາໂຣ, ຕສ຺ມາ ນ ເອຕ຺ຖ ຂນ຺ຘວິນິມຸຕ຺ເຕນ ອຎ຺ເຎນ ອຸປຠຸຎ຺ຊເກນ ນາມ ໂກຈິ ອຕ຺ໂຖ ອຕ຺ຖີຕິ.

໖໓໕. ເອວໍ ສນ຺ເຕປີຕິ ອສງ຺ກນ຺ຕິປາຕຸຠາເວ ຕຕ຺ຖ ຈ ຍຖາວຸຕ຺ຕໂທສປຣິຫຣເຓ ສຕິ, ສິທ຺ເຘຕິ ອຕ຺ໂຖ. ປວຕ຺ຕິກ຺ຂເຓເຍວາຕິ ສງ຺ຂາຣານໍ ປວຕ຺ຕມານກ຺ຂເຓ ເອວ. ປວຕ຺ຕິໂຕ ປຸພ຺ເພຕິ ກມ຺ມາຍູຫນກ຺ຂຓໂຕ ປຸພ຺ເພ, ອວິຊ຺ຊມານຕາຍ ສມານຕ຺ຕາ ເອວໍ ວຸຕ຺ຕໍ. ປຈ຺ຉາ ຈາຕິ ວິປຈ຺ຈນປ຺ປປຕ຺ຕິໂຕ ປຈ຺ຉາ ຈ.

ອວິປກ຺ກວິປາກາ ກຕຕ຺ຕາ ເຈ ປຈ຺ຈຍາ, ວິປກ຺ກວິປາການມ຺ປິ ກຕຕ຺ຕໍ ສມານນ຺ຕິ ເຕສມ຺ປິ ຜລາວຫຕາ ສິຍາຕິ ອາສງ຺ການິວຕ຺ຕນຕ຺ຖໍ ອາຫ ‘‘ນ ຈ ນິຈ຺ຈໍ ຜລາວຫາ’’ຕິ.

‘‘ນ ວິຊ຺ຊມານຕ຺ຕາ ອວິຊ຺ຊມານຕ຺ຕາ ວາ’’ຕິ ເອເຕນ ວິຊ຺ຊມານຕ຺ຕໍ, ອວິຊ຺ຊມານຕ຺ຕຎ຺ຈ ນິສ຺ສາຍ ວຸຕ຺ຕໂທເສ ປຣິຫຣຕິ. ຕສ຺ສາ ປາຏິໂຠຄກິຣິຍາຍ, ຠຓ຺ຑກີຓນກິຣິຍາຍ, ອິຓຄ຺ຄຫຓກິຣິຍາຍ ວາ ກຣຓມຕ຺ຕໍ ຕໍກິຣິຍາກຣຓມຕ຺ຕໍ, ຕເທວ ຕທຕ຺ຖນິຍ຺ຍາຕເນ ປຏິຠຓ຺ຑທາເນ, ອິຓທາເນ ຈ ປຈ຺ຈໂຍ ໂຫຕິ, ອຜລິຕນິຍ຺ຍາຕນາທິຜລນ຺ຕິ ອຕ຺ໂຖ.

໖໓໖. ສມ຺ໂມຫວິຆາຕຕ຺ຖນ຺ຕິ ພາຕ຺ຕິໍສາຍ ວິຎ຺ຎາເຓສຸ ຍຖາວຸຕ຺ຕສງ຺ຂາຣານໍ ປຏິສນ຺ຘິຍໍ, ປວຕ຺ຕິຍຎ຺ຈ ປຈ຺ຈຍຠາເວ ວິຠຊ຺ຊ ອວິຠາວິເຕ ປວຕ຺ຕນກສມ຺ໂມຫສ຺ສ ອປນຍນຕ຺ຖໍ.

ປຸຎ຺ຎາຠິສງ຺ຂາເຣຕິ ນິທ຺ຘາຣເຓ ຠຸມ຺ມໍ. ອວິເສເສນາຕິ ‘‘ຕິເຫຕຸໂກ ຕິເຫຕຸກສ຺ສາ’’ຕິອາທິກໍ ເຠທໍ ອກຕ຺ວາ ສາມຎ຺ຎໂຕ, ປິຓ຺ຑວເສນາຕິ ອຕ຺ໂຖ. ສພ຺ພຕ຺ຖ ອຸປນິສ຺ສຍປຈ຺ຈໂຍ ພລວກມ຺ມສ຺ສ ວເສນ ໂຍເຊຕພ຺ໂພ. ‘‘ທຸພ຺ພລຎ຺ຫິ ກມ຺ມໍ ອຸປນິສ຺ສຍປຈ຺ຈໂຍ ນ ໂຫຕີ’’ຕິ ປຏ຺ຐານສໍວຓ຺ຓນາຍ ທສ຺ສິຕເມຕໍ. ຣູປາວຈຣປຎ຺ຈກຸສລເຈຕນາເຠໂທຕິ ‘‘ຐເປຕ຺ວາ ອຠິຎ຺ຎາປ຺ປຕ຺ຕ’’ນ຺ຕິ ວິເສເສຕ຺ວາ ວຕ຺ຕພ຺ພໍ, ນ ວາ ວຕ຺ຕພ຺ພໍ ວິປາກສ຺ສ ປຈ຺ຈຍຠາວກຖາຍ ອວິປາກາຣຫສ຺ສ ປສງ຺ຄາຠາວໂຕ. ອຠິຎ຺ຎາເຈຕນາຍ ຫິ ອວິປາກຕາ ເຫຏ຺ຐາ ວິຠາວິຕາ ເອວ. ອວິເສເສນ ປນາຕິ ເອຕ຺ຖາປິ ເອເສວ ນໂຍ. ປຎ຺ຈນ຺ນໍ ວິປາກວິຎ຺ຎາຓານນ຺ຕິ ອາເນຕ຺ວາ ສມ຺ພນ຺ຘິຕພ຺ພໍ.

ປຎ຺ຈນ຺ນນ຺ຕິ ຈກ຺ຂຸໂສຕວິຎ຺ຎາຓານໍ, ສມ຺ປຏິຈ຺ຉນມໂນຘາຕຸຍາ, ທ຺ວິນ຺ນໍ ສນ຺ຕີຣຓມໂນວິຎ຺ຎາຓຘາຕູນຎ຺ຈາຕິ ເອເຕສໍ ປຎ຺ຈນ຺ນໍ. ຕເຖວາຕິ ທ຺ເວຘາ ເອວ. ກຖໍ ປນ ອິຏ຺ຐາຣມ຺ມເຓເຍວ ປວຕ຺ຕນການິ ກຸສລວິປາກວິຎ຺ຎາຓານິ ທຸຄ຺ຄຕິຍໍ ປວຕ຺ຕນ຺ຕີຕິ ອາຫ ‘‘ນິຣເຍ ມຫາໂມຄ຺ຄລ຺ລານຕ຺ເຖຣສ຺ສາ’’ຕິອາທິ. ເຖໂຣ ຫິ ຕຕ຺ຖ ອິທ຺ຘິຍາ ວສ຺ສໍ ນິມ຺ມິນິຕ຺ວາ ກຕິປຍໍ ເວລໍ ນິຣຍຄ຺ຄິໍ ວູປສເມຕ຺ວາ ເຕສໍ ຘມ຺ມໍ ເທເສຕິ.

ສ຺ເວວ ກາມາວຈໂຣ ປຸຎ຺ຎາຠິສງ຺ຂາໂຣ. ອວິເສເສນ ປນ ປຸຎ຺ຎາຠິສງ຺ຂາໂຣຕິ ກາມາວຈຣໍ, ຣູປາວຈຣຎ຺ຈາຕິ ທຸວິຘມ຺ປິ ປຸຎ຺ຎາຠິສງ຺ຂາຣໍ ເອກຊ຺ຌໍ ສງ຺ຄຓ຺ຫາຕິ.

ທ຺ວາທສາກຸສລເຈຕນາເຠໂທຕິ ເອຕ຺ຖ ອຸທ຺ຘຈ຺ຈສຫຄຕເຈຕນາຍ ຄຫເຓ ກາຣຓໍ ນ ທິສ຺ສຕິ, ວິຈາເຣຕພ຺ພເມຕໍ. ເອກສ຺ສ ວິຎ຺ຎາຓສ຺ສ ຕເຖວ ປຈ຺ຈໂຍ ປຏິສນ຺ຘິຍໍ, ໂນ ປວຕ຺ເຕຕິ ເອກສ຺ເສວ ປຈ຺ຈຍຠາວນິຍໂມ ປຏິສນ຺ຘິຍໍ, ໂນ ປວຕ຺ເຕ. ປວຕ຺ເຕ ຫິ ສຕ຺ຕນ຺ນມ຺ປິ ປຈ຺ຈໂຍຕິ ອຘິປ຺ປາໂຍ.

ຣູປຠເວ ຈຕຸນ຺ນນ຺ຕິ ອກຸສລວິປາການໍ ຈກ຺ຂຸໂສຕວິຎ຺ຎາຓສມ຺ປຏິຈ຺ຉນສນ຺ຕີຣຓານໍ. ຕານິ ປນ ເອກນ຺ຕໂຕ ອນິຏ຺ຐາຣມ຺ມຓານິ, ຣູປຠເວ ຈ ກຖໍ ອນິຏ຺ຐາຣມ຺ມຓສມາໂຍໂຄຕິ ອາຫ ‘‘ໂສ ຈ ໂຂ’’ຕິອາທິ. ‘‘ຕຖາ ກາມາວຈຣເທວໂລເກປິ ອນິຏ຺ຐຣູປາທໂຍ ນຕ຺ຖີ’’ຕິ ອິທໍ ເຍຠຸຍ຺ຍວເສນ ວຸຕ຺ຕໍ. ພຫຸລຎ຺ຫິ ເຕສໍ ອິຏ຺ຐາ ເອວ ຣູປາທໂຍ ອຸປຏ຺ຐຫນ຺ຕິ, ກທາຈິ ອນິຏ຺ຐໍ. ເທວານຎ຺ຫິ ເກສຎ຺ຈິເທວ ປຸພ຺ພນິມິຕ຺ຕປາຕຸຠາວກາລາທີສຸ ມິລາຕມາລາທິອນິຏ຺ຐາຣມ຺ມຓສມາໂຍໂຄ ໂຫຕີຕິ.

໖໓໗. ຍຕ຺ຖ ວິຕ຺ຖາຣປ຺ປກາສນໍ ກຕໍ, ຕໂຕ ຠວໂຕ ປຏ຺ຐາຍ ມຸຂມຕ຺ຕປ຺ປກາສນໍ ກາຕຸກາໂມ ອາຫ ‘‘ອາທິໂຕ ປຏ຺ຐາຍາ’’ຕິ. ເຕເນວ ‘‘ທ຺ວີສຸ ຠເວສູ’’ຕິອາທິ ວຸຕ຺ຕໍ. ມນຸສ຺ສາປິ ເກຈິ ອຓ຺ຑຊາ, ສໍເສທຊາ ຈ ໂຫນ຺ຕີຕິ ຕທເປກ຺ຂາຍ ‘‘ຈຕູສຸ ໂຍນີສູ’’ຕິ ວຸຕ຺ຕໍ. ເອກຕ຺ຕກາຍເອກຕ຺ຕສຎ຺ຎິຕາສາມຎ຺ເຎນ ຈຕຸຕ຺ຖຌານຠູມິກາປິ ອສຎ຺ຎາຣຸປ຺ປວຊ຺ຊາ ຈຕຸຕ຺ຖິໍເຍວ ວິຎ຺ຎາຓຏ຺ຐິຕິໍ ຠຊນ຺ຕິ. ເອສ ປຸຎ຺ຎາຠິສງ຺ຂາໂຣ. ວຸຕ຺ຕນເຍເນວາຕິ ‘‘ນານາກ຺ຂຓິກກມ຺ມປຈ຺ຈເຍນ ເຈວ ອຸປນິສ຺ສຍປຈ຺ຈເຍນ ຈາ’’ຕິ ວຸຕ຺ຕນເຍເນວ. ຍຖາສມ຺ຠວນ຺ຕິ ເອກວີສຕິກາມາວຈຣຣູປາວຈຣກຸສລວິປາເກສຸ ຈຸທ຺ທສນ຺ນໍ ປຏິສນ຺ຘິຍໍ, ປວຕ຺ເຕ ຈ, ສຕ຺ຕນ຺ນໍ ປວຕ຺ເຕ ເອວາຕິ ອຍໍ ຍຖາສມ຺ຠໂວ.

ຕາທິເສເຍວາຕິ ນານຕ຺ຕກາຍເອກຕ຺ຕສຎ຺ຎີສງ຺ຂາເຕເຍວ.

ຈຕຸນ຺ນໍ ວິຎ຺ຎາຓານນ຺ຕິ ຠວາທໂຍ ອເປກ຺ຂິຕ຺ວາ ວຸຕ຺ຕໍ. ຈຕູສຸ ອນ຺ໂຕຄຘານໍ ປນ ຕິຓ຺ຓໍ ວິຎ຺ຎາຓານໍ ຕີສຸ ວິຎ຺ຎາຓຏ຺ຐິຕີສຸ ປຈ຺ຈຍຠາໂວ ໂຍເຊຕພ຺ໂພ. ອວິຎ຺ຎາຓເກ ສຕ຺ຕາວາເສ ສງ຺ຂາຣປຈ຺ຈຍາ ວິຎ຺ຎາເຓ ອລພ຺ຠມາເນປິ ຕສ຺ສ ສງ຺ຂາຣເຫຕຸກຕ຺ຕໍ ລພ຺ຠເຕວ. ຕຖາ ຫິ ຕຕ຺ຖ ປຸຎ຺ຎາຠິສງ຺ຂາໂຣ ກຏຕ຺ຕາຣູປານໍ ນານາກ຺ຂຓິກກມ຺ມປຈ຺ຈເຍນ ປຈ຺ຈໂຍ ໂຫຕິ. ເອຕສ຺ມິຎ຺ຈ ມຸຂມຕ຺ຕປ຺ປກາສເນ ປຸຎ຺ຎາຠິສງ຺ຂາຣາທີນໍ ທຸຄ຺ຄຕິອາທີສຸ ປວຕ຺ຕິຍໍ ກຸສລວິປາກາທິວິຎ຺ຎາຓານໍ ປຈ຺ຈຍຠາໂວ ຠເວສຸ ວຸຕ຺ຕນເຍເນວ ວິຎ຺ຎາຍຕີຕິ ນ ວຸຕ຺ໂຕຕິ ເວທິຕພ຺ໂພ.