ປຐມສີລປຎ຺ຈກວຓ຺ຓນາ

໒໐. ປຣິຍນ຺ໂຕ ເອເຕສໍ ອຕ຺ຖີຕິ ປຣິຍນ຺ຕານິ, ປຣິຍນ຺ຕານິ ສິກ຺ຂາປທານິ ເຍສໍ ເຕ ປຣິຍນ຺ຕສິກ຺ຂາປທາ, ເຕສໍ ປຣິຍນ຺ຕສິກ຺ຂາປທານໍ. ອຸປສມ຺ປນ຺ນານນ຺ຕິ ຐເປຕ຺ວາ ກລ຺ຍາຓປຸຖຸຊ຺ຊນເສກ຺ຂາເສກ຺ເຂ ຕທຎ຺ເຎສໍ ອຸປສມ຺ປນ຺ນານໍ. ສາມຎ຺ຎໂຊຕນາປິ ຫິ ວິເສເສ ຕິຏ຺ຐຕິ. ກຸສລຘມ຺ເມ ຍຸຕ຺ຕານນ຺ຕິ ວິປສ຺ສນາຈາເຣ ຍຸຕ຺ຕປຍຸຕ຺ຕານໍ. ເສກ຺ຂຘມ຺ມາ ປຣິຍນ຺ຕາ ປຣມາ ມຣິຍາທາ ເອຕສ຺ສາຕິ ເສກ຺ຂປຣິຍນ຺ໂຕ. ນາມຣູປປຣິຈ຺ເຉທໂຕ, ກຸສລຘມ຺ມສມາທານໂຕ ວາ ປນ ປຏ຺ຐາຍ ຍາວ ໂຄຕ຺ຣຠູ, ຕາວ ປວຕ຺ຕກຸສລຘມ຺ມປ຺ປພນ຺ໂຘ ເສກ຺ຂຘມ຺ເມ ອາຫຈ຺ຈ ຐິໂຕ ເສກ຺ຂປຣິຍນ຺ໂຕ. ເສກ຺ຂຘມ຺ມານໍ ວາ ເຫຏ຺ຐິມນ຺ຕຠູຕາ ສິກ຺ຂິຕພ຺ພາ ໂລກິຍາ ຕິສ຺ໂສ ສິກ຺ຂາ ເສກ຺ຂປຣິຍນ຺ໂຕ, ຕສ຺ມິໍ ເສກ຺ຂປຣິຍນ຺ເຕ. ປຣິປູຣກາຣີນນ຺ຕິ ກິຎ຺ຈິປິ ສິກ຺ຂໍ ອຫາເປຕ຺ວາ ປູເຣນ຺ຕານໍ. ອຸປຣິວິເສສາຘິຄມຕ຺ຖໍ ກາເຍ ຈ ຊີວິເຕ ຈ ອນເປກ຺ຂານໍ. ຕໂຕ ເອວ ສີລປາຣິປູຣິອຕ຺ຖໍ ປຣິຈ຺ຈຕ຺ຕຊີວິຕານໍ. ທິຏ຺ຐິສໍກິເລເສນ ອປຣາມສນີຍໂຕ ປາຣິສຸທ຺ຘິວນ຺ຕໍ ສີລໍ ອປຣາມຏ຺ຐປາຣິສຸທ຺ຘິສີລໍ. ກິເລສານໍ ສພ຺ພໂສ ປຏິປ຺ປສ຺ສທ຺ຘິຍາ ປາຣິສຸທ຺ຘິວນ຺ຕໍ ສີລໍ ປຏິປ຺ປສ຺ສທ຺ຘິປາຣິສຸທ຺ຘິສີລໍ.

ອນຸປສມ຺ປນ຺ນານໍ ອເສກ຺ຂານໍ, ເສກ຺ຂານໍ, ກລ຺ຍາຓປຸຖຸຊ຺ຊນານຎ຺ຈ ສີລໍ ມຫານຸຠາວຕາຍ ອານຸຠາວໂຕ ອປຣິຍນ຺ຕເມວາຕິ ອາຫ ‘‘ຄຓນວເສນ ສປຣິຍນ຺ຕຕ຺ຕາ’’ຕິ. ກາຍວາຈານໍ ສໍວຣຓໂຕ, ວິນຍນໂຕ ຈ ສໍວຣວິນຍາ. ເປຍ຺ຍາລມຸເຂນ ນິທ຺ທິຏ຺ຐາຕິ ຕຕ຺ຖ ຕຕ຺ຖ ສຕ຺ຖາຣາ ເທສິຕວິຕ຺ຖາຣນເຍນ ຍຖາວຸຕ຺ຕຄຓນໂຕ ນິທ຺ທິຏ຺ຐາ. ສິກ຺ຂາຕິ ສີລສງ຺ຂາຕາ ສິກ຺ຂາ. ວິນຍສໍວເຣຕິ ວິນຍປິຏເກ. ຄຓນວເສນ ສປຣິຍນ຺ຕມ຺ປິ ອຸປສມ຺ປນ຺ນານໍ ສີລນ຺ຕິ ເຫຏ຺ຐາ ວຸຕ຺ຕໍ ອາເນຕ຺ວາ ສມ຺ພນ຺ຘິຕພ຺ພໍ. ຍໍ ກິຎ຺ຈິ ຫິ ອຸປສມ຺ປນ຺ເນນ ສິກ຺ຂິຕພ຺ພໍ ສີລໍ ນາມ, ຕຕ຺ຖ ກສ຺ສຈິປິ ອນວເສສໂຕ ອນວເສສວເສນ. ສມາທານຠາວນ຺ຕິ ສມາທານສພ຺ຠາວໍ. ລາຠ…ເປ… ວເສນ ອທິຏ຺ຐປຣິຍນ຺ຕຠາໂວ ລາຠາທິເຫຕຸ ສີລສ຺ສ ອວີຕິກ຺ກໂມ.

ຘນໍ ຈເຊ ອງ຺ຄວຣສ຺ສ ເຫຕຸ ປາຣິປນ຺ຖິກໂຈຣາທີຫິ ອຸປທ຺ທຸໂຕ. ອງ຺ຄໍ ຈເຊ ຊີວິຕໍ ຣກ຺ຂມາໂນ ສປ຺ປທຏ຺ຐາທິກາເລ. ອງ຺ຄໍ ຘນໍ ຊີວິຕຎ຺ຈາປິ ສພ຺ພໍ, ຈເຊ ນໂຣ ຘມ຺ມມນຸສ຺ສຣນ຺ໂຕ ສຸຕໂສມມຫາໂພຘິສຕ຺ຕາທໂຍ ວິຍ. ເຕນາຫ ‘‘ອິມໍ ສປ຺ປຸຣິສານຸສ຺ສຕິໍ ອວິຊຫນ຺ໂຕ’’ຕິ. ຊິຆຈ຺ຉາປຣິສ຺ສເມນ ຊີວິຕສໍສເຍ ສຕິປິ. ສິກ຺ຂາປທໍ ອວີຕິກ຺ກມ຺ມາຕິ ອສ຺ສາມິເກສຸ ອມ຺ພຜເລສຸ ຠູມິຍໍ ປຕິເຕສຸ ສມີເປເຍວ ສນ຺ເຕສຸປິ ປຏິຄ຺ຄາຫກາຠາເວນ ອປຣິຠຸຎ຺ຊນ຺ໂຕ ປຏິຄ຺ຄຫຓສິກ຺ຂາປທໍ ອວີຕິກ຺ກມິຕ຺ວາ.

ສີລວນ຺ຕສ຺ສາຕິ ສີລວນ຺ຕຠາວສ຺ສ ກາຣຓາ, ສີລວນ຺ຕສ຺ສ ວາ ຕຸຍ຺ຫໍ ເອຕາທິສໍ ອໍເສນ ວາຫຓາທິກໍ ກິຈ຺ຈໍ ກໂຣຕິ, ກາຣຓາ ສີລສ຺ສາຕິ ອຘິປ຺ປາໂຍ. ສຸໂຘຕຊາຕິມຓິ ວິຍາຕິ ຈຕູສຸ ປາສາເຓສຸ ສມ຺ມເທວ ໂຘຕຊາຕິມຓິ ວິຍ. ມຫາສງ຺ຆຣກ຺ຂິຕຠາຄິເນຍ຺ຍສງ຺ຆຣກ຺ຂິຕຕ຺ເຖຣານໍ ວິຍາຕິ ມຫາສງ຺ຆຣກ຺ຂິຕຕ຺ເຖຣສ຺ສ, ຕສ຺ເສວ ຠາຄິເນຍ຺ຍສງ຺ຆຣກ຺ຂິຕຕ຺ເຖຣສ຺ສ ວິຍ ຈ. ‘‘ກິມຕ຺ຖໍ ມຍໍ ອິຘາຄຕາ’’ຕິ ມຫາຊນສ຺ສ ວິປ຺ປຏິສາໂຣ ຠວິສ຺ສຕີຕິ ອຘິປ຺ປາໂຍ. ອຈ຺ຉຣິກາຍາຕິ ອງ຺ຄຸລິໂຜຏເນນ. ອສຕິຍາຕິ ສຕິສມ຺ໂມເສນ. ອຎ຺ຎາຓປກຕນ຺ຕິ ອຎ຺ຎາເຓນ ອປຣຊ຺ຌິຕ຺ວາ ກຕໍ, ອຊານິຕ຺ວາ ກຕນ຺ຕິ ອຕ຺ໂຖ.

ອປ຺ປສ຺ສຸໂຕປິ ເຈ ໂຫຕີຕິ ສຸຕ຺ຕເຄຍ຺ຍາທິສຸຕຣຫິໂຕ ໂຫຕິ ເຈ. ສີເລສຸ ອສມາຫິໂຕຕິ ປາຕິໂມກ຺ຂສໍວຣາທິສີເລສຸປິ ນ ສມ຺ມາ ປຕິຏ຺ຐິໂຕ ໂຫຕິ ເຈ. ນາສ຺ສ ສມ຺ປຊ຺ຊເຕ ສຸຕນ຺ຕິ ອສ຺ສ ສີລຣຫິຕສ຺ສ ປຸຄ຺ຄລສ຺ສ ສຸຕໍ ອຕ຺ຕໂນ, ປເຣສຎ຺ຈ ກຕ຺ຖຈິ ຠວສມ຺ປຕ຺ຕິອາວຫໍ ນ ໂຫຕິ. ‘‘ທຸສ຺ສີໂລຍໍ ປຸຣິສປຸຄ຺ຄໂລ’’ຕິ ຫິ ສິກ຺ຂາກາມາ ນ ຕສ຺ສ ສນ຺ຕິກໍ ອຸປສງ຺ກມນ຺ຕິ. ພຫຸສ຺ສຸໂຕປິ ເຈຕິ ເອຕ຺ຖ ເຈ-ຕິ ນິປາຕມຕ຺ຕໍ. ປສໍສິໂຕຕິ ປສໍສິໂຕ ເອວ ນາມ.

ຣາຄວເສນ ອປຣາມຏ຺ຐຄຫເຓນ ຕຓ຺ຫາປຣາມາສາຠາວມາຫ. ຕຖາຣູປນ຺ຕິ ຣາຄວເສນ ອປຣາມຏ຺ຐໍ. ຠິນ຺ທິຕ຺ວາຕິ ຫນິຕ຺ວາ. ສຎ຺ຎເປສ຺ສາມີຕິ ສຎ຺ຎຕ຺ຕິໍ ກຣິສ຺ສາມິ, ອປ຺ປກໍ ເວລໍ ມໍ ວິສ຺ເສຊ຺ເຊຕຸນ຺ຕິ ອຘິປ຺ປາໂຍ. ອຏ຺ຏິຍາມີຕິ ຊິຄຸຈ຺ຉາມິ. ຫຣາຍາມີຕິ ລຊ຺ຊາມິ.

ປລິປນ຺ໂນຕິ ສີທນ຺ໂຕ, ສມ຺ມກ຺ຂິໂຕ ວາ. ສີເລເນວ ສທ຺ຘິໍ ມຣິສ຺ສາມີຕິ ສີລໍ ອວິນາເສນ຺ໂຕ ເຕນ ສເຫວ ມຣິສ຺ສາມິ, ນ ອິທານິ ກທາຈິປິ ຕໍ ປຣິຈ຺ຈຊິສ຺ສາມິ. ສຕິ ຫິ ຠວາທາເນ ສີເລນ ວິໂຍໂຄ ສິຍາ, ຠວເມວ ນາທິຍິສ຺ສາມີຕິ ອຘິປ຺ປາໂຍ. ໂຣຄໍ ສມ຺ມສນ຺ໂຕຕິ ໂຣຄຠູຕໍ ເວທນໍ ເວທນາມຸເຂນ ເສສາຣູປຘມ຺ເມ, ຣູປຘມ຺ເມ ຈ ປຣິຄ຺ຄເຫຕ຺ວາ ວິປສ຺ສນ຺ໂຕ.

ຣຸປ຺ປໂຕຕິ ວິກາຣໍ ອາປາທິຍມານສຣີຣສ຺ສ. ປຣິສຸສ຺ສຕີຕິ ສມນ຺ຕໂຕ ສຸສ຺ສຕິ. ຍຖາ ກິໍ? ປຸປ຺ຜໍ ຍຖາ ປໍສຸນິ ອາຕເປ ກຕໍ ສູຣິຍາຕປສນ຺ຕຕ຺ເຕ ປໍສຸນິ ຐປິຕໍ ສິຣີສາທິປຸປ຺ຜໍ ວິຍາຕິ ອຕ຺ໂຖ. ອຊຎ຺ຎນ຺ຕິ ອມນຸຎ຺ຎໍ ຊິຄຸຈ຺ຉນີຍໍ. ຊຎ຺ຎສງ຺ຂາຕນ຺ຕິ ພາເລຫິ ‘‘ຊຎ຺ຎ’’ນ຺ຕິ ເອວໍ ກິຕ຺ຕິຕໍ. ຊຎ຺ຎຣູປໍ ອປສ຺ສໂຕຕິ ຍຖາຠູຕໍ ອປ຺ປສ຺ສໂຕ ອວິທ຺ທສຸໂນ ‘‘ຊຎ຺ຎ’’ນ຺ຕິ ປສໍສິຕໍ. ຘິຣຕ຺ຖຸມນ຺ຕິ ຘິ ອຕ຺ຖຸ ອິມໍ, ຘິ-ສທ຺ທໂຍເຄນ ສພ຺ພຕ຺ຖ ອຸປໂຍຄວຈນໍ, ອິມສ຺ສ ປູຕິກາຍສ຺ສ ຘິກາໂຣ ໂຫຕູຕິ ອຕ຺ໂຖ. ທຸຄ຺ຄນ຺ຘິຍນ຺ຕິ ທຸຄ຺ຄນ຺ຘິກໍ ທຸຄ຺ຄນ຺ຘວນ຺ຕໍ. ຍຕ຺ຖ ຍຖາວຸຕ຺ເຕ ປູຕິກາເຍ ຣາຄເຫຕຸ ປມຕ຺ຕາ ປມາທໍ ອາປນ຺ນາ. ປຊາຕິ ສຕ຺ຕາ. ຫາເປນ຺ຕິ ມຄ຺ຄໍ ສຸຄຕູປປຕ຺ຕິຍາຕິ ສຸຄຕູປປຕ຺ຕິຍາ ມຄ຺ຄໍ, ສີລມ຺ປິ ຫາເປນ຺ຕິ, ປເຄວ ຌານາທິນ຺ຕິ ອຘິປ຺ປາໂຍ. ເກວລໍ ‘‘ອຣຫນ຺ໂຕ’’ຕິ ວຕ຺ຕພ຺ພາ ສາວກຂີຓາສວາ, ອິຕເຣ ປນ ປຈ຺ເຈກພຸທ຺ຘາ ສມ຺ມາສມ຺ພຸທ຺ຘາຕິ ສຫ ວິເສສເນນາຕິ ອາຫ ‘‘ອຣຫນ຺ຕາທີນ’’ນ຺ຕິ. ສພ຺ພທຣຖປ຺ປຏິປ຺ປສ຺ສທ຺ຘິຍາຕິ ສພ຺ພກິເລສທຣຖປ຺ປຏິປ຺ປສ຺ສທ຺ຘິຍາ.