ອາຊີວປາຣິສຸທ຺ຘິສີລວຓ຺ຓນາ

໑໖. ວຸຕ຺ເຕຕິ ອິເຘວ ອຸທ຺ເທສວເສນ ປຸພ຺ເພ ວຸຕ຺ເຕ. ຕຖາ ຫິ ‘‘ອາຊີວເຫຕຸ ປຎ຺ຎຕ຺ຕານໍ ຉນ຺ນໍ ສິກ຺ຂາປທານ’’ນ຺ຕິ ປທຸທ຺ຘາຣໍ ກຕ຺ວາ ຕານິ ປາຬິວເສເນວ ທສ຺ເສຕຸໍ ‘‘ຍານິ ຕານີ’’ຕິອາທິ ອາຣທ຺ຘໍ. ຕຕ຺ຖ ຍານິ ຕານິ ເອວໍ ປຎ຺ຎຕ຺ຕານິ ຉ ສິກ຺ຂາປທານີຕິ ສມ຺ພນ຺ໂຘ. ອາຊີວເຫຕູຕິ ຊີວິກນິມິຕ຺ຕໍ, ‘‘ເອວາຫໍ ປຈ຺ຈເຍຫິ ອກິລມນ຺ໂຕ ຊີວິສ຺ສາມີ’’ຕິ ອຘິປ຺ປາເຍນ. ອາຊີວກາຣຓາຕິ ຕສ຺ເສວ ເວວຈນໍ. ປາປິຈ຺ໂຉຕິ ປາປິກາຍ ອສນ຺ຕຄຸຓສມ຺ຠາວນິຈ຺ຉາຍ ສມນ຺ນາຄໂຕ. ອິຈ຺ຉາປກໂຕຕິ ອິຈ຺ຉາຍ ອປກໂຕ ອຸປທ຺ທຸໂຕ, ອຠິຠູໂຕ ວາ. ອສນ຺ຕນ຺ຕິ ອວິຊ຺ຊມານໍ. ອຠູຕນ຺ຕິ ອນຸປ຺ປນ຺ນໍ. ອນຸປ຺ປນ຺ນຕ຺ຕາ ຫິ ຕສ຺ສ ຕໍ ອສນ຺ຕນ຺ຕິ ປຸຣິມສ຺ສ ປຈ຺ຉິມໍ ກາຣຓວຈນໍ. ອຸຕ຺ຕຣິມນຸສ຺ສຘມ຺ມນ຺ຕິ ອຸຕ຺ຕຣິມນຸສ຺ສານໍ ອຸກ຺ກຏ຺ຐປຸຣິສານໍ ຘມ຺ມໍ, ມນຸສ຺ສຘມ຺ມໂຕ ວາ ອຸຕ຺ຕຣິ ອຸກ຺ກຏ຺ຐໍ. ອຸລ຺ລປຕີຕິ ອຸຄ຺ຄຕາຍຸໂກ ລປຕິ. ສີລໍ ຫິ ຠິກ຺ຂຸໂນ ອາຍຸ, ຕໍ ຕສ຺ສ ຕຖາລປນສມກາລເມວ ວິຄຈ຺ຉຕິ. ເຕນາຫ ‘‘ອາປຕ຺ຕິ ປາຣາຊິກສ຺ສາ’’ຕິ ປາຣາຊິກສງ຺ຂາຕາ ອາປຕ຺ຕິ ອສ຺ສ, ປາຣາຊິກສຎ຺ຎິຕສ຺ສ ວາ ວີຕິກ຺ກມສ຺ສ ອາປຊ຺ຊນໍ ອຸລ຺ລປນນ຺ຕິ ອຕ຺ໂຖ. ສຎ຺ຈຣິຕ຺ຕໍ ສມາປຊ຺ຊຕີຕິ ສຎ຺ຈຣຓຠາວໍ ອາປຊ຺ຊຕິ, ອິຕ຺ຖິຍາ ວາ ປຸຣິສມຕິໍ, ປຸຣິສສ຺ສ ວາ ອິຕ຺ຖິມຕິໍ ອາໂຣເຈຕີຕິ ອຘິປ຺ປາໂຍ. ‘‘ອິເມສໍ ຉນ຺ນໍ ສິກ຺ຂາປທານໍ ວີຕິກ຺ກມສ຺ສ ວເສນາ’’ຕິ ສມ຺ພນ຺ໂຘ ເຫຏ຺ຐາ ທສ຺ສິໂຕ ເອວ.

ກຸຫນາຕິອາທີສູຕິ ເຫຏ຺ຐາ ອຸທ຺ທິຏ຺ຐປາຬິຍາວ ປທຸທ຺ຘາໂຣ. ອຍໍ ປາຬີຕິ ອຍໍ ວິຠງ຺ເຄ (ວິຠ. ໘໖໑) ອາຄຕາ ນິທ຺ເທສປາຬິ.

໑໗. ຈີວຣາທິປຈ຺ຈຍາ ລພ຺ຠນ຺ຕີຕິ ລາຠາ. ເຕ ເອວ ສກ຺ກຈ຺ຈໍ ອາທຣວເສນ ທິຍ຺ຍມານາ ສກ຺ກາຣາ. ປຕ຺ຖຏຍສຕາ ກິຕ຺ຕິສທ຺ໂທ. ຕໍ ລາຠຎ຺ຈ ສກ຺ກາຣຎ຺ຈ ກິຕ຺ຕິສທ຺ທຎ຺ຈ. ສນ຺ນິສ຺ສິຕສ຺ສາຕິ ເອຕ຺ຖ ຕຓ຺ຫານິສ຺ສໂຍ ອຘິປ຺ເປໂຕຕິ ອາຫ ‘‘ປຕ຺ຖຍນ຺ຕສ຺ສາ’’ຕິ. ອສນ຺ຕຄຸຓທີປນກາມສ຺ສາຕິ ອສນ຺ເຕ ອຕ຺ຕນິ ອວິຊ຺ຊມາເນ ສທ຺ຘາທິຄຸເຓ ສມ຺ຠາເວຕຸກາມສ຺ສ. ອສນ຺ຕຄຸຓສມ຺ຠາວນຕາລກ຺ຂຓາ, ປຏິຄ຺ຄຫເຓ ຈ ອມຕ຺ຕຎ຺ຎຸຕາລກ຺ຂຓາ ຫິ ປາປິຈ຺ຉຕາ. ອິຈ຺ຉາຍ ອປກຕສ຺ສາຕິ ປາປິກາຍ ອິຈ຺ຉາຍ ສມ຺ມາອາຊີວໂຕ ອເປໂຕ ກໂຕຕິ ອປກໂຕ. ຕຖາຠູໂຕ ຈ ອາຊີວູປທ຺ທເວນ ອຸປທ຺ທຸໂຕຕິ ກຕ຺ວາ ອາຫ ‘‘ອຸປທ຺ທຸຕສ຺ສາຕິ ອຕ຺ໂຖ’’ຕິ.

ກຸຫນເມວ ປຈ຺ຈຍຸປ຺ປາທນສ຺ສ ວຕ຺ຖູຕິ ກຸຫນວຕ຺ຖຸ. ຕິວິຘມ຺ເປຕໍ ຕຕ຺ຖ ອາຄຕໍ ຕສ຺ສ ນິສ຺ສຍຠູຕາຍ ອິມາຍ ປາຬິຍາ ທສ຺ເສຕຸນ຺ຕິ ເອວມຕ຺ໂຖ ທຏ຺ຐພ຺ໂພ. ຕທຕ຺ຖິກສ຺ເສວາຕິ ເຕຫິ ຈີວຣາທີຫິ ອຕ຺ຖິກສ຺ເສວ. ປຏິກ຺ຂິປເນນາຕິ ຈີວຣາທີນໍ ປຏິກ຺ຂິປນເຫຕຸ. ອສ຺ສາຕິ ຠເວຍ຺ຍ. ປຏິຄ຺ຄຫເຓນ ຈາຕິ ຈ-ສທ຺ເທນ ປຸພ຺ເພ ວຸຕ຺ຕໍ ປຏິກ຺ຂິປນໍ ສມຸຈ຺ຈິໂນຕິ.

ຠິຍ຺ໂຍກມ຺ຍຕນ຺ຕິ ພຫຸກາມຕໍ. ຍນ຺ຕິ ກິຣິຍາປຣາມສນໍ, ຕສ຺ມາ ‘‘ຘາເຣຍ຺ຍາ’’ຕິ ເອຕ຺ຖ ຍເທຕໍ ສງ຺ຆາຏິໍ ກຕ຺ວາ ຘາຣຓໍ, ເອຕໍ ສມຓສ຺ສ ສາຣຸປ຺ປນ຺ຕິ ໂຍຊນາ. ປາປຓິການີຕິ ອາປຓໂຕ ຉຑ຺ຑິຕານິ. ນນ຺ຕການີຕິ ອນ຺ຕຣຫິຕານິ ໂຈຬຂຓ຺ຑານິ. ອຸຈ຺ຈິນິຕ຺ວາຕິ ອຸຎ຺ຉເນນ ຈິນິຕ຺ວາ ສງ຺ຄເຫຕ຺ວາ. ອຸຎ຺ຉາຈຣິຍາຍາຕິ ອຸຎ຺ຉາຈຣິຍາຍ ລທ຺ເຘນ. ຄິລານສ຺ສ ປຈ຺ຈຍຠູຕາ ເຠສຊ຺ຊສງ຺ຂາຕາ ຊີວິຕປຣິກ຺ຂາຣາ ຄິລານປຈ຺ຈຍເຠສຊ຺ຊປຣິກ຺ຂາຣາ. ປູຕິມຸຕ຺ຕນ຺ຕິ ປຸຣາຓສ຺ສ, ອປຸຣາຓສ຺ສ ຈ ສພ຺ພສ຺ສ ໂຄມຸຕ຺ຕສ຺ເສຕໍ ນາມໍ. ປູຕິມຸຕ຺ເຕນາຕິ ປູຕິຠາເວນ ມຸຕ຺ເຕນ ປເຣຫິ ຉຑ຺ຑິເຕນ, ປູຕິຠູເຕນ ວາ ໂຄມຸຕ຺ເຕນ. ຘຸຕວາໂທຕິ ປເຣສມ຺ປິ ຘຸຕຄຸຓວາທີ. ສມ຺ມຸຂີຠາວາຕິ ສມ຺ມຸຂໂຕ ວິຊ຺ຊມານຕ຺ຕາ, ລພ຺ຠມານຕາຍາຕິ ອຕ຺ໂຖ.

ອຕ຺ຕານໍ ອຸຕ຺ຕຣິມນຸສ຺ສຘມ຺ມາຘິຄມສ຺ສ ສາມນ຺ເຕ ກຕ຺ວາ ຊປ຺ປນໍ ສາມນ຺ຕຊປ຺ປນໍ. ມເຫສກ຺ໂຂຕິ ມຫານຸຠາໂວ, ອຸຕ຺ຕຣິມນຸສ຺ສຘມ຺ມາຘິຄເມນາຕິ ອຘິປ຺ປາໂຍ. ‘‘ມິຕ຺ໂຕ’’ຕິ ສາມຎ຺ຎໂຕ ວຕ຺ວາ ປຸນ ຕໍ ວິເສເສຕິ ‘‘ສນ຺ທິຏ຺ໂຐ ສມ຺ຠຕ຺ໂຕ’’ຕິ. ທິຏ຺ຐມຕ຺ໂຕ ຫິ ມິຕ຺ໂຕ ສນ຺ທິຏ຺ໂຐ. ທຬ຺ຫຠຕ຺ຕິໂກ ສມ຺ຠຕ຺ໂຕ. ສຫາໂຍຕິ ສຫ ອາຍນໂກ, ສຂາຕິ ອຕ຺ໂຖ. ສຕ຺ຕປທິໂນ ຫິ ‘‘ສຂາ’’ຕິ ວຸຈ຺ຈນ຺ຕິ. ວິຫາໂຣ ປາກາຣປຣິຈ຺ຉິນ຺ໂນ ສກໂລ ອາວາໂສ. ອຑ຺ຒໂຍໂຄ ທີຆປາສາໂທ, ຄຣຸຬສຓ຺ຐານປາສາໂທຕິປິ ວທນ຺ຕິ. ປາສາໂທ ຈຕຸຣສ຺ສປາສາໂທ. ຫມ຺ມິຍໍ ມຸຓ຺ຑຈ຺ຉທນປາສາໂທ. ກູຏາຄາຣໍ ທ຺ວີຫິ ກຓ຺ຓິກາຫິ ກຕ຺ຕພ຺ພປາສາໂທ. ອຏ຺ໂຏ ປຏິຣາຊູນມ຺ປິ ປຏິພາຫນໂຍຄ຺ໂຍ ຈຕຸປຎ຺ຈຠູມໂກ ປຏິສ຺ສຍວິເສໂສ. ມາໂຬ ເອກກູຏສງ຺ຄຫິໂຕ ອເນກໂກຓວນ຺ໂຕ ປຏິສ຺ສຍວິເສໂສ. ອຸທ຺ທຓ຺ໂຑ ອຄພ຺ຠິກາ ເອກທ຺ວາຣາ ທີຆສາລາຕິ ວທນ຺ຕິ. ອປເຣ ປນ ຠຓນ຺ຕິ – ວິຫາໂຣ ນາມ ທີຆມຸຂປາສາໂທ. ອຑ຺ຒໂຍໂຄ ເອກປສ຺ເສນ ຉທນກເສນາສນໍ. ຕສ຺ສ ກິຣ ເອກປສ຺ເສ ຠິຕ຺ຕິ ອຸຈ຺ຈຕຣາ ໂຫຕິ, ອິຕຣປສ຺ເສ ນີຈາ, ເຕນ ຕໍ ເອກປສ຺ສຉທນກໍ ໂຫຕິ. ປາສາໂທ ອາຍຕຈຕຸຣສ຺ສປາສາໂທ. ຫມ຺ມິຍໍ ມຸຓ຺ຑຈ຺ຉທນໍ ຈນ຺ທິກງ຺ຄຓຍຸຕ຺ຕໍ. ຄຸຫາ ເກວລາ ປພ຺ພຕຄຸຫາ. ເລຓໍ ທ຺ວາຣພທ຺ຘໍ. ກູຏາຄາຣໍ ໂຍ ໂກຈິ ກຓ຺ຓິກາພທ຺ຘປາສາໂທ. ອຏ຺ໂຏ ພຫລຠິຕ຺ຕິເຄຫໍ. ຍສ຺ສ ໂຄປານສິໂຍ ອຄ຺ຄເຫຕ຺ວາ ອິຏ຺ຐກາຫິ ເອວ ຉທນໍ ໂຫຕິ. ອຏ຺ຏາລກາກາເຣນ ກຣີຍຕີຕິປິ ວທນ຺ຕິ. ມາໂຬ ວຏ຺ຏາກາເຣນ ກຕເສນາສນໍ. ອຸທ຺ທຓ຺ໂຑ ເອໂກ ປຏິສ຺ສຍວິເສໂສ. ໂຍ ‘‘ຠຓ຺ຑສາລາ, ອຸໂທສິຕ’’ນ຺ຕິປິ ວຸຈ຺ຈຕິ. ອຸປຏ຺ຐານສາລາ ສນ຺ນິປຕນຏ຺ຐານໍ.

ກຸຈ຺ຉິຕຣຊຠູຕາຍ ປາປິຈ຺ຉຕາຍ ນິຣຕ຺ຖກໍ ກາຍວຈີວິປ຺ຜນ຺ທນິຄ຺ຄຓ຺ຫນໍ ໂກຣຊໍ, ຕໍ ເອຕສ຺ສ ອຕ຺ຖີຕິ ໂກຣຊິໂກ, ໂກຫຎ຺ເຎນ ສໍຍຕກາໂຍ, ອຕິວິຍ, ອຠິຓ຺ຫໍ ວາ ໂກຣຊິໂກ ໂກຣຊິກໂກຣຊິໂກ. ອຕິປຣິສງ຺ກິໂຕຕິ ເກຈິ. ອຕິວິຍ ກຸໂຫ ກຸຫກກຸຫໂກ, ສາຕິສຍວິມ຺ຫາປໂກຕິ ອຕ຺ໂຖ. ອຕິວິຍ ລໂປ ລປນໂກ ລປກລປໂກ. ມຸຂສມ຺ຠາວິໂກຕິ ໂກຣຊິກໂກຣຊິກາທິຠາເວນ ປວຕ຺ຕວຈເນຫິ ອຕ຺ຕໂນ ມຸຂມຕ຺ເຕນ ອຎ຺ເຎຫິ ສມ຺ຠາວິໂກ. ໂສ ເອວຣູໂປ ເອວຣູປຕາຍ ເອວ ອຕ຺ຕານໍ ປຣໍ ວິຍ ກຕ຺ວາ ‘‘ອຍໍ ສມໂຓ’’ຕິອາທີນິ ກເຖຕິ. ຄມ຺ຠີຣນ຺ຕິອາທິ ຕສ຺ສາ ກຖາຍ ອຸຕ຺ຕຣິມນຸສ຺ສຘມ຺ມປຏິພທ຺ຘຕາຍ ວຸຕ຺ຕໍ.

ສມ຺ຠາວນາຘິປ຺ປາຍກເຕນາຕິ ‘‘ກຖໍ ນຸ ໂຂ ມໍ ຊໂນ ‘ອຣິໂຍ’ຕິ ວາ ‘ວິເສສລາຠີ’ຕິ ວາ ສມ຺ຠາເວຍ຺ຍາ’’ຕິ ອິມິນາ ອຘິປ຺ປາເຍນ ກເຕນ. ຄມນໍ ສຓ຺ຐເປຕີຕິ ວິເສສລາຠີນໍ ຄມນໍ ວິຍ ອຕ຺ຕໂນ ຄມນໍ ສກ຺ກຈ຺ຈໍ ຐເປຕິ, ສໂຕ ສມ຺ປຊາໂນວ ຄຈ຺ຉນ຺ໂຕ ວິຍ ໂຫຕິ. ປຓິຘາຍາຕິ ‘‘ອຣຫາຕິ ມໍ ຊານນ຺ຕູ’’ຕິ ຈິຕ຺ຕໍ ສຓ຺ຐເປຕ຺ວາ, ປຕ຺ເຖຕ຺ວາ ວາ. ສມາຫິໂຕ ວິຍາຕິ ຌານສມາຘິນາ ສມາຫິໂຕ ວິຍ. ອາປາຖກຊ຺ຌາຍີຕິ ມນຸສ຺ສານໍ ອາປາຖຏ຺ຐາເນ ສມາຘິສມາປນ຺ໂນ ວິຍ ນິສີທນ຺ໂຕ ອາປາຖເກ ຊນສ຺ສ ປາກຏຏ຺ຐາເນ ຌາຍີ. ອິຣິຍາປຖສງ຺ຂາຕນ຺ຕິ ອິຣິຍາປຖສຓ຺ຐປນສງ຺ຂາຕໍ.

ປຈ຺ຈຍປຏິເສວນສງ຺ຂາເຕນາຕິ ອໂຍນິໂສ ອຸປ຺ປາທິຕານໍ ປຈ຺ຈຍານໍ ປຏິເສວນນ຺ຕິ ເອວໍ ກຖິເຕນ, ເຕນ ວາ ປຈ຺ຈຍປຏິເສວເນນ ສງ຺ຂາຕພ຺ເພນ ກຖິຕພ຺ເພນ. ອຎ຺ຎໍ ວິຍ ກຕ຺ວາ ອຕ຺ຕໂນ ສມີເປ ຠຓນໍ ສາມນ຺ຕຊປ຺ປິຕໍ. ອາ-ກາຣສ຺ສ ຣສ຺ສຕ຺ຕໍ ກຕ຺ວາ ‘‘ອຏ຺ຐປນາ’’ຕິ ວຸຕ຺ຕໍ. ກຸຫນໍ ກຸໂຫ, ຕສ຺ສ ອຍນາ ປວຕ຺ຕິ ກຸຫາຍນາ, ກຸຫສ຺ສ ວາ ປຸຄ຺ຄລສ຺ສ ອຍນາ ຄຕິ ກິຣິຍາ ກຸຫາຍນາ. ກຸເຫຕິ, ກຸເຫນ ວາ ອິໂຕຕິ ກຸຫິໂຕ, ກຸຫໂກ.

ປຸຏ຺ຐສ຺ສາຕິ ‘‘ໂກ ຕິສ຺ໂສ, ໂກ ຣາຊປູຊິໂຕ’’ຕິ ປຸຏ຺ຐສ຺ສ. ອຸທ຺ຘໍ ກຕ຺ວາຕິ ອຸກ຺ຂິປິຕ຺ວາ ວິຠວສມ຺ປຕ຺ຕິອາທິນາ ປຄ຺ຄເຫຕ຺ວາ.

ອຸນ຺ນຫນາຕິ ອຸທ຺ຘໍ ອຸທ຺ຘໍ ພນ຺ຘນາ ປລິເວຐນາ. ທ຺ເວ ກິຣ ຠິກ຺ຂູ ເອກໍ ຄາມໍ ປວິສິຕ຺ວາ ອາສນສາລາຍ ນິສີທິຕ຺ວາ ເອກໍ ກຸມາຣິກໍ ປກ຺ໂກສິໍສຸ. ຕາຍ ອາຄຕາຍ ຕຕ຺ເຣໂກ ເອກໍ ປຸຈ຺ຉິ ‘‘ອຍໍ, ຠນ຺ເຕ, ກສ຺ສ ກຸມາຣິກາ’’ຕິ? ‘‘ອມ຺ຫາກໍ ອຸປຏ຺ຐາຍິກາຍ ເຕລກນ຺ທຣິກາຍ ຘີຕາ, ອິມິສ຺ສາ ມາຕາ ມຍິ ເຄຫໍ ຄເຕ ສປ຺ປິໍ ທທມານາ ຆເຏເນວ ເທຕິ, ອຍມ຺ປິ ມາຕາ ວິຍ ຆເຏນ ເທຕີ’’ຕິ (ວິຠ. ອຏ຺ຐ. ໘໖໒) ອຸກ຺ກາເຈສິ. ອິມໍ ສນ຺ຘາຍ ວຸຕ຺ຕໍ ‘‘ເຕລກນ຺ທຣິກວຕ຺ຖຸ ເຈຕ຺ຖ ວຕ຺ຕພ຺ພ’’ນ຺ຕິ.

ຘມ຺ມານຸຣູປາ ວາຕິ ມຕ຺ຕາວຈນານຸຣູປໍ ວາ. ມຕ຺ຕາວຈນໍ ຫິ ‘‘ຘມ຺ໂມ’’ຕິ ວຸຈ຺ຈຕິ. ຍຖາຫ ‘‘ສຸຠາສິຕໍ ອຸຕ຺ຕມມາຫຸ ສນ຺ໂຕ, ຘມ຺ມໍ ຠເຓ ນາຘມ຺ມໍ ຕໍ ທຸຕິຍ’’ນ຺ຕິ (ສໍ. ນິ. ໑.໒໑໓; ສຸ. ນິ. ໔໕໒). ເຕນ ພຫຸໍ ວິປ຺ປລປນມາຫ, ສຈ຺ຈໂຕ ວາ ອຎ຺ຎາ ສຸຠາສິຕາ ວາຈາ ‘‘ຘມ຺ໂມ’’ຕິ ເວທິຕພ຺ໂພ. ມຸຄ຺ຄສູປສທິສກມ຺ໂມ ປຸຄ຺ຄໂລ ມຸຄ຺ຄສູປ຺ໂຍ. ເຕນາຫ ‘‘ອຍໍ ປຸຄ຺ຄໂລ ມຸຄ຺ຄສູປ຺ໂຍຕິ ວຸຈ຺ຈຕີ’’ຕິ. ປຣິຠຏສ຺ສ ກມ຺ມໍ ປາຣິຠຏ຺ຍໍ, ຕເທວ ປາຣິຠຏ຺ຍຕາ.

ນິມິຕ຺ເຕນ ຈຣນ຺ໂຕ, ຊີວນ຺ໂຕ ວາ ນິມິຕ຺ຕໂກ, ຕສ຺ສ ຠາໂວ ເນມິຕ຺ຕິກຕາ. ອຕ຺ຕໂນ ອິຈ຺ຉາຍ ປກາສນໍ ໂອຠາໂສ. ໂກ ປນ ໂສຕິ? ‘‘ອຊ຺ຊ ຠິກ຺ຂູນໍ ປຈ຺ຈຍາ ທຸລ຺ລຠາ ຊາຕາ’’ຕິອາທິກາ ປຈ຺ຈຍປຏິສໍຍຸຕ຺ຕກຖາ. ອິຈ຺ຉິຕວຕ຺ຖຸສ຺ສ ສມີເປ ກຖນໍ ສາມນ຺ຕຊປ຺ປາ.

ອກ຺ໂກສນຠເຍນາປິ ທເທຍ຺ຍາຕິ ທສຫິ ອກ຺ໂກສວຕ຺ຖູຫິ ອກ຺ໂກສນໍ. ຕຖາ ວມ຺ຠນາທໂຍ. ອຸເປກ຺ຂນາ ອຸປາສການໍ ທາຍກາທິຠາວໂຕ ພຫິ ຉຑ຺ຑນາ. ຂິປນາຕິ ເຂປວຈນໍ. ຕໍ ປນ ອວຫສິຕ຺ວາ ວຈນໍ ໂຫຕີຕິ ອາຫ ‘‘ອຸປ຺ປຓ຺ຑນາ’’ຕິ. ປາປນາຕິ ອທາຍກຕ຺ຕສ຺ສ, ອວຓ຺ຓສ຺ສ ວາ ປຕິຏ຺ຐາປນໍ. ປເຣສໍ ປິຏ຺ຐິມໍສຂາທນສີໂລ ປຣປິຏ຺ຐິມໍສິໂກ, ຕສ຺ສ ຠາໂວ ປຣປິຏ຺ຐິມໍສິກຕາ. ອພ຺ຠງ຺ຄນ຺ຕິ ອພ຺ຠຎ຺ຊນໍ. ນິປິສິຕ຺ວາ ຄນ຺ຘມຄ຺ຄນາ ວິຍາຕິ ອນິປ຺ປິສິເຕ ອລພ຺ຠມານສ຺ສ ຄນ຺ຘສ຺ສ ນິປິສເນ ລາໂຠ ວິຍ ປຣຄຸເຓ ອນິປ຺ປິສິເຕ ອລພ຺ຠມານານໍ ປຈ຺ຈຍານໍ ນິປິສເນນ ລາໂຠ ທຏ຺ຐພ຺ໂພຕິ.

ນິກຕ຺ຕຸໍ ອປ຺ເປນ ລາເຠນ ພຫຸກໍ ວຎ຺ເຈຕ຺ວາ ຄເຫຕຸໍ ອິຈ຺ຉນໍ ນິຊິຄີສນໍ, ຕສ຺ສ ຠາໂວ ນິຊິຄີສນຕາ. ຕສ຺ເສວ ອິຈ຺ຉນສ຺ສ ປວຕ຺ຕິອາກາໂຣ, ຕໍສຫຊາຕໍ ວາ ຄເວສນກມ຺ມໍ.

ອງ຺ຄນ຺ຕິ ຫຕ຺ຖປາທາທິອງ຺ຄານິ ອຸທ຺ທິສ຺ສ ປວຕ຺ຕໍ ວິຊ຺ຊໍ. ນິມິຕ຺ຕນ຺ຕິ ນິມິຕ຺ຕສຕ຺ຖໍ. ອຸປ຺ປາຕນ຺ຕິ ອຸກ຺ກາປາຕທິສາຑາຫ-ຠູມິຈາລາທິອຸປ຺ປາຕປຏິພທ຺ຘວິຊ຺ຊໍ. ສຸປິນນ຺ຕິ ສຸປິນສຕ຺ຖໍ. ລກ຺ຂຓນ຺ຕິ ອິຕ຺ຖິປຸຣິສານໍ ລກ຺ຂຓຊານນສຕ຺ຖໍ. ມູສິກຈ຺ຉິນ຺ນນ຺ຕິ ວຕ຺ຖາທີນໍ ອສຸກຠາເຄ ມູສິກຈ຺ເຉເທ ສຕິ ອິທໍ ນາມ ຜລໍ ໂຫຕີຕິ ຊານນກສຕ຺ຖໍ. ປລາສຄ຺ຄິອາທີສຸ ອິມິນາ ນາມ ອຄ຺ຄິນາ ຫຸເຕ ອິທໍ ນາມ ໂຫຕີຕິ ອຄ຺ຄິວເສນ ໂຫມວິຘານໍ ອຄ຺ຄິໂຫມໍ. ອິມິນາ ນເຍນ ທພ຺ພິໂຫມໍ ເວທິຕພ຺ພໍ. ອາທິ-ສທ຺ເທນ ຖຸສໂຫມາທີນໍ, ອຎ຺ເຎສຎ຺ຈ ສຸຕ຺ເຕ ອາຄຕານໍ ມິຈ຺ຉາຊີວານໍ ສງ຺ຄໂຫ ທຏ຺ຐພ຺ໂພ. ວີຣິຍສາຘນຕ຺ຕາ ອາຊີວປາຣິສຸທ຺ຘິສີລສ຺ສ ‘‘ປຈ຺ຈຍປຣິເຍສນວາຍາໂມ’’ຕິ ວຸຕ຺ຕໍ. ຕສ຺ສ ປາຣິສຸທ຺ຘິ ອນວຊ຺ຊຠາໂວ, ເຍນ ຘມ຺ເມນ ສເມນ ປຈ຺ຈຍລາໂຠ ໂຫຕິ. ນ ຫິ ອລໂສ ຎາເຍນ ປຈ຺ຈເຍ ປຣິເຍສິຕຸໍ ສກ຺ໂກຕີຕິ.