ວິມຸຕ຺ຕິມຄ຺ຄປກຣຓໍ

ໂກ ໂສ ວິມຸຕ຺ຕິມຄ຺ໂຄ ນາມ? ວິສຸທ຺ຘິມຄ຺ໂຄ ວິຍ ສີລສມາຘິປຎ຺ຎານໍ ວິສຸໍ ວິສຸໍ ວິຠຊິຕ຺ວາ ທີປໂກ ເອໂກ ປຏິປຕ຺ຕິຄນ຺ໂຖ. ຕຕ຺ຖ ຫິ –

‘‘ສີລໍ ສມາຘິ ປຎ຺ຎາ ຈ, ວິມຸຕ຺ຕິ ຈ ອນຸຕ຺ຕຣາ;

ອນຸພຸທ຺ຘາ ອິເມ ຘມ຺ມາ, ໂຄຕເມນ ຍສສ຺ສິນາ’’ຕິ [ທີ. ນິ. ໒.໑໘໖; ອ. ນິ. ໔.໑] –

ອິມໍ ຄາຖໍ ປຐມໍ ທສ຺ເສຕ຺ວາ ຕທຕ຺ຖວຓ຺ຓນາວເສນ ສີລສມາຘິປຎ຺ຎາວິມຸຕ຺ຕິໂຍ ວິສຸໍ ວິສຸໍ ວິຠຊິຕ຺ວາ ທີປິຕາ. ໂສ ປນ ຄນ຺ໂຖ ອິທານິ ຈິນຣຏ຺ເຐເຍວ ທິຏ຺ໂຐ, ຈິນຠາສາຍ ຈ ປຣິວຕ຺ຕິໂຕ (໑໐໔໘-ພຸ-ວ) ສງ຺ຆປາເລນ ນາມ ຠິກ຺ຂຸນາ. ເກນ ປນ ໂສ ກຸໂຕ ຈ ຕຕ຺ຖ ອານີໂຕຕິ ນ ປາກຏເມຕໍ. ຕສ຺ສ ປນ ສງ຺ຆປາລສ຺ສ ອາຈຣິໂຍ ຄຸຓຠທ຺ໂຣ ນາມ ມຫາຍານິໂກ ຠິກ຺ຂຸ ມຊ຺ຌິມອິນ຺ທິຍເທສິໂກ, ໂສ ອິນ຺ທິຍຣຏ຺ຐໂຕ ຈິນຣຏ຺ຐໍ ຄຈ຺ຉນ຺ໂຕ ປຐມໍ ສີຫຬທີປໍ ຄນ຺ຕ຺ວາ ຕໂຕ (໙໗໘-ພຸ-ວ) ຈິນຣຏ຺ຐໍ ຄໂຕ. ຕທາ ໂສ ເຕນ ອານີໂຕ ຠເວຍ຺ຍ [ວິມຸຕ຺ຕິມຄ຺ຄ, ວິສຸທ຺ຘິມຄ຺ຄ].

ຕສ຺ມິຎ຺ຫິ ວິມຸຕ຺ຕິມຄ຺ເຄ ປຸພ຺ພາຈິຓ຺ຓນິທານທສ຺ສນໍ ຘາຕຸນິທານທສ຺ສນຎ຺ຈ ຍເຖວ ວິສຸທ຺ຘິມຄ຺ເຄ ເອກຈ຺ເຈວາໂທ, ຕເຖວາຄຕໍ. ໂທສນິທານທສ຺ສເນ ປນ ‘‘ເສມ຺ຫາຘິໂກ ຣາຄຈຣິໂຕ, ປິຕ຺ຕາຘິໂກ ໂທສຈຣິໂຕ, ວາຕາຘິໂກ ໂມຫຈຣິໂຕ. ເສມ຺ຫາຘິໂກ ວາ ໂມຫຈຣິໂຕ, ວາຕາຘິໂກ ຣາຄຈຣິໂຕ’’ຕິ ຕິຓ຺ຓມ຺ປິ ຣາຄໂທສໂມຫານໍ ໂທສນິຍໂມ ວຸຕ຺ໂຕ. ອາຈຣິຍພຸທ຺ຘໂຆເສນ ທິຏ຺ຐວິມຸຕ຺ຕິມຄ຺ຄໂປຕ຺ຖເກ ປນ ‘‘ປິຕ຺ຕາຘິໂກ ໂທສຈຣິໂຕ’’ຕິ ປາໂຐ ອູໂນ ຠເວຍ຺ຍ.

ອຎ຺ຎານິປິ ພຫູນິ ວິສຸທ຺ຘິມຄ຺ເຄ ປຏິກ຺ຂິຕ຺ຕານິ ຕຕ຺ຖ ວິມຸຕ຺ຕິມຄ຺ເຄ ຄເຫຕພ຺ພຠາເວນ ທິສ຺ສນ຺ຕິ. ກຖໍ?

ສີລນິທ຺ເທເສ (໑, ໘-ປິຏ຺ເຐ) ‘‘ອຎ຺ເຎ ປນ ສິຣຏ຺ໂຐ ສີລຕ຺ໂຖ, ສີຕລຕ຺ໂຖ ສີລຕ຺ໂຖຕິ ເອວມາທິນາປິ ນເຍເນຕ຺ຖ ອຕ຺ຖໍ ວຓ຺ຓຍນ຺ຕີ’’ຕິ ປຏິກ຺ຂິຕ຺ໂຕ ອຕ຺ໂຖປິ ຕຕ຺ຖ ຄເຫຕພ຺ພຠາເວນ ທິສ຺ສຕິ.

ຕຖາ ຘຸຕງ຺ຄນິທ຺ເທເສ (໑, ໗໘-ປິຏ຺ເຐ) ‘‘ເຍສມ຺ປິ ກຸສລຕ຺ຕິກວິນິມຸຕ຺ຕໍ ຘຸຕງ຺ຄໍ, ເຕສໍ ອຕ຺ຖໂຕ ຘຸຕງ຺ຄເມວ ນຕ຺ຖິ, ອສນ຺ຕໍ ກສ຺ສ ຘຸນນໂຕ ຘຸຕງ຺ຄໍ ນາມ ຠວິສ຺ສຕິ, ຘຸຕຄຸເຓ ສມາທາຍ ວຕ຺ຕຕີຕິ ວຈນວິໂຣໂຘປິ ຈ ເນສໍ ອາປຊ຺ຊຕິ, ຕສ຺ມາ ຕໍ ນ ຄເຫຕພ຺ພ’’ນ຺ຕິ ປຏິກ຺ຂິຕ຺ຕໍ ປຎ຺ຎຕ຺ຕິຘຸຕງ຺ຄມ຺ປິ ຕຕ຺ຖ ທິສ຺ສຕິ. ມຫາຏີກາຍໍ (໑-໑໐໔) ປນ ‘‘ເຍສນ຺ຕິ ອຠຍຄິຣິວາສິເກ ສນ຺ຘາຍາຫ, ເຕ ຫິ ຘຸຕງ຺ຄໍ ນາມ ປຎ຺ຎຕ຺ຕີຕິ ວທນ຺ຕີ’’ຕິ ວຓ຺ຓິຕໍ.

ຕຖາ ປຖວີກສິຓນິທ຺ເທເສ (໑, ໑໔໔) ‘‘ປຏິປທາວິສຸທ຺ຘິ ນາມ ສສມ຺ຠາຣິໂກ ອຸປຈາໂຣ, ອຸເປກ຺ຂານຸພ຺ຣູຫນາ ນາມ ອປ຺ປນາ, ສມ຺ປຫໍສນາ ນາມ ປຈ຺ຈເວກ຺ຂຓາຕິ ເອວເມເກ ວຓ຺ຓຍນ຺ຕີ’’ຕິອາທິນາ ປຏິກ຺ຂິຕ຺ຕເອເກວາໂທປິ ຕຕ຺ຖ ທິສ຺ສຕິ. ມຫາຏີກາຍໍ (໑, ໑໗໒) ປນ ‘‘ເອເກຕິ ອຠຍຄິຣິວາສິໂນ’’ຕິ ວຓ຺ຓິຕໍ.

ຕຖາ ຂນ຺ຘນິທ຺ເທເສ (໒, ໘໐-ປິຏ຺ເຐ) ‘‘ພລຣູປໍ ສມ຺ຠວຣູປໍ ຊາຕິຣູປໍ ໂຣຄຣູປໍ ເອກຈ຺ຈານໍ ມເຕນ ມິທ຺ຘຣູປ’’ນ຺ຕິ ເອວໍ ອຎ຺ຎານິປິ ຣູປານິ ອາຫຣິຕ຺ວາ ໂປຣາຓຏ຺ຐກຖາຍໍ ເຕສໍ ປຏິກ຺ຂິຕ຺ຕຠາໂວ ປກາສິໂຕ. ມຫາຏີກາຍໍ ‘‘ເອກຈ຺ຈານນ຺ຕິ ອຠຍຄິຣິວາສີນ’’ນ຺ຕິ ວຓ຺ຓິຕໍ. ເຕສຸ ຊາຕິຣູປໍ ມິທ຺ຘຣູປຎ຺ຈ ວິມຸຕ຺ຕິມຄ຺ເຄ ທສ຺ສິຕໍ. ນ ເກວລໍ ທສ຺ສນມຕ຺ຕເມວ, ອຖ ໂຂ ມິທ຺ຘຣູປສ຺ສ ອຕ຺ຖິຠາໂວປິ ‘‘ມິທ຺ຘໍ ນາມ ຕິວິຘໍ ອາຫາຣຊໍ ອຸຕຸຊໍ ຈິຕ຺ຕຊຎ຺ຈາຕິ. ເຕສຸ ຈິຕ຺ຕຊເມວ ນີວຣຓໍ ໂຫຕິ, ເສສາ ປນ ທ຺ເວ ອຣຫໂຕປິ ຠເວຍ຺ຍຸ’’ນ຺ຕິອາທິນາ ສາຘິໂຕ.

ເອຕ຺ຕາວຕາ ຈ ວິມຸຕ຺ຕິມຄ຺ເຄ ວິສຸທ຺ຘິມຄ຺ເຄນ ອສມານຕ຺ຖານໍ ວຸຕ຺ຕຠາໂວ ຈ ອຠຍຄິຣິວາສີຫິ ຕສ຺ສ ຄນ຺ຖສ຺ສ ປຏິຄ຺ຄຫິຕຠາໂວ ຈ ສກ຺ກາ ຎາຕຸໍ. ອຎ຺ຎານິປິ ປນ ອີທິສານິ ອສມານວຈນານິ ພຫູນິ ຕຕ຺ຖ ສໍວິຊ຺ຊນ຺ຕິເຍວ, ຕານິ ປນ ສພ຺ພານິ ນ ສກ຺ກາ ອິຘ ທສ຺ເສຕຸໍ.

ເຍຠຸຍ຺ເຍນ ປນສ຺ສ ກຣຓປ຺ປກາໂຣ ວິສຸທ຺ຘິມຄ຺ຄສ຺ສ ວິຍ ໂຫຕິ. ຍາ ຍາ ຫິ ປາຬິ ອຠິຘມ຺ມວິຠງ຺ຄໂຕ ວາ ປຏິສມ຺ຠິທາມຄ຺ຄໂຕ ວາ ອຎ຺ຎສຸຕ຺ຕນ຺ເຕຫິ ວາ ອາເນຕ຺ວາ ສາຘກຠາເວນ ວິສຸທ຺ຘິມຄ຺ເຄ ທສ຺ສິຍຕິ, ຕຕ຺ຖປິ ສາ ສາ ປາຬິ ເຍຠຸຍ຺ເຍນ ທິສ຺ສເຕວ. ຕາສຸ ກຎ຺ຈິມຕ຺ຕໍ ອຸທ຺ຘຣິຕ຺ວາ ອນຸມິນນຕ຺ຖາຍ ທສ຺ສຍິສ຺ສາມ.

ຍາ ວິສຸທ຺ຘິມຄ຺ເຄ (໑, ໔໗-ປິຏ຺ເຐ) ‘‘ປຎ຺ຈ ສີລານິ ປາຓາຕິປາຕສ຺ສ ປຫານໍ ສີລ’’ນ຺ຕິອາທິກາ ປຏິສມ຺ຠິທາມຄ຺ຄປາຬິ ທສ຺ສິຕາ, ສາ ວິມຸຕ຺ຕິມຄ຺ເຄປິ ທິສ຺ສເຕວ.

ຍຎ຺ຈ ວິສຸທ຺ຘິມຄ຺ເຄ (໑, ໑໓໗-ປິຏ຺ເຐ) ‘‘ສມາຘິ ກາມຈ຺ຉນ຺ທສ຺ສ ປຏິປກ຺ໂຂ…ເປ… ວິຈາໂຣ ວິຈິກິຈ຺ຉາຍາ’’ຕິ ວຈນໍ ເປຏເກ ວຸຕ຺ຕນ຺ຕິ ທສ຺ສິຕໍ, ຕຎ຺ຈ ຕຕ຺ຖປິ ຕເຖວ ທສ຺ເສຕ຺ວາ ‘‘ຕິເປຏເກ ວຸຕ຺ຕ’’ນ຺ຕິ ນິທ຺ທິຏ຺ຐໍ. ຕິເປຏເກຕິ ນາມຎ຺ຈ ເປຏໂກປເທສເມວ ສນ຺ຘາຍ ວຸຕ຺ຕໍ ຠເວຍ຺ຍ. ຕຕ຺ຖ ຫິ ວິວິຈ຺ເຈວ ກາເມຫີຕິ ປາຐສໍວຓ຺ຓນາຍໍ ‘‘ອໂລຠສ຺ສ ປາຣິປູຣິຍາ ກາເມຫິ ວິເວໂກ ສມ຺ປຊ຺ຊຕິ, ອໂທສສ຺ສ. ອໂມຫສ຺ສ ປາຣິປູຣິຍາ ອກຸສເລຫິ ຘມ຺ເມຫິ ວິເວໂກ ສມ຺ປຊ຺ຊຕີ’’ຕິ ປາຐສ຺ສ ຕິເປຏເກ ວຸຕ຺ຕຠາໂວ ທສ຺ສິໂຕ. ໂສ ຈ ປາໂຐ ເປຏໂກປເທເສ (໒໖໒-ປິຏ຺ເຐ) ‘‘ຕຕ຺ຖ ອໂລຠສ຺ສ ປາຣິປູຣິຍາ ວິວິຕ຺ໂຕ ໂຫຕິ ກາເມຫີ’’ຕິອາທິນາ ທິສ຺ສຕິ.

ຍຖາ ຈ ວິສຸທ຺ຘິມຄ຺ເຄ (໑, ໒໕໘-ປິຏ຺ເຐ) ‘‘ອຍມ຺ປິ ໂຂ ຠິກ຺ຂເວ ອານາປານສ຺ສຕິສມາຘິ ຠາວິໂຕ’’ຕິອາທິກາ ປາຬິ ມຫາວຄ຺ຄສໍຍຸຕ຺ຕກໂຕ ອາເນຕ຺ວາ ທສ຺ສິຕາ, ຕເຖວ ຕຕ຺ຖປິ.

ຍຖາ ຈ ວິສຸທ຺ຘິມຄ຺ເຄ (໑, ໒໗໒-ປິຏ຺ເຐ) ‘‘ອສ຺ສາສາທິມຊ຺ຌປຣິໂຍສານໍ ສຕິຍາ ອນຸຄຈ຺ຉໂຕ’’ຕິອາທິ ປາຬິ ຈ (໑, ໒໗໓-ປິຏ຺ເຐ) ກກຈູປມປາຬິ ຈ ປຏິສມ຺ຠິທາມຄ຺ຄໂຕ ອາເນຕ຺ວາ ທສ຺ສິຕາ, ຕເຖວ ຕຕ຺ຖປິ.

ຍຖາ ຈ ວິສຸທ຺ຘິມຄ຺ເຄ (໒, ໖໙-ປິຏ຺ເຐ) ‘‘ກຕມາ ຈິນ຺ຕາມຍາ ປຎ຺ຎາ’’ຕິອາທິກາ ຈ ປາຬິ ‘‘ຕຕ຺ຖ ກຕມໍ ອາຍໂກສລ຺ລ’’ນ຺ຕິອາທິກາ ຈ ປາຬິ (໒, ໗໑-ປິຏ຺ເຐ) ‘‘ທຸກ຺ເຂ ຎາຓໍ ອຕ຺ຖປຏິສມ຺ຠິທາ’’ຕິອາທິກາ ຈ ປາຬິ ອຠິຘມ຺ມວິຠງ຺ຄໂຕ ອາເນຕ຺ວາ ທສ຺ສິຕາ, ຕເຖວ ຕຕ຺ຖປິ. ສພ຺ພາປິ ຈ ຕຕ຺ຖ ວຸຕ຺ຕາ ເອກວິຘທຸວິຘາທິປຎ຺ຎາປເຠທກຖາ ວິສຸທ຺ຘິມຄ຺ເຄ ວຸຕ຺ຕກຖາຍ ເຍຠຸຍ຺ເຍນ ສມານາເຍວ.

‘‘ເຍນ ຈກ຺ຂຸປສາເທນ, ຣູປານິ ມນຸປສ຺ສຕິ;

ປຣິຕ຺ຕໍ ສຸຂຸມໍ ເອຕໍ, ອູກາສິຣສມູປມ’’ນ຺ຕິ [ວິສຸທ຺ຘິ. ໒.໔໓໖; ຘ. ສ. ອຏ຺ຐ. ໕໙໖] –

ອຍມ຺ປິ ຄາຖາ ວິມຸຕ຺ຕິມຄ຺ເຄປິ ອາຍສ຺ມຕາ ສາຣິປຸຕ຺ຕຕ຺ເຖເຣນ ຠາສິຕຠາເວເນວ ທສ຺ສິຕາ. ອູກາສິຣສມູປມນ຺ຕິ ປທໍ ປນ ອູກາສມູປມນ຺ຕິ ຕຕ຺ຖ ທິສ຺ສຕິ, ຕຎ຺ຈ ປຣມ຺ປຣເລຂການໍ ປມາທເລຂມຕ຺ຕເມວ ສິຍາ.

ຈຕູສຸ ສຈ຺ເຈສຸ ວິສຸທ຺ຘິມຄ຺ເຄ ວິຍ ວຈນຕ຺ຖໂຕ ລກ຺ຂຓໂຕ ອນູນາຘິກໂຕ ກມໂຕ ອນ຺ໂຕຄຘານໍ ປເຠທໂຕ ອຸປມາໂຕ ຈ ວິນິຈ຺ຉໂຍ ທສ຺ສິໂຕ, ໂສ ຈ ເຍຠຸຍ຺ເຍນ ວິສຸທ຺ຘິມຄ຺ເຄນ [ວິສຸທ຺ຘິ. ໒.໕໓໐] ສມາໂນເຍວ.

ຍຖາ ຈ ວິສຸທ຺ຘິມຄ຺ເຄ (໒, ໒໔໒-໒໔໕) ສມ຺ມສນຎາຓກຖາຍໍ ປຎ຺ຈນ຺ນໍ ຂນ຺ຘານໍ ອຕີຕາທິເອກາທສວິເຘນ ຈ ອນິຈ຺ຈາທິລກ຺ຂຓຕ຺ຕເຍນ ຈ ວິສຸໍ ວິສຸໍ ສມ຺ມສນນໂຍ ທສ຺ສິໂຕ, ຕເຖວ ຕຕ຺ຖປິ. ຈກ຺ຂາທິຊຣາມຣຓປຣິໂຍສາເນສຸ ປນ ຘມ຺ເມສຸ ຘມ຺ມວິຈາຣປຣິໂຍສານານໍ ສຏ຺ຐິຍາ ເອວ ຘມ຺ມານໍ ອນິຈ຺ຈາທິລກ຺ຂຓຕ຺ຕເຍນ ສມ຺ມສນນໂຍ ຕຕ຺ຖ ທສ຺ສິໂຕ.

ວິສຸທ຺ຘິມຄ຺ເຄ ປນ ທິຏ຺ຐິວິສຸທ຺ຘິນິທ຺ເທເສ (໒, ໒໓໐-໒໓໒-ປິຏ຺ເຐສຸ) ວຸຕ຺ຕາ ‘‘ຍມກໍ ນາມຣູປຎ຺ຈ…ເປ… ອຸໂຠ ຠິຊ຺ຊນ຺ຕິ ປຈ຺ຈຍາ’’ຕິ ຄາຖາ ຈ, ‘‘ນ ຈກ຺ຂຸໂຕ ຊາຍເຣ’’ຕິອາທິກາ ຉ ຄາຖາໂຍ ຈ, ‘‘ນ ສເກນ ພເລນ ຊາຍເຣ’’ຕິອາທິກາ ຉ ຄາຖາໂຍ ຈ ວິມຸຕ຺ຕິມຄ຺ເຄ ຠງ຺ຄານຸປສ຺ສນາຎາຓກຖາຍໍ ທສ຺ສິຕາ. ຕາສຸ ອປ຺ປມຕ຺ຕໂກເຍວ ປາຐເຠໂທ ທິສ຺ສຕິ.

ວິສຸທ຺ຘິມຄ຺ເຄ (໒, ໒໖໑-໒-ປິຏ຺ເຐສຸ) ອຣູປສຕ຺ຕເກສຸ ອຣິຍວໍສກຖານເຍນ ວຸຕ຺ໂຕ ກລາປໂຕ ຈ ຍມກໂຕ ຈ ສມ຺ມສນນໂຍ ວິມຸຕ຺ຕິມຄ຺ເຄ ເອຕ຺ເຖວ ຠງ຺ຄານຸປສ຺ສນາຎາຓກຖາຍໍ ທສ຺ສິໂຕ.

ວິມຸຕ຺ຕິມຄ຺ເຄ ພຸທ຺ຘານຸສ຺ສຕິກຖາຍໍ ໂລກວິທູຕິ ປທສ຺ສ ອຕ຺ຖວຓ຺ຓນາຍໍ ສຕ຺ຕໂລກສງ຺ຂາຣໂລກວເສນ ທ຺ເວເຍວ ໂລກາ ທສ຺ສິຕາ, ນ ປນ ໂອກາສໂລໂກ ຍຖາ ວິສຸທ຺ຘິມຄ຺ເຄ (໑, ໑໙໙-໒໐໐-ປິຏ຺ເຐສຸ).

ເອຕ຺ຕາວຕາ ຈ ວິມຸຕ຺ຕິມຄ຺ໂຄ ນາມ ຄນ຺ໂຖ ກີທິໂສຕິ ສກ຺ກາ ອນຸມິນິຕຸໍ. ໂສ ປນ ຍຖາ ນ ມຫາວິຫາຣວາສີນໍ ຄນ຺ໂຖ ໂຫຕິ, ເອວໍ ມຫາຍານິການມ຺ປິ ນ ໂຫຕິເຍວ ເຖຣວາທປິຏກເມວ ນິສ຺ສາຍ ກຕຠາວໂຕ. ຍສ຺ມາ ປນ ຕຕ຺ຖ ນ ກິຎ຺ຈິປິ ສີຫຬທີປິກໍ ນາມໍ ວາ ເຖຣວາໂທ ວາ ທິສ຺ສຕິ, ຕສ຺ມາ ໂສ ສີຫຬທີເປ ກຕຄນ຺ໂຖປິ ນ ໂຫຕິ. ອິນ຺ທິຍຣຏ຺ຐິກໍ ປນ ນາມຎ຺ຈ ໂວຫາໂຣ ຈ ຕຕ຺ຖ ພຫູສຸ ຐາເນສຸ ທິສ຺ສຕິ, ຕສ຺ມາ ອິນ຺ທິຍຣຏ຺ເຐ ກຕຄນ຺ໂຖວ ຠເວຍ຺ຍ. ຍສ຺ມາ ຈສ຺ສ ເປຏໂກປເທສໍ ນິສ຺ສິຕຠາໂວ ພຫູສຸ ຐາເນສຸ ທິສ຺ສຕິ, ວິເສສໂຕ ປນ ມິທ຺ຘຣູປສ຺ສ ອຕ຺ຖິຠາໂວ ຈ, ອຣຫໂຕປິ ຕສ຺ສ ອຕ຺ຖິຠາໂວ ຈ ຕເມວ ນິສ຺ສາຍ ທສ຺ສີຍຕິ, ປຏິສມ຺ຠິທາມຄ຺ຄຄຓ຺ຐິປເທ ຈ ເປຏເກຕິ ປທສ຺ສ [ປຏິ. ມ. ອຏ຺ຐ. ໑.໑.໓໖] ອຕ຺ຖວຓ຺ຓນາຍໍ ‘‘ສຸຕ຺ຕນ຺ຕປິຏກຕ຺ຖາຍ ອຏ຺ຐກຖາ ເປຏກໍ ມຫິສາສການໍ ຄນ຺ໂຖ’’ຕິ ວຓ຺ຓິໂຕ. ຕສ຺ມາ ເອໂສ ວິມຸຕ຺ຕິມຄ຺ໂຄ ມຫິສາສກນິກາຍິເກນ ກໂຕ ຠເວຍ຺ຍາຕິ ອມ຺ຫາກໍ ມຕິ.