ນິສ຺ສຍຏ຺ຐກຖາວິຠາວນາ

ວິສຸທ຺ຘິມຄ຺ໂຄ ປນ ນ ເກວລໍ ປຸພ຺ເພ ວຸຕ຺ຕປ຺ປກາເຣເນວ ກໂຕ, ອຖ ໂຂ ວຸຈ຺ຈມານປ຺ປກາເຣນາປິ. ຕຖາ ຫິ ອາຈຣິຍພຸທ຺ຘໂຆສຕ຺ເຖໂຣ ໂປຣາຓຏ຺ຐກຖາຫິ ສມາຫຣິຕ຺ວາ ຠາສາປຣິວຕ຺ຕນວເສນ ທສ຺ເສນ຺ໂຕປິ ຍາ ຍາ ອຕ຺ຖວຓ຺ຓນາ ວາ ວິນິຈ຺ຉໂຍ ວາ ສໍສຍິຕພ຺ໂພ ໂຫຕິ, ຕຕ຺ຖ ຕຕ຺ຖ ວິນຍຏ຺ຐກຖາຍໍ ວຸຕ຺ຕນ຺ຕິ ວາ (໑, ໒໖໓), ວິນຍຏ຺ຐກຖາສຸ ວຸຕ຺ຕໍ, ມຊ຺ຌິມຏ຺ຐກຖາສຸ ປນາຕິ ວາ (໑, ໗໐), ອງ຺ຄຸຕ຺ຕຣຠາຓກາຕິ ວາ (໑, ໗໒), ອຏ຺ຐກຖາຈຣິຍານໍ ມຕານຸສາເຣນ ວິນິຈ຺ຉໂຍຕິ ວາ (໑, ໙໙), ວຸຕ຺ຕມ຺ປິ ເຈຕໍ ອຏ຺ຐກຖາສູຕິ ວາ (໑, ໑໑໘), ຕໍ ອຏ຺ຐກຖາສຸ ປຏິກ຺ຂິຕ຺ຕນ຺ຕິ ວາ (໑, ໑໓໔), ທີຆຠາຓກສໍຍຸຕ຺ຕຠາຓການໍ ມຕນ຺ຕິ ວາ, ມຊ຺ຌິມຠາຓກາ ອິຈ຺ຉນ຺ຕີຕິ ວາ (໑, ໒໖໗), ອຏ຺ຐກຖາສຸ ວິນິຈ຺ຉໂຍຕິ ວາ, ເອວໍ ຕາວ ທີຆຠາຓກາ, ມຊ຺ຌິມຠາຓກາ ປນາຫູຕິ ວາ (໑, ໒໗໗), ອງ຺ຄຸຕ຺ຕຣຏ຺ຐກຖາຍໍ ປນ…ເປ… ອຍໍ ກໂມ ວຸຕ຺ໂຕ, ໂສ ປາຬິຍາ ນ ສເມຕີຕິ ວາ (໑, ໓໐໙), ເອວໍ ຕາວ ມຊ຺ຌິມຠາຓກາ, ສໍຍຸຕ຺ຕຠາຓກາ ປນາຕິ ວາ (໒, ໖໒), ສໍຍຸຕ຺ຕຏ຺ຐກຖາຍໍ ວຸຕ຺ຕນ຺ຕິ ວາ (໒, ໖໓), ອຏ຺ຐກຖາຍໍ ປນາຕິ ວາ (໒, ໘໐) ເອວໍ ຕໍຕໍອຕ຺ຖວຓ຺ຓນາວິນິຈ຺ຉຍານໍ ນິສ຺ສຍມ຺ປິ ວິຠາເວຕ຺ວາ ປຈ຺ຉິມຊນານໍ ອຸປ຺ປຊ຺ຊມານສໍສຍໍ ວິໂນເທນ຺ໂຕເຍວ ເຕ ທສ຺ເສສິ.

ເຕນິມສ຺ສ ວິສຸທ຺ຘິມຄ຺ຄສ຺ສ ກຣຓກາເລ ສພ຺ພາປິ ສີຫຬຏ຺ຐກຖາໂຍ ອາຈຣິຍສ຺ສ ສນ຺ຕິເກ ສນ຺ຕີຕິ ຈ, ປຸພ຺ເພເຍວ ຕາ ອາຈຣິເຍນ ສີຫຬຕ຺ເຖຣານໍ ສນ຺ຕິເກ ສຸຕາຕິ ຈ, ຕາຫິ ຄເຫຕພ຺ພໍ ສພ຺ພໍ ຄເຫຕ຺ວາ ອຍໍ ວິສຸທ຺ຘິມຄ຺ໂຄ ອາຈຣິເຍນ ລິຂິໂຕຕິ ຈ ອຍມຕ຺ໂຖ ອຕິວິຍ ປາກໂຏ ໂຫຕິ. ຕສ຺ມາ ຍໍ ມຫາວໍເສ –

‘‘ສງ຺ໂຆ ຄາຖາທ຺ວຍໍ ຕສ຺ສາ’ທາສິ ສາມຕ຺ຖິຍໍ ຕວາ’’ຕິອາທິນາ ‘‘ຄາຖາທ຺ວຍເມວ ໂອໂລເກຕ຺ວາ ກິຎ຺ຈິປິ ອຎ຺ຎໍ ໂປຕ຺ຖກໍ ອໂນໂລເກຕ຺ວາ ອາຈຣິຍພຸທ຺ຘໂຆໂສ ວິສຸທ຺ຘິມຄ຺ຄໍ ອກາສີ’’ຕິ ອຘິປ຺ປາເຍນ ອຠິຕ຺ຖຸຕິວຈນໍ ວຸຕ຺ຕໍ, ຕໍ ອຠິຕ຺ຖຸຕິມຕ຺ຕເມວາຕິ ເວທິຕພ຺ພໍ.