ຕກ຺ກຣຓປ຺ປກາໂຣ

ເກນ ປກາເຣນ ກໂຕຕິ ເອຕ຺ຖ ອນນ຺ຕຣປຎ຺ເຫ ວຸຕ຺ຕປ຺ປກາເຣເນວ ກໂຕ. ຕຖາ ຫິ ອາຈຣິໂຍ ສໍຍຸຕ຺ຕນິກາຍໂຕ

‘‘ສີເລ ປຕິຏ຺ຐາຍ ນໂຣ ສປຎ຺ໂຎ, ຈິຕ຺ຕໍ ປຎ຺ຎຎ຺ຈ ຠາວຍໍ;

ອາຕາປີ ນິປໂກ ຠິກ຺ຂຸ, ໂສ ອິມໍ ວິຊຏເຍ ຊຏ’’ນ຺ຕິ [ສໍ. ນິ. ໑.໒໓] –

ອິມໍ ຄາຖໍ ປຐມໍ ທສ຺ເສຕ຺ວາ ຕຕ຺ຖ ປຘານວເສນ ວຸຕ຺ຕາ ສີລສມາຘິປຎ຺ຎາໂຍ ວິສຸໍ ວິສຸໍ ວິຕ຺ຖາຣໂຕ ວິຠຊິຕ຺ວາ ອກາສິ. ເອວໍ ກຸຣຸມາໂນ ຈ ປຎ຺ຈຫິປິ ນິກາເຍຫິ ສີລສມາຘິປຎ຺ຎາປຏິສໍຍຸຕ຺ຕານິ ສຸຕ຺ຕປທານິ ອຸທ຺ຘຣິຕ຺ວາ ເຕສໍ ອຕ຺ຖຎ຺ຈ ສີຫຬຏ຺ຐກຖາຫິ ຠາສາປຣິວຕ຺ຕນວເສນ ທສ຺ເສຕ຺ວາ ຕາສຸ ວຸຕ຺ຕານິ ສີຫຬິກວຕ຺ຖູນິ ຈ ວິນິຈ຺ຉເຍ ຈ ປກາເສສິ. ວິເສສໂຕ ປນ ຕສ຺ມິໍ ກາເລ ປາກຏາ ສກສມຍວິຣຸທ຺ຘາ ສມຍນ຺ຕຣາ ຈ ພຫູສຸ ຐາເນສຸ ທສ຺ເສຕ຺ວາ ສເຫຕຸກໍ ປຏິກ຺ຂິຕ຺ຕາ. ກຖໍ?

ຕຕ຺ຖ ຫິ ຈຣິຍາວຓ຺ຓນາຍໍ ‘‘ຕຕ຺ຣ ປຸຣິມາ ຕາວ ຕິສ຺ໂສ ຈຣິຍາ ປຸພ຺ພາຈິຓ຺ຓນິທານາ ຘາຕຸໂທສນິທານາ ຈາຕິ ເອກຈ຺ເຈ ວທນ຺ຕິ. ປຸພ຺ເພ ກິຣ ອິຏ຺ຐປ຺ປໂຍຄສຸຠກມ຺ມພຫຸໂລ ຣາຄຈຣິໂຕ ໂຫຕິ, ສຄ຺ຄາ ວາ ຈວິຕ຺ວາ ອິຘູປປນ຺ໂນ. ປຸພ຺ເພ ເຉທນວຘພນ຺ຘນເວຣກມ຺ມພຫຸໂລ ໂທສຈຣິໂຕ ໂຫຕິ, ນິຣຍນາຄໂຍນີຫິ ວາ ຈວິຕ຺ວາ ອິຘູປປນ຺ໂນ. ປຸພ຺ເພ ມຊ຺ຊປານພຫຸໂລ ສຸຕປຣິປຸຈ຺ຉາວິຫີໂນ ຈ ໂມຫຈຣິໂຕ ໂຫຕິ, ຕິຣຈ຺ຉານໂຍນິຍາ ວາ ຈວິຕ຺ວາ ອິຘູປປນ຺ໂນຕິ ເອວໍ ປຸພ຺ພາຈິຓ຺ຓນິທານາຕິ ວທນ຺ຕິ. ທ຺ວິນ຺ນໍ ປນ ຘາຕູນໍ ອຸສ຺ສນ຺ນຕ຺ຕາ ປຸຄ຺ຄໂລ ໂມຫຈຣິໂຕ ໂຫຕິ ປຖວີຘາຕຸຍາ ຈ ອາໂປຘາຕຸຍາ ຈ. ອິຕຣາສໍ ທ຺ວິນ຺ນໍ ອຸສ຺ສນ຺ນຕ຺ຕາ ໂທສຈຣິໂຕ. ສພ຺ພາສໍ ສມຕ຺ຕາ ປນ ຣາຄຈຣິໂຕຕິ. ໂທເສສຸ ຈ ເສມ຺ຫາຘິໂກ ຣາຄຈຣິໂຕ ໂຫຕິ. ວາຕາຘິໂກ ໂມຫຈຣິໂຕ. ເສມ຺ຫາຘິໂກ ວາ ໂມຫຈຣິໂຕ. ວາຕາຘິໂກ ຣາຄຈຣິໂຕຕິ ເອວໍ ຘາຕຸໂທສນິທານາຕິ ວທນ຺ຕີ’’ຕິ ເອກຈ຺ເຈວາທໍ ທສ຺ເສຕ຺ວາ ໂສ ‘‘ຕຕ຺ຖ ຍສ຺ມາ ປຸພ຺ເພ ອິຏ຺ຐປ຺ປໂຍຄສຸຠກມ຺ມພຫຸລາປິ ສຄ຺ຄາ ຈວິຕ຺ວາ ອິຘູປປນ຺ນາປິ ຈ ນ ສພ຺ເພ ຣາຄຈຣິຕາເນວ ໂຫນ຺ຕິ, ນ ອິຕເຣ ວາ ໂທສໂມຫຈຣິຕາ. ເອວໍ ຘາຕູນຎ຺ຈ ຍຖາວຸຕ຺ເຕເນວ ນເຍນ ອຸສ຺ສທນິຍໂມ ນາມ ນຕ຺ຖິ. ໂທສນິຍເມ ຈ ຣາຄໂມຫທ຺ວຍເມວ ວຸຕ຺ຕໍ, ຕມ຺ປິ ຈ ປຸພ຺ພາປຣວິຣຸທ຺ຘເມວ. ຕສ຺ມາ ສພ຺ພເມຕໍ ອປຣິຈ຺ຉິນ຺ນວຈນ’’ນ຺ຕິ [ວິສຸທ຺ຘິ. ໑.໔໔] ປຏິກ຺ຂິຕ຺ໂຕ. ຕໍ ປຣມຕ຺ຖມຎ຺ຊູສາຍ ນາມ ວິສຸທ຺ຘິມຄ຺ຄມຫາຏີກາຍໍ ‘‘ເອກຈ຺ເຈຕິ ອຸປຕິສ຺ສຕ຺ເຖຣໍ ສນ຺ຘາຍາຫ, ເຕນ ຫິ ວິມຸຕ຺ຕິມຄ຺ເຄ ຕຖາ ວຸຕ຺ຕ’’ນ຺ຕິອາທິນາ ວຓ຺ຓິຕໍ [ວິສຸທ຺ຘິ. ຏີ. ໑.໔໔].