ເວຕຸລ຺ລວາທສ຺ສ ທຸຕິຍນິຄ຺ຄໂຫ

ໂຄຐາຠໂຍ ປນ ຣາຊາ ປຎ຺ຈສຸ [ມຫາວິຫາຣ, ເຈຕິຍ, ຖູປາຣາມ, ອິສ຺ສຣສມຓກ, ເວສ຺ສຄິຣິວິຫາຣສງ຺ຂາເຕສຸ] ວິຫາເຣສຸ ມຫາຠິກ຺ຂຸສງ຺ຆໍ ເອກໂຕ ສນ຺ນິປາເຕຕ຺ວາ ຕໍ ປວຕ຺ຕິໍ ປຸຈ຺ຉິຕ຺ວາ ເວຕຸລ຺ລວາທສ຺ສ ອພຸທ຺ຘຠາສິຕຠາວໍ ຎຕ຺ວາ ຕໍວາທິໂນ ສຏ຺ຐິ ປາປຠິກ຺ຂູ ລກ຺ຂຓາຫເຕ ກຕ຺ວາ ຣຏ຺ຐໂຕ ປພ຺ພາເຊສິ, ເວຕຸລ຺ລໂປຕ຺ຖການິ ຈ ຌາເປຕ຺ວາ ພຸທ຺ຘສາສນໍ ໂຊເຕສິ [ມຫາວໍເສ ໓໖, ໑໑໑-໑໑໒-ຄາຖາສຸ, ນິກາຍ ໑໓-ປິຏ຺ເຐ].

ຕທາ ຣຏ຺ຐໂຕ ປພ຺ພາຊິເຕສຸ ເຕສຸ ຠິກ຺ຂູສຸ ເກຈິ ກາວີຣປຏ຺ຏນໍ ຄນ຺ຕ຺ວາ ຕຕ຺ຖ ວສນ຺ຕິ. ຕສ຺ມິຎ຺ຈ ສມເຍ ເອໂກ ອຎ຺ຎຕິຕ຺ຖິຍມາຓວໂກ ເທສນ຺ຕຣໂຕ ກາວີຣມາຄນ຺ຕ຺ວາ ປຏ຺ຏນຄາມິເກຫິ ເຕສໍ ຠິກ຺ຂູນໍ ກຕູປຫາຣໍ ທິສ຺ວາ ລາຠສກ຺ກາຣໍ ນິສ຺ສາຍ ເຕສໍ ສນ຺ຕິເກ ປພ຺ພຊິຕ຺ວາ ສງ຺ຆມິຕ຺ໂຕຕິ ນາເມນ ປາກໂຏ ອໂຫສິ. ໂສ ມຫາວິຫາຣວາສີນໍ ຘມ຺ມວິນິຈ຺ຉຍໍ ນິສ຺ສາຍ ໂຄຐາຠຍຣຎ຺ຎາ ເວຕຸລ຺ລວາທເຫຕຸ ເຕສໍ ຠິກ຺ຂູນໍ ຣຏ຺ຐາ ປພ຺ພາຊິຕຠາວໍ ຎຕ຺ວາ ມຫາວິຫາຣວາສີນໍ ກຸທ຺ໂຘ ຫຸຕ຺ວາ ‘‘ເວຕຸລ຺ລວາທໍ ວາ ເນ ຄາຫາເປສ຺ສາມິ, ວິຫາເຣ ວາ ເນສໍ ອຸມ຺ມູເລຕ຺ວາ ວິນາເສສ຺ສາມີ’’ຕິ ສີຫຬທີປໍ ຄນ຺ຕ຺ວາ ຣາຊານໍ ປສາເທຕ຺ວາ ຕສ຺ສ ທ຺ເວ ປຸຕ຺ເຕ ສິປ຺ປໍ ສິກ຺ຂາເປສ຺ສາມີຕິ ອາຣຠິ. ຕຖາປິ ອຕ຺ຕໂນ ວາທສ຺ສ ຊານນສມຕ຺ຖໍ ເຊຏ຺ຐຕິສ຺ສໍ ໂອຫາຍ ອນາຄເຕ ອຕ຺ຕໂນ ວຈນໍ ກາຣາເປຕຸໍ ສກ຺ກຸເຓຍ຺ຍໍ ກນິຏ຺ຐໍ ມຫາເສນກຸມາຣເມວ ສງ຺ຄຓ຺ຫິຕ຺ວາ ສິປ຺ປໍ ສິກ຺ຂາເປສິ. ວິຕຸໂນ ອຈ຺ຈເຍນ ເຊຏ຺ຐຕິສ຺ສກຸມາເຣ ຣຊ຺ຊໍ ປຕ຺ເຕ (໘໑໐-໘໑໙-ພຸ-ວ) ໂສ ຕສ຺ສ ຣຎ຺ໂຎ ຠີໂຕ ກາວີຣປຏ຺ຏນເມວ ຄໂຕ [ມຫາວໍເສ ໓໖, ໑໑໓-ຄາຖາທີສຸ, ນິກາຍ ໑໔-ປິຏ຺ເຐ].

ມຫາເສນຣຎ຺ໂຎ ປນ ກາເລ (໘໑໙-໘໔໕-ພຸ-ວ) ໂສ ປຸນ ສີຫຬທີປມາຄນ຺ຕ຺ວາ ອຠຍຄິຣິວິຫາເຣ ວສນ຺ໂຕ ມຫາວິຫາຣວາສີຫິ ເວຕຸລ຺ລວາທໍ ຄາຫາເປຕຸໍ ນານາປກາເຣຫິ ວາຍາມມກາສິ. ຕຖາປິ ເຕຫິ ຕໍ ຄາຫາເປຕຸໍ ອສກ຺ໂກນ຺ໂຕ ຣາຊານໍ ອຸປສງ຺ກມິຕ຺ວາ ນານາກາຣເຓຫິ ສຎ຺ຎາເປຕ຺ວາ ‘‘ໂຍ ໂກຈິ ເອກສ຺ສປິ ຠິກ຺ຂຸສ຺ສ ມຫາວິຫາຣວາສິໂນ ອາຫາຣໍ ທເທຍ຺ຍ, ຕສ຺ສ ສຕໍ ທຓ຺ໂຑ’’ຕິ ຣຎ຺ໂຎ ອາຓາຍ ນຄເຣ ເຠຣິໍ ຈຣາເປສິ. ຕທາ ມຫາວິຫາຣວາສິໂນ ນຄເຣ ປິຓ຺ຑາຍ ຈຣນ຺ຕາ ຕໂຍ ທິວເສ ຠິກ຺ຂມລທ຺ຘາ ມຫາປາສາເທ ສນ຺ນິປຕິຕ຺ວາ ‘‘ສເຈ ມຍໍ ຂຸທາເຫຕຸ ອຘມ຺ມໍ ຘມ຺ໂມຕິ ຄຓ຺ເຫຍ຺ຍາມ, ພຫູ ຊນາ ຕໍ ຄເຫຕ຺ວາ ອປາຍຄາມິໂນ ຠວິສ຺ສນ຺ຕິ, ມຍຎ຺ຈ ສພ຺ເພ ສາວຊ຺ຊາ ຠວິສ຺ສາມ, ຕສ຺ມາ ນ ມຍໍ ຊີວິຕເຫຕຸປິ ເວຕຸລ຺ລວາທໍ ປຏິຄ຺ຄຓ຺ຫິສ຺ສາມາ’’ຕິ ສມ຺ມນ຺ຕຍິຕ຺ວາ ມຫາວິຫາຣາທິເກ ສພ຺ພວິຫາເຣ ຉຑ຺ເຑຕ຺ວາ ໂຣຫຓຊນປທຎ຺ຈ ມລຍປເທສຎ຺ຈ ອຄມິໍສຸ [ມຫາວໍເສ ໓໗, ໒-໖-ຄາຖາສຸ. ນິກາຍສງ຺ຄເຫ ໑໔-ປິຏ຺ເຐ].