ເວຕຸລ຺ລວາໂທ

ກີທິໂສ ເວຕຸລ຺ລວາໂທ ນາມ, ຍໂຕ ມຫາວິຫາຣວາສິໂນ ອຕິວິຍ ຊິຄຸຈ຺ຉິໍສູຕິ? ອິທານິ ເວຕຸລ຺ລວາທສ຺ສ ສຣູປໍ ສພ຺ພາກາເຣນ ປກາເສຕຸໍ ນ ສກ຺ກາ, ເວຕຸລ຺ລນາເມນ ໂປຕ຺ຖການໍ ວາ ນິກາຍສ຺ສ ວາ ເອຕຣຫິ ອປາກຏຠາວໂຕ. ອຠິຘມ຺ມປິຏເກ ປນ ກຖາວຕ຺ຖຸອຏ຺ຐກຖາຍໍ [ກຖາ. ອຏ຺ຐ. ໗໙໓-໗໙໔ ອາທໂຍ] ກຕິປຍາ ເວຕຸລ຺ລວາທາ ອາຄຕາ. ກຖໍ? –

‘‘ປຣມຕ຺ຖໂຕ ມຄ຺ຄຜລາເນວ ສງ຺ໂຆ, ມຄ຺ຄຜເລຫິ ອຎ຺ໂຎ ສງ຺ໂຆ ນາມ ນຕ຺ຖິ, ມຄ຺ຄຜລານິ ຈ ນ ກິຎ຺ຈິ ປຏິຄ຺ຄຓ຺ຫນ຺ຕິ, ຕສ຺ມາ ນ ວຕ຺ຕພ຺ພໍ ສງ຺ໂຆ ທກ຺ຂິຓໍ ປຏິຄ຺ຄຓ຺ຫາຕີ’’ຕິ ຈ (໑).

‘‘ມຄ຺ຄຜລາເນວ ສງ຺ໂຆ ນາມ, ນ ຈ ຕານິ ທກ຺ຂິຓໍ ວິໂສເຘຕຸໍ ສກ຺ໂກນ຺ຕິ, ຕສ຺ມາ ນ ວຕ຺ຕພ຺ພໍ ສງ຺ໂຆ ທກ຺ຂິຓໍ ວິໂສເຘຕີ’’ຕິ ຈ (໒).

‘‘ມຄ຺ຄຜລາເນວ ສງ຺ໂຆ ນາມ, ນ ຈ ຕານິ ກິຎ຺ຈິ ຠຸຎ຺ຊນ຺ຕິ, ຕສ຺ມາ ນ ວຕ຺ຕພ຺ພໍ ສງ຺ໂຆ ຠຸຎ຺ຊຕິ ປິວຕິ ຂາທຕິ ສາຍຕີ’’ຕິ ຈ (໓).

ມຄ຺ຄຜລາເນວ ສງ຺ໂຆ ນາມ, ນ ຈ ສກ຺ກາ ເຕສໍ ກິຎ຺ຈິ ທາຕຸໍ, ນ ຈ ເຕຫິ ປຏິຄ຺ຄຓ຺ຫິຕຸໍ, ນາປິ ເຕສໍ ທາເນນ ໂກຈິ ອຸປກາໂຣ ອິຊ຺ຌຕິ, ຕສ຺ມາ ນ ວຕ຺ຕພ຺ພໍ ສງ຺ຆສ຺ສ ທິນ຺ນໍ ມຫປ຺ຜລ’’ນ຺ຕິ ຈ (໔).

‘‘ພຸທ຺ໂຘ ຠຄວາ ນ ກິຎ຺ຈິ ປຣິຠຸຎ຺ຊຕິ, ໂລການຸວຕ຺ຕນຕ຺ຖໍ ປນ ປຣິຠຸຎ຺ຊມານໍ ວິຍ ອຕ຺ຕານໍ ທສ຺ເສຕິ, ຕສ຺ມາ ນິຣຸປກາຣຕ຺ຕາ ນ ວຕ຺ຕພ຺ພໍ ຕສ຺ມິໍ ທິນ຺ນໍ ມຫປ຺ຜລ’’ນ຺ຕິ ຈ (໕).

‘‘ຠຄວາ ຕຸສິຕຠວເນ ນິພ຺ພຕ຺ໂຕ ຕຕ຺ເຖວ ວສຕິ, ນ ມນຸສ຺ສໂລກໍ ອາຄຈ຺ຉຕິ, ນິມ຺ມິຕຣູປມຕ຺ຕກໍ ປເນຕ຺ຖ ທສ຺ເສຕີ’’ຕິ ຈ (໖).

‘‘ຕຸສິຕປຸເຣ ຐິໂຕ ຠຄວາ ຘມ຺ມເທສນຕ຺ຖາຍ ອຠິນິມ຺ມິຕໍ ເປເສສິ, ເຕນ ເຈວ, ຕສ຺ສ ຈ ເທສນໍ ສມ຺ປຏິຈ຺ຉິຕ຺ວາ ອາຍສ຺ມຕາ ອານນ຺ເທນ ຘມ຺ໂມ ເທສິໂຕ, ນ ພຸທ຺ເຘນ ຠຄວຕາ’’ຕິ ຈ (໗).

‘‘ເອກາຘິປ຺ປາເຍນ ເມຖຸໂນ ຘມ຺ໂມ ປຏິເສວິຕພ຺ໂພ. ອຍໍ ປເນຕ຺ຖ ອຕ຺ໂຖ – ກາຣຸຎ຺ເຎນ ວາ ເອເກນ ອຘິປ຺ປາເຍນ ເອກາຘິປ຺ປາໂຍ, ສໍສາເຣ ວາ ເອກໂຕ ຠວິສ຺ສາມາຕິ ອິຕ຺ຖິຍາ ສທ຺ຘິໍ ພຸທ຺ຘປູຊາທີນິ ກຕ຺ວາ ປຓິຘິວເສນ ເອໂກ ອຘິປ຺ປາໂຍ ອສ຺ສາຕິ ເອກາຘິປ຺ປາໂຍ, ເອວຣູໂປ ທ຺ວິນ຺ນມ຺ປິ ຊນານໍ ເອກາຘິປ຺ປາໂຍ ເມຖຸໂນ ຘມ຺ໂມ ປຏິເສວິຕພ຺ໂພ’’ຕິ ຈ (໘) ເອວໍ ເວຕຸລ຺ລວາທີນໍ ລທ຺ຘິໂຍ ອາຄຕາ, ເອຕ຺ຕກາເຍວ ເນສໍ ວາທາ ເຖຣວາທຄນ຺ຖວເສນ ທານິ ປຎ຺ຎາຍນ຺ຕິ.

ເອຕ຺ຖ ຈ ອາທິໂຕ ຈຕູຫິ ວາເທຫິ ສຸຕ຺ຕນ຺ຕາຄຕສງ຺ໂຆ ຈ ມິຈ຺ຉາ ຄຫິໂຕ, ວິນຍາຄຕສງ຺ໂຆ ຈ ສພ຺ພຖາ ປຏິກ຺ຂິຕ຺ໂຕ. ຕທນນ຺ຕຣໍ ຕໂຍ ວາທາ ອິສ຺ສຣນິມ຺ມານວາທານຸວຕ຺ຕກາ. ອນ຺ຕິມສ຺ສ ປນ ອສທ຺ຘມ຺ມວາທຠາໂວ ອຕິວິຍ ປາກໂຏຕິ.

ອຠິຘມ຺ມສມຸຈ຺ຈເຍ ປນ ເວຕຸລ຺ລປິຏກສ຺ສ ໂພຘິສຕ຺ຕປິຏກຠາໂວ ປກາສິໂຕ, ຕສ຺ມາ ສທ຺ຘມ຺ມປຸຓ຺ຑຣິກສຸຕ຺ຕາທິເກ ໂພຘິສຕ຺ຕປິຏເກ ອາຄຕວາໂທປິ ‘‘ເວຕຸລ຺ລວາໂທ’’ຕິ ເວທິຕພ຺ໂພ [ອຠິຘມ຺ມສມຸຈ຺ຈເຍ ໗໙-ປິຏ຺ເຐ].