໕. ເສສກສິຓນິທ຺ເທໂສ

ອາໂປກສິຓກຖາ

໙໑. ອິທານິ ປຖວີກສິຓານນ຺ຕເຣ ອາໂປກສິເຓ ວິຕ຺ຖາຣກຖາ ໂຫຕິ. ຍເຖວ ຫິ ປຖວີກສິຓໍ, ເອວໍ ອາໂປກສິຓມ຺ປິ ຠາເວຕຸກາເມນ ສຸຂນິສິນ຺ເນນ ອາປສ຺ມິໍ ນິມິຕ຺ຕໍ ຄຓ຺ຫິຕພ຺ພໍ, ກເຕ ວາ ອກເຕ ວາຕິ ສພ຺ພໍ ວິຕ຺ຖາເຣຕພ຺ພໍ. ຍຖາ ຈ ອິຘ, ເອວໍ ສພ຺ພຕ຺ຖ. ອິໂຕ ປຣຎ຺ຫິ ເອຕ຺ຕກມ຺ປິ ອວຕ຺ວາ ວິເສສມຕ຺ຕເມວ ວກ຺ຂາມ.

ອິຘາປິ ປຸພ຺ເພກຕາຘິກາຣສ຺ສ ປຸຎ຺ຎວໂຕ ອກເຕ ອາປສ຺ມິໍ ໂປກ຺ຂຣຓິຍາ ວາ ຕຬາເກ ວາ ໂລຓິຍໍ ວາ ສມຸທ຺ເທ ວາ ນິມິຕ຺ຕໍ ອຸປ຺ປຊ຺ຊຕິ ຈູຬສິວຕ຺ເຖຣສ຺ສ ວິຍ. ຕສ຺ສ ກິຣາຍສ຺ມໂຕ ລາຠສກ຺ກາຣໍ ປຫາຍ ວິວິຕ຺ຕວາສໍ ວສິສ຺ສາມີຕິ ມຫາຕິຕ຺ເຖ ນາວມາຣູຫິຕ຺ວາ ຊມ຺ພຸທີປໍ ຄຈ຺ຉໂຕ ອນ຺ຕຣາ ມຫາສມຸທ຺ທໍ ໂອໂລກຍໂຕ ຕປ຺ປຏິຠາຄໍ ກສິຓນິມິຕ຺ຕໍ ອຸທປາທິ.

ອກຕາຘິກາເຣນ ຈຕ຺ຕາໂຣ ກສິຓໂທເສ ປຣິຫຣນ຺ເຕນ ນີລປີຕໂລຫິໂຕທາຕວຓ຺ຓານມຎ຺ຎຕຣວຓ຺ຓໍ ອາປໍ ອຄເຫຕ຺ວາ ຍໍ ປນ ຠູມິໍ ອສມ຺ປຕ຺ຕເມວ ອາກາເສ ສຸທ຺ຘວຕ຺ເຖນ ຄຫິຕໍ ອຸທກໍ, ອຎ຺ຎໍ ວາ ຕຖາຣູປໍ ວິປ຺ປສນ຺ນໍ ອນາວິລໍ, ເຕນ ປຕ຺ຕໍ ວາ ກຸຓ຺ຑິກໍ ວາ ສມຕິຕ຺ຕິກໍ ປູເຣຕ຺ວາ ວິຫາຣປຈ຺ຈນ຺ເຕ ວຸຕ຺ຕປ຺ປກາເຣ ປຏິຈ຺ຉນ຺ເນ ໂອກາເສ ຐເປຕ຺ວາ ສຸຂນິສິນ຺ເນນ ນ ວຓ຺ໂຓ ປຈ຺ຈເວກ຺ຂິຕພ຺ໂພ. ນ ລກ຺ຂຓໍ ມນສິ ກາຕພ຺ພໍ. ນິສ຺ສຍສວຓ຺ຓເມວ ກຕ຺ວາ ອຸສ຺ສທວເສນ ປຓ຺ຓຕ຺ຕິຘມ຺ເມ ຈິຕ຺ຕໍ ຐເປຕ຺ວາ ອມ຺ພຸ, ອຸທກໍ, ວາຣິ, ສລິລນ຺ຕິອາທີສຸ ອາໂປນາເມສຸ ປາກຏນາມວເສເນວ ‘‘ອາໂປ ອາໂປ’’ຕິ ຠາເວຕພ຺ພໍ.

ຕສ຺ເສວໍ ຠາວຍໂຕ ອນຸກ຺ກເມນ ວຸຕ຺ຕນເຍເນວ ນິມິຕ຺ຕທ຺ວຍໍ ອຸປ຺ປຊ຺ຊຕິ. ອິຘ ປນ ອຸຄ຺ຄຫນິມິຕ຺ຕໍ ຈລມານໍ ວິຍ ອຸປຏ຺ຐາຕິ, ສເຈ ເຜຓປຸປ຺ຜຸຬກມິສ຺ສໍ ອຸທກໍ ໂຫຕິ, ຕາທິສເມວ ອຸປຏ຺ຐາຕິ, ກສິຓໂທໂສ ປຎ຺ຎາຍຕິ. ປຏິຠາຄນິມິຕ຺ຕໍ ປນ ນິປ຺ປຣິປ຺ຜນ຺ທໍ ອາກາເສ ຐປິຕມຓິຕາລວຓ຺ຏໍ ວິຍ ມຓິມຍາທາສມຓ຺ຑລມິວ ຈ ຫຸຕ຺ວາ ອຸປຏ຺ຐາຕິ. ໂສ ຕສ຺ສ ສຫ ອຸປຏ຺ຐາເນເນວ ອຸປຈາຣຊ຺ຌານໍ, ວຸຕ຺ຕນເຍເນວ ຈຕຸກ຺ກປຎ຺ຈກຊ຺ຌານານິ ຈ ປາປຸຓາຕີຕິ. ອາໂປກສິຓໍ.

ເຕໂຊກສິຓກຖາ

໙໒. ເຕໂຊກສິຓໍ ຠາເວຕຸກາເມນາປິ ເຕຊສ຺ມິໍ ນິມິຕ຺ຕໍ ຄຓ຺ຫິຕພ຺ພໍ. ຕຕ຺ຖ ກຕາຘິກາຣສ຺ສ ປຸຎ຺ຎວໂຕ ອກເຕ ນິມິຕ຺ຕໍ ຄຓ຺ຫນ຺ຕສ຺ສ ທີປສິຂາຍ ວາ ອຸທ຺ຘເນ ວາ ປຕ຺ຕປຈນຏ຺ຐາເນ ວາ ທວທາເຫ ວາ ຍຕ຺ຖ ກຕ຺ຖຈິ ອຄ຺ຄິຊາລໍ ໂອໂລເກນ຺ຕສ຺ສ ນິມິຕ຺ຕໍ ອຸປ຺ປຊ຺ຊຕິ ຈິຕ຺ຕຄຸຕ຺ຕຕ຺ເຖຣສ຺ສ ວິຍ. ຕສ຺ສ ຫາຍສ຺ມໂຕ ຘມ຺ມສ຺ສວນທິວເສ ອຸໂປສຖາຄາຣໍ ປວິຏ຺ຐສ຺ສ ທີປສິຂໍ ໂອໂລເກນ຺ຕສ຺ເສວ ນິມິຕ຺ຕໍ ອຸປ຺ປຊ຺ຊິ.

ອິຕເຣນ ປນ ກາຕພ຺ພໍ. ຕຕ຺ຣິທໍ ກຣຓວິຘານໍ, ສິນິທ຺ຘານິ ສາຣທາຣູນິ ຜາເລຕ຺ວາ ສຸກ຺ຂາເປຕ຺ວາ ຆຏິກໍ ຆຏິກໍ ກຕ຺ວາ ປຕິຣູປໍ ຣຸກ຺ຂມູລໍ ວາ ມຓ຺ຑປໍ ວາ ຄນ຺ຕ຺ວາ ປຕ຺ຕປຈນາກາເຣນ ຣາສິໍ ກຕ຺ວາ ອາລິມ຺ເປຕ຺ວາ ກຏສາຣເກ ວາ ຈມ຺ເມ ວາ ປເຏ ວາ ວິທຕ຺ຖິຈຕຸຣງ຺ຄຸລປ຺ປມາຓໍ ຉິທ຺ທໍ ກາຕພ຺ພໍ. ຕໍ ປຸຣໂຕ ຐເປຕ຺ວາ ວຸຕ຺ຕນເຍເນວ ນິສີທິຕ຺ວາ ເຫຏ຺ຐາ ຕິຓກຏ຺ຐໍ ວາ ອຸປຣິ ຘູມສິຂໍ ວາ ອມນສິກຣິຕ຺ວາ ເວມຊ຺ເຌ ຆນຊາລາຍ ນິມິຕ຺ຕໍ ຄຓ຺ຫິຕພ຺ພໍ, ນີລນ຺ຕິ ວາ ປີຕນ຺ຕິ ວາຕິອາທິວເສນ ວຓ຺ໂຓ ນ ປຈ຺ຈເວກ຺ຂິຕພ຺ໂພ, ອຸຓ຺ຫຕ຺ຕວເສນ ລກ຺ຂຓໍ ນ ມນສິ ກາຕພ຺ພໍ. ນິສ຺ສຍສວຓ຺ຓເມວ ກຕ຺ວາ ອຸສ຺ສທວເສນ ປຓ຺ຓຕ຺ຕິຘມ຺ເມ ຈິຕ຺ຕໍ ຐເປຕ຺ວາ ປາວໂກ, ກຓ຺ຫວຕ຺ຕນີ, ຊາຕເວໂທ, ຫຸຕາສໂນຕິອາທີສຸ ອຄ຺ຄິນາເມສຸ ປາກຏນາມວເສເນວ ‘‘ເຕໂຊ ເຕໂຊ’’ຕິ ຠາເວຕພ຺ພໍ.

ຕສ຺ເສວໍ ຠາວຍໂຕ ອນຸກ຺ກເມນ ວຸຕ຺ຕນເຍເນວ ນິມິຕ຺ຕທ຺ວຍໍ ອຸປ຺ປຊ຺ຊຕິ. ຕຕ຺ຖ ອຸຄ຺ຄຫນິມິຕ຺ຕໍ ຊາລໍ ຉິຊ຺ຊິຕ຺ວາ ຉິຊ຺ຊິຕ຺ວາ ປຕນສທິສໍ ຫຸຕ຺ວາ ອຸປຏ຺ຐາຕິ. ອກເຕ ຄຓ຺ຫນ຺ຕສ຺ສ ປນ ກສິຓໂທໂສ ປຎ຺ຎາຍຕິ, ອລາຕຂຓ຺ຑໍ ວາ ອງ຺ຄາຣປິຓ຺ໂຑ ວາ ຉາຣິກາ ວາ ຘູໂມ ວາ ອຸປຏ຺ຐາຕິ. ປຏິຠາຄນິມິຕ຺ຕໍ ນິຈ຺ຈລໍ ອາກາເສ ຐປິຕຣຕ຺ຕກມ຺ພລກ຺ຂຓ຺ຑໍ ວິຍ ສຸວຓ຺ຓຕາລວຓ຺ຏໍ ວິຍ ກຎ຺ຈນຕ຺ຖມ຺ໂຠ ວິຍ ຈ ອຸປຏ຺ຐາຕິ. ໂສ ຕສ຺ສ ສຫ ອຸປຏ຺ຐາເນເນວ ອຸປຈາຣຊ຺ຌານໍ, ວຸຕ຺ຕນເຍເນວ ຈຕຸກ຺ກປຎ຺ຈກຊ຺ຌານານິ ຈ ປາປຸຓາຕີຕິ. ເຕໂຊກສິຓໍ.

ວາໂຍກສິຓກຖາ

໙໓. ວາໂຍກສິຓໍ ຠາເວຕຸກາເມນາປິ ວາຍຸສ຺ມິໍ ນິມິຕ຺ຕໍ ຄຓ຺ຫິຕພ຺ພໍ. ຕຎ຺ຈ ໂຂ ທິຏ຺ຐວເສນ ວາ ຜຸຏ຺ຐວເສນ ວາ. ວຸຕ຺ຕຎ຺ເຫຕໍ ອຏ຺ຐກຖາສຸ ‘‘ວາໂຍກສິຓໍ ອຸຄ຺ຄຓ຺ຫນ຺ໂຕ ວາຍຸສ຺ມິໍ ນິມິຕ຺ຕໍ ຄຓ຺ຫາຕິ, ອຸຈ຺ຉຄ຺ຄໍ ວາ ເອຣິຕໍ ສເມຣິຕໍ ອຸປລກ຺ເຂຕິ, ເວຬຄ຺ຄໍ ວາ…ເປ… ຣຸກ຺ຂຄ຺ຄໍ ວາ ເກສຄ຺ຄໍ ວາ ເອຣິຕໍ ສເມຣິຕໍ ອຸປລກ຺ເຂຕິ, ກາຍສ຺ມິໍ ວາ ຜຸຏ຺ຐໍ ອຸປລກ຺ເຂຕີ’’ຕິ. ຕສ຺ມາ ສມສີສຏ຺ຐິຕໍ ຆນປຕ຺ຕໍ ອຸຈ຺ຉຸໍ ວາ ເວຬຸໍ ວາ ຣຸກ຺ຂໍ ວາ ຈຕຸຣງ຺ຄຸລປ຺ປມາຓໍ ຆນເກສສ຺ສ ປຸຣິສສ຺ສ ສີສໍ ວາ ວາເຕນ ປຫຣິຍມານໍ ທິສ຺ວາ ‘‘ອຍໍ ວາໂຕ ເອຕສ຺ມິໍ ຐາເນ ປຫຣຕີ’’ຕິ ສຕິໍ ຐເປຕ຺ວາ, ຍໍ ວາ ປນສ຺ສ ວາຕປານນ຺ຕຣິກາຍ ວາ ຠິຕ຺ຕິຉິທ຺ເທນ ວາ ປວິສິຕ຺ວາ ວາໂຕ ກາຍປ຺ປເທສໍ ປຫຣຕິ, ຕຕ຺ຖ ສຕິໍ ຐເປຕ຺ວາ ວາຕມາລຸຕອນິລາທີສຸ ວາຍຸນາເມສຸ ປາກຏນາມວເສເນວ ‘‘ວາໂຕ ວາໂຕ’’ຕິ ຠາເວຕພ຺ພໍ. ອິຘ ອຸຄ຺ຄຫນິມິຕ຺ຕວຑ຺ຒນໂຕ ໂອຕາຣິຕມຕ຺ຕສ຺ສ ປາຍາສສ຺ສ ອຸສຸມວຏ຺ຏິສທິສໍ ຈລໍ ຫຸຕ຺ວາ ອຸປຏ຺ຐາຕິ. ປຏິຠາຄນິມິຕ຺ຕໍ ສນ຺ນິສິນ຺ນໍ ໂຫຕິ ນິຈ຺ຈລໍ. ເສສໍ ວຸຕ຺ຕນເຍເນວ ເວທິຕພ຺ພນ຺ຕິ. ວາໂຍກສິຓໍ.

ນີລກສິຓກຖາ

໙໔. ຕທນນ຺ຕຣໍ ປນ ນີລກສິຓໍ ອຸຄ຺ຄຓ຺ຫນ຺ໂຕ ນີລກສ຺ມິໍ ນິມິຕ຺ຕໍ ຄຓ຺ຫາຕິ ປຸປ຺ຜສ຺ມິໍ ວາ ວຕ຺ຖສ຺ມິໍ ວາ ວຓ຺ຓຘາຕຸຍາ ວາຕິ ວຈນໂຕ ກຕາຘິກາຣສ຺ສ ປຸຎ຺ຎວໂຕ ຕາວ ຕຖາຣູປໍ ມາລາຄຈ຺ຉໍ ວາ ປູຊາຐາເນສຸ ປຸປ຺ຜສນ຺ຖຣໍ ວາ ນີລວຕ຺ຖມຓີນໍ ວາ ອຎ຺ຎຕຣໍ ທິສ຺ວາວ ນິມິຕ຺ຕໍ ອຸປ຺ປຊ຺ຊຕິ. ອິຕເຣນ ນີລຸປ຺ປລຄິຣິກຓ຺ຓິກາທີນິ ປຸປ຺ຜານິ ຄເຫຕ຺ວາ ຍຖາ ເກສຣໍ ວາ ວຓ຺ຏໍ ວາ ນ ປຎ຺ຎາຍຕິ, ເອວໍ ຈງ຺ໂຄຏກໍ ວາ ກຣຓ຺ຑປຏລໍ ວາ ປຕ຺ເຕຫິເຍວ ສມຕິຕ຺ຕິກໍ ປູເຣຕ຺ວາ ສນ຺ຖຣິຕພ຺ພໍ. ນີລວຓ຺ເຓນ ວາ ວຕ຺ເຖນ ຠຓ຺ຑິກໍ ພນ຺ຘິຕ຺ວາ ປູເຣຕພ຺ພໍ. ມຸຂວຏ຺ຏິຍໍ ວາ ອສ຺ສ ເຠຣິຕລມິວ ພນ຺ຘິຕພ຺ພໍ. ກໍສນີລປລາສນີລອຎ຺ຊນນີລານໍ ວາ ອຎ຺ຎຕເຣນ ຘາຕຸນາ ປຖວີກສິເຓ ວຸຕ຺ຕນເຍນ ສໍຫາຣິມໍ ວາ ຠິຕ຺ຕິຍໍເຍວ ວາ ກສິຓມຓ຺ຑລໍ ກຕ຺ວາ ວິສຠາຄວຓ຺ເຓນ ປຣິຈ຺ຉິນ຺ທິຕພ຺ພໍ. ຕໂຕ ປຖວີກສິເຓ ວຸຕ຺ຕນເຍນ ‘‘ນີລໍ ນີລ’’ນ຺ຕິ ມນສິກາໂຣ ປວຕ຺ເຕຕພ຺ໂພ. ອິຘາປິ ອຸຄ຺ຄຫນິມິຕ຺ເຕ ກສິຓໂທໂສ ປຎ຺ຎາຍຕິ, ເກສຣທຓ຺ຑກປຕ຺ຕນ຺ຕຣິກາທີນິ ອຸປຏ຺ຐຫນ຺ຕິ. ປຏິຠາຄນິມິຕ຺ຕໍ ກສິຓມຓ຺ຑລໂຕ ມຸຎ຺ຈິຕ຺ວາ ອາກາເສ ມຓິຕາລວຓ຺ຏສທິສໍ ອຸປຏ຺ຐາຕິ. ເສສໍ ວຸຕ຺ຕນເຍເນວ ເວທິຕພ຺ພນ຺ຕິ. ນີລກສິຓໍ.

ປີຕກສິຓກຖາ

໙໕. ປີຕກສິເຓປິ ເອເສວ ນໂຍ. ວຸຕ຺ຕຎ຺ເຫຕໍ ປີຕກສິຓໍ ອຸຄ຺ຄຓ຺ຫນ຺ໂຕ ປີຕກສ຺ມິໍ ນິມິຕ຺ຕໍ ຄຓ຺ຫາຕິ ປຸປ຺ຜສ຺ມິໍ ວາ ວຕ຺ຖສ຺ມິໍ ວາ ວຓ຺ຓຘາຕຸຍາ ວາຕິ. ຕສ຺ມາ ອິຘາປິ ກຕາຘິກາຣສ຺ສ ປຸຎ຺ຎວໂຕ ຕຖາຣູປໍ ມາລາຄຈ຺ຉໍ ວາ ປຸປ຺ຜສນ຺ຖຣໍ ວາ ປີຕວຕ຺ຖຘາຕູນໍ ວາ ອຎ຺ຎຕຣໍ ທິສ຺ວາວ ນິມິຕ຺ຕໍ ອຸປ຺ປຊ຺ຊຕິ ຈິຕ຺ຕຄຸຕ຺ຕຕ຺ເຖຣສ຺ສ ວິຍ. ຕສ຺ສ ກິຣາຍສ຺ມໂຕ ຈິຕ຺ຕລປພ຺ພເຕ ປຕ຺ຕງ຺ຄປຸປ຺ເຜຫິ ກຕໍ ອາສນປູຊໍ ປສ຺ສໂຕ ສຫ ທສ຺ສເນເນວ ອາສນປ຺ປມາຓໍ ນິມິຕ຺ຕໍ ອຸທປາທິ. ອິຕເຣນ ກຓິກາຣປຸປ຺ຜາທິນາ ວາ ປີຕວຕ຺ເຖນ ວາ ຘາຕຸນາ ວາ ນີລກສິເຓ ວຸຕ຺ຕນເຍເນວ ກສິຓໍ ກຕ຺ວາ ‘‘ປີຕກໍ ປີຕກ’’ນ຺ຕິ ມນສິກາໂຣ ປວຕ຺ເຕຕພ຺ໂພ. ເສສໍ ຕາທິສເມວາຕິ. ປີຕກສິຓໍ.

ໂລຫິຕກສິຓກຖາ

໙໖. ໂລຫິຕກສິເຓປິ ເອເສວ ນໂຍ. ວຸຕ຺ຕຎ຺ເຫຕໍ ໂລຫິຕກສິຓໍ ອຸຄ຺ຄຓ຺ຫນ຺ໂຕ ໂລຫິຕກສ຺ມິໍ ນິມິຕ຺ຕໍ ຄຓ຺ຫາຕິ ປຸປ຺ຜສ຺ມິໍ ວາ ວຕ຺ຖສ຺ມິໍ ວາ ວຓ຺ຓຘາຕຸຍາ ວາຕິ. ຕສ຺ມາ ອິຘາປິ ກຕາຘິກາຣສ຺ສ ປຸຎ຺ຎວໂຕ ຕຖາຣູປໍ ພນ຺ຘຸຊີວກາທິມາລາຄຈ຺ຉໍ ວາ ປຸປ຺ຜສນ຺ຖຣໍ ວາ ໂລຫິຕກວຕ຺ຖມຓິຘາຕູນໍ ວາ ອຎ຺ຎຕຣໍ ທິສ຺ວາວ ນິມິຕ຺ຕໍ ອຸປ຺ປຊ຺ຊຕິ. ອິຕເຣນ ຊຍສຸມນພນ຺ຘຸຊີວກຣຕ຺ຕໂກຣຓ຺ຑກາທິປຸປ຺ເຜຫິ ວາ ຣຕ຺ຕວຕ຺ເຖນ ວາ ຘາຕຸນາ ວາ ນີລກສິເຓ ວຸຕ຺ຕນເຍເນວ ກສິຓໍ ກຕ຺ວາ ‘‘ໂລຫິຕກໍ ໂລຫິຕກ’’ນ຺ຕິ ມນສິກາໂຣ ປວຕ຺ເຕຕພ຺ໂພ. ເສສໍ ຕາທິສເມວາຕິ. ໂລຫິຕກສິຓໍ.

ໂອທາຕກສິຓກຖາ

໙໗. ໂອທາຕກສິເຓປິ ໂອທາຕກສິຓໍ ອຸຄ຺ຄຓ຺ຫນ຺ໂຕ ໂອທາຕສ຺ມິໍ ນິມິຕ຺ຕໍ ຄຓ຺ຫາຕິ ປຸປ຺ຜສ຺ມິໍ ວາ ວຕ຺ຖສ຺ມິໍ ວາ ວຓ຺ຓຘາຕຸຍາ ວາຕິ ວຈນໂຕ ກຕາຘິກາຣສ຺ສ ຕາວ ປຸຎ຺ຎວໂຕ ຕຖາຣູປໍ ມາລາຄຈ຺ຉໍ ວາ ວສ຺ສິກສຸມນາທິປຸປ຺ຜສນ຺ຖຣໍ ວາ ກຸມຸທປທຸມຣາສິໍ ວາ ໂອທາຕວຕ຺ຖຘາຕູນໍ ວາ ອຎ຺ຎຕຣໍ ທິສ຺ວາວ ນິມິຕ຺ຕໍ ອຸປ຺ປຊ຺ຊຕິ, ຕິປຸມຓ຺ຑລຣຊຕມຓ຺ຑລຈນ຺ທມຓ຺ຑເລສຸປິ ອຸປ຺ປຊ຺ຊຕິເຍວ. ອິຕເຣນ ວຸຕ຺ຕປ຺ປກາເຣຫິ ໂອທາຕປຸປ຺ເຜຫິ ວາ ໂອທາຕວຕ຺ເຖນ ວາ ຘາຕຸນາ ວາ ນີລກສິເຓ ວຸຕ຺ຕນເຍເນວ ກສິຓໍ ກຕ຺ວາ ‘‘ໂອທາຕໍ ໂອທາຕ’’ນ຺ຕິ ມນສິກາໂຣ ປວຕ຺ເຕຕພ຺ໂພ. ເສສໍ ຕາທິສເມວາຕິ. ໂອທາຕກສິຓໍ.

ອາໂລກກສິຓກຖາ

໙໘. ອາໂລກກສິເຓ ປນ ອາໂລກກສິຓໍ ອຸຄ຺ຄຓ຺ຫນ຺ໂຕ ອາໂລກສ຺ມິໍ ນິມິຕ຺ຕໍ ຄຓ຺ຫາຕິ ຠິຕ຺ຕິຉິທ຺ເທ ວາ ຕາຬຈ຺ຉິທ຺ເທ ວາ ວາຕປານນ຺ຕຣິກາຍ ວາຕິ ວຈນໂຕ ກຕາຘິກາຣສ຺ສ ຕາວ ປຸຎ຺ຎວໂຕ ຍໍ ຠິຕ຺ຕິຉິທ຺ທາທີນໍ ອຎ຺ຎຕເຣນ ສູຣິຍາໂລໂກ ວາ ຈນ຺ທາໂລໂກ ວາ ປວິສິຕ຺ວາ ຠິຕ຺ຕິຍໍ ວາ ຠູມິຍໍ ວາ ມຓ຺ຑລໍ ສມຸຏ຺ຐາເປຕິ, ຆນປຓ຺ຓຣຸກ຺ຂສາຂນ຺ຕເຣນ ວາ ຆນສາຂາມຓ຺ຑປນ຺ຕເຣນ ວາ ນິກ຺ຂມິຕ຺ວາ ຠູມິຍເມວ ມຓ຺ຑລໍ ສມຸຏ຺ຐາເປຕິ, ຕໍ ທິສ຺ວາວ ນິມິຕ຺ຕໍ ອຸປ຺ປຊ຺ຊຕິ. ອິຕເຣນາປິ ຕເທວ ວຸຕ຺ຕປ຺ປກາຣໂມຠາສມຓ຺ຑລໍ ‘‘ໂອຠາໂສ ໂອຠາໂສ’’ຕິ ວາ ‘‘ອາໂລໂກ ອາໂລໂກ’’ຕິ ວາ ຠາເວຕພ຺ພໍ. ຕຖາ ອສກ຺ໂກນ຺ເຕນ ຆເຏ ທີປໍ ຊາເລຕ຺ວາ ຆຏມຸຂໍ ປິທຫິຕ຺ວາ ຆເຏ ຉິທ຺ທໍ ກຕ຺ວາ ຠິຕ຺ຕິມຸຂໍ ຐເປຕພ຺ພໍ. ເຕນ ຉິທ຺ເທນ ທີປາໂລໂກ ນິກ຺ຂມິຕ຺ວາ ຠິຕ຺ຕິຍໍ ມຓ຺ຑລໍ ກໂຣຕິ, ຕໍ ອາໂລໂກ ອາໂລໂກຕິ ຠາເວຕພ຺ພໍ. ອິທມິຕເຣຫິ ຈິຣຏ຺ຐິຕິກໍ ໂຫຕິ. ອິຘ ອຸຄ຺ຄຫນິມິຕ຺ຕໍ ຠິຕ຺ຕິຍໍ ວາ ຠູມິຍໍ ວາ ອຸຏ຺ຐິຕມຓ຺ຑລສທິສເມວ ໂຫຕິ. ປຏິຠາຄນິມິຕ຺ຕໍ ຆນວິປ຺ປສນ຺ນອາໂລກປຸຎ຺ຊສທິສໍ. ເສສໍ ຕາທິສເມວາຕິ. ອາໂລກກສິຓໍ.

ປຣິຈ຺ຉິນ຺ນາກາສກສິຓກຖາ

໙໙. ປຣິຈ຺ຉິນ຺ນາກາສກສິເຓປິ ອາກາສກສິຓໍ ອຸຄ຺ຄຓ຺ຫນ຺ໂຕ ອາກາສສ຺ມິໍ ນິມິຕ຺ຕໍ ຄຓ຺ຫາຕິ ຠິຕ຺ຕິຉິທ຺ເທ ວາ ຕາຬຈ຺ຉິທ຺ເທ ວາ ວາຕປານນ຺ຕຣິກາຍ ວາຕິ ວຈນໂຕ ກຕາຘິກາຣສ຺ສ ຕາວ ປຸຎ຺ຎວໂຕ ຠິຕ຺ຕິຉິທ຺ທາທີສຸ ອຎ຺ຎຕຣໍ ທິສ຺ວາວ ນິມິຕ຺ຕໍ ອຸປ຺ປຊ຺ຊຕິ. ອິຕເຣນ ສຸຈ຺ຉນ຺ນມຓ຺ຑເປ ວາ ຈມ຺ມກຏສາຣກາທີນໍ ວາ ອຎ຺ຎຕຣສ຺ມິໍ ວິທຕ຺ຖິຈຕຸຣງ຺ຄຸລປ຺ປມາຓໍ ຉິທ຺ທໍ ກຕ຺ວາ ຕເທວ ວາ ຠິຕ຺ຕິຉິທ຺ທາທິເຠທໍ ຉິທ຺ທໍ ‘‘ອາກາໂສ ອາກາໂສ’’ຕິ ຠາເວຕພ຺ພໍ. ອິຘ ອຸຄ຺ຄຫນິມິຕ຺ຕໍ ສທ຺ຘິໍ ຠິຕ຺ຕິປຣິຍນ຺ຕາທີຫິ ຉິທ຺ທສທິສເມວ ໂຫຕິ, ວຑ຺ຒິຍມານມ຺ປິ ນ ວຑ຺ຒຕິ. ປຏິຠາຄນິມິຕ຺ຕມາກາສມຓ຺ຑລເມວ ຫຸຕ຺ວາ ອຸປຏ຺ຐາຕິ, ວຑ຺ຒິຍມານຎ຺ຈ ວຑ຺ຒຕິ. ເສສໍ ປຖວີກສິເຓ ວຸຕ຺ຕນເຍເນວ ເວທິຕພ຺ພນ຺ຕິ. ປຣິຈ຺ຉິນ຺ນາກາສກສິຓໍ.

ອິຕິ ກສິຓານິ ທສພໂລ,

ທສ ຍານິ ອໂວຈ ສພ຺ພຘມ຺ມທໂສ;

ຣູປາວຈຣມ຺ຫິ ຈຕຸກ຺ກປຎ຺ຈກຊ຺ຌານເຫຕູນິ.

ເອວໍ ຕານິ ຈ ເຕສຎ຺ຈ,

ຠາວນານຍມິມໍ ວິທິຕ຺ວານ;

ເຕສ຺ເວວ ອຍໍ ຠິຍ຺ໂຍ,

ປກິຓ຺ຓກກຖາປິ ວິຎ຺ເຎຍ຺ຍາ.

ປກິຓ຺ຓກກຖາ

໑໐໐. ອິເມສຸ ຫິ ປຖວີກສິຓວເສນ ເອໂກປິ ຫຸຕ຺ວາ ພຫຸຘາ ໂຫຕີຕິອາທິຠາໂວ, ອາກາເສ ວາ ອຸທເກ ວາ ປຖວິໍ ນິມ຺ມິນິຕ຺ວາ ປທສາ ຄມນໍ, ຐານນິສຊ຺ຊາທິກປ຺ປນໍ ວາ, ປຣິຕ຺ຕອປ຺ປມາຓນເຍນ ອຠິຠາຍຕນປຏິລາໂຠຕິ ເອວມາທີນິ ອິຊ຺ຌນ຺ຕິ.

ອາໂປກສິຓວເສນ ປຖວິຍໍ ອຸມ຺ມຸຊ຺ຊນນິມ຺ມຸຊ຺ຊນໍ, ອຸທກວຸຏ຺ຐິສມຸປ຺ປາທນໍ, ນທີສມຸທ຺ທາທິນິມ຺ມານໍ, ປຖວີປພ຺ພຕປາສາທາທີນໍ ກມ຺ປນນ຺ຕິ ເອວມາທີນິ ອິຊ຺ຌນ຺ຕິ.

ເຕໂຊກສິຓວເສນ ຘູມາຍນາ, ປຊ຺ຊລນາ, ອງ຺ຄາຣວຸຏ຺ຐິສມຸປ຺ປາທນໍ, ເຕຊສາ ເຕໂຊປຣິຍາທານໍ, ຍເທວ ໂສ ອິຈ຺ຉຕິ ຕສ຺ສ ຑຫນສມຕ຺ຖຕາ, ທິພ຺ເພນ ຈກ຺ຂຸນາ ຣູປທສ຺ສນຕ຺ຖາຍ ອາໂລກກຣຓໍ, ປຣິນິພ຺ພານສມເຍ ເຕໂຊຘາຕຸຍາ ສຣີຣຊ຺ຌາປນນ຺ຕິ ເອວມາທີນິ ອິຊ຺ຌນ຺ຕິ.

ວາໂຍກສິຓວເສນ ວາຍຸຄຕິຄມນໍ, ວາຕວຸຏ຺ຐິສມຸປ຺ປາທນນ຺ຕິ ເອວມາທີນິ ອິຊ຺ຌນ຺ຕິ.

ນີລກສິຓວເສນ ນີລຣູປນິມ຺ມານໍ, ອນ຺ຘກາຣກຣຓໍ, ສຸວຓ຺ຓທຸພ຺ພຓ຺ຓນເຍນ ອຠິຠາຍຕນປຏິລາໂຠ, ສຸຠວິໂມກ຺ຂາຘິຄໂມຕິ ເອວມາທີນິ ອິຊ຺ຌນ຺ຕິ.

ປີຕກສິຓວເສນ ປີຕກຣູປນິມ຺ມານໍ, ສຸວຓ຺ຓນ຺ຕິ ອຘິມຸຈ຺ຈນາ, ວຸຕ຺ຕນເຍເນວ ອຠິຠາຍຕນປຏິລາໂຠ, ສຸຠວິໂມກ຺ຂາຘິຄໂມ ຈາຕິ ເອວມາທີນິ ອິຊ຺ຌນ຺ຕິ.

ໂລຫິຕກສິຓວເສນ ໂລຫິຕກຣູປນິມ຺ມານໍ, ວຸຕ຺ຕນເຍເນວ ອຠິຠາຍຕນປຏິລາໂຠ, ສຸຠວິໂມກ຺ຂາຘິຄໂມຕິ ເອວມາທີນິ ອິຊ຺ຌນ຺ຕິ.

ໂອທາຕກສິຓວເສນ ໂອທາຕຣູປນິມ຺ມານໍ, ຖິນມິທ຺ຘສ຺ສ ທູຣຠາວກຣຓໍ, ອນ຺ຘກາຣວິຘມນໍ, ທິພ຺ເພນ ຈກ຺ຂຸນາ ຣູປທສ຺ສນຕ຺ຖາຍ ອາໂລກກຣຓນ຺ຕິ ເອວມາທີນິ ອິຊ຺ຌນ຺ຕິ.

ອາໂລກກສິຓວເສນ ສປ຺ປຠາຣູປນິມ຺ມານໍ, ຖິນມິທ຺ຘສ຺ສ ທູຣຠາວກຣຓໍ, ອນ຺ຘກາຣວິຘມນໍ, ທິພ຺ເພນ ຈກ຺ຂຸນາ ຣູປທສ຺ສນຕ຺ຖໍ ອາໂລກກຣຓນ຺ຕິ ເອວມາທີນິ ອິຊ຺ຌນ຺ຕິ.

ອາກາສກສິຓວເສນ ປຏິຈ຺ຉນ຺ນານໍ ວິວຏກຣຓໍ, ອນ຺ໂຕປຖວີປພ຺ພຕາທີສຸປິ ອາກາສໍ ນິມ຺ມິນິຕ຺ວາ ອິຣິຍາປຖກປ຺ປນໍ, ຕິໂຣກຸຑ຺ຑາທີສຸ ອສຊ຺ຊມານຄມນນ຺ຕິ ເອວມາທີນິ ອິຊ຺ຌນ຺ຕິ.

ສພ຺ພາເນວ ອຸທ຺ຘໍ ອໂຘ ຕິຣິຍໍ ອທ຺ວຍໍ ອປ຺ປມາຓນ຺ຕິ ອິມໍ ປເຠທໍ ລຠນ຺ຕິ. ວຸຕ຺ຕຎ຺ເຫຕໍ ‘‘ປຖວີກສິຓເມໂກ ສຎ຺ຊານາຕິ. ອຸທ຺ຘມໂຘຕິຣິຍໍ ອທ຺ວຍມປ຺ປມາຓ’’ນ຺ຕິອາທິ.

ຕຕ຺ຖ ອຸທ຺ຘນ຺ຕິ ອຸປຣິຄຄນຕລາຠິມຸຂໍ. ອໂຘຕິ ເຫຏ຺ຐາຠູມິຕລາຠິມຸຂໍ. ຕິຣິຍນ຺ຕິ ເຂຕ຺ຕມຓ຺ຑລມິວ ສມນ຺ຕາ ປຣິຈ຺ຉິນ຺ທິຕໍ. ເອກຈ຺ໂຈ ຫິ ອຸທ຺ຘເມວ ກສິຓໍ ວຑ຺ເຒຕິ, ເອກຈ຺ໂຈ ອໂຘ, ເອກຈ຺ໂຈ ສມນ຺ຕໂຕ. ເຕນ ເຕນ ວາ ກາຣເຓນ ເອວໍ ປສາເຣຕິ. ອາໂລກມິວ ທິພ຺ພຈກ຺ຂຸນາ ຣູປທສ຺ສນກາໂມ. ເຕນ ວຸຕ຺ຕໍ ອຸທ຺ຘມໂຘຕິຣິຍນ຺ຕິ. ອທ຺ວຍນ຺ຕິ ອິທໍ ປນ ເອກສ຺ສ ອຎ຺ຎຠາວານຸປຄມນຕ຺ຖໍ ວຸຕ຺ຕໍ. ຍຖາ ຫິ ອຸທກໍ ປວິຏ຺ຐສ຺ສ ສພ຺ພທິສາສຸ ອຸທກເມວ ໂຫຕິ, ນ ອຎ຺ຎໍ, ເອວເມວ ປຖວີກສິຓໍ ປຖວີກສິຓເມວ ໂຫຕິ, ນຕ຺ຖິ ຕສ຺ສ ອຎ຺ໂຎ ກສິຓສມ຺ເຠໂທຕິ. ເອເສວ ນໂຍ ສພ຺ພຕ຺ຖ. ອປ຺ປມາຓນ຺ຕິ ອິທໍ ຕສ຺ສ ຜຣຓອປ຺ປມາຓວເສນ ວຸຕ຺ຕໍ. ຕຎ຺ຫິ ເຈຕສາ ຜຣນ຺ໂຕ ສກລເມວ ຜຣຕິ. ນ ອຍມສ຺ສ ອາທິ ອິທໍ ມຊ຺ຌນ຺ຕິ ປມາຓໍ ຄຓ຺ຫາຕີຕິ.

໑໐໑. ເຍ ຈ ເຕ ສຕ຺ຕາ ກມ຺ມາວຣເຓນ ວາ ສມນ຺ນາຄຕາ ກິເລສາວຣເຓນ ວາ ສມນ຺ນາຄຕາ ວິປາກາວຣເຓນ ວາ ສມນ຺ນາຄຕາ ອສທ຺ຘາ ອຈ຺ຉນ຺ທິກາ ທຸປ຺ປຎ຺ຎາ ອຠພ຺ພາ ນິຍາມໍ ໂອກ຺ກມິຕຸໍ ກຸສເລສຸ ຘມ຺ເມສຸ ສມ຺ມຕ຺ຕນ຺ຕິ ວຸຕ຺ຕາ, ເຕສເມກສ຺ສາເປກກສິເຓປິ ຠາວນາ ນ ອິຊ຺ຌຕິ. ຕຕ຺ຖ ກມ຺ມາວຣເຓນ ສມນ຺ນາຄຕາຕິ ອານນ຺ຕຣິຍກມ຺ມສມງ຺ຄິໂນ. ກິເລສາວຣເຓນ ສມນ຺ນາຄຕາຕິ ນິຍຕມິຈ຺ຉາທິຏ຺ຐິກາ ເຈວ ອຸຠໂຕພ຺ຍຎ຺ຊນກປຓ຺ຑກາ ຈ. ວິປາກາວຣເຓນ ສມນ຺ນາຄຕາຕິ ອເຫຕຸກທ຺ວິເຫຕຸກປຏິສນ຺ຘິກາ. ອສທ຺ຘາຕິ ພຸທ຺ຘາທີສຸ ສທ຺ຘາວິຣຫິຕາ. ອຈ຺ຉນ຺ທິກາຕິ ອປຈ຺ຈນີກປຏິປທາຍໍ ຉນ຺ທວິຣຫິຕາ. ທຸປ຺ປຎ຺ຎາຕິ ໂລກິຍໂລກຸຕ຺ຕຣສມ຺ມາທິຏ຺ຐິຍາ ວິຣຫິຕາ. ອຠພ຺ພາ ນິຍາມໍ ໂອກ຺ກມິຕຸໍ ກຸສເລສຸ ຘມ຺ເມສຸ ສມ຺ມຕ຺ຕນ຺ຕິ ກຸສເລສຸ ຘມ຺ເມສຸ ນິຍາມສງ຺ຂາຕໍ ສມ຺ມຕ຺ຕສງ຺ຂາຕຎ຺ຈ ອຣິຍມຄ຺ຄໍ ໂອກ຺ກມິຕຸໍ ອຠພ຺ພາຕິ ອຕ຺ໂຖ. ນ ເກວລຎ຺ຈ ກສິເຓເຍວ, ອຎ຺ເຎສຸປິ ກມ຺ມຏ຺ຐາເນສຸ ເອເຕສເມກສ຺ສປິ ຠາວນາ ນ ອິຊ຺ຌຕິ. ຕສ຺ມາ ວິຄຕວິປາກາວຣເຓນປິ ກຸລປຸຕ຺ເຕນ ກມ຺ມາວຣຓຎ຺ຈ ກິເລສາວຣຓຎ຺ຈ ອາຣກາ ປຣິວຊ຺ເຊຕ຺ວາ ສທ຺ຘມ຺ມສ຺ສວນສປ຺ປຸຣິສູປນິສ຺ສຍາທີຫິ ສທ຺ຘຎ຺ຈ ຉນ຺ທຎ຺ຈ ປຎ຺ຎຎ຺ຈ ວຑ຺ເຒຕ຺ວາ ກມ຺ມຏ຺ຐານານຸໂຍເຄ ໂຍໂຄ ກຣຓີໂຍຕິ.

ອິຕິ ສາຘຸຊນປາໂມຊ຺ຊຕ຺ຖາຍ ກເຕ ວິສຸທ຺ຘິມຄ຺ເຄ

ສມາຘິຠາວນາຘິກາເຣ

ເສສກສິຓນິທ຺ເທໂສ ນາມ

ປຎ຺ຈໂມ ປຣິຈ຺ເຉໂທ.