໑໑. ໂສສານິກງ຺ຄກຖາ

໓໔. ໂສສານິກງ຺ຄມ຺ປິ ‘‘ນ ສຸສານໍ ປຏິກ຺ຂິປາມິ, ໂສສານິກງ຺ຄໍ ສມາທິຍາມີ’’ຕິ ອິເມສໍ ອຎ຺ຎຕຣວຈເນນ ສມາທິນ຺ນໍ ໂຫຕິ.

ເຕນ ປນ ໂສສານິເກນ ຍໍ ມນຸສ຺ສາ ຄາມໍ ນິເວສນ຺ຕາ ‘‘ອິທໍ ສຸສານ’’ນ຺ຕິ ວວຕ຺ຖເປນ຺ຕິ, ນ ຕຕ຺ຖ ວສິຕພ຺ພໍ. ນ ຫິ ມຕສຣີເຣ ອຊ຺ຌາປິເຕ ຕໍ ສຸສານໍ ນາມ ໂຫຕິ, ຌາປິຕກາລໂຕ ປນ ປຏ຺ຐາຍ ສເຈປິ ທ຺ວາທສວສ຺ສານິ ຉຑ຺ຑິຕໍ, ຕໍ ສຸສານເມວ.

ຕສ຺ມິໍ ປນ ວສນ຺ເຕນ ຈງ຺ກມມຓ຺ຑປາທີນິ ກາເຣຕ຺ວາ ມຎ຺ຈປີຐໍ ປຎ຺ຎເປຕ຺ວາ ປານີຍປຣິໂຠຊນີຍໍ ອຸປຏ຺ຐາເປຕ຺ວາ ຘມ຺ມໍ ວາເຈນ຺ເຕນ ນ ວສິຕພ຺ພໍ. ຄຣຸກໍ ຫິ ອິທໍ ຘຸຕງ຺ຄໍ, ຕສ຺ມາ ອຸປ຺ປນ຺ນປຣິສ຺ສຍວິຆາຕຕ຺ຖາຍ ສງ຺ຆຕ຺ເຖຣໍ ວາ ຣາຊຍຸຕ຺ຕກໍ ວາ ຊານາເປຕ຺ວາ ອປ຺ປມຕ຺ເຕນ ວສິຕພ຺ພໍ. ຈງ຺ກມນ຺ເຕນ ອທ຺ຘກ຺ຂິເກນ ອາຬາຫນໍ ໂອໂລເກນ຺ເຕນ ຈງ຺ກມິຕພ຺ພໍ.

ສຸສານໍ ຄຈ຺ຉນ຺ເຕນາປິ ມຫາປຖາ ອຸກ຺ກມ຺ມ ອຸປ຺ປຖມຄ຺ເຄນ ຄນ຺ຕພ຺ພໍ. ທິວາເຍວ ອາຣມ຺ມຓໍ ວວຕ຺ຖເປຕພ຺ພໍ. ເອວຎ຺ຫິສ຺ສ ຕໍ ຣຕ຺ຕິໍ ຠຍານກໍ ນ ຠວິສ຺ສຕິ, ອມນຸສ຺ສາ ຣຕ຺ຕິໍ ວິຣວິຕ຺ວາ ວິຣວິຕ຺ວາ ອາຫິຓ຺ຑນ຺ຕາປິ ນ ເກນຈິ ປຫຣິຕພ຺ພາ. ເອກທິວສມ຺ປິ ສຸສານໍ ອຄນ຺ຕຸໍ ນ ວຏ຺ຏຕິ. ມຊ຺ຌິມຍາມໍ ສຸສາເນ ເຂເປຕ຺ວາ ປຈ຺ຉິມຍາເມ ປຏິກ຺ກມິຕຸໍ ວຏ຺ຏຕີຕິ ອງ຺ຄຸຕ຺ຕຣຠາຓກາ. ອມນຸສ຺ສານໍ ປິຍໍ ຕິລປິຏ຺ຐມາສຠຕ຺ຕມຈ຺ຉມໍສຂີຣເຕລຄຸຬາທິຂຊ຺ຊໂຠຊ຺ຊໍ ນ ເສວິຕພ຺ພໍ. ກຸລເຄຫໍ ນ ປວິສິຕພ຺ພນ຺ຕິ ອິທມສ຺ສ ວິຘານໍ.

ປເຠທໂຕ ປນ ອຍມ຺ປິ ຕິວິໂຘ ໂຫຕິ. ຕຕ຺ຖ ອຸກ຺ກຏ຺ເຐນ ຍຕ຺ຖ ຘຸວຑາຫຘຸວກຸຓປຘຸວໂຣທນານິ ອຕ຺ຖິ, ຕຕ຺ເຖວ ວສິຕພ຺ພໍ. ມຊ຺ຌິມສ຺ສ ຕີສຸ ເອກສ຺ມິມ຺ປິ ສຕິ ວຏ຺ຏຕິ. ມຸທຸກສ຺ສ ວຸຕ຺ຕນເຍນ ສຸສານລກ຺ຂຓໍ ປຕ຺ຕມຕ຺ເຕ ວຏ຺ຏຕິ.

ອິເມສໍ ປນ ຕິຓ຺ຓມ຺ປິ ນ ສຸສານມ຺ຫິ ວາສໍ ກປ຺ປເນນ ຘຸຕງ຺ຄໍ ຠິຊ຺ຊຕິ. ສຸສານໍ ອຄຕທິວເສຕິ ອງ຺ຄຸຕ຺ຕຣຠາຓກາ. ອຍເມຕ຺ຖ ເຠໂທ.

ອຍໍ ປນານິສໍໂສ ມຣຓສ຺ສຕິປຏິລາໂຠ, ອປ຺ປມາທວິຫາຣິຕາ, ອສຸຠນິມິຕ຺ຕາຘິຄໂມ, ກາມຣາຄວິໂນທນໍ, ອຠິຓ຺ຫໍ ກາຍສຠາວທສ຺ສນໍ, ສໍເວຄພຫຸລຕາ ອາໂຣຄ຺ຍມທາທິປ຺ປຫານໍ, ຠຍເຠຣວສຫນຕາ, ອມນຸສ຺ສານໍ ຄຣຸຠາວນີຍຕາ, ອປ຺ປິຈ຺ຉຕາທີນໍ ອນຸໂລມວຸຕ຺ຕິຕາຕິ.

ໂສສານິກຎ຺ຫິ ມຣຓານຸສຕິປ຺ປຠາວາ,

ນິທ຺ທາຄຕມ຺ປິ ນ ຜຸສນ຺ຕິ ປມາທໂທສາ;

ສມ຺ປສ຺ສໂຕ ຈ ກຸຓປານິ ພຫູນິ ຕສ຺ສ,

ກາມານຸຠາວວສຄມ຺ປິ ນ ໂຫຕິ ຈິຕ຺ຕໍ.

ສໍເວຄເມຕິ ວິປຸລໍ ນ ມທໍ ອຸເປຕິ,

ສມ຺ມາ ອໂຖ ຆຏຕິ ນິພ຺ພຸຕິເມສມາໂນ;

ໂສສານິກງ຺ຄມິຕິເນກຄຸຓາວຫຕ຺ຕາ,

ນິພ຺ພານນິນ຺ນຫທເຍນ ນິເສວິຕພ຺ພນ຺ຕິ.

ອຍໍ ໂສສານິກງ຺ເຄ ສມາທານວິຘານປ຺ປເຠທເຠທານິສໍສວຓ຺ຓນາ.