໑໑. ສມາຘິນິທ຺ເທໂສ

ອາຫາເຣປຏິກ຺ກູລຠາວນາ

໒໙໔. ອິທານິ ອາຣຸປ຺ປານນ຺ຕຣໍ ເອກາ ສຎ຺ຎາຕິ ເອວໍ ອຸທ຺ທິຏ຺ຐາຍ ອາຫາເຣ ປຏິກ຺ກູລສຎ຺ຎາຍ ຠາວນານິທ຺ເທໂສ ອນຸປ຺ປຕ຺ໂຕ. ຕຕ຺ຖ ອາຫຣຕີຕິ ອາຫາໂຣ. ໂສ ຈຕຸພ຺ພິໂຘ ກພຬີກາຣາຫາໂຣ, ຜສ຺ສາຫາໂຣ, ມໂນສຎ຺ເຈຕນາຫາໂຣ, ວິຎ຺ຎາຓາຫາໂຣຕິ.

ໂກ ປເນຕ຺ຖ ກິມາຫຣຕີຕິ? ກພຬີກາຣາຫາໂຣ ໂອຊຏ຺ຐມກໍ ຣູປໍ ອາຫຣຕິ. ຜສ຺ສາຫາໂຣ ຕິສ຺ໂສ ເວທນາ ອາຫຣຕິ. ມໂນສຎ຺ເຈຕນາຫາໂຣ ຕີສຸ ຠເວສຸ ປຏິສນ຺ຘິໍ ອາຫຣຕິ. ວິຎ຺ຎາຓາຫາໂຣ ປຏິສນ຺ຘິກ຺ຂເຓ ນາມຣູປໍ ອາຫຣຕິ.

ເຕສຸ ກພຬີກາຣາຫາເຣ ນິກນ຺ຕິຠຍໍ. ຜສ຺ສາຫາເຣ ອຸປຄມນຠຍໍ. ມໂນສຎ຺ເຈຕນາຫາເຣ ອຸປປຕ຺ຕິຠຍໍ. ວິຎ຺ຎາຓາຫາເຣ ປຏິສນ຺ຘິຠຍໍ. ເອວໍ ສປ຺ປຏິຠເຍສຸ ຈ ເຕສຸ ກພຬີກາຣາຫາໂຣ ປຸຕ຺ຕມໍສູປເມນ (ສໍ. ນິ. ໒.໖໓) ທີເປຕພ຺ໂພ. ຜສ຺ສາຫາໂຣ ນິຈ຺ຈມ຺ມຄາວູປເມນ (ສໍ. ນິ. ໒.໖໓). ມໂນສຎ຺ເຈຕນາຫາໂຣ ອງ຺ຄາຣກາສູປເມນ (ສໍ. ນິ. ໒.໖໓). ວິຎ຺ຎາຓາຫາໂຣ ສຕ຺ຕິສຕູປເມນາຕິ (ສໍ. ນິ. ໒.໖໓). ອິເມສຸ ປນ ຈຕູສຸ ອາຫາເຣສຸ ອສິຕປີຕຂາຍິຕສາຍິຕປ຺ປເຠໂທ ກພຬີກາໂຣ ອາຫາໂຣວ ອິມສ຺ມິໍ ອຕ຺ເຖ ອາຫາໂຣຕິ ອຘິປ຺ເປໂຕ. ຕສ຺ມິໍ ອາຫາເຣ ປຏິກ຺ກູລາກາຣຄ຺ຄຫຓວເສນ ອຸປ຺ປນ຺ນາ ສຎ຺ຎາ ອາຫາເຣ ປຏິກ຺ກູລສຎ຺ຎາ.

ຕໍ ອາຫາເຣ ປຏິກ຺ກູລສຎ຺ຎໍ ຠາເວຕຸກາເມນ ກມ຺ມຏ຺ຐານໍ ອຸຄ຺ຄເຫຕ຺ວາ ອຸຄ຺ຄຫໂຕ ເອກປທມ຺ປິ ອວິຣຊ຺ຌນ຺ເຕນ ຣໂຫຄເຕນ ປຏິສລ຺ລີເນນ ອສິຕປີຕຂາຍິຕສາຍິຕປ຺ປເຠເທ ກພຬີກາຣາຫາເຣ ທສຫາກາເຣຫິ ປຏິກ຺ກູລຕາ ປຈ຺ຈເວກ຺ຂິຕພ຺ພາ. ເສຍ຺ຍຖິທໍ, ຄມນໂຕ, ປຣິເຍສນໂຕ, ປຣິໂຠຄໂຕ, ອາສຍໂຕ, ນິຘານໂຕ, ອປຣິປກ຺ກໂຕ, ປຣິປກ຺ກໂຕ, ຜລໂຕ, ນິສ຺ສນ຺ທໂຕ, ສມ຺ມກ຺ຂນໂຕຕິ.

໒໙໕. ຕຕ຺ຖ ຄມນໂຕຕິ ເອວໍ ມຫານຸຠາເວ ນາມ ສາສເນ ປພ຺ພຊິເຕນ ສກລຣຕ຺ຕິໍ ພຸທ຺ຘວຈນສຊ຺ຌາຍໍ ວາ ສມຓຘມ຺ມໍ ວາ ກຕ຺ວາ ກາລສ຺ເສວ ວຸຏ຺ຐາຍ ເຈຕິຍງ຺ຄຓໂພຘິຍງ຺ຄຓວຕ຺ຕໍ ກຕ຺ວາ ປານີຍໍ ປຣິໂຠຊນີຍໍ ອຸປຏ຺ຐເປຕ຺ວາ ປຣິເວຓໍ ສມ຺ມຊ຺ຊິຕ຺ວາ ສຣີຣໍ ປຏິຊຄ຺ຄິຕ຺ວາ ອາສນມາຣູຍ຺ຫ ວີສຕິໍສ ວາເຣ ກມ຺ມຏ຺ຐານໍ ມນສິກຣິຕ຺ວາ ອຸຏ຺ຐາຍ ປຕ຺ຕຈີວຣໍ ຄເຫຕ຺ວາ ນິຊນສມ຺ພາຘານິ ປວິເວກສຸຂານິ ຉາຍູທກສມ຺ປນ຺ນານິ ສຸຈີນິ ສີຕລານິ ຣມຓີຍຠູມິຠາຄານິ ຕໂປວນານິ ປຫາຍ ອຣິຍໍ ວິເວກຣຕິໍ ອນເປກ຺ຂິຕ຺ວາ ສຸສານາຠິມຸເຂນ ສິງ຺ຄາເລນ ວິຍ ອາຫາຣຕ຺ຖາຍ ຄາມາຠິມຸເຂນ ຄນ຺ຕພ຺ພໍ.

ເອວໍ ຄຈ຺ຉຕາ ຈ ມຎ຺ຈມ຺ຫາ ວາ ປີຐມ຺ຫາ ວາ ໂອຕຣຓໂຕ ປຏ຺ຐາຍ ປາທຣຊຆຣໂຄລິກວຈ຺ຈາທິສມ຺ປຣິກິຓ຺ຓໍ ປຈ຺ຈຕ຺ຖຣຓໍ ອກ຺ກມິຕພ຺ພໍ ໂຫຕິ. ຕໂຕ ອປ຺ເປກທາ ມູສິກຊຕຸກວຈ຺ຈາທີຫິ ອຸປຫຕຕ຺ຕາ ອນ຺ໂຕຄພ຺ຠໂຕ ປຏິກ຺ກູລຕຣໍ ປມຸຂໍ ທຏ຺ຐພ຺ພໍ ໂຫຕິ. ຕໂຕ ອຸລູກປາຣາວຕາທິວຈ຺ຈສມ຺ມກ຺ຂິຕຕ຺ຕາ ອຸປຣິມຕລໂຕ ປຏິກ຺ກູລຕຣໍ ເຫຏ຺ຐິມຕລໍ. ຕໂຕ ກທາຈິ ກທາຈິ ວາເຕຣິເຕຫິ ປຸຣາຓຕິຓປຓ຺ເຓຫິ ຄິລານສາມເຓຣານໍ ມຸຕ຺ຕກຣີສເຂຬສິງ຺ຆາຓິກາຫິ ວສ຺ສກາເລ ອຸທກຈິກ຺ຂລ຺ລາທີຫິ ຈ ສໍກິລິຏ຺ຐຕ຺ຕາ ເຫຏ຺ຐິມຕລໂຕ ປຏິກ຺ກູລຕຣໍ ປຣິເວຓໍ. ປຣິເວຓໂຕ ປຏິກ຺ກູລຕຣາ ວິຫາຣຣຈ຺ຉາ ທຏ຺ຐພ຺ພາ ໂຫຕິ.

ອນຸປຸພ຺ເພນ ປນ ໂພຘິຎ຺ຈ ເຈຕິຍຎ຺ຈ ວນ຺ທິຕ຺ວາ ວິຕກ຺ກມາຬເກ ຐິເຕນ ມຸຕ຺ຕຣາສິສທິສໍ ເຈຕິຍໍ ໂມຣປິຎ຺ຉກລາປມໂນຫຣໍ ໂພຘິໍ ເທວວິມານສມ຺ປຕ຺ຕິສສ຺ສິຣີກໍ ເສນາສນຎ຺ຈ ອນປໂລເກຕ຺ວາ ເອວຣູປໍ ນາມ ຣມຓີຍໍ ປເທສໍ ປິຏ຺ຐິໂຕ ກຕ຺ວາ ອາຫາຣເຫຕຸ ຄນ຺ຕພ຺ພໍ ຠວິສ຺ສຕີຕິ ປກ຺ກມິຕ຺ວາ ຄາມມຄ຺ຄໍ ປຏິປນ຺ເນນ ຂາຓຸກຓ຺ຏກມຄ຺ໂຄປິ ອຸທກເວຄຠິນ຺ນວິສມມຄ຺ໂຄປິ ທຏ຺ຐພ຺ໂພ ໂຫຕິ.

ຕໂຕ ຄຓ຺ຑໍ ປຏິຈ຺ຉາເທນ຺ເຕນ ວິຍ ນິວາສນໍ ນິວາເສຕ຺ວາ ວຓໂຈຬກໍ ພນ຺ຘນ຺ເຕນ ວິຍ ກາຍພນ຺ຘນໍ ພນ຺ຘິຕ຺ວາ ອຏ຺ຐິສງ຺ຆາຕໍ ປຏິຈ຺ຉາເທນ຺ເຕນ ວິຍ ຈີວຣໍ ປາຣຸປິຕ຺ວາ ເຠສຊ຺ຊກປາລໍ ນີຫຣນ຺ເຕນ ວິຍ ປຕ຺ຕໍ ນີຫຣິຕ຺ວາ ຄາມທ຺ວາຣສມີປໍ ປາປຸຓນ຺ເຕນ ຫຕ຺ຖິກຸຓປອສ຺ສກຸຓປໂຄກຸຓປມຫິໍສກຸຓປມນຸສ຺ສກຸຓປອຫິກຸຓປກຸກ຺ກຸຣກຸຓປານິປິ ທຏ຺ຐພ຺ພານິ ຠວນ຺ຕິ. ນ ເກວລຎ຺ຈ ທຏ຺ຐພ຺ພານິ, ຄນ຺ໂຘປິ ເນສໍ ຆານໍ ປຏິຫນມາໂນ ອຘິວາເສຕພ຺ໂພ ໂຫຕິ. ຕໂຕ ຄາມທ຺ວາເຣ ຐຕ຺ວາ ຈຓ຺ຑຫຕ຺ຖິອສ຺ສາທິປຣິສ຺ສຍປຣິວຊ຺ຊນຕ຺ຖໍ ຄາມຣຈ຺ຉາ ໂອໂລເກຕພ຺ພາ ໂຫນ຺ຕິ.

ອິຈ຺ເຈຕໍ ປຈ຺ຈຕ຺ຖຣຓາທິອເນກກຸຓປປຣິໂຍສານໍ ປຏິກ຺ກູລໍ ອາຫາຣເຫຕຸ ອກ຺ກມິຕພ຺ພຎ຺ຈ ທຏ຺ຐພ຺ພຎ຺ຈ ຆາຍິຕພ຺ພຎ຺ຈ ໂຫຕິ. ອໂຫ ວຕ ໂຠ ປຏິກ຺ກູໂລ ອາຫາໂຣຕິ ເອວໍ ຄມນໂຕ ປຏິກ຺ກູລຕາ ປຈ຺ຈເວກ຺ຂິຕພ຺ພາ.

໒໙໖. ກຖໍ ປຣິເຍສນໂຕ? ເອວໍ ຄມນປຏິກ຺ກູລໍ ອຘິວາເສຕ຺ວາປິ ຄາມໍ ປວິຏ຺ເຐນ ສງ຺ຆາຏິປາຣຸເຕນ ກປຓມນຸສ຺ເສນ ວິຍ ກປາລຫຕ຺ເຖນ ຆຣປຏິປາຏິຍາ ຄາມວີຖີສຸ ຈຣິຕພ຺ພໍ ໂຫຕິ. ຍຕ຺ຖ ວສ຺ສກາເລ ອກ຺ກນ຺ຕອກ຺ກນ຺ຕຏ຺ຐາເນ ຍາວ ປິຓ຺ຑິກມໍສາປິ ອຸທກຈິກ຺ຂລ຺ເລ ປາທາ ປວິສນ຺ຕິ, ເອເກນ ຫຕ຺ເຖນ ປຕ຺ຕໍ ຄເຫຕພ຺ພໍ ໂຫຕິ, ເອເກນ ຈີວຣໍ ອຸກ຺ຂິປິຕພ຺ພໍ. ຄິມ຺ຫກາເລ ວາຕເວເຄນ ສມຸຏ຺ຐິເຕຫິ ປໍສຸຕິຓຣເຊຫິ ໂອກິຓ຺ຓສຣີເຣນ ຈຣິຕພ຺ພໍ. ຕໍ ຕໍ ເຄຫທ຺ວາຣໍ ປຕ຺ວາ ມຈ຺ຉໂຘວນມໍສໂຘວນຕຓ຺ຑຸລໂຘວນເຂຬສິງ຺ຆາຓິກສຸນຂສູກຣວຈ຺ຈາທີຫິ ສມ຺ມິສ຺ສານິ ກິມິກຸລາກຸລານິ ນີລມກ຺ຂິກປຣິກິຓ຺ຓານິ ໂອຬິຄລ຺ລານິ ເຈວ ຈນ຺ທນິກຏ຺ຐານານິ ຈ ທຏ຺ຐພ຺ພານິ ໂຫນ຺ຕິ ອກ຺ກມິຕພ຺ພານິປິ. ຍໂຕ ຕາ ມກ຺ຂິກາ ອຸຏ຺ຐຫິຕ຺ວາ ສງ຺ຆາຏິຍມ຺ປິ ປຕ຺ເຕປິ ສີເສປິ ນິລີຍນ຺ຕິ.

ຆຣໍ ປວິຏ຺ຐສ຺ສາປິ ເກຈິ ເທນ຺ຕິ, ເກຈິ ນ ເທນ຺ຕິ. ທທມານາປິ ເອກຈ຺ເຈ ຫິຍ຺ໂຍ ປກ຺ກຠຕ຺ຕມ຺ປິ ປຸຣາຓຂຊ຺ຊກມ຺ປິ ປູຕິກຸມ຺ມາສປູປາທີນິປິ ທທນ຺ຕິ. ອທທມານາປິ ເກຈິເທວ ‘‘ອຕິຈ຺ຉຖ, ຠນ຺ເຕ’’ຕິ ວທນ຺ຕິ, ເກຈິ ປນ ອປສ຺ສມານາ ວິຍ ຕຸຓ຺ຫີ ໂຫນ຺ຕິ, ເກຈິ ອຎ຺ເຎນ ມຸຂໍ ກໂຣນ຺ຕິ, ເກຈິ ‘‘ຄຈ຺ຉ, ເຣ ມຸຓ຺ຑກາ’’ຕິອາທີຫິ ຜຣຸສວາຈາຫິ ສມຸທາຈຣນ຺ຕິ. ເອວໍ ກປຓມນຸສ຺ເສນ ວິຍ ຄາເມ ປິຓ຺ຑາຍ ຈຣິຕ຺ວາ ນິກ຺ຂມິຕພ຺ພນ຺ຕິ.

ອິຈ຺ເຈຕໍ ຄາມປ຺ປເວສນໂຕ ປຏ຺ຐາຍ ຍາວ ນິກ຺ຂມນາ ອຸທກຈິກ຺ຂລ຺ລາທິປຏິກ຺ກູລໍ ອາຫາຣເຫຕຸ ອກ຺ກມິຕພ຺ພຎ຺ເຈວ ທຏ຺ຐພ຺ພຎ຺ຈ ອຘິວາເສຕພ຺ພຎ຺ຈ ໂຫຕິ. ອໂຫ ວຕ ໂຠ ປຏິກ຺ກູໂລ ອາຫາໂຣຕິ ເອວໍ ປຣິເຍສນໂຕ ປຏິກ຺ກູລຕາ ປຈ຺ຈເວກ຺ຂິຕພ຺ພາ.

໒໙໗. ກຖໍ ປຣິໂຠຄໂຕ? ເອວໍ ປຣິຍິຏ຺ຐາຫາເຣນ ປນ ພຫິຄາເມ ຜາສຸກຏ຺ຐາເນ ສຸຂນິສິນ຺ເນນ ຍາວ ຕຕ຺ຖ ຫຕ຺ຖໍ ນ ໂອຕາເຣຕິ, ຕາວ ຕຖາຣູປໍ ຄຣຸຏ຺ຐານິຍໍ ຠິກ຺ຂຸໍ ວາ ລຊ຺ຊິມນຸສ຺ສໍ ວາ ທິສ຺ວາ ນິມນ຺ເຕຕຸມ຺ປິ ສກ຺ກາ ໂຫຕິ. ຠຸຎ຺ຊິຕຸກາມຕາຍ ປເນຕ຺ຖ ຫຕ຺ເຖ ໂອຕາຣິຕມຕ຺ເຕ ‘‘ຄຓ຺ຫຖາ’’ຕິ ວທນ຺ເຕນ ລຊ຺ຊິຕພ຺ພໍ ໂຫຕິ. ຫຕ຺ຖໍ ປນ ໂອຕາເຣຕ຺ວາ ມທ຺ທນ຺ຕສ຺ສ ປຎ຺ຈງ຺ຄຸລິອນຸສາເຣນ ເສໂທ ປຄ຺ຆຣມາໂນ ສຸກ຺ຂຖທ຺ຘຠຕ຺ຕມ຺ປິ ເຕເມນ຺ໂຕ ມຸທຸໍ ກໂຣຕິ.

ອຖ ຕສ຺ມິໍ ປຣິມທ຺ທນມຕ຺ເຕນາປິ ສມ຺ຠິນ຺ນໂສເຠ ອາໂລປໍ ກຕ຺ວາ ມຸເຂ ຐປິເຕ ເຫຏ຺ຐິມທນ຺ຕາ ອຸທຸກ຺ຂລກິຈ຺ຈໍ ສາເຘນ຺ຕິ, ອຸປຣິມາ ມຸສລກິຈ຺ຈໍ, ຊິວ຺ຫາ ຫຕ຺ຖກິຈ຺ຈໍ. ຕໍ ຕຕ຺ຖ ສຸວານໂທຓິຍໍ ສຸວານປິຓ຺ຑມິວ ທນ຺ຕມຸສເລຫິ ໂກຏ຺ເຏຕ຺ວາ ຊິວ຺ຫາຍ ສມ຺ປຣິວຕ຺ຕິຍມານໍ ຊິວ຺ຫາຄ຺ເຄ ຕນຸປສນ຺ນເຂໂຬ ມກ຺ເຂຕິ, ເວມຊ຺ຌໂຕ ປຏ຺ຐາຍ ພຫລເຂໂຬ ມກ຺ເຂຕິ, ທນ຺ຕກຏ຺ເຐນ ອສມ຺ປຕ຺ຕຏ຺ຐາເນ ທນ຺ຕຄູຖໂກ ມກ຺ເຂຕິ. ໂສ ເອວໍ ວິຈຸຓ຺ຓິຕມກ຺ຂິໂຕ ຕງ຺ຂຓຎ຺ເຎວ ອນ຺ຕຣຫິຕວຓ຺ຓຄນ຺ຘສງ຺ຂາຣວິເສໂສ ສຸວານໂທຓິຍໍ ຐິຕສຸວານວມຖຸ ວິຍ ປຣມເຊຄຸຈ຺ຉຠາວໍ ອຸປຄຈ຺ຉຕິ. ເອວຣູໂປປິ ສມາໂນ ຈກ຺ຂຸສ຺ສ ອາປາຖໍ ອຕີຕຕ຺ຕາ ອຊ຺ໂຌຫຣິຕພ຺ໂພ ໂຫຕີຕິ ເອວໍ ປຣິໂຠຄໂຕ ປຏິກ຺ກູລຕາ ປຈ຺ຈເວກ຺ຂິຕພ຺ພາ.

໒໙໘. ກຖໍ ອາສຍໂຕ? ເອວໍ ປຣິໂຠຄໍ ອຸປຄໂຕ ຈ ປເນສ ອນ຺ໂຕ ປວິສມາໂນ ຍສ຺ມາ ພຸທ຺ຘປຈ຺ເຈກພຸທ຺ຘານມ຺ປິ ຣຎ຺ໂຎປິ ຈກ຺ກວຕ຺ຕິສ຺ສ ປິຕ຺ຕເສມ຺ຫປຸພ຺ພໂລຫິຕາສເຍສຸ ຈຕູສຸ ອຎ຺ຎຕໂຣ ອາສໂຍ ໂຫຕິເຍວ. ມນ຺ທປຸຎ຺ຎານໍ ປນ ຈຕ຺ຕາໂຣ ອາສຍາ ໂຫນ຺ຕິ. ຕສ຺ມາ ຍສ຺ສ ປິຕ຺ຕາສໂຍ ອຘິໂກ ໂຫຕິ, ຕສ຺ສ ພຫລມຘຸກເຕລມກ຺ຂິໂຕ ວິຍ ປຣມເຊຄຸຈ຺ໂຉ ໂຫຕິ. ຍສ຺ສ ເສມ຺ຫາສໂຍ ອຘິໂກ ໂຫຕິ, ຕສ຺ສ ນາຄພລປຓ຺ຓຣສມກ຺ຂິໂຕ ວິຍ. ຍສ຺ສ ປຸພ຺ພາສໂຍ ອຘິໂກ ໂຫຕິ, ຕສ຺ສ ປູຕິຕກ຺ກມກ຺ຂິໂຕ ວິຍ. ຍສ຺ສ ໂລຫິຕາສໂຍ ອຘິໂກ ໂຫຕິ, ຕສ຺ສ ຣຊນມກ຺ຂິໂຕ ວິຍ ປຣມເຊຄຸຈ຺ໂຉ ໂຫຕີຕິ ເອວໍ ອາສຍໂຕ ປຏິກ຺ກູລຕາ ປຈ຺ຈເວກ຺ຂິຕພ຺ພາ.

໒໙໙. ກຖໍ ນິຘານໂຕ? ໂສ ອິເມສຸ ຈຕູສຸ ອາສເຍສຸ ອຎ຺ຎຕເຣນ ອາສເຍນ ມກ຺ຂິໂຕ ອນ຺ໂຕອຸທຣໍ ປວິສິຕ຺ວາ ເນວ ສຸວຓ຺ຓຠາຊເນ ນ ມຓິຣຊຕາທິຠາຊເນສຸ ນິຘານໍ ຄຈ຺ຉຕິ. ສເຈ ປນ ທສວສ຺ສິເກນ ອຊ຺ໂຌຫຣິຍຕິ ທສ ວສ຺ສານິ ອໂຘຕວຈ຺ຈກູປສທິເສ ໂອກາເສ ປຕິຏ຺ຐຫຕິ. ສເຈ ວີສ, ຕິໍສ, ຈຕ຺ຕາລີສ, ປຎ຺ຎາສ, ສຏ຺ຐິ, ສຕ຺ຕຕິ, ອສີຕິ, ນວຸຕິວສ຺ສິເກນ, ສເຈ ວສ຺ສສຕິເກນ ອຊ຺ໂຌຫຣິຍຕິ. ວສ຺ສສຕໍ ອໂຘຕວຈ຺ຈກູປສທິເສ ໂອກາເສ ປຕິຏ຺ຐຫຕີຕິ ເອວໍ ນິຘານໂຕ ປຏິກ຺ກູລຕາ ປຈ຺ຈເວກ຺ຂິຕພ຺ພາ.

໓໐໐. ກຖໍ ອປຣິປກ຺ກໂຕ? ໂສ ປນາຍມາຫາໂຣ ເອວຣູເປ ໂອກາເສ ນິຘານມຸປຄໂຕ ຍາວ ອປຣິປກ຺ໂກ ໂຫຕິ, ຕາວ ຕສ຺ມິຎ຺ເຎວ ຍຖາວຸຕ຺ຕປ຺ປກາເຣ ປຣມນ຺ຘກາຣຕິມິເສ ນານາກຸຓປຄນ຺ຘວາສິຕປວນວິຈຣິເຕ ອຕິທຸຄ຺ຄນ຺ຘເຊຄຸຈ຺ເຉ ປເທເສ ຍຖາ ນາມ ນິທາເຆ ອກາລເມເຆນ ອຠິວຸຏ຺ຐມ຺ຫິ ຈຓ຺ຑາລຄາມທ຺ວາຣອາວາເຏ ປຕິຕານິ ຕິຓປຓ຺ຓກິລຎ຺ຊຂຓ຺ຑອຫິກຸກ຺ກຸຣມນຸສ຺ສກຸຓປາທີນິ ສູຣິຍາຕເປນ ສນ຺ຕຕ຺ຕານິ ເຜຓປຸປ຺ຜຸຬກາຈິຕານິ ຕິຏ຺ຐນ຺ຕິ, ເອວເມວ ຕໍທິວສມ຺ປິ ຫິຍ຺ໂຍປິ ຕໂຕ ປຸຣິເມ ທິວເສປິ ອຊ຺ໂຌຫໂຕ ສພ຺ໂພ ເອກໂຕ ຫຸຕ຺ວາ ເສມ຺ຫປຏລປຣິໂຍນທ຺ໂຘ ກາຍຄ຺ຄິສນ຺ຕາປກຸຖິຕກຸຖນສຎ຺ຊາຕເຜຓປຸປ຺ຜຸຬກາຈິໂຕ ປຣມເຊຄຸຈ຺ຉຠາວໍ ອຸປຄນ຺ຕ຺ວາ ຕິຏ຺ຐຕີຕິ ເອວໍ ອປຣິປກ຺ກໂຕ ປຏິກ຺ກູລຕາ ປຈ຺ຈເວກ຺ຂິຕພ຺ພາ.

໓໐໑. ກຖໍ ປຣິປກ຺ກໂຕ? ໂສ ຕຕ຺ຕກາຍຄ຺ຄິນາ ປຣິປກ຺ໂກ ສມາໂນ ນ ສຸວຓ຺ຓຣຊຕາທິຘາຕຸໂຍ ວິຍ ສຸວຓ຺ຓຣຊຕາທິຠາວໍ ອຸປຄຈ຺ຉຕິ. ເຜຓປຸປ຺ຜຸຬເກ ປນ ມຸຎ຺ຈນ຺ໂຕ ສຓ຺ຫກຣຓິຍໍ ປິສິຕ຺ວາ ນາຬິເກ ປກ຺ຂິຕ຺ຕປຓ຺ຑຸມຕ຺ຕິກາ ວິຍ ກຣີສຠາວໍ ອຸປຄນ຺ຕ຺ວາ ປກ຺ກາສຍໍ, ມຸຕ຺ຕຠາວໍ ອຸປຄນ຺ຕ຺ວາ ມຸຕ຺ຕວຕ຺ຖິຎ຺ຈ ປູເຣຕີຕິ ເອວໍ ປຣິປກ຺ກໂຕ ປຏິກ຺ກູລຕາ ປຈ຺ຈເວກ຺ຂິຕພ຺ພາ.

໓໐໒. ກຖໍ ຜລໂຕ? ສມ຺ມາ ປຣິປຈ຺ຈມາໂນ ຈ ປນາຍໍ ເກສໂລມນຂທນ຺ຕາທີນິ ນານາກຸຓປານິ ນິປ຺ຜາເທຕິ ອສມ຺ມາປຣິປຈ຺ຈມາໂນ ທທ຺ທຸກຓ຺ຑຸກຈ຺ຉຸກຸຏ຺ຐກິລາສໂສສກາສາຕິສາຣປ຺ປຠຸຕີນິ ໂຣຄສຕານິ, ອິທມສ຺ສ ຜລນ຺ຕິ ເອວໍ ຜລໂຕ ປຏິກ຺ກູລຕາ ປຈ຺ຈເວກ຺ຂິຕພ຺ພາ.

໓໐໓. ກຖໍ ນິສ຺ສນ຺ທໂຕ? ອຊ຺ໂຌຫຣິຍມາໂນ ເຈສ ເອເກນ ທ຺ວາເຣນ ປວິສິຕ຺ວາ ນິສ຺ສນ຺ທມາໂນ ອກ຺ຂິມ຺ຫາ ອກ຺ຂິຄູຖໂກ ກຓ຺ຓມ຺ຫາ ກຓ຺ຓຄູຖໂກຕິອາທິນາ ປກາເຣນ ອເນເກຫິ ທ຺ວາເຣຫິ ນິສ຺ສນ຺ທຕິ. ອຊ຺ໂຌຫຣຓສມເຍ ເຈສ ມຫາປຣິວາເຣນາປິ ອຊ຺ໂຌຫຣິຍຕິ. ນິສ຺ສນ຺ທນສມເຍ ປນ ອຸຈ຺ຈາຣປສ຺ສາວາທິຠາວໍ ອຸປຄໂຕ ເອກເກເນວ ນີຫຣິຍຕິ. ປຐມທິວເສ ຈ ນໍ ປຣິຠຸຎ຺ຊນ຺ໂຕ ຫຏ຺ຐປຫຏ຺ໂຐປິ ໂຫຕິ ອຸທຄ຺ຄຸທຄ຺ໂຄ ປີຕິໂສມນສ຺ສຊາໂຕ. ທຸຕິຍທິວເສ ນິສ຺ສນ຺ເທນ຺ໂຕ ປິຫິຕນາສິໂກ ໂຫຕິ ວິກຸຓິຕມຸໂຂ ເຊຄຸຈ຺ຉີ ມງ຺ກຸຠູໂຕ. ປຐມທິວເສ ຈ ນໍ ຣຕ຺ໂຕ ຄິທ຺ໂຘ ຄຘິໂຕ ມຸຈ຺ຉິໂຕປິ ອຊ຺ໂຌຫຣິຕ຺ວາ ທຸຕິຍທິວເສ ເອກຣຕ຺ຕິວາເສນ ວິຣຕ຺ໂຕ ອຏ຺ຏີຍມາໂນ ຫຣາຍມາໂນ ຊິຄຸຈ຺ຉມາໂນ ນີຫຣຕິ. ເຕນາຫຸ ໂປຣາຓາ –

‘‘ອນ຺ນໍ ປານໍ ຂາທນີຍໍ, ໂຠຊນຎ຺ຈ ມຫາຣຫໍ;

ເອກທ຺ວາເຣນ ປວິສິຕ຺ວາ, ນວທ຺ວາເຣຫິ ສນ຺ທຕິ.

‘‘ອນ຺ນໍ ປານໍ ຂາທນີຍໍ, ໂຠຊນຎ຺ຈ ມຫາຣຫໍ;

ຠຸຎ຺ຊຕິ ສປຣິວາໂຣ, ນິກ຺ຂາເມນ຺ໂຕ ນິລີຍຕິ.

‘‘ອນ຺ນໍ ປານໍ ຂາທນີຍໍ, ໂຠຊນຎ຺ຈ ມຫາຣຫໍ;

ຠຸຎ຺ຊຕິ ອຠິນນ຺ທນ຺ໂຕ, ນິກ຺ຂາເມນ຺ໂຕ ຊິຄຸຈ຺ຉຕິ.

‘‘ອນ຺ນໍ ປານໍ ຂາທນີຍໍ, ໂຠຊນຎ຺ຈ ມຫາຣຫໍ;

ເອກຣຕ຺ຕິປຣິວາສາ, ສພ຺ພໍ ຠວຕິ ປູຕິກ’’ນ຺ຕິ.

ເອວໍ ນິສ຺ສນ຺ທໂຕ ປຏິກ຺ກູລຕາ ປຈ຺ຈເວກ຺ຂິຕພ຺ພາ.

໓໐໔. ກຖໍ ສມ຺ມກ຺ຂນໂຕ? ປຣິໂຠຄກາເລປິ ເຈສ ຫຕ຺ຖໂອຏ຺ຐຊິວ຺ຫາຕາລູນິ ສມ຺ມກ຺ເຂຕິ. ຕານິ ເຕນ ສມ຺ມກ຺ຂິຕຕ຺ຕາ ປຏິກ຺ກູລານິ ໂຫນ຺ຕິ, ຍານິ ໂຘຕານິປິ ຄນ຺ຘຫຣຓຕ຺ຖໍ ປຸນປ຺ປຸນໍ ໂຘວິຕພ຺ພານິ ໂຫນ຺ຕິ. ປຣິຠຸຕ຺ໂຕ ສມາໂນ ຍຖາ ນາມ ໂອທເນ ປຈ຺ຈມາເນ ຖຸສກຓກຸຓ຺ຑກາທີນິ ອຸຕ຺ຕຣິຕ຺ວາ ອຸກ຺ຂລິມຸຂວຏ຺ຏິປິຘານິໂຍ ມກ຺ຂນ຺ຕິ, ເອວເມວ ສກລສຣີຣານຸຄເຕນ ກາຍຄ຺ຄິນາ ເຜຓຸທ຺ເທຫກໍ ປຈ຺ຈິຕ຺ວາ ອຸຕ຺ຕຣມາໂນ ທນ຺ເຕ ທນ຺ຕມລຠາເວນ ສມ຺ມກ຺ເຂຕິ. ຊິວ຺ຫາຕາລຸປ຺ປຠຸຕີນິ ເຂຬເສມ຺ຫາທິຠາເວນ, ອກ຺ຂິກຓ຺ຓນາສອໂຘມຄ຺ຄາທິເກ ອກ຺ຂິຄູຖກກຓ຺ຓຄູຖກສິງ຺ຆາຓິກາມຸຕ຺ຕກຣີສາທິຠາເວນ ສມ຺ມກ຺ເຂຕິ. ເຍນ ສມ຺ມກ຺ຂິຕານິ ອິມານິ ທ຺ວາຣານິ ທິວເສ ທິວເສ ໂຘວິຍມານານິປິ ເນວ ສຸຈີນິ, ນ ມໂນຣມານິ ໂຫນ຺ຕິ. ເຍສຸ ເອກຈ຺ຈໍ ໂຘວິຕ຺ວາ ຫຕ຺ໂຖ ປຸນ ອຸທເກນ ໂຘວິຕພ຺ໂພ ໂຫຕິ. ເອກຈ຺ຈໍ ໂຘວິຕ຺ວາ ທ຺ວຕ຺ຕິກ຺ຂຕ຺ຕຸໍ ໂຄມເຍນປິ ມຕ຺ຕິກາຍປິ ຄນ຺ຘຈຸຓ຺ເຓນປິ ໂຘວໂຕ ປາຏິກຸລ຺ຍຕາ ວິຄຈ຺ຉຕີຕິ ເອວໍ ສມ຺ມກ຺ຂນໂຕ ປຏິກ຺ກູລຕາ ປຈ຺ຈເວກ຺ຂິຕພ຺ພາ.

໓໐໕. ຕສ຺ເສວໍ ທສຫາກາເຣຫິ ປຏິກ຺ກູລຕໍ ປຈ຺ຈເວກ຺ຂໂຕ ຕກ຺ກາຫຕໍ ວິຕກ຺ກາຫຕໍ ກໂຣນ຺ຕສ຺ສ ປຏິກ຺ກູລາກາຣວເສນ ກພຬີກາຣາຫາໂຣ ປາກໂຏ ໂຫຕິ. ໂສ ຕໍ ນິມິຕ຺ຕໍ ປຸນປ຺ປຸນໍ ອາເສວຕິ ຠາເວຕິ ພຫຸລີກໂຣຕິ. ຕສ຺ເສວໍ ກໂຣໂຕ ນີວຣຓານິ ວິກ຺ຂມ຺ຠນ຺ຕິ. ກພຬີກາຣາຫາຣສ຺ສ ສຠາວຘມ຺ມຕາຍ ຄມ຺ຠີຣຕ຺ຕາ ອປ຺ປນໍ ອປ຺ປຕ຺ເຕນ ອຸປຈາຣສມາຘິນາ ຈິຕ຺ຕໍ ສມາຘິຍຕິ. ປຏິກ຺ກູລາກາຣຄ຺ຄຫຓວເສນ ປເນຕ຺ຖ ສຎ຺ຎາ ປາກຏາ ໂຫຕິ. ຕສ຺ມາ ອິມໍ ກມ຺ມຏ຺ຐານໍ ອາຫາເຣ ປຏິກ຺ກູລສຎ຺ຎາ ອິຈ຺ເຈວ ສງ຺ຂໍ ຄຈ຺ຉຕິ.

ອິມຎ຺ຈ ປນ ອາຫາເຣ ປຏິກ຺ກູລສຎ຺ຎໍ ອນຸຍຸຕ຺ຕສ຺ສ ຠິກ຺ຂຸໂນ ຣສຕຓ຺ຫາຍ ຈິຕ຺ຕໍ ປຕິລີຍຕິ ປຕິກຸຏຕິ ປຕິວຏ຺ຏຕິ. ໂສ ກນ຺ຕາຣນິຕ຺ຖຣຓຕ຺ຖິໂກ ວິຍ ປຸຕ຺ຕມໍສໍ ວິຄຕມໂທ ອາຫາຣໍ ອາຫາເຣຕິ ຍາວເທວ ທຸກ຺ຂສ຺ສ ນິຕ຺ຖຣຓຕ຺ຖາຍ. ອຖສ຺ສ ອປ຺ປກສິເຣເນວ ກພຬີກາຣາຫາຣປຣິຎ຺ຎາມຸເຂນ ປຎ຺ຈກາມຄຸຓິໂກ ຣາໂຄ ປຣິຎ຺ຎໍ ຄຈ຺ຉຕິ. ໂສ ປຎ຺ຈກາມຄຸຓປຣິຎ຺ຎາມຸເຂນ ຣູປກ຺ຂນ຺ຘໍ ປຣິຊານາຕິ. ອປຣິປກ຺ກາທິປຏິກ຺ກູລຠາວວເສນ ຈສ຺ສ ກາຍຄຕາສຕິຠາວນາປິ ປາຣິປູຣິໍ ຄຈ຺ຉຕິ, ອສຸຠສຎ຺ຎາຍ ອນຸໂລມປຏິປທໍ ປຏິປນ຺ໂນ ໂຫຕິ. ອິມໍ ປນ ປຏິປຕ຺ຕິໍ ນິສ຺ສາຍ ທິຏ຺ເຐວ ຘມ຺ເມ ອມຕປຣິໂຍສານຕໍ ອນຠິສມ຺ຠຸຓນ຺ໂຕ ສຸຄຕິປຣາຍໂນ ໂຫຕີຕິ.

ອຍໍ ອາຫາເຣ ປຏິກ຺ກູລສຎ຺ຎາຠາວນາຍ ວິຕ຺ຖາຣກຖາ.

ຈຕຸຘາຕຸວວຕ຺ຖານຠາວນາ

໓໐໖. ອິທານິ ອາຫາເຣ ປຏິກ຺ກູລສຎ຺ຎານນ຺ຕຣໍ ເອກໍ ວວຕ຺ຖານນ຺ຕິ ເອວໍ ອຸທ຺ທິຏ຺ຐສ຺ສ ຈຕຸຘາຕຸວວຕ຺ຖານສ຺ສ ຠາວນານິທ຺ເທໂສ ອນຸປ຺ປຕ຺ໂຕ. ຕຕ຺ຖ ວວຕ຺ຖານນ຺ຕິ ສຠາວູປລກ຺ຂຓວເສນ ສນ຺ນິຏ຺ຐານໍ, ຈຕຸນ຺ນໍ ຘາຕູນໍ ວວຕ຺ຖານໍ ຈຕຸຘາຕຸວວຕ຺ຖານໍ. ຘາຕຸມນສິກາໂຣ, ຘາຕຸກມ຺ມຏ຺ຐານໍ, ຈຕຸຘາຕຸວວຕ຺ຖານນ຺ຕິ ອຕ຺ຖໂຕ ເອກໍ. ຕຍິທໍ ທ຺ວິຘາ ອາຄຕໍ ສງ຺ເຂປໂຕ ຈ ວິຕ຺ຖາຣໂຕ ຈ. ສງ຺ເຂປໂຕ ມຫາສຕິປຏ຺ຐາເນ ອາຄຕໍ. ວິຕ຺ຖາຣໂຕ ມຫາຫຕ຺ຖິປທູປເມ ຣາຫຸໂລວາເທ ຘາຕຸວິຠງ຺ເຄ ຈ. ຕຎ຺ຫິ –

‘‘ເສຍ຺ຍຖາປິ, ຠິກ຺ຂເວ, ທກ຺ໂຂ ໂຄຆາຕໂກ ວາ ໂຄຆາຕກນ຺ເຕວາສີ ວາ ຄາວິໍ ວຘິຕ຺ວາ ຈຕຸມຫາປເຖ ພິລໂສ ວິຠຊິຕ຺ວາ ນິສິນ຺ໂນ ອສ຺ສ, ເອວເມວ ໂຂ, ຠິກ຺ຂເວ, ຠິກ຺ຂຸ ອິມເມວ ກາຍໍ ຍຖາຐິຕໍ ຍຖາປຓິຫິຕໍ ຘາຕຸໂສ ປຈ຺ຈເວກ຺ຂຕິ, ອຕ຺ຖິ ອິມສ຺ມິໍ ກາເຍ ປຖວີຘາຕຸ ອາໂປຘາຕຸ ເຕໂຊຘາຕຸ ວາໂຍຘາຕູ’’ຕິ –

ເອວໍ ຕິກ຺ຂປຎ຺ຎສ຺ສ ຘາຕຸກມ຺ມຏ຺ຐານິກສ຺ສ ວເສນ ມຫາສຕິປຏ຺ຐາເນ (ທີ. ນິ. ໒.໓໗໘) ສງ຺ເຂປໂຕ ອາຄຕໍ.

ຕສ຺ສຕ຺ໂຖ – ຍຖາ ເຉໂກ ໂຄຆາຕໂກ ວາ ຕສ຺ເສວ ວາ ຠຕ຺ຕເວຕນຠໂຕ ອນ຺ເຕວາສິໂກ ຄາວິໍ ວຘິຕ຺ວາ ວິນິວິຊ຺ຌິຕ຺ວາ ຈຕສ຺ໂສ ທິສາ ຄຕານໍ ມຫາປຖານໍ ເວມຊ຺ຌຏ຺ຐານສງ຺ຂາເຕ ຈຕຸມຫາປເຖ ໂກຏ຺ຐາສໍ ກຕ຺ວາ ນິສິນ຺ໂນ ອສ຺ສ, ເອວເມວ ຠິກ຺ຂຸ ຈຕຸນ຺ນໍ ອິຣິຍາປຖານໍ ເຍນ ເກນຈິ ອາກາເຣນ ຐິຕຕ຺ຕາ ຍຖາຐິຕໍ. ຍຖາຐິຕຕ຺ຕາວ ຍຖາປຓິຫິຕໍ ກາຍໍ ອຕ຺ຖິ ອິມສ຺ມິໍ ກາເຍ ປຖວີຘາຕຸ…ເປ… ວາໂຍຘາຕູຕິ ເອວໍ ຘາຕຸໂສ ປຈ຺ຈເວກ຺ຂຕິ.

ກິໍ ວຸຕ຺ຕໍ ໂຫຕິ? ຍຖາ ໂຄຆາຕກສ຺ສ ຄາວິໍ ໂປເສນ຺ຕສ຺ສປິ ອາຆາຕນໍ ອາຫຣນ຺ຕສ຺ສປິ ອາຫຣິຕ຺ວາ ຕຕ຺ຖ ພນ຺ຘິຕ຺ວາ ຐເປນ຺ຕສ຺ສປິ ວຘນ຺ຕສ຺ສປິ ວຘິຕໍ ມຕໍ ປສ຺ສນ຺ຕສ຺ສປິ ຕາວເທວ ຄາວີຕິສຎ຺ຎາ ນ ອນ຺ຕຣຘາຍຕິ, ຍາວ ນໍ ປທາເລຕ຺ວາ ພິລໂສ ນ ວິຠຊຕິ. ວິຠຊິຕ຺ວາ ນິສິນ຺ນສ຺ສ ປນ ຄາວີສຎ຺ຎາ ອນ຺ຕຣຘາຍຕິ, ມໍສສຎ຺ຎາ ປວຕ຺ຕຕິ. ນາສ຺ສ ເອວໍ ໂຫຕິ ‘‘ອຫໍ ຄາວິໍ ວິກ຺ກິຓາມິ, ອິເມ ຄາວິໍ ຫຣນ຺ຕີ’’ຕິ. ອຖ ຂ຺ວສ຺ສ ‘‘ອຫໍ ມໍສໍ ວິກ຺ກິຓາມິ, ອິເມປິ ມໍສໍ ຫຣນ຺ຕິ’’ຈ຺ເຈວ ໂຫຕິ, ເອວເມວ ອິມສ຺ສາປິ ຠິກ຺ຂຸໂນ ປຸພ຺ເພ ພາລປຸຖຸຊ຺ຊນກາເລ ຄິຫິຠູຕສ຺ສປິ ປພ຺ພຊິຕສ຺ສປິ ຕາວເທວ ສຕ຺ໂຕຕິ ວາ ໂປໂສຕິ ວາ ປຸຄ຺ຄໂລຕິ ວາ ສຎ຺ຎາ ນ ອນ຺ຕຣຘາຍຕິ, ຍາວ ອິມເມວ ກາຍໍ ຍຖາຐິຕໍ ຍຖາປຓິຫິຕໍ ຆນວິນິພ຺ໂຠຄໍ ກຕ຺ວາ ຘາຕຸໂສ ນ ປຈ຺ຈເວກ຺ຂຕິ. ຘາຕຸໂສ ປຈ຺ຈເວກ຺ຂໂຕ ປນ ສຕ຺ຕສຎ຺ຎາ ອນ຺ຕຣຘາຍຕິ, ຘາຕຸວເສເນວ ຈິຕ຺ຕໍ ສນ຺ຕິຏ຺ຐຕິ. ເຕນາຫ ຠຄວາ ‘‘ເສຍ຺ຍຖາປິ, ຠິກ຺ຂເວ, ທກ຺ໂຂ ໂຄຆາຕໂກ ວາ…ເປ… ນິສິນ຺ໂນ ອສ຺ສ, ເອວເມວ ໂຂ, ຠິກ຺ຂເວ, ຠິກ຺ຂຸ…ເປ… ວາໂຍຘາຕູ’’ຕິ.

໓໐໗. ມຫາຫຕ຺ຖິປທູປເມ (ມ. ນິ. ໑.໓໐໐ ອາທໂຍ) ປນ – ‘‘ກຕມາ ຈາວຸໂສ, ອຊ຺ຌຕ຺ຕິກາ ປຖວີຘາຕຸ? ຍໍ ອຊ຺ຌຕ຺ຕໍ ປຈ຺ຈຕ຺ຕໍ ກກ຺ຂຬໍ ຂຣິຄຕໍ ອຸປາທິນ຺ນໍ. ເສຍ຺ຍຖິທໍ, ເກສາ ໂລມາ…ເປ… ອຸທຣິຍໍ ກຣີສໍ, ຍໍ ວາ ປນຎ຺ຎມ຺ປິ ກິຎ຺ຈິ ອຊ຺ຌຕ຺ຕໍ ປຈ຺ຈຕ຺ຕໍ ກກ຺ຂຬໍ ຂຣິຄຕໍ ອຸປາທິນ຺ນໍ, ອຍໍ ວຸຈ຺ຈຕິ, ອາວຸໂສ, ອຊ຺ຌຕ຺ຕິກາ ປຖວີຘາຕູ’’ຕິ ຈ,

‘‘ກຕມາ ຈາວຸໂສ, ອຊ຺ຌຕ຺ຕິກາ ອາໂປຘາຕຸ? ຍໍ ອຊ຺ຌຕ຺ຕໍ ປຈ຺ຈຕ຺ຕໍ ອາໂປ ອາໂປຄຕໍ ອຸປາທິນ຺ນໍ. ເສຍ຺ຍຖິທໍ, ປິຕ຺ຕໍ…ເປ… ມຸຕ຺ຕໍ, ຍໍ ວາ ປນຎ຺ຎມ຺ປິ ກິຎ຺ຈິ ອຊ຺ຌຕ຺ຕໍ ປຈ຺ຈຕ຺ຕໍ ອາໂປ ອາໂປຄຕໍ ອຸປາທິນ຺ນໍ, ອຍໍ ວຸຈ຺ຈຕາວຸໂສ, ອຊ຺ຌຕ຺ຕິກາ ອາໂປຘາຕູ’’ຕິ ຈ,

‘‘ກຕມາ ຈາວຸໂສ, ອຊ຺ຌຕ຺ຕິກາ ເຕໂຊຘາຕຸ? ຍໍ ອຊ຺ຌຕ຺ຕໍ ປຈ຺ຈຕ຺ຕໍ ເຕໂຊ ເຕໂຊຄຕໍ ອຸປາທິນ຺ນໍ. ເສຍ຺ຍຖິທໍ, ເຍນ ຈ ສນ຺ຕປ຺ປຕິ, ເຍນ ຈ ຊີຣີຍຕິ, ເຍນ ຈ ປຣິຑຍ຺ຫຕິ, ເຍນ ຈ ອສິຕປີຕຂາຍິຕສາຍິຕໍ ສມ຺ມາ ປຣິຓາມໍ ຄຈ຺ຉຕິ, ຍໍ ວາ ປນຎ຺ຎມ຺ປິ ກິຎ຺ຈິ ອຊ຺ຌຕ຺ຕໍ ປຈ຺ຈຕ຺ຕໍ ເຕໂຊ ເຕໂຊຄຕໍ ອຸປາທິນ຺ນໍ, ອຍໍ ວຸຈ຺ຈຕາວຸໂສ, ອຊ຺ຌຕ຺ຕິກາ ເຕໂຊຘາຕູ’’ຕິ ຈ,

‘‘ກຕມາ ຈາວຸໂສ, ອຊ຺ຌຕ຺ຕິກາ ວາໂຍຘາຕຸ? ຍໍ ອຊ຺ຌຕ຺ຕໍ ປຈ຺ຈຕ຺ຕໍ ວາໂຍ ວາໂຍຄຕໍ ອຸປາທິນ຺ນໍ. ເສຍ຺ຍຖິທໍ, ອຸທ຺ຘງ຺ຄມາ ວາຕາ, ອໂຘຄມາ ວາຕາ, ກຸຈ຺ຉິສຍາ ວາຕາ, ໂກຏ຺ຐາສຍາ ວາຕາ, ອງ຺ຄມງ຺ຄານຸສາຣິໂນ ວາຕາ, ອສ຺ສາໂສ ປສ຺ສາໂສ ອິຕິ ວາ, ຍໍ ວາ ປນຎ຺ຎມ຺ປິ ກິຎ຺ຈິ ອຊ຺ຌຕ຺ຕໍ ປຈ຺ຈຕ຺ຕໍ ວາໂຍ ວາໂຍຄຕໍ ອຸປາທິນ຺ນໍ, ອຍໍ ວຸຈ຺ຈຕາວຸໂສ, ອຊ຺ຌຕ຺ຕິກາ ວາໂຍຘາຕູ’’ຕິ ຈ –

ເອວໍ ນາຕິຕິກ຺ຂປຎ຺ຎສ຺ສ ຘາຕຸກມ຺ມຏ຺ຐານິກສ຺ສ ວເສນ ວິຕ຺ຖາຣໂຕ ອາຄຕໍ. ຍຖາ ເຈຕ຺ຖ, ເອວໍ ຣາຫຸໂລວາທຘາຕຸວິຠງ຺ເຄສຸປິ.

ຕຕ຺ຣາຍໍ ອນຸຕ຺ຕານປທວຓ຺ຓນາ, ອຊ຺ຌຕ຺ຕໍ ປຈ຺ຈຕ຺ຕນ຺ຕິ ອິທໍ ຕາວ ອຸຠຍມ຺ປິ ນິຍກສ຺ສ ອຘິວຈນໍ. ນິຍກໍ ນາມ ອຕ຺ຕນິ ຊາຕໍ ສສນ຺ຕານປຣິຍາປນ຺ນນ຺ຕິ ອຕ຺ໂຖ. ຕຍິທໍ ຍຖາ ໂລເກ ອິຕ຺ຖີສຸ ກຖາ ອຘິຕ຺ຖີຕິ ວຸຈ຺ຈຕິ, ເອວໍ ອຕ຺ຕນິ ປວຕ຺ຕຕ຺ຕາ ອຊ຺ຌຕ຺ຕໍ, ອຕ຺ຕານໍ ປຏິຈ຺ຈ ປຏິຈ຺ຈ ປວຕ຺ຕຕ຺ຕາ ປຈ຺ຈຕ຺ຕນ຺ຕິປິ ວຸຈ຺ຈຕິ. ກກ຺ຂຬນ຺ຕິ ຖທ຺ຘໍ. ຂຣິຄຕນ຺ຕິ ຜຣຸສໍ. ຕຕ຺ຖ ປຐມໍ ລກ຺ຂຓວຈນໍ, ທຸຕິຍໍ ອາກາຣວຈນໍ, ກກ຺ຂຬລກ຺ຂຓາ ຫິ ປຖວີຘາຕຸ, ສາ ຜຣຸສາກາຣາ ໂຫຕິ, ຕສ຺ມາ ຂຣິຄຕນ຺ຕິ ວຸຕ຺ຕາ. ອຸປາທິນ຺ນນ຺ຕິ ທຬ຺ຫໍ ອາທິນ຺ນໍ, ອຫໍ ມມນ຺ຕິ ເອວໍ ທຬ຺ຫໍ ອາທິນ຺ນໍ, ຄຫິຕໍ ປຣາມຏ຺ຐນ຺ຕິ ອຕ຺ໂຖ. ເສຍ຺ຍຖິທນ຺ຕິ ນິປາໂຕ. ຕສ຺ສ ຕໍ ກຕມນ຺ຕິ ເຈຕິ ອຕ຺ໂຖ. ຕໂຕ ຕໍ ທສ຺ເສນ຺ໂຕ ‘‘ເກສາ ໂລມາ’’ຕິອາທິມາຫ. ເອຕ຺ຖ ຈ ມຕ຺ຖລຸງ຺ຄໍ ປກ຺ຂິປິຕ຺ວາ ວີສຕິຍາ ອາກາເຣຫິ ປຖວີຘາຕຸ ນິທ຺ທິຏ຺ຐາຕິ ເວທິຕພ຺ພາ. ຍໍ ວາ ປນຎ຺ຎມ຺ປິ ກິຎ຺ຈີຕິ ອວເສເສສຸ ຕີສຸ ໂກຏ຺ຐາເສສຸ ປຖວີຘາຕຸ ສງ຺ຄຫິຕາ.

ວິສ຺ສນ຺ທນຠາເວນ ຕໍ ຕໍ ຐານໍ ອປ຺ໂປຕີຕິ ອາໂປ. ກມ຺ມສມຸຏ຺ຐານາທິວເສນ ນານາວິເຘສຸ ອາເປສຸ ຄຕນ຺ຕິ ອາໂປຄຕໍ. ກິໍ ຕໍ? ອາໂປຘາຕຸຍາ ອາພນ຺ຘນລກ຺ຂຓໍ.

ເຕຊນວເສນ ເຕໂຊ, ວຸຕ຺ຕນເຍເນວ ເຕເຊສຸ ຄຕນ຺ຕິ ເຕໂຊຄຕໍ. ກິໍ ຕໍ? ອຸຓ຺ຫຕ຺ຕລກ຺ຂຓໍ. ເຍນ ຈາຕິ ເຍນ ເຕໂຊຘາຕຸຄເຕນ ກຸປິເຕນ ອຍໍ ກາໂຍ ສນ຺ຕປ຺ປຕິ, ເອກາຫິກຊຣາທິຠາເວນ ອຸສຸມຊາໂຕ ໂຫຕິ. ເຍນ ຈ ຊີຣີຍຕີຕິ ເຍນ ອຍໍ ກາໂຍ ຊີຣຕິ, ອິນ຺ທ຺ຣິຍເວກລ຺ລຕໍ ພລປຣິກ຺ຂຍໍ ວລິປລິຕາທິຠາວຎ຺ຈ ປາປຸຓາຕິ. ເຍນ ຈ ປຣິຑຍ຺ຫຕີຕິ ເຍນ ກຸປິເຕນ ອຍໍ ກາໂຍ ຑຍ຺ຫຕິ. ໂສ ຈ ປຸຄ຺ຄໂລ ‘‘ຑຍ຺ຫາມິ ຑຍ຺ຫາມີ’’ຕິ ກນ຺ທນ຺ໂຕ ສຕໂຘຕສປ຺ປິໂຄສີສຈນ຺ທນາທິເລປຎ຺ເຈວ ຕາລວຓ຺ຏວາຕຎ຺ຈ ປຈ຺ຈາສີສຕິ. ເຍນ ຈ ອສິຕປີຕຂາຍິຕສາຍິຕໍ ສມ຺ມາ ປຣິຓາມໍ ຄຈ຺ຉຕີຕິ ເຍເນຕໍ ອສິຕໍ ວາ ໂອທນາທິ ປີຕໍ ວາ ປານກາທິ ຂາຍິຕໍ ວາ ປິຏ຺ຐຂຊ຺ຊກາທິ ສາຍິຕໍ ວາ ອມ຺ພປກ຺ກມຘຸຜາຓິຕາທິ ສມ຺ມາ ປຣິປາກໍ ຄຈ຺ຉຕິ, ຣສາທິຠາເວນ ວິເວກໍ ຄຈ຺ຉຕີຕິ ອຕ຺ໂຖ. ເອຕ຺ຖ ຈ ປຸຣິມາ ຕໂຍ ເຕໂຊຘາຕຸສມຸຏ຺ຐານາ. ປຈ຺ຉິໂມ ກມ຺ມສມຸຏ຺ຐາໂນວ.

ວາຍນວເສນ ວາໂຍ, ວຸຕ຺ຕນເຍເນວ ວາເຍສຸ ຄຕນ຺ຕິ ວາໂຍຄຕໍ. ກິໍ ຕໍ? ວິຕ຺ຖມ຺ຠນລກ຺ຂຓໍ. ອຸທ຺ຘງ຺ຄມາ ວາຕາຕິ ອຸຄ຺ຄາຣຫິກ຺ກາທິປວຕ຺ຕກາ ອຸທ຺ຘໍ ອາໂຣຫຓວາຕາ. ອໂຘຄມາ ວາຕາຕິ ອຸຈ຺ຈາຣປສ຺ສາວາທິນີຫຣຓກາ ອໂຘ ໂອໂຣຫຓວາຕາ. ກຸຈ຺ຉິສຍາ ວາຕາຕິ ອນ຺ຕານໍ ພຫິວາຕາ. ໂກຏ຺ຐາສຍາ ວາຕາຕິ ອນ຺ຕານໍ ອນ຺ໂຕວາຕາ. ອງ຺ຄມງ຺ຄານຸສາຣິໂນ ວາຕາຕິ ຘມນິຊາລານຸສາເຣນ ສກລສຣີເຣ ອງ຺ຄມງ຺ຄານິ ອນຸສຏາ ສມິຎ຺ຊນປສາຣຓາທິນິພ຺ພຕ຺ຕກາ ວາຕາ. ອສ຺ສາໂສຕິ ອນ຺ໂຕປວິສນນາສິກວາໂຕ. ປສ຺ສາໂສຕິ ພຫິນິກ຺ຂມນນາສິກວາໂຕ. ເອຕ຺ຖ ຈ ປຸຣິມາ ປຎ຺ຈ ຈຕຸສມຸຏ຺ຐານາ. ອສ຺ສາສປສ຺ສາສາ ຈິຕ຺ຕສມຸຏ຺ຐານາວ. ສພ຺ພຕ຺ຖ ຍໍ ວາ ປນຎ຺ຎມ຺ປິ ກິຎ຺ຈີຕິ ອິມິນາ ປເທນ ອວເສສໂກຏ຺ຐາເສສຸ ອາໂປຘາຕຸອາທໂຍ ສງ຺ຄຫິຕາ.

ອິຕິ ວີສຕິຍາ ອາກາເຣຫິ ປຖວີຘາຕຸ, ທ຺ວາທສຫິ ອາໂປຘາຕຸ, ຈຕູຫິ ເຕໂຊຘາຕຸ, ຉຫິ ວາໂຍຘາຕູຕິ ທ຺ວາຈຕ຺ຕາລີສາຍ ອາກາເຣຫິ ຈຕສ຺ໂສ ຘາຕຸໂຍ ວິຕ຺ຖາຣິຕາ ໂຫນ຺ຕີຕິ ອຍໍ ຕາເວຕ຺ຖ ປາຬິວຓ຺ຓນາ.

໓໐໘. ຠາວນານເຍ ປເນຕ຺ຖ ຕິກ຺ຂປຎ຺ຎສ຺ສ ຠິກ຺ຂຸໂນ ເກສາ ປຖວີຘາຕຸ, ໂລມາ ປຖວີຘາຕູຕິ ເອວໍ ວິຕ຺ຖາຣໂຕ ຘາຕຸປຣິຄ຺ຄໂຫ ປປຎ຺ຈໂຕ ອຸປຏ຺ຐາຕິ. ຍໍ ຖທ຺ຘລກ຺ຂຓໍ, ອຍໍ ປຖວີຘາຕຸ. ຍໍ ອາພນ຺ຘນລກ຺ຂຓໍ, ອຍໍ ອາໂປຘາຕຸ. ຍໍ ປຣິປາຈນລກ຺ຂຓໍ, ອຍໍ ເຕໂຊຘາຕຸ. ຍໍ ວິຕ຺ຖມ຺ຠນລກ຺ຂຓໍ, ອຍໍ ວາໂຍຘາຕູຕິ ເອວໍ ມນສິກໂຣໂຕ ປນສ຺ສ ກມ຺ມຏ຺ຐານໍ ປາກຏໍ ໂຫຕິ. ນາຕິຕິກ຺ຂປຎ຺ຎສ຺ສ ປນ ເອວໍ ມນສິກໂຣໂຕ ອນ຺ຘກາຣໍ ອວິຠູຕໍ ໂຫຕິ. ປຸຣິມນເຍນ ວິຕ຺ຖາຣໂຕ ມນສິກໂຣນ຺ຕສ຺ສ ປາກຏໍ ໂຫຕິ.

ກຖໍ? ຍຖາ ທ຺ວີສຸ ຠິກ຺ຂູສຸ ພຫຸເປຍ຺ຍາລໍ ຕນ຺ຕິໍ ສຊ຺ຌາຍນ຺ເຕສຸ ຕິກ຺ຂປຎ຺ໂຎ ຠິກ຺ຂຸ ສກິໍ ວາ ທ຺ວິກ຺ຂຕ຺ຕຸໍ ວາ ເປຍ຺ຍາລມຸຂໍ ວິຕ຺ຖາເຣຕ຺ວາ ຕໂຕ ປຣໍ ອຸຠໂຕໂກຏິວເສເນວ ສຊ຺ຌາຍໍ ກໂຣນ຺ໂຕ ຄຈ຺ຉຕິ. ຕຕ຺ຣ ນາຕິຕິກ຺ຂປຎ຺ໂຎ ເອວໍ ວຕ຺ຕາ ໂຫຕິ ‘‘ກິໍ ສຊ຺ຌາໂຍ ນາເມສ ໂອຏ຺ຐປຣິຍາຫຕມຕ຺ຕໍ ກາຕຸໍ ນ ເທຕິ, ເອວໍ ສຊ຺ຌາເຍ ກຣິຍມາເນ ກທາ ຕນ຺ຕິ ປຄຸຓາ ຠວິສ຺ສຕີ’’ຕິ. ໂສ ອາຄຕາຄຕໍ ເປຍ຺ຍາລມຸຂໍ ວິຕ຺ຖາເຣຕ຺ວາວ ສຊ຺ຌາຍໍ ກໂຣຕິ. ຕເມນໍ ອິຕໂຣ ເອວມາຫ – ‘‘ກິໍ ສຊ຺ຌາໂຍ ນາເມສ ປຣິໂຍສານໍ ຄນ຺ຕຸໍ ນ ເທຕິ, ເອວໍ ສຊ຺ຌາເຍ ກຣິຍມາເນ ກທາ ຕນ຺ຕິ ປຣິໂຍສານໍ ຄມິສ຺ສຕີ’’ຕິ. ເອວເມວ ຕິກ຺ຂປຎ຺ຎສ຺ສ ເກສາທິວເສນ ວິຕ຺ຖາຣໂຕ ຘາຕຸປຣິຄ຺ຄໂຫ ປປຎ຺ຈໂຕ ອຸປຏ຺ຐາຕິ. ຍໍ ຖທ຺ຘລກ຺ຂຓໍ, ອຍໍ ປຖວີຘາຕູຕິອາທິນາ ນເຍນ ສງ຺ເຂປໂຕ ມນສິກໂຣໂຕ ກມ຺ມຏ຺ຐານໍ ປາກຏໍ ໂຫຕິ. ອິຕຣສ຺ສ ຕຖາ ມນສິກໂຣໂຕ ອນ຺ຘກາຣໍ ອວິຠູຕໍ ໂຫຕິ. ເກສາທິວເສນ ວິຕ຺ຖາຣໂຕ ມນສິກໂຣນ຺ຕສ຺ສ ປາກຏໍ ໂຫຕິ.

ຕສ຺ມາ ອິມໍ ກມ຺ມຏ຺ຐານໍ ຠາເວຕຸກາເມນ ຕິກ຺ຂປຎ຺ເຎນ ຕາວ ຣໂຫຄເຕນ ປຏິສລ຺ລີເນນ ສກລມ຺ປິ ອຕ຺ຕໂນ ຣູປກາຍໍ ອາວຊ຺ເຊຕ຺ວາ ໂຍ ອິມສ຺ມິໍ ກາເຍ ຖທ຺ຘຠາໂວ ວາ ຂຣຠາໂວ ວາ, ອຍໍ ປຖວີຘາຕຸ. ໂຍ ອາພນ຺ຘນຠາໂວ ວາ ທ຺ຣວຠາໂວ ວາ, ອຍໍ ອາໂປຘາຕຸ. ໂຍ ປຣິປາຈນຠາໂວ ວາ ອຸຓ຺ຫຠາໂວ ວາ, ອຍໍ ເຕໂຊຘາຕຸ. ໂຍ ວິຕ຺ຖມ຺ຠນຠາໂວ ວາ ສມຸທີຣຓຠາໂວ ວາ, ອຍໍ ວາໂຍຘາຕູຕິ ເອວໍ ສໍຂິຕ຺ເຕນ ຘາຕຸໂຍ ປຣິຄ຺ຄເຫຕ຺ວາ ປຸນປ຺ປຸນໍ ປຖວີຘາຕຸ ອາໂປຘາຕູຕິ ຘາຕຸມຕ຺ຕໂຕ ນິສ຺ສຕ຺ຕໂຕ ນິຊ຺ຊີວໂຕ ອາວຊ຺ຊິຕພ຺ພໍ ມນສິກາຕພ຺ພໍ ປຈ຺ຈເວກ຺ຂິຕພ຺ພໍ. ຕສ຺ເສວໍ ວາຍມມານສ຺ສ ນຈິເຣເນວ ຘາຕຸປ຺ປເຠທາວຠາສນປຎ຺ຎາປຣິຄ຺ຄຫິໂຕ ສຠາວຘມ຺ມາຣມ຺ມຓຕ຺ຕາ ອປ຺ປນໍ ອປ຺ປຕ຺ໂຕ ອຸປຈາຣມຕ຺ໂຕ ສມາຘິ ອຸປ຺ປຊ຺ຊຕິ.

ອຖ ວາ ປນ ເຍ ອິເມ ຈຕຸນ຺ນໍ ມຫາຠູຕານໍ ນິສ຺ສຕ຺ຕຠາວທສ຺ສນຕ຺ຖໍ ຘມ຺ມເສນາປຕິນາ ‘‘ອຏ຺ຐິຎ຺ຈ ປຏິຈ຺ຈ ນ຺ຫາຣຸຎ຺ຈ ປຏິຈ຺ຈ ມໍສຎ຺ຈ ປຏິຈ຺ຈ ຈມ຺ມຎ຺ຈ ປຏິຈ຺ຈ ອາກາໂສ ປຣິວາຣິໂຕ ຣູປນ຺ຕ຺ເວວ ສງ຺ຂໍ ຄຈ຺ຉຕີ’’ຕິ (ມ. ນິ. ໑.໓໐໖) ຈຕ຺ຕາໂຣ ໂກຏ຺ຐາສາ ວຸຕ຺ຕາ. ເຕສຸ ຕໍ ຕໍ ອນ຺ຕຣານຸສາຣິນາ ຎາຓຫຕ຺ເຖນ ວິນິພ຺ຠຸຊິຕ຺ວາ ວິນິພ຺ຠຸຊິຕ຺ວາ ໂຍ ເອເຕສຸ ຖທ຺ຘຠາໂວ ວາ ຂຣຠາໂວ ວາ, ອຍໍ ປຖວີຘາຕູຕິ ປຸຣິມນເຍເນວ ຘາຕຸໂຍ ປຣິຄ຺ຄເຫຕ຺ວາ ປຸນປ຺ປຸນໍ ປຖວີຘາຕຸ ອາໂປຘາຕູຕິ ຘາຕຸມຕ຺ຕໂຕ ນິສ຺ສຕ຺ຕໂຕ ນິຊ຺ຊີວໂຕ ອາວຊ຺ຊິຕພ຺ພໍ ມນສິກາຕພ຺ພໍ ປຈ຺ຈເວກ຺ຂິຕພ຺ພໍ. ຕສ຺ເສວໍ ວາຍມມານສ຺ສ ນຈິເຣເນວ ຘາຕຸປ຺ປເຠທາວຠາສນປຎ຺ຎາປຣິຄ຺ຄຫິໂຕ ສຠາວຘມ຺ມາຣມ຺ມຓຕ຺ຕາ ອປ຺ປນໍ ອປ຺ປຕ຺ໂຕ ອຸປຈາຣມຕ຺ໂຕ ສມາຘິ ອຸປ຺ປຊ຺ຊຕິ. ອຍໍ ສງ຺ເຂປໂຕ ອາຄເຕ ຈຕຸຘາຕຸວວຕ຺ຖາເນ ຠາວນານໂຍ.

໓໐໙. ວິຕ຺ຖາຣໂຕ ອາຄເຕ ປນ ເອວໍ ເວທິຕພ຺ໂພ. ອິທໍ ກມ຺ມຏ຺ຐານໍ ຠາເວຕຸກາເມນ ຫິ ນາຕິຕິກ຺ຂປຎ຺ເຎນ ໂຍຄິນາ ອາຈຣິຍສນ຺ຕິເກ ທ຺ວາຈຕ຺ຕາລີສາຍ ອາກາເຣຫິ ວິຕ຺ຖາຣໂຕ ຘາຕຸໂຍ ອຸຄ຺ຄຓ຺ຫິຕ຺ວາ ວຸຕ຺ຕປ຺ປກາເຣ ເສນາສເນ ວິຫຣນ຺ເຕນ ກຕສພ຺ພກິຈ຺ເຈນ ຣໂຫຄເຕນ ປຏິສລ຺ລີເນນ ສສມ຺ຠາຣສງ຺ເຂປໂຕ, ສສມ຺ຠາຣວິຠຕ຺ຕິໂຕ, ສລກ຺ຂຓສງ຺ເຂປໂຕ, ສລກ຺ຂຓວິຠຕ຺ຕິໂຕຕິ ເອວໍ ຈຕູຫາກາເຣຫິ ກມ຺ມຏ຺ຐານໍ ຠາເວຕພ຺ພໍ.

ຕຕ຺ຖ ກຖໍ ສສມ຺ຠາຣສງ຺ເຂປໂຕ ຠາເວຕິ? ອິຘ ຠິກ຺ຂຸ ວີສຕິຍາ ໂກຏ຺ຐາເສສຸ ຖທ຺ຘາກາຣໍ ປຖວີຘາຕູຕິ ວວຕ຺ຖເປຕິ. ທ຺ວາທສສຸ ໂກຏ຺ຐາເສສຸ ຍູສຄຕໍ ອຸທກສງ຺ຂາຕໍ ອາພນ຺ຘນາກາຣໍ ອາໂປຘາຕູຕິ ວວຕ຺ຖເປຕິ. ຈຕູສຸ ໂກຏ຺ຐາເສສຸ ປຣິປາຈນກໍ ເຕຊໍ ເຕໂຊຘາຕູຕິ ວວຕ຺ຖເປຕິ. ຉສຸ ໂກຏ຺ຐາເສສຸ ວິຕ຺ຖມ຺ຠນາກາຣໍ ວາໂຍຘາຕູຕິ ວວຕ຺ຖເປຕິ. ຕສ຺ເສວໍ ວວຕ຺ຖາປຍໂຕເຍວ ຘາຕຸໂຍ ປາກຏາ ໂຫນ຺ຕິ. ຕາ ປຸນປ຺ປຸນໍ ອາວຊ຺ຊໂຕ ມນສິກໂຣໂຕ ວຸຕ຺ຕນເຍເນວ ອຸປຈາຣສມາຘິ ອຸປ຺ປຊ຺ຊຕິ.

໓໑໐. ຍສ຺ສ ປນ ເອວໍ ຠາວຍໂຕ ກມ຺ມຏ຺ຐານໍ ນ ອິຊ຺ຌຕິ, ເຕນ ສສມ຺ຠາຣວິຠຕ຺ຕິໂຕ ຠາເວຕພ຺ພໍ. ກຖໍ? ເຕນ ຫິ ຠິກ຺ຂຸນາ ຍໍ ຕໍ ກາຍຄຕາສຕິກມ຺ມຏ຺ຐານນິທ຺ເທເສ ສຕ຺ຕຘາ ອຸຄ຺ຄຫໂກສລ຺ລໍ ທສຘາ ມນສິກາຣໂກສລ຺ລຎ຺ຈ ວຸຕ຺ຕໍ. ທ຺ວຕ຺ຕິໍສາກາເຣ ຕາວ ຕໍ ສພ຺ພໍ ອປຣິຫາເປຕ຺ວາ ຕຈປຎ຺ຈກາທີນໍ ອນຸໂລມປຏິໂລມໂຕ ວຈສາ ສຊ຺ຌາຍໍ ອາທິໍກຕ຺ວາ ສພ຺ພໍ ຕຕ຺ຖ ວຸຕ຺ຕວິຘານໍ ກາຕພ຺ພໍ. ອຍເມວ ຫິ ວິເສໂສ, ຕຕ຺ຖ ວຓ຺ຓສຓ຺ຐານທິໂສກາສປຣິຈ຺ເຉທວເສນ ເກສາທໂຍ ມນສິກຣິຕ຺ວາປິ ປຏິກ຺ກູລວເສນ ຈິຕ຺ຕໍ ຐເປຕພ຺ພໍ, ອິຘ ຘາຕຸວເສນ. ຕສ຺ມາ ວຓ຺ຓາທິວເສນ ປຎ຺ຈຘາ ປຎ຺ຈຘາ ເກສາທໂຍ ມນສິກຣິຕ຺ວາ ອວສາເນ ເອວໍ ມນສິກາໂຣ ປວຕ຺ເຕຕພ຺ໂພ.

໓໑໑. ອິເມ ເກສາ ນາມ ສີສກຏາຫປລິເວຐນຈມ຺ເມ ຊາຕາ. ຕຕ຺ຖ ຍຖາວມ຺ມິກມຕ຺ຖເກ ຊາເຕສຸ ກຸຓ຺ຐຕິເຓສຸ ນ ວມ຺ມິກມຕ຺ຖໂກ ຊານາຕິ ມຍິ ກຸຓ຺ຐຕິຓານິ ຊາຕານີຕິ, ນປິ ກຸຓ຺ຐຕິຓານິ ຊານນ຺ຕິ ມຍໍ ວມ຺ມິກມຕ຺ຖເກ ຊາຕານີຕິ, ເອວເມວ ນ ສີສກຏາຫປລິເວຐນຈມ຺ມໍ ຊານາຕິ ມຍິ ເກສາ ຊາຕາຕິ, ນປິ ເກສາ ຊານນ຺ຕິ ມຍໍ ສີສກຏາຫເວຐນຈມ຺ເມ ຊາຕາຕິ, ອຎ຺ຎມຎ຺ຎໍ ອາໂຠຄປຈ຺ຈເວກ຺ຂຓຣຫິຕາ ເອເຕ ຘມ຺ມາ. ອິຕິ ເກສາ ນາມ ອິມສ຺ມິໍ ສຣີເຣ ປາຏິເຍກ຺ໂກ ໂກຏ຺ຐາໂສ ອເຈຕໂນ ອພ຺ຍາກໂຕ ສຸຎ຺ໂຎ ນິສ຺ສຕ຺ໂຕ ຖທ຺ໂຘ ປຖວີຘາຕູຕິ.

໓໑໒. ໂລມາ ສຣີຣເວຐນຈມ຺ເມ ຊາຕາ. ຕຕ຺ຖ ຍຖາ ສຸຎ຺ຎຄາມຏ຺ຐາເນ ຊາເຕສຸ ທພ຺ພຕິຓເກສຸ ນ ສຸຎ຺ຎຄາມຏ຺ຐານໍ ຊານາຕິ ມຍິ ທພ຺ພຕິຓການິ ຊາຕານີຕິ, ນປິ ທພ຺ພຕິຓການິ ຊານນ຺ຕິ ມຍໍ ສຸຎ຺ຎຄາມຏ຺ຐາເນ ຊາຕານີຕິ, ເອວເມວ ນ ສຣີຣເວຐນຈມ຺ມໍ ຊານາຕິ ມຍິ ໂລມາ ຊາຕາຕິ. ນປິ ໂລມາ ຊານນ຺ຕິ ມຍໍ ສຣີຣເວຐນຈມ຺ເມ ຊາຕາຕິ. ອຎ຺ຎມຎ຺ຎໍ ອາໂຠຄປຈ຺ຈເວກ຺ຂຓຣຫິຕາ ເອເຕ ຘມ຺ມາ. ອິຕິ ໂລມາ ນາມ ອິມສ຺ມິໍ ສຣີເຣ ປາຏິເຍກ຺ໂກ ໂກຏ຺ຐາໂສ ອເຈຕໂນ ອພ຺ຍາກໂຕ ສຸຎ຺ໂຎ ນິສ຺ສຕ຺ໂຕ ຖທ຺ໂຘ ປຖວີຘາຕູຕິ.

໓໑໓. ນຂາ ອງ຺ຄຸລີນໍ ອຄ຺ເຄສຸ ຊາຕາ. ຕຕ຺ຖ ຍຖາ ກຸມາຣເກສຸ ທຓ຺ຑເກຫິ ມຘຸກຏ຺ຐິເກ ວິຊ຺ຌິຕ຺ວາ ກີຬນ຺ເຕສຸ ນ ທຓ຺ຑກາ ຊານນ຺ຕິ ອມ຺ເຫສຸ ມຘຸກຏ຺ຐິກາ ຐປິຕາຕິ, ນປິ ມຘຸກຏ຺ຐິກາ ຊານນ຺ຕິ ມຍໍ ທຓ຺ຑເກສຸ ຐປິຕາຕິ, ເອວເມວ ນ ອງ຺ຄຸລິໂຍ ຊານນ຺ຕິ ອມ຺ຫາກໍ ອຄ຺ເຄສຸ ນຂາ ຊາຕາຕິ. ນປິ ນຂາ ຊານນ຺ຕິ ມຍໍ ອງ຺ຄຸລີນໍ ອຄ຺ເຄສຸ ຊາຕາຕິ. ອຎ຺ຎມຎ຺ຎໍ ອາໂຠຄປຈ຺ຈເວກ຺ຂຓຣຫິຕາ ເອເຕ ຘມ຺ມາ. ອິຕິ ນຂາ ນາມ ອິມສ຺ມິໍ ສຣີເຣ ປາຏິເຍກ຺ໂກ ໂກຏ຺ຐາໂສ ອເຈຕໂນ ອພ຺ຍາກໂຕ ສຸຎ຺ໂຎ ນິສ຺ສຕ຺ໂຕ ຖທ຺ໂຘ ປຖວີຘາຕູຕິ.

໓໑໔. ທນ຺ຕາ ຫນຸກຏ຺ຐິເກສຸ ຊາຕາ. ຕຕ຺ຖ ຍຖາ ວຑ຺ຒກີຫິ ປາສາຓອຸທຸກ຺ຂລເກສຸ ເກນຈິເທວ ສິເລສຊາເຕນ ພນ຺ຘິຕ຺ວາ ຐປິຕຖມ຺ເຠສຸ ນ ອຸທຸກ຺ຂລາ ຊານນ຺ຕິ ອມ຺ເຫສຸ ຖມ຺ຠາ ຐິຕາຕິ. ນປິ ຖມ຺ຠາ ຊານນ຺ຕິ ມຍໍ ອຸທຸກ຺ຂເລສຸ ຐິຕາຕິ, ເອວເມວ ນ ຫນຸກຏ຺ຐີນິ ຊານນ຺ຕິ ອມ຺ເຫສຸ ທນ຺ຕາ ຊາຕາຕິ. ນປິ ທນ຺ຕາ ຊານນ຺ຕິ ມຍໍ ຫນຸກຏ຺ຐີສຸ ຊາຕາຕິ. ອຎ຺ຎມຎ຺ຎໍ ອາໂຠຄປຈ຺ຈເວກ຺ຂຓຣຫິຕາ ເອເຕ ຘມ຺ມາ. ອິຕິ ທນ຺ຕາ ນາມ ອິມສ຺ມິໍ ສຣີເຣ ປາຏິເຍກ຺ໂກ ໂກຏ຺ຐາໂສ ອເຈຕໂນ ອພ຺ຍາກໂຕ ສຸຎ຺ໂຎ ນິສ຺ສຕ຺ໂຕ ຖທ຺ໂຘ ປຖວີຘາຕູຕິ.

໓໑໕. ຕໂຈ ສກລສຣີຣໍ ປຣິໂຍນນ຺ຘິຕ຺ວາ ຐິໂຕ. ຕຕ຺ຖ ຍຖາ ອລ຺ລໂຄຈມ຺ມປຣິໂຍນທ຺ຘາຍ ມຫາວີຓາຍ ນ ມຫາວີຓາ ຊານາຕິ ອຫໍ ອລ຺ລໂຄຈມ຺ເມນ ປຣິໂຍນທ຺ຘາຕິ. ນປິ ອລ຺ລໂຄຈມ຺ມໍ ຊານາຕິ ມຍາ ມຫາວີຓາ ປຣິໂຍນທ຺ຘາຕິ, ເອວເມວ ນ ສຣີຣໍ ຊານາຕິ ອຫໍ ຕເຈນ ປຣິໂຍນທ຺ຘນ຺ຕິ. ນປິ ຕໂຈ ຊານາຕິ ມຍາ ສຣີຣໍ ປຣິໂຍນທ຺ຘນ຺ຕິ. ອຎ຺ຎມຎ຺ຎໍ ອາໂຠຄປຈ຺ຈເວກ຺ຂຓຣຫິຕາ ເອເຕ ຘມ຺ມາ. ອິຕິ ຕໂຈ ນາມ ອິມສ຺ມິໍ ສຣີເຣ ປາຏິເຍກ຺ໂກ ໂກຏ຺ຐາໂສ ອເຈຕໂນ ອພ຺ຍາກໂຕ ສຸຎ຺ໂຎ ນິສ຺ສຕ຺ໂຕ ຖທ຺ໂຘ ປຖວີຘາຕູຕິ.

໓໑໖. ມໍສໍ ອຏ຺ຐິສງ຺ຆາຏໍ ອນຸລິມ຺ປິຕ຺ວາ ຐິຕໍ. ຕຕ຺ຖ ຍຖາ ມຫາມຕ຺ຕິກລິຕ຺ຕາຍ ຠິຕ຺ຕິຍາ ນ ຠິຕ຺ຕິ ຊານາຕິ ອຫໍ ມຫາມຕ຺ຕິກາຍ ລິຕ຺ຕາຕິ. ນປິ ມຫາມຕ຺ຕິກາ ຊານາຕິ ມຍາ ຠິຕ຺ຕິ ລິຕ຺ຕາຕິ, ເອວເມວ ນ ອຏ຺ຐິສງ຺ຆາໂຏ ຊານາຕິ ອຫໍ ນວເປສິສຕປ຺ປເຠເທນ ມໍເສນ ລິຕ຺ໂຕຕິ. ນປິ ມໍສໍ ຊານາຕິ ມຍາ ອຏ຺ຐິສງ຺ຆາໂຏ ລິຕ຺ໂຕຕິ. ອຎ຺ຎມຎ຺ຎໍ ອາໂຠຄປຈ຺ຈເວກ຺ຂຓຣຫິຕາ ເອເຕ ຘມ຺ມາ. ອິຕິ ມໍສໍ ນາມ ອິມສ຺ມິໍ ສຣີເຣ ປາຏິເຍກ຺ໂກ ໂກຏ຺ຐາໂສ ອເຈຕໂນ ອພ຺ຍາກໂຕ ສຸຎ຺ໂຎ ນິສ຺ສຕ຺ໂຕ ຖທ຺ໂຘ ປຖວີຘາຕູຕິ.

໓໑໗. ນ຺ຫາຣຸ ສຣີຣພ຺ຠນ຺ຕເຣ ອຏ຺ຐີນິ ອາພນ຺ຘມານາ ຐິຕາ. ຕຕ຺ຖ ຍຖາ ວລ຺ລີຫິ ວິນທ຺ເຘສຸ ກຸຏ຺ຏທາຣູສຸ ນ ກຸຏ຺ຏທາຣູນິ ຊານນ຺ຕິ ມຍໍ ວລ຺ລີຫິ ວິນທ຺ຘານີຕິ. ນປິ ວລ຺ລິໂຍ ຊານນ຺ຕິ ອມ຺ເຫຫິ ກຸຏ຺ຏທາຣູນິ ວິນທ຺ຘານີຕິ, ເອວເມວ ນ ອຏ຺ຐີນິ ຊານນ຺ຕິ ມຍໍ ນ຺ຫາຣູຫິ ອາພທ຺ຘານີຕິ. ນປິ ນ຺ຫາຣູ ຊານນ຺ຕິ ອມ຺ເຫຫິ ອຏ຺ຐີນິ ອາພທ຺ຘານີຕິ. ອຎ຺ຎມຎ຺ຎໍ ອາໂຠຄປຈ຺ຈເວກ຺ຂຓຣຫິຕາ ເອເຕ ຘມ຺ມາ. ອິຕິ ນ຺ຫາຣຸ ນາມ ອິມສ຺ມິໍ ສຣີເຣ ປາຏິເຍກ຺ໂກ ໂກຏ຺ຐາໂສ ອເຈຕໂນ ອພ຺ຍາກໂຕ ສຸຎ຺ໂຎ ນິສ຺ສຕ຺ໂຕ ຖທ຺ໂຘ ປຖວີຘາຕູຕິ.

໓໑໘. ອຏ຺ຐີສຸ ປຓ຺ຫິກຏ຺ຐິ ໂຄປ຺ຜກຏ຺ຐິໍ ອຸກ຺ຂິປິຕ຺ວາ ຐິຕໍ. ໂຄປ຺ຜກຏ຺ຐິ ຊງ຺ຆຏ຺ຐິໍ ອຸກ຺ຂິປິຕ຺ວາ ຐິຕໍ. ຊງ຺ຆຏ຺ຐິ ອູຣຸຏ຺ຐິໍ ອຸກ຺ຂິປິຕ຺ວາ ຐິຕໍ. ອູຣຸຏ຺ຐິ ກຏິຏ຺ຐິໍ ອຸກ຺ຂິປິຕ຺ວາ ຐິຕໍ. ກຏິຏ຺ຐິ ປິຏ຺ຐິກຓ຺ຏກໍ ອຸກ຺ຂິປິຕ຺ວາ ຐິຕໍ, ປິຏ຺ຐິກຓ຺ຏໂກ ຄີວຏ຺ຐິໍ ອຸກ຺ຂິປິຕ຺ວາ ຐິໂຕ. ຄີວຏ຺ຐິ ສີສຏ຺ຐິໍ ອຸກ຺ຂິປິຕ຺ວາ ຐິຕໍ. ສີສຏ຺ຐິ ຄີວຏ຺ຐິເກ ປຕິຏ຺ຐິຕໍ. ຄີວຏ຺ຐິ ປິຏ຺ຐິກຓ຺ຏເກ ປຕິຏ຺ຐິຕໍ. ປິຏ຺ຐິກຓ຺ຏໂກ ກຏິຏ຺ຐິມ຺ຫິ ປຕິຏ຺ຐິໂຕ. ກຏິຏ຺ຐິ ອູຣຸຏ຺ຐິເກ ປຕິຏ຺ຐິຕໍ. ອູຣຸຏ຺ຐິ ຊງ຺ຆຏ຺ຐິເກ ປຕິຏ຺ຐິຕໍ. ຊງ຺ຆຏ຺ຐິ ໂຄປ຺ຜກຏ຺ຐິເກ ປຕິຏ຺ຐິຕໍ. ໂຄປ຺ຜກຏ຺ຐິ ປຓ຺ຫິກຏ຺ຐິເກ ປຕິຏ຺ຐິຕໍ.

ຕຕ຺ຖ ຍຖາ ອິຏ຺ຐກທາຣຸໂຄມຍາທິສຎ຺ຈເຍສຸ ນ ເຫຏ຺ຐິມາ ເຫຏ຺ຐິມາ ຊານນ຺ຕິ ມຍໍ ອຸປຣິເມ ອຸປຣິເມ ອຸກ຺ຂິປິຕ຺ວາ ຐິຕາຕິ. ນປິ ອຸປຣິມາ ອຸປຣິມາ ຊານນ຺ຕິ ມຍໍ ເຫຏ຺ຐິເມສຸ ເຫຏ຺ຐິເມສຸ ປຕິຏ຺ຐິຕາຕິ, ເອວເມວ ນ ປຓ຺ຫິກຏ຺ຐິ ຊານາຕິ ອຫໍ ໂຄປ຺ຜກຏ຺ຐິໍ ອຸກ຺ຂິປິຕ຺ວາ ຐິຕນ຺ຕິ. ນ ໂຄປ຺ຜກຏ຺ຐິ ຊານາຕິ ອຫໍ ຊງ຺ຆຏ຺ຐິໍ ອຸກ຺ຂິປິຕ຺ວາ ຐິຕນ຺ຕິ. ນ ຊງ຺ຆຏ຺ຐິ ຊານາຕິ ອຫໍ ອູຣຸຏ຺ຐິໍ ອຸກ຺ຂິປິຕ຺ວາ ຐິຕນ຺ຕິ. ນ ອູຣຸຏ຺ຐິ ຊານາຕິ ອຫໍ ກຏິຏ຺ຐິໍ ອຸກ຺ຂິປິຕ຺ວາ ຐິຕນ຺ຕິ. ນ ກຏິຏ຺ຐິ ຊານາຕິ ອຫໍ ປິຏ຺ຐິກຓ຺ຏກໍ ອຸກ຺ຂິປິຕ຺ວາ ຐິຕນ຺ຕິ. ນ ປິຏ຺ຐິກຓ຺ຏໂກ ຊານາຕິ ອຫໍ ຄີວຏ຺ຐິໍ ອຸກ຺ຂິປິຕ຺ວາ ຐິຕນ຺ຕິ. ນ ຄີວຏ຺ຐິ ຊານາຕິ ອຫໍ ສີສຏ຺ຐິໍ ອຸກ຺ຂິປິຕ຺ວາ ຐິຕນ຺ຕິ. ນ ສີສຏ຺ຐິ ຊານາຕິ ອຫໍ ຄີວຏ຺ຐິມ຺ຫິ ປຕິຏ຺ຐິຕນ຺ຕິ. ນ ຄີວຏ຺ຐິ ຊານາຕິ ອຫໍ ປິຏ຺ຐິກຓ຺ຏເກ ປຕິຏ຺ຐິຕນ຺ຕິ. ນ ປິຏ຺ຐິກຓ຺ຏໂກ ຊານາຕິ ອຫໍ ກຏິຏ຺ຐິມ຺ຫິ ປຕິຏ຺ຐິໂຕຕິ. ນ ກຏິຏ຺ຐິ ຊານາຕິ ອຫໍ ອູຣຸຏ຺ຐິມ຺ຫິ ປຕິຏ຺ຐິຕນ຺ຕິ. ນ ອູຣຸຏ຺ຐິ ຊານາຕິ ອຫໍ ຊງ຺ຆຏ຺ຐິມ຺ຫິ ປຕິຏ຺ຐິຕນ຺ຕິ. ນ ຊງ຺ຆຏ຺ຐິ ຊານາຕິ ອຫໍ ໂຄປ຺ຜກຏ຺ຐິມ຺ຫິ ປຕິຏ຺ຐິຕນ຺ຕິ. ນ ໂຄປ຺ຜກຏ຺ຐິ ຊານາຕິ ອຫໍ ປຓ຺ຫິກຏ຺ຐິມ຺ຫິ ປຕິຏ຺ຐິຕນ຺ຕິ. ອຎ຺ຎມຎ຺ຎໍ ອາໂຠຄປຈ຺ຈເວກ຺ຂຓຣຫິຕາ ເອເຕ ຘມ຺ມາ. ອິຕິ ອຏ຺ຐິ ນາມ ອິມສ຺ມິໍ ສຣີເຣ ປາຏິເຍກ຺ໂກ ໂກຏ຺ຐາໂສ ອເຈຕໂນ ອພ຺ຍາກໂຕ ສຸຎ຺ໂຎ ນິສ຺ສຕ຺ໂຕ ຖທ຺ໂຘ ປຖວີຘາຕູຕິ.

໓໑໙. ອຏ຺ຐິມິຎ຺ຊໍ ເຕສໍ ເຕສໍ ອຏ຺ຐີນໍ ອພ຺ຠນ຺ຕເຣ ຐິຕໍ. ຕຕ຺ຖ ຍຖາ ເວຬຸປພ຺ພາທີນໍ ອນ຺ໂຕ ປກ຺ຂິຕ຺ຕຉິນ຺ນເວຕ຺ຕຄ຺ຄາທີສຸ ນ ເວຬຸປພ຺ພາທີນິ ຊານນ຺ຕິ ອມ຺ເຫສຸ ເວຕ຺ຕຄ຺ຄາທີນິ ປກ຺ຂິຕ຺ຕານີຕິ. ນປິ ເວຕ຺ຕຄ຺ຄາທີນິ ຊານນ຺ຕິ ມຍໍ ເວຬຸປພ຺ພາທີສຸ ຐິຕານີຕິ, ເອວເມວ ນ ອຏ຺ຐີນິ ຊານນ຺ຕິ ອມ຺ຫາກໍ ອນ຺ໂຕ ມິຎ຺ຊໍ ຐິຕນ຺ຕິ. ນາປິ ມິຎ຺ຊໍ ຊານາຕິ ອຫໍ ອຏ຺ຐີນໍ ອນ຺ໂຕ ຐິຕນ຺ຕິ. ອຎ຺ຎມຎ຺ຎໍ ອາໂຠຄປຈ຺ຈເວກ຺ຂຓຣຫິຕາ ເອເຕ ຘມ຺ມາ. ອິຕິ ອຏ຺ຐິມິຎ຺ຊໍ ນາມ ອິມສ຺ມິໍ ສຣີເຣ ປາຏິເຍກ຺ໂກ ໂກຏ຺ຐາໂສ ອເຈຕໂນ ອພ຺ຍາກໂຕ ສຸຎ຺ໂຎ ນິສ຺ສຕ຺ໂຕ ຖທ຺ໂຘ ປຖວີຘາຕູຕິ.

໓໒໐. ວກ຺ກໍ ຄລວາຏກໂຕ ນິກ຺ຂນ຺ເຕນ ເອກມູເລນ ໂຖກໍ ຄນ຺ຕ຺ວາ ທ຺ວິຘາ ຠິນ຺ເນນ ຖູລນ຺ຫາຣຸນາ ວິນິພທ຺ຘໍ ຫຸຕ຺ວາ ຫທຍມໍສໍ ປຣິກ຺ຂິປິຕ຺ວາ ຐິຕໍ. ຕຕ຺ຖ ຍຖາ ວຓ຺ຏຸປນິພທ຺ເຘ ອມ຺ພຜລທ຺ວເຍ ນ ວຓ຺ຏໍ ຊານາຕິ ມຍາ ອມ຺ພຜລທ຺ວຍໍ ອຸປນິພທ຺ຘນ຺ຕິ. ນປິ ອມ຺ພຜລທ຺ວຍໍ ຊານາຕິ ອຫໍ ວຓ຺ເຏນ ອຸປນິພທ຺ຘນ຺ຕິ, ເອວເມວ ນ ຖູລນ຺ຫາຣຸ ຊານາຕິ ມຍາ ວກ຺ກໍ ອຸປນິພທ຺ຘນ຺ຕິ. ນປິ ວກ຺ກໍ ຊານາຕິ ອຫໍ ຖູລນ຺ຫາຣຸນາ ອຸປນິພທ຺ຘນ຺ຕິ. ອຎ຺ຎມຎ຺ຎໍ ອາໂຠຄປຈ຺ຈເວກ຺ຂຓຣຫິຕາ ເອເຕ ຘມ຺ມາ. ອິຕິ ວກ຺ກໍ ນາມ ອິມສ຺ມິໍ ສຣີເຣ ປາຏິເຍກ຺ໂກ ໂກຏ຺ຐາໂສ ອເຈຕໂນ ອພ຺ຍາກໂຕ ສຸຎ຺ໂຎ ນິສ຺ສຕ຺ໂຕ ຖທ຺ໂຘ ປຖວີຘາຕູຕິ.

໓໒໑. ຫທຍໍ ສຣີຣພ຺ຠນ຺ຕເຣ ອຸຣຏ຺ຐິປຎ຺ຊຣມຊ຺ຌໍ ນິສ຺ສາຍ ຐິຕໍ. ຕຕ຺ຖ ຍຖາ ຊິຓ຺ຓສນ຺ທມານິກປຎ຺ຊຣໍ ນິສ຺ສາຍ ຐປິຕາຍ ມໍສເປສິຍາ ນ ສນ຺ທມານິກປຎ຺ຊຣພ຺ຠນ຺ຕຣໍ ຊານາຕິ ມໍ ນິສ຺ສາຍ ມໍສເປສິ ຐິຕາຕິ. ນປິ ມໍສເປສິ ຊານາຕິ ອຫໍ ຊິຓ຺ຓສນ຺ທມານິກປຎ຺ຊຣໍ ນິສ຺ສາຍ ຐິຕາຕິ, ເອວເມວ ນ ອຸຣຏ຺ຐິປຎ຺ຊຣພ຺ຠນ຺ຕຣໍ ຊານາຕິ ມໍ ນິສ຺ສາຍ ຫທຍໍ ຐິຕນ຺ຕິ. ນປິ ຫທຍໍ ຊານາຕິ ອຫໍ ອຸຣຏ຺ຐິປຎ຺ຊຣໍ ນິສ຺ສາຍ ຐິຕນ຺ຕິ. ອຎ຺ຎມຎ຺ຎໍ ອາໂຠຄປຈ຺ຈເວກ຺ຂຓຣຫິຕາ ເອເຕ ຘມ຺ມາ. ອິຕິ ຫທຍໍ ນາມ ອິມສ຺ມິໍ ສຣີເຣ ປາຏິເຍກ຺ໂກ ໂກຏ຺ຐາໂສ ອເຈຕໂນ ອພ຺ຍາກໂຕ ສຸຎ຺ໂຎ ນິສ຺ສຕ຺ໂຕ ຖທ຺ໂຘ ປຖວີຘາຕູຕິ.

໓໒໒. ຍກນໍ ອນ຺ໂຕສຣີເຣ ທ຺ວິນ຺ນໍ ຖນານມພ຺ຠນ຺ຕເຣ ທກ຺ຂິຓປສ຺ສໍ ນິສ຺ສາຍ ຐິຕໍ. ຕຕ຺ຖ ຍຖາ ອຸກ຺ຂລິກປາລປສ຺ສມ຺ຫິ ລຄ຺ເຄ ຍມກມໍສປິຓ຺ເຑ ນ ອຸກ຺ຂລິກປາລປສ຺ສໍ ຊານາຕິ ມຍິ ຍມກມໍສປິຓ຺ໂຑ ລຄ຺ໂຄຕິ. ນປິ ຍມກມໍສປິຓ຺ໂຑ ຊານາຕິ ອຫໍ ອຸກ຺ຂລິກປາລປສ຺ເສ ລຄ຺ໂຄຕິ, ເອວເມວ ນ ຖນານມພ຺ຠນ຺ຕເຣ ທກ຺ຂິຓປສ຺ສໍ ຊານາຕິ ມໍ ນິສ຺ສາຍ ຍກນໍ ຐິຕນ຺ຕິ. ນປິ ຍກນໍ ຊານາຕິ ອຫໍ ຖນານມພ຺ຠນ຺ຕເຣ ທກ຺ຂິຓປສ຺ສໍ ນິສ຺ສາຍ ຐິຕນ຺ຕິ. ອຎ຺ຎມຎ຺ຎໍ ອາໂຠຄປຈ຺ຈເວກ຺ຂຓຣຫິຕາ ເອເຕ ຘມ຺ມາ. ອິຕິ ຍກນໍ ນາມ ອິມສ຺ມິໍ ສຣີເຣ ປາຏິເຍກ຺ໂກ ໂກຏ຺ຐາໂສ ອເຈຕໂນ ອພ຺ຍາກໂຕ ສຸຎ຺ໂຎ ນິສ຺ສຕ຺ໂຕ ຖທ຺ໂຘ ປຖວີຘາຕູຕິ.

໓໒໓. ກິໂລມເກສຸ ປຏິຈ຺ຉນ຺ນກິໂລມກໍ ຫທຍຎ຺ຈ ວກ຺ກຎ຺ຈ ປຣິວາເຣຕ຺ວາ ຐິຕໍ. ອປ຺ປຏິຈ຺ຉນ຺ນກິໂລມກໍ ສກລສຣີເຣ ຈມ຺ມສ຺ສ ເຫຏ຺ຐໂຕ ມໍສໍ ປຣິໂຍນນ຺ຘິຕ຺ວາ ຐິຕໍ. ຕຕ຺ຖ ຍຖາ ປິໂລຕິກປລິເວຐິເຕ ມໍເສ ນ ມໍສໍ ຊານາຕິ ອຫໍ ປິໂລຕິກາຍ ປລິເວຐິຕນ຺ຕິ. ນປິ ປິໂລຕິກາ ຊານາຕິ ມຍາ ມໍສໍ ປລິເວຐິຕນ຺ຕິ, ເອວເມວ ນ ວກ຺ກຫທຍານິ ສກລສຣີເຣ ຈ ມໍສໍ ຊານາຕິ ອຫໍ ກິໂລມເກນ ປຏິຈ຺ຉນ຺ນນ຺ຕິ. ນປິ ກິໂລມກໍ ຊານາຕິ ມຍາ ວກ຺ກຫທຍານິ ສກລສຣີເຣ ຈ ມໍສໍ ປຏິຈ຺ຉນ຺ນນ຺ຕິ. ອຎ຺ຎມຎ຺ຎໍ ອາໂຠຄປຈ຺ຈເວກ຺ຂຓຣຫິຕາ ເອເຕ ຘມ຺ມາ. ອິຕິ ກິໂລມກໍ ນາມ ອິມສ຺ມິໍ ສຣີເຣ ປາຏິເຍກ຺ໂກ ໂກຏ຺ຐາໂສ ອເຈຕໂນ ອພ຺ຍາກໂຕ ສຸຎ຺ໂຎ ນິສ຺ສຕ຺ໂຕ ຖທ຺ໂຘ ປຖວີຘາຕູຕິ.

໓໒໔. ປິຫກໍ ຫທຍສ຺ສ ວາມປສ຺ເສ ອຸທຣປຏລສ຺ສ ມຕ຺ຖກປສ຺ສໍ ນິສ຺ສາຍ ຐິຕໍ. ຕຕ຺ຖ ຍຖາ ໂກຏ຺ຐມຕ຺ຖກປສ຺ສໍ ນິສ຺ສາຍ ຐິຕາຍ ໂຄມຍປິຓ຺ຑິຍາ ນ ໂກຏ຺ຐມຕ຺ຖກປສ຺ສໍ ຊານາຕິ ໂຄມຍປິຓ຺ຑິ ມໍ ນິສ຺ສາຍ ຐິຕາຕິ. ນປິ ໂຄມຍປິຓ຺ຑິ ຊານາຕິ ອຫໍ ໂກຏ຺ຐມຕ຺ຖກປສ຺ສໍ ນິສ຺ສາຍ ຐິຕາຕິ, ເອວເມວ ນ ອຸທຣປຏລສ຺ສ ມຕ຺ຖກປສ຺ສໍ ຊານາຕິ ປິຫກໍ ມໍ ນິສ຺ສາຍ ຐິຕນ຺ຕິ. ນປິ ປິຫກໍ ຊານາຕິ ອຫໍ ອຸທຣປຏລສ຺ສ ມຕ຺ຖກປສ຺ສໍ ນິສ຺ສາຍ ຐິຕນ຺ຕິ. ອຎ຺ຎມຎ຺ຎໍ ອາໂຠຄປຈ຺ຈເວກ຺ຂຓຣຫິຕາ ເອເຕ ຘມ຺ມາ. ອິຕິ ປິຫກໍ ນາມ ອິມສ຺ມິໍ ສຣີເຣ ປາຏິເຍກ຺ໂກ ໂກຏ຺ຐາໂສ ອເຈຕໂນ ອພ຺ຍາກໂຕ ສຸຎ຺ໂຎ ນິສ຺ສຕ຺ໂຕ ຖທ຺ໂຘ ປຖວີຘາຕູຕິ.

໓໒໕. ປປ຺ຜາສໍ ສຣີຣພ຺ຠນ຺ຕເຣ ທ຺ວິນ຺ນໍ ຖນານມນ຺ຕເຣ ຫທຍຎ຺ຈ ຍກນຎ຺ຈ ອຸປຣິ ຉາເທຕ຺ວາ ໂອລມ຺ພນ຺ຕໍ ຐິຕໍ. ຕຕ຺ຖ ຍຖາ ຊິຓ຺ຓໂກຏ຺ຐພ຺ຠນ຺ຕເຣ ລມ຺ພມາເນ ສກຸຓກຸລາວເກ ນ ຊິຓ຺ຓໂກຏ຺ຐພ຺ຠນ຺ຕຣໍ ຊານາຕິ ມຍິ ສກຸຓກຸລາວໂກ ລມ຺ພມາໂນ ຐິໂຕຕິ. ນປິ ສກຸຓກຸລາວໂກ ຊານາຕິ ອຫໍ ຊິຓ຺ຓໂກຏ຺ຐພ຺ຠນ຺ຕເຣ ລມ຺ພມາໂນ ຐິໂຕຕິ, ເອວເມວ ນ ຕໍ ສຣີຣພ຺ຠນ຺ຕຣໍ ຊານາຕິ ມຍິ ປປ຺ຜາສໍ ລມ຺ພມານໍ ຐິຕນ຺ຕິ. ນປິ ປປ຺ຜາສໍ ຊານາຕິ ອຫໍ ເອວຣູເປ ສຣີຣພ຺ຠນ຺ຕເຣ ລມ຺ພມານໍ ຐິຕນ຺ຕິ. ອຎ຺ຎມຎ຺ຎໍ ອາໂຠຄປຈ຺ຈເວກ຺ຂຓຣຫິຕາ ເອເຕ ຘມ຺ມາ. ອິຕິ ປປ຺ຜາສໍ ນາມ ອິມສ຺ມິໍ ສຣີເຣ ປາຏິເຍກ຺ໂກ ໂກຏ຺ຐາໂສ ອເຈຕໂນ ອພ຺ຍາກໂຕ ສຸຎ຺ໂຎ ນິສ຺ສຕ຺ໂຕ ຖທ຺ໂຘ ປຖວີຘາຕູຕິ.

໓໒໖. ອນ຺ຕໍ ຄລວາຏກກຣີສມຄ຺ຄປຣິຍນ຺ເຕ ສຣີຣພ຺ຠນ຺ຕເຣ ຐິຕໍ. ຕຕ຺ຖ ຍຖາ ໂລຫິຕໂທຓິກາຍ ໂອຠຸຊິຕ຺ວາ ຐປິເຕ ຉິນ຺ນສີສຘມ຺ມນິກເຬວເຣ ນ ໂລຫິຕໂທຓິ ຊານາຕິ ມຍິ ຘມ຺ມນິກເຬວຣໍ ຐິຕນ຺ຕິ. ນປິ ຘມ຺ມນິກເຬວຣໍ ຊານາຕິ ອຫໍ ໂລຫິຕໂທຓິຍາ ຐິຕນ຺ຕິ, ເອວເມວ ນ ສຣີຣພ຺ຠນ຺ຕຣໍ ຊານາຕິ ມຍິ ອນ຺ຕໍ ຐິຕນ຺ຕິ. ນປິ ອນ຺ຕໍ ຊານາຕິ ອຫໍ ສຣີຣພ຺ຠນ຺ຕເຣ ຐິຕນ຺ຕິ. ອຎ຺ຎມຎ຺ຎໍ ອາໂຠຄປຈ຺ຈເວກ຺ຂຓຣຫິຕາ ເອເຕ ຘມ຺ມາ. ອິຕິ ອນ຺ຕໍ ນາມ ອິມສ຺ມິໍ ສຣີເຣ ປາຏິເຍກ຺ໂກ ໂກຏ຺ຐາໂສ ອເຈຕໂນ ອພ຺ຍາກໂຕ ສຸຎ຺ໂຎ ນິສ຺ສຕ຺ໂຕ ຖທ຺ໂຘ ປຖວີຘາຕູຕິ.

໓໒໗. ອນ຺ຕຄຸຓໍ ອນ຺ຕນ຺ຕເຣ ເອກວີສຕິອນ຺ຕໂຠເຄ ພນ຺ຘິຕ຺ວາ ຐິຕໍ. ຕຕ຺ຖ ຍຖາ ປາທປຸຎ຺ຉນຣຊ຺ຊຸມຓ຺ຑລກໍ ສິພ຺ເພຕ຺ວາ ຐິເຕສຸ ຣຊ຺ຊຸເກສຸ ນ ປາທປຸຎ຺ຉນຣຊ຺ຊຸມຓ຺ຑລກໍ ຊານາຕິ ຣຊ຺ຊຸກາ ມໍ ສິພ຺ພິຕ຺ວາ ຐິຕາຕິ. ນປິ ຣຊ຺ຊຸກາ ຊານນ຺ຕິ ມຍໍ ປາທປຸຎ຺ຉນຣຊ຺ຊຸມຓ຺ຑລກໍ ສິພ຺ພິຕ຺ວາ ຐິຕາຕິ, ເອວເມວ ນ ອນ຺ຕໍ ຊານາຕິ ອນ຺ຕຄຸຓໍ ມໍ ອາພນ຺ຘິຕ຺ວາ ຐິຕນ຺ຕິ. ນປິ ອນ຺ຕຄຸຓໍ ຊານາຕິ ອຫໍ ອນ຺ຕໍ ອາພນ຺ຘິຕ຺ວາ ຐິຕນ຺ຕິ. ອຎ຺ຎມຎ຺ຎໍ ອາໂຠຄປຈ຺ຈເວກ຺ຂຓຣຫິຕາ ເອເຕ ຘມ຺ມາ. ອິຕິ ອນ຺ຕຄຸຓໍ ນາມ ອິມສ຺ມິໍ ສຣີເຣ ປາຏິເຍກ຺ໂກ ໂກຏ຺ຐາໂສ ອເຈຕໂນ ອພ຺ຍາກໂຕ ສຸຎ຺ໂຎ ນິສ຺ສຕ຺ໂຕ ຖທ຺ໂຘ ປຖວີຘາຕູຕິ.

໓໒໘. ອຸທຣິຍໍ ອຸທເຣ ຐິຕໍ ອສິຕປີຕຂາຍິຕສາຍິຕໍ. ຕຕ຺ຖ ຍຖາ ສຸວານໂທຓິຍໍ ຐິເຕ ສຸວານວມຖຸມ຺ຫິ ນ ສຸວານໂທຓິ ຊານາຕິ ມຍິ ສຸວານວມຖຸ ຐິໂຕຕິ. ນປິ ສຸວານວມຖຸ ຊານາຕິ ອຫໍ ສຸວານໂທຓິຍໍ ຐິໂຕຕິ, ເອວເມວ ນ ອຸທຣໍ ຊານາຕິ ມຍິ ອຸທຣິຍໍ ຐິຕນ຺ຕິ. ນປິ ອຸທຣິຍໍ ຊານາຕິ ອຫໍ ອຸທເຣ ຐິຕນ຺ຕິ. ອຎ຺ຎມຎ຺ຎໍ ອາໂຠຄປຈ຺ຈເວກ຺ຂຓຣຫິຕາ ເອເຕ ຘມ຺ມາ. ອິຕິ ອຸທຣິຍໍ ນາມ ອິມສ຺ມິໍ ສຣີເຣ ປາຏິເຍກ຺ໂກ ໂກຏ຺ຐາໂສ ອເຈຕໂນ ອພ຺ຍາກໂຕ ສຸຎ຺ໂຎ ນິສ຺ສຕ຺ໂຕ ຖທ຺ໂຘ ປຖວີຘາຕູຕິ.

໓໒໙. ກຣີສໍ ປກ຺ກາສຍສງ຺ຂາເຕ ອຏ຺ຐງ຺ຄຸລເວຬຸປພ຺ພສທິເສ ອນ຺ຕປຣິໂຍສາເນ ຐິຕໍ. ຕຕ຺ຖ ຍຖາ ເວຬຸປພ຺ເພ ໂອມທ຺ທິຕ຺ວາ ປກ຺ຂິຕ຺ຕາຍ ສຓ຺ຫປຓ຺ຑຸມຕ຺ຕິກາຍ ນ ເວຬຸປພ຺ພໍ ຊານາຕິ ມຍິ ປຓ຺ຑຸມຕ຺ຕິກາ ຐິຕາຕິ. ນປິ ປຓ຺ຑຸມຕ຺ຕິກາ ຊານາຕິ ອຫໍ ເວຬຸປພ຺ເພ ຐິຕາຕິ, ເອວເມວ ນ ປກ຺ກາສໂຍ ຊານາຕິ ມຍິ ກຣີສໍ ຐິຕນ຺ຕິ. ນປິ ກຣີສໍ ຊານາຕິ ອຫໍ ປກ຺ກາສເຍ ຐິຕນ຺ຕິ. ອຎ຺ຎມຎ຺ຎໍ ອາໂຠຄປຈ຺ຈເວກ຺ຂຓຣຫິຕາ ເອເຕ ຘມ຺ມາ. ອິຕິ ກຣີສໍ ນາມ ອິມສ຺ມິໍ ສຣີເຣ ປາຏິເຍກ຺ໂກ ໂກຏ຺ຐາໂສ ອເຈຕໂນ ອພ຺ຍາກໂຕ ສຸຎ຺ໂຎ ນິສ຺ສຕ຺ໂຕ ຖທ຺ໂຘ ປຖວີຘາຕູຕິ.

໓໓໐. ມຕ຺ຖລຸງ຺ຄໍ ສີສກຏາຫພ຺ຠນ຺ຕເຣ ຐິຕໍ. ຕຕ຺ຖ ຍຖາ ປຸຣາຓລາພຸກຏາເຫ ປກ຺ຂິຕ຺ຕາຍ ປິຏ຺ຐປິຓ຺ຑິຍາ ນ ລາພຸກຏາຫໍ ຊານາຕິ ມຍິ ປິຏ຺ຐປິຓ຺ຑິ ຐິຕາຕິ. ນປິ ປິຏ຺ຐປິຓ຺ຑິ ຊານາຕິ ອຫໍ ລາພຸກຏາເຫ ຐິຕາຕິ, ເອວເມວ ນ ສີສກຏາຫພ຺ຠນ຺ຕຣໍ ຊານາຕິ ມຍິ ມຕ຺ຖລຸງ຺ຄໍ ຐິຕນ຺ຕິ. ນປິ ມຕ຺ຖລຸງ຺ຄໍ ຊານາຕິ ອຫໍ ສີສກຏາຫພ຺ຠນ຺ຕເຣ ຐິຕນ຺ຕິ. ອຎ຺ຎມຎ຺ຎໍ ອາໂຠຄປຈ຺ຈເວກ຺ຂຓຣຫິຕາ ເອເຕ ຘມ຺ມາ. ອິຕິ ມຕ຺ຖລຸງ຺ຄໍ ນາມ ອິມສ຺ມິໍ ສຣີເຣ ປາຏິເຍກ຺ໂກ ໂກຏ຺ຐາໂສ ອເຈຕໂນ ອພ຺ຍາກໂຕ ສຸຎ຺ໂຎ ນິສ຺ສຕ຺ໂຕ ຖທ຺ໂຘ ປຖວີຘາຕູຕິ.

໓໓໑. ປິຕ຺ເຕສຸ ອພທ຺ຘປິຕ຺ຕໍ ຊີວິຕິນ຺ທ຺ຣິຍປຏິພທ຺ຘໍ ສກລສຣີຣໍ ພ຺ຍາເປຕ຺ວາ ຐິຕໍ. ພທ຺ຘປິຕ຺ຕໍ ປິຕ຺ຕໂກສເກ ຐິຕໍ. ຕຕ຺ຖ ຍຖາ ປູວໍ ພ຺ຍາເປຕ຺ວາ ຐິເຕ ເຕເລ ນ ປູວໍ ຊານາຕິ ເຕລໍ ມໍ ພ຺ຍາເປຕ຺ວາ ຐິຕນ຺ຕິ. ນປິ ເຕລໍ ຊານາຕິ ອຫໍ ປູວໍ ພ຺ຍາເປຕ຺ວາ ຐິຕນ຺ຕິ, ເອວເມວ ນ ສຣີຣໍ ຊານາຕິ ອພທ຺ຘປິຕ຺ຕໍ ມໍ ພ຺ຍາເປຕ຺ວາ ຐິຕນ຺ຕິ. ນປິ ອພທ຺ຘປິຕ຺ຕໍ ຊານາຕິ ອຫໍ ສຣີຣໍ ພ຺ຍາເປຕ຺ວາ ຐິຕນ຺ຕິ. ຍຖາ ວສ຺ໂສທເກນ ປຸຓ຺ເຓ ໂກສາຕກິໂກສເກ ນ ໂກສາຕກິໂກສໂກ ຊານາຕິ ມຍິ ວສ຺ໂສທກໍ ຐິຕນ຺ຕິ. ນປິ ວສ຺ໂສທກໍ ຊານາຕິ ອຫໍ ໂກສາຕກິໂກສເກ ຐິຕນ຺ຕິ, ເອວເມວ ນ ປິຕ຺ຕໂກສໂກ ຊານາຕິ ມຍິ ພທ຺ຘປິຕ຺ຕໍ ຐິຕນ຺ຕິ. ນປິ ພທ຺ຘປິຕ຺ຕໍ ຊານາຕິ ອຫໍ ປິຕ຺ຕໂກສເກ ຐິຕນ຺ຕິ. ອຎ຺ຎມຎ຺ຎໍ ອາໂຠຄປຈ຺ຈເວກ຺ຂຓຣຫິຕາ ເອເຕ ຘມ຺ມາ. ອິຕິ ປິຕ຺ຕໍ ນາມ ອິມສ຺ມິໍ ສຣີເຣ ປາຏິເຍກ຺ໂກ ໂກຏ຺ຐາໂສ ອເຈຕໂນ ອພ຺ຍາກໂຕ ສຸຎ຺ໂຎ ນິສ຺ສຕ຺ໂຕ ຍູສຠູໂຕ ອາພນ຺ຘນາກາໂຣ ອາໂປຘາຕູຕິ.

໓໓໒. ເສມ຺ຫໍ ເອກປຕ຺ຖປູຣປ຺ປມາຓໍ ອຸທຣປຏເລ ຐິຕໍ. ຕຕ຺ຖ ຍຖາ ອຸປຣິ ສຎ຺ຊາຕເຜຓປຏລາຍ ຈນ຺ທນິກາຍ ນ ຈນ຺ທນິກາ ຊານາຕິ ມຍິ ເຜຓປຏລໍ ຐິຕນ຺ຕິ. ນປິ ເຜຓປຏລໍ ຊານາຕິ ອຫໍ ຈນ຺ທນິກາຍ ຐິຕນ຺ຕິ, ເອວເມວ ນ ອຸທຣປຏລໍ ຊານາຕິ ມຍິ ເສມ຺ຫໍ ຐິຕນ຺ຕິ. ນປິ ເສມ຺ຫໍ ຊານາຕິ ອຫໍ ອຸທຣປຏເລ ຐິຕນ຺ຕິ. ອຎ຺ຎມຎ຺ຎໍ ອາໂຠຄປຈ຺ຈເວກ຺ຂຓຣຫິຕາ ເອເຕ ຘມ຺ມາ. ອິຕິ ເສມ຺ຫໍ ນາມ ອິມສ຺ມິໍ ສຣີເຣ ປາຏິເຍກ຺ໂກ ໂກຏ຺ຐາໂສ ອເຈຕໂນ ອພ຺ຍາກໂຕ ສຸຎ຺ໂຎ ນິສ຺ສຕ຺ໂຕ ຍູສຠູໂຕ ອາພນ຺ຘນາກາໂຣ ອາໂປຘາຕູຕິ.

໓໓໓. ປຸພ຺ໂພ ອນິພທ຺ໂຘກາໂສ ຍຕ຺ຖ ຍຕ຺ເຖວ ຂາຓຸກຓ຺ຏກປ຺ປຫຣຓອຄ຺ຄິຊາລາທີຫິ ອຠິຫເຕ ສຣີຣປ຺ປເທເສ ໂລຫິຕໍ ສຓ຺ຐຫິຕ຺ວາ ປຈ຺ຈຕິ, ຄຓ຺ຑປີຬກາທໂຍ ວາ ອຸປ຺ປຊ຺ຊນ຺ຕິ, ຕຕ຺ຖ ຕຕ຺ຖ ຕິຏ຺ຐຕິ. ຕຕ຺ຖ ຍຖາ ຜຣສຸປ຺ປຫາຣາທິວເສນ ປຄ຺ຆຣິຕນິຍ຺ຍາເສ ຣຸກ຺ເຂ ນ ຣຸກ຺ຂສ຺ສ ປຫາຣາທິປ຺ປເທສາ ຊານນ຺ຕິ ອມ຺ເຫສຸ ນິຍ຺ຍາໂສ ຐິໂຕຕິ, ນປິ ນິຍ຺ຍາໂສ ຊານາຕິ ອຫໍ ຣຸກ຺ຂສ຺ສ ປຫາຣາທິປ຺ປເທເສສຸ ຐິໂຕຕິ, ເອວເມວ ນ ສຣີຣສ຺ສ ຂາຓຸກຓ຺ຏກາທີຫິ ອຠິຫຕປ຺ປເທສາ ຊານນ຺ຕິ ອມ຺ເຫສຸ ປຸພ຺ໂພ ຐິໂຕຕິ. ນປິ ປຸພ຺ໂພ ຊານາຕິ ອຫໍ ເຕສຸ ປເທເສສຸ ຐິໂຕຕິ. ອຎ຺ຎມຎ຺ຎໍ ອາໂຠຄປຈ຺ຈເວກ຺ຂຓຣຫິຕາ ເອເຕ ຘມ຺ມາ. ອິຕິ ປຸພ຺ໂພ ນາມ ອິມສ຺ມິໍ ສຣີເຣ ປາຏິເຍກ຺ໂກ ໂກຏ຺ຐາໂສ ອເຈຕໂນ ອພ຺ຍາກໂຕ ສຸຎ຺ໂຎ ນິສ຺ສຕ຺ໂຕ ຍູສຠູໂຕ ອາພນ຺ຘນາກາໂຣ ອາໂປຘາຕູຕິ.

໓໓໔. ໂລຫິເຕສຸ ສໍສຣຓໂລຫິຕໍ ປິຕ຺ຕໍ ວິຍ ສກລສຣີຣໍ ພ຺ຍາເປຕ຺ວາ ຐິຕໍ. ສນ຺ນິຈິຕໂລຫິຕໍ ຍກນຏ຺ຐານສ຺ສ ເຫຏ຺ຐາຠາຄໍ ປູເຣຕ຺ວາ ເອກປຕ຺ຖປູຣມຕ຺ຕໍ ວກ຺ກຫທຍຍກນປປ຺ຜາສານິ ເຕເມນ຺ຕໍ ຐິຕໍ. ຕຕ຺ຖ ສໍສຣຓໂລຫິເຕ ອພທ຺ຘປິຕ຺ຕສທິໂສວ ວິນິຈ຺ຉໂຍ. ອິຕຣໍ ປນ ຍຖາ ຊຊ຺ຊຣກປາເລ ໂອວຏ຺ເຐ ອຸທເກ ເຫຏ຺ຐາ ເລຑ຺ຑຸຂຓ຺ຑາທີນິ ເຕມຍມາເນ ນ ເລຑ຺ຑຸຂຓ຺ຑາທີນິ ຊານນ຺ຕິ ມຍໍ ອຸທເກນ ເຕມິຍມານາຕິ. ນປິ ອຸທກໍ ຊານາຕິ ອຫໍ ເລຑ຺ຑຸຂຓ຺ຑາທີນິ ເຕເມມີຕິ, ເອວເມວ ນ ຍກນສ຺ສ ເຫຏ຺ຐາຠາຄຏ຺ຐານໍ ວກ຺ກາທີນິ ວາ ຊານນ຺ຕິ ມຍິ ໂລຫິຕໍ ຐິຕໍ ອມ຺ເຫ ວາ ເຕມຍມານໍ ຐິຕນ຺ຕິ. ນປິ ໂລຫິຕໍ ຊານາຕິ ອຫໍ ຍກນສ຺ສ ເຫຏ຺ຐາຠາຄໍ ປູເຣຕ຺ວາ ວກ຺ກາທີນິ ເຕມຍມານໍ ຐິຕນ຺ຕິ. ອຎ຺ຎມຎ຺ຎໍ ອາໂຠຄປຈ຺ຈເວກ຺ຂຓຣຫິຕາ ເອເຕ ຘມ຺ມາ. ອິຕິ ໂລຫິຕໍ ນາມ ອິມສ຺ມິໍ ສຣີເຣ ປາຏິເຍກ຺ໂກ ໂກຏ຺ຐາໂສ ອເຈຕໂນ ອພ຺ຍາກໂຕ ສຸຎ຺ໂຎ ນິສ຺ສຕ຺ໂຕ ຍູສຠູໂຕ ອາພນ຺ຘນາກາໂຣ ອາໂປຘາຕູຕິ.

໓໓໕. ເສໂທ ອຄ຺ຄິສນ຺ຕາປາທິກາເລສຸ ເກສໂລມກູປວິວຣານິ ປູເຣຕ຺ວາ ຕິຏ຺ຐຕິ ເຈວ ປຄ຺ຆຣຕິ ຈ. ຕຕ຺ຖ ຍຖາ ອຸທກາ ອພ຺ພູຬ຺ຫມຕ຺ເຕສຸ ຠິສມຸຬາລກຸມຸທນາຬກລາເປສຸ ນ ຠິສາທິກລາປວິວຣານິ ຊານນ຺ຕິ ອມ຺ເຫຫິ ອຸທກໍ ປຄ຺ຆຣຕີຕິ. ນປິ ຠິສາທິກລາປວິວເຣຫິ ປຄ຺ຆຣນ຺ຕໍ ອຸທກໍ ຊານາຕິ ອຫໍ ຠິສາທິກລາປວິວເຣຫິ ປຄ຺ຆຣາມີຕິ, ເອວເມວ ນ ເກສໂລມກູປວິວຣານິ ຊານນ຺ຕິ ອມ຺ເຫຫິ ເສໂທ ປຄ຺ຆຣຕີຕິ. ນປິ ເສໂທ ຊານາຕິ ອຫໍ ເກສໂລມກູປວິວເຣຫິ ປຄ຺ຆຣາມີຕິ. ອຎ຺ຎມຎ຺ຎໍ ອາໂຠຄປຈ຺ຈເວກ຺ຂຓຣຫິຕາ ເອເຕ ຘມ຺ມາ. ອິຕິ ເສໂທ ນາມ ອິມສ຺ມິໍ ສຣີເຣ ປາຏິເຍກ຺ໂກ ໂກຏ຺ຐາໂສ ອເຈຕໂນ ອພ຺ຍາກໂຕ ສຸຎ຺ໂຎ ນິສ຺ສຕ຺ໂຕ ຍູສຠູໂຕ ອາພນ຺ຘນາກາໂຣ ອາໂປຘາຕູຕິ.

໓໓໖. ເມໂທ ຖູລສ຺ສ ສກລສຣີຣໍ ຜຣິຕ຺ວາ ກິສສ຺ສ ຊງ຺ຆມໍສາທີນິ ນິສ຺ສາຍ ຐິໂຕ ປຕ຺ຖິນ຺ນສິເນໂຫ. ຕຕ຺ຖ ຍຖາ ຫລິທ຺ທິປິໂລຕິກປຏິຈ຺ຉນ຺ເນ ມໍສປຸຎ຺ເຊ ນ ມໍສປຸຎ຺ໂຊ ຊານາຕິ ມໍ ນິສ຺ສາຍ ຫລິທ຺ທິປິໂລຕິກາ ຐິຕາຕິ. ນປິ ຫລິທ຺ທິປິໂລຕິກາ ຊານາຕິ ອຫໍ ມໍສປຸຎ຺ຊໍ ນິສ຺ສາຍ ຐິຕາຕິ, ເອວເມວ ນ ສກລສຣີເຣ ຊງ຺ຆາທີສຸ ວາ ມໍສໍ ຊານາຕິ ມໍ ນິສ຺ສາຍ ເມໂທ ຐິໂຕຕິ. ນປິ ເມໂທ ຊານາຕິ ອຫໍ ສກລສຣີເຣ ຊງ຺ຆາທີສຸ ວາ ມໍສໍ ນິສ຺ສາຍ ຐິໂຕຕິ. ອຎ຺ຎມຎ຺ຎໍ ອາໂຠຄປຈ຺ຈເວກ຺ຂຓຣຫິຕາ ເອເຕ ຘມ຺ມາ. ອິຕິ ເມໂທ ນາມ ອິມສ຺ມິໍ ສຣີເຣ ປາຏິເຍກ຺ໂກ ໂກຏ຺ຐາໂສ ອເຈຕໂນ ອພ຺ຍາກໂຕ ສຸຎ຺ໂຎ ນິສ຺ສຕ຺ໂຕ ປຕ຺ຖິນ຺ນຍູໂສ ອາພນ຺ຘນາກາໂຣ ອາໂປຘາຕູຕິ.

໓໓໗. ອສ຺ສຸ ຍທາ ສຎ຺ຊາຍຕິ ຕທາ ອກ຺ຂິກູປເກ ປູເຣຕ຺ວາ ຕິຏ຺ຐຕິ ວາ ປຄ຺ຆຣຕິ ວາ. ຕຕ຺ຖ ຍຖາ ອຸທກປຸຓ຺ເຓສຸ ຕຣຸຓຕາລຏ຺ຐິກູປເກສຸ ນ ຕຣຸຓຕາລຏ຺ຐິກູປກາ ຊານນ຺ຕິ ອມ຺ເຫສຸ ອຸທກໍ ຐິຕນ຺ຕິ. ນປິ ຕຣຸຓຕາລຏ຺ຐິກູປເກສຸ ອຸທກໍ ຊານາຕິ ອຫໍ ຕຣຸຓຕາລຏ຺ຐິກູປເກສຸ ຐິຕນ຺ຕິ, ເອວເມວ ນ ອກ຺ຂິກູປກາ ຊານນ຺ຕິ ອມ຺ເຫສຸ ອສ຺ສຸ ຐິຕນ຺ຕິ. ນປິ ອສ຺ສຸ ຊານາຕິ ອຫໍ ອກ຺ຂິກູປເກສຸ ຐິຕນ຺ຕິ. ອຎ຺ຎມຎ຺ຎໍ ອາໂຠຄປຈ຺ຈເວກ຺ຂຓຣຫິຕາ ເອເຕ ຘມ຺ມາ. ອິຕິ ອສ຺ສຸ ນາມ ອິມສ຺ມິໍ ສຣີເຣ ປາຏິເຍກ຺ໂກ ໂກຏ຺ຐາໂສ ອເຈຕໂນ ອພ຺ຍາກໂຕ ສຸຎ຺ໂຎ ນິສ຺ສຕ຺ໂຕ ຍູສຠູໂຕ ອາພນ຺ຘນາກາໂຣ ອາໂປຘາຕູຕິ.

໓໓໘. ວສາ ອຄ຺ຄິສນ຺ຕາປາທິກາເລ ຫຕ຺ຖຕລຫຕ຺ຖປິຏ຺ຐິປາທຕລປາທປິຏ຺ຐິ ນາສາປຸຏນລາຏອໍສກູເຏສຸ ຐິຕວິລີນສ຺ເນໂຫ. ຕຕ຺ຖ ຍຖາ ປກ຺ຂິຕ຺ຕເຕເລ ອາຈາເມ ນ ອາຈາໂມ ຊານາຕິ ມໍ ເຕລໍ ອຊ຺ໂຌຕ຺ຖຣິຕ຺ວາ ຐິຕນ຺ຕິ. ນປິ ເຕລໍ ຊານາຕິ ອຫໍ ອາຈາມໍ ອຊ຺ໂຌຕ຺ຖຣິຕ຺ວາ ຐິຕນ຺ຕິ, ເອວເມວ ນ ຫຕ຺ຖຕລາທິປ຺ປເທໂສ ຊານາຕິ ມໍ ວສາ ອຊ຺ໂຌຕ຺ຖຣິຕ຺ວາ ຐິຕາຕິ. ນປິ ວສາ ຊານາຕິ ອຫໍ ຫຕ຺ຖຕລາທິປ຺ປເທສໍ ອຊ຺ໂຌຕ຺ຖຣິຕ຺ວາ ຐິຕາຕິ. ອຎ຺ຎມຎ຺ຎໍ ອາໂຠຄປຈ຺ຈເວກ຺ຂຓຣຫິຕາ ເອເຕ ຘມ຺ມາ. ອິຕິ ວສາ ນາມ ອິມສ຺ມິໍ ສຣີເຣ ປາຏິເຍກ຺ໂກ ໂກຏ຺ຐາໂສ ອເຈຕໂນ ອພ຺ຍາກໂຕ ສຸຎ຺ໂຎ ນິສ຺ສຕ຺ໂຕ ຍູສຠູໂຕ ອາພນ຺ຘນາກາໂຣ ອາໂປຘາຕູຕິ.

໓໓໙. ເຂໂຬ ຕຖາຣູເປ ເຂຬຸປ຺ປຕ຺ຕິປຈ຺ຈເຍ ສຕິ ອຸໂຠຫິ ກໂປລປສ຺ເສຫິ ໂອໂຣຫິຕ຺ວາ ຊິວ຺ຫາຕເລ ຕິຏ຺ຐຕິ. ຕຕ຺ຖ ຍຖາ ອພ຺ໂພຈ຺ຉິນ຺ນອຸທກນິສ຺ສນ຺ເທ ນທີຕີຣກູປເກ ນ ກູປຕລໍ ຊານາຕິ ມຍິ ອຸທກໍ ສນ຺ຕິຏ຺ຐຕີຕິ. ນປິ ອຸທກໍ ຊານາຕິ ອຫໍ ກູປຕເລ ສນ຺ຕິຏ຺ຐາມີຕິ, ເອວເມວ ນ ຊິວ຺ຫາຕລໍ ຊານາຕິ ມຍິ ອຸໂຠຫິ ກໂປລປສ຺ເສຫິ ໂອໂຣຫິຕ຺ວາ ເຂໂຬ ຐິໂຕຕິ. ນປິ ເຂໂຬ ຊານາຕິ ອຫໍ ອຸໂຠຫິ ກໂປລປສ຺ເສຫິ ໂອໂຣຫິຕ຺ວາ ຊິວ຺ຫາຕເລ ຐິໂຕຕິ. ອຎ຺ຎມຎ຺ຎໍ ອາໂຠຄປຈ຺ຈເວກ຺ຂຓຣຫິຕາ ເອເຕ ຘມ຺ມາ. ອິຕິ ເຂໂຬ ນາມ ອິມສ຺ມິໍ ສຣີເຣ ປາຏິເຍກ຺ໂກ ໂກຏ຺ຐາໂສ ອເຈຕໂນ ອພ຺ຍາກໂຕ ສຸຎ຺ໂຎ ນິສ຺ສຕ຺ໂຕ ຍູສຠູໂຕ ອາພນ຺ຘນາກາໂຣ ອາໂປຘາຕູຕິ.

໓໔໐. ສິງ຺ຆາຓິກາ ຍທາ ສຎ຺ຊາຍຕິ, ຕທາ ນາສາປຸເຏ ປູເຣຕ຺ວາ ຕິຏ຺ຐຕິ ວາ ປຄ຺ຆຣຕິ ວາ. ຕຕ຺ຖ ຍຖາ ປູຕິທຘິຠຣິຕາຍ ສິປ຺ປິກາຍ ນ ສິປ຺ປິກາ ຊານາຕິ ມຍິ ປູຕິທຘິ ຐິຕນ຺ຕິ. ນປິ ປູຕິທຘິ ຊານາຕິ ອຫໍ ສິປ຺ປິກາຍ ຐິຕນ຺ຕິ, ເອວເມວ ນ ນາສາປຸຏາ ຊານນ຺ຕິ ອມ຺ເຫສຸ ສິງ຺ຆາຓິກາ ຐິຕາຕິ. ນປິ ສິງ຺ຆາຓິກາ ຊານາຕິ ອຫໍ ນາສາປຸເຏສຸ ຐິຕາຕິ. ອຎ຺ຎມຎ຺ຎໍ ອາໂຠຄປຈ຺ຈເວກ຺ຂຓຣຫິຕາ ເອເຕ ຘມ຺ມາ. ອິຕິ ສິງ຺ຆາຓິກາ ນາມ ອິມສ຺ມິໍ ສຣີເຣ ປາຏິເຍກ຺ໂກ ໂກຏ຺ຐາໂສ ອເຈຕໂນ ອພ຺ຍາກໂຕ ສຸຎ຺ໂຎ ນິສ຺ສຕ຺ໂຕ ຍູສຠູໂຕ ອາພນ຺ຘນາກາໂຣ ອາໂປຘາຕູຕິ.

໓໔໑. ລສິກາ ອຏ຺ຐິກສນ຺ຘີນໍ ອພ຺ຠຎ຺ຊນກິຈ຺ຈໍ ສາຘຍມານາ ອສີຕິສຕສນ຺ຘີສຸ ຐິຕາ. ຕຕ຺ຖ ຍຖາ ເຕລພ຺ຠຎ຺ຊິເຕ ອກ຺ເຂ ນ ອກ຺ໂຂ ຊານາຕິ ມໍ ເຕລໍ ອພ຺ຠຎ຺ຊິຕ຺ວາ ຐິຕນ຺ຕິ. ນປິ ເຕລໍ ຊານາຕິ ອຫໍ ອກ຺ຂໍ ອພ຺ຠຎ຺ຊິຕ຺ວາ ຐິຕນ຺ຕິ, ເອວເມວ ນ ອສີຕິສຕສນ຺ຘໂຍ ຊານນ຺ຕິ ລສິກາ ອມ຺ເຫ ອພ຺ຠຎ຺ຊິຕ຺ວາ ຐິຕາຕິ. ນປິ ລສິກາ ຊານາຕິ ອຫໍ ອສີຕິສຕສນ຺ຘໂຍ ອພ຺ຠຎ຺ຊິຕ຺ວາ ຐິຕາຕິ. ອຎ຺ຎມຎ຺ຎໍ ອາໂຠຄປຈ຺ຈເວກ຺ຂຓຣຫິຕາ ເອເຕ ຘມ຺ມາ. ອິຕິ ລສິກາ ນາມ ອິມສ຺ມິໍ ສຣີເຣ ປາຏິເຍກ຺ໂກ ໂກຏ຺ຐາໂສ ອເຈຕໂນ ອພ຺ຍາກໂຕ ສຸຎ຺ໂຎ ນິສ຺ສຕ຺ໂຕ ຍູສຠູໂຕ ອາພນ຺ຘນາກາໂຣ ອາໂປຘາຕູຕິ.

໓໔໒. ມຸຕ຺ຕໍ ວຕ຺ຖິສ຺ສ ອພ຺ຠນ຺ຕເຣ ຐິຕໍ. ຕຕ຺ຖ ຍຖາ ຈນ຺ທນິກາຍ ປກ຺ຂິຕ຺ເຕ ອມຸເຂ ຣວຓຆເຏ ນ ຣວຓຆໂຏ ຊານາຕິ ມຍິ ຈນ຺ທນິກາຣໂສ ຐິໂຕຕິ. ນປິ ຈນ຺ທນິກາຣໂສ ຊານາຕິ ອຫໍ ຣວຓຆເຏ ຐິໂຕຕິ, ເອວເມວ ນ ວຕ຺ຖິ ຊານາຕິ ມຍິ ມຸຕ຺ຕໍ ຐິຕນ຺ຕິ. ນປິ ມຸຕ຺ຕໍ ຊານາຕິ ອຫໍ ວຕ຺ຖິມ຺ຫິ ຐິຕນ຺ຕິ. ອຎ຺ຎມຎ຺ຎໍ ອາໂຠຄປຈ຺ຈເວກ຺ຂຓຣຫິຕາ ເອເຕ ຘມ຺ມາ. ອິຕິ ມຸຕ຺ຕໍ ນາມ ອິມສ຺ມິໍ ສຣີເຣ ປາຏິເຍກ຺ໂກ ໂກຏ຺ຐາໂສ ອເຈຕໂນ ອພ຺ຍາກໂຕ ສຸຎ຺ໂຎ ນິສ຺ສຕ຺ໂຕ ຍູສຠູໂຕ ອາພນ຺ຘນາກາໂຣ ອາໂປຘາຕູຕິ.

໓໔໓. ເອວໍ ເກສາທີສຸ ມນສິກາຣໍ ປວຕ຺ເຕຕ຺ວາ ເຍນ ສນ຺ຕປ຺ປຕິ, ອຍໍ ອິມສ຺ມິໍ ສຣີເຣ ປາຏິເຍກ຺ໂກ ໂກຏ຺ຐາໂສ ອເຈຕໂນ ອພ຺ຍາກໂຕ ສຸຎ຺ໂຎ ນິສ຺ສຕ຺ໂຕ ປຣິປາຈນາກາໂຣ ເຕໂຊຘາຕູຕິ, ເຍນ ຊີຣີຍຕິ, ເຍນ ປຣິຑຍ຺ຫຕິ, ເຍນ ອສິຕປີຕຂາຍິຕສາຍິຕໍ ສມ຺ມາ ປຣິຓາມໍ ຄຈ຺ຉຕິ, ອຍໍ ອິມສ຺ມິໍ ສຣີເຣ ປາຏິເຍກ຺ໂກ ໂກຏ຺ຐາໂສ ອເຈຕໂນ ອພ຺ຍາກໂຕ ສຸຎ຺ໂຎ ນິສ຺ສຕ຺ໂຕ ປຣິປາຈນາກາໂຣ ເຕໂຊຘາຕູຕິ ເອວໍ ເຕໂຊໂກຏ຺ຐາເສສຸ ມນສິກາໂຣ ປວຕ຺ເຕຕພ຺ໂພ.

໓໔໔. ຕໂຕ ອຸທ຺ຘງ຺ຄເມ ວາເຕ ອຸທ຺ຘງ຺ຄມວເສນ ປຣິຄ຺ຄເຫຕ຺ວາ ອໂຘຄເມ ອໂຘຄມວເສນ, ກຸຈ຺ຉິສເຍ ກຸຈ຺ຉິສຍວເສນ, ໂກຏ຺ຐາສເຍ ໂກຏ຺ຐາສຍວເສນ, ອງ຺ຄມງ຺ຄານຸສາຣິມ຺ຫິ ອງ຺ຄມງ຺ຄານຸສາຣິວເສນ, ອສ຺ສາສປສ຺ສາເສ ອສ຺ສາສປສ຺ສາສວເສນ ປຣິຄ຺ຄເຫຕ຺ວາ ອຸທ຺ຘງ຺ຄມາ ວາຕາ ນາມ ອິມສ຺ມິໍ ສຣີເຣ ປາຏິເຍກ຺ໂກ ໂກຏ຺ຐາໂສ ອເຈຕໂນ ອພ຺ຍາກໂຕ ສຸຎ຺ໂຎ ນິສ຺ສຕ຺ໂຕ ວິຕ຺ຖມ຺ຠນາກາໂຣ ວາໂຍຘາຕູຕິ, ອໂຘຄມາ ວາຕາ ນາມ, ກຸຈ຺ຉິສຍາ ວາຕາ ນາມ, ໂກຏ຺ຐາສຍາ ວາຕາ ນາມ, ອງ຺ຄມງ຺ຄານຸສາຣິໂນ ວາຕາ ນາມ, ອສ຺ສາສປສ຺ສາສາ ວາຕາ ນາມ ອິມສ຺ມິໍ ສຣີເຣ ປາຏິເຍກ຺ໂກ ໂກຏ຺ຐາໂສ ອເຈຕໂນ ອພ຺ຍາກໂຕ ສຸຎ຺ໂຎ ນິສ຺ສຕ຺ໂຕ ວິຕ຺ຖມ຺ຠນາກາໂຣ ວາໂຍຘາຕູຕິ ເອວໍ ວາໂຍໂກຏ຺ຐາເສສຸ ມນສິກາໂຣ ປວຕ຺ເຕຕພ຺ໂພ. ຕສ຺ເສວໍ ປວຕ຺ຕມນສິກາຣສ຺ສ ຘາຕຸໂຍ ປາກຏາ ໂຫນ຺ຕິ. ຕາ ປຸນປ຺ປຸນໍ ອາວຊ຺ຊໂຕ ມນສິກໂຣໂຕ ວຸຕ຺ຕນເຍເນວ ອຸປຈາຣສມາຘິ ອຸປ຺ປຊ຺ຊຕິ.

໓໔໕. ຍສ຺ສ ປນ ເອວໍ ຠາວຍໂຕ ກມ຺ມຏ຺ຐານໍ ນ ອິຊ຺ຌຕິ, ເຕນ ສລກ຺ຂຓສງ຺ເຂປໂຕ ຠາເວຕພ຺ພໍ. ກຖໍ? ວີສຕິຍາ ໂກຏ຺ຐາເສສຸ ຖທ຺ຘລກ຺ຂຓໍ ປຖວີຘາຕູຕິ ວວຕ຺ຖເປຕພ຺ພໍ. ຕຕ຺ເຖວ ອາພນ຺ຘນລກ຺ຂຓໍ ອາໂປຘາຕູຕິ. ປຣິປາຈນລກ຺ຂຓໍ ເຕໂຊຘາຕູຕິ. ວິຕ຺ຖມ຺ຠນລກ຺ຂຓໍ ວາໂຍຘາຕູຕິ.

ທ຺ວາທສສຸ ໂກຏ຺ຐາເສສຸ ອາພນ຺ຘນລກ຺ຂຓໍ ອາໂປຘາຕູຕິ ວວຕ຺ຖເປຕພ຺ພໍ. ຕຕ຺ເຖວ ປຣິປາຈນລກ຺ຂຓໍ ເຕໂຊຘາຕູຕິ. ວິຕ຺ຖມ຺ຠນລກ຺ຂຓໍ ວາໂຍຘາຕູຕິ. ຖທ຺ຘລກ຺ຂຓໍ ປຖວີຘາຕູຕິ.

ຈຕູສຸ ໂກຏ຺ຐາເສສຸ ປຣິປາຈນລກ຺ຂຓໍ ເຕໂຊຘາຕູຕິ ວວຕ຺ຖເປຕພ຺ພໍ. ເຕນ ອວິນິຠຸຕ຺ຕໍ ວິຕ຺ຖມ຺ຠນລກ຺ຂຓໍ ວາໂຍຘາຕູຕິ. ຖທ຺ຘລກ຺ຂຓໍ ປຖວີຘາຕູຕິ. ອາພນ຺ຘນລກ຺ຂຓໍ ອາໂປຘາຕູຕິ.

ຉສຸ ໂກຏ຺ຐາເສສຸ ວິຕ຺ຖມ຺ຠນລກ຺ຂຓໍ ວາໂຍຘາຕູຕິ ວວຕ຺ຖເປຕພ຺ພໍ. ຕຕ຺ເຖວ ຖທ຺ຘລກ຺ຂຓໍ ປຖວີຘາຕູຕິ. ອາພນ຺ຘນລກ຺ຂຓໍ ອາໂປຘາຕູຕິ. ປຣິປາຈນລກ຺ຂຓໍ ເຕໂຊຘາຕູຕິ. ຕສ຺ເສວໍ ວວຕ຺ຖາປຍໂຕ ຘາຕຸໂຍ ປາກຏາ ໂຫນ຺ຕິ. ຕາ ປຸນປ຺ປຸນໍ ອາວຊ຺ຊໂຕ ມນສິກໂຣໂຕ ວຸຕ຺ຕນເຍເນວ ອຸປຈາຣສມາຘິ ອຸປ຺ປຊ຺ຊຕິ.

໓໔໖. ຍສ຺ສ ປນ ເອວມ຺ປິ ຠາວຍໂຕ ກມ຺ມຏ຺ຐານໍ ນ ອິຊ຺ຌຕິ, ເຕນ ສລກ຺ຂຓວິຠຕ຺ຕິໂຕ ຠາເວຕພ຺ພໍ. ກຖໍ? ປຸພ຺ເພ ວຸຕ຺ຕນເຍເນວ ເກສາທໂຍ ປຣິຄ຺ຄເຫຕ຺ວາ ເກສມ຺ຫິ ຖທ຺ຘລກ຺ຂຓໍ ປຖວີຘາຕູຕິ ວວຕ຺ຖເປຕພ຺ພໍ. ຕຕ຺ເຖວ ອາພນ຺ຘນລກ຺ຂຓໍ ອາໂປຘາຕູຕິ. ປຣິປາຈນລກ຺ຂຓໍ ເຕໂຊຘາຕູຕິ. ວິຕ຺ຖມ຺ຠນລກ຺ຂຓໍ ວາໂຍຘາຕູຕິ. ເອວໍ ສພ຺ພໂກຏ຺ຐາເສສຸ ເອເກກສ຺ມິໍ ໂກຏ຺ຐາເສ ຈຕສ຺ໂສ ຈຕສ຺ໂສ ຘາຕຸໂຍ ວວຕ຺ຖເປຕພ຺ພາ. ຕສ຺ເສວໍ ວວຕ຺ຖາປຍໂຕ ຘາຕຸໂຍ ປາກຏາ ໂຫນ຺ຕິ. ຕາ ປຸນປ຺ປຸນໍ ອາວຊ຺ຊໂຕ ມນສິກໂຣໂຕ ວຸຕ຺ຕນເຍເນວ ອຸປຈາຣສມາຘິ ອຸປ຺ປຊ຺ຊຕິ.

ອປິຈ ໂຂ ປນ ວຈນຕ຺ຖໂຕ, ກລາປໂຕ, ຈຸຓ຺ຓໂຕ, ລກ຺ຂຓາທິໂຕ, ສມຸຏ຺ຐານໂຕ, ນານຕ຺ເຕກຕ຺ຕໂຕ, ວິນິພ຺ໂຠຄາວິນິພ຺ໂຠຄໂຕ, ສຠາຄວິສຠາຄໂຕ, ອຊ຺ຌຕ຺ຕິກພາຫິຣວິເສສໂຕ, ສງ຺ຄຫໂຕ, ປຈ຺ຈຍໂຕ, ອສມນ຺ນາຫາຣໂຕ, ປຈ຺ຈຍວິຠາຄໂຕຕິ ອິເມຫິປິ ອາກາເຣຫິ ຘາຕຸໂຍ ມນສິກາຕພ຺ພາ.

໓໔໗. ຕຕ຺ຖ ວຈນຕ຺ຖໂຕ ມນສິກໂຣນ຺ເຕນ ປຕ຺ຖຏຕ຺ຕາ ປຖວີ. ອປ຺ໂປຕິ ອາປິຍຕິ ອປ຺ປາຍຕີຕິ ວາ ອາໂປ. ເຕຊຕີຕິ ເຕໂຊ. ວາຍຕີຕິ ວາໂຍ. ອວິເສເສນ ປນ ສລກ຺ຂຓຘາຣຓໂຕ ທຸກ຺ຂາທານໂຕ ທຸກ຺ຂາຘານໂຕ ຈ ຘາຕູຕິ. ເອວໍ ວິເສສສາມຎ຺ຎວເສນ ວຈນຕ຺ຖໂຕ ມນສິກາຕພ຺ພາ.

໓໔໘. ກລາປໂຕຕິ ຍາ ອຍໍ ເກສາ ໂລມາຕິອາທິນາ ນເຍນ ວີສຕິຍາ ອາກາເຣຫິ ປຖວີຘາຕຸ, ປິຕ຺ຕໍ ເສມ຺ຫນ຺ຕິ ຈ ອາທິນາ ນເຍນ ທ຺ວາທສຫາກາເຣຫິ ອາໂປຘາຕຸ ນິທ຺ທິຏ຺ຐາ, ຕຕ຺ຖ ຍສ຺ມາ –

ວຓ຺ໂຓ ຄນ຺ໂຘ ຣໂສ ໂອຊາ, ຈຕສ຺ໂສ ຈາປິ ຘາຕຸໂຍ;

ອຏ຺ຐຘມ຺ມສໂມຘານາ, ໂຫຕິ ເກສາຕິ ສມ຺ມຸຕິ;

ເຕສໍເຍວ ວິນິພ຺ໂຠຄາ, ນຕ຺ຖິ ເກສາຕິ ສມ຺ມຸຕິ.

ຕສ຺ມາ ເກສາປິ ອຏ຺ຐຘມ຺ມກລາປມຕ຺ຕເມວ. ຕຖາ ໂລມາທໂຍຕິ. ໂຍ ປເນຕ຺ຖ ກມ຺ມສມຸຏ຺ຐາໂນ ໂກຏ຺ຐາໂສ, ໂສ ຊີວິຕິນ຺ທ຺ຣິເຍນ ຈ ຠາເວນ ຈ ສທ຺ຘິໍ ທສຘມ຺ມກລາໂປປິ ໂຫຕິ. ອຸສ຺ສທວເສນ ປນ ປຖວີຘາຕຸ ອາໂປຘາຕູຕິ ສງ຺ຂໍ ຄໂຕ. ເອວໍ ກລາປໂຕ ມນສິກາຕພ຺ພາ.

໓໔໙. ຈຸຓ຺ຓໂຕຕິ ອິມສ຺ມິໍ ຫິ ສຣີເຣ ມຊ຺ຌິເມນ ປມາເຓນ ປຣິຄ຺ຄຍ຺ຫມານາ ປຣມາຓຸເຠທສຎ຺ຈຸຓ຺ຓາ ສຸຂຸມຣຊຠູຕາ ປຖວີຘາຕຸ ໂທຓມຕ຺ຕາ ສິຍາ. ສາ ຕໂຕ ອຸປຑ຺ຒປ຺ປມາຓາຍ ອາໂປຘາຕຸຍາ ສງ຺ຄຫິຕາ, ເຕໂຊຘາຕຸຍາ ອນຸປາລິຕາ ວາໂຍຘາຕຸຍາ ວິຕ຺ຖມ຺ຠິຕາ ນ ວິກິຣິຍຕິ ນ ວິທ຺ຘໍສິຍຕິ, ອວິກິຣິຍມານາ ອວິທ຺ຘໍສິຍມານາ ອເນກວິຘໍ ອິຕ຺ຖິປຸຣິສລິງ຺ຄາທິຠາວວິກປ຺ປໍ ອຸປຄຈ຺ຉຕິ, ອຓຸຖູລທີຆຣສ຺ສຖິຣກຖິນາທິຠາວຎ຺ຈ ປກາເສຕິ.

ຍູສຄຕາ ອາພນ຺ຘນາກາຣຠູຕາ ປເນຕ຺ຖ ອາໂປຘາຕຸ ປຖວີປຕິຏ຺ຐິຕາ ເຕຊານຸປາລິຕາ ວາໂຍວິຕ຺ຖມ຺ຠິຕາ ນ ປຄ຺ຆຣຕິ ນ ປຣິສ຺ສວຕິ, ອປຄ຺ຆຣມານາ ອປຣິສ຺ສວມານາ ປີຓິຕປີຓິຕຠາວໍ ທສ຺ເສຕິ.

ອສິຕປີຕາທິປາຈກາ ເຈຕ຺ຖ ອຸສຸມາກາຣຠູຕາ ອຸຓ຺ຫຕ຺ຕລກ຺ຂຓາ ເຕໂຊຘາຕຸ ປຖວີປຕິຏ຺ຐິຕາ ອາໂປສງ຺ຄຫິຕາ ວາໂຍວິຕ຺ຖມ຺ຠິຕາ ອິມໍ ກາຍໍ ປຣິປາເຈຕິ, ວຓ຺ຓສມ຺ປຕ຺ຕິຎ຺ຈສ຺ສ ອາວຫຕິ. ຕາຍ ຈ ປນ ປຣິປາຈິໂຕ ອຍໍ ກາໂຍ ນ ປູຕິຠາວໍ ທສ຺ເສຕິ.

ອງ຺ຄມງ຺ຄານຸສຏາ ເຈຕ຺ຖ ສມຸທີຣຓວິຕ຺ຖມ຺ຠນລກ຺ຂຓາ ວາໂຍຘາຕຸ ປຖວີປຕິຏ຺ຐິຕາ ອາໂປສງ຺ຄຫິຕາ ເຕຊານຸປາລິຕາ ອິມໍ ກາຍໍ ວິຕ຺ຖມ຺ເຠຕິ. ຕາຍ ຈ ປນ ວິຕ຺ຖມ຺ຠິໂຕ ອຍໍ ກາໂຍ ນ ປຣິປຕຕິ, ອຸຊຸກໍ ສຓ຺ຐາຕິ. ອປຣາຍ ວາໂຍຘາຕຸຍາ ສມພ຺ຠາຫໂຕ ຄມນຏ຺ຐານນິສຊ຺ຊາສຍນອິຣິຍາປເຖສຸ ວິຎ຺ຎຕ຺ຕິໍ ທສ຺ເສຕິ, ສມິຎ຺ເຊຕິ, ສມ຺ປສາເຣຕິ, ຫຕ຺ຖປາທໍ ລາເຬຕິ. ເອວເມຕໍ ອິຕ຺ຖິປຸຣິສາທິຠາເວນ ພາລຊນວຎ຺ຈນໍ ມາຍາຣູປສທິສໍ ຘາຕຸຍນ຺ຕໍ ປວຕ຺ຕຕີຕິ ເອວໍ ຈຸຓ຺ຓໂຕ ມນສິກາຕພ຺ພາ.

໓໕໐. ລກ຺ຂຓາທິໂຕຕິ ປຖວີຘາຕຸ ກິໍ ລກ຺ຂຓາ, ກິໍ ຣສາ, ກິໍ ປຈ຺ຈຸປຏ຺ຐານາຕິ ເອວໍ ຈຕສ຺ໂສປິ ຘາຕຸໂຍ ອາວຊ຺ເຊຕ຺ວາ ປຖວີຘາຕຸ ກກ຺ຂຬຕ຺ຕລກ຺ຂຓາ, ປຕິຏ຺ຐານຣສາ, ສມ຺ປຏິຈ຺ຉນປຈ຺ຈຸປຏ຺ຐານາ. ອາໂປຘາຕຸ ປຄ຺ຆຣຓລກ຺ຂຓາ, ພ຺ຣູຫນຣສາ, ສງ຺ຄຫປຈ຺ຈຸປຏ຺ຐານາ. ເຕໂຊຘາຕຸ ອຸຓ຺ຫຕ຺ຕລກ຺ຂຓາ, ປຣິປາຈນຣສາ, ມທ຺ທວານຸປ຺ປທານປຈ຺ຈຸປຏ຺ຐານາ. ວາໂຍຘາຕຸ ວິຕ຺ຖມ຺ຠນລກ຺ຂຓາ, ສມຸທີຣຓຣສາ. ອຠິນີຫາຣປຈ຺ຈຸປຏ຺ຐານາຕິ ເອວໍ ລກ຺ຂຓາທິໂຕ ມນສິກາຕພ຺ພາ.

໓໕໑. ສມຸຏ຺ຐານໂຕຕິ ເຍ ອິເມ ປຖວີຘາຕຸອາທີນໍ ວິຕ຺ຖາຣໂຕ ທສ຺ສນວເສນ ເກສາທໂຍ ທ຺ວາຈຕ຺ຕາລີສ ໂກຏ຺ຐາສາ ທສ຺ສິຕາ. ເຕສຸ ອຸທຣິຍໍ ກຣີສໍ ປຸພ຺ໂພ ມຸຕ຺ຕນ຺ຕິ ອິເມ ຈຕ຺ຕາໂຣ ໂກຏ຺ຐາສາ ອຸຕຸສມຸຏ຺ຐານາວ. ອສ຺ສຸ ເສໂທ ເຂໂຬ ສິງ຺ຆາຓິກາຕິ ອິເມ ຈຕ຺ຕາໂຣ ອຸຕຸຈິຕ຺ຕສມຸຏ຺ຐານາ. ອສິຕາທິປຣິປາຈໂກ ເຕໂຊ ກມ຺ມສມຸຏ຺ຐາໂນວ. ອສ຺ສາສປສ຺ສາສາ ຈິຕ຺ຕສມຸຏ຺ຐານາວ. ອວເສສາ ສພ຺ເພປິ ຈຕຸສມຸຏ຺ຐານາຕິ ເອວໍ ສມຸຏ຺ຐານໂຕ ມນສິກາຕພ຺ພາ.

໓໕໒. ນານຕ຺ເຕກຕ຺ຕໂຕຕິ ສພ຺ພາສມ຺ປິ ຘາຕູນໍ ສລກ຺ຂຓາທິໂຕ ນານຕ຺ຕໍ. ອຎ຺ຎາເນວ ຫິ ປຖວີຘາຕຸຍາ ລກ຺ຂຓຣສປຈ຺ຈຸປຏ຺ຐານານິ. ອຎ຺ຎານິ ອາໂປຘາຕຸອາທີນໍ. ເອວໍ ລກ຺ຂຓາທິວເສນ ປນ ກມ຺ມສມຸຏ຺ຐານາທິວເສນ ຈ ນານຕ຺ຕຠູຕານມ຺ປິ ເອຕາສໍ ຣູປມຫາຠູຕຘາຕຸຘມ຺ມອນິຈ຺ຈາທິວເສນ ເອກຕ຺ຕໍ ໂຫຕິ. ສພ຺ພາປິ ຫິ ຘາຕຸໂຍ ຣຸປ຺ປນລກ຺ຂຓໍ ອນຕີຕຕ຺ຕາ ຣູປານິ. ມຫນ຺ຕປາຕຸຠາວາທີຫິ ກາຣເຓຫິ ມຫາຠູຕານິ.

ມຫນ຺ຕປາຕຸຠາວາທີຫີຕິ ເອຕາ ຫິ ຘາຕຸໂຍ ມຫນ຺ຕປາຕຸຠາວໂຕ, ມຫາຠູຕສາມຎ຺ຎໂຕ, ມຫາປຣິຫາຣໂຕ, ມຫາວິກາຣໂຕ, ມຫຕ຺ຕາ ຠູຕຕ຺ຕາ ຈາຕິ ອິເມຫິ ກາຣເຓຫິ ມຫາຠູຕານີຕິ ວຸຈ຺ຈນ຺ຕິ.

ຕຕ຺ຖ ມຫນ຺ຕປາຕຸຠາວໂຕຕິ ເອຕານິ ຫິ ອນຸປາທິນ຺ນສນ຺ຕາເນປິ ອຸປາທິນ຺ນສນ຺ຕາເນປິ ມຫນ຺ຕານິ ປາຕຸຠູຕານິ. ເຕສໍ ອນຸປາທິນ຺ນສນ຺ຕາເນ –

ທຸເວ ສຕສຫສ຺ສານິ, ຈຕ຺ຕາຣິ ນຫຸຕານິ ຈ;

ເອຕ຺ຕກໍ ພຫລຕ຺ເຕນ, ສງ຺ຂາຕາຍໍ ວສຸນ຺ຘຣາຕິ. –

ອາທິນາ ນເຍນ ມຫນ຺ຕປາຕຸຠາວຕາ ພຸທ຺ຘານຸສ຺ສຕິນິທ຺ເທເສ ວຸຕ຺ຕາວ.

ອຸປາທິນ຺ນສນ຺ຕາເນປິ ມຈ຺ຉກຈ຺ຉປເທວທານວາທິສຣີຣວເສນ ມຫນ຺ຕາເນວ ປາຕຸຠູຕານິ. ວຸຕ຺ຕຎ຺ເຫຕໍ ‘‘ສນ຺ຕິ, ຠິກ຺ຂເວ, ມຫາສມຸທ຺ເທ ໂຍຊນສຕິກາປິ ອຕ຺ຕຠາວາ’’ຕິອາທິ.

ມຫາຠູຕສາມຎ຺ຎໂຕຕິ ເອຕານິ ຫິ ຍຖາ ມາຍາກາໂຣ ອມຓິໍເຍວ ອຸທກໍ ມຓິໍ ກຕ຺ວາ ທສ຺ເສຕິ, ອສຸວຓ຺ຓໍເຍວ ເລຑ຺ຑຸໍ ສຸວຓ຺ຓໍ ກຕ຺ວາ ທສ຺ເສຕິ.

ຍຖາ ຈ ສຍໍ ເນວ ຍກ຺ໂຂ ນ ຍກ຺ຂີ ສມາໂນ ຍກ຺ຂຠາວມ຺ປິ ຍກ຺ຂິຠາວມ຺ປິ ທສ຺ເສຕິ, ເອວເມວ ສຍໍ ອນີລາເນວ ຫຸຕ຺ວາ ນີລໍ ອຸປາທາຣູປໍ ທສ຺ເສນ຺ຕິ, ອປີຕານິ ອໂລຫິຕານິ ອໂນທາຕາເນວ ຫຸຕ຺ວາ ໂອທາຕໍ ອຸປາທາຣູປໍ ທສ຺ເສນ຺ຕີຕິ ມາຍາກາຣມຫາຠູຕສາມຎ຺ຎໂຕ ມຫາຠູຕານິ.

ຍຖາ ຈ ຍກ຺ຂາທີນິ ມຫາຠູຕານິ ຍໍ ຄຓ຺ຫນ຺ຕິ, ເນວ ເນສໍ ຕສ຺ສ ອນ຺ໂຕ ນ ພຫິ ຐານໍ ອຸປລພ຺ຠຕິ, ນ ຈ ຕໍ ນິສ຺ສາຍ ນ ຕິຏ຺ຐນ຺ຕິ, ເອວເມວ ຕານິປິ ເນວ ອຎ຺ຎມຎ຺ຎສ຺ສ ອນ຺ໂຕ ນ ພຫິ ຐິຕານິ ຫຸຕ຺ວາ ອຸປລພ຺ຠນ຺ຕິ, ນ ຈ ອຎ຺ຎມຎ຺ຎໍ ນິສ຺ສາຍ ນ ຕິຏ຺ຐນ຺ຕີຕິ ອຈິນ຺ເຕຍ຺ຍຏ຺ຐານຕາຍ ຍກ຺ຂາທິມຫາຠູຕສາມຎ຺ຎໂຕປິ ມຫາຠູຕານິ. ຍຖາ ຈ ຍກ຺ຂິນີສງ຺ຂາຕານິ ມຫາຠູຕານິ ມນາເປຫິ ວຓ຺ຓສຓ຺ຐານວິກ຺ເຂເປຫິ ອຕ຺ຕໂນ ຠຍານກຠາວໍ ປຏິຈ຺ຉາເທຕ຺ວາ ສຕ຺ເຕ ວຎ຺ເຈນ຺ຕິ, ເອວເມວ ເອຕານິປິ ອິຕ຺ຖິປຸຣິສສຣີຣາທີສຸ ມນາເປນ ຉວິວຓ຺ເຓນ ມນາເປນ ອຕ຺ຕໂນ ອງ຺ຄປຈ຺ຈງ຺ຄສຓ຺ຐາເນນ ມນາເປນ ຈ ຫຕ຺ຖປາທງ຺ຄຸລິຠມຸກວິກ຺ເຂເປນ ອຕ຺ຕໂນ ກກ຺ຂຬຕ຺ຕາທິເຠທໍ ສຣສລກ຺ຂຓໍ ປຏິຈ຺ຉາເທຕ຺ວາ ພາລຊນໍ ວຎ຺ເຈນ຺ຕິ, ອຕ຺ຕໂນ ສຠາວໍ ທຏ຺ຐຸໍ ນ ເທນ຺ຕີຕິ ວຎ຺ຈກຕ຺ເຕນ ຍກ຺ຂິນີມຫາຠູຕສາມຎ຺ຎໂຕປິ ມຫາຠູຕານິ.

ມຫາປຣິຫາຣໂຕຕິ ມຫນ຺ເຕຫິ ປຈ຺ຈເຍຫິ ປຣິຫຣິຕພ຺ພໂຕ. ເອຕານິ ຫິ ທິວເສ ທິວເສ ອຸປເນຕພ຺ພຕ຺ຕາ ມຫນ຺ເຕຫິ ຆາສຈ຺ຉາທນາທີຫິ ຠູຕານິ ປວຕ຺ຕານີຕິ ມຫາຠູຕານິ. ມຫາປຣິຫາຣານິ ວາ ຠູຕານີຕິປິ ມຫາຠູຕານິ.

ມຫາວິກາຣໂຕຕິ ເອຕານິ ຫິ ອນຸປາທິນ຺ນານິປິ ອຸປາທິນ຺ນານິປິ ມຫາວິກາຣານິ ໂຫນ຺ຕິ. ຕຕ຺ຖ ອນຸປາທິນ຺ນານໍ ກປ຺ປວຸຏ຺ຐາເນ ວິກາຣມຫຕ຺ຕໍ ປາກຏໍ ໂຫຕິ. ອຸປາທິນ຺ນານໍ ຘາຕຸກ຺ໂຂຠກາເລ. ຕຖາ ຫິ –

ຠູມິໂຕ ວຸຏ຺ຐິຕາ ຍາວ, ພ຺ຣຫ຺ມໂລກາ ວິຘາວຕິ;

ອຈ຺ຈິ ອຈ຺ຈິມໂຕ ໂລເກ, ຑຍ຺ຫມານມ຺ຫິ ເຕຊສາ.

ໂກຏິສຕສຫສ຺ເສກໍ, ຈກ຺ກວາຬໍ ວິລີຍຕິ;

ກຸປິເຕນ ຍທາ ໂລໂກ, ສລິເລນ ວິນສ຺ສຕິ.

ໂກຏິສຕສຫສ຺ເສກໍ, ຈກ຺ກວາຬໍ ວິກີຣຕິ;

ວາໂຍຘາຕຸປ຺ປໂກເປນ, ຍທາ ໂລໂກ ວິນສ຺ສຕິ.

ປຕ຺ຖທ຺ໂຘ ຠວຕິ ກາໂຍ, ທຏ຺ໂຐ ກຏ຺ຐມຸເຂນ ວາ;

ປຖວີຘາຕຸປ຺ປໂກເປນ, ໂຫຕິ ກຏ຺ຐມຸເຂວ ໂສ.

ປູຕິໂຍ ຠວຕິ ກາໂຍ, ທຏ຺ໂຐ ປູຕິມຸເຂນ ວາ;

ອາໂປຘາຕຸປ຺ປໂກເປນ, ໂຫຕິ ປູຕິມຸເຂວ ໂສ.

ສນ຺ຕຕ຺ໂຕ ຠວຕິ ກາໂຍ, ທຏ຺ໂຐ ອຄ຺ຄິມຸເຂນ ວາ;

ເຕໂຊຘາຕຸປ຺ປໂກເປນ, ໂຫຕິ ອຄ຺ຄິມຸເຂວ ໂສ.

ສຎ຺ຉິນ຺ໂນ ຠວຕິ ກາໂຍ, ທຏ຺ໂຐ ສຕ຺ຖມຸເຂນ ວາ;

ວາໂຍຘາຕຸປ຺ປໂກເປນ, ໂຫຕິ ສຕ຺ຖມຸເຂວ ໂສ.

ອິຕິ ມຫາວິກາຣານິ ຠູຕານີຕິ ມຫາຠູຕານິ.

ມຫຕ຺ຕາ ຠູຕຕ຺ຕາ ຈາຕິ ເອຕານິ ຫິ ມຫນ຺ຕານິ ມຫຕາ ວາຍາເມນ ປຣິຄ຺ຄເຫຕພ຺ພຕ຺ຕາ ຠູຕານິ ວິຊ຺ຊມານຕ຺ຕາຕິ ມຫຕ຺ຕາ ຠູຕຕ຺ຕາ ຈ ມຫາຠູຕານິ.

ເອວໍ ສພ຺ພາເປຕາ ຘາຕຸໂຍ ມຫນ຺ຕປາຕຸຠາວາທີຫິ ກາຣເຓຫິ ມຫາຠູຕານິ.

ສລກ຺ຂຓຘາຣຓໂຕ ປນ ທຸກ຺ຂາທານໂຕ ຈ ທຸກ຺ຂາຘານໂຕ ຈ ສພ຺ພາປິ ຘາຕຸລກ຺ຂຓໍ ອນຕີຕຕ຺ຕາ ຘາຕຸໂຍ. ສລກ຺ຂຓຘາຣເຓນ ຈ ອຕ຺ຕໂນ ຂຓານຸຣູປຘາຣເຓນ ຈ ຘມ຺ມາ. ຂຍຏ຺ເຐນ ອນິຈ຺ຈາ. ຠຍຏ຺ເຐນ ທຸກ຺ຂາ. ອສາຣກຏ຺ເຐນ ອນຕ຺ຕາ.

ອິຕິ ສພ຺ພາສມ຺ປິ ຣູປມຫາຠູຕຘາຕຸຘມ຺ມອນິຈ຺ຈາທິວເສນ ເອກຕ຺ຕນ຺ຕິ ເອວໍ ນານຕ຺ເຕກຕ຺ຕໂຕ ມນສິກາຕພ຺ພາ.

໓໕໓. ວິນິພ຺ໂຠຄາວິນິພ຺ໂຠຄໂຕຕິ ສຫຸປ຺ປນ຺ນາວ ເອຕາ ເອເກກສ຺ມິໍ ສພ຺ພປຣິຍນ຺ຕິເມ ສຸທ຺ຘຏ຺ຐກາທິກລາເປປິ ປເທເສນ ອວິນິພ຺ຠຸຕ຺ຕາ. ລກ຺ຂເຓນ ປນ ວິນິພ຺ຠຸຕ຺ຕາຕິ ເອວໍ ວິນິພ຺ໂຠຄາວິນິພ຺ໂຠຄໂຕ ມນສິກາຕພ຺ພາ.

໓໕໔. ສຠາຄວິສຠາຄໂຕຕິ ເອວໍ ອວິນິພ຺ຠຸຕ຺ຕາສຸ ຈາປິ ເອຕາສຸ ປຸຣິມາ ທ຺ເວ ຄຣຸກຕ຺ຕາ ສຠາຄາ. ຕຖາ ປຈ຺ຉິມາ ລຫຸກຕ຺ຕາ. ປຸຣິມາ ປນ ປຈ຺ຉິມາຫິ ປຈ຺ຉິມາ ຈ ປຸຣິມາຫິ ວິສຠາຄາຕິ ເອວໍ ສຠາຄວິສຠາຄໂຕ ມນສິກາຕພ຺ພາ.

໓໕໕. ອຊ຺ຌຕ຺ຕິກພາຫິຣວິເສສໂຕຕິ ອຊ຺ຌຕ຺ຕິກາ ຘາຕຸໂຍ ວິຎ຺ຎາຓວຕ຺ຖຸວິຎ຺ຎຕ຺ຕິອິນ຺ທ຺ຣິຍານໍ ນິສ຺ສຍາ ໂຫນ຺ຕິ, ສອິຣິຍາປຖາ, ຈຕຸສມຸຏ຺ຐານາ. ພາຫິຣາ ວຸຕ຺ຕວິປຣີຕປ຺ປກາຣາຕິ ເອວໍ ອຊ຺ຌຕ຺ຕິກພາຫິຣວິເສສໂຕ ມນສິກາຕພ຺ພາ.

໓໕໖. ສງ຺ຄຫໂຕຕິ ກມ຺ມສມຸຏ຺ຐານາ ປຖວີຘາຕຸ ກມ຺ມສມຸຏ຺ຐານາຫິ ອິຕຣາຫິ ເອກສງ຺ຄຫາ ໂຫຕິ ສມຸຏ຺ຐານນານຕ຺ຕາຠາວໂຕ. ຕຖາ ຈິຕ຺ຕາທິສມຸຏ຺ຐານາ ຈິຕ຺ຕາທິສມຸຏ຺ຐານາຫີຕິ ເອວໍ ສງ຺ຄຫໂຕ ມນສິກາຕພ຺ພາ.

໓໕໗. ປຈ຺ຈຍໂຕຕິ ປຖວີຘາຕຸ ອາໂປສງ຺ຄຫິຕາ ເຕໂຊອນຸປາລິຕາ ວາໂຍວິຕ຺ຖມ຺ຠິຕາ ຕິຓ຺ຓໍ ມຫາຠູຕານໍ ປຕິຏ຺ຐາ ຫຸຕ຺ວາ ປຈ຺ຈໂຍ ໂຫຕິ. ອາໂປຘາຕຸ ປຖວີປຕິຏ຺ຐິຕາ ເຕໂຊອນຸປາລິຕາ ວາໂຍວິຕ຺ຖມ຺ຠິຕາ ຕິຓ຺ຓໍ ມຫາຠູຕານໍ ອາພນ຺ຘນໍ ຫຸຕ຺ວາ ປຈ຺ຈໂຍ ໂຫຕິ. ເຕໂຊຘາຕຸ ປຖວີປຕິຏ຺ຐິຕາ ອາໂປສງ຺ຄຫິຕາ ວາໂຍວິຕ຺ຖມ຺ຠິຕາ ຕິຓ຺ຓໍ ມຫາຠູຕານໍ ປຣິປາຈນໍ ຫຸຕ຺ວາ ປຈ຺ຈໂຍ ໂຫຕິ. ວາໂຍຘາຕຸ ປຖວີປຕິຏ຺ຐິຕາ ອາໂປສງ຺ຄຫິຕາ ເຕໂຊປຣິປາຈິຕາ ຕິຓ຺ຓໍ ມຫາຠູຕານໍ ວິຕ຺ຖມ຺ຠນໍ ຫຸຕ຺ວາ ປຈ຺ຈໂຍ ໂຫຕີຕິ ເອວໍ ປຈ຺ຈຍໂຕ ມນສິກາຕພ຺ພາ.

໓໕໘. ອສມນ຺ນາຫາຣໂຕຕິ ປຖວີຘາຕຸ ເຈຕ຺ຖ ‘‘ອຫໍ ປຖວີຘາຕູ’’ຕິ ວາ, ‘‘ຕິຓ຺ຓໍ ມຫາຠູຕານໍ ປຕິຏ຺ຐາ ຫຸຕ຺ວາ ປຈ຺ຈໂຍ ໂຫມີ’’ຕິ ວາ ນ ຊານາຕິ. ອິຕຣານິປິ ຕີຓິ ‘‘ອມ຺ຫາກໍ ປຖວີຘາຕຸ ປຕິຏ຺ຐາ ຫຸຕ຺ວາ ປຈ຺ຈໂຍ ໂຫຕີ’’ຕິ ນ ຊານນ຺ຕິ. ເອສ ນໂຍ ສພ຺ພຕ຺ຖາຕິ ເອວໍ ອສມນ຺ນາຫາຣໂຕ ມນສິກາຕພ຺ພາ.

໓໕໙. ປຈ຺ຈຍວິຠາຄໂຕຕິ ຘາຕູນໍ ຫິ ກມ຺ມໍ, ຈິຕ຺ຕໍ, ອາຫາໂຣ, ອຸຕູຕິ ຈຕ຺ຕາໂຣ ປຈ຺ຈຍາ. ຕຕ຺ຖ ກມ຺ມສມຸຏ຺ຐານານໍ ກມ຺ມເມວ ປຈ຺ຈໂຍ ໂຫຕິ, ນ ຈິຕ຺ຕາທໂຍ. ຈິຕ຺ຕາທິສມຸຏ຺ຐານານມ຺ປິ ຈິຕ຺ຕາທໂຍວ ປຈ຺ຈຍາ ໂຫນ຺ຕິ, ນ ອິຕເຣ. ກມ຺ມສມຸຏ຺ຐານານຎ຺ຈ ກມ຺ມໍ ຊນກປຈ຺ຈໂຍ ໂຫຕິ, ເສສານໍ ປຣິຍາຍໂຕ ອຸປນິສ຺ສຍປຈ຺ຈໂຍ ໂຫຕິ. ຈິຕ຺ຕສມຸຏ຺ຐານານໍ ຈິຕ຺ຕໍ ຊນກປຈ຺ຈໂຍ ໂຫຕິ, ເສສານໍ ປຈ຺ຉາຊາຕປຈ຺ຈໂຍ ອຕ຺ຖິປຈ຺ຈໂຍ ອວິຄຕປຈ຺ຈໂຍ ຈ. ອາຫາຣສມຸຏ຺ຐານານໍ ອາຫາໂຣ ຊນກປຈ຺ຈໂຍ ໂຫຕິ, ເສສານໍ ອາຫາຣປຈ຺ຈໂຍ ອຕ຺ຖິປຈ຺ຈໂຍ ອວິຄຕປຈ຺ຈໂຍ ຈ. ອຸຕຸສມຸຏ຺ຐານານໍ ອຸຕຸ ຊນກປຈ຺ຈໂຍ ໂຫຕິ, ເສສານໍ ອຕ຺ຖິປຈ຺ຈໂຍ ອວິຄຕປຈ຺ຈໂຍ ຈ. ກມ຺ມສມຸຏ຺ຐານໍ ມຫາຠູຕໍ ກມ຺ມສມຸຏ຺ຐານານມ຺ປິ ມຫາຠູຕານໍ ປຈ຺ຈໂຍ ໂຫຕິ ຈິຕ຺ຕາທິສມຸຏ຺ຐານານມ຺ປິ. ຕຖາ ຈິຕ຺ຕສມຸຏ຺ຐານໍ, ອາຫາຣສມຸຏ຺ຐານໍ. ອຸຕຸສມຸຏ຺ຐານໍ ມຫາຠູຕໍ ອຸຕຸສມຸຏ຺ຐານານມ຺ປິ ມຫາຠູຕານໍ ປຈ຺ຈໂຍ ໂຫຕິ ກມ຺ມາທິສມຸຏ຺ຐານານມ຺ປິ.

ຕຕ຺ຖ ກມ຺ມສມຸຏ຺ຐານາ ປຖວີຘາຕຸ ກມ຺ມສມຸຏ຺ຐານານໍ ອິຕຣາສໍ ສຫຊາຕອຎ຺ຎມຎ຺ຎນິສ຺ສຍອຕ຺ຖິອວິຄຕວເສນ ເຈວ ປຕິຏ຺ຐາວເສນ ຈ ປຈ຺ຈໂຍ ໂຫຕິ, ນ ຊນກວເສນ. ອິຕເຣສໍ ຕິສນ຺ຕຕິມຫາຠູຕານໍ ນິສ຺ສຍອຕ຺ຖິອວິຄຕວເສນ ປຈ຺ຈໂຍ ໂຫຕິ, ນ ປຕິຏ຺ຐາວເສນ ນ ຊນກວເສນ. ອາໂປຘາຕຸ ເຈຕ຺ຖ ອິຕຣາສໍ ຕິຓ຺ຓໍ ສຫຊາຕາທິວເສນ ເຈວ ອາພນ຺ຘນວເສນ ຈ ປຈ຺ຈໂຍ ໂຫຕິ, ນ ຊນກວເສນ. ອິຕເຣສໍ ຕິສນ຺ຕຕິການໍ ນິສ຺ສຍອຕ຺ຖິອວິຄຕປຈ຺ຈຍວເສເນວ, ນ ອາພນ຺ຘນວເສນ ນ ຊນກວເສນ. ເຕໂຊຘາຕຸເປຕ຺ຖ ອິຕຣາສໍ ຕິຓ຺ຓໍ ສຫຊາຕາທິວເສນ ເຈວ ປຣິປາຈນວເສນ ຈ ປຈ຺ຈໂຍ ໂຫຕິ, ນ ຊນກວເສນ. ອິຕເຣສໍ ຕິສນ຺ຕຕິການໍ ນິສ຺ສຍອຕ຺ຖິອວິຄຕປຈ຺ຈຍວເສເນວ, ນ ປຣິປາຈນວເສນ, ນ ຊນກວເສນ. ວາໂຍຘາຕຸເປຕ຺ຖ ອິຕຣາສໍ ຕິຓ຺ຓໍ ສຫຊາຕາທິວເສນ ເຈວ ວິຕ຺ຖມ຺ຠນວເສນ ຈ ປຈ຺ຈໂຍ ໂຫຕິ, ນ ຊນກວເສນ. ອິຕເຣສໍ ຕິສນ຺ຕຕິການໍ ນິສ຺ສຍອຕ຺ຖິອວິຄຕປຈ຺ຈຍວເສເນວ, ນ ວິຕ຺ຖມ຺ຠນວເສນ, ນ ຊນກວເສນ. ຈິຕ຺ຕອາຫາຣອຸຕຸສມຸຏ຺ຐານປຖວີຘາຕຸອາທີສຸປິ ເອເສວ ນໂຍ.