໒. ໂທສປຣິຫາຣາວໂພຘປຣິຈ຺ເຉທວຓ຺ຓນາ

໖໘. ກທາຈິ ກວິໂກສລ຺ລາ, ວິໂຣໂຘ ສກໂລປ຺ຍ’ຍໍ;

ໂທສສງ຺ຂ຺ຍມຕິກ຺ກມ຺ມ, ຄຸຓວີຖິໍ ວິຄາຫເຕ.

໖໙. ເຕນ ວຸຕ຺ຕວິໂຣຘານ-ມວິໂຣໂຘ ຍຖາ ສິຍາ;

ຕຖາ ໂທສປຣິຫາຣາ-ວໂພໂຘ ທານິ ນີຍເຕ.

໖໘-໖໙. ອິຈ຺ເຈວໍ ໂທສວິຠາຄໍ ປຣິຈ຺ຉິຊ຺ຊ ອິທານິ ຍຖາວຸຕ຺ຕໂທສປຣິຫາຣກ຺ກມມຸປທິສິຕຸມາຫ ‘‘ກທາຈີ’’ຕ຺ຍາທິ. ສກໂລປິ ອຍໍ ວິໂຣໂຘ ວິຣຸທ຺ຘຕ຺ຖນ຺ຕຣາທິກໂຕ ນ ໂກຈິ ເອໂກ ເອວ ໂທເສສຸ, ໂທສານໍ ວາ ສງ຺ຂ຺ຍໍ ຄຓນໍ ໂທສຠາວໍ ອຕິກ຺ກມ຺ມ ປຣິຈ຺ຉິຊ຺ຊ ຄຸຓານໍ ວີຖິໍ ປທວິໍ ຄຸຓສຠາວຕໍ ວິຄາຫເຕ ອພ຺ຠຸປຄຈ຺ຉຕິ ກທາຈິ, ນ ສພ຺ພທາ. ກວິໂນ ປຍຸຊ຺ຊກສ຺ສ ໂກສລ຺ລາ ຕາທິສວິສຍປຣິຄ຺ຄຫລກ຺ຂຓເນປຸຎ຺ຎກາຣຓາ, ນ ຕຸ ຍຖາ ຕຖາ ເຈຕິ. ‘‘ເຕເນ’’ຈ຺ຈາທິ. ເຍເນວໍ, ເຕນ ກາຣເຓນ ວຸຕ຺ຕານໍ ວິຣຸທ຺ຘຕ຺ຖນ຺ຕຣາທີນໍ ວິໂຣຘານໍ ຍຖາ ເຍນ ປກາເຣນ ອວິໂຣໂຘ ນິທ຺ໂທສຕາ ສິຍາ ຠເວຍ຺ຍ, ຕຖາ ເຕນ ປກາເຣນ ໂທສານໍ ປຣິຫາໂຣ ທູຣີກຣຓໍ ອວພຸຊ຺ຌຕິ ຎາຍຕິ ເອເຕນາຕິ ອວໂພໂຘ, ຕສ຺ສ ອວໂພໂຘ, ຕນ຺ນາມິໂກ ປຣິຈ຺ເຉໂທ ອິທານິ ນີຍເຕ ອານີຍເຕ ວຸຈ຺ຈເຕຕິ ອຕ຺ໂຖ.

໖໘-໖໙. ເອວໍ ໂທສວິຠາຄໍ ປຣິຈ຺ຉິນ຺ທິຕ຺ວາ ອິທານິ ຍຖາວຸຕ຺ຕໂທສານໍ ປຣິຫາຣຕ຺ຖມາຣຠນ຺ໂຕ ‘‘ກທາຈີ’’ຕ຺ຍາທິມາຫ. ສກໂລປິ ອຍໍ ວິໂຣໂຘ ປທໂທສາທິໂກ ໂທສສງ຺ຂ຺ຍໍ ໂທສານໍ, ໂທເສສຸ ວາ ຄຓນໍ ໂທສຠາວໍ ອຕິກ຺ກມ຺ມ ກທາຈິ ກວິໂກສລ຺ລາ ກວິໂນ ພ຺ຍາກຣຓາຠິຘານຉນ຺ໂທອລງ຺ກຕິອາທີສຸ ປຣິຈຍລກ຺ຂເຓນ ປຎ຺ຎາປາຏເວນ ຍໂຕ ຄຸຓວີຖິໍ ຄຸຓປທວິໍ ເກວລໍ ຄຸຓສຠາວໍ ວິຄາຫເຕ ອພ຺ຠຸປຄຈ຺ຉຕິ, ເຕນ ກາຣເຓນ ວຸຕ຺ຕວິໂຣຘານໍ ຍຖາວຸຕ຺ຕປທໂທສາທິວິໂຣຘານໍ ອວິໂຣໂຘ ອວິຣຸທ຺ຘຕາ ຍຖາ ສິຍາ ເຍນ ປກາເຣນ ຠເວຍ຺ຍ, ຕຖາ ເຕນ ປກາເຣນ ໂທສປຣິຫາຣາວໂພໂຘ ຍຖາວຸຕ຺ຕປທໂທສາທິສມ຺ພນ຺ຘິໂນ ປຣິຫຣຓກ຺ກມສ຺ສ ອວໂພຘກາຣຓຕ຺ຕາ ຕນ຺ນາມິກປຣິຈ຺ເຉໂທ ອິທານິ ລທ຺ຘາວສເຣ ນີຍເຕ ວຸຈ຺ຈເຕ. ຍຖາວຸຕ຺ຕໂທສາ ກວິສາມຕ຺ຖິເຍນ ນິທ຺ໂທສຕ຺ຕໍ ຠຊນ຺ຕິ, ຕສ຺ສ ສາມຕ຺ຖິຍສ຺ສ ອຸປເທສໍ ທສ຺ສາມາຕິ ອຘິປ຺ປາໂຍ.

ປທໂທສປຣິຫາຣວຓ຺ຓນາ

ຕຕ຺ຖ ວິຣຸທ຺ຘຕ຺ຖນ຺ຕຣສ຺ສ ປຣິຫາໂຣ ຍຖາ –

໗໐. ວິນ຺ທນ຺ຕໍ ປາກສາລີນໍ, ສາລີນໍ ທສ຺ສນາ ສຸຂໍ;

ຕໍ ກຖໍ ນາມ ເມໂຆ’ຍໍ, ວິສໂທ ສຸຂເຍ ຊນໍ.

໗໐. ‘‘ວິນ຺ທນ຺ຕ’’ມິຈ຺ຈາທິ. ປາເກນ ປຣິຓຕຠາເວນ ສາລີນໍ ຍຸຕ຺ຕານໍ, ມນຸຎ຺ຎານໍ ວາ ສາລີນໍ ຣຕ຺ຕສາລິອາທີນໍ ສາລິຊາຕີນໍ ທສ຺ສນາ ສຸຂໍ ເຈຕສິກໍ ໂສມນສ຺ສໍ ວິນ຺ທນ຺ຕໍ ຕໍ ຊນໍ ວິສໂທ ອຍໍ ເມໂຆ ອມ຺ພຸໂທ ກຖໍ ນາມ ສຸຂເຍຕິ. ເອຕ຺ຖ ຕາທິສສ຺ສ ຊນສ຺ສ ອສຸຂປ຺ປທານໍ ຄຣຬສ຺ສ ເມຆສ຺ສານຸຣູປນ຺ຕິ ວິຣຸທ຺ຘຕ຺ຖນ຺ຕຣຕາ ປຣິຫຏາ.

໗໐. ຕຕ຺ຖ ວິຣຸທ຺ຘຕ຺ຖນ຺ຕຣສ຺ສ ປຣິຫາໂຣ ຍຖາ ເອວໍ. ‘‘ວິນ຺ທນ຺ຕິ’’ຈ຺ຈາທິ. ປາກສາລີນໍ ປຣິຓາເມນ ຍຸຕ຺ຕານໍ, ມນຸຎ຺ຎານໍ ວາ ສາລີນໍ ຣຕ຺ຕສາລິອາທີນໍ ທສ຺ສນາ ທສ຺ສນເຫຕຸ ສຸຂໍ ເຈຕສິກໂສມນສ຺ສໍ ວິນ຺ທນ຺ຕໍ ອນຸໂຠນ຺ຕໍ ຕໍ ຊນໍ ຕໍ ກສ຺ສກຊນໍ ວິສໂທ ຊລທາຍໂກ ອຍໍ ເມໂຆ ກຖໍ ນາມ ສຸຂເຍ, ນ ສຸຂຍເຕວ. ຕາທິສສ຺ສ ຊນສ຺ສ ທຸກ຺ຂທານໍ ຄຣຬທາຍກສ຺ສ ເມຆສ຺ສາປິ ອນຸຣູປມິຕິ ວິຣຸທ຺ຘຎ຺ຎຕ຺ໂຖ ອປນີໂຕ ໂຫຕິ. ປາເກນ ສາລິໂນຕິ ວິຄ຺ຄໂຫ. ສຸຂໍ ກໂຣຕີຕິ ສຸຂເຍຕິ ນາມຘາຕຸ.

ຍຖາ ວາ –

໗໑. ວິນາຍໂກປິ ນາໂຄສິ,

ໂຄຕໂມປິ ມຫາມຕິ;

ປຓີໂຕປິ ຣສາເປໂຕ,

ຈິຕ຺ຕາ ເມ ສາມິ ເຕ ຄຕິ.

໗໑. ‘‘ວິນາຍໂກປິ’’ຈ຺ຈາທິ. ວີນໍ ປກ຺ຂີນໍ ນາຍໂກ, ຄຣຸໂຬ, ສຕ຺ເຕ ວິເນຕີຕິ ວິນາຍໂກ, ວຸທ຺ໂຘ, ຠຄວາ ຈ. ຕຕ຺ຖ ຍທາ ວິນາຍໂກ ຄຣຸໂຬ, ຕທາ ຕຸ ນາໂຄ ປນ຺ນໂຄສີຕິ ວິຣຸທ຺ຘໍ, ປກ຺ຂນ຺ຕເຣ ຕ຺ວວິຣຸທ຺ຘໍ ຠຄວໂຕ ອາຄຸສ຺ສ ຣາຄາທິໂນ ອຠາວໂຕ. ອິເມສໍ ຄຸນ຺ນໍ ອຕິສເຍນ ໂຄ ໂຄຕໂມ ຫີນປສຸ, ໂຄຕມວໍສາວຕິຓ຺ຓຕ຺ຕາ ໂຄຕໂມ ຠຄວາ ຈ. ຫີນປສຸ ຈ ຕ຺ວໍ ມຫາມຕິ ອສີຕິ ວິຣຸທ຺ຘໍ ອຈ຺ຈນ຺ຕຫີນປສຸໂນ ມຫຕິຍາ ປຎ຺ຎາຍ ອຠາວໂຕ. ປກ຺ຂນ຺ຕເຣ ຕຸ ນ ພ຺ຍາຆາໂຕ. ປຓີໂຕ ມຘຸໂຣ ຣໂສ, ອຸຕ຺ຕໂມ ຈ ສຸຄໂຕ. ຕຕ຺ຖ ມຘຸຣຣສໂຕ ອເປໂຕ ອປຄໂຕສີຕິ ວິຣຸຊ຺ຌຕິ, ຠຄວໂຕ ຕຸ ຣເສຫິ ສິງ຺ຄາຣາທີຫິ ອເປໂຕຕິ ຍຸຊ຺ຊຕິ. ເມ ມມ. ສາມີຕິ ອາມນ຺ຕນໍ. ເຕ ຕວ ຄຕິ ປວຕ຺ຕິ ຈິຕ຺ຕາ ອພ຺ຠຸຕາຕິ. ເອຕ຺ຖ ວິຣຸທ຺ຘຕ຺ຖນ຺ຕຣໍ ວິໂຣຘາລງ຺ກາຣໍ ສິລາຆນີຍນ຺ຕິ ເຕນ ຕໍ ປຣິຫຏໍ.

໗໑. ຍຖາ ວາ ອຸຕ຺ຕໂທສສ຺ສ ປຣິຫາໂຣ ອີທິໂສ ວາ. ‘‘ວິນາຍໂກ’’ຈ຺ຈາທິ. ເຫ ສາມິ ຕ຺ວໍ ວິນາຍໂກປິ ຄຣຸໂຬປິ ນາໂຄສິ ປນ຺ນໂຄ ອສິ. ໂນ ເຈ, ວິນາຍໂກປິ ສຕ຺ເຕ ວິເນນ຺ໂຕ ເອວ ນາໂຄສິ ນິກ຺ກິເລໂສ ອສິ. ໂຄຕໂມປິ ປສຸຕໂມປິ ມຫາມຕິ ມຫາປຎ຺ຎວາສິ. ໂນ ເຈ, ໂຄຕໂມປິ ໂຄຕ຺ຕໂຕ ໂຄຕໂມເຍວ ມຫາມຕິ ມຫາປຎ຺ຎວາສິ. ປຓີໂຕປິ ມຘຸໂຣປິ ຣສາເປໂຕ ມຘຸຣຣສໂຕ ອປຄໂຕສິ. ໂນ ເຈ, ປຓີໂຕປິ ອຸຕ຺ຕໂມ ເອວ ຣສາເປໂຕ ສິງ຺ຄາຣາທິຣສໂຕ ອປຄໂຕສິ. ເຕ ຕຸຍ຺ຫໍ ຄຕິ ປວຕ຺ຕິ ເມ ມຍ຺ຫໍ ຈິຕ຺ຕາ ອຈ຺ຉຣິຍາ. ເອຕ຺ຖ ຄຣຸຬສ຺ສ ນາຄຕ຺ຕຎ຺ຈ ປສຸຕມສ຺ສ ປຎ຺ຎວນ຺ຕຕ຺ຕຎ຺ຈ ປຓີຕສ຺ສ ນິຣສຕ຺ຕຎ຺ຈ ວິຣຸທ຺ຘໍ, ຕຖາປິ ອຎ຺ຎປກ຺ຂສ຺ສ ອວິຣຸທ຺ຘຕ຺ຕາ ວິຣຸທ຺ຘຕ຺ຖນ຺ຕຣໂທໂສ ປສຕ຺ເຖນ ວິຣຸທ຺ຘາລງ຺ກາເຣນ ນິຣາກໂຕ. ວີນໍ ປກ຺ຂີນໍ ນາຍໂກ, ຄຣຸໂຬ. ສຕ຺ເຕ ວິເນຕີຕິ ວິນາຍໂກ, ພຸທ຺ໂຘ. ນຕ຺ຖິ ອາຄຸ [ອໂຄ (ກ.)] ເອຕສ຺ສາຕິ ນາໂຄ, ພຸທ຺ໂຘ. ຄຸນ຺ນມຕິສເຍນ ໂຄຕໂມ, ປສຸ. ມຫຕີ ມຕິ ອສ຺ສາຕິ ມຫາມຕິ, ພຸທ຺ໂຘ. ປຘານຕ຺ຕໍ ນີໂຕ ປຓີໂຕ, ມຘຸໂຣ ຣໂສ. ຣສໂຕ ອເປໂຕຕິ ຣສາເປໂຕ, ພຸທ຺ໂຘຕິ ວິຄ຺ຄໂຫ.

ອຌຕ຺ຖສ຺ສ ຍຖາ –

໗໒. ກຖໍ ຕາທິຄຸຓາຠາເວ,

ໂລກໍ ໂຕເສຕິ ທຸຊ຺ຊໂນ;

ໂອຠາສິຕາເສສທິໂສ,

ຂຊ຺ໂຊໂຕ ນາມ ກິໍ ຠເວ.

໗໒. ‘‘ກຖ’’ມິຈ຺ຈາທິ. ທຸຊ຺ຊໂນ ຕາທິໂນ ຄຸຓາ ໂລກໍ ໂຕເສນ຺ຕິ, ຕາທີນໍ ຄຸຓານໍ ອຕ຺ຕນິ ອຠາເວ ສຕິ ໂລກໍ ສຕ຺ຕໂລກໍ ກຖໍ ໂຕເສຕິ, ນ ໂຕເສຕີຕິ ອຕ຺ໂຖ. ວຸຕ຺ຕເມວຕ຺ຖນ຺ຕເຣນ ສາເຘຕິ ‘‘ຂຊ຺ໂຊໂຕ ນາມ ໂອຠາສິຕາ ທີປິຕາ ອເສສທິສາ ເຍນ ຕຖາວິໂຘ ກິໍ ຠເວ, ນ ຠເວຍ຺ຍ ຕາທິໂນ ຄຸຓສ຺ສ ອຠາວໂຕ’’ຕິ. ເອຕ຺ຖ ຂຊ຺ໂຊຕສ຺ສ ອຘິກຕ຺ຖຠາເວນ ສິໂຕ ໂອຠາສິຕາເສສທິສຕ຺ຕໂທໂສ ‘‘ກຖໍ ຕາທິຄຸຓາຠາເວ’’ຕິອາທິວໂຈຠງ຺ຄິຍາ ປຣິຫໂຏ.

໗໒. ອຌຕ຺ຖສ຺ສ ຍຖາຕິ ເອຕ຺ຖ ປຣິຫາໂຣ ອຊ຺ຌາຫາໂຣ, ເອວມຸປຣິປິ. ‘‘ກຖິ’’ຈ຺ຈາທິ. ທຸຊ຺ຊໂນ ຄຸຓຫີນຊໂນ ຕາທິຄຸຓາຠາເວ ສນ຺ໂຕສຊນນກາຣຓານໍ ຕາທິສານໍ ສີລາທິຄຸຓານໍ ອຕ຺ຕນິ ອວິຊ຺ຊມານຕ຺ເຕ ສຕິ ໂລກໍ ສຕ຺ຕໂລກໍ ກຖໍ ໂຕເສຕິ, ນ ໂຕເສຕິເຍວ, ຕຖາ ຫິ ຂຊ຺ໂຊໂຕ ນາມ ໂອຠາສິຕາເສສທິໂສ ກິໍ ຠເວ, ນ ຠວຕ຺ເຍວ. ເອຕ຺ຖ ຂຊ຺ໂຊຕສ຺ສ ສກລທິໂສຠາສນສງ຺ຂາຕມຘິກຕ຺ຖໂທໂສ ‘‘ກຖໍ ຕາທິຄຸຓາຠາເວ’’ຈ຺ຈາທິວາກ຺ຍລີລາຍ ນິຣາກໂຕ. ຕາທີ ຈ ເຕ ຄຸຓາ ເຈຕິ ວິຄ຺ຄໂຫ.

໗໓. ປເຫຬິກາຍມາຣຸຬ຺ຫາ, ນ ຫິ ທຸຏ຺ຐາ ກິລິຏ຺ຐຕາ;

ປິຍາ ສຸຂາ’ລິງ຺ຄິຕໍ ກ-ມາລິງ຺ຄຕິ ນຸ ໂນ ອິຕິ.

໗໓. ‘‘ປເຫຬິກາຍໍ’’ອິຈ຺ຈາທິ. ກິລິຏ຺ຐຕາ ກິລິຏ຺ຐປທໂທໂສ ປເຫຬິກາຍ ວິສເຍ ອາຣຸຬ຺ຫາ ສຫີ ນ ຫິ ໂນ ທຸຏ຺ໂຐ ສິຍາ. ກີທິສີຕິ ອາຫ ‘‘ປິເຍ’’ຈ຺ຈາທິ. ອິຕີຕິ ນິທສ຺ສເນ. ປິຍາ ວລ຺ລຠາຍ ອາລິງ຺ຄິຕໍ ກໍ ຊນໍ ສຸຂໍ ກາຍິກໍ ເຈຕສິກຎ຺ຈ ໂນ ອາລິງ຺ຄຕິ ນ ສໍຍຸຊ຺ຊຕິ ນຸ. ນຸອິຕິ ປຣິວິຕກ຺ເກ ນິປາໂຕ. ເອຕ຺ຖ ປິຍາຕິ ກິລິຏ຺ຐໍ ປເຫຬິກາຍ ສມາໂຣເປນ ປຣິຫຏໍ.

໗໓. ‘‘ປເຫຬິເກ’’ຈ຺ຈາທິ. ກິລິຏ຺ຐຕາ ກິລິຏ຺ຐປທໂທສສງ຺ຂາຕາ ປເຫຬິກາຍໍ ວິສເຍ ອາຣຸຬ຺ຫາ ເຈ, ນ ຫິ ທຸຏ຺ຐາ ທຸຏ຺ຐາ ນ ໂຫຕິ. ກິມຸທາຫຣຓໍ? ປິຍາ ສຸຂາລິງ຺ຄິຕໍ ກມາລິງ຺ຄຕິ ນຸ ໂນ ອິຕິ, ອິຕິສທ຺ທສ຺ສ ນິທສ຺ສນຕ຺ຖຕ຺ຕາ ເສສອຸທາຫຣຓານເມຕມຸປລກ຺ຂຓນ຺ຕິ ຎາຕພ຺ພໍ. ໂນ ເຈ, ເອວໍປກາຣານມຸທາຫຣຓານມປຣິຄ຺ຄເຫຕພ຺ພຕ຺ຕາ ອິຕິສທ຺ໂທ ປກາຣຕ຺ໂຖຕິ. ປິຍາ ວລ຺ລຠາຍ ອາລິງ຺ຄິຕໍ ອຸປຄຸຫິຕໍ ກໍ ນາມ ຊນໍ ສຸຂໍ ກາຍິກມານສິກໍ ໂນ ອາລິງ຺ຄຕິ ນຸ, ອາລິງ຺ຄເຕວາຕິ. ເອຕ຺ຖ ປິຍາຕິ ກິລິຏ຺ຐປທໍ ປເຫຬິກາຍມາໂຣປເນນ ນິຣາກຕໍ ໂຫຕິ.

໗໔. ຍມເກ ໂນ ປໂຍເຊຍ຺ຍ, ກິລິຏ຺ຐປທ’ມິຈ຺ຉິເຕ;

ຕໂຕ ຍມກ’ມຎ຺ຎໍ ຕຸ, ສພ຺ພເມຕໍມຍໍ ວິຍ.

໗໔. ‘‘ຍມເກ’’ຈ຺ຈາທິ. ຕໂຕ ອຎ຺ຎນ຺ຕິ ອິຈ຺ຉິຕຍມກໂຕ ອຎ຺ຎໍ. ຕຸອິຕິ ວິເສສໂຊຕໂກ. ເອຕໍມຍໍ ວິຍາຕິ ເອເຕນ ກິລິຏ຺ຐປເທນ ນິພ຺ພຕ຺ຕໍ ວິຍ.

໗໔. ‘‘ຍມເກ’’ຈ຺ຈາທິ. ກິລິຏ຺ຐປທໍ ອິຈ຺ຉິເຕ ຍມເກ ອິຏ຺ຐຍມເກ ໂນ ປໂຍເຊຍ຺ຍ ນປ຺ປຍຸຊ຺ເຊຍ຺ຍ, ຕໂຕ ອິຏ຺ຐຍມກໂຕ ອຎ຺ຎໍ ສພ຺ພໍ ຍມກໍ ປນ ເອຕໍມຍໍ ວິຍ ອິມິນາ ກິລິຏ຺ຐປທໂທເສນ ກຕໍ ວິຍ ໂຫຕິ. ເອຕ຺ຖ ອິຏ຺ຐຍມກໍ ວຸຕ຺ຕນເຍນ ຎາຕພ຺ພໍ, ເອເຕນ ນິພ຺ພຕ຺ຕໍ ເອຕໍມຍນ຺ຕິ ວິຄ຺ຄໂຫ.

ເທສວິໂຣຘິໂນ ຍຖາ –

໗໕. ໂພຘິສຕ຺ຕປ຺ປຠາເວນ, ຖເລປິ ຊລຊານ຺ຍ’ຫຸໍ;

ນຸທນ຺ຕານິ’ວ ສຸຈິຣາ-ວາສກ຺ເລສໍ ຕຫິໍ ຊເລ.

໗໕. ‘‘ໂພຘິສຕ຺ເຕ’’ຈ຺ຈາທິ. ໂພຘິສຕ຺ຕສ຺ສ ມາຍາເທວິຍາ ສຸຕສ຺ສ ວກ຺ຂມານສ຺ສ ວິເສສສ຺ສ ຕທຸປ຺ປນ຺ນທິເນ ສມ຺ຠວາ ປຠາເວນ ປຸຎ຺ຎປ຺ປຠາວໂຕ ຊລຊານິ ອມ຺ພຸຊານິ ຖເລປິ ອຫຸໍ ອເຫສຸໍ ອຈິນ຺ຕນີຍຕ຺ຕາ ປຸຎ຺ຎປ຺ປຠາວສ຺ສ. ກິໍ ປນ ວາປ຺ຍາທີສຸ ກິໍ ກໂຣນ຺ຕາວ ຕຫິໍ ຕສ຺ມິຎ຺ຈ ຊເລ ສຸຈິຣໍ ສພ຺ພທາວ ອາວສນມາວາໂສ ເຕນ ຊາໂຕ ກ຺ເລໂສ ຕໍ ນຸທນ຺ຕານິວ ທູຣໂຕ ຊຫນ຺ຕານິເວຕິ. ອຈິນ຺ຕນີຍຕ຺ຕາ ປຸຎ຺ຎປ຺ປຠາວສ຺ສ ອີທິສມ຺ປິ ອຈ຺ຉຣິຍມໂຫສີຕິ ນ ເທສວິໂຣໂຘ.

໗໕. ໂພຘິສຕ຺ຕປ຺ປຠາເວນ ໂພຘິສຕ຺ຕສ຺ສ ອຈິນ຺ເຕຍ຺ຍານຸຠາເວນ ຊລຊານິ ຊລຊສທິສຕ຺ຕາ ຕນ຺ນາມການິ ປທຸມເກຣວາທີນິ ຕຫິໍ ຊເລ ວິສຍຕ຺ເຕນ ປສິທ຺ເຘ ຕສ຺ມິໍ ອຸທເກ ສຸຈິຣາວາສກ຺ເລສໍ ອຕິຈິຣໍ ນິວາສໂຕ ຊາຕອາຍາສໍ ນຸທນ຺ຕານິ ອິວ ຈຊນ຺ຕານິ ອິວ ຖເລປິ ອຫຸໍ ອເຫສຸໍ, ວາປິອາທີສຸ ກາ ກຖາ. ເອຕ຺ຖ ຊລຊານໍ ຖລຸປ຺ປຕ຺ຕິກຖນສງ຺ຂາຕໍ ເທສວິໂຣຘໍ ອຈິນ຺ເຕຍ຺ຍປຸຎ຺ຎປ຺ປຠາເວນ ອີທິສານໍ ອຈ຺ຉຣິຍານໍ ປາຕຸຠາວໂຕ ‘‘ໂພຘິສຕ຺ຕປ຺ປຠາເວນາ’’ຕິ ອິມິນາ ນິຣາກໂຣຕິ. ໂພຘິຍໍ ຈຕຸມຄ຺ຄປຎ຺ຎາຍໍ ສຕ຺ໂຕຕິ ຈ, ຕສ຺ສ ປຠາໂວຕິ ຈ, ສຸຈິຣໍ ອາວາໂສຕິ ຈ, ເຕນ ຠູໂຕ ກ຺ເລໂສຕິ ຈ ວາກ຺ຍໍ.

ກາລວິໂຣຘິໂນ ຍຖາ –

໗໖. ມຫານຸຠາວປິສຸໂນ, ມຸນິໂນ ມນ຺ທມາຣຸໂຕ;

ສພ຺ໂພຕຸກມຍໍ ວາຍິ, ຘຸນນ຺ໂຕ ກຸສຸມໍ ສມໍ.

໗໖. ‘‘ມຫາ’’ອິຈ຺ຈາທິ. ມນ຺ໂທ ມຸທຸຠູໂຕ ມາຣຸໂຕ ອຍໍ ສພ຺ໂພຕຸກໍ ສພ຺ເພສຸ ອຸຕູສຸ ປຸປ຺ຜນກໍ ກຸສຸມໍ ປຸປ຺ຜໍ ສມໍ ເອກໂຕ ກຕ຺ວາ ຘຸນນ຺ໂຕ ວິກິຣນ຺ໂຕ ມຸນິໂນ ມຸນິສທິສຕ຺ຕາ ຠວິສ຺ສນ຺ຕມຸນິຠາເວນ ຈ ໂພຘິສຕ຺ຕສ຺ສ, ມຸນິໂນເຍວ ວາ ສມ຺ມາສມ຺ໂພຘິສມຘິຄມສມເຍ ມຫານຸຠາວສ຺ສ ປິສຸໂນ ສູຈໂກ ວາຍິ ປວາຍຕີຕິ. ເອຕ຺ຖ ຍທ຺ຍເປກທາ ສພ຺ໂພຕຸກາສມ຺ຠໂວ ນານາອຸຕູສຸ ນານາກຸສຸມສ຺ສ ສມ຺ຠວາ, ຕຖາປິ ຠຄວໂຕ ມຫານຸຠາວປິສຸນມີທິສເມກປທິກໍ ສມ຺ຠວຕີຕິ ກາລວິໂຣໂຘ ອິມິນາ ປຣິຫໂຏ.

໗໖. ‘‘ມຫານຸຠາເວ’’ຈ຺ຈາທິ. ອຍໍ ມນ຺ທມາຣຸໂຕ ອຈຓ຺ຑສມີຣໂຓ ສພ຺ໂພຕຸກໍ ວສນ຺ຕາທີສຸ ສພ຺ພອຸຕູສຸ ວິກສນ຺ຕໍ ກຸສຸມໍ ປຸປ຺ຜຊາຕໍ ສມໍ ເອກໂຕ ກຕ຺ວາ ຘຸນນ຺ໂຕ ກມ຺ເປນ຺ໂຕ ມຸນິໂນ ເອກນ຺ຕຠາວິຕ຺ຕາ ມຸນິສງ຺ຂາຕສ຺ສ ໂພຘິສຕ຺ຕສ຺ສ, ສມ຺ມາສມ຺ໂພຘິສມຘິຄມສມເຍ ຠູຕຕ຺ຕາ ມຸນິໂນ ສພ຺ພຎ຺ຎຸໂນ ວາ ມຫານຸຠາວປິສຸໂນ ມຫນ຺ຕໍ ປຸຎ຺ຎປ຺ປຠາວໍ ປກາເສນ຺ໂຕ ວາຍິ ສມ຺ປວາຍີຕິ. ເອຕ຺ຖ ນານາກາເລ ສມ຺ຠວນ຺ຕານມ຺ປິ ກຸສຸມານໍ ເອກກາເລ ສມ຺ຠວສ຺ສ ກາລວິໂຣຘຕ຺ເຕປິ ຠຄວໂຕ ປຸຎ຺ຎານຸຠາໂວ ຕາທິສມຈ຺ຉຣິຍເມກກ຺ຂເຓ ຊເນຕຸໍ ສມຕ຺ໂຖຕິ ກາລວິໂຣຘໍ ‘‘ມຫານຸຠາວປິສຸໂນ’’ຕິ ອິມິນາ ນິຣາກໂຣຕິ. ມຫານຸຠາວສ຺ສ, ມຫານຸຠາວໍ ວາ ປິສຸໂນຕິ ວາກ຺ຍໍ.

ກລາວິໂຣຘິໂນ ຍຖາ –

໗໗. ນິມຸຄ຺ຄມນໂສ ພຸທ຺ຘ-ຄຸເຓ ປຎ຺ຈສິຂສ຺ສປິ;

ຕນ຺ຕິສ຺ສຣວິໂຣໂຘ ໂສ, ນ ສມ຺ປີເຓຕິ ກໍ ຊນໍ.

໗໗. ‘‘ນິມຸຄ຺ຄິ’’ຈ຺ຈາທິ. ພຸທ຺ຘສ຺ສ ຄຸເຓ ສີລາທິເກ ອປຣິມາເຓ ນິມຸຄ຺ຄໍ ໂອຄາຬ຺ຫໍ ມນໍ ຈິຕ຺ຕໍ ຍສ຺ສ ຕສ຺ສ ປຎ຺ຈສິຂສ຺ສ ຄນ຺ຘພ຺ພເທວປຸຕ຺ຕສ຺ສປິ ວີຓາຍ ຕນ຺ຕິຍາ ສໂຣ ກິຣິຍາກາລມານລກ຺ຂຓວິລມ຺ພິຕທຸຕມຊ຺ຌເຠທຠິນ຺ໂນ ຉຊ຺ຊາທິໂກ ຕສ຺ສ ວິໂຣໂຘ ກລາສຕ຺ຖປຣິນິທ຺ທິຏ຺ຐກມເວສມໍ ກໍ ຊນໍ ນ ສມ຺ປີເຓຕິ, ປີເຓຕິເຍວ. ສມ຺ມາສມ຺ພຸທ຺ຘສ຺ສ ໂລກິຍຄຸຓານຸພນ຺ຘພຸທ຺ຘີນໍ ວິກ຺ເຂປປ຺ປວຕ຺ຕິປິ ຕຖາວິຘໍ ປີເຓຕີຕິ. ‘‘ພຸທ຺ຘຄຸເຓ ນິມຸຄ຺ຄມນໂສ’’ຕິ ອິມິນາ ກລາວິໂຣໂຘ ປຣິຫໂຏ.

໗໗. ‘‘ນິມຸຄ຺ຄິ’’ຈ຺ຈາທິ. ພຸທ຺ຘຄຸເຓ ສພ຺ພຎ຺ຎຸໂນ ວິມ຺ຫຍຊນກສີລາທິຄຸຓສມ຺ຠາເຣ ນິມຸຄ຺ຄມນໂສ ໂອຕິຓ຺ຓຈິຕ຺ຕສ຺ສ ປຎ຺ຈສິຂສ຺ສປິ ຄນ຺ຘພ຺ພເທວປຸຕ຺ຕສ຺ສາປິ ໂສ ຕນ຺ຕິສ຺ສຣວິໂຣໂຘ ວີຓາຍ ຕນ຺ຕິຍາ ຆຏ຺ຏນກິຣິຍາ, ອທ຺ຘມຕ຺ຕິກາທິກາໂລ, ຫຕ຺ຖາທີນໍ ສນ຺ນິເວສລກ຺ຂໂຓ ມາໂນຕິ ອິເມຫິ ຕີຫິ ລກ຺ຂເຓຫິ ຍຸຕ຺ຕສ຺ສ ມນ຺ທສີຆມຊ຺ຌິມປ຺ປມາເຓຫິ ຠິນ຺ນສ຺ສ ຉຊ຺ຊາທິສຕ຺ຕສຣສ຺ສ ກລາສຕ຺ຖາຄຕກ຺ກມສ຺ສ ວິນາສສງ຺ຂາໂຕ ວິໂຣໂຘ ກໍ ຊນໍ ນ ສມ຺ປີເຓຕິ, ສມ຺ປີເຓຕິ ເອວ. ເອຕ຺ຖ ອກນ຺ຕິຍາ ກາຣຓຠູໂຕ ກລາສຕ຺ຖາຄຕກ຺ກມຠງ຺ໂຄ ໂລກຸຕ຺ຕຣພຸທ຺ຘຄຸຓານຸຄຕພຸທ຺ຘິຍາ ຊາໂຕຕິ ໂສ ຠງ຺ໂຄ ‘‘ນິມຸຄ຺ຄມນໂສ ພຸທ຺ຘຄຸເຓ’’ຕິ ວຸຕ຺ຕຕ຺ຕາ ປີຕິຍາ ກາຣຓເມເວຕິ ນ ວິໂຣໂຘ. ນິມຸຄ຺ໂຄ ມໂນ ອສ຺ສາຕິ ຈ, ຕນ຺ຕິຍາ ສໂຣຕິ ຈ, ເຕສໍ ວິໂຣໂຘຕິ ຈ ວາກ຺ຍໍ.

ໂລກວິໂຣຘິໂນ ຍຖາ –

໗໘. ຄຓເຍ ຈກ຺ກວາຬໍ ໂສ, ຈນ຺ທນາຍປິ ສີຕລໍ;

ສມ຺ໂພຘິສຕ຺ຕຫທໂຍ, ປທິຕ຺ຕງ຺ຄາຣປູຣິຕໍ.

໗໘. ‘‘ຄຓເຍ’’ຈ຺ຈາທິ. ຈນ຺ທນາຍ ອປິ ສີຕລໍ ຄຓເຍ ຈິນ຺ເຕສິ. ກິນ຺ຕໍ? ປທິຕ຺ຕງ຺ຄາຣປູຣິຕໍ ຈກ຺ກວາຬໍ. ໂກ ໂສ? ສມ຺ໂພຘິຍໍ ສພ຺ພຎ຺ຎຸຕຎ຺ຎາເຓ ສຕ຺ຕໍ ປຣິພທ຺ຘໍ ຫທຍໍ ຈິຕ຺ຕໍ ຍສ຺ສ ໂສ. ສພ຺ພຎ຺ຎຸຕຎ຺ຎາຓານຸພນ຺ຘພຸທ຺ຘິໂນ ຫິ ຕາທິໂສ ມໂນພນ຺ໂຘຕິ ນ ໂລກວິໂຣໂຘ.

໗໘. ‘‘ຄຓເຍ’’ຈ຺ຈາທິ. ສມ຺ໂພຘິສຕ຺ຕຫທໂຍ ສພ຺ພຎ຺ຎຸຕຎ຺ຎາເຓ ອາສຕ຺ຕຈິຕ຺ໂຕ ໂສ ໂພຘິສຕ຺ໂຕ ປທິຕ຺ຕງ຺ຄາຣປູຣິຕໍ ອາທິຕ຺ຕງ຺ຄາເຣຫິ ປຣິປຸຓ຺ຓໍ ຈກ຺ກວາຬໍ ຈກ຺ກວາຬຄພ຺ຠໍ ຈນ຺ທນາຍປິ ຈນ຺ທນໂຕ ອປິ ສີຕລໍ ອຕິສີຕລໍ ກຕ຺ວາ ຄຓເຍ ຈິນ຺ເຕຍ຺ຍາຕິ. ອິຏ຺ຐຕ຺ຖລຸທ຺ຘສ຺ສ ຈິຕ຺ຕປ຺ປວຕ຺ຕິຍາ ອີທິສຕ຺ຕາ ອຄ຺ຄິໂນ ຈນ຺ທນໂຕປິ ອຘິກສີຕຕ຺ຕກປ຺ປນາ ‘‘ຈນ຺ທນໍ ສີຕລໍ, ອຄ຺ຄິ ອຸຓ຺ໂຫ’’ຕິ ປວຕ຺ຕໂລກສີມາຍ ວິຣຸທ຺ຘາ ນ ໂຫຕິ. ສມ຺ໂພຘິຍໍ ສຕ຺ຕຫທຍໍ ຍສ຺ເສຕິ ຈ, ປທິຕ຺ຕານິ ອງ຺ຄາຣານີຕິ ຈ, ເຕຫິ ປູຣິຕນ຺ຕິ ຈ ວິຄ຺ຄໂຫ.

ຎາຍວິໂຣຘິໂນ ຍຖາ –

໗໙. ປຣິຈ຺ຈຕ຺ຕຠໂວປິ ຕ຺ວ-ມຸປນີຕຠໂວ ອສິ;

ອຈິນ຺ຕ຺ຍຄຸຓສາຣາຍ, ນໂມ ເຕ ມຸນິປຸງ຺ຄວ.

໗໙. ‘‘ປຣິຈ຺ຈຕ຺ເຕ’’ຈ຺ຈາທິ. ມຸນິປຸງ຺ຄວ ມຸນີນໍ ອຸຕ຺ຕມ ປຣິຈ຺ຈຕ຺ໂຕ ວິສຏ຺ໂຐ ຠໂວ ສຸຄຕິທຸຄ຺ຄຕິສງ຺ຂາໂຕ ເຍນາຕິ ປຣິຈ຺ຈຕ຺ຕຠໂວປິ ຕ຺ວໍ ອຸປນີໂຕ ອານີໂຕ ປວຕ຺ຕິໂຕ ຠໂວ ວຸຑ຺ຒິ ເຍນາຕິ ອຸປນີຕຠໂວ ອສິ. ຕສ຺ມາ ກາຣຓາ ອຈິນ຺ຕ຺ຍຄຸຓສາຣາຍ ເຕ ນໂມ ອຕ຺ຖູຕິ ເສໂສ. ອີທິສໍ ນ ຎາຍວິຣຸທ຺ຘເມວໍວິຘຕ຺ຕາ ມຸນິປຸງ຺ຄວສ຺ສ.

໗໙. ‘‘ປຣິຈ຺ຈຕ຺ເຕ’’ຈ຺ຈາທິ. ມຸນິປຸງ຺ຄວ ມຸນິເສຏ຺ຐ ຕ຺ວໍ ປຣິຈ຺ຈຕ຺ຕຠໂວປິ ອປນີຕສຸຄຕິທຸຄ຺ຄຕິຠໂວປິ ອຸປນີຕຠໂວ ໂລກສ຺ສານີຕອຠິວຸທ຺ຘິໂກ ອສິ ຠວສິ, ອຈິນ຺ຕ຺ຍຄຸຓສາຣາຍ ຕໂຕ ເອວ ຈິນ຺ຕາວິສຍາຕິກ຺ກນ຺ຕສາຣຄຸຓສ຺ສ ເຕ ຕຸຍ຺ຫໍ ນໂມ ອຕ຺ຖູຕິ ສພ຺ພາກາຣໂຕ ຠວສ຺ສ ປຣິຈ຺ຈຕ຺ຕຕ຺ຕາ ອຕ຺ຕນິ ອວິຊ຺ຊມານໍ ສຸຄຕິຠວໍ ໂລກສ຺ສ ເທຕີຕິ ເອຕໍ ຎາຍາຄຕໍ ນ ໂຫຕີຕິ ປຏິຠາຕິ, ຕຖາປິ ຈ ສພ຺ພຎ຺ຎູນໍ ປວຕ຺ຕິ ອີທິສາເຍວາຕິ ຎາຍວິໂຣໂຘ ນິຣາກໂຕ. ອຈິນ຺ຕ຺ຍາ ຄຸຓສາຣາ ຍສ຺ມິນ຺ຕິ ວິຄ຺ຄໂຫ.

ອາຄມວິໂຣຘິໂນ ຍຖາ –

໘໐. ເນວາລປຕິ ເກນາປິ, ວຈີວິຎ຺ຎຕ຺ຕິໂຕ ຍຕິ;

ສມ຺ປຊານມຸສາວາທາ, ຜຸເສຍ຺ຍາປຕ຺ຕິທຸກ຺ກຏໍ.

໘໐. ‘‘ເນເວ’’ຕິອາທິ. ຍຕີຕິ ຠິກ຺ຂຸ ເກນາປິ ສຫ ເນວາລປຕິ ນ ວທຕ຺ເຍວ, ຕຖາປິ ວຈີວິຎ຺ຎຕ຺ຕິໂຕ ໂຈປນວາຈາສງ຺ຂາເຕນ ວຈີວິຎ຺ຎຕ຺ຕິເຫຕຸນາ ປວຕ຺ຕິໂຕ ສມ຺ປຊານນ຺ຕສ຺ສ ມຸສາວາທໂຕ ກາຣຓາ ອາປຕ຺ຕິທຸກ຺ກຏໍ ‘‘ສມ຺ປຊານມຸສາວາທສ຺ສ ໂຫຕີ’’ຕິ ວຸຕ຺ຕທຸກ຺ກຏາປຕ຺ຕິ ຜຸເສຍ຺ຍ ອາປຊ຺ຊຕີຕິ. ເອຕ຺ຖ ອນາລປໂຕ ວຈີວິຎ຺ຎຕ຺ຕິຍາ ກຖໍ ມຸສາວາໂທຕິ ອຠິຘມ຺ມາປນ຺ນວິໂຣໂຘ ນຕ຺ຖິ, ອປຣວຈນຕ຺ເຖ ຕ຺ວີທິໂສ ວິຣຸຊ຺ຌຕີຕິ.

໘໐. ‘‘ເນວິ’’ຈ຺ຈາທິ. ຍຕິ ສມໂຓ ເກນາປິ ເກນຈິ ສທ຺ຘິໍ ເນວາລປຕິ ໂນ ຠາສຕິ, ຕຖາປິ ວຈີວິຎ຺ຎຕ຺ຕິໂຕ ໂຈປນວາຈາສງ຺ຂາຕວິຎ຺ຎຕ຺ຕິກາຣຓາ ປວຕ຺ຕນໂຕ ສມ຺ປຊານມຸສາວາທາ ສມ຺ປຊານນ຺ຕສ຺ສ ມຸສາຠຓນໂຕ ອາປຕ຺ຕິທຸກ຺ກຏໍ ທຸກ຺ກຏາປຕ຺ຕິໍ ຜຸເສຍ຺ຍ ອາປຊ຺ເຊຍ຺ຍາຕິ. ເອຕ຺ຖ ອນາລປນ຺ຕສ຺ສ ວຈີວິຎ຺ຎຕ຺ຕິໂຕ ມຸສາວາໂທ ກຖໍ ສມ຺ຠວຕີຕິ ອຠິຘມ຺ມາປນ຺ນວິໂຣໂຘ, ‘‘ສນ຺ຕິໍ ອາປຕ຺ຕິໍ ນາວິກເຣຍ຺ຍ, ສມ຺ປຊານມຸສາວາທ’ສ຺ສ ໂຫຕີ’’ຕິ ນິທານຸທ຺ເທເສ ນິທ຺ທິຏ຺ຐວຈີທ຺ວາເຣ ອກິຣິຍສມຸຏ຺ຐານາ ທຸກ຺ກຏາປຕ຺ຕິ ໂຫຕີຕິ ອາຄມວິໂຣໂຘ ນິຣາກໂຕ. ມຸສາຠຓນໍ ວິນາ ອາປຕ຺ຕິ ກຖໍ ຠວຕີຕິ? ຍຖາ ກາເລ ອວສ຺ສມານເມຆໂຕ ສຎ຺ຊາຕທຸພ຺ຠິກ຺ຂໍ ‘‘ເມຆກຕໍ ທຸພ຺ຠິກ຺ຂ’’ນ຺ຕິ ວຕ຺ຕພ຺ພໍ ໂຫຕິ, ເອວໍ ກເຖຕພ຺ພກາເລ ອກຖນໂຕ ສຎ຺ຊາຕາ ວຈີທ຺ວາເຣ ອກິຣິຍສມຸຏ຺ຐານາ ທຸກ຺ກຏາປຕ຺ຕິປິ ຕໂຕ ສຎ຺ຊາຕາຕິ ວຕ຺ຕພ຺ພາ ໂຫຕິ. ສມ຺ປຊານນ຺ຕສ຺ສ ມຸສາວາໂທຕິ ຈ, ອາປຕ຺ຕິເຍວ ທຸກ຺ກຏນ຺ຕິ ຈ ວາກ຺ຍໍ.

ເນຍ຺ຍສ຺ສ ຍຖາ –

໘໑. ມຣີຈິຈນ຺ທນາເລປ-ລາຠາ ສີຕມຣີຈິໂນ [ສິຕມຣີຈິໂນ (ສີ.)];

ອິມາ ສພ຺ພາປິ ຘວລາ, ທິສາ ໂຣຈນ຺ຕິ ນິພ຺ຠຣໍ.

໘໑. ‘‘ມຣີຈີ’’ຕ຺ຍາທິ. ສີຕມຣີຈິໂນ ຈນ຺ທສ຺ສ ມຣີຈິໂຍ ທີຘິຕິໂຍ ເອວ ຈນ຺ທນໍ, ຕສ຺ສ ອາເລໂປ ອຸປເທໂຫ, ຕສ຺ສ ລາເຠນ ອິມາ ສພ຺ພາປິ ທິສາ ນິພ຺ຠຣມຕິສຍໍ ຘວລາ ເສຕາ ໂຣຈນ຺ຕີຕິ ນຕ຺ເຖຕ຺ຖ ເນຍ຺ຍຕາ ມຣີຈິຍາ ສທ຺ໂທປາຕ຺ຕຕ຺ຖາຍ ຕຸ.

໘໑. ‘‘ມຣີຈິ’’ຈ຺ຈາທິ. ສີຕມຣີຈິໂນ ຈນ຺ທສ຺ສ ມຣີຈິຈນ຺ທນາເລປລາຠາ ມຣີຈິສງ຺ຂາຕຈນ຺ທນາເລປສ຺ສ ປຏິລາຠໂຕ ອິມາ ສພ຺ພາປິ ທິສາ ນິພ຺ຠຣມຕິສຍໍ ຘວລາ ເສຕາ ໂຣຈນ຺ຕິ ທິພ຺ພນ຺ຕີຕິ. ທິສານໍ ຘວລກາຣຓສ຺ສ ‘‘ມຣີຈິຈນ຺ທນາເລປລາຠາ ສີຕມຣີຈິໂນ’’ຕິ ວຸຕ຺ຕຕ຺ຕາ ເນຍ຺ຍໂທໂສ ນ ປຕິຏ຺ຐາຕິ, ຈນ຺ທນມິວ ຈນ຺ທນໍ, ມຣີຈິໂຍເຍວ ຈນ຺ທນມິຕິ ຈ, ຕສ຺ສ ອາເລໂປຕິ ຈ, ຕສ຺ສ ລາໂຠຕິ ຈ ວິຄ຺ຄໂຫ.

ຍຖາ ວາ –

໘໑. ມໂນນຸຣຎ຺ຊໂນ ມາຣ-ງ຺ຄນາສິງ຺ຄາຣວິພ຺ຠໂມ;

ຊິເນນາ’ສມນຸຎ຺ຎາໂຕ, ມາຣສ຺ສ ຫທຍານໂລ.

໘໒. ‘‘ມໂນ’’ຈ຺ຈາທິ. ມນໍ ປສ຺ສນ຺ຕານມນຸສ຺ສຣນ຺ຕານຎ຺ຈ ຈິຕ຺ຕໍ ອນຸຣຎ຺ເຊຕີຕິ ມໂນນຸຣຎ຺ຊໂນ, ມາຣງ຺ຄນານໍ ສິງ຺ຄາຣກໂຕ ວິພ຺ຠໂມ ວິລາໂສ ຊິເນນ ອສມນຸຎ຺ຎາໂຕ ອພ຺ຠຸປຄໂຕ ມາຣສ຺ສ ວສວຕ຺ຕິໂນ ຫທຍານໂລ ຫທຍຄ຺ຄິ ຊາໂຕ. ໂສໂກ ເຈຕ຺ຖ ອນລຕ຺ເຖ ນິຣຸປ຺ປິໂຕ ຕສ຺ສ ຕາທິສຕ຺ຖານຕິວຕ຺ຕນໂຕ, ກາຣຓນ຺ຕຸປຈາເຣນາຕິ. ເອຕ຺ຖ ຍຊ຺ຊປິ ມາຣງ຺ຄນາປຣາຊໂຍ ນ ສທ຺ໂທປາຕ຺ຕຕ຺ໂຖ, ຕຖາປິ ‘‘ສິງ຺ຄາຣວິພ຺ຠໂມ ມາຣສ຺ສ ຫທຍຄ຺ຄີ’’ຕິ ວຸຕ຺ເຕ ສາມຕ຺ຖິຍາ ມາຣງ຺ຄນາປຣາຊໂຍ ຄມ຺ຍເຕ, ຕຖາວິຘສ຺ສ ມາຣໂສກສ຺ສ ມາຣງ຺ຄນາປຣາຊຍາພ຺ຍຠິຈາຣໂຕ. ເນເວທິສສ຺ສ ເນຍ຺ຍຕາ, ວງ຺ກວຸຕ຺ຕີທິສີ ຄຸໂຓເຍວ ພນ຺ຘສ຺ສ.

໘໒. ວຕ຺ຕພ຺ພສ຺ສ ຎາໂຍປາຕ຺ຕຕ຺ຕາ ເນຍ຺ຍໂທສປຣິຫາຣຕ຺ຖມຸທາຫຣຕິ ‘‘ມໂນ’’ຈ຺ຈາທິ. ມໂນນຸຣຎ຺ຊໂນ ທສ຺ສນສວນານຸສ຺ສຣຓໍ ກໂຣນ຺ຕານໍ ຊນານໍ ຈິຕ຺ຕມຕ຺ຕນິ ອນຸຣຎ຺ຊນ຺ໂຕ ມາຣງ຺ຄນາສິງ຺ຄາຣວິພ຺ຠໂມ ມາຣວຘູນໍ ຣຕິກີຬາເຫຕຸຠູຕກາມປຕ຺ຖນາສງ຺ຂາຕສິງ຺ຄາເຣນ ກຕລີລາ ຊິເນນ ຊິຕປຎ຺ຈມາເຣນ ສຕ຺ຖຸນາ ອສມນຸຎ຺ຎາໂຕ ອນພ຺ຠຸປຄໂຕ ອສມ຺ປຏິຈ຺ຉິໂຕ ມາຣສ຺ສ ວສວຕ຺ຕິໂນ ຫທຍານໂລ ຫທຍຄ຺ຄິ ອໂຫສີຕິ. ອນລຕ຺ເຕນ ກປ຺ປິຕກາຣິຍຠູໂຕ ໂສໂກ ມາຣງ຺ຄນາສິງ຺ຄາຣວິພ຺ຠມສງ຺ຂາຕກາຣເຓນ ສທ຺ຘິໍ ອເຠທກປ຺ປນາຍ [ອນລຕ຺ຕກປ຺ປນາຍ (ກ.)] ‘‘ຄຸໂຬ ເສມ຺ຫໍ, ຕິປຸສໍ ຊໂຣ’’ຕິອາທີສຸ ວິຍ ຕຸລ຺ຍາຘິກຣຓຠາເວນ ວຸຕ຺ໂຕ ໂຫຕິ. ເອຕ຺ຖ ກິຎ຺ຈາປິ ມາຣງ຺ຄນານໍ ປຣາຊຍວາຈໂກ ສທ຺ໂທ ນຕ຺ຖິ, ຕຖາປິ ‘‘ສິງ຺ຄາຣວິພ຺ຠໂມ ມາຣສ຺ສ ຫທຍານໂລ’’ຕິ ວຸຕ຺ເຕ ມາຣງ຺ຄນາປຣາຊຍໍ ວິນາ ຕາທິສໂສກຸປ຺ປຕ຺ຕິກາຣຓສ຺ສ ອນຘິຄຕຕ຺ຕາ ອຎ຺ຎຖານຸປປຕ຺ຕິລກ຺ຂຓສາມຕ຺ຖິເຍນ ຕາສໍ ປຣາຊໂຍ ປກາສິໂຕ ໂຫຕີຕິ ອີທິສວງ຺ກວຸຕ຺ຕິຍາ ພນ຺ຘຄຸຓຕ຺ຕາ ເນຍ຺ຍໂທໂສ ນິຣາກໂຕ ໂຫຕີຕິ. ມໂນ ອນຸຣຎ຺ເຊຕີຕິ ຈ, ມາຣງ຺ຄນານໍ ສິງ຺ຄາໂຣຕິ ຈ, ເຕນ ກໂຕ ວິພ຺ຠໂມຕິ ຈ ວາກ຺ຍໍ.

ວິເສສນາເປກ຺ຂສ຺ສ ຍຖາ –

໘໓. ອປຍາຕາປຣາຘມ຺ປິ, ອຍໍ ເວຣີ ຊນໍ ຊໂນ;

ໂກຘປາຏລຠູເຕນ, ຠິຍ຺ໂຍ ປສ຺ສຕິ ຈກ຺ຂຸນາ.

໘໓. ‘‘ອປຍາເຕ’’ຈ຺ຈາທິ. ອຍໍ ເວຣີ ຊໂນ ອປຍາຕາປຣາຘມ຺ປິ ຊນນ຺ຕິ ສມ຺ພນ຺ໂຘ. ອປຍາໂຕ ອປຄໂຕ ອປຣາໂຘ ຍສ຺ສ ຕໍ, ໂກເຘນ ປາຏລຠູເຕນ ເສຕຣຕ຺ເຕນ. ອິມິນາ ວິເສສນາເປກ຺ຂໂທໂສ ປຣິຫໂຏ.

໘໓. ‘‘ອປຍາຕິ’’ຈ຺ຈາທິ. ອຍໍ ເວຣີ ຊໂນ ອປຍາຕາປຣາຘມ຺ປິ ອປຄຕາປຣາຘມ຺ປິ ຊນໍ ໂກຘປາຏລຠູເຕນ ໂກເຘນ ຠູຕເສຕໂລຫິຕວຓ຺ຓຍຸຕ຺ເຕນ ຈກ຺ຂຸນາ ຠິຍ຺ໂຍ ເຍຠຸຍ຺ເຍນ ປສ຺ສຕີຕິ. ‘‘ປສ຺ສຕີ’’ຕິ ວຈນສ຺ສ ວິຊ຺ຊມານຕ຺ເຕປິ ‘‘ຈກ຺ຂຸນາ’’ຕິ ວິເສສ຺ຍວຈນໍ ‘‘ໂກຘປາຏລຠູເຕນາ’’ຕິ ວິເສສນສ຺ສ ລພ຺ຠມານຕ຺ຕາ ສາຕ຺ຖກໍ ໂຫຕີຕິ ວິເສສນາເປກ຺ຂໂທໂສ ນິຣາກໂຕຕິ. ອປຍາໂຕ ອປຄໂຕ ອປຣາໂຘ ອສ຺ມາຕິ ຈ, ໂກເຘນ ປາຏລຠູຕນ຺ຕິ ຈ ວິຄ຺ຄໂຫ.

ຫີນຕ຺ຖສ຺ສ ຍຖາ –

໘໔. ອປ຺ປການມ຺ປິ ປາປານໍ,

ປຠາວໍ ນາສເຍ ພຸໂຘ;

ອປິ ນິປ຺ປຠຕານີຕ-

ຂຊ຺ໂຊໂຕ ໂຫຕິ ຠາຓຸມາ.

໘໔. ‘‘ອປ຺ປການ’’ມິຈ຺ຈາທິ. ພຸໂຘ ປຓ຺ຑິຕໂປໂສ ອປ຺ປການໍ ປາປານມ຺ປິ ກິມຸຕມຘິການໍ ປຠາວໍ ອານຸຠາວໍ ນາສເຍ ອປ຺ປວຕ຺ຕິໍ ປາເປຍ຺ຍ. ຕໍ ອຕ຺ຖນ຺ຕຣນ຺ຍາເສນ ສາເຘຕິ. ຠາຓຸມາ ສູຣິໂຍ ນິປ຺ປຠຕໍ ອານີໂຕ ຂຊ຺ໂຊໂຕ ເຍນ ຕຖາວິໂຘ ອປິ ໂຫຕິ. ‘‘ມນ຺ທປ຺ປໂຠ ອຍ’’ນ຺ຕິ ໂຊຕິຣິງ຺ຄຓມ຺ປິ ໂນເປກ຺ຂຕິ ຈກ຺ກວາຬກຸຫຣານຸຈຣິຕມຫານຸຠາໂວປີຕິ. ເອຕ຺ຖ ອປີຕ຺ຍາທິນາ ວໂຈຠງ຺ຄິຍາ ຫີນຕ຺ຖໂທໂສ ປຣິຫໂຏ.

໘໔. ‘‘ອປ຺ປການິ’’ຈ຺ຈາທິ. ພຸໂຘ ປຎ຺ຎວາ ອປ຺ປການມ຺ປິ ອຕິມນ຺ທານມ຺ປິ ປາປານໍ ອກຸສລານໍ ປຠາວໍ ວິປາກທານສາມຕ຺ຖິຍສງ຺ຂາຕານຸຠາວໍ ນາສເຍ ອໂຫສິກມ຺ມຕາປາທເນນ ນາເສຍ຺ຍ, ພຫູນໍ ປາປານໍ ວຕ຺ຕພ຺ພເມວ ນຕ຺ຖິ. ຕມຕ຺ຖມຕ຺ຖນ຺ຕຣນ຺ຍາສາລງ຺ກາເຣນ ສມຕ຺ເຖຕິ ອປິຈ຺ຈາທິ. ຠາຓຸມາ ສູຣິໂຍ ນິປ຺ປຠຕານີຕຂຊ຺ໂຊໂຕ ອປິ ນິປ຺ປຠຕມາປາທິຕໂຊຕິຣິງ຺ຄເຓຫິ ສມນ຺ນາຄໂຕປິ ໂຫຕີຕິ. ຫີນປຠາໂວ ໂຫຕິ ຂຊ຺ໂຊປນເກ ປຫາຍ ອຕ຺ຕໂນ ອາໂລກໍ ກໂຣນ຺ໂຕ ນ ໂຫຕີຕິ ອຘິປ຺ປາໂຍ. ເອຕ຺ຖ ອປິ ນິປ຺ປຠຕິຈ຺ຈາທິວຈນວິລາສວເສນ ຫີນປກ຺ຂໍ ຄເຫຕ຺ວາປິ ສູຣິຍອຸທາຣຕ຺ຕສ຺ເສວ ໂປສິຕຕ຺ຕາ ‘‘ນິປ຺ປຠຕານີຕຂຊ຺ໂຊໂຕ’’ຕິ ວິເສສນປທໍ ຫີນຕ຺ຖໂທສໍ ນ ນິສ຺ສຍຕິ. ນຕ຺ຖິ ປຠາ ເຍສນ຺ຕິ ຈ, ເຕສໍ ຠາໂວຕິ ຈ, ຕໍ ອານີຕາ ຂຊ຺ໂຊຕາ ເຍເນຕິ ຈ ວິຄ຺ຄໂຫ.

ອນຕ຺ຖສ຺ສ ຍຖາ –

໘໕. ນ ປາທປູຣຓຕ຺ຖາຍ, ປທໍ ໂຍເຊຍ຺ຍ ກຕ຺ຖຈິ;

ຍຖາ ວນ຺ເທ ມຸນິນ຺ທສ຺ສ, ປາທປງ຺ເກຣຸຫໍ ວຣໍ.

໘໕. ‘‘ນ ປາເທ’’ຈ຺ຈາທິ. ເອຕ຺ຖ ວນ຺ເທອິຈ຺ຈາໂທ ເຫຏ຺ຐາ ວິຍ ປາທປູຣຓສ຺ສ ກສ຺ສຈິ ອຠາເວນ ອນຕ຺ຖາຠາໂວ.

໘໕. ‘‘ນ ປາທິ’’ຈ຺ຈາທິ. ປາທປູຣຓຕ຺ຖາຍ ຄາຖາປາທານໍ ປູຣຓສງ຺ຂາຕປໂຍຊນຕ຺ຖາຍ ປທໍ ນາມາທິກໍ ກຕ຺ຖຈິ ນ ໂຍເຊຍ຺ຍ ວິຎ຺ຎູຕິ, ຍຖາ ນິຣຕ຺ຖກປທາໂຍຊເນ ອຸທາຫຣຓເມວໍ ‘‘ມຸນິນ຺ທສ຺ສ ວຣໍ ປາທປງ຺ເກຣຸຫໍ ວນ຺ເທ’’ຕິ. ເຫຏ຺ຐາ ທຸຏ຺ໂຐທາຫຣເຓ ວິຍ ປາທປູຣຓຕ຺ຖໍ ກສ຺ສຈິ ປທສ຺ສ ອໂຍຊິຕຕ຺ຕາ ສາຕ຺ຖກປເທຫິ ນິຣຕ຺ຖກໂທໂສ ນິຣາກໂຕຕິ. ມຸທຸນິມ຺ມລໂສຠາທິສາຘາຣຓຄຸຓໂຍຄໂຕ ປງ຺ເກຣຸຫສທິສໍ ອຸປຈາຣໂຕ ປງ຺ເກຣຸຫໍ ນາມ. ປາທເມວ ປງ຺ເກຣຸຫນ຺ຕິ ວິຄ຺ຄໂຫ. ວິເສສນວິເສສ຺ຍປທໂທສປຣິຫາໂຣ.

໘໖. ຠຍໂກຘປສໍສາທິ-

ວິເສໂສ ຕາທິໂສ ຍທິ;

ວຕ຺ຕຸໍ ກາມີຍເຕ ໂທໂສ,

ນ ຕຕ຺ເຖ’ກຕ຺ຖຕາກໂຕ.

໘໖. ‘‘ຠເຍ’’ຈ຺ຈາທິ. ຠຍຎ຺ຈ ຈິຕ຺ຕຸຕ຺ຣາໂສ ໂກໂຘ ຈ ໂທໂສ ປສໍສາ ຈ ຖຸຕິ, ຕາ ອາທິ ຍສ຺ສ ຕຸຣິຕາທິໂນ ໂສ ຕາທິໂສ ວິເສໂສ ຍທິ ວຕ຺ຕຸໍ ກາມີຍເຕ ອິຈ຺ຉີຍເຕ, ຕຕ຺ຖ ຕສ຺ມິໍ ຠຍາທິວິເສເສ ວິສເຍ ເອກຕ຺ຖຕາຍ ເອກຕ຺ຖຠາເວນ ກໂຕ ໂທໂສ ນຕ຺ຖິ.

໘໖. ອິທານິ ວາກ຺ຍໂທສປຣິຫາຣຕ຺ຖມາຣຠຕິ ‘‘ຠຍໂກເຘ’’ຈ຺ຈາທິ. ຠຍໂກຘປສໍສາທິ ຈິຕ຺ຕຸຕ຺ຣາສປຏິຆຖຸຕິອາທີຫິ ສມນ຺ນາຄໂຕ ຕາທິໂສ ວິເສໂສ ວຕ຺ຕຸໍ ຍທິ ກາມີຍເຕ ເຈ ວິຎ຺ຎູຫິ ອິຈ຺ຉີຍເຕ, ຕຕ຺ຖ ຠຍໂກຘາທິເກ ວິເສເສ ເອກຕ຺ຖຕາກໂຕ ເອກຕ຺ຖຠາເວນ ກໂຕ ໂທໂສ ວາກ຺ຍໂທໂສ ນ ຠວຕິ. ຠຍາທິວິເສເສ ວຕ຺ຕຸມິຈ຺ຉິເຕ ປຸພ຺ພຸຈ຺ຈາຣິຕປທສ຺ສ ປຸນຸຈ຺ຈາຣເຓ ເອກຕ຺ຖໂທໂສ ນ ໂຫຕີຕິ ອຘິປ຺ປາໂຍ. ຠຍຎ຺ຈ ໂກໂຘ ຈ ປສໍສາ ຈາຕິ ຈ, ຕາ ອາທິ ຍສ຺ສ ຕຸຣິຕໂກຕູຫລອຈ຺ຉຣາຫາສໂສກປສາທສງ຺ຂາຕສ຺ສ ອຕ຺ຖວິເສສສ຺ເສຕິ ຈ ວິຄ຺ຄໂຫ. ຕຄ຺ຄຸຓສໍວິຎ຺ຎາຓອຎ຺ຎປທຕ຺ຖສມາສຕ຺ຕາ ຠຍາທີສຸ ກຖິຕມປິ ຄເຫຕ຺ວາ ປຸນປ຺ປຸນໍ ກຖນມວິໂຣຘໍ. ເອໂກ ອຕ຺ໂຖ ເຍສໍ ປທາທີນໍ ເຕ ເອກຕ຺ຖາ, ເຕສໍ ຠາໂວ ເອກຕ຺ຖຕາ, ຕາຍ ກໂຕຕິ ວິຄ຺ຄໂຫ.

ຍຖາ –

໘໗. ສປ຺ໂປ ສປ຺ໂປ ອຍໍ ຫນ຺ທ, ນິວຕ຺ຕຕຸ ຠວໍ ຕໂຕ;

ຍທິ ຊີວິຕຸກາໂມ’ສິ, ກຖໍ ຕມຸປສປ຺ປສິ.

໘໗. ‘‘ຍເຖ’’ຕ຺ຍຸທາຫຣຕິ ‘‘ສປ຺ໂປ’’ອິຈ຺ຈາທິ. ‘‘ອຍໍ ສປ຺ໂປ ສປ຺ໂປ’’ຕິ ຠເຍນາເມຑິຕໍ ຫນ຺ທາຕິ ເຂເທ ຕໂຕ ຕມ຺ຫາ ຐານາ, ສປ຺ປໂຕ ວາ ຠວໍ ຠວນ຺ໂຕ ນິວຕ຺ຕຕຸ ຄຕມຄ຺ຄາຠິມຸໂຂ ອາວຕ຺ຕຕຸ. ຕໍ ຐານໍ, ສປ຺ປໍ ວາ. ນຕ຺ເຖຕ຺ຖ ເອກຕ຺ຖຕາໂທໂສ ຠເຍນາເມຑິຕປ຺ປໂຍຄໂຕ.

໘໗. ‘‘ສປ຺ໂປ’’ຈ຺ຈາທິ. ຫນ຺ທ ນຏ຺ໂຐ ວຕ, ອຍໍ ສປ຺ໂປ ສປ຺ໂປ ຠວໍ ຕໂຕ ຐານໂຕ, ສປ຺ປໂຕ ວາ ນິວຕ຺ຕຕຸ ອາວຕ຺ຕຕຸ ຍທິ ຊີວິຕຸກາໂມ ອສິ, ຕໍ ຐານໍ, ສປ຺ປໍ ວາ ກຖມຸປສປ຺ປສິ ກຖມຸປຄຈ຺ຉສີຕິ. ຠເຍ ອາເມຑິຕວຈນຕ຺ຕາ ເອກຕ຺ຖຕາໂທໂສ ນຕ຺ຖິ, ຊີວິຕຸກາໂມສີຕິ ເອຕ຺ຖ ພິນ຺ທຸໂລໂປ.

ປທໂທສປຣິຫາຣວຓ຺ຓນາ ນິຏ຺ຐິຕາ.

ວາກ຺ຍໂທສປຣິຫາຣວຓ຺ຓນາ

ຠຄ຺ຄຣີຕິໂນ ຍຖາ –

໘໘. ໂຍ ໂກຈິ ຣູປາຕິສໂຍ,

ກນ຺ຕິ ກາປິ ມໂນຫຣາ;

ວິລາສາຕິສໂຍ ໂກປິ,

ອໂຫ ພຸທ຺ຘມໂຫທໂຍ.

໘໘. ‘‘ໂຍ’’ອິຈ຺ຈາທິ. ຣູປສ຺ສ ອນຸພ຺ຍຎ຺ຊເນຫິ ອນຸພ຺ຍຎ຺ຊິຕພາຕ຺ຕິໍສວຣປຸຣິສລກ຺ຂໂຓປໂສຠິຕສ຺ສ ພ຺ຍາມປ຺ປຠາເກຕຸມາລາວິຣາຊິຕສ຺ສ ອຕິສໂຍ ອາຘິກ຺ກໍ ວາຈາໂຄຈຣຠາວາຕິກ຺ກເມນ ອວຈນີຍຕ຺ຕາ ໂຍ ໂກຈິເຍວ. ມໂນ ອເນກໂລກສ຺ສ ຈິຕ຺ຕໍ ຫຣຕີຕິ ມໂນຫຣາ ຈິຕ຺ຕມວຫຣນ຺ຕີ ກນ຺ຕິ ໂສຠາ ກາປິ ອວຈນປຖາ ກາປິເຍວ. ວິລາສສ຺ສ ຄຕ຺ຍາທິໂນ ອຕິສໂຍ ວຈນປຖາຕິກ຺ກນ຺ໂຕ ໂກປິເຍວ, ຕສ຺ມາ ພຸທ຺ຘສ຺ສ ມຫນ຺ໂຕ ອຸທໂຍ ອຠິວຸຑ຺ຒິ ອໂຫ ອພ຺ຠຸໂຕຕິ. ເອຕ຺ຖ ກິໍສທ຺ເທນາຣທ຺ຘາ ຣີຕິ ນ ກຕ຺ຖຈິ ຠຄ຺ຄາ.

໘໘. ‘‘ໂຍ ໂກຈິ’’ຈ຺ຈາທິ. ຣູປາຕິສໂຍ ສຸປ຺ປຫິຏ຺ຐິຕປາທຕາທິທ຺ວຕ຺ຕິໍສປຸຣິສລກ຺ຂເຓຫິ ໂສຠິຕສ຺ສ ຈິຕ຺ຕງ຺ຄຸລິຕາທິອສີຕິອນຸພ຺ຍຎ຺ຊເນຫິ ອລງ຺ກຕສ຺ສ ພ຺ຍາມປ຺ປຠາເກຕຸມາລາຫິ ອຸຊ຺ຊລສ຺ສ ຣູປກາຍສ຺ສ ອາຘິກ຺ຍໍ ໂຍ ໂກຈິເຍວ ມໂນໂຄຈຣຠາວໍ ວິນາ ວຈນວິສຍາຕິກ຺ກນ຺ຕຕ຺ຕາ ໂຍ ໂກຈິເຍວ. ມໂນຫຣາ ໂລກສ຺ສ ຈິຕ຺ຕໍ ຫຣນ຺ຕີ ກນ຺ຕິ ໂສຠາ ກາປິເຍວ ວຈີວິສຍາຕິກ຺ກນ຺ຕຕ຺ຕາ ກາປິເຍວ. ວິລາສາຕິສໂຍ ວິສຍຠູຕປິຍຠາວສງ຺ຂາຕສ຺ສ ຄມນາທິວິລາສສ຺ສ ອາຘິກ຺ຍມ຺ປິ ໂກປິເຍວ ວຸຕ຺ຕກາຣເຓເນວໂກປິເຍວ. ຕໂຕ ພຸທ຺ຘມໂຫທໂຍ ພຸທ຺ຘສ຺ສ ມຫາຠິວຸທ຺ຘິສງ຺ຂາໂຕ ອຸທໂຍ ອໂຫ ອຈ຺ຉຣິໂຍຕິ. ເອຕ຺ຖ ສພ຺ພນາມິເກນ ກິໍ ສທ຺ເທນ ວຕ຺ຕຸມາຣທ຺ຘກ຺ກໂມ ນ ກຕ຺ຖຈິ ຠິນ຺ໂນຕິ ຠຄ຺ຄຣີຕິໂທໂສ ນຕ຺ຖີຕິ.

໘໙. ອພ຺ຍາໂມຫກຣໍ ພນ຺ຘໍ, ອພ຺ຍາກິຓ຺ຓໍ ມໂນຫຣໍ;

ອທູຣປທວິນ຺ຍາສໍ, ປສໍສນ຺ຕິ ກວິສ຺ສຣາ.

໘໙. ‘‘ອພ຺ຍາໂມຫ’’ອິຈ຺ຈາທິ. ນຕ຺ຖິ ທູຣເມສນ຺ຕິ ອທູຣານິ, ຕານິເຍວ ປທານິ, ເຕສໍ ວິນ຺ຍາໂສ ຍາຖາວໂຕ ຐປນໍ ຍສ຺ສ ຕໍ. ຕໂຕເຍວ ອພ຺ຍາກິຓ຺ໂຓ ອສມ຺ມິສ຺ໂສ ຈ. ໂສ ອພ຺ຍາກິຓ຺ຓຕາຍ ເອວ ມໂນຫໂຣ ຈາຕິ ອພ຺ຍາກິຓ຺ຓໍ ມໂນຫຣໍ. ເຕເນວ ‘‘ອຍເມຕ຺ຖ ອຕ຺ໂຖ ອຍໍ ວາ’’ຕິ ເອວໍ ພ຺ຍາໂມຫໍ ນ ກໂຣຕີຕິ ອພ຺ຍາໂມຫກໂຣ, ຕໍ. ປສາທາລງ຺ກາຣາລງ຺ກິຕໍ ພນ຺ຘໍ. ກວີນໍ ອິສ຺ສຣາ ປຘານາ. ເຍ ກນິຏ຺ຐງ຺ຄຸລິຄຓນານິຏ຺ຐາ, ເຕ ປສໍສນ຺ຕິ ຖຸວນ຺ຕິ ຕາທິສພນ຺ຘຄຸຓສ຺ສາຕິສຍປສໍສາຣຫຠາເວນ.

໘໙. ‘‘ອພ຺ຍາໂມເຫ’’ຈ຺ຈາທິ. ອທູຣປທວິນ຺ຍາສໍ ນາມາທິປທານໍ ໂວຫາຣກາເລ ອທູຣສມ຺ພນ຺ໂຘ ຍຖາ ສິຍາ, ຕຖາ ປຏິປາຏິຍາ ປທຏ຺ຐປເນນ ສມນ຺ນາຄຕໍ ອພ຺ຍາກິຓ຺ຓໍ, ຕໂຕເຍວ ອຎ຺ຎສມ຺ພນ຺ຘີປເທຫິ ອສມ຺ມິສ຺ສໍ ມໂນຫຣໍ, ຕໂຕເຍວ ວິຎ຺ຎູນໍ ຈິຕ຺ຕມາຣາເຘນ຺ຕໍ ອພ຺ຍາໂມຫກຣໍ ‘‘ອິມສ຺ສຕ຺ໂຖ ອິມສ຺ສຕ຺ໂຖ ເອໂສ ເອໂສ ວາ’’ຕິ ສໍສຍມນຸປ຺ປາເທນ຺ຕໍ ພນ຺ຘໍ ປສາທາລງ຺ກາຣສໍຍຸຕ຺ຕໍ ພນ຺ຘນໍ ກວິສ຺ສຣາ ກວີນໍ ປຘານາ ປຓ຺ຑິຠຊນາ, ກນິຏ຺ຐງ຺ຄຸລິຍາ ຄຓິຕພ຺ພາ ອຄ຺ຄກວິໂນຕິ ອຘິປ຺ປາໂຍ. ປສໍສນ຺ຕິ ໂຖເມນ຺ຕິ. ພ຺ຍາໂມຫໍ ນ ກໂຣຕີຕິ ອພ຺ຍາໂມຫກໂຣ. ວິ ອາກິຓ຺ໂຓ ພ຺ຍາກິຓ຺ໂຓ, ນ ພ຺ຍາກິຓ຺ໂຓ ອພ຺ຍາກິຓ຺ໂຓ. ນຕ຺ຖິ ທູຣໍ ເຍສໍ, ຕານິເຍວ ປທານິ, ເຕສໍ ວິນ຺ຍາໂສ ຐປນໍ ຍສ຺ສ ພນ຺ຘສ຺ສາຕິ ວິຄ຺ຄໂຫ.

ຍຖາ –

໙໐. ນີລຸປ຺ປລາຠໍ ນຍນໍ,

ພນ຺ຘຸກຣຸຈິໂຣ’ຘໂຣ;

ນາສາ ເຫມງ຺ກຸໂສ ເຕນ,

ຊິໂນຍໍ ປິຍທສ຺ສໂນ.

໙໐. ‘‘ຍເຖ’’ຕ຺ຍຸທາຫຣຕິ ‘‘ນີລຸປ຺ປລາຠ’’ມິຈ຺ຈາທິ. ຍສ຺ສ ຊິນສ຺ສ ນຍນໍ ເນຕ຺ຕໍ ນີລຸປ຺ປລາຠໍ ອິນ຺ທີວຣທ຺ວຍນິຠໍ, ອຘໂຣ ອຘໂຣຏ຺ໂຐ ພນ຺ຘຸກມິວ ພນ຺ຘຸກກຸສຸມມິວ ຣຸຈິໂຣ ກນ຺ໂຕ, ນາສາ ນາສິກາ ສຍໍ ເຫມງ຺ກຸໂສ ສຸວຓ຺ຓງ຺ກຸໂສເຍວ, ເຕນ ກາຣເຓນ ອຍໍ ຊິໂນ ປິຍໍ ມຘຸຣໍ ທສ຺ສນມສ຺ສາຕິ ປິຍທສ຺ສໂນ. ອີທິໂສ ນ ພ຺ຍາກິຓ຺ຓໂທໂສ, ອພ຺ຍາກິຓ຺ໂຓ ປສາໂທເຍວາຕິ.

໙໐. ອິທານິ ພ຺ຍາກິຓ຺ຓໂທສປຣິຫາຣໍ ປຣິຫຣຕິ ‘‘ນີລຸປ຺ປລິ’’ຈ຺ຈາທິນາ. ນຍນໍ ຍສ຺ສ ເນຕ຺ຕຍຸຄຬໍ ນີລຸປ຺ປລາຠໍ ນີລຸປ຺ປລທລສທິສໍ, ອຘໂຣ ອຘໂຣຏ຺ໂຐ ພນ຺ຘຸກຣຸຈິໂຣ ພນ຺ຘຸກປຸປ຺ຜມິວ ມນຸຎ຺ໂຎ, ນາສາ ນາສິກາ ເຫມງ຺ກຸໂສ ສຸວຓ຺ຓງ຺ກຸໂສເຍວ, ເຕນ ກາຣເຓນ ອຍໍ ຊິໂນ ປິຍທສ຺ສໂນ ມນຸຎ຺ຎທສ຺ສໂນ ໂຫຕີຕິ. ເອຕ຺ຖ ປສາທາລງ຺ກາເຣນ ຍຸຕ຺ຕຕ຺ຕາ ນ ພ຺ຍາກິຓ຺ຓໂທໂສ. ອາຠາສທ຺ໂທ ນິຠາສທ຺ໂທ ວິຍ ອິວຕ຺ໂຖ. ໂນ ເຈ, ປຠາປຣິຍາໂຍ ວາ ໂຫຕິ. ພນ຺ຘຸກມິວ ຣຸຈິໂຣຕິ ຈ, ປິຍໍ ທສ຺ສນໍ ຍສ຺ເສຕິ ຈ ວິຄ຺ຄໂຫ. ອິຫ ທສ຺ສນສ຺ສ ກຕ຺ຕຸຠູຕສາຘຸຊນສມ຺ພນ຺ຘຕ຺ເຕປິ ວິສຍຕ຺ເຕເນວ ຊິນສມ຺ພນ຺ໂຘ ໂຫຕີຕິ ອຎ຺ຎປທຕ຺ເຖນ ຕຖາຄໂຕ ຄຫິໂຕຕິ.

໙໑. ສມຕິກ຺ກນ຺ຕຄາມ຺ມຕ຺ຕ-ກນ຺ຕວາຈາຠິສງ຺ຂຕໍ;

ພນ຺ຘນໍ ຣສເຫຕຸຕ຺ຕາ, ຄາມ຺ມຕ຺ຕໍ ອຕິວຕ຺ຕຕິ.

໙໑. ‘‘ສມຕິກ຺ກນ຺ຕິ’’ຈ຺ຈາທິ. ສມ຺ມາ ອຕິກ຺ກນ຺ຕໍ ນິຄ຺ຄຕໍ. ຄາມ຺ມສ຺ສ ຠາໂວ ຄາມ຺ມຕ຺ຕໍ. ຍາສໍ ກນ຺ຕານໍ ມຘຸຣານໍ ວາຈານໍ ຕາຫິ ອຠິສງ຺ຂຕໍ ຣຈິຕໍ ພນ຺ຘນໍ ຣສສ຺ສ ມາຘຸຣິຍສ຺ສ ເຫຕຸຕ຺ຕາ ກາຣຓຠາເວນ ຄາມ຺ມຕ຺ຕໍ ຍຖາວຸຕ຺ຕໍ ອຕິວຕ຺ຕຕິ ອຕິກ຺ກມຕິ.

໙໑. ‘‘ສມຕິ’’ຈ຺ຈາທິ. ສມຕິກ຺ກນ຺ຕຄາມ຺ມຕ຺ຕກນ຺ຕວາຈາຠິສງ຺ຂຕໍ ວິເສສໂຕ ອຕິກ຺ກນ຺ຕຄາມ຺ມຠາວາຫິ ກນ຺ຕວາຈາຫິ ຣຈິຕໍ ພນ຺ຘນໍ ມຸຕ຺ຕກາທິພນ຺ຘນໍ ຣສເຫຕຸຕ຺ຕາ ປຓ຺ຑິຕານໍ ປີຕິຣສສ຺ສ ກາຣຓຕ຺ຕາ ຍຖາວຸຕ຺ຕຄາມ຺ມໂທສໍ ອຕິວຕ຺ຕຕິ ອຕິກ຺ກມ຺ມ ປວຕ຺ຕຕີຕິ. ສມ຺ມາ ອຕິກ຺ກນ຺ຕໍ ຄາມ຺ມຕ຺ຕໍ ຍາສໍ, ຕາຫິເຍວ ກນ຺ຕວາຈາຫິ ອຠິສງ຺ຂຕນ຺ຕິ ຈ, ຣສສ຺ສ ເຫຕຸ, ຕສ຺ສ ຠາໂວຕິ ຈ ວິຄ຺ຄໂຫ.

ຍຖາ –

໙໒. ທຸໂນຕິ ກາມຈຓ຺ຑາໂລ,

ໂສ ມໍ ສທຍ ນິທ຺ທໂຍ;

ອີທິສໍ ພ຺ຍສນາປນ຺ນໍ,

ສຸຂີປິ ກິມຸເປກ຺ຂເສ.

໙໒. ‘‘ຍເຖ’’ຕ຺ຍຸທາຫຣຕິ. ກາມາຕຸຣາ ກາຈິ ວນິຕາ ອຕ຺ຕໂນ ປິຍໍ ປຕິໍ ວິຣວຕິ ‘‘ທຸໂນຕິ’’ຈ຺ຈາທິນາ. ທຍາຍ ສຫ ປວຕ຺ຕີຕິ ສທຍອິຕິ ອນຸນຍວເສນ ປິຍສ຺ສ ອາມນ຺ຕນໍ, ສານຸນຍາມນ຺ຕນຎ຺ຫິ ຕໂຕນຸຄ຺ຄຫາຠິກງ຺ຂາຍມຈ຺ຈນ຺ຕມຸຈິຕໍ, ໂສ ກາໂມ ກນ຺ທປ຺ໂປ ເອວ ຈຓ຺ຑາໂລ ອກຓ຺ໂຑ ວາ ອສຍ຺ໂຫປຕາປາວຫຕ຺ຕາ. ກາເມ ຈຓ຺ຑາລຕ຺ຕາໂຣປນຎ຺ຈ ອຸຈິຕເມວ ຍໂຕເນນ ກຍິຣມານມສຫນມຸປຕາປມສຫມານາ ຕໍ ປຣິຠວນ຺ຕໍ ວິປ຺ປລປຕິ, ນິທ຺ທໂຍ ນິກ຺ກຣຸໂຓ, ອິທມປິ ອຸຈິຕມຸປຕາເປ ນິກ຺ກຣຸຓານໍ ຕາທິສີ ຄຕີຕິ. ມໍ ທຸໂນຕິ ອຘິກມຸປຕາເປຕິ ນິທ຺ທຍຕ຺ຕາ, ນ ຠວນ຺ຕໍ, ເຕເນວ ຠວໍ ສຸຂີ. ອິມິນາ ອຎ຺ຎາສຕ຺ຕຕໍ ຕສ຺ສ ທີເປຕິ. ຍທິ ນາຎ຺ຎາສຕ຺ໂຕສິ, ນາຫເມກາກິນີ ຠວາມິ. ອສຫາຍານຎ຺ຫິ ປຏິສຕ຺ຕໂວ ໂຫນ຺ຕິ. ເອກາກິຕ຺ຕາເຍວາຫມປ຺ປຏິສຣຓຕ຺ຕາເນນ ທຸສາມີຕິ [ທຸຎ຺ຎາມີຕິ (?)] ຕວ ກາມໍ ຕ຺ວໍ ສຸຂີ ໂຫສິ. ສນາຖານໍ ຕາທິສີ ວຸຕ຺ຕີຕິ ເອວໍ ສຸຂີປິ ຕ຺ວໍ ອີທິສໍ ພ຺ຍສນມາປນ຺ນໍ ກິໍ ກສ຺ມາ ອຸເປກ຺ຂເສຕິ. ເອວມຍໍ ວງ຺ກວຸຕ຺ຕິຍາ ອຕ຺ຕໂນ, ຕໍ ວິສຍມນຸຠວນ຺ຕສ຺ສ ຈ ວິມຸຂຕ຺ຕໍ ນິທສ຺ເສຕີຕີທິສໍ ນ ຄາມ຺ມໍ.

໙໒. ຄາມ຺ມໂທສປຣິຫາເຣ ລກ຺ຂິຍໍ ທສ຺ເສຕິ ‘‘ທຸໂນຕິ’’ຈ຺ຈາທິ. ກາມຕຓ຺ຫາຠິຠູຕາ ອງ຺ຄນາ ອຕ຺ຕໂນ ວລ຺ລຠໍ ນິສ຺ສາຍ ເອວໍ ວິລປຕິ ‘‘ສທຍ ເຫ ກາຣຸຓິກ ໂສ ກາມຈຓ຺ຑາໂລ ໂສ ອນງ຺ຄນີໂຈ ນິທ຺ທໂຍ ນິກ຺ກາຣຸຓິໂກ ມໍ ທຸໂນຕິ ປີເຬຕິ, ສຸຂີປິ ມມ ວິຍ ອນາຖຠາວາຠາວໂຕ ສຸຂິໂຕປິ ຕ຺ວໍ ອີທິສໍ ພ຺ຍສນາປນ຺ນໍ ເອວໍ ກາມຈຓ຺ຑາເລນ ອກາຣຸເຓນ ກຕອສຍ຺ຫສນ຺ຕາປສງ຺ຂາຕພ຺ຍສນມນຸປ຺ປຕ຺ຕໍ ມໍ ກິມຸເປກ຺ຂເສ ກສ຺ມາ ອຸທາສີໂນສີ’’ຕິ. ອຕ຺ຕໂນ ທຸກ຺ຂາຕຸຣຕ຺ຕາ ທຸກ຺ຂທູຣີກຣຓໍ ກາຣຸຓິການໍເຍວ ວິສຍນ຺ຕິ ‘‘ສທເຍ’’ຕິ ອນຸນຍວເສນ ອາມນ຺ຕນຸຈິຕໍ ອຕ຺ຕໂນ ທຸກ຺ຂາຕຸຣຕໍ ໂປເສຕຸໍ ປີຬາກາຣເກ ກາເມ ຈຓ຺ຑາລຕ຺ຕາໂຣປນຎ຺ຈ ນິທ຺ທຍຕ຺ຕກຖນຎ຺ຈ ອຸຈິຕເມວ ອຕ຺ຕນິ ອຸເປກ຺ຂກຕ຺ຕາ. ສຸຂີປີຕິ ອິມິນາ ຕສ຺ສ ປຣວິສຍາສຕ຺ຕຕາຍ ອຕິຈາຣໍ ອພ຺ຠຸປຄເມຕິ. ເອວໍ ວງ຺ກວຸຕ຺ຕິຍາ ອຕ຺ຕໂນ ວລ຺ລເຠ ສານຸຣາຄຕ຺ຕຎ຺ຈ ອຕ຺ຕນິ ຕສ຺ສ ຕທຠາວຕ຺ຕຎ຺ຈ ທສ຺ເສຕີຕິ. ‘‘ກຎ຺ເຎ ກາມຍມານໍ ມໍ, ນ ກາມຍສິ ກິໍນ຺ວິທ’’ນ຺ຕິ ເອຕ຺ຖ ວິຍ ອິຫ ຄາມ຺ມໂທໂສ ນຕ຺ຖີຕິ ຄາມ຺ມໂທສປຣິຫາຣມິທໍ. ກາໂມເຍວ ຈຓ຺ຑາໂລ ກາມຈຓ຺ຑາໂລ, ສຫ ທຍາຍ ໂຍ ວຕ຺ຕຕີຕິ ຈ, ນຕ຺ຖິ ທຍາ ອສ຺ເສຕິ ຈ, ສຸຂມສ຺ສ ອຕ຺ຖີຕິ ຈ ວິຄ຺ຄໂຫ. ອປິສທ຺ໂທ ອກ຺ຂເມ.

໙໓. ຍຕິຫີນປຣິຫາໂຣ, ນ ປຸເນ’ທານິ ນີຍເຕ;

ຍໂຕ ນ ສວນຸພ຺ເພຄໍ, ເຫຏ຺ຐາ ເຍຕໍ ວິຈາຣິຕໍ.

໙໓. ‘‘ຍຕິ’’ຈ຺ຈາທິ. ວິຈາຣິຕນ຺ຕິ ‘‘ຕໍ ນເມ ສິຣສາ ຈາມີ-ກຣວຓ຺ຓໍ ຕຖາຄຕ’’ນ຺ຕິອາທິນາ ເຫຏ຺ຐາ ປກາສິຕນ຺ຕິ ອຕ຺ໂຖ.

໙໓. ‘‘ຍຕິຫີນິ’’ຈ຺ຈາທິ. ຍໂຕ ຍສ຺ມາ ສວນຸພ຺ເພຄໍ ‘‘ໂທສານມຸທ຺ເທສກ຺ກເມນ ໂທສປຣິຫາຣກ຺ກໂມ ນ ວຸຕ຺ໂຕ’’ຕິ ເອວໍ ວິຎ຺ຎູນມຸປ຺ປຊ຺ຊມານໍ ອິມສ຺ສ ຄນ຺ຖສ຺ສ ສວນາສຫນໍ ນຕ຺ຖິ, ຕໂຕ ຍຕິຫີນປຣິຫາໂຣ ຍຕິຫີນໂທສສ຺ສ ປຣິຫຣຓວເສນ ປວຕ຺ຕມຸທາຫຣຓໍ ອິທານິ ປຸນ ນ ນີຍເຕ ນາຫຣີຍເຕຕິ. ອິມິນາຘິຄຕມາໂທ ວຸຕ຺ຕຕ຺ຖເມວ ສມຕ຺ເຖຕິ. ເຫຏ຺ຐາ ເຍຕໍ ວິຈາຣິຕນ຺ຕິ ເອວໍ ຍຕິຫີນໂທສປຣິຫຣຓໍ ເຫຏ຺ຐາ ອນນ຺ຕຣປຣິຈ຺ເຉເທ ວິຈາຣິຕໍ ‘‘ຕໍ ນເມ ສິຣສາ ຈາມີ-ກຣວຓ຺ຓໍ ຕຖາຄຕ’’ນ຺ຕິອາທິນາ ປກາສິຕນ຺ຕິ. ອາໂທ ຍຕິຫີນໂທສປາຕຸຠາເວເຍວ ປຣິຫາຣກ຺ກມສ຺ສາປິ ທສ຺ສິຕຕ຺ຕາ ອິຫາທສ຺ສເນປິ ຄນ຺ຖສ຺ສ ອູນຕາ ນຕ຺ຖີຕິ ອຘິປ຺ປາໂຍ. ຍຕິ ຫີນາ ເອຕ຺ເຖຕິ ຈ, ຕສ຺ສ ປຣິຫາໂຣຕິ ຈ, ສວເນ ອຸພ຺ເພຄນ຺ຕິ ຈ ວິຄ຺ຄໂຫ.

ກມຈ຺ຈຸຕສ຺ສ ຍຖາ –

໙໔. ອຸທາຣຈຣິໂຕ’ສິ ຕ຺ວໍ, ເຕເນວາ’ຣາຘນາ ຕ຺ວຍິ;

ເທສໍ ວາ ເທຫິ ຄາມໍ ວາ, ເຂຕ຺ຕໍ ວາ ມມ ໂສຠນໍ.

໙໔. ‘‘ອຸທາຣ’’ອິຈ຺ຈາທິ. ອຸທາຣໍ ອຸທາຣຕ຺ຕໍ ຈາຄາຕິສຍສມ຺ພນ຺ຘໂຕ ຈຣິຕໍ ອຕິຄຸຓປວຕ຺ຕິ ຍສ຺ສາຕິ ວິຄ຺ຄໂຫ. ເອຕ຺ຖ ອຸຈິຕຕ຺ຕາ ເທສາທີນໍ ຍາຈນກ຺ກມສ຺ສ ກມຈ຺ຈຸຕສ຺ສ ປຣິຫາໂຣຍໍ.

໙໔. ‘‘ອຸທາຣິ’’ຈ຺ຈາທິ. ຕ຺ວໍ ປຸຎ຺ຎວນ຺ຕ ອຸທາຣຈຣິໂຕສິ ຈາຄາຕິສຍໂຍຄໂຕ ວິສາຣທປວຕ຺ຕິຍຸຕ຺ໂຕສິ, ເຕເນວ ເຕນ ກາຣເຓເນວ ອາຣາຘນາ ມມ ຍາຈນາ ຕ຺ວຍິ ໂຫຕິ. ເທສໍ ວາຊນປທໍ ວາ, ໂນ ເຈ, ຄາມໍ ວາ ສໍວສຖໍ ວາ, ໂນ ເຈ, ໂສຠນໍ ເຂຕ຺ຕໍ ວາ ເກທາຣໍ ວາ ມມ ເທຫີຕິ ອນຸປຸພ຺ພໍ ຫີນປທຕ຺ຖຍາຈນາ ທາຍກສ຺ສ ທານສ຺ສາປິ ຍາຈກສ຺ສ ອິຈ຺ຉິຕຕ຺ຖປຏິລາຠສ຺ສາປິ ອນຸຣູປຕ຺ຕາ ກມຈ຺ຈຸຕໂທສມປເນຕິ. ອຸທາຣໍ ຈຣິຕໍ ອສ຺ສາຕິ ວິຄ຺ຄໂຫ.

ອຕິວຸຕ຺ຕສ຺ສ ຍຖາ –

໙໕. ມຸນິນ຺ທຈນ຺ທສມ຺ຠູຕ-

ຍໂສຣາສິມຣີຈິນໍ;

ສກໂລປ຺ຍ’ຍມາກາໂສ,

ນາ’ວກາໂສ ວິຊມ຺ຠເນ.

໙໕. ‘‘ມຸນິນ຺ທ’’ອິຈ຺ຈາທິ. ມຸນິນ຺ໂທເຍວ ຈນ຺ໂທ, ຕໂຕ ສມ຺ຠູຕາ ປາຕຸຠູຕາ, ຍໂສຣາສີ ເອວ ມຣີຈິໂຍ, ຕາສໍ. ອຍໍ ສກໂລ ອາກາໂສປິ ຄຄນເມວ, ນ ຕສ຺ເສໂກ ປເທໂສ. ວິຊມ຺ຠເນ ພ຺ຍາປເນ ນາວກາໂສ ຕາທິສຕ຺ຕາ ຕາສໍ ມຣີຈິນນ຺ຕິ ນາຕິວຸຕ຺ຕໍ.

໙໕. ‘‘ມຸນິນ຺ທິ’’ຈ຺ຈາທິ. ມຸນິນ຺ທຈນ຺ທສມ຺ຠູຕຍໂສຣາສິມຣີຈິນໍ ມຸນິນ຺ທສງ຺ຂາຕຈນ຺ທໂຕ ປາຕຸຠູຕານໍ ກິຕ຺ຕິສມູຫສງ຺ຂາຕກິຣຓານໍ ວິຊມ຺ຠເນ ພ຺ຍາປເນ ອຍໍ ສກໂລປິ ອາກາໂສ ນາວກາໂສ ນ ໂອກາໂສ ໂຫຕີຕິ. ເຫຕຸຜລາທິເອເກກກາຣເຓນາປິ ອປ຺ປເມຍ຺ຍານໍ ສພ຺ພຎ຺ຎຸຄຸຓານໍ ປວຕ຺ຕິຍາ ອປ຺ປເມຍ຺ຍສາມຎ຺ຎຠູຕາກາສສ຺ສ ນິຣວກາສສ຺ສ ອິວ ກຖນມຸຈິຕນ຺ຕິ ອຕິວຸຕ຺ຕໂທໂສ ອິຫ ນ ຠວຕິ. ຈນ຺ໂທ ອິວ ຈນ຺ໂທ, ມຸນິນ຺ໂທ ເອວ ຈນ຺ໂທ, ຕໂຕ ສມ຺ຠູຕານໍເຍວ ຍສານໍ ຣາສີ ຈ ຕາ ມຣີຈິໂຍ ຈາຕິ ວິຄ຺ຄໂຫ.