໓. ຄຸຓາວໂພຘ-ຕຕິຍປຣິຈ຺ເຉທ

ອນຸສນ຺ຘິ

໑໑໖. ສມ຺ຠວນ຺ຕິ ຄຸຓາ ຍສ຺ມາ, ໂທສາເນ’ວ’ມຕິກ຺ກເມ;

ທສ຺ເສສ຺ສໍ ເຕ ຕໂຕ ທານິ, ສທ຺ເທ ສມ຺ຠູສຍນ຺ຕິ ເຍ.

ສທ຺ທາລງ຺ກາຣ ອຸທ຺ເທສ

໑໑໗. ປສາໂທ’ໂຊ, ມຘຸຣຕາ, ສມຕາ, ສຸຂຸມາລຕາ;

ສິເລໂສ’ທຣຕາ, ກນ຺ຕິ, ອຕ຺ຖພ຺ຍຕ຺ຕິ, ສມາຘໂຍ.

ສທ຺ທາລງ຺ກາຣ ປໂຍຊນ

໑໑໘. ຄຸເຓເຫ’ເຕຫິ ສມ຺ປນ຺ໂນ, ພນ຺ໂຘ ກວິມໂນຫໂຣ;

ສມ຺ປາທິຍຕິ ກຕ຺ຕູນໍ, ກິຕ຺ຕິ ມຈ຺ຈນ຺ຕນິມ຺ມລໍ.

ສທ຺ທາລງ຺ກາຣ ນິທ຺ເທສ

໑໑໙. ອທູຣາຫິຕສມ຺ພນ຺ຘ, ສຸຠຄາ ຍາ ປທາ’ວລິ;

ສຸປສິທ຺ຘາ’ຠິເຘຍ຺ຍາ’ຍໍ, ປສາທໍ ຊນເຍ ຍຖາ.

໑໒໐. ອລງ຺ກໂຣນ຺ຕາ ວທນໍ, ມຸນິໂນ’ຘຣຣໍສິໂຍ;

ໂສຠນ຺ເຕ’ຣຸຓຣໍສີ’ວ, ສມ຺ປຕນ຺ຕາ’ມ຺ພຸໂຊ’ທເຣ.

໑໒໑. ໂອໂຊ ສມາສພາຫຸລ຺ຍ, ເມໂສ ຄຊ຺ຊສ຺ສ ຊີວິຕໍ;

ປຊ຺ເຊປ຺ຍ’ນາ’ກຸໂລ ໂສ’ຍໍ,

ກນ຺ໂຕ ກາມີຍເຕ ຍຖາ.

໑໒໒. ມຸນິນ຺ທ ມນ຺ທ ສຎ຺ຊາຕ, ຫາສ ຈນ຺ທນ ລິມ຺ປິຕາ;

ປລ຺ລວາ ຘວລາ ຕສ຺ເສ, ເວໂກ ນາ’ຘຣປລ຺ລໂວ.

໑໒໓. ປທາ’ຠິເຘຍ຺ຍວິສຍໍ, ສມາສ ພ຺ຍາສ ສມ຺ຠວໍ;

ຍໍ ປາຣິຓຕ຺ຍໍ ໂຫຕີ’ຫ, ໂສປິ ໂອໂຊ’ວ ຕໍ ຍຖາ.

໑໒໔. ໂຊຕຍິຕ຺ວານ ສທ຺ຘມ຺ມໍ, ສນ຺ຕາເຣຕ຺ວາ ສເທວເກ;

ຊລິຕ຺ວາ ອຄ຺ຄິຂນ຺ໂຘ’ວ, ນິພ຺ພຸໂຕ ໂສ ສສາວໂກ.

໑໒໕. ມຕ຺ຖກຏ຺ຐີ ມຕສ຺ສາ’ປິ, ຣໂຊຠາວໍ ວຊນ຺ຕຸ ເມ;

ຍໂຕ ປຸຎ຺ເຎນ ເຕ ເສນ຺ຕຸ, ຊິນ ປາທ’ມ຺ພຸຊທ຺ວເຍ.

໑໒໖. ອິຈ຺ຈຕ຺ຣ ນິຈ຺ຈປ຺ປຓຕິ, ເຄໂຘ ສາຘຸ ປທິສ຺ສຕິ;

ຊາຍເຕ’ຍໍ ຄຸໂຓ ຕິກ຺ຂ, ປຎ຺ຎານມຠິໂຍຄໂຕ.

໑໒໗. ມຘຸຣຕ຺ຕໍ ປທາສຕ຺ຕິ, ຣ’ນຸປ຺ປາສວສາ ທ຺ວິຘາ;

ສິຍາ ສມສຸຕິ ປຸພ຺ພາ, ວຓ຺ຓາ’ວຸຕ຺ຕິ ປໂຣ ຍຖາ.

໑໒໘. ຍທາ ເອໂສ’ຠິສມ຺ໂພຘິໍ, ສມ຺ປຕ຺ໂຕ ມຸນິປຸງ຺ຄໂວ;

ຕທາ ປຠຸຕິ ຘມ຺ມສ຺ສ, ໂລເກ ຊາໂຕ ມຫຸ’ສ຺ສໂວ.

໑໒໙. ມຸນິນ຺ທມນ຺ທຫາສາ ເຕ, ກຸນ຺ທ ສນ຺ໂທຫວິພ຺ຠມາ;

ທິສນ຺ຕ ມນຸຘາວນ຺ຕິ, ຫສນ຺ຕາ ຈນ຺ທກນ຺ຕິໂຍ.

໑໓໐. ສພ຺ພໂກມລວຓ຺ເຓຫິ, ນາ’ນຸປ຺ປາໂສ ປສໍສິໂຍ;

ຍຖາ’ຍໍ ມາລຕີມາລາ, ລິນ ໂລລາ’ລິມາລິນີ.

໑໓໑. ມຸທູຫິ ວາ ເກວເລຫິ, ເກວເລຫິ ຜຸເຏຫິ ວາ,

ມິສ຺ເສຫິ ວາ ຕິຘາ ໂຫຕິ, ວຓ຺ເຓຫິ ສມຕາ ຍຖາ.

ເກວລມຸທຸສມຕາ

໑໓໒. ໂກກິລາ’ລາປສໍວາທີ, ມຸນິນ຺ທາ’ລາປວິພ຺ຠໂມ;

ຫທຍງ຺ຄມຕໍ ຍາຕິ, ສຕໍ ເທຕິ ຈ ນິພ຺ພຸຕິໍ.

ເກວລຜຸຏສມຕາ

໑໓໓. ສມ຺ຠາວນີຍສມ຺ຠາວໍ, ຠຄວນ຺ຕໍ ຠວນ຺ຕຄຸໍ;

ຠວນ຺ຕສາຘນາ’ກງ຺ຂີ, ໂກ ນ ສມ຺ຠາວເຍ ວິຠຸໍ.

ມິສ຺ສກສມຕາ

໑໓໔. ລທ຺ຘຈນ຺ທນສໍສຄ຺ຄ, ສຸຄນ຺ຘິ ມລຍາ’ນິໂລ;

ມນ຺ທ ມາຍາຕິ ຠີໂຕ’ວ, ມຸນິນ຺ທມຸຂມາຣຸຕາ.

໑໓໕. ອນິຏ຺ຐຸຣ’ກ຺ຂຣ’ປ຺ປາຍາ, ສພ຺ພໂກມລ ນິສ຺ສຏາ;

ກິຈ຺ຉມຸຈ຺ຈາຣຓາ’ເປຕ, ພ຺ຍຎ຺ຊນາ ສຸຂຸມາລຕາ.

໑໓໖. ປສ຺ສນ຺ຕາ ຣູປວິຠວໍ, ສຸຓນ຺ຕາ ມຘຸຣໍ ຄິຣໍ;

ຈຣນ຺ຕິ ສາຘູ [ສາຘຸ (ສີ-ຉນ຺ຘານຸຣກ຺ຂຓຕ຺ຖໍ)] ສມ຺ພຸທ຺ຘ, ກາເລ ເກຬິປຣມ຺ມຸຂາ.

໑໓໗. ອລງ຺ກາຣວິຫີນາ’ປິ, ສຕໍ ສມ຺ມຸຂເຕ’ທິສີ;

ອາໂຣຫຕິ ວິເສເສນ, ຣມຓີຍາ ຕ’ທຸຊ຺ຊລາ.

໑໓໘. ໂຣມຎ຺ຈ ປິຎ຺ຉ ຣຈນາ, ສາຘຸ ວາທາຫິຕທ຺ຘນີ;

ລຬນ຺ຕິ’ເມ ມຸນິເມຆຸ, ມ຺ມທາ ສາຘຸ ສິຂາວລາ.

໑໓໙. ສຸຂຸມາລຕ຺ຕ ມຕ຺ເຖ’ວ, ປທຕ຺ຖວິສຍມ຺ປິ ຈ;

ຍຖາ ມຕາທິສທ຺ເທສຸ, ກິຕ຺ຕິເສສາທິກິຕ຺ຕນໍ.

໑໔໐. ສິລິຏ຺ຐ ປທ ສໍສຄ຺ຄ, ຣມຓີຍ ຄຸຓາ’ລໂຍ;

ສພນ຺ຘຄາຣໂວ ໂສ’ຍໍ, ສິເລໂສ ນາມ ຕໍ ຍຖາ.

໑໔໑. ພາລິ’ນ຺ທຸວິພ຺ຠມ’ຈ຺ເຉທິ, ນຂຣາ’ວລິ ກນ຺ຕິຠິ;

ສາ ມຸນິນ຺ທປທ’ມ຺ໂຠຊ, ກນ຺ຕິ ໂວ ວລິຕາ’ວຕໍ.

໑໔໒. ອຸກ຺ກໍສວນ຺ໂຕ ໂຍໂກຈິ, ຄຸໂຓ ຍທິ ປຕີຍເຕ;

ອຸທາໂຣ’ຍໍ ຠເວ ເຕນ, ສນາຖາ ພນ຺ຘປທ຺ຘຕິ.

໑໔໓. ປາທມ຺ໂຠຊ ຣໂຊ ລິຕ຺ຕ, ຄຕ຺ຕາ ເຍ ຕວ ໂຄຕມ;

ອໂຫ! ເຕ ຊນ຺ຕໂວ ຍນ຺ຕິ, ສພ຺ພຖາ ນິຣຊຕ຺ຕນໍ.

໑໔໔. ເອວໍ ຊິນາ’ນຸຠາວສ຺ສ, ສມຸກ຺ກໍໂສ’ຕ຺ຣ ທິສ຺ສຕິ;

ປຎ຺ຎວາ ວິຘິນາ’ເນນ, ຈິນ຺ຕເຍ ປຣ ມີທິສໍ.

໑໔໕. ອຸທາໂຣ ໂສປິ ວິຎ຺ເຎຍ຺ໂຍ, ຍໍ ປສຕ຺ຖ ວິເສສນໍ;

ຍຖາ ກີຬາສໂຣ ລີລາ, ຫາໂສ ເຫມງ຺ຄທາ’ທໂຍ.

໑໔໖. ໂລກິຍ’ຕ຺ຖາ’ນ’ຕິກ຺ກນ຺ຕາ, ກນ຺ຕາ ສພ຺ພຊນານປິ;

ກນ຺ຕິ ນາມາ’ຕິວຸຕ຺ຕສ຺ສ, ວຸຕ຺ຕາ ສາ ປຣິຫາຣໂຕ.

ຍຖາ ມຸນິນ຺ທ ອິຈ຺ຈາທິ.

໑໔໗. ອຕ຺ຖພ຺ຍຕ຺ຕາ’ຠິເຘຍ຺ຍສ຺ສາ,

ເນຍ຺ຍຕາ ສທ຺ທໂຕ’ຕ຺ຖໂຕ;

ສາ’ຍໍ ຕທຸຠຍາ ເນຍ຺ຍ, ປຣິຫາເຣ ປທສ຺ສິຕາ;

ຍຖາ ມຣີຈິຈ຺ຈາທິ ຈ, ມໂນນຸຣຎ຺ຊໂນຈ຺ຈາທິ.

ປຸນ ອຕ຺ເຖນ ຍຖາ

໑໔໘. ສຠາວາ’ມລຕາ ຘີຣ, ມຸຘາ ປາທນເຂສຸ ເຕ;

ຍໂຕ ເຕ’ວນຕາ’ນນ຺ຕ, ໂມຬິຈ຺ຉາຍາ ຊຫນ຺ຕິ ໂນ.

໑໔໙. ‘ພນ຺ຘສາໂຣ’ຕິ ມຎ຺ຎນ຺ຕິ, ຍໍ ສມຄ຺ຄາປິ ວິຎ຺ຎຸໂນ;

ທສ຺ສນາ’ວສຣໍ ປຕ຺ໂຕ, ສມາຘິ ນາມ’ຍໍ ຄຸໂຓ.

໑໕໐. ອຎ຺ຎຘມ຺ໂມ ຕໂຕ’ຎ຺ຎຕ຺ຖ, ໂລກສີມາ’ນຸໂຣຘໂຕ;

ສມ຺ມາ ອາຘີຍເຕ’ຈ຺ເຈ’ໂສ, ‘ສມາຘີ’ຕິ ນິຣຸຈ຺ຈຕິ.

ສມາຘິ ອຸທ຺ເທສ

໑໕໑. ອປາເຓ ປາຓີນໍ ຘມ຺ໂມ, ສມ຺ມາ ອາຘີຍເຕ ກ຺ວຈິ,;

ນິຣູເປ ຣູປຍຸຕ຺ຕສ຺ສ, ນິຣເສ ສຣສສ຺ສ, ຈ.

໑໕໒. ອທ຺ຣເວ ທ຺ຣວຍຸຕ຺ຕສ຺ສ, ອກຕ຺ຕຣິປິ ກຕ຺ຕຸຕາ,;

ກຐິນສ຺ສາ’ສຣີເຣ,ປິ, ຣູປໍ ເຕສໍ ກມາ ສິຍາ.

ສມາຘິນິທ຺ເທສ

ອປາເຓ ປາຓີນໍ ຘມ຺ໂມ

໑໕໓. ອຸຓ຺ຓາ ປຸຓ຺ຓິ’ນ຺ທຸນາ ນາຖ! ທິວາປິ ສຫ ສງ຺ຄມາ;

ວິນິທ຺ທາ ສມ຺ປໂມທນ຺ຕິ, ມຎ຺ເຎ ກຸມຸທິນີ ຕວ.

ນິຣຸເປ ຣູປຍຸຕ຺ຕສ຺ສ

໑໕໔. ທຍາຣເສສຸ ມຸຊ຺ຊນ຺ຕາ, ຊນາ’ມຕຣເສສ຺ວິ’ວ;

ສຸຂິຕາ ຫຕໂທສາ ເຕ, ນາຖ! ປາທ’ມ຺ພຸຊາ’ນຕາ.

ນິຣເສ ສຣສສ຺ສ

໑໕໕. ມຘຸເຣປິ ຄຸເຓ ຘີຣ, ນ’ປ຺ປສີທນ຺ຕິ ເຍ ຕວ;

ກີທິສີ ມນໂສວຸຕ຺ຕິ, ເຕສໍ ຂາຣຄຸຓານ ໂຠ’.

ອທ຺ຣເວ ທ຺ຣວຍຸຕ຺ຕສ຺ສ

໑໕໖. ສພ຺ພຕ຺ຖສິທ຺ຘ! ຈູຬກ, ປຸຏເປຍ຺ຍາ ມຫາຄຸຓາ;

ທິສາ ສມນ຺ຕາ ຘາວນ຺ຕິ, ກຸນ຺ທໂສຠາ ສ ລກ຺ຂຓາ.

ອກຕ຺ຕຣິປິ ກຕ຺ຕຸຕາ

໑໕໗. ມາຣາ’ຣິພລວິສ຺ສຏ຺ຐາ, ກຸຓ຺ຐາ ນານາວິຘາ’ຍຸຘາ;

ລຊ຺ຊມານາ’ຎ຺ຎເວເສນ, ຊິນ! ປາທາ’ນຕາ ຕວ.

ກຐິນສ຺ສາ ສຣີເຣ

໑໕໘. ມຸນິນ຺ທຠາຓຸມາ ກາໂລ,

ທິໂຕ ໂພໂຘ’ທຍາ’ຈເລ;

ສທ຺ຘມ຺ມຣໍສິນາ ຠາຕິ, ຠິນ຺ທ ມນ຺ທຕມໍ ປຣໍ.

໑໕໙. ວມນຸ’ຄ຺ຄິຣນາທ຺ເຍ’ຕໍ, ຄຸຓວຸຕ຺ຍ’ປຣິຈ຺ຈຸຕໍ;

ອຕິສຸນ຺ທຣ ມຎ຺ຎໍ ຕຸ, ກາມໍ ວິນ຺ທຕິ ຄາມ຺ມຕໍ.

໑໖໐. ກນ຺ຕີນໍ ວມນພ຺ຍາຊາ, ມຸນິປາທນຂາ’ວລີ;

ຈນ຺ທກນ຺ຕີ ປິວນ຺ຕີ’ວ, ນິປ຺ປຠໍ ຕໍ ກໂຣນ຺ຕິໂຍ.

໑໖໑. ອຈິຕ຺ຕກຕ຺ຕຸກໍ ຣຸຈ຺ຍ [ຣຸຈ຺ຈ (ສີ.)], ມິຈ຺ເຈວໍ ຄຸຓກມ຺ມຕໍ;

ສຈິຕ຺ຕກຕ຺ຕຸກໍ ເປ’ຕໍ, ຄຸຓກມ຺ມໍ ຍທຸ’ຕ຺ຕມໍ.

໑໖໒. ອຸຄ຺ຄິຣນ຺ໂຕ’ວ ສສ຺ເນຫ, ຣສໍ ຊິນວໂຣ ຊເນ;

ຠາສນ຺ໂຕ ມຘຸຣໍ ຘມ຺ມໍ, ກໍ ນ ສປ຺ປີຓເຍ ຊນໍ.

໑໖໓. ໂຍ ສທ຺ທສຕ຺ຖກຸສໂລ ກຸສໂລ ນິຆຓ຺ຑຸ,

ຉນ຺ໂທອລງ຺ກຕິສຸ ນິຈ຺ຈກຕາ’ຠິໂຍໂຄ;

ໂສ’ຍໍ ກວິຕ຺ຕວິກໂລປິ ກວີສຸ ສງ຺ຂ຺ຍ,

ໂມຄ຺ຄຍ຺ຫ ວິນ຺ທຕິ ຫິ ກິຕ຺ຕິ’ ມມນ຺ທຣູປໍ.

ອິຕິ ສງ຺ຆຣກ຺ຂິຕມຫາສາມິວິຣຈິເຕ ສຸໂພຘາລງ຺ກາເຣ

ຄຸຓາວໂພໂຘ ນາມ

ຕຕິໂຍ ປຣິຈ຺ເຉໂທ.