ນໂມ ຕສ຺ສ ຠຄວໂຕ ອຣຫໂຕ ສມ຺ມາສມ຺ພຸທ຺ຘສ຺ສ

ສຸໂພຘາລງ຺ກາໂຣ

໑. ໂທສາວໂພຘ-ປຐມປຣິຈ຺ເຉທ

ຣຕນຕ຺ຕຍປ຺ປຓາມ

໑. ມຸນິນ຺ທວທນມ຺ໂຠຊ, ຄພ຺ຠສມ຺ຠວສຸນ຺ທຣີ;

ສຣຓໍ ປາຓິນໍ ວາຓີ, ມຍ຺ຫໍ ປີຓຍຕໍ ມນໍ.

ນິມິຕ຺ຕ

໒. ຣາມ, ສມ຺ມາ’ທ຺ຍ’ລງ຺ກາຣາ, ສນ຺ຕິ ສນ຺ໂຕ ປຸຣາຕນາ;

ຕຖາປິ ຕຸ ວຬຎ຺ເຊນ຺ຕິ, ສຸທ຺ຘມາຄຘິກາ ນ ເຕ.

ອຠິຘານາທິກໍ

໓. ເຕນາ’ປິ ນາມ ໂຕເສຍ຺ຍ, ເມເຕ ລງ຺ກາຣວຊ຺ຊິເຕ;

ອນຸຣູເປນາ’ລງ຺ກາເຣ, ເນ’ສ ເມໂສ ປຣິສ຺ສໂມ.

໔. ເຍສໍ ນ ສຎ຺ຈິຕາ ປຎ຺ຎາ, ເນກສຕ຺ຖນ຺ຕໂຣ’ຈິຕາ;

ສມ຺ໂມຫ’ພ຺ຠາຫຕາ ເວ’ເຕ, ນາວພຸຊ຺ຌນ຺ຕິ ກິຎ຺ຈິປິ.

໕. ກິໍ ເຕຫິ ປາທສຸສ຺ສູສາ, ເຍສໍ ນຕ຺ຖິ ຄຣູນິ’ຫ;

ເຍ ຕປ຺ປາທຣໂຊກິຓ຺ຓາ, ເຕ’ວ ສາຘູ ວິເວກິໂນ.

໖. ກພ຺ພ, ນາຏກນິກ຺ຂິຕ຺ຕ, ເນຕ຺ຕຈິຕ຺ຕາ ກວິຊ຺ຊນາ;

ຍໍກິຎ຺ຈິ ຣຈຍນ຺ເຕ’ຕໍ, ນ ວິມ຺ຫຍກຣໍ ປຣໍ.

໗. ເຕເຍ’ວ ປຏິຠາເວນ຺ໂຕ, ໂສ’ວ ພນ຺ໂຘ ສວິມ຺ຫໂຍ;

ເຍນ ໂຕເສນ຺ຕິ ວິຎ຺ຎູ ເຍ, ຕຕ຺ຖ ປ຺ຍ’ວິຫິຕາ’ທຣາ.

໘. ພນ຺ໂຘ ຈ ນາມ ສທ຺ທ,ຕ຺ຖາ, ສຫິຕາ ໂທສວຊ຺ຊິຕາ;

ປຊ຺ຊ ຄຊ຺ຊ ວິມິສ຺ສານໍ, ເຠເທນາ’ຍໍ ຕິຘາ ຠເວ.

໙. ນິພນ຺ໂຘ ຈາ’ນິພນ຺ໂຘ ຈ, ປຸນ ທ຺ວິຘາ ນິຣຸປ຺ປເຕ;

ຕໍ ຕຸ ປາເປນ຺ຕ຺ຍ’ລງ຺ກາຣາ, ວິນ຺ທນີຍຕຣຕ຺ຕນໍ.

໑໐. ອນວຊ຺ຊໍ ມຸຂມ຺ໂຠຊ [‘‘ອມ຺ໂຠຊ’’ນ຺ຕິ ປທໍ ປາຬິຍໍ ນຕ຺ຖິ, ວາຣິຊວາຈກໍ, ສກ຺ກຏຄນ຺ຖໂຕ ອນີຕໍ], ມນວຊ຺ຊາ ຈ ຠາຣຕີ;

ອລງ຺ກຕາ’ວ ໂສຠນ຺ເຕ, ກິໍ ນຸ ເຕ ນິຣ’ລງ຺ກຕາ?

໑໑. ວິນາ ຄຣູປເທສໍ ຕໍ, ພາໂລ’ລງ຺ກຕ຺ຕຸ ມິຈ຺ຉຕິ;

ສມ຺ປາປຸເຓ ນ ວິຎ຺ຎູຫິ, ຫສ຺ສຠາວໍ ກຖໍ ນຸ ໂສ?

໑໒. ຄນ຺ໂຖປິ ກວິວາຈານ, ມລງ຺ກາຣ’ປ຺ປກາສໂກ;

ຍາຕິ ຕພ຺ພຈນີຍຕ຺ຕໍ, ຕ’ພ຺ໂພຫາຣູ’ປຈາຣໂຕ.

໑໓. ທ຺ວິປ຺ປກາຣາ ອລງ຺ກາຣາ, ຕຕ຺ຖ ສທ຺ທ, ຕ຺ຖເຠທໂຕ;

ສທ຺ທຕ຺ຖາ ພນ຺ຘນາມາ’ວ, ຕໍສຊ຺ຊິຕ ຕທາວລິ.

໑໔. ຄຸຓາລງ຺ກາຣສໍຍຸຕ຺ຕາ, ອປິ ໂທສລວ’ງ຺ກິຕາ;

ປສໍສິຍາ ນ ວິຎ຺ຎູຫິ, ສາ ກຎ຺ຎາ ວິຍ ຕາທິສີ.

໑໕. ເຕນ ໂທສນິຣາໂສ’ວ, ມຫຸສ຺ສາເຫນ ສາຘິໂຍ;

ນິທ຺ໂທສາ ສພ຺ພຖາ ສາ’ຍໍ, ສຄຸຓາ ນ ຠເວຍ຺ຍ ກິໍ?

໑໖. ສາ’ລງ຺ກາຣວິຍຸຕ຺ຕາ’ປິ, ຄຸຓຍຸຕ຺ຕາ ມໂນຫຣາ;

ນິທ຺ໂທສາ ໂທສຣຫິຕາ, ຄຸຓຍຸຕ຺ຕາ ວຘູ ວິຍ.

໑໗. ປເທ ວາກ຺ເຍ ຕທຕ຺ເຖ ຈ, ໂທສາ ເຍ ວິວິຘາ ມຕາ;

ໂສ’ທາຫຣຓ ເມເຕສໍ, ລກ຺ຂຓໍ ກຖຍາມ຺ຍ’ຫໍ.

ປທໂທສ ອຸທ຺ເທສ

໑໘. ວິຣຸທ຺ຘຕ຺ຖນ຺ຕຣາ, ຌຕ຺ຖ, ກິລິຏ຺ຐານິ, ວິໂຣຘິ ຈ;

ເນຍ຺ຍໍ, ວິເສສນາເປກ຺ຂໍ, ຫີນຕ຺ຖກ ມນຕ຺ຖກໍ.

ວາກ຺ຍໂທສ ອຸທ຺ເທສ

໑໙. ໂທສາ ປທານ ວາກ຺ຍານ, ເມກຕ຺ຖໍ ຠຄ຺ຄຣີຕິກໍ;

ຕຖາ ພ຺ຍາກິຓ຺ຓ ຄາມ຺ມານິ, ຍຕິຫີນໍ ກມຈ຺ຈຸຕໍ;

ອຕິວຸຕ຺ຕ ມເປຕຕ຺ຖໍ, ສພນ຺ຘຜຣຸສໍ ຕຖາ.

ວາກ຺ຍຕ຺ຖໂທສອຸທ຺ເທສ

໒໐. ອປກ຺ກໂມ’, ຈິຕ຺ຍຫີນໍ, ຠຄ຺ຄຣີຕິ, ສສໍສຍໍ;

ຄາມ຺ມໍ ທຸຏ຺ຐາລງ຺ກຕີຕິ, ໂທສາ ວາກ຺ຍຕ຺ຖນິສ຺ສິຕາ.

ປທໂທສນິທ຺ເທສ

໒໑. ວິຣຸທ຺ຘຕ຺ຖນ຺ຕຣໍ ຕຎ຺ຫິ, ຍສ຺ສ’ຎ຺ຎຕ຺ໂຖ ວິຣຸຊ຺ຌຕິ;

ອຘິປ຺ເປເຕ ຍຖາ ເມໂຆ, ວິສໂທ ສຸຂເຍ ຊນໍ.

໒໒. ວິເສສ຺ຍ ມຘິກໍ ເຍນາ, ຌຕ຺ຖ ເມຕໍ ຠເວ ຍຖາ;

ໂອຠາສິຕາ’ເສສທິໂສ, ຂຊ຺ໂຊໂຕ’ຍໍ ວິຣາຊເຕ.

໒໓. ຍສ຺ສ’ຕ຺ຖາ’ວຄໂມ ທຸກ຺ໂຂ, ປກຕ຺ຍາ’ທິວິຠາຄໂຕ;

ກິລິຏ຺ຐໍ ຕໍ ຍຖາ ຕາຍ, ໂສ’ຍ ມາລິງ຺ຄ຺ຍເຕ ປິຍາ.

໒໔. ຍໍ ກິລິຏ຺ຐປທໍ ມນ຺ທາ, ຠິເຘຍ຺ຍໍ ຍມກາທິກໍ;

ກິລິຏ຺ຐປທໂທເສ’ວ, ຕມ຺ປິ ອນ຺ໂຕ ກຣີຍຕິ.

໒໕. ປຕີຕສທ຺ທຣຈິຕໍ, ສິລິຏ຺ຐປທສນ຺ຘິກໍ;

ປສາທຄຸຓສໍຍຸຕ຺ຕໍ, ຍມກໍ ມຕ ເມທິສໍ.

໒໖. ອພ຺ຍເປຕໍ ພ຺ຍເປຕ’ຎ຺ຎ, ມາວຸຕ຺ຕາ’ເນກວຓ຺ຓຊໍ;

ຍມກໍ ຕຎ຺ຈ ປາທານ, ມາທິ, ມຊ຺ຌ, ນ຺ຕ, ໂຄຈຣໍ.

ອພ຺ຍເປຕ ປຐມປາທາທິ ຍມກໍ

໒໗. ສຸຊນາ’ສຸຊນາ ສພ຺ເພ, ຄຸເຓນາປິ ວິເວກິໂນ;

ວິເວກໍ ນ ສມາຍນ຺ຕິ, ອວິເວກິຊນນ຺ຕິເກ.

ອພ຺ຍເປຕ ປຐມ ທຸຕິຍ ປາທາທິ ຍມກໍ

໒໘. ກຸສລາ’ກຸສລາ ສພ຺ເພ, ປພລາ’ປພລາ ຖວາ;

ໂນ ຍາຕາ ຍາວ’ໂຫສິຕ຺ຕໍ, ສຸຂທຸກ຺ຂປ຺ປທາ ສິຍຸໍ;

ອພ຺ຍເປຕ ປຐມ ທຸຕິຍ ຕຕິຍປາທາທິ ຍມກໍ.

໒໙. ສາທຣໍ ສາ ທຣໍ ຫນ຺ຕຸ, ວິຫິຕາ ວິຫິຕາ ມຍາ;

ວນ຺ທນາ ວນ຺ທນາມານ, ຠາຊເນ ຣຕນຕ຺ຕເຍ.

ອພ຺ຍເປຕ ຈຕຸກ຺ກປາທາທິ ຍມກໍ

໓໐. ກມລໍ ກ’ມລໍ ກຕ຺ຕຸໍ, ວນໂທ ວນໂທ’ມ຺ພຣໍ;

ສຸຄໂຕ ສຸຄໂຕ ໂລກໍ, ສຫິຕໍ ສ ຫິຕໍ ກຣໍ.

໓໑. ອພ຺ຍເປຕາທິຍມກ, ສ຺ເສໂສ ເລໂສ ນິທສ຺ສິໂຕ;

ເຎຍ຺ຍານິ’ມາເຍວ ທິສາ, ຍ’ຎ຺ຎານິ ຍມການິປິ.

໓໒. ອຈ຺ຈນ຺ຕພຫໂວ ເຕສໍ, ເຠທາ ສມ຺ເຠທໂຍນິໂຍ;

ຕຖາປິ ເກຈິ ສຸກຣາ, ເກຈິ ອຈ຺ຈນ຺ຕທຸກ຺ກຣາ.

໓໓. ຍມກໍ ຕໍ ປເຫລີ [ປເຫຬິ (ກ.)] ຈ, ເນກນ຺ຕມຘຸຣານິ’ຕິ;

ອຸເປກ຺ຂິຍນ຺ຕິ ສພ຺ພານິ, ສິສ຺ສເຂທຠຍາ ມຍາ.

໓໔. ເທສກາລກລາໂລກ, ຎາຍາຄມວິໂຣຘິ ຍໍ;

ຕໍ ວິໂຣຘິປທໍ ເຈ’ຕ, ມຸທາຫຣຓໂຕ ຜຸຏໍ.

໓໕. ຍ ທປ຺ປຕີຕ ມານີຍ, ວຕ຺ຕພ຺ພໍ ເນຍ຺ຍ ມາຫຸ ຕໍ;

ຍຖາ ສພ຺ພາປິ ຘວລາ, ທິສາ ໂຣຈນ຺ຕິ ຣຕ຺ຕິຍໍ.

໓໖. ເນທິສໍ ພຫຸ ມຎ຺ຎນ຺ຕິ, ສພ຺ເພ ສພ຺ພຕ຺ຖ ວິຎ຺ຎຸໂນ;

ທຸລ຺ລຠາ’ວຄຕີ ສທ຺ທ, ສາມຕ຺ຖິຍວິລງ຺ຆິນີ.

໓໗. ສິຍາ ວິເສສນາເປກ຺ຂໍ, ຍໍ ຕໍ ປຕ຺ວາ ວິເສສນໍ;

ສາຕ຺ຖກໍ ຕໍ ຍຖາ ຕໍ ໂສ, ຠິຍ຺ໂຍ ປສ຺ສຕິ ຈກ຺ຂຸນາ.

໓໘. ຫີນໍ ກເຣ ວິເສສ຺ຍໍ ຍໍ, ຕໍ ຫີນຕ຺ຖໍ ຠເວ ຍຖາ;

ນິປ຺ປຠີ ກຕ ຂຊ຺ໂຊໂຕ, ສມຸເທຕິ ທິວາກໂຣ.

໓໙. ປາທປູຣຓມຕ຺ຕໍ ຍໍ, ອນຕ຺ຖມິຕິ ຕໍ ມຕໍ;

ຍຖາ ຫິ ວນ຺ເທ ພຸທ຺ຘສ຺ສ, ປາທປງ຺ເກຣຸຫໍ ປິ ຈ.

ວາກ຺ຍໂທສ ນິທ຺ເທສ

໔໐. ສທ຺ທໂຕ ອຕ຺ຖໂຕ ວຸຕ຺ຕໍ, ຍຕ຺ຖ ຠິຍ຺ໂຍປິ ວຸຈ຺ຈຕິ;

ຕ ເມກຕ຺ຖໍ ຍຖາ’ຠາຕິ, ວາຣິໂທ ວາຣິໂທ ອຍໍ.

ຍຖາ ຈ

໔໑. ຕິຕ຺ຖິຍງ຺ກຸຣພີຊານິ, ຊຫໍ ທິຏ຺ຐິຄຕານິ’ຫ;

ປສາເທຕິ ປສນ຺ເນ’ໂສ, ມຫາມຸນິ ມຫາຊເນ.

໔໒. ອາຣທ຺ຘກ຺ກມວິຈ຺ເຉທາ, ຠຄ຺ຄຣີຕິ ຠເວ ຍຖາ;

ກາປິ ປຎ຺ຎາ, ໂກປິ ປຄຸໂຓ, ປກຕີປິ ອໂຫ ຕວ.

໔໓. ປທານໍ ທຸພ຺ພິນິກ຺ເຂປາ, ພ຺ຍາໂມໂຫ ຍຕ຺ຖ ຊາຍຕິ;

ຕໍ ພ຺ຍາກິຓ຺ຓນ຺ຕິ ວິຎ຺ເຎຍ຺ຍໍ, ຕທຸທາຫຣຓໍ ຍຖາ.

໔໔. ພຫຸຄຸເຓ ປຓມຕິ, ທຸຊ຺ຊນານໍ ປ຺ຍຍໍ ຊໂນ;

ຫິຕໍ ປມຸທິໂຕ ນິຈ຺ຈໍ, ສຸຄຕໍ ສມນຸສ຺ສຣໍ.

໔໕. ວິສິຏ຺ຐວຈນາ’ເປຕໍ, ຄາມ຺ມໍ’ຕ຺ຍ’ຠິມຕໍ ຍຖາ;

ກຎ຺ເຎ ກາມຍມານໍ ມໍ, ນ ກາມຍສິ ກິໍນ຺ວິ’ທໍ?

໔໖. ປທສນ຺ຘານໂຕ ກິຎ຺ຈິ, ທຸປ຺ປຕີຕິກຣໍ ຠເວ;

ຕມ຺ປິ ຄາມ຺ມໍ ຕ຺ຍ’ຠິມຕໍ, ຍຖາ ຍາຠວໂຕ ປິຍາ.

໔໗. ວຸຕ຺ເຕສຸ ສູຈິເຕ ຏ຺ຐາເນ, ປທຈ຺ເຉໂທ ຠເວ ຍຕິ;

ຍໍ ຕາຍ ຫີນໍ ຕໍ ວຸຕ຺ຕໍ, ຍຕິຫີນນ຺ຕິ ສາ ປນ.

໔໘. ຍຕິ ສພ຺ພຕ຺ຖປາທນ຺ເຕ, ວຸຕ຺ຕຑ຺ເຒ ຈ ວິເສສໂຕ;

ປຸພ຺ພາປຣາເນກວຓ຺ຓ, ປທມຊ຺ເຌປິ ກຕ຺ຖຈິ.

ຕຕ຺ໂຖທາຫຣຓປຈ຺ຈຸທາຫຣຓານິ ຍຖາ

໔໙. ຕໍ ນເມ ສິຣສາ ຈາມິ, ກຣວຓ຺ຓໍ ຕຖາຄຕໍ;

ສກລາປິ ທິສາ ສິຎ຺ຈ, ຕິວ ໂສຓ຺ຓຣເສຫິ ໂຍ.

໕໐. ສໂຣ ສນ຺ຘິມ຺ຫິ ປຸພ຺ພນ຺ໂຕ, ວິຍ ໂລເປ ວິຠຕ຺ຕິຍາ;

ອຎ຺ຎຖາ ຕ຺ວ’ຎ຺ຎຖາ ຕຕ຺ຖ, ຍາ’ເທສາທິ ປຣາ’ທິ’ວ.

໕໑. ຈາທີ ປຸພ຺ພປທນ຺ຕາ’ວ, ນິຈ຺ຈໍ ປຸພ຺ພປທສ຺ສິຕາ;

ປາທໂຍ ນິຈ຺ຈສມ຺ພນ຺ຘາ, ປຣາທີວ ປເຣນ ຕຸ.

ສພ຺ພຕ຺ໂຖທາຫຣຓານິ ຍຖາ

໕໒. ນເມ ຕໍ ສິຣສາ ສພ຺ໂພ, ປມາ’ຕີຕໍ ຕຖາຄຕໍ;

ຍສ຺ສ ໂລກຄ຺ຄຕໍ ປຕ຺ຕ, ສ຺ໂສ’ປມາ ນ ຫິ ຍຸຊ຺ຊຕິ.

໕໓. ມຸນິນ຺ທໍ ຕໍ ສທາ ວນ຺ທາ, ມ຺ຍ’ນນ຺ຕມຕິ ມຸຕ຺ຕມໍ;

ຍສ຺ສ ປຎ຺ຎາ ຈ ເມຕ຺ຕາ ຈ, ນິສ຺ສີມາຕິ ວິຊມ຺ຠຕິ.

ຈາທິປາທີສຸ ປຈ຺ຈຸທາຫຣຓານິ ຍຖາ

໕໔. ມຫາເມຕ຺ຕາ ມຫາປຎ຺ຎາ, ຈ ຍຕ຺ຖ ປຣໂມທຍາ;

ປຓມາມິ ຊິນໍ ຕໍ ປ, ວຣໍ ວຣຄຸຓາ’ລຍໍ.

໕໕. ປທຕ຺ຖກ຺ກມໂຕ ມຸຕ຺ຕໍ, ກມຈ຺ຈຸຕ ມິທໍ ຍຖາ;

ເຂຕ຺ຕໍ ວາ ເທຫິ ຄາມໍ ວາ, ເທສໍ ວາ ມມ ໂສຠນໍ.

໕໖. ໂລກິຍຕ຺ຖ ມຕິກ຺ກນ຺ຕໍ, ອຕິວຸຕ຺ຕໍ ມຕໍ ຍຖາ;

ອຕິສມ຺ພາຘ ມາກາສ, ເມຕິສ຺ສາ ຖນຊມ຺ຠເນ.

໕໗. ສມຸທາຍຕ຺ຖໂຕ’ເປຕໍ, ຕໍ ອເປຕຕ຺ຖກໍ ຍຖາ;

ຄາວິປຸຕ຺ໂຕ ພລິພທ຺ໂຘ, ຕິຓໍ ຂາທີ ປິວີ ຊລໍ.

໕໘. ພນ຺ເຘ ຜຣຸສຕາ ຍຕ຺ຖ, ຕໍ ພນ຺ຘຜຣຸສໍ ຍຖາ;

ຂຣາ ຂິລາ ປຣິກ຺ຂີຓາ, ເຂຕ຺ເຕ ຂິຕ຺ຕໍ ຜລຕ຺ຍ’ລໍ.

ວາກ຺ຍຕ຺ຖໂທສ ນິທ຺ເທສ

໕໙. ເຎຍ຺ຍໍ ລກ຺ຂຓ ມນ຺ວຕ຺ຖ, ວເສນາ’ປກ຺ກມາທິນໍ;

ອຸທາຫຣຓ ເມເຕສໍ, ທານິ ສນ຺ທສ຺ສຍາມ຺ຍ’ຫໍ.

ຕຕ຺ຖາ’ປກ຺ກມໍ ຍຖາ

໖໐. ຠາວນາ, ທານ, ສີລານິ, ສມ຺ມາ ສມ຺ປາທິຕານິ’ຫ;

ໂຠຄ, ສຄ຺ຄາທິ, ນິພ຺ພານ, ສາຘນານິ ນ ສໍສໂຍ.

ໂອຈິຕ຺ຍຫີນໍ ຍຖາ

໖໑. ປູຊນີຍຕໂຣ ໂລເກ, ອຫ ເມໂກ ນິຣນ຺ຕຣໍ;

ມເຍກສ຺ມິໍ ຄຸຓາ ສພ຺ເພ, ຍໂຕ ສມຸທິຕາ ອຫຸໍ.

ຍຖາ ຈ

໖໒. ຍາຈິໂຕ’ຫໍ ກຖໍ ນາມ, ນ ທຊ຺ຊາມ຺ຍ’ປິ ຊີວິຕໍ;

ຕຖາປິ ປຸຕ຺ຕທາເນນ, ເວຘເຕ ຫທຍໍ ມມ.

ຠຄ຺ຄຣີຕິ ຍຖາ

໖໓. ອິຕ຺ຖີນໍ ທຸຊ຺ຊນານຎ຺ຈ, ວິສ຺ສາໂສ ໂນປປຊ຺ຊເຕ;