໔. ອຕ຺ຖາລງ຺ກາຣາວໂພຘ-ຈຕຸຕ຺ຖປຣິຈ຺ເຉທ

໑໖໔. ອຕ຺ຖາລງ຺ກາຣສຫິຕາ, ສຄຸຓາ ພນ຺ຘປທ຺ຘຕິ;

ອຈ຺ຈນ຺ຕກນ຺ຕາ ກນ຺ຕາ [ຍໂຕ ອຈ຺ຈນ຺ຕກນ຺ຕາ (ກ.)] ວ ວຸຈ຺ຈນ຺ເຕ ເຕ ຕໂຕ’ຘຸນາ.

໑໖໕. ສຠາວ, ວງ຺ກວຸຕ຺ຕີນໍ, ເຠທາ ທ຺ວິຘາ ອລໍກ຺ຣິຍາ;

ປຐມາ ຕຕ຺ຖ ວຕ຺ຖູນໍ, ນານາວຕ຺ຖາ’ວິຠາວິນີ.

ຍຖາ

໑໖໖. ລີລາ ວິກນ຺ຕິ ສຸຠໂຄ, ທິສາ ຖິຣ ວິໂລກໂນ;

ໂພຘິສຕ຺ຕງ຺ກຸໂຣ ຠາສໍ, ວິໂຣຈິ ວາຈ ມາສຠິໍ.

໑໖໗. ວຸຕ຺ຕິ ວຕ຺ຖຸສຠາວສ຺ສ, ຍາ’ຎ຺ຎຖາ ສາ’ປຣາ ຠເວ;

ຕສ຺ສາ’ນນ຺ຕວິກປ຺ປຕ຺ຕາ, ໂຫຕິ ພີໂຊ’ປທສ຺ສນໍ.

ວງ຺ກວຸຕ຺ຕິ ອຕ຺ຖາລງ຺ກາຣ

ອຸທ຺ເທສ

໑໖໘. ຕຕ຺ຖາ’ຕິສຍ, ອຸປມາ, ຣູປກາ, ວຸຕ຺ຕິ, ທີປກໍ,;

ອກ຺ເຂໂປ, ຕ຺ຖນ຺ຕຣນ຺ຍາໂສ, ພ຺ຍຕິເຣໂກ, ວິຠາວນາ.

໑໖໙. ເຫຕຸ, ກ຺ກໂມ, ປິຍຕຣໍ, ສມາສ, ປຣິກປ຺ປນາ;

ສມາຫິຕໍ, ປຣິຍາຍ, ວຸຕ຺ຕິ, ພ຺ຍາໂຊປວຓ຺ຓນໍ.

໑໗໐. ວິເສສ, ຣຸຬ຺ຫາຫງ຺ກາຣາ, ສິເລໂສ, ຕຸລ຺ຍໂຍຄິຕາ;

ນິທສ຺ສນໍ, ມຫນ຺ຕຕ຺ຕໍ, ວຎ຺ຈນາ, ປ຺ປກຕຕ຺ຖຸຕິ,.

໑໗໑. ເອກາວລິ, ອຎ຺ຎມຎ຺ຎໍ, ສຫວຸຕ຺ຕິ, ວິໂຣຘິຕາ;

ປຣິວຸຕ຺ຕິ, ພ຺ຠໂມ, ຠາໂວ, ມິສ຺ສ, ມາສີ, ຣສີ, ອິຕິ.

໑໗໒. ເອເຕ ເຠທາ ສມຸທ຺ທິຏ຺ຐາ, ຠາໂວ ຊີວິຕ ມຸຈ຺ຈເຕ;

ວງ຺ກວຸຕ຺ຕີສຸ ໂປເສສິ, ສິເລໂສ ຕຸ ສິຣິໍ ປຣໍ.

ນິທ຺ເທສ

໑໗໓. ປກາສກາ ວິເສສສ຺ສ, ສິຍາ’ຕິສຍວຸຕ຺ຕິ ຍາ;

ໂລກາ’ຕິກ຺ກນ຺ຕວິສຍາ, ໂລກິຍາ,ຕິ ຈ ສາ ທ຺ວິຘາ.

໑໗໔. ໂລກິຍາຕິສຍສ຺ເສ’ເຕ,

ເຠທາ ເຍ ຊາຕິອາທໂຍ;

ປຏິປາທີຍເຕ ຕ຺ວ’ຊ຺ຊ, ໂລກາຕິກ຺ກນ຺ຕໂຄຈຣາ.

໑໗໕. ປິວນ຺ຕິ ເທຫກນ຺ຕີ ເຍ, ເນຕ຺ຕຎ຺ຊລິປຸເຏນ ເຕ;

ນາ’ລໍ ຫນ຺ຕຸໍ ຊິເນ’ສໍ ຕ຺ວໍ, ຕຓ຺ຫໍ ຕຓ຺ຫາຫໂຣປິ ກິໍ?

໑໗໖. ອຸປມາໂນ’ປເມຍ຺ຍານໍ, ສຘມ຺ມຕ຺ຕໍ ສິໂຍ’ປມາ;

ສທ຺ທ, ຕ຺ຖຄມ຺ມາ, ວາກ຺ຍຕ຺ຖ, ວິສຍາ,ຕິ ຈ ສາ ຠິຘາ.

໑໗໗. ສມາສ, ປຈ຺ຈເຍ, ວາ’ທີ, ສທ຺ທາ ເຕສໍ ວສາ ຕິຘາ;

ສທ຺ທຄມ຺ມາ ສມາເສນ, ມຸນິນ຺ໂທ ຈນ຺ທິມາ’ນໂນ.

໑໗໘. ອາຍາທີ ປຈ຺ຈຍາ ເຕຫິ, ວທນໍ ປງ຺ກຊາຍເຕ;

ມຸນິນ຺ທນຍນ ທ຺ວນ຺ທໍ, ນີລຸປ຺ປລທລີຍຕິ.

໑໗໙. ອິວາທີ ອິວ, ວາ, ຕຸລ຺ຍ, ສມານ, ນິຠ, ສນ຺ນິຠາ;

ຍຖາ, ສງ຺ກາສ, ຕຸລິຕ, ປ຺ປກາສ, ປຕິຣູປກາ.

໑໘໐. ສຣີ, ສຣິກ຺ຂ, ສໍວາທີ, ວິໂຣຘິ, ສທິສາ, ວິຍ;

ປຏິປກ຺ຂ, ປຈ຺ຈນີກາ, ສປກ຺ໂຂ, ປມິໂຕ, ປມາ.

໑໘໑. ປຏິພິມ຺ພ, ປຏິຈ຺ຉນ຺ນ, ສຣູປ, ສມ, ສມິຕາ;

ສວຓ຺ຓາ, ຠາ, ປຏິນິຘິ, ສຘມ຺ມາ, ທິ ສລກ຺ຂຓາ.

໑໘໒. ຊຍຕ຺ຍ, ກ຺ໂກສຕິ, ຫສຕິ, ປຕິຄຊ຺ຊຕິ, ທູຠຕິ;

ອຸສູຍຕ຺ຍ, ວຊານາຕິ, ນິນ຺ທຕິ, ສ຺ສຕິ, ຣຸນ຺ຘຕິ.

໑໘໓. ຕສ຺ສ ໂຈເຣຕິ ໂສຠຄ຺ຄໍ, ຕສ຺ສ ກນ຺ຕິໍ ວິລຸມ຺ປຕິ;

ເຕນ ສທ຺ຘິໍ ວິວທຕິ, ຕຸລ຺ຍໍ ເຕນາ’ຘິໂຣຫຕິ.

໑໘໔. ກຈ຺ຉໍ ວິຄາຫເຕ, ຕສ຺ສ, ຕ ມນ຺ເວຕ຺ຍ, ນຸພນ຺ຘຕິ;

ຕໍສີລໍ, ຕໍນິເສເຘຕິ, ຕສ຺ສ ຈາ’ນຸກໂຣຕິ, ເມ.

໑໘໕. ອຸປມາໂນ’ປເມຍ຺ຍານໍ, ສຘມ຺ມຕ຺ຕໍ ວິຠາວິຠິ;

ອິເມຫິ ອຸປມາເຠທາ, ເກຈິ ນິຍ຺ຍນ຺ຕິ ສມ຺ປຕິ.

໑໘໖. ວິກາສິປທຸມໍ’ວາ’ຕິ, ສຸນ຺ທຣໍ ສຸຄຕາ’ນນໍ;

ອິຕິ ຘມ຺ໂມປມາ ນາມ, ຕຸລ຺ຍຘມ຺ມນິທສ຺ສນາ.

໑໘໗. ຘມ຺ມຫີນາ ‘‘ມຸຂ’ມ຺ໂຠຊ, ສທິສໍ ມຸນິໂນ’’ອິຕິ;

ວິປຣີໂຕ’ປມາ ‘‘ຕຸລ຺ຍ, ມານເນນ’ມ຺ພຸຊໍ ຕວ’’.

໑໘໘. ຕວາ’ນນ’ມິວ’ມ຺ໂຠຊໍ, ອມ຺ໂຠຊ’ມິວ ເຕ ມຸຂໍ;

ອຎ຺ຎມຎ຺ໂຎປມາ ສາ’ຍໍ, ອຎ຺ຎມຎ຺ໂຎປມານໂຕ.

໑໘໙. ‘‘ຍທິ ກິຎ຺ຈິ ຠເວ’ມ຺ໂຠຊໍ, ໂລຈນ’ພ຺ຠມຸວິພ຺ຠມໍ;

ຘາເຣຕຸໍ ມຸຂໂສຠໍ ຕໍ, ຕເວ’’ຕິ ອພ຺ຠຸໂຕປມາ.

໑໙໐. ‘‘ສຸຄນ຺ຘິ ໂສຠາ ສມ຺ພນ຺ຘີ, ສິສິຣໍ’ສຸ ວິໂຣຘິ ຈ;

ມຸຂໍ ຕວ’ມ຺ພຸຊໍເວ’ຕິ’’, ສາ ສິເລໂສປມາ ມຕາ.

໑໙໑. ສຣູປສທ຺ທວາຈ຺ຈຕ຺ຕາ, ສາ ສນ຺ຕາໂນປມາ ຍຖາ;

ພາລາ’ວຸ’ຍ຺ຍານມາລາ’ຍໍ, ສາ’ລກາ’ນນໂສຠິນີ.

໑໙໒. ຂຍີ ຈນ຺ໂທ, ພຫຸຣຊໍ, ປທຸມໍ, ເຕຫິ ເຕ ມຸຂໍ;

ສມານມ຺ປິ ສມຸກ຺ກໍສິ, ຕ຺ຍ’ຍໍ ນິນ຺ໂທປມາ ມຕາ.

໑໙໓. ອສມຕ຺ໂຖ ມຸເຂນິ’ນ຺ທຸ, ຊິນ! ເຕ ປຏິຄຊ຺ຊິຕຸໍ;

ຊໂຬ ກລງ຺ກີ’ຕິ ອຍໍ, ປຏິເສໂຘປມາ ສິຍາ.

໑໙໔. ‘‘ກຈ຺ຉໍ ຈນ຺ທາຣວິນ຺ທານໍ, ອຕິກ຺ກມ຺ມ ມຸຂໍ ຕວ;

ອຕ຺ຕນາ’ວ ສມໍ ຊາຕ’’, ມິຕ຺ຍ’ສາຘາຣໂຓປມາ.

໑໙໕. ‘‘ສພ຺ພ’ມ຺ໂຠຊ’ປ຺ປຠາສາໂຣ, ຣາສິຠູໂຕ’ວ ກຕ຺ຖຈິ;

ຕວາ’ນນໍ ວິຠາຕີ’’ຕິ, ໂຫຕາ’ຠູໂຕປມາ ອຍໍ.

໑໙໖. ປຕີຍເຕ’ຕ຺ຖຄມ຺ມາ ຕຸ, ສທ຺ທສາມຕ຺ຖິຍາ ກ຺ວຈິ;

ສມາສ, ປ຺ປຈ຺ຈເຍ, ວາທິ, ສທ຺ທໂຍຄໍ ວິນາ ອປິ.

໑໙໗. ຠິງ຺ຄາເນ’ມານິ ຈກ຺ຂູນິ, ນາ’ມ຺ພຸຊໍ ມຸຂ’ເມວິ’ທໍ;

ສຸພ຺ຍຕ຺ຕສທິສຕ຺ເຕນ, ສາ ສຣູໂປປມາ ມຕາ.

໑໙໘. ‘‘ມເຍ’ວ ມຸຂໂສຠາ’ສ຺ເສ, ຕ຺ຍລ’ມິນ຺ທຸ! ວິກຕ຺ຖນາ;

ຍໂຕ’ມ຺ພຸເຊປິ ສາ’ຕ຺ຖີຕິ’’, ປຣິກປ຺ໂປປມາ ອຍໍ.

໑໙໙. ‘‘ກິໍ ວາ’ມ຺ພຸຊ’ນ຺ໂຕຠນ຺ຕາລິ, ກິໍ ໂລລນຍນໍ ມຸຂໍ;

ມມ ໂທລາຍເຕ ຈິຕ຺ຕ’’, ມິຈ຺ຈ’ຍໍ ສໍສໂຍປມາ.

໒໐໐. ກິຎ຺ຈິ ວຕ຺ຖຸໍ ປທສ຺ເສຕ຺ວາ, ສຘມ຺ມສ຺ສາ’ຠິຘານໂຕ;

ສາມ຺ຍປ຺ປຕີຕິສພ຺ຠາວາ, ປຕິວຕ຺ຖຸປມາ ຍຖາ.

໒໐໑. ຊເນສຸ ຊາຍມາເນສຸ, ເນ’ໂກປິ ຊິນສາທິໂສ;

ທຸຕິໂຍ ນນຸ ນຕ຺ເຖ’ວ, ປາຣິຊາຕສ຺ສ ປາທໂປ.

໒໐໒. ວາກ຺ຍຕ຺ເຖເນ’ວ ວາກ຺ຍຕ຺ໂຖ, ຍທິ ໂກຈູ’ປມີຍເຕ;

ອິວຍຸຕ຺ຕາ, ວິຍຸຕ຺ຕຕ຺ຕາ, ສາ ວາກ຺ຍຕ຺ໂຖປມາ ທ຺ວິຘາ.

ອິວຍຸຕ຺ຕາ

໒໐໓. ຊິໂນ ສໍກ຺ເລສຕຕ຺ຕານໍ, ອາວິຠູໂຕ ຊນານ’ຍໍ;

ຆມ຺ມສນ຺ຕາປຕຕ຺ຕານໍ, ຆມ຺ມກາເລ’ມ຺ພຸໂທ ວິຍ.

ອິວວິຍຸຕ຺ຕາ

໒໐໔. ມຸນິນ຺ທານນ ມາຠາຕິ, ວິລາເສກມໂນຫຣໍ;

ອຸທ຺ຘໍ ສມຸຄ຺ຄຕສ຺ສາ’ປິ, ກິໍ ເຕ ຈນ຺ທ ວິຊມ຺ຠນາ.

໒໐໕. ສມຸພ຺ເພເຊຕິ ຘີມນ຺ຕໍ, ຠິນ຺ນລິງ຺ຄາທິກໍ ຕຸ ຍໍ;

ອຸປມາທູສນາຍາ’ລ, ເມຕໍ ກຕ຺ຖຈິ ຕໍ ຍຖາ.

໒໐໖. ຫໍສີ’ວາ’ຍໍ ສສີ ຠິນ຺ນ, ລິງ຺ຄາ, ກາສໍ ສຣານິ’ວ;

ວິຊາຕິ ວຈນາ, ຫີນາ, ສາ’ວ ຠຕ຺ໂຕ ຠໂຏ’ຘິເປ.

໒໐໗. ‘‘ຂຊ຺ໂຊໂຕ ຠາຓຸມາລີ’ວ, ວິຠາຕິ’’ຕ຺ຍຘິໂກປມາ;

ອຜຸຏ຺ຐຕ຺ຖາ ‘‘ພລມ຺ໂພຘິ, ສາຄໂຣ ວິຍ ສໍຂຸຠິ.’’

໒໐໘. ‘‘ຈນ຺ເທ ກລງ຺ໂກ ຠິງ຺ໂຄ’ເວ’, ຕ຺ຍຸ’ປມາເປກ຺ຂິນີ ອຍໍ;

ຂຓ຺ຑິຕາ ເກຣວາ’ກາໂຣ, ສກລງ຺ໂກ ນິສາກໂຣ.

໒໐໙. ອິຈ຺ເຈວມາທິຣູເປສຸ, ຠວນ຺ຕິ ວິຄຕາ’ທຣາ;

ກໂຣນ຺ຕິ ຈາ’ທຣໍ ຘີຣາ, ປໂຍເຄ ກ຺ວຈິ ເທ’ວ ຕຸ.

໒໑໐. ອິຕ຺ຖີຍໍ’ວາ’ຊໂນ ຍາຕິ, ວທຕ຺ເຍ’ສາ ປຸມາ ວິຍ;

ປິໂຍ ປາຓາ ອິວາ’ຍໍ ເມ, ວິຊ຺ຊາ ຘນ’ມິວ’ຈ຺ຈິຕາ.

໒໑໑. ຠວໍ ວິຍ ມຫີປາລ, ເທວຣາຊາ ວິໂຣຈເຕ;

ອລ’ມໍສຸມໂຕ ກຈ຺ຉໍ, ເຕຊສາ ໂຣຫິຕຸໍ ອຍໍ.

໒໑໒. ອຸປມາໂນ’ປເມຍ຺ຍານໍ, ອເຠທສ຺ສ ນິຣູປນາ;

ອຸປມາ’ວ ຕິໂຣຠູຕ, ເຠທາ ຣູປກ ມຸຈ຺ຈເຕ.

໒໑໓. ອເສສ ວຕ຺ຖຸ ວິສຍໍ, ເອກເທສ ວິວຸຕ຺ຕິ [ວິວຕ຺ຕິ (ຏີກາ)], ຈ;

ຕໍ ທ຺ວິຘາ ປຸນ ປຈ຺ເຈກໍ, ສມາສາທິວສາ ຕິຘາ.

ອເສສວຕ຺ຖຸວິສຍສມາສ

໒໑໔. ອງ຺ຄຸລິທລ ສໍໂສຠິໍ, ນຂທີຘິຕິ ເກສຣໍ;

ສິຣສາ ນ ປິລນ຺ຘນ຺ຕິ, ເກ ມຸນິນ຺ທ ປທ’ມ຺ພຸຊໍ.

ອເສສວຕ຺ຖຸວິສຍອສມາສ

໒໑໕. ຣຕນານິ ຄຸຓາ ຠູຣີ, ກຣຸຓາ ສີຕລໍ ຊລໍ;

ຄມ຺ຠີຣຕ຺ຕ ມຄາຘຕ຺ຕໍ, ປຈ຺ຈກ຺ໂຂ’ຍໍ ຊິໂນ’ມ຺ພຸຘິ.

ອເສສວຕ຺ຖຸວິສຍມິສ຺ສກ

໒໑໖. ຈນ຺ທິກາ ມນ຺ທຫາສາ ເຕ, ມຸນິນ຺ທ! ວທນິ’ນ຺ທຸໂນ;

ປໂພຘຍຕ຺ຍ’ຍໍ ສາຘຸ, ມໂນ ກຸມຸທ ການນໍ.

໒໑໗. ອເສສວຕ຺ຖຸວິສເຍ, ປເຠໂທ ຣູປເກ ອຍໍ;

ເອກເທສວິວຸຕ຺ຕິມ຺ຫິ, ເຠໂທ ທານິ ປວຸຈ຺ຈຕິ.

ເອກເທສວິວຸຕ຺ຕິສມາສ

໒໑໘. ວິລາສ ຫາສ ກຸສຸມໍ, ຣຸຈິຣາ’ຘຣ ປລ຺ລວໍ;

ສຸຂໍ ເກ ວາ ນ ວິນ຺ທນ຺ຕິ, ປສ຺ສນ຺ຕາ ມຸນິໂນ ມຸຂໍ.

ເອກເທສວິວຸຕ຺ຕິອສມາສ

໒໑໙. ປາທທ຺ວນ຺ທໍ ມຸນິນ຺ທສ຺ສ, ທທາຕຸ ວິຊຍໍ ຕວ;

ນຂຣໍສີ ປຣໍ ກນ຺ຕາ, ຍສ຺ສ ປາປຊຍທ຺ຘຊາ.

ເອກເທສວິວຸຕ຺ຕິມິສ຺ສກ

໒໒໐. ສຸນິມ຺ມລກໂປລສ຺ສ, ມຸນິນ຺ທ ວທນິ’ນ຺ທຸໂນ;

ສາຘຸ’ປ຺ປພຸທ຺ຘ ຫທຍໍ, ຊາຕໍ ເກຣວ ການນໍ.

໒໒໑. ຣູປການິ ພຫູນ຺ເຍ’ວ [ຏີກາຍໍ ອຸທ຺ຘຏໍ ຍຸຕ຺ຕຣູປກໍ ສິຕປຸປ຺ຜຸຊລໍ ໂລລ, ເນຕ຺ຕຠິງ຺ຄ ຕວາ’ນນໍ; ກສ຺ສ ນາມ ມໂນ ຘີຣ, ນາກຑ຺ຒຕິ ມໂນຫຣໍ;], ຍຸຕ຺ຕາ, ຍຸຕ຺ຕາທິເຠທໂຕ;

ວິສຸໍ ນ ຕານິ ວຸຕ຺ຕານິ, ເອຕ຺ເຖ’ວ’ນ຺ໂຕຄຘານິ’ຕິ.

໒໒໒. ‘‘ຈນ຺ທິມາ’ກາສປທຸມ’’, ມິຈ຺ເຈຕໍ ຂຓ຺ຑຣູປກໍ;

ທຸຏ຺ຐ, ‘‘ມມ຺ໂພຣຸຫວນໍ, ເນຕ຺ຕານິ’ຈ຺ຈາ’’ທິ ສຸນ຺ທຣໍ.

໒໒໓. ປຣິຍນ຺ໂຕ ວິກປ຺ປານໍ, ຣູປກສ຺ໂສ’ປມາຍ ຈ;

ນຕ຺ຖິ ຍໍ ເຕນ ວິຎ຺ເຎຍ຺ຍໍ, ອວຸຕ຺ຕ ມນຸມານໂຕ.

໒໒໔. ປຸນປ຺ປຸນ ມຸຈ຺ຈາຣຓໍ [ປຸນປ຺ປຸນຸຈ຺ຈາຣຓໍ ຍໍ (ສີ. ກ.)], ຍມຕ຺ຖສ຺ສ, ປທສ຺ສ ຈ;

ອຸຠເຍສຎ຺ຈ ວິຎ຺ເຎຍ຺ຍາ, ສາ’ຍ’ມາວຸຕ຺ຕິ ນາມໂຕ.

ອຕ຺ຖາວຸຕ຺ຕິ

໒໒໕. ມໂນ ຫຣຕິ ສພ຺ເພສໍ, ອາທທາຕິ ທິສາ ທສ;

ຄຓ຺ຫາຕິ ນິມ຺ມລຕ຺ຕຎ຺ຈ, ຍໂສຣາສິ ຊິນສ຺ສ’ຍໍ.

ປທາວຸຕ຺ຕິ

໒໒໖. ວິຠາເສນ຺ຕິ ທິສາ ສພ຺ພາ, ມຸນິໂນ ເທຫກນ຺ຕິໂຍ;

ວິຠາ ເສນ຺ຕິ ຈ ສພ຺ພາປິ, ຈນ຺ທາທີນໍ ຫຕາ ວິຍ.

ອຸຠຍາວຸຕ຺ຕິ

໒໒໗. ຊິຕ຺ວາ ວິຫຣຕິ ກ຺ເລສ, ຣິປຸໍ ໂລເກ ຊິໂນ ອຍໍ;

ວິຫຣຕ຺ຍ’ຣິວຄ຺ໂຄ’ຍໍ, ຣາສິຠູໂຕ’ວ ທຸຊ຺ຊເນ.

໒໒໘. ເອກຕ຺ຖ ວຕ຺ຕມານມ຺ປິ, ສພ຺ພວາກ຺ໂຍ’ປກາຣກໍ;

ທີປກໍ ນາມ ຕໍ ຈາທິ, ມຊ຺ຌ, ນ຺ຕວິສຍໍ ຕິຘາ.

ອາທິ ທີປກ

໒໒໙. ອກາສິ ພຸທ຺ໂຘ ເວເນຍ຺ຍ, ພນ຺ຘູນ ມມິໂຕ’ທຍໍ;

ສພ຺ພປາເປຫິ ຈ ສມໍ, ເນກຕິຕ຺ຖິຍມທ຺ທນໍ.