໕,໑໖. ປໂຍຊກພ຺ຍາປາເຣ ຓາປິ ຈ

ກຕ຺ຕາຣໍ ໂຍ ປໂຍເຊຕິ, ຕສ຺ສ ພ຺ຍາປາເຣ ກ຺ຣິຍຕ຺ຖາ ຓິ+ຓາປີ ໂຫນ຺ຕິ ພຫຸລໍ.

ຓິປຈ຺ຈໂຍ ອຸວຓ຺ຓນ຺ຕາ, ອາໂຕ ຓາເປວ ໂຫຕິ+ຫ;

ທ຺ເວ ທ຺ເວ+ໂກ ໂຫຕິ ວາ ເສເສ, ພຫຸລໍຕ຺ຍນຸວຸຕ຺ຕິຍາ.

ອກມ຺ມກາປິ ໂຫນ຺ເຕວ, ຓິ+ຓາປ຺ຍນ຺ຕາ ສກມ຺ມກາ;

ສກມ຺ມກາ ທ຺ວິກມ຺ມາ+ສ຺ສຸ, ທ຺ວິກມ຺ມາ ຈ ຕິກມ຺ມກາ.

ຕສ຺ມາ ກຕ຺ຕຣິ ກມ຺ເມ ຈ, ຓິ+ຓາປີນໍ ຕຸ ສມ຺ຠໂວ;

ນ ຠາເວ ສຸທ຺ຘກຕ຺ຕາ ຕຸ, ກມ຺ມໍ ໂຫຕິ ປໂຍຊເກ.

ນຍາທີນໍ ປຘານຎ຺ຈ, ອປຘານໍ ທຸຫາທິນໍ;

ສຸທ຺ຘກຕ຺ຕາ ຓິ+ຓາປີສຸ, ກມ຺ມ+ມກ຺ຂ຺ຍາຕ ໂຄຈຣໍ.

ຠວິຕຸໍ ປໂຍຊຍຕີຕິ ອຕ຺ເຖ ອິມິນາ ຓິປ຺ປຈ຺ຈໂຍ. ຓກາໂຣ ຓານຸພນ຺ຘກາຣິຍຕ຺ໂຖ. ‘‘ຍຸວຓ຺ຓານ+ເມ+ໂອ ປຈ຺ຈເຍ’’ຕິ ໂອກາເຣ ‘‘ອາຍາ+ວາ ຓານຸພນ຺ເຘ’’ຕິ ຓານຸພນ຺ເຘ ອາວາເທໂສ. ຕ຺ຍາທິມ຺ຫິ ‘‘ຓິ+ຓາປ຺ຍາ+ປີຫິ ວາ’’ຕິ ລວິກຣເຓ ເອກາເຣ ‘‘ເອໂອນ+ມຍວາ ສເຣ’’ຕິ ອຍາເທໂສ. ໂສ ສມາຘິໍ ຠາວຍຕິ ຠາເວຕິ, ຠາວຍນ຺ຕິ ຠາເວນ຺ຕິ+ຈ຺ຈາທິ. ກມ຺ເມ-ເຕນ ສມາຘິ ຠາວີຍຕິ+ຈ຺ຈາທິ. ເອຕ຺ຖ ‘‘ທີໂຆ ສຣສ຺ສາ’’ຕິ ກ຺ເຍ ອິກາຣສ຺ສ ທີໂຆ. ຠາວຍິສ຺ສຕິ ຠາເວສ຺ສຕິ, ຠາວຍິສ຺ສນ຺ຕິ ຠາເວສ຺ສນ຺ຕິ+ຈ຺ຈາທິ. ອຊ຺ຊຕເນ ອີສ຺ສ ສິມ຺ຫິ ອຠາເວສິ ຠາເວສິ, ອຠາວຍິ ຠາວຍິ, ອຠາວຍິໍສຸ ຠາວຍິໍສຸ. ປຣສ຺ສຣໂລເປ ອຠາເວສຸໍ ຠາເວສຸໍ, ອຠາວຍໍສຸ ຠາວຍໍສຸ, ອຠາວຍຸໍ ຠາວຍຸໍ ອິຈ຺ຈາທິ. ກມ຺ເມ-ອຠາວີຍິ ຠາວີຍິ ອິຈ຺ຈາທິ. ອຠາວິສ຺ສ ອຠາວຍິສ຺ສ, ອຠາວິສ຺ສໍສຸ ອຠາວຍິສ຺ສໍສຸ. ກມ຺ເມ-ອຠາວຍິສ຺ສໍ ອິຈ຺ຈາທິ. ຠາເວ ຠາເວຍ຺ຍ ອິຈ຺ຈາທິ. ກມ຺ເມ-ຠາວີເຍຍ຺ຍ ອິຈ຺ຈາທິ. ຠາວຍຕຸ ຠາເວຕຸ ອິຈ຺ຈາທິ. ກມ຺ເມ-ຠາວີຍຕຸ ອິຈ຺ຈາທິ.

ປຈິຕຸໍ ປໂຍເຊຕີຕິ ອຕ຺ເຖ ຓິ+ຓາປີ ໂຫນ຺ຕິ. ໂສ ເທວທຕ຺ເຕນ ໂອທນໍ ປາຈຍຕິ ປາເຈຕິ ອິຈ຺ຈາທິ, ຕຖາ ປາຈາປຍຕິ ປາຈາເປຕິ+ຈ຺ຈາທິ. ກມ຺ເມ-ໂສ ເຕນ ເທວທຕ຺ເຕນ ໂອທໂນ ປາຈີຍຕິ ປາຈາປີຍຕິ+ຈ຺ຈາທິ, ຠວິສ຺ສຕ຺ຍາທີສຸປິ ໂຍເຊຕພ຺ພໍ.

ຄນ຺ຕຸໍ ປໂຍເຊຕີຕິ ອຕ຺ເຖ ໂສ ຕໍ ປຸຣິສໍ ຄາມໍ ຄມຍຕິ ຄເມຕິ ຄຈ຺ຉາປຍຕິ ຄຈ຺ຉາເປຕິ+ຈ຺ຈາທິ. ກມ຺ເມ-ເຕນ ໂສ ຄາມໍ ຄມີຍຕິ ຄຈ຺ຉາປີຍຕິ+ຈ຺ຈາທິ.

ຄຸຫ=ສໍວຣເຓ, ຄຸຫິຕຸໍ ປໂຍເຊຕີຕິ ຓິມ຺ຫິ ‘‘ຄຸຫິສ຺ສ ສເຣ’’ຕິ ທີໂຆ. ຄູຫຍຕິ, ຄູຫຍນ຺ຕິ ອິຈ຺ຈາທິ.

ທິສ+ທຸສ=ອປ຺ປີຕິຍໍ, ທຸສິຕຸໍ ປໂຍເຊຕີຕິ ຓິມ຺ຫິ ‘‘ຓິມ຺ຫິ ທີໂຆ ທຸສສ຺ສາ’’ຕິ ທີເຆ ທູສຍຕິ+ຈ຺ຈາທິ.

ຕຖາ ອິຈ຺ຉນ຺ຕໍ ປໂຍຊຍຕິ ອິຈ຺ຉາປຍຕິ ອິຈ຺ຉາເປຕິ, ເອສຍຕິ ເອເສຕິ. ນິຍຈ຺ຉນ຺ຕໍ ປໂຍຊຍຕິ ນິຍມຍຕິ ນິຍເມຕິ. ຕຖາ ອາສຍຕິ ອາເສຕິ, ອຈ຺ຉາປຍຕິ ອຈ຺ຉາເປຕິ. ລາຠຍຕິ ລາເຠຕິ, ເອວໍ ວາສຍຕິ ວາເສຕິ, ວາສາປຍຕິ ວາສາເປຕິ. ວາຫຍຕິ ວາເຫຕິ, ວາຫາປຍຕິ ວາຫາເປຕິ+ຈ຺ຈາທິ. ເອວໍ ຊີຣຍຕິ, ມາຣຍຕິ, ທສ຺ສຍຕິ ອິຈ຺ຈາທິ. ຫູ=ສຕ຺ຕາຍໍ, ປໂຫນ຺ຕໍ ປໂຍຊຍຕິ ປຫາວຍຕິ ປຫາເວຕິ ອິຈ຺ຈາທິ. ສາຍຍຕິ ສາຍາປຍຕິ ສາຍາເປຕິ. ນາຍາປຍຕິ ນາຍາເປຕິ. ປຕິຏ຺ຐາປຍຕິ ປຕິຏ຺ຐາເປຕິ. ຣສ຺ເສ ປຕິຏ຺ຐເປຕິ. ຫນ຺ຕຸໍ ປໂຍຊຍຕີຕິ ຓິ+ຓາປີ, ‘‘ຫນສ຺ສ ຆາໂຕ ຓານຸພນ຺ເຘ’’ຕິ ຆາຕາເທເສ ຆາຕຍຕິ ຆາເຕຕິ. ຕຖາ ຊຸຫາວຍຕິ ຊຸຫາເວຕິ, ຊຫາປຍຕິ ຊຫາເປຕິ. ຫາປຍຕິ ຫາເປຕິ. ທາປຍຕິ ທາເປຕິ. ວິຘາປຍຕິ ວິຘາເປຕິ, ປິທຫາປຍຕິ ປິທຫາເປຕິ. (ຠູວາທິນໂຍ).

ອິທານິ ຣຸຘາທິອຏ຺ຐຄຓາ ທສ຺ສີຍນ຺ເຕ-ໂຣຘຍຕິ ໂຣເຘຕິ. ເທວຍຕິ ເທເວຕິ. ໂຕທຍຕິ ໂຕເທຕິ. ຊຍາປຍຕິ ຊຍາເປຕິ. ວິກ຺ກຍຕິ ວິກ຺ກຍາເປຕິ. ສາວຍຕິ ສາເວຕິ. ວິຕານຍຕິ ວິຕາເນຕິ. ໂຈຣາປຍຕິ ໂຈຣາເປຕິ ອິຈ຺ຈາທິ.

ຂາທີຫິ ປຈ຺ຈຍນ຺ເຕຫິ, ອປິ ໂຫນ຺ຕິ ຓິ+ຓາປໂຍ;

ຓິ+ຓາປິນາ+ນການານໍ, ທສ຺ສນຎ຺ເຈຕ຺ຖ ສາຘນໍ.

ຕິຕິກ຺ຂນ຺ຕໍ ປໂຍຊຍຕິ ຕິຕິກ຺ເຂຕິ ຕິຕິກ຺ຂາເປຕິ, ຕິກິຈ຺ຉຍຕິ ຕິກິຈ຺ເຉຕິ ຕິກິຈ຺ຉາປຍຕິ ຕິກິຈ຺ຉາເປຕິ. ເອວໍ ພຸຠຸກ຺ເຂຕິ ພຸຠຸກ຺ຂາເປຕິ. ປພ຺ພຕາຍຍຕິ. ປຸຕ຺ຕີຍຍຕິ ອິຈ຺ຈາທິ. (ຂາທິປຈ຺ຈຍນໂຍ).

ອິຕິ ປໂຍຄສິທ຺ຘິຍໍ ຕ຺ຍາທິກຓ຺ໂຑ ຉຏ຺ໂຐ.