໖. ຕ຺ຍາທິກຓ຺ຑ

ອຖ ຕ຺ຍາທໂຍ ກ຺ຣິຍາວາຈີຫິ ຘາຕູຫິ ວຸຈ຺ຈນ຺ເຕ.

ກ຺ຣິຍໍ ອາຈິກ຺ຂຕີຕິ ອາຂ຺ຍາຕນ຺ຕິ ກ຺ຣິຍາປທສ຺ສ ປຸພ຺ພາຈຣິຍສຎ຺ຎາ. ກາລ+ກາຣກ+ປຸຣິສປຣິທີປກໍ ກ຺ຣິຍາລກ຺ຂຓໍ ຕ຺ຍາທ຺ຍນ຺ຕໍ ອລິງ຺ຄຎ຺ຈ, ວຸຕ຺ຕມ຺ປິ ເຈ+ຕໍ –

ຍໍ ຕິກາລໍ ຕິປຸຣິສໍ, ກ຺ຣິຍາວາຈີ ຕິກາຣກໍ;

ອຕິລິງ຺ຄໍ ທ຺ວິວຈນໍ, ຕ+ທາຂ຺ຍາຕນ຺ຕິ ວຸຈ຺ຈຕິ.

໑໔. ກ຺ຣິຍຕ຺ຖາ ພຫຸລໍ –ຕິ

ຈ ສພ຺ພຕ຺ຖ ວຕ຺ຕເຕ. ກ຺ຣິຍາ ອຕ຺ໂຖ ເອຕສ຺ສາຕິ ກ຺ຣິຍຕ຺ໂຖ ຘາຕຸ, ໂສ ຈ ທຸວິໂຘ ສກມ຺ມກາ+ກມ຺ມກວເສນ. ຕຕ຺ຖ ຍສ຺ມິໍ ກ຺ຣິຍຕ຺ເຖ ກຕ຺ຕຸວາຈິມ຺ຫາ ກມ຺ມໍ ຄເວສີຍເຕ, ໂສ ສກມ຺ມໂກ. ອິຕໂຣ ອກມ຺ມໂກ.

ຕຕ຺ຣ ສກມ຺ມກາ ກມ຺ມາເປກ຺ຂໍ ກ຺ຣິຍໍ ວທນ຺ຕິ, ຍຖາ ກຏໍ ກໂຣຕິ, ຄາມໍ ຄຈ຺ຉຕິ, ໂອທນໍ ປຈຕິ. ອກມ຺ມກາ ກມ຺ມນິຣເປກ຺ຂໍ ກ຺ຣິຍໍ ວທນ຺ຕິ, ຍຖາ ອຈ຺ຉຕິ ເສຕິ ຕິຏ຺ຐຕິ. ກ຺ຣິຍາຕິ ຈ ຄມນປຈນາທິໂກ ອສຕ຺ຕສມ຺ມໂຕ ກຕ຺ຕຣິ ກມ຺ເມ ວາ ປຕິຏ຺ຐິໂຕ ກາຣກສມູຫສາຘິໂຍ ປທຕ຺ໂຖ ວຸຈ຺ຈຕິ. ອປິ ຈ –

ກຣຓໍ ຠວນໍ ຈາປິ, ກຣ+ຠູຫິ ກຖີຍເຕ;

ຕໂຕ ກ຺ຣິຍາທິວາຈຕ຺ຕໍ, ປາກາທີນໍ ກຖໍ ຠເວ.

ກຣ+ຠູຘາຕູຫິ ກຣຓຎ຺ຈ ຠວນຎ຺ຈ ວຸຈ຺ຈຕິ, ປາກ+ຄມນາທີຫິ ເຕສໍ ກ຺ຣິຍາຠວນານໍ ວາຈ຺ຈຕ຺ຕໍ ກຖໍ ຠວຕີຕິ ວຸຕ຺ຕໍ ໂຫຕິ. ປຸນປິ –

ປາກາທີນຎ຺ຫິ ວາຈ຺ຈຕ຺ຕໍ, ກຣຠູສຸ ນ ຍຸຊ຺ຊຕິ;

ຕໍ ພຫຸຕຣວາຈ຺ຈຕ຺ຕໍ, ປາກາທີສຸ ນ ຍຸຊ຺ຊຕິ.

ຕໍ ນາມ –

ກາຣິຍຣູປາ ຫິ ຘາຕ຺ວຕ຺ຖາ, ສຕ຺ຕາຍຸຕ຺ຕາ ຈ ເຕ+ຂິລາ;

ຕໂຕ ກ຺ຣິຍາ ຈ ຠາໂວ ຈ, ສາມຎ຺ຎໍ ເຕສຸ ຄມ຺ຍເຕ.

໑. ວຕ຺ຕມາເນຕິ ອນ຺ຕິ ສິ ຖ ມິ ມ ເຕ ອນ຺ເຕ ເສ ວ຺ເຫ ເອ ມ຺ເຫ.

ວຕ຺ຕມາເນ ອາຣທ຺ຘາປຣິສມຕ຺ເຕ ອຕ຺ເຖ ວຕ຺ຕມານໂຕ ກ຺ຣິຍຕ຺ຖາ ຕ຺ຍາທໂຍ ໂຫນ຺ຕິ. ກ຺ຣິຍາຘິກາຣຕ຺ຕາ ‘‘ກ຺ຣິຍຕ຺ຖາ’’ຕິ ວຸຕ຺ຕໍ. ເຕສ+ມນິຍເມ –

໑໔. ປຸພ຺ພປຣຈ຺ຉກ຺ການ+ເມກາເນເກສຸ ຕຸມ຺ຫາ+ມ຺ຫ+ເສເສສຸ ທ຺ເວ ທ຺ເວ ມຊ຺ຌິມຸ+ຕ຺ຕມ+ປຐມາ

ເອກາເນເກສຸ ຕຸມ຺ຫອມ຺ຫສທ຺ທວຈນີເຍສຸ ຕທຎ຺ຎສທ຺ທວຈນີເຍສຸ ຈ ກາຣເກສຸ ປຸພ຺ພຈ຺ຉກ຺ການໍ ປຣຈ຺ຉກ຺ການຎ຺ຈ ມຊ຺ຌິມຸ+ຕ຺ຕມ+ປຐມາ ທ຺ເວ ທ຺ເວ ໂຫນ຺ຕິ ຍຖາກ຺ກມໍ. ຕຕ຺ຖຕິ ອນ຺ຕີຕິ ປຐມປຸຣິໂສ, ອາໂທ ນິທ຺ທິຏ຺ຐຕ຺ຕາ. ສິ ຖ ອິຕິ ມຊ຺ຌິມປຸຣິໂສ, ມຊ຺ເຌ ນິທ຺ທິຏ຺ຐຕ຺ຕາ. ມິ ມ ອິຕິ ອຸຕ຺ຕມປຸຣິໂສ. ອຸຕ຺ຕມສທ຺ໂທ+ຍໍ ສຠາວໂຕ ຕິປຠຸຕີນ+ມນ຺ຕ+ມາຫ. ປຣຈ຺ຉກ຺ເກປິ ເຕ ອນ຺ເຕຕິອາທິນາ ເອວໍ ໂຍເຊຕພ຺ພໍ. ເອວໍ ເສເສສຸ ຠວິສ຺ສຕິອາທີສຸ ສຕ຺ຕສຸ ປຈ຺ຈຍວິຘານສຸຕ຺ເຕສຸປິ ໂຍເຊຕພ຺ພໍ.

ອິທານິ ຠູວາທີນ+ມຏ຺ຐຄຓານໍ ຠູວາທິຄເຓສຸ ຠູ=ສຕ຺ຕາຍ+ມິຕິ ປຐມຘາຕຸໂຕ ປຣາ ຕ຺ຍາທໂຍ ໂຍຊີຍນ຺ເຕ. ຕຕ຺ຖ ‘‘ເອກມ຺ຫິ ວຕ຺ຕພ຺ເພ ເອກວຈນໍ’’ຕິ ຕ຺ຍາທີສຸ ປຣຠູເຕສຸ ກຕ຺ຕຸ+ກມ຺ມ+ຠາເວສຸເຍວ ກ຺ຍວິກຣຓລວິກຣຓາ ໂຫນ຺ຕີຕິ ‘‘ກ຺ໂຍ ຠາວກມ຺ເມສ຺ວ+ປໂຣກ຺ເຂສຸ ມານ+ນ຺ຕ+ຕ຺ຍາທີສຸ’’ ‘‘ກຕ຺ຕຣິ ໂລ’’ ອິຈ຺ຈາທິນາ ເຕສໍ ວິກຣຓານໍ ວິຘານາ ຕ຺ຍາທໂຍ ກຕ຺ຕຸ+ກມ຺ມ+ຠາເວສ຺ເວວ ວິຎ຺ຎາຍນ຺ຕີຕິ ກຕ຺ຕຣິ ຕິມ຺ຫິໂລ. ເກ ເຕ ວິກຣຓາ –

ປຸພ຺ພາປຣຠາຄຏ຺ຐານາ, ຠິນ຺ນຘາຕຸວິຠຕ຺ຕິໂຍ;

ນິສ຺ສາຍ ປຈ຺ຈຍາ ໂຫນ຺ຕິ, ເອເຕ ວິກຣຓາ ສິຍຸໍ.

໕,໘໒. ຍຸວຓ຺ຓານ+ເມ, ໂອ ປຈ຺ຈເຍ

ອິວຓ຺ຓຸ+ວຓ຺ຓນ຺ຕານໍ ກ຺ຣິຍຕ຺ຕານໍ ເອ+ໂອ ໂຫນ຺ຕິ ຍຖາກ຺ກມໍ ປຈ຺ຈເຍຕິ ອູສ຺ໂສ+ກາໂຣ.

໕,໘໙. ເອໂອນ+ມຍ+ວາ ສເຣ

ສເຣ ປເຣ ເອໂອນ+ມຍວາ ໂຫນ຺ຕິ ຍຖາກ຺ກມໍຕິ ໂອສ຺ສ ອວາເທໂສ. ໂສ ປຸຣິໂສ ສາຘຸ ຠວຕິ, ສາ ອິຕ຺ຖີ ສາຘຸ ຠວຕິ, ຈິຕ຺ຕໍ ສາຘຸ ຠວຕິ.

ອຸຕ຺ຕຕ຺ຕາ ກຕ຺ຕຸ ອາຂ຺ຍາເຕ, ຕຕິຍາ ນ ຈ ກຕ຺ຕຣິ;

ປຐມາວິຠຕ຺ຕິ ໂຫເຕວ, ອຕ຺ຖມຕ຺ຕໍ ອເປກ຺ຂິຍ.

ສຕິປິ ກ຺ຣິຍາເຍກຕ຺ເຕ ກຕ຺ຕູນໍ ພຫຸຕ຺ຕາ ‘‘ພຫຸມ຺ຫິ ວຕ຺ຕພ຺ເພ ພຫຸວຈນໍ’’ຕິ ອນ຺ຕິ.

໑໖໑. ກ຺ວຈິ ວິກຣຓານນ຺ຕິ

ວິກຣຓານໍ ກ຺ວຈິ ໂລໂປ ໂຫຕີຕິ ລວິກຣຓສ຺ສ ໂລໂປ, ເສສໍ ປຸຣິມສທິສໍ. ເຕ ປຸຣິສາ ຠວນ຺ຕິ. ມຊ຺ຌິມປຸຣິ- ເສກວຈນໍ ສິ, ຕ຺ວໍ ຠວສິ. ພຫຸວຈນໍ ຖປຈ຺ຈໂຍ, ຕຸມ຺ເຫ ຠວຖ. ອຸຕ຺ຕມປຸຣິເສກວຈນໍ ມິປຈ຺ຈໂຍ.

໕໗. ຫິມິເມສ຺ວ+ສ຺ສ

ອກາຣສ຺ສ ທີໂຆ ໂຫຕິ ຫິມິເມສຸ. ອຫໍ ຠວາມິ. ພຫຸວຈນໍ ມປຈ຺ຈໂຍ, ມຍໍ ຠວາມ. ເອວໍ ປຣຈ຺ເຉກ຺ເກປິ-ຠວເຕ, ຠວນ຺ເຕ. ຠວເສ, ຠວວ຺ເຫ. ຠເວ, ຠວມ຺ເຫ. ເກຈິ ທີຆໍ ກຕ຺ວາ ປຐນ຺ຕິ, ‘‘ພ຺ຍຎ຺ຊເນ ທີຆຣສ຺ສາ’’ຕິ ທີໂຆ, ຠວາມ຺ເຫ.

ເອຕ຺ຖ ຈ –

ລຊ຺ຊາ ສຕ຺ຕາ ຐິຕິ ຊາຄຣຓໍ,

ວຸທ຺ຘິ ກ຺ຂຍ ຊີວິຕ ມຣຓໍ;

ກີຬາ ຣຸຈິ ໂຣຈເຕ ອິຕ຺ເຍວໍ,

ວຸຕ຺ຕາ ອກມ຺ມກຘາຕຸ ສພ຺ເພ.

–ຕິ ວຸຕ຺ຕຕ຺ຕາ ກມ຺ມໍ ທຸຕິຍາ ນ.

ປຈ=ປາເກ, ອກາໂຣ ອຸຈ຺ຈາຣຓຕ຺ໂຖ, ເອວ+ມຸປຣິປິ. ປຈ ອິຕິ ຐິເຕ ລວິກຣຓໍ, ວິກຣຓໂລປາທິ ປຸຣິມສມໍ. ໂສ ໂອທນໍ ປຈຕິ, ເຕ ປຈນ຺ຕິ. ຕ຺ວໍ ປຈສິ, ຕຸມ຺ເຫ ປຈຖ. ອຫໍ ປຈາມິ, ມຍໍ ປຈາມ. ປຣຈ຺ຉກ຺ເກ-ປຈເຕ, ປຈນ຺ເຕ. ປຈເສ, ປຈວ຺ເຫ. ປເຈ, ປຈາມ຺ເຫ.

໑,໒໒. ວິປ຺ປຏິເສເຘ

ວິປ຺ປຏິເສຘນໍ=ອຎ຺ຎມຎ຺ຎປຏິເສຘນໍ ວິປ຺ປຏິເສໂຘ. ປຐມມຊ຺ຌິມປຸຣິສານໍ ທ຺ວິນ຺ນໍ ເອກຕ຺ຖ ປສງ຺ເຄ ມຊ຺ຌິມປຸຣິສພຫຸວຈນໍ ຖປຈ຺ຈໂຍ. ໂສ ຈ ປຈຕິ, ຕ຺ວຎ຺ຈ ປຈສິ, ຕຸມ຺ເຫ ປຈຖ. ຕຸລ຺ຍພລວິໂຣຘິໂນ ຫິ ວິປ຺ປຏິເສຘາ ປຐມມຊ຺ຌິມອຸຕ຺ຕມປຸຣິສານໍ ຕິຓ຺ຓໍ ເອກຕ຺ຖ ປສງ຺ເຄ ອຸຕ຺ຕມປຸຣິສພຫຸວຈນໍ ໂຫຕິ, ໂສ ຈ ປຈຕິ, ຕ຺ວຎ຺ຈ ປຈສິ, ອຫຎ຺ຈ ປຈາມິ ມຍໍ ປຈາມາຕິ ຠວຕິ.

ອມ+ຄມ=ຄມເນ –

໕,໑໗໓. ຄມ ຍມິ+ສາ+ສ ທິສານໍ ວາ ຈ຺ຉງ

ເອເຕສໍ ຘາຕູນໍ ຈ຺ຉງ ວາ ໂຫຕິ ນ຺ຕ+ມານ+ຕ຺ຍາທີສຸ. ໂສ ຄາມໍ ຄຈ຺ຉຕິ. ອນ຺ຕິ –

໗໔. ຄຣຸປຸພ຺ພາ ຣສ຺ສາ ເຣ+ນ຺ເຕນ຺ຕີນໍ

ຄຣຸປຸພ຺ພສ຺ມາ ຣສ຺ສາ ນ຺ເຕ+ນ຺ຕີນໍ ເຣ ວາ ໂຫຕິ.

ອກ຺ຂຣນິຍໂມ ຉນ຺ທໍ,

ຄຣຸລຫຸນິຍໂມ ຠເວ ວຸຕ຺ຕິ;

ທີໂຆ ສໍໂຍຄາທິປຸພ຺ໂພ,

ຣສ຺ໂສ ຄຣຸ ລຫຸ ຕຸ ຣສ຺ໂສ.

ຄຈ຺ຉເຣ ຄຈ຺ຉນ຺ຕິ. ຕ຺ວໍ ຄຈ຺ຉສິ, ຕຸມ຺ເຫ ຄຈ຺ຉຖ. ອຫໍ ຄຈ຺ຉາມິ, ມຍໍ ຄຈ຺ຉາມ. ຈ຺ຉາເທສາຠາວປກ຺ເຂ ‘‘ອູ ລສ຺ເສ’’ຕິ ເອກາເຣ ຄເມຕິ. ປຣໂລເປ ຄເມນ຺ຕິ. ຄເມສິ, ຄເມຖ. ຄເມມິ, ຄເມມ. ປຣຈ຺ຉກ຺ເກປິ ໂສ ຄຈ຺ຉເຕ, ຄຈ຺ຉເຣ ຄຈ຺ຉນ຺ເຕ. ຄຈ຺ຉເສ, ຄຈ຺ຉວ຺ເຫ. ຄຈ຺ເຉ, ຄຈ຺ຉາມ຺ເຫ.

ປຸເຣ ອຘມ຺ໂມ ທິພ຺ພຕິ, ປຸຣາ ມຣາມີຕິ ຈ ຕໍສມີເປ ຕພ຺ໂພຫາຣູປຈາເຣນ ວຕ຺ຕມານວຈນໍ. ວຸຕ຺ຕຎ຺ຫິ –

ອາຣທ຺ຘາ+ນິຏ຺ຐິຕໍ ກິຈ຺ຈໍ, ວຕ຺ຕມານນ຺ຕິ ວຸຈ຺ຈຕິ;

ວຕ຺ຕມານສມີປຎ຺ຈ, ວຕ຺ຕມານນ຺ຕິ ວຸຈ຺ຈຕິ.

ກິມິວ ເຕ –

ຄງ຺ຄາຈ ຕໍສມີປຎ຺ຈ, ຍໂຕ ຄງ຺ຄາຕິ ຎາຍເຕ;

ຄງ຺ຄາຍໍ ປາຕຸ+ມາຄຈ຺ຉ, ໂຆໂສ ຄງ຺ຄາຍ+ມິຕ຺ຍປິ.

ມຸຂ຺ຍາ+ມຸຂ຺ຍຕ຺ຖເຠເທນ, ວຕ຺ຕມານໍ ຕໂຕ ທ຺ວິຘາ;

ມຸຂ຺ຍຎ຺ຫິ ຣຸຬ຺ຫິ+ມາປນ຺ນໍ, ຕ+ທາໂຣປາ ອມຸຂ຺ຍຕາຕິ.

ປຸເຣ+ປຸຣາສທ຺ເທຫິ ວາ ອນາຄຕຕາ ຄມ຺ຍເຕ, ຕທາ ຕສ຺ສ ວຕ຺ຕມານຕ຺ຕາ. ກາລພ຺ຍຕ຺ຕໂຍ ວາ ເອໂສ, ຠວນ຺ຕ຺ເຍວ ຫິ ກາລນ຺ຕເຣປິ ຕ຺ຍາທໂຍ ພາຫຸລກາ ‘‘ສນ຺ເຕສຸ ປຣິຄູຫາມິ’’ ‘‘ກາຍສ຺ສ ເຠທາ ອຠິສມ຺ປຣາຍໍ, ສຫພ຺ຍຕໍ ຄຈ຺ຉຕິ ວາສວສ຺ສ’’ ‘‘ອຕິເວລໍ ນມສ຺ສິສ຺ສໍ’’ຕິ. ‘‘ກຸໂຕ ນຸ ຕ຺ວໍ ອາຄຈ຺ຉສິ, ຣາຊຄຫໂຕ ອາຄຈ຺ຉາມີ’’ຕິອາທີສຸ ປນ ປຈ຺ຈຸປ຺ປນ຺ນສມີເປ ວຕ຺ຕມານວຈນໍ.

໕,໑໗໕. ຄມ ວທ ທານໍ ຆມ຺ມ ວຊ຺ຊ ທຊ຺ຊາ

ຄມາທີນໍ ຆມ຺ມາທໂຍ ວາ ໂຫນ຺ຕິ ນ຺ຕ+ມານ+ຕ຺ຍາທີສຸ. ຆມ຺ມຕິ, ຆມ຺ມນ຺ຕິ ອິຈ຺ຈາທິ.

ກມ຺ເມ –

ອຸປສຄ຺ຄວສາ ໂກຈິ, ອກມ຺ໂມປິ ສກມ຺ມໂກ;

ຍຖາ+ຠິຠູຍເຕ ຣາໂຄ, ຕາປເສນ ມຫິທ຺ຘິນາຕິ –

ວຸຕ຺ຕຕ຺ຕາ ອກມ຺ມກໂຕ ກມ຺ມນິ ອນຸປຸພ຺ພາ ຠູຘາຕຸໂຕ ຕ຺ຍາທໂຍ ໂຫນ຺ຕິ.

໕,໑໗. ກ຺ໂຍ ຠາວກມ຺ເມສ຺ວ+ປໂຣກ຺ເຂສຸ ມານ+ນ຺ຕ+ຕ຺ຍາທີສຸ

ຠາວກມ຺ມວິຫິເຕສຸ ປໂຣກ຺ຂາວຊ຺ຊິເຕສຸ ມານ+ນ຺ຕ+ຕ຺ຍາທີສຸ ປເຣສຸ ກ຺ໂຍ ໂຫຕິ ກ຺ຣິຍຕ຺ຖາ. ກກາໂຣ+ນຸພນ຺ຘກາຣິຍຕ຺ໂຖ. ‘‘ນ ເຕ ການຸພນ຺ຘ+ນາຄເມສູ’’ຕິ ປຏິເສຘາ ໂອກາຣາຠາໂວ. ອນຸຠູຍຕິ ສຸຂໍ ເທວທຕ຺ເຕນ.

ເອຕ຺ຖ ຈ –

ອາຂ຺ຍາເຕນ ອວຸຕ຺ຕຕ຺ຕາ, ກຕ຺ຕຸໂຕ ຕຕິຍາ ນ ຕຸ;

ທຸຕິຍາ ໂຫຕິ ກມ຺ມສ຺ສ, ວຸຕ຺ຕຕ຺ຕາ ປຐມາປິ+ຘ.

ອນຸຠູຍນ຺ຕິ ສມ຺ປຕ຺ຕິໂຍ ຕຍາ. ອນຸຠູຍສິ ຕ຺ວໍ ເທວທຕ຺ເຕນ. ອນຸຠູຍຖ ຕຸມ຺ເຫ. ອຫໍ ອນຸຠູຍາມິ, ຕຍາ ມຍໍ ອນຸຠູຍາມ. ທ຺ວິຕ຺ເຕ ອນຸຠຸຍ຺ຍຕິ+ຈ຺ຈາທິ. ເອວໍ ປຣຈ຺ຉກ຺ເກ.

ຠາເວ ອທພ຺ພວຸຕ຺ຕິໂນ ຠາວສ຺ສ ເອກຕ຺ຕາ ເອກວຈນເມວ. ຕຎ຺ຈ ປຐມປຸຣິເສກວຈເນເຍວ ສມ຺ຠວຕິ, ເນວ+ຎ຺ຎໍ, ພຫຸລໍວິຘານາ. ຠູຍຕິ ຠູຍເຕ ເທວທຕ຺ເຕນ, ສມ຺ປຕິ ຠວນນ຺ຕ຺ຍຕ຺ໂຖ.

ປຈຘາຕຸໂຕ ກມ຺ເມ ກ຺ໂຍ.

໓໗. ກ຺ຍສ຺ສຕິ

ກ຺ຣິຍຕ຺ຖາ ກ຺ຍສ຺ສ ອີຎ ວາ ໂຫຕິ. ໂຎ ອາທ຺ຍາວຍວຕ຺ໂຖ. ເທວທຕ຺ເຕນ ໂອທໂນ ປຈີຍຕິ ປຈ຺ຈຕິ, ເຣອາເທເສ ໂອທນາ ປຈີຍເຣ ປຈີຍນ຺ຕິ, ປຈ຺ຈເຣ ປຈ຺ຈນ຺ຕິ. ຈວຄ຺ຄປຸພ຺ພຣູປານິ. ຕ຺ວໍ ປຈີຍສິ ປຈ຺ຈສິ, ຕຸມ຺ເຫ ປຈີຍຖ ປຈ຺ຈຖ. ອຫໍ ປຈີຍາມິ ປຈ຺ຈາມິ, ມຍໍ ປຈີຍາມ ປຈ຺ຈາມ. ປຣຈ຺ຉກ຺ເກ ເທວທຕ຺ເຕນ ໂອທໂນ ປຈີຍເຕ ອິຈ຺ຈາທິ.

ຄມິໂຕ ກມ຺ເມ ຈ຺ຉງ ຈ ອີຎອາຄເມ ຈ ກເຕ ເຕນ ຄາໂມ ຄຈ຺ຉີຍຕິ, ຄາມາ ຄຈ຺ຉີຍນ຺ຕິ. ຄຈ຺ຉີຍສິ, ຄຈ຺ຉີຍຖ. ຄຈ຺ຉີຍາມິ, ຄຈ຺ຉີຍາມ. ເອວໍ ປຣຈ຺ຉກ຺ເກ. ຄມີຍຕິ ຄມ຺ມຕິ, ຄມີຍນ຺ຕິ ຄມ຺ມນ຺ຕິ. ຄມີຍສິ ຄມ຺ມສິ, ຄມີຍຖ ຄມ຺ມຖ, ຄມີຍາມິ ຄມ຺ມາມິ, ຄມີຍາມ ຄມ຺ມາມ ປຣຈ຺ຉກ຺ເກປິ ເອວໍ. ຕຖາ ຆມ຺ມີຍຕິ, ຆມ຺ມີຍນ຺ຕິ ອິຈ຺ຈາທິ.

ກ຺ຣິຍຕ຺ຖາ ກຕ຺ຕຣິ ຕ຺ຍາທິ, ກມ຺ມສ຺ມິຎ຺ຈ ສກມ຺ມກາ;

ຠາເວ ວາ+ກມ຺ມກາ ກມ຺ມາ+ວຈນິຈ຺ຉາຍ ມຎ຺ຎເຕ.

ຕຖາ ຫິ ວິຊ຺ຊມານສ຺ສາປິ ກມ຺ມາສ຺ສ ອວຈນິຈ຺ຉາຍໍ ອິທໍ ວຸຈ຺ຈຕິ –

ສໂຕປິ ນ ວິວກ຺ຂາ+ສ຺ສ, ອສໂຕປິ ຈ ສາ ຠເວ;

ຕໍ ຍຖາ+ນຸທຣາ ກຎ຺ຎາ, ວຎ຺ຌາວທ຺ຘິຕໂກ ຍຖາ.

ວິວກ຺ຂາ ໂລກິກາ ເອສາ, ອສກ຺ຍ+ມຕິວຕ຺ຕິຕຸໍ;

ກຖ+ເມສ ວິປຣິຍາໂສ, ໂລໂກ ເອວາ+ນຍຸຊ຺ຊເຕ.

(ວຕ຺ຕມານປຈ຺ຈຍນໂຍ).

໒. ຠວິສ຺ສຕິ ສ຺ສຕິ ສ຺ສນ຺ຕິ ສ຺ສຕິ ສ຺ສຖ ສ຺ສາມິ ສ຺ສາມ ສ຺ສເຕ ສ຺ສນ຺ເຕ ສ຺ສເສ ສ຺ສວ຺ເຫ ສ຺ສໍ ສ຺ສາມ຺ເຫ

ຠວິສ຺ສຕິ=ອນາຣທ຺ເຘ ອຕ຺ເຖ ວຕ຺ຕມານໂຕ ກ຺ຣິຍຕ຺ຖາ ສ຺ສຕ຺ຍາທໂຍ ໂຫນ຺ຕິ.

໓໕. ອ+ອີ+ສ຺ສາທີນໍ ພ຺ຍຎ຺ຊນສ຺ສິຎ

ກ຺ຣິຍຕ຺ຖາ ປເຣສໍ ອອາທີນໍ ອີອາທີນໍ ສ຺ສາທີນຎ຺ຈ ພ຺ຍຎ຺ຊນສ຺ສິ+ຎ ໂຫຕິ ວິຠາສາ. ວວຕ຺ຖິຕວິຠາສາ+ຍໍ. ສ຺ເສຕິ ສ຺ສາທີນໍ ສ຺ສຕິອາທີນຎ຺ຈາວຍໂວ ຄຫິໂຕ, ‘‘ອູພ຺ຍຎ຺ຊນສ຺ສາ’’ຕິ ສິທ຺ເຘປິ ຕ຺ຍາທີສຸ ເອເຕສເມວາຕິ ນິຍມຕ຺ໂຖ+ຍ+ມາຣມ຺ໂຠ. ລສ຺ສາກາຣໂລເປ ໂອ+ອວາເທເສ ຠວິສ຺ສຕິ, ຠວິສ຺ສນ຺ຕິ. ຠວິສ຺ສສິ, ຠວິສ຺ສຖ. ຠວິສ຺ສາມິ, ຠວິສ຺ສາມ. ຠວິສ຺ສເຕ, ຠວິສ຺ສນ຺ເຕ. ຠວິສ຺ສເສ, ຠວິສ຺ສວ຺ເຫ. ຠວິສ຺ສໍ, ຠວິສ຺ສາມ຺ເຫ.

ກມ຺ເມ –

໔໙. ກ຺ຍສ຺ສ ສ຺ເສ

ກ຺ຍສ຺ສ ວາ ໂລໂປ ໂຫຕິ ສ຺ເສ. ສຸຂໍ ຕຍາ ອນຸຠວິສ຺ສຕິ, ອນຸຠວິສ຺ສນ຺ຕິ. ອນຸຠວິສ຺ສສິ, ອນຸຠວິສ຺ສຖ. ອນຸຠວິສ຺ສາມິ, ອນຸຠວິສ຺ສາມ. ອຎ຺ຎຕ຺ຣ ອນຸຠູຍິສ຺ສຕິ, ອນຸຠູຍິສ຺ສນ຺ຕິ ອິຈ຺ຈາທິ. ເອວໍ ປຣຈ຺ຉກ຺ເກ. ຠາເວ-ຠູຍິສ຺ສຕິ ຠູຍິສ຺ສເຕ.

ກຕ຺ຕຣິ-ປຈິສ຺ສຕິ, ປຈິສ຺ສນ຺ຕິ ອິຈ຺ຈາທິ. ກມ຺ເມ-ປຈິສ຺ສຕິ ໂອທໂນ ເທວທຕ຺ເຕນ, ປຈີຍິສ຺ສຕິ, ປຈ຺ຈິສ຺ສຕິ. ປຈ຺ຈິສ຺ສນ຺ຕິ ໂອທນາ ປຈີຍິສ຺ສນ຺ຕິ, ປຈີຍິສ຺ສເຣ, ປຈ຺ຈິສ຺ສເຣ, ປຈ຺ຈິສ຺ສນ຺ຕິ.

ຄມິໂຕ ກຕ຺ຕຣິ-ໂສ ຄຈ຺ຉິສ຺ສຕິ, ເຕ ຄຈ຺ຉິສ຺ສນ຺ຕິ. ຕ຺ວໍ ຄຈ຺ຉິສ຺ສສິ, ຕຸມ຺ເຫ ຄຈ຺ຉິສ຺ສຖ. ອຫໍ ຄຈ຺ຉິສ຺ສາມິ, ມຍໍ ຄຈ຺ຉິສ຺ສາມ. ຄຈ຺ຉິສ຺ສເຕ, ຄຈ຺ຉິສ຺ສນ຺ເຕ. ຄຈ຺ຉິສ຺ສເສ, ຄຈ຺ຉິສ຺ສວ຺ເຫ. ຄຈ຺ຉິສ຺ສໍ, ຄຈ຺ຉິສ຺ສາມ຺ເຫ. ສຄ຺ຄໍ ຄມິສ຺ສຕິ, ຄມິສ຺ສນ຺ຕິ. ຄມິສ຺ສສິ, ຄມິສ຺ສຖ. ຄມິສ຺ສາມິ, ຄມິສ຺ສາມ ອິຈ຺ຈາທິ. ກມ຺ເມ-ຄຈ຺ຉິຍິສ຺ສຕິ, ຄຈ຺ຉິຍິສ຺ສນ຺ຕິ ອິຈ຺ຈາທິ. ກ຺ຍໂລເປ ຄມິສ຺ສຕິ, ຄມິສ຺ສນ຺ຕິ ອິຈ຺ຈາທິ. ຕຖາ ຆມ຺ມິສ຺ສຕິ ຆມ຺ມີຍິສ຺ສຕິ, ຆມ຺ມິສ຺ສນ຺ຕິ, ຆມ຺ມີຍິສ຺ສນ຺ຕິ ອິຈ຺ຈາທິ.

໓. ນາເມ ຄຣຫາວິມ຺ຫເຍສຸ

ນາມສທ຺ເທ ນິປາເຕ ສຕິ ຄຣຫາຍໍ ວິມ຺ຫເຍ ຈ ຄມ຺ຍມາເນ ສ຺ສຕ຺ຍາທໂຍ ໂຫນ຺ຕິ. ອິເມ ຫິ ນາມ ກລ຺ຍາຓຘມ຺ມາ ປຏິຊານິສ຺ສນ຺ຕິ. ເອຕ຺ຖ ‘‘ຊ຺ຍາທີຫິ ກ຺ນາ’’ຕິ ກ຺ນາວິກຣເຓ ‘‘ຎາສ຺ສເນ ຊາ’’ຕິ ຊາເທໂສ. ນ ຫິ ນາມ ຠິກ຺ຂເວ ຕສ຺ສ ໂມຆປຸຣິສສ຺ສ ປາເຓສຸ ອນຸທ຺ທຍາ ຠວິສ຺ສຕິ. ກຖຎ຺ຫິ ນາມ ໂສ ຠິກ຺ຂເວ ໂມຆປຸຣິໂສ ສພ຺ພມຕ຺ຕິກາມຍໍ ກຸຏິກໍ ກຣິສ຺ສຕິ. ວິມ຺ຫເຍ-ອຈ຺ຉຣິຍໍ ວຕ ໂຠ, ອພ຺ຠຸຕໍ ວຕ ໂຠ, ສນ຺ເຕນ ວຕ ໂຠ ປພ຺ພຊິຕາ ວິຫາເຣນ ວິຫຣນ຺ຕິ, ຍຕ຺ຣ ຫິ ນາມ ສຎ຺ຎີ ສມາໂນ ຊາຄໂຣ ປຎ຺ຈມຕ຺ຕານິ ສກຏສຕານິ ນິສ຺ສາຍ ນິສ຺ສາຍ ອຕິກ຺ກນ຺ຕານິ ເນວ ທກ຺ຂິຕິ, ນ ປນ ສທ຺ທໍ ໂສສ຺ສຕິ. ອຈ຺ຉຣິຍໍ ອນ຺ໂຘ ນາມ ປພ຺ພຕ+ມາໂຣຫິສ຺ສຕິ, ພຘິໂຣ ນາມ ສທ຺ທໍ ໂສສ຺ສຕິ. (ຠວິສ຺ສນ຺ຕິປຈ຺ຈຍນໂຍ).

໔. ຠູເຕ ອີ ອຸໍ ໂອ ຕ຺ຖ ອິໍ ມ຺ຫາ ອາ ອູ ເສ ວ຺ຫໍ ອ ມ຺ເຫ

ຠູເຕ ປຣິສມຕ຺ເຕ ອຕ຺ເຖ ວຕ຺ຕມານໂຕ ກ຺ຣິຍຕ຺ຖາ ອີອາທໂຍ ໂຫນ຺ຕິ. ຠູຕານຊ຺ຊຕເນ ອຸປຣິ ວກ຺ຂມານຕ຺ຕາ ອິເມ ອີອາທໂຍ ຠູຕຊ຺ຊຕເນ. ‘‘ສຸໂວ ອໂຫສິ ອານນ຺ໂທ’’ຕິອາທີສຸ ຠູຕສາມຎ຺ເຎວ ຠວນ຺ຕິ.

ອຫສ຺ສຸ+ຠຍໂຕ ອຑ຺ຒ-ຣຕ຺ຕໍ ວາ ຕທຸປຑ຺ຒຕໍ;

ອນ຺ໂຕກຕ຺ວານ ວິຎ຺ເຎຍ຺ໂຍ, ອໂຫ ອຊ຺ຊຕໂນ ອິຕິ;

ຕທຎ຺ໂຎ ປນ ໂຍ ກາໂລ, ໂສ+ນຊ຺ຊຕນສຎ຺ຎິໂຕ.

ອິຕິ ປຐມປຸຣິເສກວຈນໍ ອີ,

໑໕. ອາ+ອີ+ສ຺ສາທີສ຺ວ+ຎ ວາ

ອາອາໂທ ອີອາໂທ ສ຺ສາໂທ ຈ ກ຺ຣິຍຕ຺ຖສ຺ສ ວາ ອຎ ໂຫຕີຕິ ຘາຕຸໂຕ ປຸພ຺ພໍ ອຎ. ‘‘ກຕ຺ຕຣິ ໂລ’’ຕິ ໂລ, ເອກາຣ+ອວາເທສາ ຈ.

໓໘. ເອຍ຺ຍາຖ+ສ຺ເສ+ອ+ອາ+ອີ+ຖານໍ ໂອ+ອ+ອໍ+ຕ຺ຖ+ຕ຺ໂຖ+ວ຺ໂຫກ

ເອຍ຺ຍາຖາທີນໍ ໂອອາທໂຍ ວາ ໂຫນ຺ຕິ ຍຖາກ຺ກມໍຕິ ອີສ຺ສຕ຺ໂຖ, ອຠວິຕ຺ໂຖ, ຠວິຕ຺ໂຖ, ອຠວຕ຺ໂຖ, ຠວຕ຺ໂຖ. ‘‘ອາ ອີ ອູ ມ຺ຫາ ສ຺ສາ ສ຺ສມ຺ຫານໍ ວາ’’ຕິ ອີສ຺ສ ຣສ຺ສຕ຺ຕໍ. ໂສ ອຠວິ ຠວິ, ອຠວີ ຠວີ.

໓໙. ອຸໍສ຺ສິໍ+ສ຺ວໍ+ສຸ

ຕິອຸໍສ຺ສ ອິໍສຸ+ອໍສຸ ວາ ໂຫນ຺ຕິ. ອຠວິໍສຸ ຠວິໍສຸ, ອຠວໍສຸ ຠວໍສຸ, ອຠວຸໍ ຠວຸໍ.

໔໒. ໂອສ຺ສ ອ+ອິ+ຕ຺ຖ+ຕ຺ໂຖ

ໂອສ຺ສ ອອາທໂຍ ວາ ໂຫນ຺ຕິ. ອຠວ ຠວ, ອຠວິ ຠວິ, ອິຎາຄເມ ອຠວິຕ຺ຖ ຠວິຕ຺ຖ, ອຠວຕ຺ຖ ຠວຕ຺ຖ, ອຠວິຕ຺ໂຖ ຠວິຕ຺ໂຖ, ອຠວຕ຺ໂຖ ຠວຕ຺ໂຖ.

໔໓. ສິ

ໂອສ຺ສ ສິ ວາ ໂຫຕິ. ອຠວິສິ ຠວິສິ, ອຠວສິ ຠວສິ. ອຠໂວ ຠໂວ.

໔໕. ມ຺ຫາຕ຺ຖານ+ມຸຎ

ເອສໍ ອຸຎ ວາ ໂຫຕິ. ອີອາທິສມ຺ພນ຺ຘີນເມວ ຄຫຓໍ. ອຠວຸຕ຺ຖ ຠວຸຕ຺ຖ.

໔໖. ອິໍສ຺ສ ຈ ສິຎ

ອິໍສ຺ສ ຈ ສິຎ ວາ ໂຫຕິ ມ຺ຫາຕ຺ຖານຎ຺ຈ ພຫຸລໍ. ອິກາຣຎ຺ຎກາຣາ ອຸຈ຺ຈາຣຓອາທ຺ຍາວຍວຕ຺ຖາ. ອຠວສິຕ຺ຖ ຠວສິຕ຺ຖ, ອຠວິຕ຺ຖ ຠວິຕ຺ຖ, ອຠວຕ຺ຖ ຠວຕ຺ຖ, ອຠວິສິໍ ຠວິສິໍ, ອຠວສິໍ ຠວສິໍ, ອຠວິໍ ຠວິໍ. ອຸຎາຄເມ ອາສ຺ສ ຣສ຺ໂສ. ອຠວຸມ຺ຫ ຠວຸມ຺ຫ ອຠວຸມ຺ຫາ ຠວຸມ຺ຫາ. ສິຎາຄເມ ອຠວສິມ຺ຫ ຠວສິມ຺ຫ ອຠວສິມ຺ຫາ ຠວສິມ຺ຫາ ອຠວິມ຺ຫ ຠວິມ຺ຫ ອຠວິມ຺ຫາ ຠວິມ຺ຫາ ອຠວມ຺ຫ ຠວມ຺ຫ ອຠວມ຺ຫາ ຠວມ຺ຫາ. ປຣຈ຺ຉກ຺ເກ – ‘‘ເອຍ຺ຍາຖາ’’ທິນາ ຕ຺ເຖ ອຠວິຕ຺ຖ ຠວິຕ຺ຖ ອຠວຕ຺ຖ ຠວຕ຺ຖ. ຣສ຺ເສ ອຠວຖ ຠວຖ, ອຠວາ ຠວາ, ອຠວຸ ຠວຸ. ອຠວິເສ ຠວິເສ, ອຠວເສ ຠວເສ, ອຠວິວ຺ຫໍ ຠວິວ຺ຫໍ ອຠວວ຺ຫໍ ຠວວ຺ຫໍ, ອສ຺ສ ອ+ມາເທເສ ອຠວໍ ຠວໍ ອຠວ ຠວ, ອຠວິມ຺ເຫ ຠວິມ຺ເຫ ອຠວມ຺ເຫ ຠວມ຺ເຫ. ກມ຺ເມ ສຸຂໍ ຕຍາ ອນຸຠູຍິຕ຺ໂຖ ອນ຺ວຠູຍຕ຺ໂຖ ອນຸຠູຍຕ຺ໂຖ ອນ຺ວຠູສິ ອນຸຠູສີ ອນ຺ວຠູຍີ ອນຸຠູຍີ, ອນ຺ວຠູຍິໍສຸ ອນຸຠູຍິໍສຸ ອນ຺ວຠູຍໍສຸ ອນຸຠູຍໍສຸ ອນ຺ວຠູຍຸໍ ອນຸຠູຍຸໍ ອິຈ຺ຈາທິ. ຠາເວ-ເຕນ ອຠູຍິຕ຺ໂຖ ຠູຍິຕ຺ໂຖ ອຠູຍຕ຺ໂຖ ຠູຍຕ຺ໂຖ ອຠູຍິ ຠູຍິ ອຠູຍີ ຠູຍີ. ເຕນ ອຠູຍຕ຺ຖ ຠູຍຕ຺ຖ ອຠູຍ ຠູຍ ອຠູຍາ ຠູຍາ.

ໂສ ອປຈິຕ຺ໂຖ ປຈິຕ຺ໂຖ ອິຈ຺ຈາທິ ກຕ຺ຕຸສມໍ. ກມ຺ເມ-ອປຈີຍິຕ຺ໂຖ ປຈີຍິຕ຺ໂຖ ອປຈີຍຕ຺ໂຖ ປຈີຍຕ຺ໂຖ. ຈວຄ຺ຄປຸພ຺ພ- ຣູເປ ອປຈ຺ຈິຕ຺ໂຖ ປຈ຺ຈິຕ຺ໂຖ ອປຈ຺ຈຕ຺ໂຖ ປຈ຺ຈຕ຺ໂຖ ອປຈີຍິ ປຈີຍິ ອປຈີຍີ ປຈີຍີ ອປຈ຺ຈິ ປຈ຺ຈິ ອປຈ຺ຈີ ປຈ຺ຈີ, ອປຈີຍິໍສຸ ປຈີຍິໍສຸ ອປຈິໍສຸ ປຈິໍສຸ ອປຈີຍໍສຸ ປຈີຍໍສຸ ອປຈ຺ຈໍສຸ ປຈ຺ຈໍສຸ ອປຈີຍຸໍ ປຈີຍຸໍ ອປຈ຺ຈຸໍ ປຈ຺ຈຸໍ ອິຈ຺ຈາທິ ກຕ຺ຕຸສມໍ, ປຸພ຺ພຣູໂປວ ວິເສໂສ.

ໂສ ຄາມໍ ອຄຈ຺ຉິຕ຺ໂຖ ຄຈ຺ຉິຕ຺ໂຖ ອິຈ຺ຈາທິ ປຸຣິມສມໍ.

໓໐. ຑໍສສ຺ສ ຈ ຎ຺ຉງ

ຑໍສສ຺ສ ຈ ຄມິສ຺ສ ຈ ຎ຺ຉງ ວາ ໂຫຕິ ອາ+ອີອາທີສຸ. ອຄຎ຺ຉິຕ຺ໂຖ ຄຎ຺ຉິຕ຺ໂຖ ອຄຎ຺ຉຕ຺ໂຖ ຄຎ຺ຉຕ຺ໂຖ ອຄຎ຺ຉິ ຄຎ຺ຉິ ອຄຎ຺ຉີ ຄຎ຺ຉີ ອິຈ຺ຈາທິ.

໒໙. ຄມິສ຺ສາ

ອາອາໂທ ອີອາໂທ ຈ ຄມິສ຺ສ ອາ ໂຫຕິ ວາ. ໂສ ອຄາ ອຄມິ ຄມິ ອຄມິຕ຺ໂຖ ຄມິຕ຺ໂຖ ອຄມຕ຺ໂຖ ຄມຕ຺ໂຖ. ອີປຈ຺ຈເຍ ລສ຺ສາກາຣສ຺ສ ‘‘ຫິມິເມສ຺ວ+ສ຺ສາ’’ຕິ ເອຕ຺ຖ ‘‘ອສ຺ສາ’’ຕິ ໂຍຄວິຠາຄາ ທີເຆ ‘‘ທີຆາ ອີສ຺ສາ’’ຕິ ອີສ຺ສ ສິອາເທໂສ, ອຄມາສິ ອຄມິ ຄມິ ອຄມີ ຄມີ, ອຄມິໍສຸ ຄມິໍສຸ ອຄມໍສຸ ຄມໍສຸ ອຄມຸໍ ຄມຸໍ. ໂອສ຺ສ ອອາເທເສ ອຊ຺ຌຄຸໍ. ຕ຺ວໍ ອຊ຺ຌຄາ ປຣສ຺ສ ໂລໂປ. ຕຸມ຺ເຫ ອຊ຺ຌຄຸຕ຺ຖ. ອຫໍ ອຊ຺ຌຄໍ, ມຍໍ ອຊ຺ຌຄມ຺ຫ. ປຣຈ຺ຉກ຺ເກ – ‘‘ເອຍ຺ຍາຖາ’’ທິນາ ຕ຺ເຖ ໂສ ອຄຈ຺ຉິຕ຺ຖ ຄຈ຺ຉິຕ຺ຖ ອຄຎ຺ຉິຕ຺ຖ ຄຎ຺ຉິຕ຺ຖ ອຄມິຕ຺ຖ ຄມິຕ຺ຖ ອຄມ ຄມ ອຄມາ ຄມາ. ເຕ ອຄມູ ຄມູ, ໂອສ຺ສ ອາອາເທເສ ອຊ຺ຌຄຸໍ. ຕ຺ວໍ ອຄມິເສ ຄມິເສ. ຕຸມ຺ເຫ ອຄມິວ຺ຫໍ. ‘‘ເອຍ຺ຍາຖາ’’ ທິນາ ອ+ມາເທເສ ອຫໍ ອຄມໍ ຄມໍ ອຊ຺ຌຄໍ. ມຍໍ ອຄມິມ຺ເຫ ຄມິມ຺ເຫ. ກມ຺ເມອຄຈ຺ຉີຍິ ອຄມີຍິ, ອຄຈ຺ຉິຍຸໍ ອຄມິຍຸໍ ອິຈ຺ຈາທິ. ຕຖາ ອຆມ຺ມີ ຆມ຺ມີ ອິຈ຺ຈາທິ.

໑໓. ມາໂຍເຄ ອີ+ອາອາທີ

ມາໂຍເຄ ສຕິ ອີອາທໂຍ ອາອາທໂຍ ຈ ວາ ໂຫນ຺ຕິ. ສກກາລໂຕ ກາລນ຺ຕເຣປິ ປຈ຺ຈຍວິຘານຕ຺ໂຖ+ຍໍ. ມາ ຠວໍ ອຠວິຕ຺ໂຖ ອິຈ຺ຈາທິ. ວາວິຘານາສ຺ສຕ຺ຍາທິ+ເອຍ຺ຍາທິ+ຕ຺ວາທໂຍປິ ໂຫນ຺ຕິ, ມາ ຠວໍ ຠວິສ຺ສຕິ, ມາ ຠວໍ ຠເວຍ຺ຍ, ມາ ຠວໍ ຠວຕຸ ອິຈ຺ຈາທິ. (ອີອາທິປຈ຺ຈຍນໂຍ).

໕. ອນຊ຺ຊຕເນ ອາ ອູໂອ ຕ຺ຖ ອ ມ຺ຫາ ຕ຺ຖ ຕ຺ຖຸໍ ເສ ວ຺ຫໍ ອິໍ ມ຺ຫເສ

ອວິຊ຺ຊມານຊ຺ຊຕເນ ຠູຕຕ຺ເຖ ວຕ຺ຕມານໂຕ ກ຺ຣິຍຕ຺ຖາ ອາອາທໂຍ ໂຫນ຺ຕິ ວາ. ‘‘ເອຍ຺ຍາຖາ’’ທິນາ ຕ຺ເຖ ‘‘ອາ ອີ ອູ ມ຺ຫາ’’ ອິຈ຺ຈາທິນາ ຣສ຺ເສ ຈ ໂສ ອຠວຕ຺ຖ ຠວຕ຺ຖ ອຠວ ຠວ ອຠວາ ຠວາ, ເຕ ອຠວຸ ຠວຸ ອຠວູ ຠວູ. ໂອ, ‘‘ໂອສ຺ສາ’’ຕິອາທິນາ ອອາທໂຍ, ອຠວ ຠວ ອຠວິ ຠວິ ອຠວຕ຺ຖ ຠວຕ຺ຖ ອຠວຕ຺ໂຖ ຠວຕ຺ໂຖ, ສິອາເທເສ ອຠວສິ ຠວສິ ອຠໂວ ຠໂວ. ຕຸມ຺ເຫ ອຠວຕ຺ຖ ຠວຕ຺ຖ. ອຫໍ ອຠວໍ ຠວໍ ອຠວ ຠວ, ມຍໍ ອຠວມ຺ຫ ຠວມ຺ຫ ອຠວມ຺ຫາ ຠວມ຺ຫາ. ໂສ ອຠວຕ຺ຖ ຠວຕ຺ຖ. ເຕ ອຠວຕ຺ຖຸໍ ຠວຕ຺ຖຸໍ. ຕ຺ວໍ ອຠວເສ ຠວເສ. ຕຸມ຺ເຫ ອຠວວ຺ຫໍ ຠວວ຺ຫໍ. ‘‘ອິສ຺ສ ຈ ສິຎ’’ຕິ ສິໍ, ອຫໍ ອຠວສິໍ ຠວສິໍ ອຠວິໍ ຠວິໍ. ມຍໍ ອຠວມ຺ຫເສ ຠວມ຺ຫເສ. ກມ຺ເມ-ຕ຺ເຖ ສຸຂໍ ຕຍາ ອນຸຠູຍິຕ຺ຖ, ອິຎາຄມາຠາເວ ອນຸຠູຍຕ຺ຖ ອິຈ຺ຈາທິ. ຠາເວ-ອຠູຍຕ຺ຖ ຠູຍຕ຺ຖ ອິຈ຺ຈາທິ.

ໂສ ໂອທນໍ ອປຈຕ຺ຖ ປຈຕ຺ຖ ອິຈ຺ຈາທິ ກຕ຺ຕຸສມໍ. ກມ຺ເມ-ອປຈີຍຕ຺ຖ ປຈີຍຕ຺ຖ ອປຈ຺ຈຕ຺ຖ ປຈ຺ຈຕ຺ຖ ອປຈີຍ ປຈີຍ ອປຈີຍາ ປຈີຍາ ອປຈ຺ຈ ປຈ຺ຈ ອປຈ຺ຈາ ປຈ຺ຈາ. ອປຈີຍຸ ປຈີຍຸ ອປຈີຍູ ປຈີຍູ ອປຈ຺ຈຸ ປຈ຺ຈຸ ອປຈ຺ຈູ ປຈ຺ຈູ ອິຈ຺ຈາທິ. ‘‘ມາໂຍເຄ ອີ+ອາອາທີ’’ຕິ ມາໂຍເຄປິ ອາອາທໂຍ, ມາ ຠວໍ ອປຈ຺ຈຕ຺ຖ ອິຈ຺ຈາທິ.

ຕຖາ ອຄຈ຺ຉຕ຺ຖ ຄຈ຺ຉຕ຺ຖ ອິຈ຺ຈາທິ ປຸຣິມສມໍ. ຕຖາ ອຄມຕ຺ຖ ຄມຕ຺ຖ ອິຈ຺ຈາທິປິ ອຆມ຺ມຕ຺ຖ ຆມ຺ມຕ຺ຖ ອິຈ຺ຈາທິປິ. (ອນຊ຺ຊຕນປຈ຺ຈຍນໂຍ).

໖. ປໂຣກ຺ເຂ ອ ອຸ ເອ ຕ຺ຖ ອ ມ຺ຫ ຕ຺ຖ ເຣ ຕ຺ໂຖ ວ຺ໂຫ ອິ ມ຺ເຫ

ອປຈ຺ຈກ຺ເຂ ຠູຕານຊ຺ຊຕເນ ວຕ຺ຕມານໂຕ ກ຺ຣິຍຕ຺ຖາ ອອາທໂຍ ໂຫນ຺ຕິ. ອກ຺ຂານໍ=ອິນ຺ທ຺ຣິຍານໍ ປຣໍ ປໂຣກ຺ຂໍ. ຕສ຺ມິໍ. ‘‘ອປໂຣກ຺ເຂສູ’’ຕິ ວຈນາ ກ຺ຍ+ລາທິວິກຣຓາ ນ ໂຫນ຺ຕິ.

໕,໗໑. ປໂຣກ຺ຂາຍຎ຺ຈ

ປໂຣກ຺ຂາຍໍ ປຐມ+ເມກສ຺ສຣໍ ສທ຺ທຣູປໍ ທ຺ເວ ຠວຕິ. ‘‘ຠູສ຺ສ ວຸກ’’ ອິຕິອາທີສຸ ວຸກ, ຠູວ ຠູວ ອິຕິ ທ຺ວິຕ຺ເຕ –

໕,໗໕. ໂລໂປ+ນາທິພ຺ຍຎ຺ຊນສ຺ສ

ທ຺ວິຕ຺ເຕ ປຸພ຺ພສ຺ສ ອາທິໂຕ+ຎ຺ຎສ຺ສ ພ຺ຍຎ຺ຊນສ຺ສ ໂລໂປ ໂຫຕິ.

໑໘. ປຸພ຺ພສ຺ສ ອ

ອອາທີສຸ ທ຺ວິຕ຺ເຕ ປຸພ຺ພສ຺ສ ຠູສ຺ສ ອ ໂຫຕິ.

໕,໗໘. ຈຕຸຕ຺ຖທຸຕິຍານໍ ຕຕິຍປຐມາ

ທ຺ວິຕ຺ເຕ ປຸພ຺ເພສໍ ຈຕຸຕ຺ຖທຸຕິຍານໍ ຕຕິຍປຐມາ ໂຫນ຺ຕິ ຍຖາກ຺ກມໍຕິ ພກາເຣ ໂສ ພຠູວ ກິຣ, ເຕ ພຠຸວຸ ກິຣ. ຕ຺ວໍ ພຠຸເວ ກິຣ, ອິຎ ຕຸມ຺ເຫ ພຠຸວິຕ຺ຖ ກິຣ. ອຫໍ ພຠຸວ ກິຣ, ມຍໍ ພຠຸວິມ຺ຫ ກິຣ. ໂສ ພຠຸວິຕ຺ຖ ກິຣ, ເຕ ພຠຸວິເຣ ກິຣ. ຕ຺ວໍ ພຠຸວິຕ຺ໂຖ ກິຣ, ຕຸມ຺ເຫ ພຠຸວິວ຺ໂຫ ກິຣ. ອຫໍ ພຠຸວິ ກິຣ, ມຍໍ ພຠຸວິມ຺ເຫ ກິຣ. ກມ຺ເມ-ອນຸປຠຸວ ກິຣ ອິຈ຺ຈາທິ. ຠາເວພຠຸວ ພຠຸວິຕ຺ຖ ກິຣ.

ປປຈ, ປປຈຸ. ປປເຈ, ອິຎາຄເມ ປປຈິຕ຺ຖ. ອຎ຺ຎຕ຺ຣ ‘‘ສໍໂຍຄາທິໂລໂປ’’ຕິ ໂລໂປ, ປປຈິຕ຺ຖ. ປປຈ, ປປຈິມ຺ຫ. ປປຈິຕ຺ຖ, ປປຈິເຣ. ປປຈິຕ຺ໂຖ ປປຈິໂຖ, ປປຈິວ຺ໂຫ. ປປຈິ, ປປຈິມ຺ເຫ. ເອວໍ ກມ຺ເມ.

ອອາທິປຈ຺ຈເຍ ທ຺ວິຠາເວ ອນາທິພ຺ຍຎ຺ຊນໂລເປ ປຸພ຺ພສ຺ສ ‘‘ກວຄ຺ຄຫານໍ ຈວຄ຺ຄຊາ’’ຕິ ຈວຄ຺ຄຊກາເຣ ‘‘ພ຺ຍຎ຺ຊເນ ທີຆຣສ຺ສາ’’ຕິ ທີເຆ ຈ ກເຕ ໂສ ຄາມໍ ຊຄາມ ກິຣ, ຊຄມຸ. ຊຄເມ, ຊຄມິຕ຺ຖ. ຊຄມ, ຊຄມິມ຺ຫ. ຊຄມິຕ຺ຖ, ຊຄມິເຣ. ຊຄມິຕ຺ໂຖ, ຊຄມິວ຺ໂຫ. ຊຄມິ, ຊຄມິມ຺ເຫ. ເອວໍ ກມ຺ເມ.

ມູຬ຺ຫວິກ຺ຂິຕ຺ຕພ຺ຍາສຕ຺ຕຈິຕ຺ເຕນ ອຕ຺ຕນາປິ ກ຺ຣິຍາ ກຕາ ອຠິນິພ຺ພຕ຺ຕິກາເລ+ນຸປລທ຺ຘາສມານາ ຜເລນາ+ນຸມີຍມານາ ປໂຣກ຺ຂາວ ວຕ຺ຖຸໂຕ. ເຕນ ອຸຕ຺ຕມວິສເຍປິ ປໂຍຄສມ຺ຠໂວ. (ປໂຣກ຺ຂາປຈ຺ຈຍນໂຍ).

໗. ຍ຺ໂຍໂທ ວາ+ຕິປຕ຺ຕິຍໍ ສ຺ສາ ສ຺ສໍສຸ ສ຺ເສ ສ຺ສຖ ສ຺ສໍ ສ຺ສມ຺ຫາ ສ຺ສຖ ສ຺ສິໍສຸສ຺ສເສສ຺ສວ຺ເຫສ຺ສິໍ ສ຺ສາມ຺ຫເສ.

ເອຍ຺ຍາໂທ ວິສເຍ ກ຺ຣິຍາຕິປຕ຺ຕິຍໍ ສ຺ສາທໂຍ ໂຫນ຺ຕິ. ວິຘຸຣປຈ຺ຈໂຍປນິປາຕໂຕ ກາຣຓເວກລ຺ລໂຕ ວາ ກ຺ຣິຍາຕິປຕນ+ມນິປ຺ຜຕ຺ຕິ ກ຺ຣິຍາຕິປຕ຺ຕິ. ເອເຕ ຈ ສ຺ສາທໂຍ ສາມຕ຺ຖິຍາ ອຕີຕານາຄເຕສ຺ເວວ ໂຫນ຺ຕິ, ນ ວຕ຺ຕມາເນ, ຕຕ຺ຣ ກ຺ຣິຍາຕິປຕ຺ຍສມ຺ຠວາ. ອິຎາຄເມ ສ຺ສາສ຺ສ ວາ ຣສ຺ເສ ຈ ສເຈ ໂສ ປຐມວເຍ ປພ຺ພຊ຺ຊໍ ອລຠິສ຺ສ, ອຣຫາ ອຠວິສ຺ສ ຠວິສ຺ສ ອຠວິສ຺ສາ ຠວິສ຺ສາ ວາ, ເຕ ຈ ຕໍ ອລຠິສ຺ສໍສຸ, ອຣຫນ຺ໂຕ ອຠວິສ຺ສໍສຸ ຠວິສ຺ສໍສຸ. ‘‘ເອຍ຺ຍາຖາ’’ທິນາ ສ຺ເສສ຺ສ ວາ ອກາເຣ ຕ຺ວໍ ອຠວິສ຺ສ ຠວິສ຺ເສ. ຕຸມ຺ເຫ ອຠວິສ຺ສຖ. ອຫໍ ອຠວິສ຺ສໍ. ຣສ຺ເສ ມຍໍ ອຠວິສ຺ສມ຺ຫ ຠວິສ຺ສມ຺ຫ ອຠວິສ຺ສມ຺ຫາ ຠວິສ຺ສມ຺ຫາ. ປຣຈ຺ຉກ຺ເກ-ໂສ ອຠວິສ຺ສຖ, ອຠວິສ຺ສິໍສຸ. ອຠວິສ຺ສເສ, ອຠວິສ຺ສວ຺ເຫ. ອຠວິສ຺ສິໍ, ອຠວິສ຺ສາມ຺ຫເສ.

ກມ຺ເມ-ເຕນ ສຸຂໍ ອນ຺ວຠວິສ຺ສ, ອນ຺ວຠວິສ຺ສໍສຸ ກ຺ຍໂລໂປ. ອນ຺ວຠູຍິສ຺ສ ອນ຺ວຠູຍິສ຺ສາ ອິຈ຺ຈາທິ. ຠາເວ-ເຕນ ອຠູຍິສ຺ສ ຠູຍິສ຺ສ ອຠູຍິສ຺ສາ ຠູຍິສ຺ສາ. ອຠູຍິສ຺ສຖ ຠູຍິສ຺ສຖ.

ເອວໍ ຕຓ຺ຑຸລາທິສາຘນໍ ອລຠິສ຺ສ, ໂອທນໍ ອປຈິສ຺ສ ປຈິສ຺ສ ອິຈ຺ຈາທິ. ກມ຺ເມ-ເຕນ ໂອທໂນ ອປຈິສ຺ສ ປຈິສ຺ສ ອປຈິສ຺ສາ ປຈິສ຺ສາ ອປຈີຍິສ຺ສ ປຈີຍິສ຺ສ ອປຈີຍິສ຺ສາ ປຈີຍິສ຺ສາ ອປຈ຺ຈິສ຺ສ ປຈ຺ຈິສ຺ສ ອປຈ຺ຈິສ຺ສາ ປຈ຺ຈິສ຺ສາ ອິຈ຺ຈາທິ.

ໂສ ອຄຈ຺ຉິສ຺ສ ຄຈ຺ຉິສ຺ສ ອຄຈ຺ຉິສ຺ສາ ຄຈ຺ຉິສ຺ສາ ອິຈ຺ຈາທິ. ຈ຺ຉາເທສາ+ຠາເວ ອຄມິສ຺ສ ຄມິສ຺ສ ອຄມິສ຺ສາ ຄມິສ຺ສາ ອິຈ຺ຈາທິ. ກມ຺ເມ-ອຄຈ຺ຉິສ຺ສ ຄຈ຺ຉິສ຺ສ ອຄຈ຺ຉີຍິສ຺ສ ອິຈ຺ຈາທິ. ອຄມິສ຺ສ ຄມິສ຺ສ ອຄມີຍິສ຺ສ ອິຈ຺ຈາທິ. ຕຖາ ອຆມ຺ມິສ຺ສ ອິຈ຺ຈາທິ. (ກ຺ຣິຍາຕິປຕ຺ຕິປຈ຺ຈຍນໂຍ).

໘. ເຫຕຸຜເລສ຺ເວ+ຍ຺ຍ ເອຍ຺ຍຸໍ ເອຍ຺ຍາສິ ເອຍ຺ຍາຖ ເອຍ຺ຍາມິ ເອຍ຺ຍາມ ເອຖ ເອຣໍ ເອໂຖ ເອຍ຺ຍາວ຺ໂຫ ເອຍ຺ຍໍ ເອຍ຺ຍາມ຺ເຫ.

ເຫຕຸຠູຕາຍໍ ຜລຠູຕາຍຎ຺ຈ ກ຺ຣິຍາຍໍ ວຕ຺ຕມານໂຕ ກ຺ຣິຍຕ຺ຖາ ເອຍ຺ຍາທໂຍ ໂຫນ຺ຕິ ວາ. ລວິກຣຓວຸທ຺ຘິອາທິ ປຸພ຺ພສມໍ. ປຣິກປ຺ເປ –