໑໕. ສາມິຕ຺ເຖ+ຘິນາ

ສາມິຠາວຕ຺ເຖ ອຘິນາ ຍຸຕ຺ຕມ຺ຫາ ສຕ຺ຕມີ ໂຫຕິ. ອຘິພ຺ຣຫ຺ມທຕ຺ເຕ ປຎ຺ຈາລາ, ອຘິປຎ຺ຈາເລສຸ ພ຺ຣຫ຺ມທຕ຺ໂຕ, ພ຺ຣຫ຺ມທຕ຺ຕິສ຺ສຣາ ປຎ຺ຈາລາຕິ ອຕ຺ໂຖ. ອຘິເທເວສຸ ພຸທ຺ໂຘ, ສມ຺ມຸຕິເທວາທີຫິ ພຸທ຺ໂຘ ອຘິໂກຕ຺ຍຕ຺ໂຖ.

ເອຕ຺ຖ ຈ ຍຖາວຸຕ຺ເຕສຸ ອຕ຺ເຖສຸ ອຍໍ ເຠໂທ –

ກາຣກໍ ສາຘກໍ ນິພ຺ພຕ຺ຕກໍ ກ຺ຣິຍານິມິຕ຺ຕນ຺ຕິ ອຕ຺ຖໂຕ ເອກເມວ, ຕຎ຺ຈ ທຓ຺ໂຑ, ຘວໂລ, ປຈນໍ, ຈິຕ຺ໂຕ, ໂຄຕິ ທພ຺ພ+ຄຸຓ+ກ຺ຣິຍາ+ນາມ+ຊາຕິເຠເທນ ປຎ຺ຈວິຘມ຺ປິ ກມ຺ມ+ກຕ຺ຕາທິວເສນ ຉພ຺ພິຘໍ, ຕໍ ສຕ຺ຕິກາຣກໍ, ຕທາຘາຣຠູຕທພ຺ພາທໂຍ ຕຕ຺ຣຏ຺ຐກາຣກໍ, ນ ມຸຂ຺ຍໂຕ. ມຸຂ຺ຍໂຕ ເຈ ໂຫນ຺ຕິ, ເຕສໍ ສຕ຺ຕິທພ຺ພານໍ ອຎ຺ຎມຎ຺ຎພ຺ຍາວຏຣູປຕ຺ຕາ ໂຍ ອາຘາໂຣ, ໂສ ອາຘາໂຣເຍວ, ກິສ຺ມິຎ຺ຈິກາເລ ກຣຓໍ ວາ ກຕ຺ຕຸຣູປຠູໂຕ ວາ ນ ໂຫຕິ, ຕສ຺ມາ ຖາລິ ປຈຕິ, ຖາລິຍາ ປຈຕິ, ຖາລິຍໍ ປຈຕີຕ຺ຍາທິນາ ເອກສ຺ສ ວຕ຺ຖຸໂນ ກຕ຺ຕຸ+ກຣຓາ+ຘາຣເຠໂທ ນ ສິຍາ. ສຕ຺ຕິປກ຺ເຂ ປນ ທພ຺ພາທີນໍ ອເນກສຕ຺ຕິຍາ ອາຘາຣຕ຺ຕາ ສຕ຺ຕິຍາ ທພ຺ພາທໂຍ ວິວກ຺ຂິຕາ ຕໍ ຕໍ ກາຣກໍ ໂຫຕີຕິ ທພ຺ພາທີນໍ ອເຠເທປິ ກາຣກເຠໂທ ຍຸຊ຺ຊເຕ. ວຸຕ຺ຕຎ຺ຫິ –

ວິຈິຕ຺ຕກຕ຺ຕຸອາທີຫິ, ສໍໂຍຄາ ເອກວຕ຺ຖຸໂນ;

ນານາຕ຺ຕໍ ຍຸຊ຺ຊເຕ ນາຏ຺ຍ-ເຠເທນ ນຏກສ຺ສິ+ວາຕິ.

ຖາລິ ວຕ຺ຖຸໂຕ ເອກາ ເຈທປິ ສຕ຺ຕິກາຣກຠູຕກຕ຺ຕຸ+ກຣຓາ+ຘາຣາທີນໍ ເຠເທນ ເຠທ+ມຸປຍາຕິ, ກິມິວ ຣາມ+ຣາວຓາທິເວສຘາຣີນຏໂກ ເຕສໍ ນາມວເສນ ຣາໂມ, ຣາວໂຓຕິ ເຠທ+ມຸປຍາຕິ, ຕ+ມິວາຕິ ອຘິປ຺ປາໂຍ.

ປຸນ+ຣປິ –

ຍເຖ+ໂກປິ ປໂຏ ສຸຕ຺ຕ, ປີຕາທິຄຸຓສໍຍຸໂຕ;

ສຸກ຺ໂກ ປໂຏຕິ ປີໂຕຕິ, ເຠທໍ ຍາຕ຺ເຍ+ວເມວ+ຍໍ.

ເອຕ຺ຖ ຈ ສຕ຺ຕິຠູຕກຕ຺ຕາທໂຍ ມຸຂ຺ຍກາຣກໍ, ຕໍໂຍເຄນ ທພ຺ພຠູຕຖາລີ ຄຸຓກາຣກໍ, ເຕ ຈ ກຖໍ ກ຺ຣິຍາຍ ກາຣກາ ໂຫນ຺ຕິ. ກຕ຺ຕາ ອຕ຺ຕນາ ປຕິຏ຺ຐິຕາຍ ຫສຕິ+ນຈ຺ຈຕິຈ຺ຈາທິກ຺ຣິຍາຍ ນິມິຕ຺ຕໍ ໂຫຕິ. ກມ຺ມຎ຺ຈ ອຕ຺ຕນາ ປຕິຏ຺ຐິຕກ຺ຣິຍາຍ ຕທຕ຺ຖຠູຕອິນ຺ຘນາທີນິ ປວຕ຺ເຕນ຺ຕໍ ‘‘ໂອທນໍ ປຈຕີ’’ຕ຺ຍາໂທ ນິມິຕ຺ຕໍ. ‘ກຏ຺ເຐຫິ ປຈ຺ຈຕີ’ຕ຺ຍາໂທ ກຏ຺ຐານິ ຊລນກ຺ຣິຍາຍ ສາເຘຕພ຺ພປາກສ຺ສ ອງ຺ຄຠາເວນ ນິມິຕ຺ຕໍ. ‘ຜຣສຸນາ ຉິນ຺ທຕີ’ຕ຺ຍາໂທ ຜຣສຸ ຈ ກຏ຺ຐານໍ ທ຺ວິຘາປວຕ຺ຕິຍາ ນິມິຕ຺ຕໍ. ກມ຺ມຎ຺ຈ ກ຺ຣິຍາຍ ສມ຺ພນ຺ຘີຍມານພ຺ຍາປ຺ເຍ ສຕິ ນິມິຕ຺ຕຠາເວນ ກ຺ຣິຍາຍ ນິມິຕ຺ຕໍ. ຕຖາ ສມ຺ປທານາ+ວຘິ+ອາຘາຣານໍ ‘ຄາໂວ ທທາຕິ’ ‘ຄາມສ຺ມາ ອປນຍຕິ’ ‘ຖາລິຍໍ ປຈຕີ’ຕ຺ຍາທີສຸ ໂຄທານາ+ປນຍນ+ປຈນກ຺ຣິຍານໍ ນິມິຕ຺ຕຕ຺ຕາ ກ຺ຣິຍາຍ ນິມິຕ຺ຕານິ ໂຫນ຺ຕິ. ເຕສໍ ຍຖາສກໍ ກ຺ຣິຍາຍ ປວຕ຺ຕໂກ ກຕ຺ຕາ, ຕສ຺ມາ ສ ເອວ ປຘາໂນ ກຕ຺ຕາຕິ ໂວຫາຣໍ ລຠຕິ, ອຎ຺ເຎສໍ ກຣຓາທີນໍ ກຕ຺ຕຸຠາເວ ສຕິປິ ອປ຺ປຘານຕ຺ຕາ ຕໍ ນ ລຠຕິ.

ໂຈທເກນ ວຸຕ຺ຕຎ຺ຫິ –

ນນຸ ສາມຄ຺ຍມີນາຍໍ, ກ຺ຣິຍາສິທ຺ຘິ ກຖໍ ວທ;

ເອກສ຺ສ ກຕ຺ຕຸໂນ ເອວ, ສພ຺ເພສໍ ກຕ຺ຕຸຕໍ ວິນາ.

ສພ຺ເພສໍ ກຣຓາທີນໍ, ກຕ຺ຕຸຕາຍ ວິໂຍຄໂຕ;

ກຣຓາທີນໍ ອຠາວຕ຺ຕາ, ກາຣກໍ ນ ຫິ ຉພ຺ພິຘນ຺ຕິ.

ວຸຈ຺ຈເຕ –

ຍທ຺ຍປ຺ຍ+ຕ຺ຖິ ຫິ ກຕ຺ຕຸຕ຺ຕໍ, ສຠາວາ ກຣຓາທິສຸ;

ກ຺ຣິຍາສິທ຺ຘ຺ຍາ ຕຖາປ຺ເຍ+ຕ+ມປ຺ປຘານໍ ປຣງ຺ຄໂຕ.

ເອຕໍ ສຠາວໂຕ ອຸປລພ຺ຠມານໍ ກຣຓາທີສຸ ກຕ຺ຕຸຕ຺ຕໍ ປເຣສໍ ກຣຓາທີນໍ ຊລນ+ຘາຣຓາທິກ຺ຣິຍາຍ ອງ຺ຄໍ ອຸປາຍຕິ ອປ຺ປຘານນ຺ຕິ ອຘິປ຺ປາໂຍ.

ກາຣກໍ ຉພ຺ພິຘໍ ສຎ຺ຎາ-ວສາ ຉພ຺ພີສຕິວິຘໍ;

ປເຠທາ ສຕ຺ຕຘາ ກມ຺ມໍ, ກຕ຺ຕາ ປຎ຺ຈວິໂຘ ຠເວ.

ກຣຓໍ ທຸວິຘໍ ໂຫຕິ, ສມ຺ປທານໍ ຕິຘາ ມຕໍ;

ອປາທານໍ ປຎ຺ຈວິຘໍ, ອາຘາໂຣ ຕຸ ຈຕຸພ຺ພິໂຘ.

ວິຠຕ຺ຕິໂຍ ປນ –

ປຈ຺ຈຕ຺ຕ+ມຸປໂຍຄຎ຺ຈ, ກຣຓໍ ສມ຺ປທານິຍໍ;

ນິສ຺ສກ຺ກໍ ສາມິວຈນໍ, ຠຸມ຺ມ+ມາລປນ+ຏ຺ຐມໍຕິ.

ອິຕິ ປໂຍຄສິທ຺ຘິຍໍ ກາຣກກຓ຺ໂຑ ຕຕິໂຍ.