໓. ກາຣກກຓ຺ຑ
ອຖ ວິຠຕ຺ຕີນ+ມຕ຺ຖເຠທາ ວຸຈ຺ຈນ຺ເຕ.
ຕຕ຺ຖ ເອກມ຺ປິ ອຕ຺ຖໍ ກມ຺ມາທິວເສນ ເອກຕ຺ຕາທິວເສນ ຈ ວິຠຊນ຺ຕີຕິ ວິຠຕ຺ຕິໂຍ, ສ຺ຍາທໂຍ. ຕາ ປນ ປຐມາທິເຠເທນ ສຕ຺ຕວິຘາ. ຕາ ຍຖາ ‘‘ປຐມາ+ຕ຺ຖມຕ຺ເຕ’’ຕິ ປຐມາວິຠຕ຺ຕິ ໂຫຕິ. ສິສ຺ສ ໂອກາຣ+ໂລປ+ອ-ມາເທເສສຸ ນໂຣ ອິຕ຺ຖີ ນປຸໍສກໍ.
ສກຕ຺ຖ+ທພ຺ພ+ລິງ຺ຄານິ, ສໍຂ຺ຍາ+ກມ຺ມາທິປຎ຺ຈກໍ;
ນາມຕ຺ໂຖ ຕສ຺ສ ສາມຎ຺ຎ-ມຕ຺ຖມຕ຺ຖໍ ປວຸຈ຺ຈເຕ.
ໂສ ນາມຕ຺ໂຖ ຈ –
ຊາຕິ ກ຺ຣິຍາ ຄຸໂຓ ທພ຺ພໍ, ຕຖາ ນາມນ຺ຕິ ປຎ຺ຈຘາ;
ສທ຺ທສ຺ສ+ຕ຺ໂຖ ສ ສທ຺ໂທປິ, ປຎ຺ຈຘາວ+ຕ຺ຣ ຠິຊ຺ຊເຕ.
ກຖໍ ຊາຕິສທ຺ໂທ ຄຸຓສທ຺ໂທຕ຺ຍາທິນາ.
ຠິນ຺ເນສ຺ວ+ຠິນ຺ນຘີ+ສທ຺ທາ, ສພລາທີສຸ ຍພ຺ພລາ;
ວຕ຺ຕນ຺ເຕ ຊາຕິ ເອສາ+ສ຺ສ, ມາລາ ສຸຕ຺ຕ+ມິວາ+ນ຺ວິຕາ.
ອທພ຺ພຠູຕໍ ກຕ຺ຕາທິ-ກາຣກຄ຺ຄາມສາຘິຍໍ;
ປທຕ຺ຖໍ ກຕ຺ຕຸກມ຺ມຏ຺ຐໍ, ກ຺ຣິຍ+ມິຈ຺ຉນ຺ຕິ ຕພ຺ພິທູ.
ທພ຺ພສ຺ສິໂຕ ຕໂຕ ຠິນ຺ໂນ, ນິມິຕ຺ໂຕ ຕປ຺ປຕີຕິຍາ;
ວິນສ຺ສນສຠາໂວ ຈ, ນິຄ຺ຄຸໂຓວ ຄຸໂຓ+ຈ຺ຈເຕ.
ເອຕ຺ຖ ປໂຏ ສຸກ຺ໂກຕິ ວິນສ຺ສນສຠາໂວ ຈ ຈສທ຺ເທນ ວິປຸໂລ ອາກາໂສຕິ ອວິນສ຺ສນສຠາໂວ ຈ ອຕ຺ຕນິ ວິສຸໍ ຄຸຓຣຫິໂຕ ຄຸໂຓ+ຈ຺ຈເຕ ຕ຺ຍຕ຺ໂຖ.
ຍໍ ຍໍ ວິເສສ຺ສເຕ ກິຎ຺ຈິ, ຕໍ ຕໍ ທພ຺ພ+ມິໂຫ+ຈ຺ຈເຕ;
ຊາຕ຺ຍາທິໂນປ຺ຍ+ໂຕ ຕາທິ, ທພ຺ພຕ຺ຕໍ ປຣິກປ຺ປເຕ.
ເອຕ຺ຖ ໂຄຊາຕິ ອສ຺ສຊາຕີຕິ ວຸຕ຺ເຕ ຊາຕິ ທພ຺ພໍ. ນີໂລ ຄຸໂຓຕິ ຈ ຄຸໂຓ ທພ຺ພໍ. ປຈນກ຺ຣິຍາຕິ ຈ ຄມນາທິກ຺ຣິຍາໂຕ ວິເສສິຍຕີຕິ ກ຺ຣິຍາວ ທພ຺ພໍ.
ນາມຣູເປນ ສທພ຺ເພ, ກ຺ວຈິ ສຎ຺ຎີ ກຖີຍເຕ;
ນາມນ຺ຕິ ຕໍ ຍຖາ ຈິຕ຺ໂຕ, ສຎ຺ຎາ ສທ຺ໂທ ຕຸ ຕທ຺ຘນີ.
ນາມສ຺ສ ທພ຺ພຕ຺ເຕປິ ຈິຕ຺ໂຕຕ຺ຍາທິ ນາເມເນວ ປສິຊ຺ຌຕິ, ໂນ ຆຏ+ປຏາທໂຍວ ທພ຺ພຕ຺ເຕນ, ຕສ຺ມາ ນາມ+ມິຕິ ສຎ຺ຎີ ກຖີຍເຕ, ຕໍວາຈກຕ຺ຕາ ຕພ຺ພຕີ ຈິຕ຺ຕາທິ ສຎ຺ຎາສທ຺ໂທຕິ ນິຈ຺ຉິຍເຕຍ຺ຍ+ຘິປ຺ປາໂຍ.
ອຍໍ ປຎ຺ຈວິໂຘປິ ອຕ຺ໂຖ ສທ຺ທຕ຺ໂຖ ເຈວ ສາມຕ຺ຖິຍາ ຄມ຺ຍມານຕ຺ໂຖ ຈາຕິ ທຸພ຺ພິໂຘ. ຕຖາ ຫິ ‘‘ປີໂນ ທິວາ ນ ຠຸຎ຺ເຊຍ຺ຍ’’ມິຕິ ຠຸຕ຺ຕິນິຣາກຕິ ສທ຺ທຕ຺ໂຖ. ຣຕ຺ຕິຠຸຕ຺ຕິ ຕຸ ສາມຕ຺ຖິຍາ+ວຄມ຺ຍເຕ. ເຕເນ+ຕໍ ວຸຈ຺ຈຕິ –
ອຕ຺ຖປ຺ປຕີຕິຍໍ ສທ຺ທ-ພ຺ຍາປາໂຣ ຕິວິໂຘ ຠເວ;
ມຸຂ຺ໂຍ ລກ຺ຂຓ+ພ຺ຍຎ຺ຊນ-ສຠາໂວ ຈາຕິ ເອຕ຺ຖ ຕຸ.
ມຸຂ຺ໂຍ ຕຸ ນິຣນ຺ຕຣຕ຺ເຖ, ລກ຺ຂໂຓ ຕຸ ຕິໂຣຫິເຕ;
ອຕ຺ເຖ+ຕໂຣ ຕຸ ວາກ຺ຍສ຺ສ, ອຕ຺ເຖເຍວ ປວຕ຺ຕຕິ.
‘‘ມຎ຺ເຈ’’ຕິ ນິຣນ຺ຕຣຕ຺ເຖ ວຕ຺ຕມາໂນ ມຸຂ຺ໂຍ, ‘‘ມຎ຺ຈາ ອຸຄ຺ໂຆສນ຺ຕີ’’ຕິ ຕິໂຣຫິຕຕ຺ເຖ ວຕ຺ຕມາໂນ ລກ຺ຂໂຓ, ຄາຖາທິສກລວາກ຺ຍສ຺ສ+ຕ຺ເຖ ວຕ຺ຕມາໂນ ພ຺ຍຎ຺ຊນສຠາໂວ.
ພ຺ຍາປາຣສ຺ສ ປເຠເທນ, ຕິຘາ ສທ຺ໂທປິ ວາຈໂກ;
ລກ຺ຂຓິໂກ ພ຺ຍຎ຺ຊໂກຕິ, ຕທຕ຺ໂຖປິ ຕິຘາ ມໂຕ.
ວຈ຺ໂຈ ລກ຺ຂຓິໂກ ພ຺ຍງ຺ຄ຺ໂຍ, ເຈວໍ ສທ຺ໂທ ສຸວາຈໂກ;
ວຸຕ຺ຕກເມນ ຊາຕ຺ຍາທິ-ເຠເທນ ປຎ຺ຈຘາ ຠເວຕິ.
໓໘. ອາມນ຺ຕເຓ –
ຕິ ອາມນ຺ຕຓາຘິເກ ອຕ຺ຖມຕ຺ເຕ ປຐມາວິຠຕ຺ຕິ ໂຫຕິ. ໂຠ ນຣ, ໂຠ ອິຕ຺ຖິ, ໂຠ ນປຸໍສກ.
ສທ຺ເທນາ+ຠິມຸຂີກາໂຣ, ວິຊ຺ຊມານສ຺ສ ວຕ຺ຖຸໂນ;
ອາມນ຺ຕຓໍ ວິຘາຕພ຺ເພ, ນຕ຺ຖິ ‘‘ຣາຊາ ຠເວ’’ຕິ+ທໍ.
ກ຺ຣິຍາ ນິມິຕ຺ຕໍ ກາຣກນ຺ຕຸ ກມ຺ມ, ກຕ຺ຕຸ, ກຣຓ, ສມ຺ປທານ, ອວຘິ, ອາຘາຣເຠເທນ ຉພ຺ພິຘໍ, ຕໍ ຍຖາ –
໒,໒. ກມ຺ເມ ທຸຕິຍາ
ກຣີຍຕິ ກຕ຺ຕຸກິຣິຍາຍ ສມ຺ພນ຺ຘີຍຕີຕິ ກມ຺ມໍ, ຕສ຺ມິໍ ກມ຺ມກາຣເກ ທຸຕິຍາວິຠຕ຺ຕິ ໂຫຕິ. ຕໍ ຕິວິຘໍ ນິພ຺ພຕ຺ຕິ, ວິກຕິ, ປຕ຺ຕິ ເຠເທນ, ຕຕ຺ຖ ນິພ຺ພຕ຺ຕິກມ຺ເມ ມາຕາ ປຸຕ຺ຕໍ ວິຊາຍຕິ, ອາຫາໂຣ ສຸຂໍ ຊນຍຕິ, ກຏໍ ກໂຣຕິ ທຕ຺ໂຕ. ວິກຕິຍໍ ກຏ຺ຐ+ມງ຺ຄາຣໍ ກໂຣຕິ, ສຸວຓ຺ຓໍ ກຏກໍ ກໂຣຕິ, ວີຫໂຍ ລຸນາຕິ. ປຕ຺ຕິຍໍ ທຕ຺ໂຕ ຆຣໍ ປວິສຕິ, ອາທິຈ຺ຈໍ ປສ຺ສຕິ, ຘມ຺ມໍ ສຸຓາຕິ, ປຓ຺ຑິເຕ ປຍິຣຸປາສຕິ.
ວຸຕ຺ຕຎ຺ຈ –
ນິພ຺ພຕ຺ຕິ+ວິກຕິ+ປຕ຺ຕິ-ເຠທາ ກມ຺ມໍ ຕິຘາ ມຕໍ;
ກຕ຺ຕຸກ຺ຣິຍາຠິຄມ຺ມນ຺ຕໍ, ສຸຂ+ມງ຺ຄາຣໍ+ຆຣໍ ຍຖາຕິ.
ກຏໍ ກໂຣຕິ ວິປຸລໍ ທສ຺ສນີຍນ຺ຕິ ອຕ຺ເຖວ ຄຸຓຍຸຕ຺ຕສ຺ສ ກມ຺ມຕາ, ວິປຸລໍ ກໂຣຕິ, ທສ຺ສນີຍໍ ກໂຣຕີຕິ ກ຺ຣິຍາຍ ສມ຺ພນ຺ຘິຍມານຕ຺ຕາ. ໂອທໂນ ປຈ຺ຈເຕຕິ ໂອທນສທ຺ທໂຕ ກມ຺ມຕາ ນປ຺ປຕີຍເຕ, ກິຎ຺ຈຣຫິ ອາຂ຺ຍາຕໂຕ.
ອິຈ຺ຉິຕກມ຺ມໍ ຍຖາ-ຄາວຸໍ ປໂຍ ໂທຫຕິ, ໂຄມນ຺ຕໍ ຄາວໍ ຍາຈຕິ, ຄາວ+ມວ ຣຸນ຺ຘຕິ ວຊໍ, ມາຓວກໍ ມຄ຺ຄໍ ປຸຈ຺ຉຕິ, ໂຄມນ຺ຕໍ ຄາວໍ ຠິກ຺ຂເຕ, ຣຸກ຺ຂ+ມວຈິນາຕິ ຜລານິ, ຣຸກ຺ຂາຕ຺ຍຕ຺ໂຖ. ສິສ຺ສໍ ຘມ຺ມໍ ພ຺ຣູເຕ. ເອຕ຺ຖ ປໂຍ, ຄາວໍ ອິຈ຺ຈາທິ ອິຈ຺ຉິຕໍ, ຄາວຸໍ, ໂຄມນ຺ຕ+ມິຈ຺ຈາທິ ອນິຈ຺ຉິຕໍ. ເອວ+ມນິຈ຺ຉິເຕປິ ກຓ຺ຏກໍ ມທ຺ທຕິ, ວິສໍ ຄິລຕິ. ຍໍ ເນວິ+ຈ຺ຉິຕໍ, ນາປິ ອນິຈ຺ຉິຕໍ, ຕຕ຺ຣາປິ ຄາມໍ ຄຈ຺ຉນ຺ໂຕ ຣຸກ຺ຂມູລ+ມຸປສປ຺ປຕິ.
ອາຘາເຣ ອຘິສິ+ຐາ+ສານໍ ປໂຍເຄ ຈ, ປຖວິໍ ອຘິເສສ຺ສຕິ, ຄາມ+ມຘິຕິຏ຺ຐຕິ, ຣຸກ຺ຂ+ມຊ຺ຌາສເຕຕິ. ເອຕ຺ຖ ປຖວິນ຺ຕິ ປຖວິຍນ຺ຕິ ອຕ຺ໂຖ. ເອວ+ມຠິ, ນິປຸພ຺ພວິສສ຺ສາປິ, ຘມ຺ມ+ມຠິນິວິສເຕ, ຘມ຺ເມ ວາ. ຕຖາ ອຸປ, ນ຺ວ+ຊ຺ຌາ+ປຸພ຺ພວສຕິສ຺ສ, ຄາມ+ມຸປວສຕິ, ຄາມ+ມນຸວສຕິ, ວິຫາຣ+ມຘິວສຕິ, ຄາມ+ມາວສຕິ, ອຄາຣໍ ອຊ຺ຌວສຕິ, ເອຕ຺ຖ ຄາມນ຺ຕິ ຄາເມຕ຺ຍຕ຺ໂຖ. ຕຖາ ຕປ຺ປານາ+ຈາເຣປິ, ນທິໍ ປິພຕິ, ຄາມໍ ຈຣຕິ, ນທິຍໍຕ຺ຍຕ຺ໂຖ. ສເຈ ມໍ ນາລປິສ຺ສຕີຕິ ມຍາ ສທ຺ຘິໍຕ຺ຍຕ຺ໂຖ. ວິຫິຕາວ ປຏິ-ໂຍເຄປິ ທຸຕິຍາ, ປຏິຠນ຺ຕຸ ຕໍ ຈຸນ຺ທ ໂພຊ຺ຌງ຺ຄາ, ຕມ຺ປຏິ ໂພຊ຺ຌງ຺ຄາ ຠາສນ຺ຕູຕິ ອຕ຺ໂຖ. ອຸປມາ ມໍ ປຕິຠາຕິ, ອຸປມາ ມໍ ອຸປຏ຺ຐາຕິຕ຺ຍຕ຺ໂຖ. ຘາຕຸນາຍຸຕ຺ເຕ ‘‘ຕສ຺ສ ນປ຺ປຏິຠາຕີ’’ຕິ ຉຏ຺ຐີ.
໓. ກາລທ຺ຘານ+ມຈ຺ຈນ຺ຕສໍໂຍເຄ
ກາລທ຺ຘານໍ ທພ຺ພ+ຄຸຓ+ກ຺ຣິຍາຫິ ອຈ຺ຈນ຺ຕສໍໂຍເຄ ເຕຫິ ກາລທ຺ຘານວາຈີຫິ ທຸຕິຍາ ໂຫຕິ. ກາເລ-ສຕ຺ຕາຫໍ ຄວປານໍ, ມາສໍ ມໍໂສທນໍ, ສຣທໍ ຣມຓີຍາ ນທີ, ສພ຺ພກາລໍ ຣມຓີຍໍ ນນ຺ທນໍ, ຕໂຍ ມາເສ ອຠິຘມ຺ມໍ ເທເສຕິ. ອທ຺ຘນິ-ໂຍຊນໍ ວນຣາຊິ, ໂຍຊນໍ ທີໂຆ ປພ຺ພໂຕ, ໂກສໍ ສຊ຺ຌາຍຕິ.
ປຸພ຺ພນ຺ຫສມຍໍ ນິວາເສຕ຺ວາ, ເອກໍ ສມຍໍ ຠຄວາ, ອິມໍ ຣຕ຺ຕິໍ ຈຕ຺ຕາໂຣ ມຫາຣາຊາໂນຕິ ເອວມາທີສຸ ກາລວາຈີຫິ ອຈ຺ຈນ຺ຕສໍໂຍເຄ ທຸຕິຍາ, ພຫຸລໍວິຘານາ ວິຠຕ຺ຕິວິປລ຺ລາໂສ ວາ. ມາເສນາ+ນຸວາໂກ+ຘີໂຕ, ໂກເສນາ+ນຸວາໂກ+ຘີໂຕຕິ ກຣຓຕ຺ເຖ ຕຕິຍາ.
໔. ຄຕິໂພຘາຫາຣສທ຺ທຕ຺ຖາກມ຺ມກຠຊ຺ຊາທີນໍ ປໂຍຊ຺ເຊ
ຄຕ຺ຍຕ຺ຖານໍ ໂພຘຕ຺ຖານໍ ອາຫາຣຕ຺ຖານໍ ສທ຺ທຕ຺ຖານ+ມກມ຺ມການໍ ຠຊ຺ຊາທີນຎ຺ຈ ປໂຍຊ຺ເຊ ກຕ຺ຕຣິ ທຸຕິຍາ ໂຫຕິ. ທຕ຺ໂຕ ຄມຍຕິ ມາຓວກໍ ຄາມໍ, ຍາປຍຕິ ວາ. ຄຸຣຸ ໂພຘຍຕິ ມາຓວກໍ ຘມ຺ມໍ, ເວທຍຕິ ວາ. ມາຕາ ໂຠຊຍຕິ ປຸຕ຺ຕ+ໂມທນໍ, ອາສຍຕິ ວາ. ຄຸຣຸ ອຊ຺ຌາປຍຕິ ສິສ຺ສໍ ເວທໍ, ປາຐຍຕິ ວາ. ປໂຍຊ຺ຊໂຕ+ຎ຺ຎຕ຺ຣ ກມ຺ເມ ທຸຕິຍາ. ໂປໂສ ອາສຍຕິ ທຕ຺ຕໍ, ສາຍຍຕິ ວາ. ໂປໂສ ອຎ຺ຎໍ ຠຊ຺ຊາເປຕິ, ອຎ຺ຎໍ ໂກຏ຺ຏາເປຕິ, ອຎ຺ຎໍ ສນ຺ຖຣາເປຕິ.
໕. ຫຣາທີນໍ ວາ
ຫຣາທີນໍ ປໂຍຊ຺ເຊ ກຕ຺ຕຣິ ທຸຕິຍາ ໂຫຕິ ວາ. ໂປໂສ ຫາເຣຕິ ຠາຣໍ ທຕ຺ຕໍ, ທຕ຺ເຕເນຕິ ວາ. ທສ຺ສຍເຕ ຊນໍ ຣາຊາ, ຊເນເນຕິ ວາ. ອຠິວາທຍເຕ ຄຸຣຸໍ ທຕ຺ຕໍ, ທຕ຺ເຕເນຕິ ວາ. ອຊ຺ໂຌຫາເຣຕິ ສຕ຺ຕຸໍ ທຕ຺ຕໍ, ທຕ຺ເຕເນຕິ ວາ. ກາເຣຕິ ທຕ຺ໂຕ ທຕ຺ຕໍ, ທຕ຺ເຕເນຕິ ວາ. ປກ຺ເຂ ສພ຺ພຕ຺ຣ ກຕ຺ຕຣິ ຕຕິຍາ.
໖. ນ ຂາທາທີນໍ
ຂາທາທີນໍ ປໂຍຊ຺ເຊ ກຕ຺ຕຣິ ທຸຕິຍາ ນ ໂຫຕິ. ຄຕ຺ຍຕ຺ຖາທີສຸ ກ຺ວຈິ ປຏິເສຘຕ຺ຖ+ມິທໍ. ຂາທຍຕິ ທຕ຺ໂຕ ທຕ຺ເຕນ, ອາທຍຕິ ທຕ຺ເຕນ, ອວ຺ຫາປຍຕິ ທຕ຺ເຖນ, ສທ຺ທາຍຍຕິ ທຕ຺ເຕນ, ນາຍຍຕິ ທຕ຺ເຕນ, ກນ຺ທຍຕິ ທຕ຺ເຕນ.
໗. ຌາທີຫິ ຍຸຕ຺ຕາ
ຘິອາທີຫິ ຍຸຕ຺ຕໂຕ ທຸຕິຍາ ໂຫຕິ. ຘິ+ຣຕ຺ຖຸ+ມໍ ປຸຕິກາຍໍ, ອນ຺ຕຣາ ຈ ຣາຊຄຫໍ ອນ຺ຕຣາ ຈ ນາລນ຺ທໍ, ຣາຊຄຫສ຺ສ ຈ ນາລນ຺ທສ຺ສ ຈ ວິວຣຠູເຕ ມຊ຺ເຌຕິ ອຕ຺ໂຖ. ສມາຘານ+ມນ຺ຕເຣນ, ມຸຈລິນ຺ທ+ມຠິໂຕ ສຣໍ. ຉຏ຺ຐ຺ຍຕ຺ເຖ+ຍໍ ທຸຕິຍາ.
໘. ລກ຺ຂຓິຕ຺ຖມ຺ຠູຕວິຈ຺ຉາສ຺ວ+ຠິນາ
ລກ຺ຂຓາທີສ຺ວ+ຕ຺ເຖສຸ ອຠິນາ ຍຸຕ຺ຕມ຺ຫາ ທຸຕິຍາ ໂຫຕິ. ຣຸກ຺ຂ+ມຠິວິຊ຺ໂຊຕເຕ ຈນ຺ໂທ, ເອຕ຺ຖ ຣຸກ຺ໂຂ ລກ຺ຂຓໍ, ຈນ຺ໂທ ລກ຺ຂິຕພ຺ໂພ, ຕຕ຺ຣ ອຠິນາ ຣຸກ຺ຂສ຺ສ ລກ຺ຂຓວຸຕ຺ຕິຕາ ປກາສີຍຕີຕິ ຣຸກ຺ໂຂ ອຠິນາ ຍຸຕ຺ໂຕ ນາມ. ສາຘຸ ເທວທຕ຺ໂຕ ມາຕຣ+ມຠິ, ມາຕຣິ ສາຘຸຕ຺ຕໍ ປຕ຺ໂຕຕ຺ຍຕ຺ໂຖ. ຣຸກ຺ຂໍ ຣຸກ຺ຂໍອຠິ ວິຊ຺ໂຊຕເຕ ຈນ຺ໂທ, ຣຸກ຺ເຂ ຣຸກ຺ເຂຕ຺ຍຕ຺ໂຖ.
໙. ປຕິປຣີຫິ ຠາເຄ ຈ
ປຕິປຣີຫິ ຍຸຕ຺ຕໂຕ ລກ຺ຂຓາທີສຸ ຠາເຄ ຈ+ຕ຺ເຖ ທຸຕິຍາ ໂຫຕິ. ຣຸກ຺ຂໍປຕິ ວິຊ຺ໂຊຕເຕ, ສາຘຸ ເທວທຕ຺ໂຕ ມາຕຣໍປຕິ, ຣຸກ຺ຂໍ ຣຸກ຺ຂໍປຕິ ຕິຏ຺ຐຕິ, ຍ+ເທຕ຺ຖ ມໍ ປຕິ ສິຍາ, ໂຍ ມມ ຠາໂຄ, ໂສ ທີຍຕຸຕ຺ຍຕ຺ໂຖ. ເອວໍ ຣຸກ຺ຂໍປຣິຕ຺ຍາທິປິ.
໑໐. ອນຸນາຕິ
ລກ຺ຂຓາທີສຸ ທຸຕິຍາ. ຣຸກ຺ຂມນຸ ວິຊ຺ໂຊຕເຕ, ສຈ຺ຈກິຣິຍ+ມນຸ ວສ຺ສິ, ເຫຕຸ ຈ ລກ຺ຂຓໍ ຠວຕິ, ສາຘຸ ເທວທຕ຺ໂຕ ມາຕຣ+ມນຸ, ຣຸກ຺ຂໍ ຣຸກ຺ຂ+ມນຸ ວິຊ຺ໂຊຕເຕ, ຍເທຕ຺ຖ ມໍອນຸ ສິຍາ.
໑໑. ສຫຕ຺ເຖ
ສຫຕ຺ເຖ ອນຸນາ ຍຸຕ຺ຕມ຺ຫາ ທຸຕິຍາ. ປພ຺ພຕ+ມນຸ ຕິຏ຺ຐຕິ, ປພ຺ພເຕນ ສຫ ຕ຺ຍຕ຺ໂຖ.
໑໒. ຫີເນ
ຫີນຕ຺ເຖ ອນຸນາ ຍຸຕ຺ຕມ຺ຫາ ທຸຕິຍາ. ອນຸສາຣິປຸຕ຺ຕໍ ປຎ຺ຎວນ຺ໂຕ ຠິກ຺ຂູ, ສາຣິປຸຕ຺ຕໂຕ ປຎ຺ຎາຍ ຫີນາຕ຺ຍຕ຺ໂຖ.
໑໓. ອຸເປນ
ຫີນຕ຺ເຖ ອຸເປນ ຍຸຕ຺ຕມ຺ຫາ ທຸຕິຍາ. ອຸປສາຣິປຸຕ຺ຕໍ ປຎ຺ຎວນ຺ໂຕ.
໑໖. ກຕ຺ຕຸກຣເຓສຸ ຕຕິຍາ
ກຕ຺ຕຣິ ກຣເຓ ຈ ກາຣເກ ຕຕິຍາ ໂຫຕິ. ຊິເນນ ເທສິໂຕ ຘມ຺ໂມ, ພຸທ຺ເຘນ ຊິໂຕ ມາໂຣ, ອຫິນາ ທຏ຺ໂຐ ນໂຣ. ຍຕ຺ຖ ກາຣຓກາຣຓມ຺ປິ ກາຣຓວເສນ ວຸຈ຺ຈຕິ, ຕຕ຺ຖາປິ ຕຕິຍາ, ໂຈເຣຫິ ຄາໂມ ທຑ຺ໂຒ, ຕິເຓຫິ ຠຕ຺ຕໍ ສິທ຺ຘໍ, ສທ຺ເຘຫິ ກາຣິຕາ ວິຫາຣາ.
ອຕ຺ຕປຘາໂນ ກິຣິຍໍ, ໂຍ ນິພ຺ພຕ຺ເຕຕິ ກາຣໂກ;
ອປຍຸຕ຺ໂຕ ປຍຸຕ຺ໂຕ ວາ, ສ ກຕ຺ຕາຕິ ປວຸຈ຺ຈຕິ.
ກຣເຓ-ຕໍ ປນ ທຸວິຘໍ ອຊ຺ຌຕ຺ຕິກພາຫິຣວເສນ, ຍຖາ ຫຕ຺ເຖນ ກມ຺ມໍ ກໂຣຕິ, ຈກ຺ຂຸນາ ຣູປໍ ປສ຺ສຕິ, ມນສາ ຘມ຺ມໍ ວິຎ຺ຎາຍຕິ. ທຕ຺ເຕນ ວິຫໂຍ ລຸນາຕິ, ອຄ຺ຄິນາ ກຸຏິໍ ຌາເປຕິ.
ພາຫິຣຎ຺ຈ ຕຖາ+ຊ຺ຌຕ຺ຕໍ, ກຣຓໍ ທຸວິຘໍ ຍຖາ;
ວີຫິໍ ລຸນາຕິ ທຕ຺ເຕນ, ເນຕ຺ເຕນ ຈນ຺ທ+ມິກ຺ຂເຕ.
ປກຕິຍາ ອຠິຣູໂປ, ໂຄຕ຺ເຕນ ໂຄຕໂມ ອິຈ຺ຈາທິ ຠູຘາຕຸສ຺ສ ສມ຺ຠວາ ກຣເຓ ຕຕິຍາ. ຕຖາ ສາຣິປຸຕ຺ໂຕຕິ ນາເມນ ວິສ຺ສຸໂຕ, ຊາຕິຍາ ຂຕ຺ຕິໂຍ ພຸທ຺ໂຘ, ຊາຕິຍາ ສຕ຺ຕວສ຺ສິໂກ, ສິປ຺ເປນ ນຬກາໂຣ ໂສ, ເອກູນຕິໍໂສ ວຍສາ, ເອວໍ ສເມນ ຘາວຕິ, ວິສເມນ ຘາວຕິ, ທ຺ວິໂທເຓນ ຘຎ຺ຎໍ ກິຓາຕິ.
໑໗. ສຫຕ຺ເຖນ
ສຫຕ຺ເຖນ ໂຍເຄ ຕຕິຍາ ສິຍາ. ຕຕິຍາປິ ຉຏ຺ຐີວ ອປ຺ປຘາເນ ເອວ ຠວຕິ. ປຸຕ຺ເຕນ ສຫາ+ຄໂຕ, ປຸຕ຺ເຕນ ສທ຺ຘິໍ ອາຄໂຕ, ວິຕກ຺ເກນ ສຫ ວຕ຺ຕຕິ, ປຸຕ຺ເຕນ ສຫ ຖູໂລ, ນິສີທິ ຠຄວາ ສທ຺ຘິໍ ຠິກ຺ຂຸສງ຺ເຆນ, ສຫສ຺ເສນ ສມໍ ມິຕາ, ສພ຺ເພຫິ ເມ ປິເຍຫິ ມນາເປຫິ ນານາຠາໂວ.
໑໘. ລກ຺ຂເຓ
ລກ຺ຂເຓ ວຕ຺ຕມານໂຕ ຕຕິຍາ. ຠິນ຺ເນນ ສີເສນ ປຄ຺ຆຣນ຺ເຕນ ໂລຫິເຕນ ປຏີວິສ຺ສເກ ອຸຊ຺ຌາເປສິ, ອູນປຎ຺ຈພນ຺ຘເນນ ປຕ຺ເຕນ ອຎ຺ຎໍ ນວໍ ປຕ຺ຕໍ ເຈຕາເປຍ຺ຍ, ຕິທຓ຺ຑເກນ ປຣິພ຺ພາຊກ+ມທ຺ທກ຺ຂິ, ອກ຺ຂິນາ ກາໂຓ, ຫຕ຺ເຖນ ກຸຓີ, ປາເທນ ຂຎ຺ໂຊ, ປິຏ຺ຐິຍາ ຂຸຊ຺ໂຊ. ເຕນ ຫິ ວິກລງ຺ເຄນ ວິກລງ຺ຄິໂນ ວິກາໂຣ ລກ຺ຂິຍເຕ.
໑໙. ເຫຕຸມ຺ຫິ
ວາສາທິລກ຺ຂຓກ຺ຣິຍາຍ ເຫຕຸໂຕ ຕຕິຍາ. ອນ຺ເນນ ວສຕິ, ວິຊ຺ຊາຍ ວສຕິ, ນ ຊຈ຺ຈາ ວສໂລ ໂຫຕິ, ກມ຺ມຸນາ ວສໂລ ໂຫຕິ, ທາເນນ ໂຠຄວາ, ອາຈາເຣນ ກຸລໍ, ເຕນ ປາຓິ ກາມທໂທ.
໒໐. ປຎ຺ຈມີ+ເຓ ວາ
ອິເຓ ເຫຕຸມ຺ຫິ ປຎ຺ຈມີ ວາ. ສຕສ຺ມາ ພທ຺ໂຘ, ສເຕນ ວາ.
໒໑. ຄຸເຓ
ປຣງ຺ຄຠູເຕ ເຫຕຸມ຺ຫິ ປຎ຺ຈມີ ໂຫຕິ ວາ. ຊຬຕ຺ຕາ ພທ຺ໂຘ, ຊຬຕ຺ເຕນວາ, ປຎ຺ຎາຍ ມຸຕ຺ໂຕ, ຫຸຕ຺ວາ ອຠາວໂຕ ອນິຈ຺ຈາ, ສງ຺ຂາຣນິໂຣຘາ ວິຎ຺ຎາຓນິໂຣໂຘ. ພຫຸລໍວິຘານາ ສຕ຺ຕມ຺ຍຕ຺ເຖຫິປິ, ເຕນ ສມເຍນ, ກາເລນ ຘມ຺ມສາກຈ຺ຉາ, ປຸຣຕ຺ຖິເມນ ຘຕຣຏ຺ໂຐ, ທກ຺ຂິເຓນ ວິຣູຬ຺ຫໂກ, ອຸຕ຺ຕເຣນ ກປິລວຕ຺ຖຸ, ເຍນ ຠຄວາ, ເຕນຸປສງ຺ກມິ, ໂສ ໂວ ມມ+ຈ຺ຈເຍນ ສຕ຺ຖາຕິ. ມາເສນ ຠຸຎ຺ຊຕິ, ເອກາເຫເນວ ພາຣາຓສິໍ ປາວິສິ, ນວຫິ ມາເສຫິ ວິຫາຣໍ ກາຣາເປສິ, ກຫາປເຓນ ອູໂນ, ຘເນນ ວິກໂລ, ອສິນາ ກລໂຫ, ອາຈາເຣນ ນິປຸໂຓ, ຄຸເຬນ ມິສ຺ສກໍ, ວາຈາຍ ສຂິໂລ, ມຓິນາ ອຕ຺ໂຖ, ຘເນນ ອຕ຺ໂຖ, ໂຍຊເນນ ຄຈ຺ຉຕິ ອິຈ຺ຈາທິ ເຫຕຸມ຺ຫິ ກຣເຓ ວາ ຕຕິຍາ. ອຕ຺ຕນາວ ອຕ຺ຕານໍ ສມ຺ມນ຺ນຕີຕິ ປຈ຺ຈຕ຺ເຕ ພຫຸລໍວິຘານາ ກຕ຺ຕຣິ ຕຕິຍາ. ເອວໍ ຕິເລຫິ ເຂຕ຺ເຕ ວປຕີຕິ ກມ຺ມຕ຺ເຖ, ສຸມຸຕ຺ຕາ ມຍໍ ເຕນ ມຫາສມເຓນາຕິ ປຎ຺ຈມ຺ຍຕ຺ເຖ ຈ.
໒໔. ຈຕຸຕ຺ຖີ ສມ຺ປທາເນ
ອເຈຕນໍ ສເຈຕນໍ ວາ ປຏິຄ຺ຄາຫກຠາເວນາ+ເປກ຺ຂິຕໍ, ຕໍ ສມ຺ປທານໍ, ຕຎ຺ຈ ທາ-ທາເນຕິ ຘາຕຸໂຕ ພ຺ຍປ຺ເປນ ຍຸຕ຺ຕເມວ, ຕຕ຺ຖ ຈຕຸຕ຺ຖີ ໂຫຕິ. ຕຎ຺ຈ ທີຍມານສ຺ສ ວຕ຺ຖຸໂນ ອນິວາຣຓ+ຊ຺ເຌສນາ+ນຸມຕິໂຕ ຕິວິໂຘ, ຍຖາ ພຸທ຺ຘສ຺ສ ປຸປ຺ຜໍ ເທຕິ, ໂພຘິຣຸກ຺ຂສ຺ສ ຊລໍ ເທຕິ, ຍາຈກສ຺ສ ຘນໍ ເທຕິ, ຠິກ຺ຂູນໍ ທານໍ ເທຕິ.
ອນິຣາກຣຓາ+ຣາຘ-ນ+ພ຺ຠນຸຎ຺ຎວເສນ ຫິ;
ສມ຺ປທານໍ ຕິຘາ ວຸຕ຺ຕໍ, ຣຸກ຺ຂ+ຍາຈກ+ຠິກ຺ຂໂວ.
ອາຘາຣວິວກ຺ຂາຍໍ ສຕ຺ຕມີປິ, ສງ຺ເຆ ໂຄຕມິ ເທຫິ, ສງ຺ເຆ ທິນ຺ເນ ອຫຎ຺ເຈວ ປູຊິໂຕ ຠວິສ຺ສາມິ, ຍາ ປລາລມຍໍ ມາລໍ, ນາຣີ ທຕ຺ວານ ເຈຕິເຍຕິ.
໒໕. ຕາທຕ຺ຖ຺ເຍ
ຕາທຕ຺ຖ຺ເຍ ຈຕຸຕ຺ຖີ ສິຍາ. ຕທຕ຺ຖສ຺ສ ຠາເວ, ຕາທຕ຺ຖ຺ຍໍ, ຕສ຺ມິໍ ຕທຕ຺ຖຠາເວ ໂຊຕນີເຍວ ຈຕຸຕ຺ຖີ ສິຍາ. ຕທຕ຺ຖສ຺ສ ຠາໂວຕິ ນິມິຕ຺ຕນິມິຕ຺ຕີສມ຺ພນ຺ເຘ ຉຏ຺ຐີ, ຕສ຺ມາ ຉຏ຺ຐາປວາໂທ+ຍໍ. ສເມປິ ນິມິຕ຺ຕນິມິຕ຺ຕີນໍ ສມ຺ພນ຺ເຘ ນິມິຕ຺ຕຠູຕຍູປໂຕວ ຈຕຸຕ຺ຖີ, ໂນ ນິມິຕ຺ຕີຠູຕທາຣຸໂຕ. ຍູປາຍ ທາຣຸ, ປາກາຍ ວຊຕິ, ພຸທ຺ຘສ຺ສຕ຺ຖາຍ ຊີວິຕໍ ປຣິຈ຺ຈຊາມິ, ເນວ ທວາຍ, ນ ມທາຍ, ອູນສ຺ສ ປາຣິປູຣິຍາ, ອຕ຺ຖາຍ ຫິຕາຍ ສຸຂາຍ ສໍວຕ຺ຕຕິ, ໂລການຸກມ຺ປາຍ, ຜາສຸ ວິຫາຣາຍ.
ອິຈ຺ຈາຍໍ ກຈ຺ຈາຍເນ ອຸປຣິ ວກ຺ຂມານສ຺ສ ຈຕຸຕ຺ຖີຕິ ສາຘິຕຕ຺ຕາ ອິຘ ຉຏ຺ຐີຕິ ທີປນຕ຺ຖໍ ວຸຈ຺ຈເຕ –
ກສ຺ສ ສາທຸ ນຣຸຈ຺ຈຕິ, ມາ ອຍສ຺ມນ຺ຕານມ຺ປິ ສງ຺ຆເຠໂທ ຣຸຈ຺ຈິຕ຺ຖ, ຂມຕິ ສງ຺ຆສ຺ສ, ຠຕ຺ຕ+ມສ຺ສ ນຈ຺ຉາເທຕີຕິ ຉຏ຺ຐີ ສມ຺ພນ຺ຘວຈນິຈ຺ຉາຍໍ, ນ ເຈ+ວໍ ວິໂຣໂຘ ສິຍາ, ສທິສຣູປຕ຺ຕາ, ເອວໍວິເຘສຸ ຈ ສມ຺ພນ຺ຘສ຺ສ ສທ຺ທິການຸມຕຕ຺ຕາ. ຕຖາ ຫິ ຠາຄວຸຕ຺ຕິຍາ ‘‘ອຸປປທວິຠຕ຺ຕິ ຉຏ຺ຐິຍາ+ປວາທາ’’ຕິ ວຸຕ຺ຕໍ, ສທ຺ທນ຺ຕເຣ ວິຫິຕາ ວິຠຕ຺ຕິ ອຸປປທວິຠຕ຺ຕິ.
ກສ຺ສ ວາ ຕ຺ວໍ ຘມ຺ມໍ ໂຣເຈສີຕິ ອຕ຺ຖມຕ຺ເຕ ປຐມາ, ກສ຺ສ ວາ ຕຸຍ຺ຫນ຺ຕິ ອວຕ຺ວາ ກສ຺ສ ວາ ຕ຺ວໍ ຘມ຺ມໍ ໂຣເຈສີຕິ ອຕ຺ຖມຕ຺ເຕ ປຐມາວເສນ ພ຺ຍຠິຈາຣທສ຺ສນາ. ເອວ+ມຎ຺ຎາປິ ວິຎ຺ເຎຍ຺ຍາ, ປຣໂຕປິ ຍຖາຄມໍ.
ຣຎ຺ໂຎ ສຕໍ ຘາເຣຕິ ຣຎ຺ໂຎ ຉຕ຺ຕໍ ຘາເຣຕີຕິ ສມ຺ພນ຺ເຘ ຉຏ຺ຐີວ. ສິລາຆ=ກຖເນ, ເອວໍ ຣຎ຺ໂຎ ສິລາຆເຕ ອິຈ຺ຈາທິ, ຖຸຕິໍ ກໂຣຕີຕ຺ຍຕ຺ໂຖ. ຫນຸ=ອປນຍເນ, ຣຎ຺ໂຎ ຫນຸເຕ, ວຎ຺ເຈຕີຕ຺ຍຕ຺ໂຖ. ອຸປຕິຏ຺ເຐຍ຺ຍ ສກ຺ຍປຸຕ຺ຕານໍ ວຑ຺ຒກີ, ອຸປຄຈ຺ເຉຍ຺ຍາຕ຺ຍຕ຺ໂຖ. ສປ=ອກ຺ໂກເສ, ມຍ຺ຫໍ ສປເຕ, ສຈ຺ຈໍ ກຸຣຸເຕຕ຺ຍຕ຺ໂຖ. ຘຣ=ຘາຣເຓ, ສຸວຓ຺ຓໍ ເຕ ຘາຣຍເຕ, ອິຓໍ ເຕ ຘາຣຍຕິ, ອສ຺ສ ຣຎ຺ໂຎ ນາຄໍ ຘາຣຍາມ. ປິຫ=ອິຈ຺ຉາຍໍ, ເທວາປິ ຕສ຺ສ ປິຫຍນ຺ຕິ ຕາທິໂນ, ເຕສໍ ປິຫຍນ຺ຕິ ສມ຺ພຸທ຺ຘານໍ ສຕີມຕໍ, ປິຫຍນ຺ຕິ=ປຕ຺ເຖນ຺ຕິ. ຕສ຺ສ ກຸຊ຺ຌ ມຫາວີຣ, ຍທິ+ຫໍ ຕສ຺ສ ປກຸປ຺ເປຍ຺ຍໍ, ທຸຠຍຕິ ທິສານໍ ເມໂຆ, ໂຍ ມິຕ຺ຕານໍ ນ ທູຠຕິ, ໂຍ ອປ຺ປທຸຏ຺ຐສ຺ສ ນຣສ຺ສ ທຸສ຺ສຕິ. ອິສ຺ສ=ອິສ຺ສາຍໍ, ຕິຕ຺ຖິຍາ ອິສ຺ສຍນ຺ຕິ ສມຓານໍ. ອຸສູຍ=ໂທສາວິກຣເຓ, ທຸຊ຺ຊນາ ຄຸຓວນ຺ຕານໍ ອຸສ຺ສູຍນ຺ຕິ, ກາ ອຸສຸຍາ ວິຊານຕໍ. ອິຘ+ສິຘ+ຣາຘ+ສາຘ=ສໍສິທ຺ຘິຍໍ, ອາຣາໂຘ ເມ ຣຎ຺ໂຎ, ຣຎ຺ໂຎ ຠາຄ຺ຍ+ມາຣຊ຺ຌຕິ, ກ຺ຍາ+ຫໍ ອຍ຺ຍານໍ ອປຣຊ຺ຌາມິ, ອາຍສ຺ມໂຕ ອຸປາລິຕ຺ເຖຣສ຺ສ ອຸປສມ຺ປທາເປກ຺ໂຂ ອຸປຕິສ຺ໂສ. ຠິກ຺ຂູ ຠຄວໂຕ ປຈ຺ຈສ຺ໂສສຸໍ, ອາສຸຓນ຺ຕິ ພຸທ຺ຘສ຺ສ ຠິກ຺ຂູ, ຕສ຺ສ ຠິກ຺ຂຸໂນ ຊໂນອນຸຄິຓາຕິ, ປຕິຄິຓາຕິ, ສາຘຸກາຣທານາທິນາ ຕໍ ອຸສ຺ສຫຕີຕ຺ຍຕ຺ໂຖ. ອາໂຣຈຍາມິ ໂວ ຠິກ຺ຂເວ, ປຏິເວທຍາມິ ໂວ, ອາມນ຺ຕຍາມິ ເຕ ມຫາຣາຊ, ຘມ຺ມໍ ເຕ ເທສິສ຺ສາມິ, ເທເສຕຸ ຠນ຺ເຕ ຠຄວາ ຘມ຺ມໍ ຠິກ຺ຂູນໍ, ຍຖາ ໂນ ຠຄວາ ພ຺ຍາກເຣຍ຺ຍ, ນິຣຸຕ຺ຕິໍ ເຕ ປວກ຺ຂາມິ, ອລໍ ເມ ຣຊ຺ຊໍ, ອລໍ ຠິກ຺ຂຸ ປຕ຺ຕສ຺ສ, ອລໍ ມລ຺ໂລ ມລ຺ລສ຺ສ, ອຣຫຕິ ມລ຺ໂລ ມລ຺ລສ຺ສ, ອລໍ ເຕ ອິຘ ວາເສນ, ກິໍ ເມ ເອເກນ ຕິຓ຺ເຓນາຕິ ສພ຺ພຕ຺ຖ ສມ຺ພນ຺ເຘ ຉຏ຺ຐີ.
ເອວໍ ອາຍຸ ໂຠໂຕ ໂຫຕຸ, ຈິຣໍ ຊີວິຕໍ, ຠທ຺ທໍ, ກລ຺ຍາຓໍ, ອຕ຺ຖໍ, ປໂຍຊນໍ, ກຸສລໍ, ອນາມຍໍ, ຫິຕໍ, ປຕ຺ຖໍ, ສຸຂໍ, ສາຕໍ, ໂຠໂຕ ໂຫຕຸ, ສາຘຸ ສມ຺ມຸຕິ ເມ ຕສ຺ສ, ປຸຕ຺ຕສ຺ສາ+ວິກເຣຍ຺ຍ ຄຸຍ຺ຫ+ມຕ຺ຖໍ, ຕສ຺ສ ເມ ສກ຺ໂກ ປາຕຸຣໂຫສິ, ຕສ຺ສ ປຫິເຓຍ຺ຍ, ຠິກ຺ຂູນໍ ທູຕໍ ປາເຫສິ, ກປ຺ປຕິ ສມຓານໍ ອາໂຍໂຄ, ເອກສ຺ສ ທ຺ວິນ຺ນໍ ຕິຓ຺ຓໍ ວາ ປໂຫຕິ, ອຸປມໍ ເຕ ກຣິສ຺ສາມິ, ອຎ຺ຊລິໍເຕ ປຄ຺ຄຓ຺ຫາມິ, ຕສ຺ສ ຜາສຸ, ໂລກສ຺ສ+ຕ຺ໂຖ, ນໂມ ເຕ ປຸຣິສາຊຎ຺ຎ, ໂສຕ຺ຖິ ຕສ຺ສ, ສມຕ຺ໂຖ ມລ຺ໂລ ມລ຺ລສ຺ສ, ຕສ຺ສ ຫິຕໍ, ຕສ຺ສ ສຸຂໍ, ສ຺ວາຄຕໍ ເຕ ມຫາຣາຊາຕິ ສພ຺ພຕ຺ຖ ສມ຺ພນ຺ເຘ ຉຏ຺ຐີ.
໒໖. ປຎ຺ຈມ຺ຍ+ວຘິສ຺ມາ
ປທຕ຺ຖາວຘິສ຺ມາ ປຎ຺ຈມີວິຠຕ຺ຕິ ໂຫຕິ.
ສເມປ຺ຍ+ປຄເມ ທ຺ວິນ຺ນໍ, ປຸພ຺ພຣູປາ ຍ+ທຈ຺ຈຸຕໍ;
ວຸຈ຺ຈເຕ ຕ+ທປາທານໍ, ຕໍ ຈລາຈລໂຕ ທ຺ວິຘາ;
ຍຖາ+ສ຺ສາ ຘາວຕາ ໂປໂສ, ປໂຕ, ຣຸກ຺ຂາຜລນ຺ຕິ ຈ.
ຕຕ຺ຖ ຈລາວຘິ ຘາວຕາ ອສ຺ສາ ປຸຣິໂສ ປຕຕິ, ອຈລາວຘິ ປພ຺ພຕາ ໂອຕຣນ຺ຕິ ວນຈາຣກາຕິ.
ຕຎ຺ຈ ອວຘິ ວິສຍກ຺ຣິຍາວິເສສສ຺ສ ນິທ຺ທິຏ຺ຐຕ຺ຕາ ນິທ຺ທິຏ຺ຐວິສຍໍ, ຍຕ຺ຖ ອປ ອປຄມນກ຺ຣິຍໍ ອຸປາຕ຺ຕໍ=ອຊ຺ຌາຫຏໍ ວິສຍໍ ກຕ຺ວາ ປວຕ຺ຕຕິ, ຕໍ ອຸປາຕ຺ຕໍ. ຍໍ ເກນຈິ ຄຸເຓນ ອຸກ຺ກໍສິຍຕິ, ຕໍ ອນຸເມຍ຺ຍໍ. ຍຖາ ຄາມາ ອເປນ຺ຕິ ມຸນໂຍ, ນຄຣາ ນິຄ຺ຄໂຕ ຣາຊາ, ປາປາ ຈິຕ຺ຕໍ ນິວາເຣນ຺ຕິ. ວລາຫກາ ວິຊ຺ໂຊຕເຕ, ກຸສຸລໂຕ ປຈຕີຕິ. ເອຕ຺ຖ ຈ ວຬາຫກາ ນິກ຺ຂມ຺ມ, ກຸສຸລໂຕ ອປເນຕ຺ວາຕິ ຈ ປຸພ຺ພກ຺ຣິຍາ ອຊ຺ຌາຫຣີຍຕິ. ມຖຸຣາ ປາຏລິປຸຕ຺ຕເກຫິ ອຠິຣູປາຕິ ອນຸມີຍຕິ. ວຸຕ຺ຕຎ຺ຫິ –
ນິທ຺ທິຏ຺ຐວິສຍໍ ກິຎ຺ຈິ, ອຸປາຕ຺ຕວິສຍໍ ຕຖາ;
ອນຸເມຍ຺ຍວິສຍຎ຺ເຈຕິ, ຕິຘາ+ຫຸ ອວຘິໍ ພຸຘາຕິ.
ຠຍເຫຕຸມ຺ຫິ-ໂຈຣາ ຠຍໍ ຊາຍຕິ, ຕຓ຺ຫາຍ ຊາຍຕິ ຠຍໍ, ປາປໂຕ ອຸຕ຺ຕສຕິ, ນຕ຺ຖິ ໂສໂກ ກຸໂຕ ຠຍໍ. ອກ຺ຂາຕຣິ-ອຸປຊ຺ຌາຍາ ສິກ຺ຂໍ ຄຓ຺ຫາຕິ, ອາຈຣິຍມ຺ຫາ ອຘີໂຕ ສຸຓາຕິ ວາ. ພຸທ຺ຘສ຺ມາ ປຣາເຊນ຺ຕິ ອຎ຺ຎຕິຕ຺ຖິຍາ, ປຣາຊິຕາ ຠວນ຺ຕີຕ຺ຍຕ຺ໂຖ. ຫິມວຕາ ປຠວຕິ ຄງ຺ຄາ, ອຈິຣວຕິຍາ ປຠວນ຺ຕິ ກຸນ຺ນທິໂຍ. ອຸຣສ຺ມາ ຊາໂຕ ປຸຕ຺ໂຕ, ກມ຺ມໂຕ ຊາຕໍ ອິນ຺ທ຺ຣິຍໍ, ອຸປຊ຺ຌາຍາ ອນ຺ຕຣຘາຍຕິ ສິສ຺ໂສ, ມາຕາປິຕູຫິ ອນ຺ຕຣຘາຣຍຕິ ປຸຕ຺ໂຕ, ນິລີຍຕີຕ຺ຍຕ຺ໂຖ. ທູຣຕ຺ຖໂຍເຄກີວທູໂຣ ອິໂຕ ນຬກາຣຄາໂມ, ຕໂຕ ຫເວ ທູຣຕຣໍ ວທນ຺ຕິ, ຄາມໂຕ ນາຕິທູເຣ, ອາຣກາ ເຕ ໂມຆປຸຣິສາ ອິມສ຺ມາ ຘມ຺ມວິນຍາ, ອາຣກາ ເຕຫິ ຠຄວາ ທູຣໂຕວ ນມສ຺ສນ຺ຕິ, ອທ຺ທສ ທູຣໂຕວ ອາຄຈ຺ຉນ຺ຕໍ. ອນ຺ຕິກຕ຺ຖໂຍເຄ-ອນ຺ຕິກໍ ຄາມາ, ອາສນ຺ນໍ ຄາມາ, ສມີປໍ ຄາມາ. ປຣິມາເຓ-ອິໂຕ ມຖຸຣາຍ ຈຕູສຸ ໂຍຊເນສຸ ສໍກສ຺ສໍ, ຣາຊຄຫໂຕ ປຎ຺ຈຈຕ຺ຕາລີສໂຍຊນມຕ຺ຖເກ ສາວຕ຺ຖິ. ກາລປຣິມາເຓ-ອິໂຕ ເອກນວຸຕິກປ຺ປມຕ຺ຖເກ, ອິໂຕ ວສ຺ສສຕສຫສ຺ສສ຺ສ ອຈ຺ຈເຍນ ພຸທ຺ໂຘ ໂລເກ ອຸປ຺ປຊ຺ຊິສ຺ສຕິ. ປາສາທາ ສໍກເມຍ຺ຍ, ປາສາທໍ ອຠິຣຸຫິຕ຺ວາ ສໍກເມຍ຺ຍາຕິ ອຕ຺ໂຖ, ຕຖາ ຫຕ຺ຖິກ຺ຂນ຺ຘາ ສໍກເມຍ຺ຍ, ອຠິຘມ຺ມາ ປຸຈ຺ຉນ຺ຕິ, ອຠິຘມ຺ມໍ ສຸຕ຺ວາຕິ ອຕ຺ໂຖ, ອາສນາ ວຸຏ຺ຐເຫຍ຺ຍ. ທິສຕ຺ຖວາຈີຫິ ໂຍເຄ-ອິໂຕ ສາ ປຸຣິມາ ທິສາ, ອິໂຕ ສາ ທກ຺ຂິຓາ ທິສາ, ອວີຈິໂຕ ຍາວ ຠວຄ຺ຄໍ, ອຸທ຺ຘໍ ປາທຕລາ, ອໂຘ ເກສມຕ຺ຖກາ. ວິຠຊເນ-ຍໂຕ ປຓີຕຕໂຣ ວາ ວິສິຏ຺ຐຕໂຣ ວາ ນຕ຺ຖິ, ອຕ຺ຕທນ຺ໂຕ ຕໂຕ ວຣໍ, ກິຎ຺ຈາປິ ທານໂຕ ສີລໍ ວຣໍ, ຕໂຕ ມຍາ ພຫຸຕຣໍ ສຸຕໍ, ສີລເມວ ສຸຕາ ເສຍ຺ໂຍ. ອາຣຕິປ຺ປໂຍເຄ-ອາຣຕິ ວິຣຕິ ປາປາ, ປາຓາຕິປາຕາ ເວຣມຓິ, ອທິນ຺ນາທານາ ປຏິວິຣໂຕ, ອປ຺ປຏິວິຣຕາ ມຸສາວາທາ. ສຸທ຺ຘຕ຺ຖໂຍເຄ-ໂລຠນີເຍຫິ ຘມ຺ເມຫິ ສຸທ຺ໂຘ, ມາຕຸໂຕ ຈ ປິຕຸໂຕ ຈ ສຸທ຺ໂຘ ອນຸປກ຺ກຸຏ຺ໂຐ. ປໂມຈນຕ຺ຖໂຍເຄ-ປຣິມຸຕ຺ໂຕ ທຸກ຺ຂສ຺ມາຕິ ວທາມິ, ມຸຕ຺ໂຕ+ສ຺ມິ ມາຣພນ຺ຘນາ, ນ ເຕ ມຸຈ຺ຈນ຺ຕິ ມຈ຺ຈຸນາ, ມຸຕ຺ໂຕ+ຫໍ+ສພ຺ພປາເສຫິ. ວິເວຈເນ-ວິວິຈ຺ເຈວ ກາເມຫິ, ວິວິຈ຺ຈ ອກຸສເລຫິ ຘມ຺ເມຫິ. ປມາຓຕ຺ເຖ-ອາຍາມໂຕ ຈ ວິຕ຺ຖາຣໂຕ ຈ ໂຍຊນໍ, ຄມ຺ຠີຣໂຕ ຈ ປຸຖຸລໂຕ ຈ ໂຍຊນໍ ຈນ຺ທຠາຄາຍ ປຣິມາຓໍ, ປຣິກ຺ເຂປໂຕ ນວໂຍຊນສຕປຣິມາໂຓ ມຊ຺ຌິມເທໂສ. ປຸພ຺ພາທິໂຍເຄ-ປຸພ຺ເພວ ເມ ຠິກ຺ຂເວ ສມ຺ໂພຘາ, ອິໂຕ ປຸພ຺ເພ ນາໂຫສິ, ຕໂຕ ປຣໍ ປຈ຺ຈນ຺ຕິມາ ຊນປທາ, ຕໂຕ ອປເຣນ ສມເຍນ. ປຎ຺ເຫ-ກຸໂຕ+ສິ ຕ຺ວໍ, ກຸໂຕ ຠວໍ, ປາຏລິປຸຕ຺ຕໂຕ. ກິຈ຺ຉາ ລທ຺ຘນ຺ຕິ ຄຸເຓ ປຎ຺ຈມີ, ກິຈ຺ເຉນ ເມ ອຘິຄຕນ຺ຕິ ເຫຕຸມ຺ຫິ ກຣເຓ ວາ ຕຕິຍາ, ເອວໍ ໂຖກາ ມຸຕ຺ໂຕ, ໂຖເກນ ມຸຕ຺ໂຕຕິ.
ກຖໍ ‘‘ໂຖກໍ ຈລຕີ’’ຕິ, ກ຺ຣິຍາວິເສສເນ ກມ຺ມນິ ທຸຕິຍາ, ໂຖກໍ ຈລນໍ ກໂຣຕີຕ຺ຍຕ຺ໂຖ, ໂຖກນ຺ຕິ ຈລນກ຺ຣິຍາຍ ວິເສສນຕ຺ຕາ ກ຺ຣິຍາວິເສສນໍ.
ກ຺ຣິຍາວິເສສນໍ ນາມ, ກມ຺ມຕ຺ເຕ+ກຕ຺ຕສຓ຺ຐິຕາ;
ນ຺ຍາຍສິທ຺ຘໍ ຍໂຕ ຕສ຺ມາ, ຕທຕ຺ຖໍ ນ ວິສຸໍ ວິຘິ.
ນ຺ຍາຍສິທ຺ຘໍວ=ຈລນນ຺ຕິ ຍສ຺ມາ ຠາເວ ອໂນ, ຕສ຺ມາ ຠາວສ຺ເສ+ກຕ຺ຕາ ເອກວຈນນ຺ຕິ ຎາຍາ ເອກຕ຺ຕຎ຺ຈ, ຠາເວ ອນຕ຺ຕາ ນປຸໍສກຕ຺ຕຎ຺ຈ, ກໂຣຕິກ຺ຣິຍາຍ ສມ຺ພນ຺ເຘນ ກມ຺ມຕ຺ຕຎ຺ຈ ສິຊ຺ຌຕີຕິ. ກຣ+ຠູຘາຕໂວ ຈ –
ກາຣິຍຣູປາຠິຘາຕ຺ວຕ຺ຖາ, ສພ຺ເພ ສຕ຺ຕາຍ ຍຸຊ຺ຊເຣ;
ຕໂຕ ກ຺ຣິຍາ ຈ ຠາໂວ ຈ, ສາມຎ຺ຎໍ ເຕສຸ ຄມ຺ຍເຕ –
ຕິ ວຸຕ຺ຕຕ຺ຕາ ຍຸຊ຺ຊນ຺ຕິ.
ໂຖກຕ຺ເຖ-ໂຖກາ ມຸຈ຺ຈຕິ. ສພ຺ພຕ຺ຖ ສວິສເຍ ປຎ຺ຈມີ. ເອຕ຺ຖ ‘‘ວິວກ຺ຂາ ໂລກິກາ ສາ ຈ, ນ ສກ຺ກາ ອນິວຕ຺ຕິຕຸໍ’’ຕິ ວຸຕ຺ຕຕ຺ຕາ ອນິຏ຺ຐປ຺ປສງ຺ໂຄ ນ ສິຍາ. ມຣິຍາທາຍໍ-ອາປພ຺ພຕາ ເຂຕ຺ຕໍ. ອຠິວິຘິມ຺ຫິ-ອາພ຺ຣຫ຺ມໂລກາ ສທ຺ໂທ ອພ຺ຠຸຄ຺ຄຈ຺ຉຕິ, ປພ຺ພຕໍ ວຊ຺ເຊຕ຺ວາ, ພ຺ຣຫ຺ມໂລກມ຺ຫິ ພ຺ຍາເປຕ຺ວາຕິ ຈ ອຕ຺ໂຖ. ເອຕ຺ຖ ວຊ຺ຊມານສີມາ ມຣິຍາທາ, ຄຍ຺ຫມານສີມາ ອຠິວິຘິ.
໒໗. ອປປຣີຫິ ວຊ຺ຊເນ
ວຊ຺ຊເນ ວຕ຺ຕມາເນຫີ ອປປຣີຫິ ໂຍເຄ ປຎ຺ຈມີ ໂຫຕິ. ອປສາລາຍ ອາຍນ຺ຕິ ວາຓິຊາ, ປຣິສາລາຍ ອາຍນ຺ຕິ ວາຓິຊາ, ສາລໍ ວຊ຺ເຊຕ຺ວາຕິ ອຕ຺ໂຖ.
໒໘. ປຏິນິຘິປຕິທາເນສຸ ປຕິນາ
ປຏິນິຘິມ຺ຫິ ປຕິທາເນ ຈ ວຕ຺ຕມາເນນ ປຕິນາ ໂຍເຄ ນາມສ຺ມາ ປຎ຺ຈມີ ໂຫຕິ. ພຸທ຺ຘສ຺ມາ ປຕິ ສາຣິປຸຕ຺ໂຕ, ຆຕ+ມສ຺ສ ເຕລສ຺ມາ ປຕິ ທທາຕິ.
໒໙. ຣິເຕ ທຸຕິຍາ ຈ
ຣິເຕສທ຺ທໂຍເຄ ນາມສ຺ມາ ທຸຕິຍາ ໂຫຕິ ປຎ຺ຈມີ ຈ. ຣິເຕ ສທ຺ຘມ຺ມາ, ຣິເຕ ສທ຺ຘມ຺ມໍ.
໓໐. ວິນາ+ຎ຺ຎຕ຺ຣ ຕຕິຍາ ຈ
ວິນາ+ຎ຺ຎຕ຺ຣໂຍເຄ ນາມສ຺ມາ ຕຕິຍາ ທຸຕິຍາ ປຎ຺ຈມີ ຈ. ວິນາ ວາເຕນ, ວິນາ ວາຕໍ, ວິນາ ວາຕສ຺ມາ. ອຎ຺ຎຕ຺ຣ ເອເກນ ປິຓ຺ຑປາຕນີຫາຣເກນ, ອຎ຺ຎຕ຺ຣ ຘມ຺ມໍ, ອຎ຺ຎຕ຺ຣ ຘມ຺ມາ.
໓໑. ປຸຖນານາຫິ
ເອເຕຫິ ໂຍເຄ ຕຕິຍາ ໂຫຕິ ປຎ຺ຈມີ ຈ. ຠິນ຺ນໂຍຄກຣຓໍ ທຸຕິຍານິວຕ຺ຕນຕ຺ຖໍ. ປຸຖເຄວ ຊເນນ, ປຸຖເຄວ ຊນສ຺ມາ, ຊເນນ ນານາ, ຊນສ຺ມາ ນານາ.
໓໙. ຉຏ຺ຐີ ສມ຺ພນ຺ເຘ
ສມ຺ພນ຺ເຘ ຉຏ຺ຐີ ໂຫຕິ. ຣຎ຺ໂຎ ປຸຣິໂສຕິ ວຸຕ຺ເຕ ຍສ຺ມາ ຣາຊາ ທທາຕິ, ປຸຣິໂສ ຄຓ຺ຫາຕິ, ຕສ຺ມາ ຣາຊປຸຣິໂສຕິ ວິຎ຺ຎາຍຕິ. ເອວເມວ ໂຍ ຍສ຺ສ ອາຍຕ຺ໂຕ ເສວກາທິຠາເວນ ຠຓ຺ຑຠາເວນ ວາ ສມີປ+ສມູຫາ+ວຍວ+ວິກາຣ+ກາຣິຍ+ອວຕ຺ຖາ+ຊາຕິ+ຄຸຓ+ກ຺ຣິຍາທິວເສນ ວາ, ຐານີວເສນ ວາ, ອາຄມີວເສນ ວາ, ໂສ ຕິວິໂຘປິ ອຕ຺ໂຖ ສມ຺ພນ຺ໂຘ ນາມ. ວຸຕ຺ຕຎ຺ຫິ –
ກ຺ຣິຍາກາຣກສຎ຺ຊາໂຕ, ອສ຺ເສ+ທໍຠາວເຫຕຸໂກ;
ສມ຺ພນ຺ໂຘ ນາມ ໂສ ອຕ຺ໂຖ, ຕຕ຺ຖ ຉຏ຺ຐີ ວິຘີຍເຕ.
ປາຣຕນ຺ຕ຺ຍຎ຺ຫິ ສມ຺ພນ຺ໂຘ, ຕຕ຺ຖ ຉຏ຺ຐີ ຠເວ ຕິໂຕ;
ອຸປາຘິ+ຐານ຺ຍາ+ຄມິໂຕ, ນ ວິເສສ຺ສາທິໂຕ ຕິໂຕຕິ.
ອຸປາຘິສງ຺ຂາຕວິເສສນໂຕ ຕາວ-ຣຎ຺ໂຎ ປຸຣິໂສ. ເອຕ຺ຖ ຈ ພ຺ຣາຫ຺ມຓາທິສາມິໂຕ ນິວຕ຺ເຕຕີຕິ ຣາຊາ ວິເສສນໍ, ປຸຣິໂສ ເຕນ ວິເສສິຍຕີຕິ ວິເສສ຺ໂສ. ຠຓ຺ຑສມ຺ພນ຺ຘໂຕ-ປຫຸຕໍ ເມ ຘນໍ ສກ຺ກ, ເອກສ຺ສ ປຏິວີໂສ, ຠິກ຺ຂຸສ຺ສ ປຕ຺ຕຈີວຣໍ. ສມີປໂຕ-ອມ຺ພວນສ຺ສ ອວິທູເຣ, ນິພ຺ພານສ຺ເສວ ສນ຺ຕິເກ. ສມູເຫ-ສຸວຓ຺ຓສ຺ສ ຣາສິ, ຠິກ຺ຂູນໍ ສມູໂຫ. ອວຍເວ-ມນຸສ຺ສສ຺ເສວ ເຕ ສີສໍ, ຣຸກ຺ຂສ຺ສ ສາຂາ. ວິກາເຣ-ສຸວຓ຺ຓສ຺ສ ວິກຕິ, ຠຏ຺ຐຘຎ຺ຎານໍ ສຕ຺ຕຸ. ກາຣິເຍ-ຍວສ຺ສ ອງ຺ກຸໂຣ, ເມຆສ຺ສ ສທ຺ໂທ, ປຸຕ຺ຕາປິ ຕສ຺ສ ພຫໂວ, ກມ຺ມານໍ ຜລໍ ວິປາໂກ. ອວຕ຺ຖາຍໍ-ຂນ຺ຘານໍ ປາຕຸຠາໂວ, ຊຣາ, ເຠໂທ ວາ. ຊາຕິຍໍ-ມນຸສ຺ສສ຺ສ ຠາໂວ, ມນຸສ຺ສານໍ ຊາຕິ. ຄຸເຓ-ສຸວຓ຺ຓສ຺ສ ວຓ຺ໂຓ, ວຓ຺ໂຓ ນ ຂີເຍຖ ຕຖາຄຕສ຺ສ ພຸທ຺ຘສ຺ສ ຄຸຓໂຆໂສ, ປຸປ຺ຜານໍ ຄນ຺ໂຘ, ຜລານໍ ຣໂສ, ຈິຕ຺ຕສ຺ສ ຜຸສນາ, ສິປ຺ປິການໍ ສຕໍ ນຕ຺ຖິ, ຕິລານໍ ມຸຏ຺ຐິ, ເຕສໍ ສມາໂຍໂຄ, ສນ຺ຘິໂນ ວິໂມກ຺ໂຂ, ຕຖາຄຕສ຺ສ ປຎ຺ຎາປາຣມິໍ ອາຣພ຺ຠ, ສຸຂໍ ເຕ, ທຸກ຺ຂໍ ເຕ, ເຈຕໂສ ປຣິວິຕກ຺ໂກ ອຸທປາທິ, ປຎ຺ຎາຍ ປຏຸຠາໂວ, ຣູປສ຺ສ ລຫຸຕາ, ມຸທຸຕາ ວາ, ອຸປຈໂຍ ວາ. ກ຺ຣິຍາສມ຺ພນ຺ເຘ-ປາທສ຺ສ ອຸກ຺ເຂປນໍ, ອວກ຺ເຂປນໍ ວາ, ຫຕ຺ຖສ຺ສ ສມິຎ຺ຊນໍ, ທານໍ, ປສາຣຓໍ, ຘາຕູນໍ ຄມນໍ, ຐານໍ, ນິສຊ຺ຊາ, ສຍນໍ ວາ, ຕຖາຄຕສ຺ສ ນາມໂຄຕ຺ຕາທິ, ຕສ຺ສ ກາຣຓໍ, ຕສ຺ສ ມາຕາປິຕໂຣ, ຕສ຺ສ ປຸຣໂຕ ປາຕຸຣໂຫສິ, ນຄຣສ຺ສ ທກ຺ຂິຓໂຕ, ວສ຺ສານໍ ຕຕິເຍ ມາເສ, ນ ຕສ຺ສ ອຸປມາ, ກຸເວຣສ຺ສ ພລິ ອິຈ຺ຈາທິ. ອປິ ຈ –
ຄາວສ຺ສ ຊາຕິ, ຘວໂລ, ຄຕິ, ສິງ຺ຄໍ, ນາມນ຺ຕິ+ຘ;
ທພ຺ພສ຺ສາປິ ຈ ຊາຕ຺ຍາທິ, ວິເສສ຺ສາ ໂຫນ຺ຕິ ກາມໂຕ.
ໂຄຕ຺ຕຎ຺ຈ ສພໂລທິສ຺ສ, ປາກ+ມນ຺ນສ຺ສ ສຸກ຺ກຕາ;
ປຏສ຺ສ, ສິງ຺ຄໍເມຓ຺ຑສ຺ສ, ນາ+ຎ຺ເຎສໍຕິ ວິເສສ຺ສເຕ.
ຐານິໂຕ-ຍຸວຓ຺ຓານ+ເມໂອ ລຸຕ຺ຕາ. ອາຄມິໂຕ-ສຸຎ ສສ຺ສ. ສາມິໂຍເຄ-ເທວານ+ມິນ຺ໂທ, ມິຄານໍ ຣາຊາ. ຣຸຊາທິໂຍເຄ-ເທວທຕ຺ຕສ຺ສ ຣຸຊຕິ, ຕສ຺ສ ໂຣໂຄ ອຸປ຺ປຊ຺ຊິ, ມຫາເສນາປຕີນໍ ອຸຊ຺ຌາເປຕພ຺ພໍ, ຣຊກສ຺ສ ວຕ຺ຖໍ ທທາຕິ, ມຸສາວາທສ຺ສ ໂອຕ຺ຕປ຺ປໍ ອິຈ຺ຈາທິ. ຍຊສ຺ສ ໂຍເຄ-ປຸປ຺ຜສ຺ສ ພຸທ຺ຘສ຺ສ ຍຊຕິ, ປຸປ຺ເຜນາຕ຺ຍຕ຺ໂຖ. ເອວໍ ຆຕສ຺ສ ອຄ຺ຄິໍ ຊຸຫຕິ. ສຸຫິຕຕ຺ເຖ-ປຕ຺ຕໍ ໂອທນສ຺ສ ປູເຣຕ຺ວາ, ປູຣໍ ນານາປກາຣສ຺ສ ອສຸຈິໂນ, ປູຣໍ ຫິຣຎ຺ຎສຸວຓ຺ຓສ຺ສ, ປູຣຕິ ພາໂລ ປາປສ຺ສ. ກິຕກປ຺ປໂຍເຄ-ພຫຸລໍວິຘານາ ຉຏ຺ຐີ, ຣຎ຺ໂຎ ສມ຺ມໂຕ, ປູຊິໂຕ, ສກ຺ກໂຕ, ອປຈິໂຕ, ມານິໂຕ ວາ, ອມຕໍ ເຕສໍ ຠິກ຺ຂເວ ອປຣິຠຸຕ຺ຕໍ, ເຍສໍ ກາຍຄຕາ ສຕິ ອປຣິຠຸຕ຺ຕາ, ສາຘຸສມ຺ມໂຕ ພຫຸຊນສ຺ສ, ສຸປ຺ປຏິວິທ຺ຘາ ພຸທ຺ຘານໍ ຘມ຺ມຘາຕຸ, ຘມ຺ມສ຺ສ ຄຸຕ຺ໂຕ ເມຘາວີ. ກມ຺ມຕ຺ເຖ-ຕສ຺ສ ຠວນ຺ຕິ ວຕ຺ຕາໂຣ, ສຫສາ ກມ຺ມສ຺ສ ກຕ຺ຕາໂຣ, ອມຕສ຺ສ ທາຕາ, ຠິນ຺ນານໍ ສນ຺ຘາຕາ, ສຫິຕານໍ ອນຸປ຺ປທາຕາ, ໂພເຘຕາ ປຊາຍ, ກມ຺ມສ຺ສ ກາຣໂກ ນຕ຺ຖິ, ວິປາກສ຺ສ ຈ ເວທໂກ, ອວິສໍວາທໂກ ໂລກສ຺ສ, ຈຕຸນ຺ນໍ ມຫາຠູຕານໍ ອຸປາທາຍ ປສາໂທ. ສຣຕິ+ຈ຺ຉາໂຍເຄ-ມາຕຸ ສຣຕິ, ນ ເຕສໍ ໂກຈິ ສຣຕິ, ສຕ຺ຕານໍ ກມ຺ມປຈ຺ຈຍາ, ປຸຕ຺ຕສ຺ສ ອິຈ຺ຉຕິ. ກໂຣຕິສ຺ສ (ໂຍເຄ) – ອຸທກສ຺ສ ປຕິກຸຣຸເຕ, ກຓ຺ຑສ຺ສ ປຕິກຸຣຸເຕ, ອຠິສງ຺ຂໂຣຕີຕ຺ຍຕ຺ໂຖ. ປຎ຺ຈມິຍຕ຺ເຖ ປຣິຫານິຠຍຕ຺ຖໂຍເຄປິ ຉຏ຺ຐີ, ອສ຺ສວນຕາຍ ຘມ຺ມສ຺ສ ປຣິຍາຍນ຺ຕິ, ກິນ຺ນຸ ໂຂ ອຫໍ ຕສ຺ສ ສຸຂສ຺ສ ຠາຍາມິ, ສພ຺ເພ ຕສນ຺ຕິ ທຓ຺ຑສ຺ສ, ສພ຺ເພ ຠາຍນ຺ຕິ ມຈ຺ຈຸໂນ, ຠີໂຕ ຈຕຸນ຺ນໍ ອາສີວິສານໍ ໂຆຣວິສານໍ ອິຈ຺ຈາທິ.
໔໐. ຕຸລ຺ຍຕ຺ເຖນ ວາ ຕຕິຍາ
ຕຸລ຺ຍຕ຺ເຖນ ໂຍເຄ ວາ ຉຏ຺ຐີ ໂຫຕິ ຕຕິຍາ ຈ. ປິຕຸ ຕຸລ຺ໂຍ, ປິຕຣາ ວາ, ມາຕຸ ຕຸລ຺ໂຍ, ມາຕຣາ ວາ.
໓໒. ສຕ຺ຕມ຺ຍາ+ຘາເຣ
ກຕ຺ຕຸກມ຺ມຏ຺ຐານໍ ນິສຊ຺ຊ+ປຈນາທິກ຺ຣິຍານໍ ໂຍ ອາຘາໂຣ, ຕໍ ອາຘາຣກາຣກໍ ນາມ. ກຖໍ ກເຏ ນິສີທຕິ ເທວທຕ຺ໂຕ, ຖາລິຍໍ ໂອທນໍ ປຈຕິ, ເທວທຕ຺ຕ+ຕຓ຺ຑຸລານໍ ກຕ຺ຕຸ+ກມ຺ມານໍ ຘາຣຓໂຕ ຕທຏ຺ຐອາສນ+ປຈນກ຺ຣິຍໍ ກຏ+ຖາລິໂຍ ຘາເຣນ຺ຕິ ນາມ, ຕສ຺ມິໍ ສຕ຺ຕມີວິຠຕ຺ຕິ ໂຫຕິ.
ໂສ ພ຺ຍາປິໂກ, ໂອປສິເລສິໂກ, ເວສຍິໂກ, ສາມີປິໂກຕິ ຈຕຸພ຺ພິໂຘ. ຕຕ຺ຖ ໂຍ ອາເຘຍ຺ຍສ຺ສ ນິສ຺ເສສາຘາຣຠູໂຕ, ໂສ ພ຺ຍາປິໂກ, ຍຖາ ຕິເລສຸ ເຕລໍ ອຕ຺ຖິ, ຂີເຣສຸ ຊລໍ, ທຘິມ຺ຫິ ສປ຺ປິ. ປຈ຺ເຈກສິທ຺ຘານໍ ຠາວານໍ ຍໍ ອາເຘຍ຺ຍຠາເວນ ອຸປສິເລສນໍ ອລ຺ລີຍນໍ ອຕ຺ຖິ, ໂສ ໂອປສິເລສິໂກ. ຍຖາ ອາສເນ ນິສິນ຺ໂນ ສງ຺ໂຆ, ຖາລິຍໍ ໂອທນໍ ປຈຕິ, ຆເຏ ອຸທກ+ມຕ຺ຖິ, ທູເຣ ຐິໂຕ, ສມີເປ ຐິໂຕ. ຍຕ຺ຖ ສມີເປ ສມີປີໂວຫາຣໍ ກຕ຺ວາ ຕທາຍຕ຺ຕຕາທີປນຕ຺ຖໍ ອາຘາຣຠາໂວ ອຸປຈຣີຍຕິ, ຕໍ ສາມີປິກໍ, ຍຖາ ຄງ຺ຄາຍໍ ໂຆໂສ, ຄງ຺ຄາຍ ສມີເປ ວໂຊຕ຺ຍຕ຺ໂຖ. ສາວຕ຺ຖິຍໍ ວິຫຣຕິ ເຊຕວເນ. ຍຕ຺ຖ ອຎ຺ຎຖາຠາວວເສນ ເທສນ຺ຕຣາວຈ຺ເຉທວເສນ ວາ ອາຘາຣປຣິກປ຺ໂປ, ໂສ ເວສຍິໂຕ. ຍຖາ ອາກາເສ ສກຸຓາ ຈຣນ຺ຕິ, ຠູມິຍໍ ມນຸສ຺ສາ, ຊເລ ມຈ຺ຉາ, ປາສາເທສຸ ປຕິໂຕ, ປາປສ຺ມິໍ ຣມຕີ ມໂນ, ປສນ຺ໂນ ພຸທ຺ຘສາສເນ, ປຎ຺ຎາຍ ສາຘຸ, ວິນເຍ ນິປຸໂຓ, ມາຕຣິ ສາຘຸ, ປິຕຣິ ນິປຸໂຓ.
ກິຣິຍາ ກຕ຺ຕຸ+ກມ຺ມຏ຺ຐາ, ອາຘາຣີຍຕິ ເຍນ ໂສ;
ອາຘາໂຣ ຈຕຸຘາ ວຸຕ຺ໂຕ, ພ຺ຍາປກາທິປ຺ປເຠທໂຕ.
ພ຺ຍາປໂກ ຕິລຂີຣາທິ, ກໂຏ ໂອປສິເລສິໂກ;
ສາມີປິໂກ ຕຸ ຄງ຺ຄາທິ, ອາກາໂສ ວິສໂຍ ມໂຕ.
໓໓. ນິມິຕ຺ເຕ
ນິມິຕ຺ຕຕ຺ເຖ ສຕ຺ຕມີ ໂຫຕິ. ອຊິນມ຺ຫິ ຫຎ຺ຎເຕ ທີປິ, ກຸຎ຺ຊໂຣ ທນ຺ເຕສຸ ຫຎ຺ຎເຕ, ອຓຸມຕ຺ເຕສຸ ວຊ຺ເຊສຸ ຠຍທສ຺ສາວີ, ສມ຺ປຊານມຸສາວາເທ ປາຈິຕ຺ຕິຍໍ. ສພ຺ພຕ຺ຖ ນິມິຕ຺ຍຕ຺ໂຖ.