໑໑໘. ອສໍຂ຺ເຍຫິ ສພ຺ພາສໍ

ອວິຊ຺ຊມານສໍຂ຺ເຍຫິ ປຣາສໍ ສພ຺ພາສໍ ວິຠຕ຺ຕີນໍ ໂລໂປ ໂຫຕິ. ນ ສນ຺ຕິ ເອກວຈນາທິສໍຂ຺ຍາ ເອເຕສນ຺ຕິ ອສໍຂ຺ຍາ, ເຕສໍ ອສໍຂ຺ຍານໍ ວິຠຕ຺ຕີນໍ ເຠເທ ອສຕິປິ ສ຺ຍາທິວິຘານໍ ‘‘ມາ ໂນ ອຊ຺ຊ ວິກນ຺ຕິໍສູ’’ຕິອາໂທ ວິຠຕ຺ຍນ຺ຕຕ຺ຕາ ປທຕ຺ຕສິທ຺ຘີຕິ ໂວ+ໂນອາທີນໍ ສິທ຺ຘິຍາ ຈ ເຕສໍ ປຐມາທິອຕ຺ເຖ ທສ຺ສນໂຕ ຈ ໂຫຕິ. ປຫາໂຣ ປຣາຠໂວ ອປຫາໂຣ ສໍຫາໂຣ ອວຫາໂຣ ໂອຫາໂຣ ອິຈ຺ຈາທິ ໂຫຕິ.

ອຸເປຈ຺ຈ+ຕ຺ຖໍ ສຊນ຺ຕີຕິ, ອຸປສຄ຺ຄາ ຫິ ປາທໂຍ;

ຈາທີ ປທາທິມຊ຺ຌນ຺ເຕ, ນິປາຕາ ນິປຕນ຺ຕີຕິ.

ໂອປສຄ຺ຄິກປທໍ.

ສມຸຈ຺ຈຍ+ວິກປ຺ປນ+ປຏິເສຘ+ປູຣຓາທິອຕ຺ຖໍ ອສຕ຺ຕວາຈິກໍ ເນປາຕິກໍ.

ຈ-ອິຕິ ສມຸຈ຺ຈຍາ+ນ຺ວາຈຍ+ອິຕເຣຕຣໂຍຄ+ສມາຫາຣາ+ວຘາຣຓາທີສຸ. ວາ-ອິຕິ ວິກປ຺ປນຸ+ປມານ+ສມຸຈ຺ຈຍ+ວວຕ຺ຖິຕວິຠາສາທີສຸ. ນ, ໂນ, ມາ, ອ, ອລໍ, ຫລໍ ອິຈ຺ເຈເຕ ປຏິເສເຘ. ‘‘ທ຺ເວ ປຏິເສຘາ ປກຕິອຕ຺ຖໍ ຄມຍນ຺ຕີ’’ຕິ ຎາຍາ ‘‘ນ ເຕສໍ ປນ ຣູປານໍ ປຈ຺ຈຍາ ນ ຈ ໂຫນ຺ຕີ’’ຕິ ເອຕ຺ຖ ນ ຈ ນ ໂຫນ຺ຕິ-ໂຫນ຺ເຕວາຕິ ປກຕິອຕ຺ຖໍ ຄມຍຕິ. ອລໍ ປຣິຍຕ຺ຕິ+ຠູສເນສຸ ຈ.

ປູຣຓຕ຺ຖໍ ທຸວິຘໍ ອຕ຺ຕປູຣຓໍ ປທປູຣຓຎ຺ຈ, ຕຕ຺ຖ ອຖ, ຂລຸ, ວຕ, ອໂຖ, ອສ຺ສຸ, ຍຄ຺ເຆ, ຫິ, ຈຣຫິ, ນໍ, ຕໍ, ຈ, ຕຸ, ວາ, ໂວ, ປນ, ຫເວ, ກີວ, ຫ, ຕໂຕ, ຍຖາ, ສຸທໍ, ໂຂ, ເວ, ຫໍ, ເອນໍ, (ເອວໍ, ຣູ) ເສຍ຺ຍຖິທໍ ອິຈ຺ເຈວມາທິ ປທປູຣເຓ. ຕຕ຺ຖ ອຖ-ອິຕິ ປຎ຺ຫາ+ນນ຺ຕຣິຍາ+ຘິກາຣາທີສຸ ຈ. ຂລຸ-ອິຕິ ປຏິເສຘາ+ວຘາຣຓ, ປສິທ຺ຘີສຸ ຈ. ວຕ+ອິຕິ ເອກໍສ, ເຂທາ+ນຸກມ຺ປ, ສໍກປ຺ເປສຸ ຈ. ອໂຖ-ອິຕິ ອນ຺ວາເທເສ ຈ. ຫິ-ອິຕິ ເຫຕຸ, ອວຘາຣເຓສຸ ຈ. ຕຸ-ອິຕິ ວິເສສ, ເຫຕຸ, ນິວຕ຺ຕນາທີສຸ ຈ. ປນ-ອິຕິ ວິເສເສປິ. ຫເວ+ເວ ອິຈ຺ເຈເຕ ເອກໍສຕ຺ເຖປິ. ຫໍ-ວິສາທ, ວິມ຺ເຫສຸປິ. (ວິສາທ, ສມ຺ຠເວສຸ, ຣູ). ເສຍ຺ຍຖິທໍຕິ ຕໍ ກຕມໍຕິ ອຕ຺ເຖປິ.

ອຕ຺ຖປູຣຓໍ ທຸວິຘໍ ວິຠຕ຺ຕິຍຸຕ຺ຕໍ ອວິຠຕ຺ຕິຍຸຕ຺ຕຎ຺ຈ. ອຕ຺ຖິ, ສກ຺ກາ, ລພ຺ຠາ ອິຈ຺ເຈເຕ ປຐມາຍໍ. ອາວຸໂສ ອມ຺ໂຠ ຫມ຺ໂຠ ອເຣ ຫເຣ ເຣ ເຊ ອິຈ຺ເຈເຕ ອາມນ຺ຕເຓ. ທິວາ ຠິຍ຺ໂຍ (ນໂມ, ຣູ) ອິຈ຺ເຈເຕ ປຐມາທຸຕິຍາສຸ. ສຍໍ ສາມໍ ສໍ ສມ຺ມາ ກິນ຺ຕິ ອິຈ຺ເຈເຕ ຕຕິຍຕ຺ເຖ. ໂສ+ໂຕ+ຘາປຈ຺ຈຍນ຺ຕາ ຈ ສຸຕ຺ຕໂສ ປທໂສ ອນິຈ຺ຈໂຕ ທຸກ຺ຂໂຕ ເອກຘາ ທ຺ວິຘາ ອິຈ຺ຈາທິ. ຕເວ+ຕຸໍ ປຈ຺ຈຍນ຺ຕາ ຈຕຸຕ຺ຖິຍາວ, ກາຕເວ ທາຕເວ, ກາຕຸໍ ກາເຣຕຸໍ, (ທາຕຸໍ, ຣູ) ທາເປຕຸໍ ອິຈ຺ຈາທິ. ໂສ+ໂຕປຈ຺ຈຍນ຺ຕາ ປຎ຺ຈມິຍຕ຺ເຖ, ທີຆໂສ ໂອຣໂສ ຣາຊໂຕ ວາ ໂຈຣໂຕ ວາ ອິຈ຺ຈາທິ. ໂຕ ສຕ຺ຕ- ມ຺ຍຕ຺ເຖປິ ຕ຺ຣ+ຕ຺ຖາທິປຈ຺ຈຍນ຺ຕາ ຈ, ເອກໂຕ ປຸຣໂຕ ປຈ຺ຉໂຕ ປສ຺ສໂຕ ປິຏ຺ຐິໂຕ ປາທໂຕ ສີສໂຕ ອຄ຺ຄໂຕ ມູລໂຕ, ຍຕ຺ຣ ຍຕ຺ຖ ຍຫິໍ ຕຕ຺ຣ ຕຕ຺ຖ ຕຫິໍ ອິຈ຺ຈາທິ. ສມນ຺ຕາ ສາມນ຺ຕາ ປຣິໂຕ ອຠິໂຕ ສມນ຺ຕໂຕ ເອກຊ຺ຌໍ ເອກມນ຺ຕໍ ເຫຏ຺ຐາ ອຸປຣິ ອຸທ຺ຘໍ ອໂຘ ຕິຣິຍໍ ສມ຺ມຸຂາ ປຣມຸຂາ ອາວິ ຣໂຫ ຕິໂຣ ອຸຈ຺ຈໍ ນີຈໍ ອນ຺ໂຕ ອນ຺ຕຣາ ອນ຺ຕຣໍ ອຊ຺ຌຕ຺ຕໍ ພຫິທ຺ຘາ ພາຫິຣາ ພາຫິຣໍ ພຫິ ໂອຣໍ ປາຣໍ ອາຣາ ອາຣກາ ປຈ຺ຉາ ປຸເຣ ຫຸຣໍ ເປຈ຺ຈ ອິຈ຺ເຈເຕ ສຕ຺ຕມິຍາ. ສມ຺ປຕິ ອາຍຕິ ອຊ຺ຊ ອປຣຊ຺ຌ ສຸເວ ສ຺ເວ ອຸຕ຺ຕຣສຸເວ (ກິສຸ, ຣູ) ຫິຍ຺ໂຍ ປເຣ (ປຣສຸເວ, ຣູ) ສຊ຺ຊຸ ສາຍໍ ປາໂຕ ກາລໍ ກລ຺ລໍ ທິວາ ຣຕ຺ຕໍ ນິຈ຺ຈໍ ສຕຕໍ ອຠິຓ຺ຫໍ ອຠິກ຺ຂຓໍ ມຸຫຸໍ ມຸຫຸຕ຺ຕໍ ຠູຕປຸພ຺ພໍ ປຸຣາ ຍທາ ຕທາ (ກທາ, ຣູ) ອິຈ຺ຈາທໂຍ ກາລສຕ຺ຕມິຍໍ. ອິຕິ ວິຠຕ຺ຕິຍຸຕ຺ຕານິ.

ອວິຠຕ຺ຕິຍຸຕ຺ເຕສຸ ອປ຺ເປວ ອປ຺ເປວນາມ ນຸ ອິຈ຺ເຈເຕ ສໍສຍຕ຺ເຖ. ອທ຺ຘາ ອຎ຺ຎທຕ຺ຖຸ ຕຄ຺ຆ ຊາຕຸ ກາມໍ ສສກ຺ກໍ ອິຈ຺ເຈເຕ ເອກໍສຕ຺ເຖ. ເອວໍ ອິຕິ ອວຘາຣເຓ. ກຈ຺ຈິ ນຸ ນນຸ ກຖໍ (ກິໍສຸ, ຣູ) ກິໍ ອິຈ຺ເຈເຕ ປຸຈ຺ຉນຕ຺ເຖ. ເອວໍ ອິຕິ ອິຕ຺ຖໍ ອິຈ຺ເຈເຕ ນິທສ຺ສນຕ຺ເຖ. ອິຕິ ເຫຕຸ+ວາກ຺ຍປຣິສມຕ຺ຕີສຸ ຈ. ຍາວ ຕາວ ຍາວຕາ ຕາວຕາ ກິຕ຺ຕາວຕາ ເອຕ຺ຕາວຕາ ກີວ ອິຈ຺ເຈເຕ ປຣິຈ຺ເຉທນຕ຺ເຖ. ເອວໍ ສາຫຸ ລຫຸ ໂອປາຍິກໍ ປຏິຣູປໍ ອາມ ສາຘຸ ອິຈ຺ເຈເຕ ສມ຺ປຏິຈ຺ຉນຕ຺ເຖ. ຕຖາ ຍຖາ ຍເຖວ ຕເຖວ ເອວໍ ເອວເມວ ເອວມ຺ປິ ຍຖາປິ ເສຍ຺ຍຖາປິ ເສຍ຺ຍຖາປິນາມ ວິຍ ອິວ ຍຖຣິວ ຕຖຣິວ ຍຖານາມ ຕຖານາມ ຍຖາຫິ ຕຖາຫິ ຍຖາຈ ຕຖາຈ ອິຈ຺ເຈເຕ ປຏິຠາຄຕ຺ເຖ. ຍຖາອິຕິ ໂຍຄ຺ຄຕາ+ວິຈ຺ຉາ+ປທຕ຺ຖານຕິວຕ຺ຕິ+ນິທສ຺ສເນສຸ ຈ. ເອວໍອິຕິ ອຸປເທສ+ປຎ຺ຫາທີສຸ ຈ. ກິຎ຺ຈາປິອິຕິ ອນຸຄ຺ຄຫຕ຺ເຖ. ຘິອິຕິ ຄຣເຫ. ອໂຫອິຕິ ຄຣຫ+ປສໍສນ+ປຕ຺ຖເນສຸ. ນາມອິຕິ ຄຣຫ+ປສໍສນ+ສຎ຺ຎາ+ປຎ຺ເຫສຸ. ສາຘູຕິ ປສໍສນ+ຍາຈເນສຸ. ອິງ຺ຆ ຫນ຺ທ ອິຈ຺ເຈເຕ ໂຈທນຕ຺ເຖ. ສາຘຸ ສຸຏ຺ຐຸ ເອວເມຕໍຕິ ອນຸໂມທເນ. ກິຣອິຕິ ອນຸສ຺ສວນ+ອສທ຺ເຘຍ຺ເຍສຸ. ນຸນອິຕິ ອນຸມານາ+ນຸສ຺ສຣຓ+ປຣິວິຕກ຺ເກສຸ. ກສ຺ມາຕິ ກາຣຓປຸຈ຺ຉເນ. ຍສ຺ມາ ຕສ຺ມາ ຕຖາ ຫິ ເຕນ ອິຈ຺ເຈເຕ ກາຣຓຈ຺ເຉທນຕ຺ເຖ. ສຫ ສທ຺ຘິໍ ອມາ (ສມໍ, ຣູ) ອິຕິ ສມກ຺ຣິຍາຍໍ. ວິນາ ຣິເຕ ວິປ຺ປໂຍເຄ. ນານາ ປຸຖຸ ພຫຸປກາເຣ. ປຸຖຸ ວິສຸໍ ອສງ຺ຆາເຕ ຈ. ທຸຏ຺ຐຸ ກຸ ກຸຈ຺ຉາຍໍ (ຊິຄຸຈ຺ຉາຍໍ, ຣູ). ປຸນ ອປ຺ປຐເມ. ກຖໍ ຈິກິຈ຺ຉຕ຺ເຖ. ຘາ ກ຺ຂຕ຺ຕຸໍ ໂສ ກິຎ຺ຈອິຕິ ສໍຂ຺ຍາວິຠາເຄ. ອີສກໍ ອປ຺ປມາເນສຸ (ອປ຺ປມຕ຺ເຕ, ຣູ). ສຓິກໍ ມນ຺ທຕ຺ເຖ. ຂິປ຺ປໍ ອຣໍ ລຫຸໍ ອາສຸ ຕຸຓ຺ຫໍ ອຈິຣໍ ສີຆຕ຺ເຖ. ຈິຣໍ ຈິຣສ຺ສໍ ທີຆກາເລ. ເຈ ຍທິ ສໍກາ+ວຏ຺ຐາເນ. ຘຸຣໍ ຖິຣາ+ວຘາຣເຓສຸ (ຘຸວໍ ຖິຣາ+ວຘາຣເຓສຸ, ຣູ). ຫາ ວິສາເທ. ຕຸຓ຺ຫີ ອຠາສເນ. ສຈ຺ຉິ ປຈ຺ຈກ຺ເຂ. ມຸສາ ມິຈ຺ຉາອລິກໍ ອສຈ຺ເຈ. ສຸວຕ຺ຖິ ອາສິຏ຺ເຐ ອິຈ຺ຈາທິ.

ຕຸນ+ກ຺ຕ຺ວານ+ກ຺ຕ຺ວາປຈ຺ຈຍນ຺ຕາ ອຸສ຺ສຸກ຺ກນຕ຺ເຖ ຠວນ຺ຕິ. ຍຖາ ປສ຺ສິຕຸນ ປສ຺ສິຍ ປສ຺ສິຕ຺ວານ ປສ຺ສິຕ຺ວາ, ທິສ຺ວາ ທິສ຺ວານ ທສ຺ເສຕ຺ວາ ທາຕຸນ ທຕ຺ວານ ທຕ຺ວາ ອຸປາທາຍ ທາເປຕ຺ວາ ວິຎ຺ຎາຍ ວິເຈຍ຺ຍ ວິເນຍ຺ຍ ສເມຈ຺ຈ ນິຫຈ຺ຈ ອຸເປຈ຺ຈ ອາຣພ຺ຠ ອາຄມ຺ມ ອິຈ຺ຈາທິ.

ວິຠຕ຺ຕິຍາ ກໂຕ ເຠໂທ, ສລິງ຺ຄານໍ ຠເວ ຕຖາ;

ຕຸມ຺ຫາທີນໍ ຕ຺ວ+ລິງ຺ເຄສຸ, ເນວ+ຕ຺ຖິ ປາທິ+ຈາທິນໍ.

ເອວໍ ນາມາຂ຺ຍາໂຕປສຄ຺ເຄຫິ ວິນິມຸຕ຺ຕໍ ເອຕໍ ນິປາຕປທໍ ເວທິຕພ຺ພໍ.

ເນປາຕິກປທໍ.

ປຸລ຺ລິງ຺ຄໍ ອິຕ຺ຖິລິງ຺ຄຎ຺ຈ, ນປຸໍສກ+ມຖາ+ປຣໍ;

ຕິລິງ຺ຄຎ຺ຈ ອລິງ຺ຄຎ຺ຈ, ນາມິກໍ ປຎ຺ຈຘາ ຐິຕໍ.

ອິຕິ ປໂຍຄສິທ຺ຘິຍໍ ນາມກຓ຺ໂຑ ທຸຕິໂຍ.