໒. ນາມກຓ຺ຑ

ອຖ ນາມານິ ວຸຈ຺ຈນ຺ເຕ. ຕໍ ອຕ຺ຖາຠິມຸຂໍ ນມນໂຕ, ອຕ຺ຕນາ ຈ+ຕ຺ຖສ຺ສ ນາມນໂຕ ນາມໍ, ທພ຺ພາຠິຘານໍ. ຕໍ ທຸວິຘໍ ສລິງ຺ຄາ+ລິງ຺ຄໂຕ, ອນ຺ວຕ຺ຖຣຸຬ຺ຫິໂຕ ຈ, ຕິວິຘໍ ປຸມິ+ຕ຺ຖິ+ນປຸໍສກລິງ຺ຄໂຕ, ຣຸກ຺ໂຂ, ລຕາ, ວນນ຺ຕິ. ຈຕຸພ຺ພິຘໍ ສາມຎ຺ຎ+ຄຸຓ+ກ຺ຣິຍາ+ຍທິຈ຺ຉານາມໂຕ, ຣຸກ຺ໂຂ, ນີໂລ, ປາຈໂກ, ສິຣິວຑ຺ໂຒຕິ. ອຏ຺ຐວິຘໍ ອວຓ຺ຓິ+ວຓ຺ຓຸ+ວຓ຺ໂຓ+ກາຣ+ນິຄ຺ຄຫີຕນ຺ຕປກຕິເຠທໂຕ, ເອຕ຺ຖ ກິໍສທ຺ໂທ ນິຄ຺ຄຫີຕນ຺ໂຕ. ປຈ຺ຈຍາ ປຐມໍ ກຣີຍຕີຕິ ປກຕິ, ສທ຺ໂທ, ຘາຕຸ ຈ.

ຕຕ຺ຖ ສລິງ຺ເຄສຸ ຕາວ ອກາຣນ຺ຕໂຕ ປຸລ຺ລິງ຺ຄາ ສຸຄຕສທ຺ທາ ສຕ຺ຕ ວິຠຕ຺ຕິໂຍ ປຣາ ໂຍຊີຍນ຺ເຕ. ສຸຄຕອິຕິ ຐິເຕ –

໑. ທ຺ເວ ທ຺ເວ+ກາເນເກສຸ ນາມສ຺ມາ ສິໂຍ ອໍໂຍ ນາ ຫິ ສ ນໍ ສ຺ມາ ຫິ ສ ນໍ ສ຺ມິໍ ສຸ

ເອເຕສໍ ທ຺ເວ ທ຺ເວ ໂຫນ຺ຕິ ເອກາເນກຕ຺ເຖສຸ ວຕ຺ຕມານໂຕ ນາມສ຺ມາ ຍຖາກ຺ກມໍ. ຍໂຕ ອິເມ ສຕ຺ຕ ທຸກາ ໂຫນ຺ຕິ, ‘‘ອຕ຺ຖວນ຺ຕ+ມຘາຕຸກ+ມປຈ຺ຈຍໍ ປາຏິປທິກໍ ກິຕກ+ຕທ຺ຘິຕ+ສມາສາ ເຈ’’ຕິ ວຸຕ຺ຕຕ຺ຕາ ຕໍ ນາມໍ ປາຏິປທິກໍ ນາມ. ເກຈິ ສກຕ຺ຖ+ທພ຺ພ+ລິງ຺ຄ+ສງ຺ຂ຺ຍາ+ກມ຺ມາທິປຎ຺ຈກໍ ປາຏິປທິກນ຺ຕິ ວທນ຺ຕິ. ເຕເນ+ຕໍ ວຸຈ຺ຈຕິ –

ສກຕ຺ຖ+ທພ຺ພ+ລິງ຺ຄານິ, ສທ຺ທຕ຺ຖ+ມພ຺ຣວຸໍ ປເຣ;

ສງ຺ຂ຺ຍາ+ກມ຺ມາທິການນ຺ຕຸ, ວິຠຕ຺ຕິ ວາຈກາ ມຕາ.

ສກຕ຺ຖ+ທພ຺ພ+ລິງ຺ຄານິ, ສງ຺ຂ຺ຍາ+ກມ຺ມາທິປຎ຺ຈກໍ;

ສທ຺ທຕ຺ຖ+ມພ຺ຣວຸໍ ເກຈິ, ວິຠຕ຺ຕິ ປນ ໂຊຕກາຕິ ຈ.

ຕໂຕ ເອກມ຺ຫິ ວຕ຺ຕພ຺ເພ ເອກວຈນໍ ພຫຸມ຺ຫິ ວຕ຺ຕພ຺ເພ ພຫຸວຈນຎ຺ຈາຕິ ອນິຍເມນ ປສງ຺ເຄ ‘‘ນາມສ຺ມາ’’ຕິ ອຘິກາໂຣ.

໓໗. ປຐມາ+ຕ຺ຖມຕ຺ເຕ

ນາມສ຺ສາ+ຠິເຘຍ຺ຍມຕ຺ເຕ ປຐມາວິຠຕ຺ຕິ ໂຫຕີຕິ ວຕ຺ຕິຈ຺ຉາວສາ ປຐມາເຍ+ກວຈນພຫຸວຈນານິ. ສິ ໂຍອິຕິ ປຐມາ. ສິສ຺ສິ+ກາຣສ຺ສາ+ນຸພນ຺ຘຕ຺ຕາ ອປ຺ປໂຍໂຄ. ປໂຍຊນໍ ‘‘ກິ+ມໍສິສູ’’ຕິ ສໍເກໂຕ, ຕຖາ ອໍວຈນສ຺ສາ+ກາຣສ຺ສ. ເອຕ຺ຖ ຕຖາຕິ ວຸຕ຺ຕສ຺ສາຕິເທໂສ ອຎ຺ຎທີຍຘມ຺ມານ+ມຎ຺ຎຕ຺ຖປາປນ+ມຕິເທໂສ. ເອກມ຺ຫິ ວຕ຺ຕພ຺ເພ ປຐເມກວຈນໍ ສິ.

ອໂຕຕິ ວຕ຺ຕເຕ, ອໂຕຕິ ນາມວິເສສນຕ຺ຕາ ‘‘ວິຘິພ຺ພິເສສນນ຺ຕສ຺ສາ’’ຕິ ປຣິຠາສໂຕ ອກາຣນ຺ຕໂຕ ນາມສ຺ມາ ວິຘິ.

໑໐໙. ສິສ຺ໂສ

ອກາຣນ຺ຕໂຕ ນາມສ຺ມາ ສິສ຺ສ ໂອ ໂຫຕິ. ປຸພ຺ພສຣໂລເປ ສຸຄໂຕ ຕິຏ຺ຐຕິ. ພຫຸມ຺ຫິ ວຕ຺ຕພ຺ເພ ພຫຸວຈນໍ ໂຍ. ເອວໍ ອຸປຣິປິ ໂຍເຊຕພ຺ພໍ.

໔໑. ອໂຕ ໂຍນໍ ຏາເຏ

ອກາຣນ຺ຕໂຕ ນາມສ຺ມາ ປຐມາທຸຕິຍາໂຍນໍ ຏາເຏ ໂຫນ຺ຕິ ຍຖາກ຺ກມໍ. ຏກາຣານຸພນ຺ຘຕ຺ຕາ ‘‘ຏານຸພນ຺ຘາ+ເນກວຓ຺ຓາ ສພ຺ພສ຺ສາ’’ຕິ ສພ຺ພາເທໂສ. ສຸຄຕາ ຕິຏ຺ຐນ຺ຕິ.

‘‘ປຐມາ+ຕ຺ຖມຕ຺ເຕ’’ຕິ ວຕ຺ຕເຕ.

໓໘. ອາມນ຺ຕເຓ

ອາມນ຺ຕຓາຘິເກ ອຕ຺ຖມຕ຺ເຕ ປຐມາວິຠຕ຺ຕິ ໂຫຕີຕິ ເອກສ຺ມິໍ ເອກວຈນໍ ສິ.

໑໑໒. ໂຄ ສ຺ຍາ+ລປເນ

ອາລປເນ ສິ ຄສຎ຺ໂຎ ໂຫຕິ.

‘‘ໂລໂປ’’ຕິ ວຕ຺ຕເຕ.

໑໑໗. ຄສີນໍ

ນາມສ຺ມາ ຄ+ສີນໍ ໂລໂປ ໂຫຕິ. ໂຠ ສຸຄຕ ຈິຣໍ ຕິຏ຺ຐ.

‘‘ເຄ’’ຕິ ວຕ຺ຕເຕ.

໕໙. ອຍຸນໍ ວາ ທີໂຆ

ອອິອຸອິຈ຺ເຈເຕສໍ ວາ ທີໂຆ ໂຫຕິ ເຄ ປເຣ ຕິລິງ຺ເຄ+ຕິ ທີເຆ ໂຠ ສຸຄຕ ສຸຄຕາ ຈິຣໍ ຕິຏ຺ຐ. ສກ຺ກເຕ ສຸຄຕາຕິ ທີຆໍ ທູຣາລປເນເຍວິ+ຈ຺ຉນ຺ຕິ, ສມີປາລປເນປິ ທສ຺ສນໂຕ ຕໍ ນ ຄເຫຕພ຺ພໍ. ພຫຸວຈເນ ໂຍສ຺ສ ຏາ, ສຸຄຕາ ຈິຣໍ ຕິຏ຺ຐຖ.

໒. ກມ຺ເມ ທຸຕິຍາ

ຕສ຺ມິໍ ກມ຺ມກາຣເກ ທຸຕິຍາວິຠຕ຺ຕິ ໂຫຕິ. ອໍໂຍອິຕິ ທຸຕິຍາ. ເອຕ຺ຖ ທຸຕິຍາຕຕິຍາທິຠາໂວ ວິຠຕ຺ຕິສຸຕ຺ເຕ ສິໂຍ ອິຕິ ປຐມາວິຠຕ຺ຍາທີນິ+ມຸປາທາຍ ວຸຈ຺ຈຕິ, ຕໍ ຕໍ ອຸປາທາຍ ປຎ຺ຎຕ຺ຕຕ຺ຕາ. ທຸຕິເຍກວຈນໍ ອໍ, ອກາຣສ຺ສາ+ປໂຍໂຄ. ສຸຄຕໍ ປສ຺ສ. ທຸຕິຍາພຫຸວຈນໍ ໂຍ, ຕສ຺ສ ເຏ, ສຸຄເຕ ປສ຺ສ.

໑໙. ກຕ຺ຕຸກຣເຓສຸ ຕຕິຍາ

ຕສ຺ມິໍ ກຕ຺ຕຣິ ກຣເຓ ຈ ກາຣເກ ຕຕິຍາວິຠຕ຺ຕິ ໂຫຕິ. ນາ+ຫິອິຕິ ຕຕິຍາວິຠຕ຺ຕິ. ຕຕິຍາເອກວຈນໍ ນາ.

‘‘ນາສ຺ສາ’’ຕິ ວຕ຺ຕເຕ.

໑໐໘. ອເຕ+ນ

ອກາຣນ຺ຕໂຕ ນາມສ຺ມາ ປຣສ຺ສ ນາວຈນສ຺ສ ເອນາເທໂສ ໂຫຕິ ນິຈ຺ຈໍ. ສຸຄເຕນ ກຕໍ.

໙໘. ສຸຫິສ຺ວ+ສ຺ເສ

ອກາຣນ຺ຕສ຺ສ ສຸຫິສ຺ເວ+ໂຫຕິ. ສຸຄເຕຫິ.

‘‘ເວ’’ຕິ ວຕ຺ຕເຕ.

໙໕. ສ຺ມາຫິສ຺ມິໍນໍ ມ຺ຫາຠິມ຺ຫິ

ນາມສ຺ມາ ປເຣສໍ ສ຺ມາຫິສ຺ມິໍນໍ ມ຺ຫາຠິມ຺ຫິ ໂຫນ຺ຕິ ຍຖາກ຺ກມໍຕິ ຫິສ຺ສ ຠິອາເທເສ ສຸຄເຕຠິ. ກຣເຓ ສຸຄເຕນ ໂລໂກ ປຸຎ຺ຎໍ ກໂຣຕິ, ສຸຄເຕຫິ ສຸຄເຕຫິ ວາ.

໒໔. ຈຕຸຕ຺ຖີ ສມ຺ປທາເນ

ຕສ຺ມິໍ ສມ຺ປທານກາຣເກ ຈຕຸຕ຺ຖີ ສິຍາ. ສ+ນໍອິຕິ ຈຕຸຕ຺ຖີ. ຈຕຸຕ຺ເຖ+ກວຈນໍ ສ. ວິຠຕ຺ຕິສຸຕ຺ເຕ ສ຺ສ+ນໍຕິ ທີຆປາເຐນ ສຸຄຕສ຺ສາຕິ ສິທ຺ເຘປິ ‘‘ຌລາ ສສ຺ສ ໂນ’’ ຕ຺ຍາທິກາຣິຍສຸຕ຺ເຕສຸ ສ຺ສສ຺ສາຕິ ອກ຺ຂຣຄາຣວຕາ ໂຫຕີຕິ ລາຆວຕ຺ຖ+ມິທ+ມາຣທ຺ຘໍ –

໕໑. ສຸຎ ສສ຺ສ

ນາມສ຺ມາ ປຣສ຺ສ ສສ຺ສ ສຸຎາຄໂມ ໂຫຕິ. ສ ຈ ‘‘ຉຏ຺ຐິຍາ’’ຕິ ວຕ຺ຕມາເນ –

໑,໒໐. ຎາການຸ ພນ຺ຘາ+ທ຺ຍນ຺ຕາ

ຉຏ຺ຐີນິທ຺ທິຏ຺ຐສ຺ສ ຎານຸພນ຺ຘ+ການຸພນ຺ຘາ ອາທ຺ຍນ຺ຕາໂຫນ຺ຕີຕິ ອາທ຺ຍວຍໂວ. ອຸກາໂຣ ອຸຈ຺ຈາຣຓຕ຺ໂຖ, ຎ຺ຎກາໂຣ ອສ຺ມິໍ ສຸຕ຺ເຕ ສໍເກຕຕ຺ໂຖ. ສຸຄຕສ຺ສ ທານໍ ເທຕິ.

໑,໕໘. ‘‘ພຫຸລໍ’’ຕ຺ຍ+ຘິກາໂຣ

ພຫຸລາຘິກາຣໍ ກປ຺ປທຸມມິວ ມຎ຺ຎນ຺ຕິ ສທ຺ທິກາ. ຕຎ຺ຈ –

ກ຺ວຈິ ປວຕ຺ຕ຺ຍ+ປວຕ຺ຕິ, ກ຺ວຈ+ຎ຺ຎໍ ກ຺ວຈິ ວາ ກ຺ວຈິ;

ສິຍາ ພຫຸລສທ຺ເທນ, ວິຘິ ສພ຺ໂພ ຍຖາຄມໍຕິ –

ຈຕຸພ຺ພິຘໍ ພຫຸລໍ ສມິກ຺ຂນ຺ຕິ.

‘‘ອໂຕ ວາ’’ຕ຺ເວວ,

໔໔. ສສ຺ສາຍ ຈຕຸຕ຺ຖິຍາ

ອກາຣນ຺ຕໂຕ ປຣສ຺ສ ຈຕຸຕ຺ຖິຍາ ສສ຺ສ ອາໂຍ ໂຫຕິ ວາ ພຫຸລໍ. ສຸຄຕາຍ. ເຍຠຸຍ຺ເຍນ ຕາທຕ຺ເຖເຍວາ+ຍ+ມາໂຍ ທິສ຺ສຕີຕິ ອິໂຕ ປຣໍ ໂນ+ທາຫຣີຍເຕ. ຈຕຸຕ຺ຖີພຫຸວຈນໍ ນໍ,

‘‘ທີໂຆ’’ຕິ ວຕ຺ຕເຕ.

໘໙. ສຸນໍຫິສຸ

ນາມສ຺ສ ທີໂຆ ໂຫຕິ ສຸນໍຫິສຸ. ສຸຄຕານໍ.

໒໙. ປຎ຺ຈມ຺ຍ+ວຘິສ຺ມາ

ເອຕສ຺ມາ ອວຘິກາຣກາ ປຎ຺ຈມີວິຠຕ຺ຕິ ໂຫຕິ. ສ຺ມາ+ຫິອິຕິ ປຎ຺ຈມີ. ປຎ຺ຈມ຺ເຍກວຈນໍ ສ຺ມາ,

‘‘ອໂຕ’’ ‘‘ຏາເຏ’’ ‘‘ເວ’’ຕິ ຈ ວຕ຺ຕເຕ.

໔໓. ສ຺ມາ+ສ຺ມິໍນໍ

ອກາຣນ຺ຕໂຕ ນາມສ຺ມາ ປເຣສໍ ສ຺ມາ+ສ຺ມິໍນໍ ຏາ+ເຏ ໂຫນ຺ຕິ ວາ ຍຖາກ຺ກມໍ. ສຸຄຕາ ອເປຫິ ສຸຄຕມ຺ຫາ ສຸຄຕສ຺ມາ ວາ. ປຎ຺ຈມີພຫຸວຈນຎ຺ຫິ, ສຸຄເຕຠິ ສຸຄເຕຫິ.

໓໙. ຉຏ຺ຐີ ສມ຺ພນ຺ເຘ

ກາຣເກຫິ ອຎ຺ໂຎ ສມ຺ພນ຺ໂຘ, ຕຕ຺ຣ ຉຏ຺ຐີວິຠຕ຺ຕິ ໂຫຕິ. ສ+ນໍອິຕິ ຉຏ຺ຐີ, ຉຏ຺ເຐກວຈນໍ ສ, ສຸຄຕສ຺ສ ວິຫາໂຣ, ຉຏ຺ຐີພຫຸວຈນໍ ນໍ, ສຸຄຕານໍ.

໑໔. ສຕ຺ຕມ຺ຍາ+ຘາເຣ

ອາຘາຣກາຣເກ ສຕ຺ຕມີວິຠຕ຺ຕິ ໂຫຕິ. ສ຺ມິໍ+ສຸອິຕິ ສຕ຺ຕມີ. ສຕ຺ຕມ຺ເຍກວຈນໍ ສ຺ມິໍ, ສຸຄເຕ ປຕິຏ຺ຐິຕໍ ສຸຄຕມ຺ຫິ ສຸຄຕສ຺ມິໍ ວາ. ສຕ຺ຕມີພຫຸວຈນໍ ສຸ, ‘‘ສຸ+ຫິສ຺ວ+ສ຺ເສ’’ຕິ ເອ, ສຸຄເຕສຸ.

ສຸຄໂຕ, ສຸຄຕາ. ໂຠ ສຸຄຕ, ໂຠ ສຸຄຕາ, ຠວນ຺ໂຕ ສຸຄຕາ. ສຸຄຕໍ, ສຸຄເຕ. ສຸຄເຕນ, ສຸຄເຕຠິ, ສຸຄເຕຫິ. ກຣເຓ ສຸຄເຕນ, ສຸຄເຕຠິ, ສຸຄເຕຫິ. ສຸຄຕສ຺ສ, ສຸຄຕາຍ, ສຸຄຕານໍ. ສຸຄຕາ, ສຸຄຕມ຺ຫາ, ສຸຄຕສ຺ມາ, ສຸຄເຕຠິ, ສຸຄເຕຫິ. ສຸຄຕສ຺ສ, ສຸຄຕານໍ. ສຸຄເຕ, ສຸຄຕມ຺ຫິ, ສຸຄຕສ຺ມິໍ, ສຸຄເຕສຸ.

ສຸຄໂຕ ສຸຄໂຕ. ສຸຄຕໍ ນມຕິ. ສຸຄເຕນ ກໂຕ. ສຸຄເຕນ ຊິໂຕ. ສຸຄຕສ຺ສ ທເທ. ສຸຄຕາ ວິຄໂຕ. ສຸຄຕສ຺ສ ສຸໂຕ. ສຸຄເຕ ຣມເຕ. ເອວໍ –

ສູຣາ+ສຸຣ+ນໂຣ+ຣຄ+ນາຄ+ຍກ຺ຂາ,

ຄນ຺ຘພ຺ພ+ກິນ຺ນຣ+ມນຸສ຺ສ+ປິສາຈ+ເປຕາ;

ມາຕງ຺ຄ+ຊງ຺ຄມ+ຕຸຣງ຺ຄ+ວຣາຫ+ສີຫາ,

ພ຺ຍຄ຺ຆ+ຈ຺ຉ+ກຈ຺ຉປ+ຕຣຈ຺ຉ+ມິຄ+ສ຺ສ+ໂສຓາ.

ອາໂລກ+ໂລກ+ນິລຍາ+ນິລ+ຈາຄ+ໂຍຄາ,

ວາຍາມ+ຄາມ+ນິຄມາ+ຄມ+ຘມ຺ມ+ກາມາ;

ສງ຺ໂຆ+ຆ+ໂຆສ+ປຏິຆາ+ສວ+ໂກຘ+ໂລຠາ,

ສາຣມ຺ຠ+ຖມ຺ຠ+ມທ+ມານ+ປມາທ+ມກ຺ຂາ.

ປຸນ຺ນາຄ+ປູຄ+ປນສາ+ສນ+ຈມ຺ປກ+ມ຺ພ-

ຫິນ຺ຕາລ+ຕາລ+ວກຸລ+ຊ຺ຊຸນ+ກິໍສຸກາ ຈ;

ມນ຺ທາຣ+ກຸນ຺ທ+ປຸຈິມນ຺ທ+ກຣຎ຺ຊ+ຣຸກ຺ຂາ,

ເຎຍ຺ຍາ ມຍູຣ+ສກຸຓ+ຓ຺ຑຊ+ໂກຎ຺ຈ+ຫໍສາ.

ສຸຄຕສທ຺ໂທວ, ຍໂຕ ສພ຺ໂພ ສທ຺ໂທ, ນ ສທ຺ທຕາລິຕຕ຺ໂຖວ, ອຖ ໂຂ ສໍໂຍຄາທິວເສນປິ ອຕ຺ຖໍ ວທນ຺ຕິ. ເຕເນ+ຕໍ ວຸຈ຺ຈຕິ –

ສໍໂຍຄາ ວິປ຺ປໂຍຄາ ຈ, ສາຫຈຣິຍາ+ວິໂຣຘໂຕ;

ອຕ຺ຖາ ປກຣຓາ ລິງ຺ຄາ, ສທ຺ທນ຺ຕຣສມີປໂຕ.

ສາມຕ຺ຖ຺ໂຍ+ຈິຕ຺ຣ+ເທເສຫິ, ກາລ+ພ຺ຍຕ຺ຕາ+ນຸຣູປໂຕ;

ອຸປຈາຣ+ກາກຸເຠທ, ສມ຺ພນ຺ເຘຫຸ+ປລກ຺ຂຓາ.

ວຈນາ ຈ ຕທງ຺ຄຕ຺ຕາ, ປຘານຕ຺ຕາຕິອາທິຫິ;

ສທ຺ທ+ຕ຺ຖາ ປວິຠຊ຺ຊນ຺ເຕ, ນ ສທ຺ທາເທວ ເກວລາຕິ.

ເອຕ຺ຖ ສໍໂຍຄໂຕ ຕາວ, ‘‘ສກິໂສຣາ ເຘນຸ ທີຍຕູ’’ຕິ, ກິໂສໂຣ ອສ຺ສໂປຕໂກ, ຕໍສໍໂຍຄໂຕ ວຬວາ ເອວ ປຕີຍເຕ.

ວິປ຺ປໂຍຄໂຕ – ‘‘ອກິໂສຣາ ອານີຍຕູ’’ຕິ ຕປ຺ປຏິເສຘາ ວຬວາ ເອວ ປຕີຍເຕ.

ສຫຈຣຓໂຕ – ‘‘ຣາມ+ລກ຺ຂຓ’’ອິຕິ ອຸຠິນ຺ນໍ ສຫຈຣເຓນ ຣາໂມຕິ ທາສຣຖິ ເອວ ຣາໂມ, ນ ອຎ຺ຎາຠິຘາໂນ ຊາມທຄນ຺ຍາທິ. ລກ຺ຂໂຓປິ ໂສມິຕ຺ຕິ ເອວ, ນ ຕຸ ໂຍ ໂກຈິ ລກ຺ຂໂຓ.

ວິໂຣຘໂຕ – ‘‘ຣາມ+ຊ຺ຊຸນາ’’ ອິຕິ ຠຄ຺ຄໂວ ສຫສ຺ສພາຫຸ ຈ ອຎ຺ຎມຎ຺ຎວິຣຸທ຺ຘາຕິ ເຕ ເອວ ປຕີຍນ຺ເຕ, ນ ທາສຣຖິ ສພ຺ຍສາຈິ ຈ.

ອຕ຺ຖໂຕ – ‘‘ສິນ຺ຘວ+ມານຍ, ປວິສາມິ ຣຓງ຺ຄຓ’’ມິຕິ ຣຓງ຺ຄຓປເວໂສ ວາຫນວິເສເສນ ໂຫຕີຕິ ອຕ຺ຖໂຕ ຕຸຣງ຺ຄປຕີຕິ, ນ ຕຸ ລວຓວິເສສໍ.

ປກຣຓໂຕ-ໂຠຊນວິຘິມ຺ຫິ ອຸປສງ຺ຂຣິຍມາເນ ‘‘ສິນ຺ຘວ+ມານເຍ’’ຕິ, ອຕ຺ຣ ຫິ ສທ຺ທນ຺ຕຣສ຺ສາ+ຠາເວປິ ໂຠຊໂນປກຣຓສມວາຍ+ມາໂລກິຕຠາວໂຕ ລວເຓ ປຏິປຕ຺ຕິ, ຕາທິໂສ ຫິ ປຕ຺ຖາໂວຕິ.

ລິງ຺ຄໂຕ – ‘‘ເທວທຕ຺ຕໍ ປຐມ+ມຸປເວສຍ ສມາຣາຘິຕຄຸຣຸໍ’’ຕິ, ອຕ຺ຣ ສມາຣາຘິຕຄຸຣຸຕ຺ເຕນ ລິງ຺ເຄນ ຕສ຺ສ ພາຫຸສ຺ສຈ຺ຈ+ມວຄມ຺ຍເຕ, ນ ຕຸ ໂຍ ໂກຈິ ເທວຄຸໂຓ.

ສນ຺ນິຘານໂຕ – ‘‘ອຊ຺ຊຸໂນ ກຕວີຣິໂຍຕິ’’ ປຕີຍເຕ, ໂນ ອກຕວີຣິໂຍ ອຊ຺ຊຸໂນຕິ.

ສາມຕ຺ຖິຍໂຕ – ‘‘ອນຸທຣາ ກຎ຺ຎາ’’ຕິ ອຸທເຣ ອສຕິ ກຎ຺ຎາ ເອວ ນຕ຺ຖີຕິ ຕສ຺ສາ ກິສາງ຺ຄິຍາ ມຊ຺ຌປເທໂສຕິ ປຕີຍເຕ.

ໂອຈິຕ຺ຣໂຕ – ‘‘ຣາມສທິໂສ+ຍໍ’’ ອິຕິ, ອຕ຺ຣ ຫິ ຣາໂມ ປຍຸຕ຺ຕທາສຣຖິສ຺ມິໍ ຠິຍ຺ໂຍ ສາຘາຣໂຓ ປຣິຈໂຍຕິ ທາສຣຖິ ເອວ ປຕີຍເຕ, ນ ຠຄ຺ຄວຣາໂມ.

ເທສໂຕ – ‘‘ໂປຏ຺ຐປາ’’ ອິຕິ ກິສ຺ມິຎ຺ຈິ ເທເສ ປສໍສາວຈນໍ. ກິສ຺ມິຎ຺ຈິ ອກ຺ໂກສວຈນໍ.

ກາລໂຕ – ‘‘ປເຈ’’ຕິ ທກ຺ຂິຓາປເຖ ກຕ຺ຖຈິ ປຸພ຺ພຓ຺ເຫ ຍາຄຸປາເກ, ສາຍຓ຺ເຫ ຕຸ ໂອທນປາເກ.

ພ຺ຍຕ຺ຕິໂຕ – ‘‘ຄາມສ຺ສ ອທ຺ຘ’’ ມິຕິ ສມຠາເຄ, ນປຸໍສກຕ຺ຕາ. ‘‘ຄາມສ຺ສ ອທ຺ໂຘ’’ຕິ ປຸມຕ຺ເຕນ ຕຸ ອສມຠາເຄ.

ອນຸຣູປໂຕ – ‘‘ນຣປຕິ ສາຘຸ ຣກ຺ຂຕິ ໂຄມຓ຺ຑລ’’ມິຕິ ມຫີມຓ຺ຑລປາລນໍ ຣາຊິໂນ+ນຸຣູປ+ມິຕິ ມຫີມຓ຺ຑລປາລເນວ ປຕີຕິ, ນ ຕຸ ໂຄຍູຖຣກ຺ຂເນ.

ອຸປຈາຣໂຕ – ອຕໍສຠາເວ ຕໍສຠາວາໂຣປນ+ມຸປຈາໂຣ, ສ ຈ ຕທຏ຺ໂຐ, ຕທ຺ຘມ຺ໂມ, ຕໍສຫຈຣິໂຍ, ຕໍສມີໂປຕິ ຈຕຸພ຺ພິໂຘ, ຕຕ຺ຖ ຍຖາກ຺ກມໍ ມຎ຺ຈາ ອຸກ຺ໂກສນ຺ຕິ, ອຄ຺ຄິ ມາຓໂວ, ຍຏ຺ຐິໍ ປເວສຍ, ຄງ຺ຄາຍໍ ວໂຊຕິ.

ກາກຸໂຕ-ກາກຸສທ຺ໂທ ອິຕ຺ຖິຍໍ, ສ ຈ ວິກາຣ+ໂສກ+ຠີຕິ+ຘນິຣູເປສຸ ທິສ຺ສຕິ, ວຕ຺ຕຸ ກາຍວິກາຣາ ກຖຎ຺ຈິ ຕໍ ອກຕວາອປິ ເກນຈິ ອຎ຺ເຎນ ‘‘ກິໍ ຕ຺ວໍ ຕໍ ອກາສິ ‘‘ອິຕິ ປຸຏ຺ໂຐ ໂກເປນ ຠມຸເຠທາ ‘‘ອຫໍ ກຕວາ ອມ຺ຫີ’’ຕິ ກເຖຕິ, ຕສ຺ສ ຠມຸເຠທກ຺ຣິຍາ ອກ຺ຣິຍາປຏິຎ຺ຎໍ ສູຈຍຕິ.

ສມ຺ພນ຺ຘ ໂຕ – ‘‘ມາຕຣິ ສມ຺ມາ ວຕ຺ຕິຕພ຺ພໍ, ປິຕຣິ ສຸສ຺ສູຍິຕພ຺ພໍ’’ ອິຕິ, ອຕ຺ຣ ຫິ ສມາຕຣິ ສປິຕຣີຕິ ສມ຺ພນ຺ຘິສທ຺ທາຠາເວປິ ສາ ມາຕາ ໂສ ປິຕາ ຈ ອສ຺ສ ປຸຕ຺ຕສ຺ສາຕິ ປຕີຍເຕ.

ອຸປລກ຺ຂຓໂຕ – ‘‘ກາເກຫິ ຣກ຺ຂິຕພ຺ພໍ ທຘີ’’ຕິ ກາກສທ຺ໂທ ສພ຺ເພສ+ມຸປຆາຕການໍ ສາມຎ຺ຎໍ ອຸປລກ຺ເຂຕີຕິ ສຸນຂາທິສພ຺ເພຫິປິ ນິວາຣີຍເຕ.

ວຈນໂຕ – ‘‘ທາຣາ’’ອິຕິ ທາຣສທ຺ໂທ ກລຕ຺ເຕ ພຫຸວຈນນ຺ໂຕ, ອຎ຺ຎຕ຺ຖ ອນິຍຕວຈໂນ.

ຕທງ຺ຄຕ຺ຕາ – ‘‘ສຊ຺ຊິຕໍ ໂຠຊນ’’ມິຕິ ວຸຕ຺ເຕ ຕປ຺ປຣິກ຺ຂາຣຕ຺ຕາ ຕທຸປກຣຓ ອາສນ, ປາຕິ, ພ຺ຍຎ຺ຊນາທີນໍ ສມ຺ປາທນມ຺ປິ ປຕີຍເຕ.

ປຘານຠາວໂຕ – ‘‘ນິຄ຺ຄຈ຺ຉຕິ ອວນິນາໂຖ’’ຕິ ຣຎ຺ໂຎ ນິຄ຺ຄມເນນ ຕທຸປຊີວີນມ຺ປິ ນິຄ຺ຄມນໍ ວິຎ຺ຎາຍຕິ.

ວຸຕ຺ຕຎ຺ຈ –

ເນຍ຺ຍນີຕຕ຺ຖສຸຕ຺ເຕສຸ, ເຎຍ຺ຍໍ ສທ຺ທຕ຺ຖມຕ຺ຕກໍ;

ເນ+ຕ຺ຖ ວຕ຺ຕພ຺ພອຕ຺ເຖນ, ສຸຕ຺ຕໍ ນີຕຕ຺ຖກໍ ຠເວຕິ.

ເອວ+ມຎ຺ເຎສມ຺ປິ ອກາຣນ຺ຕານໍ ປຸລ຺ລິງ຺ຄານໍ ສທ຺ທານໍ ຣູປນໂຍ ກ຺ຣິຍາ+ຠິສມ຺ພນ຺ໂຘ ຈ. ສຸຄຕສທ຺ທໂຕ ຍສ຺ສ ສທ຺ທສ຺ສ ວິເສໂສ ອຕ຺ຖິ, ຕໍ ວກ຺ຂາມ. ອິໂຕ ປຣໍ ຉຏ຺ຐິຍາ ຈຕຸຕ຺ຖີສມຕ຺ຕາ ປຎ຺ຈມີພຫຸວຈນສ຺ສ ຈ ຕຕິຍາພຫຸວຈເນນ ສມຕ຺ຕາ ນ ຕາ ທສ຺ສິຍນ຺ເຕ.

ຄຸມ຺ພ ສິ, ‘‘ອໂຕ’’ ‘‘ສິສ຺ສາ’’ຕິ ຈ ວຕ຺ຕເຕ.

໑໑໐. ກ຺ວເຈ+ວາ.

ອກາຣນ຺ຕໂຕ ນາມສ຺ມາ ປຣສ຺ສ ສິສ຺ສ ເອ ໂຫຕິ ວາ ກ຺ວຈິ. ຄຸມ຺ເພ ຄຸມ຺ໂພ, ຄຸມ຺ພາ. ໂຠ ຄຸມ຺ພ ຄຸມ຺ພາ, ຠວນ຺ໂຕ ຄຸມ຺ພາ ອິຈ຺ຈາທິ ສຸຄຕສມໍ. ເອວໍ ຜຸສ຺ສິຕຄ຺ເຄ ຜຸສ຺ສິຕຄ຺ໂຄ, ວຕ຺ຕພ຺ເພ ວຕ຺ຕພ຺ໂພ ອິຈ຺ຈາທິ. ສິສ຺ໂສ+ກາຣສ຺ສ ນິຈ຺ຈຕ຺ຕາ ກຕ຺ຖຈິ ປກ຺ເຂ ເອກາຣຕ຺ຕ+ມິທ+ມາຣທ຺ຘນ຺ຕິ ສິສ຺ໂສ+ກາຣປກ຺ເຂ ເອວ ຠວຕີຕິ ‘‘ອໍ ນປຸໍສເກ’’ຕິ ອ+ມາເທເສນ ເອກາຣສ຺ສ ນປຸໍສກວິສເຍ ພາຘິຕຕ຺ຕາ ‘‘ພຫຸລໍ’’ ວິຘານາ ນປຸໍສເກປິ ສຸເຂ ທຸກ຺ເຂຕິ ກ຺ວຈິ ໂຫເຕວ.

‘‘ໂຍສ຺ສ’’ ‘‘ເຏ’’ຕິ ຈ ວຕ຺ຕເຕ.

໑໓໕. ເອກຈ຺ຈາທີຫ+ໂຕ

ອກາຣນ຺ເຕຫິ ເອກຈ຺ຈາທີຫິ ໂຍນໍ ເຏ ໂຫຕິ. ເອກຈ຺ໂຈ, ເອກຈ຺ເຈ. ໂຠ ເອກຈ຺ຈ ເອກຈ຺ຈາ, ເອກຈ຺ເຈ. ເອກຈ຺ຈໍ, ເອກຈ຺ເຈ. ເອວໍ ເອສ+ສ+ປຐມສທ຺ທານໍ.

ໂກໂຘ, ໂກຘາ. ໂຠ ໂກຘ ໂກຘາ, ໂກຘາ. ໂກຘໍ, ໂກເຘ.

‘‘ນາສ຺ສ’’ ‘‘ສາ’’ຕິ ຈ ວຕ຺ຕເຕ.

໑໐໗. ໂກຘາທີຫິ

ໂກຘາທີຫິ ນາສ຺ສ ສາ ໂຫຕິ ວາ. ໂກຘສາ ໂກເຘນ. ອຕ຺ຖສາ ອຕ຺ເຖນ. ‘‘ເຍ ອຸຕ຺ຕມຕ຺ຖານິ ຕຍິ ລຠິມ຺ຫາ’’ຕິ ອຕ຺ຖສທ຺ໂທ ນປຸໍສກລິງ຺ໂຄປິ ທິສ຺ສຕິ.

‘‘ສ຺ມິໂນ ຏີ’’ຕິ ຈ ວຕ຺ຕເຕ.

໑໗໕. ທິວາທິໂຕ

ທິວາທີຫິ ນາເມຫິ ສ຺ມິໂນ ຏິ ໂຫຕິ ນິຈ຺ຈໍ. ທິວິ, ເອວໍ ຠຸວິ. ເອຕ຺ຖຏິມ຺ຫິ ນິຈ຺ຈໍ ວກາຣາຄໂມ ຣສ຺ໂສ ຈ. ເອຕ຺ຖ ຠູສທ຺ໂທ ວຘູສທ຺ທສມໍ.

‘‘ເວ’’ຕິ ວຕ຺ຕເຕ.

໑໔໔. ມນາທີຫິ ສ຺ມິໍ+ສໍ+ນາ+ສ຺ມານໍ ສິ+ໂສ+ໂອ+ສາ+ສາ

ມນາທີຫິ ສ຺ມິ+ມາທີນໍ ສິ+ໂສ+ໂອ+ສາ+ສາ ໂຫນ຺ຕິ ວາ ຍຖາກ຺ກມໍ. ມໂນ, ມນາ. ໂຠ ມນ ມນາ, ມນາ. ມໂນ, ມນໍ, ມເນ. ມນສາ ມເນນ, ມເນຫິ ມເນຠິ. ມນໂສ ມນສ຺ສ, ມນານໍ. ມນສາ ມນາ ມນມ຺ຫາ ມນສ຺ມາ, ມເນຫິ ມເນຠິ. ມນສິ ມນມ຺ຫິ ມນສ຺ມິໍ, ມເນສຸ.

ເອວໍ ວໂຈ ປໂຍ ເຕໂຊ,

ຕໂປ ເຈໂຕ ຕໂມ ຍໂສ.

ອໂຍ ວໂຍ ສິໂຣ ສໂຣ,

ອຸໂຣ+ຕ຺ເຍ+ເຕ ມນາທໂຍ.

ຣູປສິທ຺ຘິຍໍ ອຫ+ຣຫສທ຺ທາ ມນາທີສຸ ປຐິຕາ. ອຫສ຺ສ ອາປາທິຕ຺ຕາ ຣໂຫຕິ ນິປາຕຕ຺ຕາ ຣຫສີຕິ ວິຠຕ຺ຍນ຺ຕປຏິຣູປກນິປາຕຕ຺ຕາ ອິຘ ນ ຄຫິຕາ.

ຄຈ຺ຉນ຺ຕ ສິ, ‘‘ສິສ຺ສ’’ ‘‘ເວ’’ຕິ ຈ ວຕ຺ຕເຕ. ປຣໂຕ ຠິຍ຺ໂຍ ນານຸວຕ຺ຕຍິສ຺ສາມ, ວຸຕ຺ຕິຍາ ເອວ ອນຸວຕ຺ຕສ຺ສ ຄມ຺ຍມານຕ຺ຕາ.

໑໔໘. ນ຺ຕສ຺ສໍ

ສິມ຺ຫິ ນ຺ຕປຈ຺ຈຍສ຺ສ ອໍ ໂຫຕິ ວາ. ‘‘ສຸຕານຸມິເຕສຸ ສຸຕສມ຺ພນ຺ໂຘວ ພລວາ’’ຕິ ຎາຍາ ‘‘ນ຺ຕສ຺ສາ’’ຕິ ສຸຕຕ຺ຕາ ນ຺ຕສ຺ເສວ ອໍ, ນ ຕທນ຺ຕສ຺ສ ອນຸມິຕສ຺ສ ສທ຺ທສ຺ສ. ເອວ+ມຸປຣິປິ ນ຺ຕ+ນ຺ຕູນໍ ອາເທສວິຘານຏ຺ຐາເນສຸ. ‘‘ຄສິນໍ’’ຕິ ສິໂລໂປ. ຄຈ຺ຉໍ ຄຈ຺ຉນ຺ໂຕ.

໒໑໕. ນ຺ຕ+ນ຺ຕູນໍ ນ຺ໂຕ ໂຍມ຺ຫິ ປຐເມ

ປຐເມ ໂຍມ຺ຫິ ນ຺ຕ+ນ຺ຕູນໍ ສວິຠຕ຺ຕີນໍ ນ຺ໂຕອິຈ຺ຈາເທໂສ ໂຫຕິ ວາ. ສ ຈ ພຫຸລາຘິກາຣາ ປຸເມວ, ຄຈ຺ຉນ຺ໂຕ ຄຈ຺ຉນ຺ຕາ.

໒໑໘. ຏ+ຏາ+ອໍ ເຄ

ເຄ ປເຣ ນ຺ຕ+ນ຺ຕູນໍ ສວິຠຕ຺ຕີນໍ ຏ+ຏາ+ອໍອິຈ຺ຈາເທສາ ນິຈ຺ຈໍ ໂຫນ຺ຕິ ພຫຸລໍ. ໂຠ ຄຈ຺ຉ ຄຈ຺ຉາ ຄຈ຺ຉໍ, ຄຈ຺ຉນ຺ໂຕ ຄຈ຺ຉນ຺ຕາ.

໙໒. ນ຺ຕສ຺ສ ຈ ຏ ວໍ+ເສ

ອໍເສສຸ ນ຺ຕປຈ຺ຈຍສ຺ສ ຏ ໂຫຕິ ວາ ນ຺ຕຸສ຺ສ ຈ. ວວຕ຺ຖິຕວິຠາສາ+ຍໍ. ຄຈ຺ຉໍ ຄຈ຺ຉນ຺ຕໍ, ຄຈ຺ຉນ຺ເຕ.

໒໑໗. ໂຕ+ຕາ+ຕິ+ຕາ ສ+ສ຺ມາ+ສ຺ມິໍ ນາສຸ

ສ+ສ຺ມາ+ສ຺ມິໍ+ນາສຸ ນ຺ຕ+ນ຺ຕູນໍ ສວິຠຕ຺ຕີນໍ ໂຕ+ຕາ+ຕິ+ຕາ ໂຫນ຺ຕິ ວາ ຍຖາກ຺ກມໍ. ຄຈ຺ຉຕາ ຄຈ຺ຉນ຺ເຕນ, ຄຈ຺ຉນ຺ເຕຫິ ຄຈ຺ຉນ຺ເຕຠິ. ຄຈ຺ຉໂຕ ຄຈ຺ຉສ຺ສ ຄຈ຺ຉນ຺ຕສ຺ສ.

໒໑໖. ຕໍ ນໍມ຺ຫິ

ນໍມ຺ຫິ ນ຺ຕ+ນ຺ຕູນໍ ສວິຠຕ຺ຕີນໍ ຕໍ ວາ ໂຫຕິ. ຄຈ຺ຉຕໍ ຄຈ຺ຉນ຺ຕານໍ. ຄຈ຺ຉຕາ ຄຈ຺ຉນ຺ຕາ ຄຈ຺ຉນ຺ຕມ຺ຫາ ຄຈ຺ຉນ຺ຕສ຺ມາ. ຄຈ຺ຉຕິ ຄຈ຺ຉນ຺ເຕ ຄຈ຺ຉນ຺ຕມ຺ຫິ ຄຈ຺ຉນ຺ຖສ຺ມິໍ, ຈ຺ເຉນ຺ເຕສຸ.

ເອວໍ ມຫໍ ຈຣໍ ຕິຏ຺ຐໍ, ທທໍ ຠຸຎ຺ຊໍ ສຸຓໍ ປຈໍ;

ຊຍໍ ຊີຣໍ ວຈໍ ປີຍໍ, ສຣໍ ກຸພ຺ພໍ ຊປໍ ວຊໍ.

ອິຈ຺ຈາທໂຍ.

ຠວນ຺ຕ ສິ,