໕໗. ກຕ຺ຕ

ນນຸຈາຣມ຺ເຠຕິ ວຸຕ຺ຕໍ- ‘ກິຣິຍາຣມ຺ເຠ’ຕິ ກຖນ຺ຕິ ອາຫ- ‘ໂສເຈ’ຈ຺ຈາທິ. ໂສ ຈ ອາຣມ຺ໂຠ. ກິຣິຍາເຍວ ອາຣມ຺ໂຠກິຣິຍາຣມ຺ໂຠ ຕສ຺ມິໍ. ກິຣິຍາຣມ຺ເຠຕິ ສາມຎ຺ເຎນ ວຸຕ຺ຕຕ຺ຕາ ກິຣິຍຕ຺ຖວິເສສນໍ ວາ ເອຕໍສິຍາ ປຈ຺ຈຍຕ຺ຖວິເສສນໍ ວາ ອຸຠຍຖາປິ ນ ໂທໂສຕິ ທສ຺ເສຕຸມາຫ- ‘ກິຣິຍຕ຺ຖວິເສສນໍ ເຈຕ’ນ຺ຕິອາທິ. ປຈ຺ຈຍຕ຺ຖວິເສສນປກ຺ເຂປິ ສາມຕ຺ຖິຍາ ອາຣມ຺ເຠ ກິຣິຍຕ຺ຖສ຺ສາປິ ປວຕ຺ຕີ ໂຫຕີຕິ ທສ຺ເສຕຸມາຫ- ‘ກິຣິຍຕ຺ຖສ຺ສາປິ’ຈ຺ຈາທິ. ສາມຕ຺ຖິຍໍ ທສ຺ເສຕິ ‘ສາມຕ຺ຖິຍມ຺ປນາ’ຕິອາທິນາ. ອນນ຺ຕຣສຸຕ຺ເຕນ ໂຍ ວິຫິໂຕ ກ຺ໂຕ, ໂສປິ ສາມຎ຺ເຎນ ວຈນໂຕ ຠາວກມ຺ເມສຸ ອາຣມ຺ເຠປິ ໂຫຕີຕິ ໂຍຊນາ. ສາມຎ຺ເຎນ ວຈນໂຕຕິ ‘‘ກ຺ໂຕ ຠາວກມ຺ເມສູ’’ຕິ (໕-໕໖) ສາມຎ຺ເຎນ ວຈນໂຕ. ຠາວກມ຺ເມສຸເຈຕິ ເອວໍ ນ ວຸຕ຺ຕນ຺ຕິ ‘ຍຖາປຕ຺ຕຎ຺ເຈ’ຕິ ວທຕາ ວຸຕ຺ຕິກາເຣເນວໍ ນ ວຸຕ຺ຕນ຺ຕິ ອຕ຺ໂຖ.

ກສ຺ມາ ເອວໍ ນ ວຸຕ຺ຕນ຺ຕິ ອາຫ- ‘ປຸພ຺ພສ຺ມິໍ ວິຍາ’ຕິ ອາທິ. ອນິຍມຸປ຺ປຕ຺ຕິ ສຎ຺ຎາຍ ສຕິ ຎາປນນ຺ຕິ ຕນ຺ນິເສເຘຕຸມາຫ- ‘ປຸນພ຺ພຈນໂຕ’ຕິອາທິ. ມາສງ຺ກີຕິ ກມ຺ມນິ, ເຕເນວຸປ຺ປຕ຺ຕີຕິ ປຐມາ. ເອວໍ ມຎ຺ຎເຕ ‘‘ຠາວກມ຺ມ ຄຫຓໍ ຈາກາເຣນານຸກຑ຺ຒິຍ ‘ຠາວກມ຺ເມສຸ ຈາ’ຕ຺ຍເນນ ກ຺ເຕວິຘີຍ ມາເນ ອິທມາສງ຺ກີຍເຕ ‘ປຸພ຺ເພເນວ ສາມຎ຺ເຎນ ສິທ຺ເຘ ປຸນພ຺ພຈນາ [ປຸນພ຺ພຈນໍ] ກິຣິຍຕ຺ຖານິຍເມນ ຕ຺ຕສ຺ສຸປ຺ປຕ຺ຕີ’ຕິ, ຍຖາປຕ຺ຕຎ຺ເຈຕິ ຫ຺ຍຸຈ຺ຈມາເນ ຈກາເຣນ ຍຖາປຕ຺ຕມ຺ປິ ກາຣິຍມນຸຎ຺ຎາຍເຕຕິ ປຸພ຺ເພເນວ ວຈເນນ ຠາວກມ຺ເມສ຺ວາຣມ຺ເຠປິ ຍຖາປຕ຺ໂຕ ກ຺ໂຕ ຠວຕີຕິ ວິຎ຺ຎາຍເຕ’’ຕິ. ເອວຎ຺ຈຣຫິ ຠາວກມ຺ເມສ຺ວາຣມ຺ເຠປິ ປຸພ຺ເພເນວ ສິທ຺ຘຕ຺ຕາ ‘‘ກຕ຺ຕຣິອາຣມ຺ເຠ’’ອິຈ຺ເຈວ ວຸຈ຺ເຈຍ຺ຍ ກິໍ ຈກາເຣເນ ຈ຺ຈາສງ຺ກິຍາຫ- ‘ປທານມວຘາຣຓ ຜລຕ຺ຕາ’ຈ຺ຈາທິ.

ນນຸຈາທິຠູໂຕ ກິຣິຍາກ຺ຂໂຓ ອາຣມ຺ໂຠ ນາມ, ພຫູຫິ ກິຣິຍາກ຺ຂເຓຫິ ກເຏ ປຣິສມຕ຺ເຕເຍວ ຠູໂຕ ກາໂລ ຈ ຠວຕີຕິ ກິຣິຍາຜລສ຺ສາປຣິນິປ຺ຜນ຺ນຕ຺ຕາ ວຕ຺ຕມາໂນວ ກາໂລຕິ ຕຕ຺ຣກ຺ໂຕ ນ ປປ຺ໂປຕິຈ຺ຈາສງ຺ກິຍາຫ- ‘ກິຣິຍາຜລສ຺ສິ’ຈ຺ຈາທິ. ກເຏກເທສສ຺ສາປິ ກຏຕ຺ຕາ ຕສ຺ສ ຈ ນິພ຺ພຕ຺ຕຕ຺ຕາ ຠູຕວຈນິຈ຺ຉາຕິ ຠາໂວ. ນນຸຈາທິສູເຕ ກິຣິຍາກ຺ຂຓກາເລ ກໂຏ ນາຠິນິພ຺ພຕ຺ໂຕ, ກຏກາຣຓຠູຕາ ພີຣຓາວ ຫິ ຕທາ ສນ຺ຕິ, ນ ຈ ຕທວຕ຺ຖາ ເຕ ເອວ ກໂຏຕິ ກຖໍ ‘ປກໂຕ ກໂຏ’ຕິ ຠູຕກາເລນ ປກຕສທ຺ເທນ ກຏສທ຺ທສມານາຘິກຣຓຕ຺ຕມິຈ຺ຈາຫ- ‘ອາທິຠູເຕເນ’ຈ຺ຈາທິ. ຕຕ຺ຖ ຕສ຺ມິໍ ວິເສເສ. ປກຕ຺ຕຸໍ ອາຣຠິ, ປກຕ຺ຕຸໍ ອາຣຠີຍິຕ຺ຖ, ປໂສຕ຺ຕຸໍ ອາຣຠິ, ປໂສຕ຺ຕຸໍ ອາຣຠນນ຺ຕິ ອຕ຺ເຖ ຕ຺ໂຕ.