໕໓. ສີລ

ກິມິທສີລມິຈ຺ຈາຫ- ‘ສີລມ຺ປກຕິສຠາໂວ’ຕິ. ຕຎ຺ຈ ສີລມນຸມາເນນ ວິຎ຺ຎາຍຕິຈ຺ຈາຫ- ‘ຕຎ຺ເຈ’ຈ຺ຈາທິ. ກິຣິຍາວິສຍຣຸຈິວິເສສານຸມິຕນ຺ຕິ ອຸຓ຺ຫໂຠຊນສງ຺ຂາຕາ ກິຣິຍາ ວິສໂຍ ຍສ຺ສ ໂສ (ກິຣິຍາ) ວິສໂຍ ຣຸຈິວິເສໂສ, ເຕນ ອນຸມິຕນ຺ຕິ ອຕ຺ໂຖ. ກິມິທມາຠິກ຺ຂຎ຺ຎນ຺ຕິ ອາຫ- ‘ອາຠິກ຺ຂຎ຺ຎ’ມິຈ຺ຈາທິ. ປຸນປ຺ປຸນຠາໂວ ໂປໂນປຸຎ຺ຎໍ. ອາເສ ວາ ຕປ຺ປຣຕາຕິ ຕເມວາຠິກ຺ຂຎ຺ຎໍ ປຣິຍາເຍຫິ ຜຸຏີກໂຣຕິ.

ຍຊ຺ເຊວນ຺ຕິ ຍທິ ອາຠິກ຺ຂຎ຺ຎໍ ຕປ຺ປໂຕ ວຸຈ຺ຈເຕ. ຕສ຺ສີລ຺ຍມິທໍ ໂຫຕີຕິ ອິມິນາ- ‘ສີລາຠິກ຺ຂຎ຺ຎາທິ’’ສຸຕ຺ເຕ ສີລສທ຺ເທເນວາຠິກ຺ຂຎ຺ຎສ຺ສ ຄຫິຕຕ຺ຕໍ ທີເປຕິ. ອຎ຺ຎຖາປິ ສີລໂຕ ອຎ຺ຎເມວາຠິກ຺ຂຎ຺ຎນ຺ຕິ ທສ຺ເສຕຸມາຫ- ‘ຍສ຺ມິໍ ເທເສ’ຕິອາທິ.

ຄມ຺ມມາເນຕິ ປຕີຍມາເນ. ປຕີຕິ ຈ ອຕ຺ຖປ຺ປກຣຓສທ຺ທນ຺ຕຣາທີຫິ. ອຠິມໂຕຕິ ປາຓິນິເຍຫິ ອຠິມໂຕ. ອາວສ຺ສກຄ຺ຄຫຓາເຍວ ສິທ຺ໂຘຕິ ວຸຕ຺ຕໍ ກຖເມຕ຺ຖາວສ຺ສມ຺ຠາໂວ ປຕີຍຕິ ຈ຺ຈາຫ- ‘ຕຎ຺ຈາ’ຕິອາທິ.

ໂຍຄວິຠາຄາຕິ ‘ຓີ’ຕິ ໂຍຄ ວິຠາຄາ. ສາຘຸໍ ກໂຣຕິ, ພ຺ຣຫ຺ມໍ ວທຕິ, ອສທ຺ຘໍ ຠຸຎ຺ຊຕິ, ປຓ຺ຑິຕມຕ຺ຕານໍ ມຎ຺ຎຕີຕິ ວິຄ຺ຄໂຫ. ສາຘຸນ຺ຕິ ກິຣິຍາວິເສສນໍ. ອສ຺ສທ຺ຘໂຠຊີຕິ ວເຕ. ວຕຎ຺ຈ ໂຠຊເນ ອຕ຺ຖິຕາຍໍ ສທ຺ຘອສ຺ສທ຺ຘໂຠຊນວິສຍາຍໍ ປວຕ຺ຕິຍໍ ຍທິ ຠຸຎ຺ຊຕິ ອສ຺ສທ຺ຘເມວ ຠຸຎ຺ຊຕິ ນ ສທ຺ຘນ຺ຕິ ສຕ຺ເຖ ວຸຕ຺ຕນິຍໂມ, ອສ຺ສທ຺ຘໍ ຠຸຎ຺ຊຕິ ເອວາຕິ ໂນຕ຺ຕຣປທາວຘາຣຓໍ… ເອວຎ຺ຫິ ວິຎ຺ຎາຍມາເນ ຍເທວາສ຺ສທ຺ຘໍ ນ ຠຸຎ຺ຊຕິ ຕເທວ ວຕໂລໂປ ສິຍາຕິ [ອຕ຺ຖິຕາຍ (ໂຠຊນາກງ຺ຂິຕຕ຺ຕາ) ຍເຖຈ຺ຉໍ ສາມຎ຺ເຎນ ໂຠຊເນ ປວຕ຺ຕິຍໍ ມຕ຺ຕາຍໍ ອສທ຺ຘໂຠຊນໍ ສຕ຺ຖວິຫິຕມຸປລຠມານສ຺ສ ສທ຺ຘໂຕ ນິວຕ຺ຕິຕ຺ວາ ວິເສເສ ຫິ ສທ຺ເຘ ປວຕ຺ຕິນິຍໂມ ວຕມຸຈ຺ຈເຕ, ນິຍໂມຈາຕ຺ຣທຸວິໂຘ ສມ຺ຠວຕິ-ອສທ຺ຘໍ ຠູຎ຺ຊຕິ ເອວ, ອຖທ຺ຘໂມ ຠຸຎ຺ຊຕີຕິ ວາ, ຕຕ຺ຣາທິເມ ນິຍເມ ຍເທວາ ສທ຺ຘໍ ນ ຠຸຎ຺ຊຕິ ຕເທວວຕ ໂລໂປສິຍາ (ຣ-໓-໒໒໘) ກາຕນ຺ຕປຎ຺ຊິກາ]. ອຎ຺ຎຖາປິ ປຏິປາທຍິຕຸມາຫ- ‘ຆຓນ຺ຕາທີຫິ’ຈ຺ຈາທິ.