໔໑. ກ຺ວຈ

ນາມຊາຕິຄຸຓກິຣິຍາ ທພ຺ພສມ຺ພນ຺ຘໂຕ ປຎ຺ຈວິຘຕ຺ເຕປິ ກມ຺ມສ຺ສ ກ຺ຣິຍຕ຺ຖສ຺ສາວຘິຣຍມຸປາທິນ຺ໂນຕິ ກ຺ຣິຍຕ຺ຖສມ຺ພນ຺ຘາ ກິຣິຍາກມ຺ມສ຺ເສຫ ຄຫຓໍ. ຕຎ຺ຈ ນິພ຺ພຕ຺ຕິວິກຕິປຕ຺ຕິເຠເທນ ຕິວິຘໍ, ຕິວິຘສ຺ສາປ຺ເຍຕສ຺ສ ວິເສສານຸປານໂຕ ຄຫຓນ຺ຕິ ກເມນຸທາຫຣນ຺ໂຕ ອາຫ- ‘ກຣກຣເຓ’ອິຈ຺ຈາທິ.

ໂລກວິທູຕິອາທິທສ຺ສນໂຕ ກ຺ວຈິຄ຺ຄຫເຓ ປໂຍຊນໍ ວຕ຺ຕຸມາຫ- ‘ກມ຺ມໂຕ’ຈ຺ຈາທິ. ນນຸ ຈ ກ຺ວຈິຄ຺ຄຫເຓເນວ ‘ອາທິຈ຺ຈໍ ປສ຺ສຕິ’ຈ຺ຈາໂທປິ (ນິວຕ຺ຕິ) ວຕ຺ຕຸໍ ສກ຺ກາ ກສ຺ມາ ‘ພຫຸລາຘິກາຣາ’ຕິ ວຸຕ຺ຕນ຺ຕິ ອາຫ ‘ເຕເນ’ຈ຺ຈາທິ. ເຕນາຕິ ເຍນ ກ຺ວຈິຄ຺ຄຫຓໍ ກຸໂຕຈິເຍວາຕິ ທສ຺ສນຕ຺ຖໍ ກຕໍ ເຕນາຕິ ອຕ຺ໂຖ. ເຕນາຕິ ວາ ກ຺ວຈິຄ຺ຄຫເຓນ. ອຖ ອາທິຈ຺ຈໍ ປສ຺ສຕິຈ຺ຈາໂທ ວິຍ ກມ຺ມກຣາທີສຸປິ ນິວຕ຺ຕິມທສ຺ເສຕ຺ວາ ‘ກ຺ວຈີຕິ ກິໍ ກມ຺ມກໂຣ’ຕິ ກສ຺ມາ ວຸຕ຺ຕນ຺ຕິ ອາຫ- ‘ຍຊ຺ເຊວ’ມິຈ຺ຈາທິ.

ຕສ຺ສາຕິ ພຫຸລວຈນສ຺ສ, ມຫາຘິກາຣຕ຺ຕາຕິ ມຫາວິສຍຕ຺ຕາ. ກຸໂຕຈິເຍວາຕິ ກຸໂຕຈິ ຘາຕຸໂຕເຍວ. ອເຖຫ ກສ຺ມາ ນ ໂຫຕິ ເທວທຕ຺ໂຕ ສຍຕິ ທາຕ຺ເຕນ ລຸນາຕິ ສຸນຂານໍ ທທາຕິ ນຄຣາ ອເປຕິ ຖາລິຍໍ ປຈຕິ ມາຕຸ ສຣຕີ’’ຕິ, ສພ຺ພເມເວທໍ ກິຣິຍາ (ຍາ) ຠິສມ຺ພນ຺ຘີຍຕີຕິ ຍທິເປວໍ, ຕຖາປິ ກມ຺ມຕ຺ເຕເນວ ຍໍ ວຕ຺ຕຸ ມິຈ຺ຉິຕໍ ນ ກາຣກນ຺ຕຣຕ຺ເຕນ ນາປິ ສມ຺ພນ຺ຘຠາເວນ, ຕສ຺ເສວ ກມ຺ມສທ຺ເທນ ຄຫຓໍ ກມ຺ມວຈນສາມຕ຺ຖິຍາ, ອຎ຺ຎຖາ ສ຺ຍາທິໂຕຈ຺ເຈວ ວເທຍ຺ຍ ກິໍ ກມ຺ມາຕິ ວຈເນນາຕິ.