໓໒. ຄຸຫາ

ສທ຺ທິການນ຺ຕິ ປາຓິນິຍກຈ຺ຈາຍນາທິເວຍ຺ຍາກຣຓານໍ. ເປສນໍ ສກ຺ກາຣປຸພ຺ພກໍ ວາ ນິໂຍຊນໍ. ກາມຈາຣານຸຎ຺ຎາຕິ ກຕ຺ຕຸມິຈ຺ຉໂຕ ຍຖິຈ຺ຉ ມນຸຊານນໍ ອຕິສຄ຺ໂຄນາມາຕິ ອຕ຺ໂຖ. ນິມິຕ຺ຕຠູຕສ຺ສາຕິ ‘‘ໂຠຕາ ກໂຏ ກຕ຺ຕພ຺ໂພ’ຈ຺ຈາທີສຸ ກຏກຣຓາທິໂນ ກາຣຓຠູຕສ຺ສ.

ນນຸ ຈ ສາມຎ຺ເຎນ ວິຫິຕາ ເອ(ເຕ), ຕຖາ ຈ ສຕິ ວິຊ຺ຌຕ຺ຖວິຫິ ເຕຫິ ເອຍ຺ຍາທີຫິ ເຕ ພາຘີຍນ຺ຕິຈ຺ຈາຫ- ‘ນເຈ’ຈ຺ຈາທິ. ວິຘິວິເສສຕ຺ເຕ ປີຕິ ວິຘານໍ ວິຘິ ນິໂຍຊນໍ ກິຣິຍາສຸ ພ຺ຍາປາຣຓາ, ຕສ຺ສ ວິຘິໂນ ເປສາທີນໍ ວິເສສຕ຺ເຕປິ, ນາວສ຺ສນ຺ຕິອາທິ ຊຍາທິຈ຺ຈພ຺ຍາຂ຺ຍານໍ ນິສ຺ສາຍ ວຸຕ຺ຕໍ, ວຸຕ຺ຕຎ຺ຫິ ເຕນ ‘‘ກິມຕ຺ຖໍ ເປສາທີສຸ ກິຈ຺ຈສຎ຺ຎິໂນ ຕພ຺ພອນີຍຓ຺ຍຕ຺ຍປ຺ປຈ຺ຈຍາ ວິຘີຍນ຺ເຕ, ນ ສາມຎ຺ເຎນ ຠາວກມ຺ເມສຸ ວິຫິຕາ, ເອວເມເຕ [ວິຫິຕາເອວ, ໂວ-ກາສິກາວຸຕ຺ຕິ] ເປສ຺ວາທີຎ຺ຎສ຺ວຕ຺ຣ ຈ ຠວິສ຺ສນ຺ຕີຕິ ວິເສສວິຫິເຕນ ວິຘ຺ຍາທີສຸ ປຈ຺ຈເຍນ ພາຘີຍນ຺ເຕ, ວາສຣູປວິຘິນາ ຠວິສ຺ສນ຺ຕິ ເອວຎ຺ຈຣຫິ ເອຕໍ ຎາເປຕິ ‘ອິຕ຺ຖີອຘິກາຣໂຕ ປເຣນ ວາສຣູປວິຘິ ນາວສ຺ສມ຺ຠວຕີ’ຕິ [ກິມຕ຺ຖມິຈ຺ຈາທິ ໂຈທ຺ຍ, ວິຈສສວິຫິເຕຈ຺ຈາທິ ປຣິຫາໂຣ, ກິຈ຺ຈາ ຫິ ສາມຎ຺ເຎນ ວິຫິຕາ, ປຎ຺ຈມີ ຕຸ ເປສາທິນາຕ຺ຖວິເສເສນ, ອໂຕ ເຕນ ວິເສສວິຫິເຕນ ກິຈ຺ຈາ ເປສາທິວິສເຍ ພາຘີເຍຣນ຺ຕິ ປຸນພ຺ພິຍເຕ, ວາສຣູເປຈ຺ຈາທິນາ ປຣິຫາຣໍ ວິຆຏຍຕິ. ເອວໍ ຈຣຫິຈ຺ຈາທິນາ ເປສາທີສຸ ກິຈ຺ຈວິຘານສ຺ສ ຎາປກຕ຺ຕໍ ທສ຺ສຍຕິ. (ຊິນິນ຺ທພຸທ຺ຘິນຸ ໒໑ ສ)]. ອສຣູປວິຘິ ອສຣູປາປວາທປ຺ປຈ຺ຈໂຍ ວາ ວິກປ຺ເປນ ພາຘໂກ ໂຫຕິ ອຸສ຺ສຄ຺ຄສ຺ສາຕິ ເອຕໍ ອວສ຺ສໍ ນ ໂຫຕີຕິ ຎາປນຕ຺ຖມ຺ປິ ນ ວິຘີຍເຕຕິ ໂຍຊນາ. ‘‘ວາ-ສຣູໂປ-ນິຕ຺ຖິຍໍ’’ຕິ (ປາ, ໓-໑-໙໔) ປຣສຸຕ຺ຕໍ. ຘາຕ຺ວຘິກາເຣວິຫິໂຕ ອສຣູໂປ ອປວາທປ຺ປຈ຺ຈໂຍ ອຸສ຺ສຄ຺ຄສ຺ສ ພາຘໂກ ຠວຕິ ອິຕ຺ຖິ ອຘິກາເຣ ວິຫິຕປ຺ປຈ຺ຈຍໍ ວຊ຺ຊຍິຕ຺ວາຕິ ອຕ຺ໂຖ. ເຫຏ຺ຐາ ວຸຕ຺ຕານຸສາເຣເນທໍ ວິຎ຺ຎາຕພ຺ພໍ.

ໂຠຕາ ຂລຸ ກໂຏ ກາຕພ຺ໂພຈ຺ຈາທິ ເປສເນ. ຕ຺ວຍາ ກໂຏ ກາຕພ຺ໂພຕິ ອນຸຎ຺ຎາຍໍ. ປຕ຺ຕກາເລ ປຣມຸທາຫຣຓໍ. ເອຕ຺ຖ ປນ ກຏກຣເຓ ກາລາໂຣຈນມຕ຺ຕເມວ ວິຎ຺ຎາຍຕິ, ນ ເປສາທິ. ‘‘ສຕ຺ຕ຺ຍຣເຫສ຺ເວຍ຺ຍາທີ’’ຕິ (໖-໑໑) ສຸຕ຺ຕໍ ວິເສສວິຫິຕໍ, ເຕນາຫ- ‘ສາມຎ຺ຎ ວິຘານໂຕ’ຈ຺ຈາທິ. ສຕ຺ຕິວິສິຏ຺ເຐຈ຺ຈາທິນາ ວຸຕ຺ຕມຕ຺ຖໍ ວິວຣຕິ ‘ສຕ຺ຕີ’ຕິອາທິນາ. ກຖໍ ສຕ຺ຕິວິສິຏ຺ຐຕາ ກຕ຺ຕຸໂນຕິ ອາຫ- ‘ຕໍໂຍຄາ’ຕິ. ຕາຍ ສຕ຺ຕິຍາ ໂຍໂຄ ຕໍໂຍໂຄ. ອວສ຺ສກາຘມີຓຕາວິສິຏ຺ເຐ ຕຸ ກຕ຺ຕຣິ ກິຈ຺ຈານໍ ຕທຎ຺ເຎສຎ຺ຈ ຠາວາຍ ວິສຸໍ- ສຸຕ຺ຕິຕໍ, ເຕນ, ວຸຕ຺ຕໍ ‘ອາວສ຺ສກາຘມີຓຕາ ວິສິຏ຺ເຐວ ກຕ຺ຕຣີ’ຕິ. ສພ຺ພຕ຺ເຖເວຕ຺ຖ ‘ອຸທ຺ຘໍ ມຸຫຸຕ຺ຕໂຕ’ຕິອາທິນາ ເອເກກມຸທາຫຣຓໍ ກເມນ ທສ຺ສິຕໍ. ໂຠຕາ ຣຊ຺ຊໍ ກາຕພ຺ພນ຺ຕິ ອຣເຫ, ຠວຕາ ຣຊ຺ຊໍ ກາຕພ຺ພນ຺ຕິ ອຕ຺ໂຖ. ຠວໍ ອຣໂຫຕິ ປນ ອຣຫກຕ຺ຕຸຕ຺ຕປ຺ປກາສນຕ຺ຖໍ ວຸຕ຺ຕໍ. ເອວມຸປຣິປິ. ສພ຺ພເມຕໍ ພຫຸລຄ຺ຄຫຓານຸຠາເວເນຕິ ວິຎ຺ເຎຍ຺ຍໍ.