໑໒໘. ອຕ຺ຍາ

ວຸຕ຺ຕິຍໍ ເອຕສ຺ມິໍ ວິສເຍຕິ ເອຕ຺ຖ ເອຕສ຺ມິນ຺ຕິ ຕ຺ຍາທິນ຺ຕວຊ຺ຊິຕປຈ຺ຈຍ ວິສເຍຕິ ອຕ຺ໂຖ. ວິຎ຺ຎາຍມານຕ຺ຕາ ຎາປິໂຕ ໂຫຕີຕິ ຄມ຺ຍເຕ. ນ ຎາປກໂຕຕິ ອິມິນາ ອິທໍ ທສ຺ເສຕິ ‘‘ກິຎ຺ຈິ ວຈນານຸສາຣໂຕ ວິຎ຺ຎາຍມານຕາມຕ຺ເຕນ ຎາປີຍເຕ ກິຎ຺ຈິ ຎາປເກນ, ອສ຺ມິມ຺ປກ຺ເຂ ວຸຕ຺ຕານຸສາຣໂຕ ກຕ຺ຖຈິ ກສ຺ສຈິ ຘາຕຸໂນ ອປ຺ປໂຍໂຄ ວິຎ຺ຎາປີຍຕີ’’ຕິ. ປກ຺ຂນ຺ຕຣມາຫ- ‘ຎາປກຕ຺ຕາເຍວ ວາ’ຕິອາທິ. ສມຕ຺ເຖຕິ ຕຖາຫິຈ຺ຈາທິນາ. ອສສ຺ສາປ຺ປໂຍໂຄຕິ ອສຘາຕຸສ຺ສ ກິສ຺ມິຎ຺ຈິ ຕພ຺ພາທິເກ ປຈ຺ຈເຍ ປເຣ ຠວິຕພ຺ພນ຺ຕິອາທີນມປ຺ປໂຍໂຄຕິ ອຕ຺ໂຖ.

ວິນາປິ ສຸຕ຺ຕນ຺ຕິ ‘‘ອຕ຺ຍາທີ’’ຕິອາທິກໍ ສຸຕ຺ຕໍ ວິນາປິ. ເອວໍ ມຎ຺ຎເຕ ‘‘ອສສ຺ສ ຠູອາເທເສນ ສາຘີຍມານໍ ສພ຺ພມິຏ຺ຐໍ ພຫຸລາຘິກາຣໂຕ ຠູຘາຕຸນາວ ສິຊ຺ຌຕິ ວິນາປິ ຠູອາເທສສຸຕ຺ຕນ຺ຕຣນ຺ຕິ ກຕ຺ຖຈິ ກສ຺ສຈິ ອປ຺ປໂຍຄສ຺ສ ຎາປກຕ຺ຕມ຺ປິສ຺ສ ຍຸຊ຺ຊຕິ ອຎ຺ຎຕ຺ຖ ກຣີຍມານມິຫາປິ ອຕ຺ຖວນ຺ຕໍ ສິຍາ’’ຕິ.

ເຍຕິ ຘາຕຸປ຺ປໂຍຄາ ຍສ຺ມິນ຺ຕິ ວິສເຍ, ປາຕິສ຺ສາຕິ ‘ປາ-ຣກ຺ຂເຓ’ຕີມສ຺ສ, ນປ຺ປໂຍໂຄ ປາຍຍຕິ ປາຍຍິຕພ຺ພນ຺ຕິອາທິປ຺ປໂຍໂຄ ນ ໂຫຕີຕິ. ເອວມຸປຣິປິ ຍຖາໂຍຄໍ ເຎຍ຺ຍໍ. ພ຺ຣູສ຺ສາຕິ ‘ພ຺ຣູ=ວຈເນ’ອິຈ຺ຈສ຺ສ. ອທິສ຺ສາຕິ ‘ອທ-ຠກ຺ຂເຓ’ອິຈ຺ຈສ຺ສ. ອີອາທີຕິ ຠູເຕ ອີອາທິ. ເອຕິສ຺ສ ຈ ອີອາທີສູຕິ ສມ຺ພນ຺ໂຘ.

ອວໂພເຘ ເອຕິສ຺ສ ຓິເສສຸ ຈ ອີອາທີສຸ ຈ, ອຊ຺ເຌເນ ເອຕິສ຺ສ ປໂຣກ຺ຂາສຸ ຈ ຓິເສສຸ ຈ ອີອາທີສຸຈາຕິ ໂຍເຊຕພ຺ພໍ. ສພ຺ພຕ຺ຖ ນປ຺ປໂຍໂຄຕິ ໂຍເຊຕ຺ວາ ອຕ຺ໂຖ ເວທິຕພ຺ໂພ. ພຫຸລໍວິຘານໂຕ ຎາຕພ຺ພາຕິ ໂຍຊນາ. ຍກ຺ວິກຣເຓນ ນິທ຺ເທສາ ‘ອສ-ກ຺ເຂປເນຕີ ມສ຺ສາ’ຕິ ວຸຕ຺ຕໍ, ຕທາຫ- ‘ອສສ຺ສາ’ຕິອາທິ.