໑໒. ຘາຕ຺ວາ

ອປຣິນິປ຺ຜນ຺ໂນຕິ ອນິປ຺ຜນ຺ໂນ ອສິທ຺ຘາວຕ຺ໂຖຕິ ອຕ຺ໂຖ. ກາຣກສາຘິໂຍຕິ ຍຖາລາຠໍ ກາຣເກຫິ ສາຘິໂຍ. ອສຕ຺ວຠູໂຕຕິ ອທພ຺ພຠູໂຕ. ອຍນ຺ຕຸ ກິຣິຍາຣູໂປ ປທຕ຺ໂຖ ປຈຕ຺ຍາທີນໍ ວິກ຺ເລທນາທິປຘານກິຣິຍາຣູໂປ ຈ ຕທວຍວຣູປາ ປຸພ຺ພປຣີຠູຕອຸທ຺ຘນາໂຣ ປນາທິກາທໂຍ ຕາທຕ຺ຖິຍາ ຈ ປຈຕ຺ຍາທິວຈນີຍາ. ຕສ຺ມາ ຍຖາ ວຸຕ຺ຕລກ຺ຂເຓ ຘາຕ຺ວຕ຺ເຖ ຘາຕຸໂຕ ວິຘີຍມາໂນ ຕ຺ຍາທິປ຺ປຈ຺ຈໂຍ ຕຖາຠູຕເມວ ວທຕີຕິ ເຠທາຠາວາ ອເຠທສງ຺ຂ຺ຍາເຍກວຈເນໂນຈ຺ຈເຕ, ‘ນ ພຫຸວຈເນນ, ເຕເນຕ຺ຖ ‘ຐີຍເຕ ເທວທຕ຺ເຕນ, ຐີຍເຕ ເທວທຕ຺ເຕຫີ’ຕິ ຠວຕິ. ນ ຍໂຕກຸໂຕຈີຕິອາທິນາ ຍໂຕ ຍຕ຺ຖ ນ ທິສ຺ສຕິ, ຕໂຕ ຕຕ຺ຖ ນ ໂຫຕີຕິ ທີເປຕິ. ຍໂຕ ຍຕ຺ຖ ວິຘິ, ສ ຕສ຺ສ ສມ຺ພນ຺ຘີ ຠວຕີຕິ ນາເມຫິ ວຈນີຍຕ຺ຖໂຕ-ຕ຺ຖນ຺ຕຣຠູໂຕ ໂຍຍໍ ຘາຕ຺ວຕ຺ໂຖ ກມາທີນມຕ຺ຖຠູໂຕ, ໂສ ສກຕ຺ໂຖຕິ ສກຕ຺ເຖເຍວາຍມິປ຺ປຈ຺ຈໂຍ ຈຸຣາທິຓິວິຍາຕິ ເວທິຕພ຺ໂພ.

ຕສ຺ສຈາຕິ ເອກາຣສ຺ສ ຈ. ອຖ ອຕິຫຕ຺ຖຍຕິຈ຺ຈາໂທ ປາທິວິສິຏ຺ເຐ ເອວ ຘາຕ຺ວຕ຺ເຖ ອິປ຺ປຈ຺ຈຍສ຺ສ ວິຘານາ ຕທຕ຺ຖວິຫິເຕເນວ ອິປ຺ປຈ຺ຈເຍນ ປາທິວິສິຏ຺ໂຐ ຘາຕ຺ວຕ຺ໂຖ ວຸຕ຺ໂຕ, ເຕນ ກິມຕ຺ໂຖ ອິປ຺ປຈ຺ຈຍນ຺ຕສ຺ສ ປາທິໂຍໂຄຈ຺ຈາສງ຺ກິຍ ປໂຍຊນມາຂ຺ຍາຕຸມາຫ- ‘ອຕິຫຕ຺ຖຍຕິ’ຈ຺ຈາທິ. ນ ສາມຕ຺ຖິຍນ຺ຕິ ສມຕ຺ຖຕາ ນຕ຺ຖີຕິ ອຕ຺ໂຖ.