໑໐. ສທ຺ທາ

ນນຸ ຈ ອສຕິ ສຸຕ຺ເຕ ທຸຕິຍາຄ຺ຄຫເຓ ທຸຕິຍນ຺ເຕຫິຈ຺ຈາຍໍ ວິເສໂສ ກຸໂຕ ລພ຺ຠເຕ ເຍນ ‘ສທ຺ທາທີຫິ ທຸຕິຍນ຺ເຕຫີ’ຕິ ວິວຣຓໍ ກຕນ຺ຕິ ສຈ຺ຈໍ, ຕຖາປິ ປຈ຺ຈຍວິຘິມ຺ຫິ ຍຸຕ຺ເຕປິ ປຎ຺ຈມິຍາ ນິທ຺ເທເສ ‘ສທ຺ທາທີນີ’ຕິ ທຸຕິຍາໂຍປາທານສາມຕ຺ຖິຍາ ຕຖາ ວິວຣຓໍ ກຕໍ.

ສພ຺ພຕ຺ຖາຕິ ‘‘ຕມຘີເຕ ຕໍ ຊານາຕິ ກຓິກາຈາ’’ໂທ (໔-໑໔) ສພ຺ພຕ຺ຖ. ກິຣິຍາວາຕ຺ຍວຘາຣເຓນ ຍໍ ພ຺ຍວຈ຺ຉິນ຺ນໍ, ຕມຸປທສ຺ເສນ຺ໂຕ ອາຫ- ‘ນ ກາເລ’ຈ຺ຈາທິ. ຍທີປິ ອຘີເຕຈ຺ຈາທີສຸ ວຕ຺ຕມານກາເລນ ກຕ຺ຕຸນາ ເອກວຈເນນ ຈ ນິທ຺ເທໂສ, ຕຖາປິ ເຕສມປ຺ປຘານຕ຺ຕາ ອຎ຺ຎສ຺ມິມ຺ປິ ຠູຕາທິເກ ກາເລ ກມ຺ມາໂທ ສາຘເນ ພຫຸວຈເນນ ຈ ປຈ຺ຈໂຍ ສິຍາ ເອເວຕິ ຠາໂວ.

ນນຸ ຈ ‘‘ຘາຕ຺ວຕ຺ເຖນາມສ຺ມີ’’ຕິ (໕-໑໒) ອິປ຺ປຈ຺ຈເຍ ປຕ຺ເຕ-ຍມາຣພ຺ຠເຕ ອສ຺ສປິ ຘາຕ຺ວຕ຺ເຖເຍວ ວິຘານໍ, ຕໂຕ ຈ ສທ຺ທາທີຫິ ຘາຕ຺ວຕ຺ເຖ ອິປ຺ປຈ຺ຈເຍນ ນ ຠວິຕພ຺ພໍ, ທິສ຺ສເຕ ຈ ອິປ຺ປຈ຺ຈຍປໂຍໂຄຈ຺ຈາສງ຺ກິຍ ‘ນາຍມິປ຺ປຈ຺ຈຍສ຺ສ ພາຘໂກ’ຕິ ປຏິປາເທຕຸມາຫ- ‘ຘູວໍ ກໂຣຕິ’ຈ຺ຈາທິ. ນານາຠິນ຺ນໍ ວາກ຺ຍໍ ນານາວາກ຺ຍໍ, ຕສ຺ສ ຠາເວນ, ເຕນ ຠິນ຺ນວາກ຺ຍຠາເວນາຍສ຺ສ ອິປ຺ປຈ຺ຈຍສ຺ສ ຈ ສມຸຈ຺ຈຍໂຕຕິ ອຕ຺ໂຖ. ‘‘ຘາຕ຺ວຕ຺ເຖນາມສ຺ມີ’’ຕ຺ເຍກໍ ວາກ຺ຍໍ, ‘‘ສທ຺ທາທີນິ ກໂຣຕ຺ຍ’’ປຣໍ. ເອຕານິ ທ຺ເວ ຠິນ຺ນວາກ຺ຍານິ- ‘ຘາຕ຺ວຕ຺ເຖ ນາມສ຺ມາ ອິປ຺ປຈ຺ຈໂຍ ຠວຕິ, ສທ຺ທາທີນິ ກໂຣຕິຈ຺ຈສ຺ມິໍ ອຕ຺ເຖ ອາໂຍ ຠວຕີ’ຕິ ປຈ຺ເຈກມາຂ຺ຍາຕາເປກ຺ຂາຍ ວາກ຺ຍປຣິສມຕ຺ຕິຍາ ຠິນ຺ນຕາ, ອຠິນ຺ເນ ຫິ ກິຣິຍາປເທກວາກ຺ຍຕາ, ຠິນ຺ເນຕຸ ນານາວາກ຺ຍຕາ, ນານາວາກ຺ເຍ ຈ ສຕິ ສມຸຈ຺ຈໂຍ. ນ ຫິ ສາມຎ຺ຎວິເສສຠາເວນ ວິຘານເມວ ພາຘາເຫຕຸ, ກິຎ຺ຈຣຫິ ເອກວາກ຺ຍຕາປິ, ຕໍ ຍຖາ-‘ພ຺ຣາຫ຺ມຓານໍ ທຘິ ທິຍ຺ຍຕໍ, ຕກ຺ກໍ ໂກຓ຺ຑຎ຺ຎາເຍ’ຕິ. ນານາວາກ຺ເຍ ຕຸ ສມຸຈ຺ຈໂຍ, ຕໍ ຍຖາ- ‘ພ຺ຣາຫ຺ມຓາ ໂຠຊີຍນ຺ຕຸ, ມາຒຣາຍ ວຕ຺ຖຍຸຄລໍ ທີຍຕູ’ຕິ ມາຒໂຣ ພ຺ຣາຫ຺ມຓຠາເວນ ໂຠຊີຍເຕ ວຕ຺ຖຍຸຄລຎ຺ຈ ລຠເຕ, ເຕໂນຊຸກໍ ວຸຕ຺ເຕນ ວຕ຺ຖຍຸຄລທາເນນ ສາມຎ຺ຎວຸຕ຺ຕໍ ໂຠຊນໍ ນ ພາຘີຍເຕ, ຕເຖຫາປິ ອຸຊຸກໍ ວິຫິເຕນາເຍນ ສາມຎ຺ຎວິຫິໂຕ ອິປ຺ປຈ຺ຈໂຍ ນ ພາຘີຍເຕ ລກ຺ຂິຍານຸໂຣເຘນ ສຕ຺ຖກາຣສ຺ສ ວາກ຺ຍ ເຠທາເຠໂທຕິ ນານວຏ຺ຐິຕິໂທໂສຕິ ມຎ຺ຎເຕ. ຕິມ຺ຫິ ເລ ຈ ສິທ຺ຘນ຺ຕິ ສມ຺ພນ຺ໂຘ.

ຍປ຺ປຈ຺ຈໂຍ ນ ວິຫິໂຕ ປາຓິນີອາທີຫິ ວິຍາຕິ ອຘິປ຺ປາໂຍ. ‘ຊລ ທລ- ທິຕ຺ຕິຍໍ’. ‘‘ມາໂນ’’ຕິ (໕-໖໕) ມາໂນ, ‘‘ກຕ຺ຕຣິ ໂລ’’ຕິ ‘‘ປໂຣກ຺ຂາຍໍ ເຈ’’ຕິ (໕-໗໐) ຈຄ຺ຄຫເຓນ ‘ທລ ທລ’ອິຕິທ຺ວິຕ຺ຕໍ ‘‘ໂລໂປນາທິພ຺ຍຎ຺ຊນສ຺ສ’’ (໕-໗໕) ‘‘ສຣມ຺ຫາ ທ຺ເວ’’ຕິ (໑-໓໔) ທສ຺ສລສ຺ສ ຈ ທ຺ວິຠາເວ ທທ຺ທລ຺ລມານາ. ຊລມານາຕິ ອຏ຺ຐກຖາວຈນໂຕຕິ ອິມິນາ ກິຣິຍາສມຠິຫາເຣ ຍປ຺ປຈ຺ຈຍາຠາວໍ ທສ຺ເສຕິ. ອິມິນາ ຈ ສກ຺ກເຕ ວິຍ ຠຸສາຠິກ຺ຂຎ຺ເຎປິ ກິຣິຍາສມຠິຫາໂຣ ກິຣິຍາປຣິວຕ຺ຕນໍ, ຕຎ຺ຈ ຍທາ ກິຣິຍມຎ຺ເຎນ ກຕ຺ຕພ຺ພມຎ຺ໂຎ ກໂຣຕິ, ເຕນ ກຕ຺ຕພ຺ພຎ຺ເຈຕໂຣ, ຕທາ ຠວຕີຕິ ວິຎ຺ເຎຍ຺ຍໍ. ‘‘ສາມຎ຺ຎວິຫິຕາ ວິຘໂຍ ປໂຍຄມນຸສຣນ຺ຕີ’’ຕິ ອິມິນາ ລກ຺ຂເຓນ ‘ທລ-ທິຕ຺ຕິຍ’ນ຺ຕິ ອິມສ຺ມາ ‘‘ມາໂນ’’ຕິ ສາມຎ຺ເຎນ ວິຫິໂຕ ມານປ຺ປຈ຺ຈໂຍ ຠຸສຕ຺ເຖ ອາຠິກ຺ຂຎ຺ເຎ ຈ ຠວິສ຺ສຕິ. ທທ຺ທລ຺ລ ມານາຕິ ເອຕ຺ຖ ຠຸສໍ ຊລມານາ, ປຸນປ຺ປຸນ ຊລມານາຕິ ຈ ອຕ຺ໂຖ ເວທິຕພ຺ໂພ.