໘໐. ທຓ຺ຑາ

ທ຺ເວ ໂຫນ຺ຕີຕິ ອິໂກ ອີເຈຕິ ທ຺ເວ ໂຫນ຺ຕິ, ເອກເມກໍວາຕິ ອຸຠິນ຺ນໍ. ວາສທ຺ໂທ ທ຺ເວ ໂຫນ຺ຕີຕິ ເອຕ຺ຖາປິ ທຏ຺ຐພ຺ໂພ. ອຸຕ຺ຕມີເຓວ ຘນາ ອິໂກຕິ ຄຓສຸຕ຺ຕໍ ວິວຣຕິ ‘ອຸຕ຺ຕມີເຓວາ’ຕິອາທິ. ເກເນຕ຺ຖ ສມາໂສຕິ ອາຫ- ‘ສ຺ຍາທິສ຺ຍາທິເນກຕ຺ຖນ຺ຕິ ສມາໂສ’ຕິ. ອຸຕ຺ຕມີໂຓ ຘນສາມີ. ອສນ຺ນິຫິເຕ ອຕ຺ຖາຕິ ຄຓສຸຕ຺ຕໍ, ອສນ຺ນິຫິເຕຕີມສ຺ສ ອຕ຺ຖໍ ວິວຣຕິ ‘ອປ຺ປຕ຺ເຕ’ຕິ. ອສມ຺ປຕ຺ເຕຕິ ອຕ຺ໂຖ. ອສນ຺ນິຫິເຕຕິ ຈ ອຕ຺ໂຖ ອິຈ຺ຈສ຺ສ ວິເສສນໍ. ອຕ຺ຖນໍ ອສນ຺ນິຫິເຕ ອຕ຺ເຖ ອາສິສນໍ ອຕ຺ໂຖ, ໂສ ອສ຺ສ ອຕ຺ຖີຕິ ອຕ຺ຖິໂກ ອຕ຺ຖີ. ຕທນ຺ຕາຈາຕິ ຄຓສຸຕ຺ຕໍ, ອສນ຺ນິຫິເຕຕ຺ຍນຸວຕ຺ຕເຕ, ອສນ຺ນິຫິໂຕປາຘິກາ ອຕ຺ຖນ຺ຕາ ຈ ອິກ ອີປ຺ປຈ຺ຈໂຍ ຠວຕີຕ຺ຍຕ຺ໂຖ. ວຓ຺ຓນ຺ຕາອີເຍວາຕິ ຄຓສຸຕ຺ຕໍ, ພ຺ຣຫ຺ມານໍ ເທວານໍ ວຓ຺ໂຓຕິ ວາ ສມາໂສ. ຫຕ຺ຖທນ຺ເຕຫິ ຊາຕິຍນ຺ຕິ ຄຓສຸຕ຺ຕໍ.

ຊາຕິຍນ຺ຕິ ປຈ຺ຈຍວິເສສນໍ. ວຓ຺ຓໂຕ ພ຺ຣຫ຺ມຈາຣິມ຺ຫີຕິ ຄຓສຸຕ຺ຕໍ. ພ຺ຣຫ຺ມສທ຺ເທນ ນິຍມວິເສໂສ ວຸຈ຺ຈຕິຈ຺ຈາຫ-‘ວິຊ຺ເຊ’ຈ຺ຈາທິ. ຕສ຺ມິຎ຺ຈນິຍມວິເສສຈຣເຓ ຕິຓ຺ຓໍ ພ຺ຣາຫ຺ມຓາທີນເມວາຘິກາໂຣ, ນສຸທ຺ທສ຺ສາຕິ ທສ຺ເສນ຺ໂຕ ອາຫ- ‘ຕຎ຺ເຈ’ຈ຺ຈາທິ. ເຕວຓ຺ຓິໂກ ວຓ຺ຓີຕິ ວຸຈ຺ຈຕີຕິ ສມ຺ພນ຺ໂຘ. ຕີສຸ ວຓ຺ເຓສຸ ຠໂວ ຕທນ຺ໂຕຄຘຕ຺ຕາ ເຕວຓ຺ຓິໂກຕິ ຠວຕ຺ເຖ ຓິໂກ. ວຓ຺ຓສທ຺ໂທ ພ຺ຣາຫ຺ມຓາທິວຓ຺ຓວຈໂນ. ຕຕ຺ຣ ພ຺ຣຫ຺ມຈາຣິມ຺ຫິຕ຺ຍເນນ ສຸທ຺ໂທ ພ຺ຍວຈ຺ຉິຊ຺ຊເຕ.

ອຖວາ ພ຺ຣຫ຺ມນ຺ຕິ ນິພ຺ພານໍ ຕທຕ຺ໂຖ ຄນ຺ໂຖປິ, ຕໍ ພ຺ຣຫ຺ມໍ ນິພ຺ພານໍ ຘມ຺ມໍ ວາ ເຕປິຏກໍ ຈຣຕີຕິ ພ຺ຣຫ຺ມຈາຣີ, ຍຕິ. ຍຕໂຍປິ ຫິ ວຓ຺ຓີຕິ ພ຺ຣຫ຺ມຈາຣິໂນຕິ ວຸຈ຺ຈນ຺ຕິ. ວຓ຺ຓີລິງ຺ຄີຕິ ຫິ ວຸຕ຺ເຕ ຕິລິງ຺ຄວາຕິ ອຕ຺ໂຖ. ວຓ຺ຓ ສທ຺ໂທ ປເນຕ຺ຖ ຍຖາວຸຕ຺ຕ ພ຺ຣຫ຺ມປຣິຍາໂຍ. ໂປກ຺ຂຣາທິໂຕ ເທເສຕິ ຄຓສຸຕ຺ຕໍ. ເທໂສ ເຈຕ຺ຖ ຍຕ຺ຖ(ຕ຺ຖິ ໂປກ຺ຂຣາທີນິ ໂສ). ປທຸມຄຈ຺ຉ ໂປກ຺ຂຣຓີນໍ ວາຈກສ຺ສາຕິ ອິມິນາ ປທຸມານິ ອສ຺ສໍ ສນ຺ຕີຕິ ປທຸມິນີຕິ ໂປກ຺ຂຣຓີປິ ວຸຈ຺ຈຕີຕິ ທສ຺ເສຕິ. ນາວາ ອຕ຺ຖີຕິ ນາວິໂກ, ຍາຄເມ ນາວາຍິໂກ. ສຸຂທຸກ຺ຂາ ອີ, ພລາ ພາຫູຣຸປຸພ຺ພາ ເຈຕິ ຈ ຄຓສຸຕ຺ຕານິ.