໗໘. ຕເມ

ອິຕິສທ຺ເທນ ພ຺ຍວຈ຺ຉິນ຺ນມຕ຺ຖມຸປທສ຺ສຍມຎ຺ຎນາເປກ຺ຂໍ ສປ຺ປຘານໍ ມນ຺ຕ຺ວາທິ ວິຘິມ຺ຫິທມຕ຺ຖທ຺ວຍໍ ພ຺ຍາປາຣີຍຕິຈ຺ຈາຫ-‘ເອຕ຺ຖ ອສ຺ສ ອຕ຺ຖີ’ຕິ. ນນຸ ຈ ຍໍ ຍສ຺ສ ໂຫຕິ ຕໍ ຕສ຺ມິມ຺ປິ ໂຫຕິ (ຍໍ ຍສ຺ມິໍ ໂຫຕິ) ຕສ຺ສາປິ ຕໍ ໂຫຕິ ເຕເນວ ວຸຈ຺ຈເຕ- ‘ຉຏ຺ຐີສຕ຺ຕມີນມວິເສໂສ’ຕິ, ຕຕ຺ຣຎ຺ຎ ຕຣນິທ຺ເທເສເນວ ສິທ຺ເຘ ກິມຕ຺ຖມິຫ ຉຏ຺ຐີສຕ຺ຕມີນໍ ເຠເທໂນປາທານໍ ກຣີຍຕີຕິ ວຸຈ຺ຈເຕ-ຍຕ຺ຣາວຍວາວຍວິຠາໂວ, ຕຕ຺ເຖວ ຉຏ຺ຐີສຕ຺ຕມີນມຕ຺ຖສ຺ສ ອວິເສໂສ [ວຕ຺ຖຸໂຕ (ໂປຕ຺ຖເກ)] ຍຖາ ‘ຣຸກ຺ເຂສາຂາ ຣຸກ຺ຂສ຺ສ ສາຂາ’ຕິ. ສສ຺ສາມິຠາວຊຎ຺ຎຊນກຠາວາໂທ ຕຸ ນາວສ຺ສມາຘາຣາເຘຍ຺ຍຠາໂວຕິ ທ຺ວິນ຺ນເມວຕ຺ຖານມຸປາທານນ຺ຕິ.

ນນຸ ຈ ສມ຺ຠເວ ພ຺ຍຠິຈາເຣ ຈ ສຕິ ວິເສສນໍ ສາຕ຺ຖກໍ ຠວຕິ ຍຖາ ‘ນີລມຸປ຺ປລ’ນ຺ຕິ, ເນວາຕ຺ຖິຕ຺ຕສ຺ສາຕ຺ຖິ ພ຺ຍຠິຈາໂຣ, ຕຖາ ຈ ວຸຕ຺ຕໍ- ‘ນ ສຕ຺ຕໍ ປທຕ຺ໂຖ ພ຺ຍຠິຈຣຕີ’ຕິ, ຕສ຺ມາ ພ຺ຍເວຈ຺ເຉຊ຺ຊາຠາວາ ນິຣຕ຺ຖກມຕ຺ຖີຕິວິເສສນນ຺ຕ຺ຍາຫ- ‘ປທຕ຺ຖສ຺ເສ’ຈ຺ຈາທິ. ສຕ຺ຕາຍໍ ອພ຺ຍຠິຈາເຣ ປີຕິ ສມ຺ພນ຺ໂຘ. ກາລນ຺ຕຣາ ພ຺ຍຠິຈາຣຕ຺ຖມຕ຺ຖີຕິວິເສສນນ຺ຕິ ທສ຺ເສຕຸມາຫ- ‘ກາເລ’ຈ຺ຈາທິ.

ນນຸ ຈ ສຸຕ຺ເຕສຸ ກາໂລ ປຘານໍ ນ ໂຫຕິ, ‘‘ເຕນ ກຕໍ ກີຕໍ’’ຕ຺ຍາທິນາ ຫິ ປຈ຺ຈຍຕ຺ໂຖ ທສ຺ສິໂຕ, ຕຖາ ຫິ ກາຍິກໍວາຈສິກໍ ຕ຺ຍາໂທ ນ ກາລສມ຺ປຈ຺ຈໂຍ, ເອວມິຫາປິ ສຕ຺ຕາມຕ຺ເຕ ຠວິຕພ຺ພໍ, ອຕ຺ຖີຕິ ຕຸ ວຕ຺ຕມານສຕ຺ຕາຍ ເອວ ປຣິຄ຺ຄໂຫ ກຖມວສີຍເຕ ເຍນ ກາລວິເສສນໍ ສິຍາຕິ. ສຈ຺ຈໍ, ກິນ຺ຕຸ ປທຕ຺ຖສ຺ສ ສຕ຺ຕາພ຺ຍຠິຈາຣາຠາເວປິ ອຕ຺ຖີຕິວິເສສໂນປາທານສາມຕ຺ຖິຍາຕ຺ຣ ວິສິຏ຺ໂຐ ສຕ຺ຕາ ອຕ຺ຖີຕິ ວິເສສນຕ຺ເຕໂນປາຕ຺ຕາ, ນ ສຕ຺ຕາມຕ຺ຕນ຺ຕິ ປຕີຍເຕ, ສາ ປນ ວິສິຏ຺ຐາ ສຕ຺ຕາ ສມ຺ປຕິສຕ຺ຕາ, ອຕ຺ຖິ ຈ ຕສ຺ສາ ພ຺ຍຠິຈາໂຣ ສາມຎ຺ຎສຕ຺ຕາຍາຕິ ຍຸຊ຺ຊເຕວ ວິເສສນວິເສສ຺ສຠາໂວຕິ ມຎ຺ຎເຕ. ອຸປາຘີຕິ ວິເສສນໍ.

ນ ຠຸຎ຺ຊຕິຈ຺ຈາທິວິຍາຕິ ຍຖາ ນ ຠຸຎ຺ຊຕີຕິ ນຎ຺ສ຺ສ ປຏິເສຘຕ຺ຕາ ວິຣຸທ຺ຘຕ຺ຖປທສ຺ສ ສນ຺ນິຘາເນ-ຕ຺ຖນ຺ຕຣສ຺ສ ປຏິເສຘຣູປສ຺ສຕ຺ຖສ຺ສາວຄຕິ ປທນິພນ຺ຘນສ຺ສ ວິຘິໂນ ອພາຘິກາ ຠວຕິ, ຕມິວາກ຺ຍຕ຺ໂຖ. ອຘິປ຺ປາຍຕ຺ຖ ມາຫ- ‘ອຕ຺ຖິວຈນິຈ຺ຉາຍ ໂຍ ວິສໂຍ ຕສ຺ສ ນິຍໂມ’ຕິ. ກຕິ ປຍສມ຺ຠເວ ນ ປນ ໂຄມາ ຣຸກ຺ຂວາຕິ ໂຍຊນາ, ເຕຫີຕິ ປສໍສາປຫູເຕຫິ. ກກຸເທ ອາວຕ຺ໂຕ ກກຸທາວຕ຺ໂຕ, ນິນ຺ທິໂຕ ກກຸທາວຕ຺ໂຕ ອສ຺ສ ອຕ຺ຖີຕິ ກກຸທາວຕ຺ຕີ. ກຖໍ ນິນ຺ທິຕຕ຺ຕມສ຺ສິຈ຺ຈາຫ-‘ກກຸທາ ວຕ຺ໂຕ’ຈ຺ຈາທິ. ສໍສຕ຺ໂຕ ທຓ຺ໂຑ ອສ຺ສ ອຕ຺ຖິຈ຺ຈເນນ ເຄຫຏ຺ຐິເຕນ ວິຊ຺ຊມາເນນປິ ທຓ຺ເຑນ ທຓ຺ຑີຕິ ນາຠິຘີຍຕີຕິ ວທຕິ. ທພ຺ເພຠິເຘຍ຺ເຍຕິ ຊາຕິສນ຺ນິສ຺ສຍໂຄປິຓ຺ຑອສ຺ສປິຓ຺ຑາທິສງ຺ຂາເຕ ທພ຺ເພ-ຠິເຘຍ຺ເຍ, ຠວໍ ຠເວຍ຺ຍາຕິ ຍທາກທາຈິ ຠວນ຺ໂຕ ຍທິ ຠເວຍ຺ຍ.