໑໒໕. ສໍໂຍ

ອນ຺ຕຣສທ຺ໂທ-ເນກຕ຺ໂຖປີຫານ຺ຕຣາຬວາຈີ ມຊ຺ຌວາຈີ ຄຍ຺ຫຕິ, ນ ວິຊ຺ຊເຕນ຺ຕຣເມສນ຺ຕິ ອນ຺ຕຣາຬມຕ຺ຕປຏິເສເຘປໂຍຊນໍ ນຕ຺ຖີຕິ ກຕ຺ວານ຺ຕຣາ ຬຏ຺ຐສ຺ສາຠາວານ຺ຕຣາຬໍ ນຕ຺ຖີຕ຺ຍຸປຈຣີຍຕິ, ເອວຎ຺ຫິ ໂລເກ ປຍຸຊ຺ຊເຕ ‘ອນນ຺ຕຣາ ອິເມ ຄາມາ ອນນ຺ຕຣາ ອິເມ ປາສາທາ’ຕິ ອນ຺ຕຣາຬຄຕສ຺ສ ຎ຺ຎສ຺ສ ຄາມສ຺ສຎ຺ຎສ຺ສ ປາສາທສ຺ສ ວາຠາວາ ຕຖາ ພ຺ຍປທິສີຍເຕ, ຕເຖວມິຫາປ຺ຍນ຺ຕຣາຬຄຕສ຺ສຎ຺ຎສ຺ສ ພ຺ຍຎ຺ຊນສ຺ສາຠາວາ ອນນ຺ຕຣາ ອິຕ຺ຍຸຈ຺ຈນ຺ເຕ, ອຖວານ຺ຕຣສທ຺ໂທ ພ຺ຍວຘານວາຈີ ພ຺ຍວຘານາຠາວໂຕ-ນນ຺ຕຣາ ອິຕິ ວຸຈ຺ຈນ຺ເຕ. ອນ຺ຕຣໍ ກໂຣຕີຕິ ວາ ຂາທິອິປ຺ປຈ຺ຈຍໍ [ຓິປ຺ປຈ຺ຈຍໍ (ໂປຕ຺ຖເກ)] ວິຘາຍ ອນ຺ຕຣາຍຕິ ພ຺ຍວຘານໍ ກໂຣຕີຕິ ກຕ຺ຕຣິ ອປ຺ປຈ຺ຈຍໍ ວິຘາຍ ອນ຺ຕໂຣ ພ຺ຍວຘາຍໂກ ນຕ຺ເຖເຕສນ຺ຕິ ອນນ຺ຕຣາ. ຍຖາ ‘ຣຸກ຺ຂາ ວນນ຺ເຕ’ຕ຺ຖ ຣຸກ຺ຂາ ສມຸທິຕາເວກວນພ຺ຍປເທສໍ ລຠນ຺ເຕ, ຕຖາຕ຺ຣາປິ ພ຺ຍຎ຺ຊນາ ສມຸທິຕາເວເຕ ສໍໂຍຄພ຺ຍປເທສໂຄຈຣຕ຺ຕໍ ປຏິປຊ຺ຊນ຺ເຕ.

ສໍໂຍໂຄຕິ ຫິ ສມຸທາຍປ຺ປຘາໂນ ນິທ຺ເທໂສ ພ຺ຍຎ຺ຊນາຕ຺ຍວຍວປ຺ປຘາໂນ, ຕສ຺ມາ ພ຺ຍຎ຺ຊນາຕິ ພຫຸວຈເນນ ສໍໂຍໂຄຕິ ເອກວຈນນິທ຺ເທໂສ ຆຏເຕ, ນນຸ ຈ ວຓ຺ຓານມຸຈ຺ຈາຣິຕປ຺ປຘໍສິຕ຺ຕາ ໂຍຄປຊ຺ຊມຏ຺ຐິຕມານານໍ ນ ສມ຺ຠວຕິ ສມຸທາຍຕ຺ຕນ຺ຕິ ສມຸທາຍຕ຺ຕມຍຸຕ຺ຕນ຺ຕິ ນາຍຸຕ຺ຕໍ, ຕຖາຫິ ອຸຕ຺ຕຣຸຕ຺ຕຣຄ຺ຄາຫິນິ ພຸທ຺ຘິ ປຸພ຺ພປຣີຠູເຕ ພ຺ຍຎ຺ຊນາວຍເວ ສມຸທາຍຣູເປນ ສງ຺ກປ຺ເປນ຺ຕີ ສມຸທາຍໂວຫາຣມ຺ປວຕ຺ຕຍີຕິ.

ຓານຸພນ຺ເຘຕິ ທິຕິສທ຺ທສ຺ສ ສໍໂຍຄາວິສຍຕ຺ຕາ ເທຈ຺ໂຈຕິ ‘ສຣານມາທິສ຺ສາ’ຕິ ວິສໂຍ, ອຸຬຸມ຺ປສທ຺ທສ຺ສ ສໍໂຍຄວິສຍຕ຺ຕາ ໂອຬຸມ຺ປິໂກຕິ ເອຕສ຺ສ ວິສໂຍຕິ ຕຕ຺ຖ ຣາຆໂວ ເວນເຕຍ຺ໂຍ ເມນິໂກ ເທຈ຺ໂຈ ໂທສຄ຺ຄານ຺ຕິ ຣູປານິ. ອິຘ ຕຸ ໂອຬຸມ຺ປິໂກ ໂກຓ຺ຑຎ຺ໂຎຕິ ຍຸຊ຺ຊນ຺ຕິ. ເຕເນວ ຈ ຕຕ຺ຖ ປຎ຺ຈິກາ ເອຕ຺ຖ, ເອຕ຺ຖ ຈ ປຎ຺ຈິກາ ຕຕ຺ຖ ອຸປເນຕພ຺ພາຕິ.